சென்னை, நவ.1: தமிழகத்தில் உள்ள இலங்கை அகதிகள் மறுவாழ்வுக்கு நிதி ஒதுக்குவது தொடர்பாக முதல்வர் கருணாநிதி திங்கள்கிழமை (நவ. 2) அவசர ஆலோசனை நடத்துகிறார். சம்பந்தப்பட்ட அமைச்சர்கள் மற்றும் அதிகாரிகளுடன் நடத்தப்படும் இந்த ஆலோசனை குறித்து, முதல்வர் கருணாநிதி ஞாயிற்றுக்கிழமை வெளியிட்ட அறிக்கை: இலங்கையில் முள்வேலி முகாம்களுக்குள் அவதிப்பட்டு வந்த தமிழ் அகதிகளை விடுவிப்பதற்காக, தமிழகத்திலிருந்து திமுக, காங்கிரஸ், விடுதலைச் சிறுத்தைகள் ஆகிய கட்சிகளைச் சேர்ந்த நாடாளுமன்ற உறுப்பினர்கள் இலங்கை சென்று முயற்சி மேற்கொண்டனர். இந்த முயற்சி மூலம் முள்வேலி முகாம்களில் அடைபட்டிருந்த 3 லட்சம் பேர்களில், ஒரு லட்சம் தமிழர்கள் அவர்களுடைய சொந்த இடங்களுக்குச் செல்வதற்கு வழி ஏற்பட்டுள்ளது. மீதமுள்ளவர்களும் நல்வாழ்வு பெற்றிட, இந்திய அரசு முயற்சி எடுக்கவேண்டும். அதற்கு முன் தமிழகத்தில் அகதிகளாக வந்து சேர்ந்திருக்கும் இலங்கைத் தமிழர்களுக்கு, அடிப்படை ஆதாரங்கள், வசதிகளை உடனடியாக செய்து தரவேண்டியது நமது கடமை. இதற்காக சம்பந்தப்பட்ட அமைச்சர்கள், அதிகாரிகளுடன் தலைமைச் செயலகத்தில் திங்கள்கிழமை காலை 10 மணிக்கு ஆலோசனை நடத்த முடிவு செய்யப்பட்டுள்ளது. இந்த ஆலோசனை கூட்டத்தின் மூலம் தேவையான நிதி ஒதுக்கி, இலங்கை அகதிகளின் தேவைகள் அனைத்தும் நிறைவு செய்யப்படும் என்று முதல்வர் தெரிவித்துள்ளார்.
By Ilakkuvanar Thiruvalluvan
11/2/2009 3:02:00 AM
By Thamizhan
11/2/2009 3:01:00 AM
By வாடா மன்னாரு
11/2/2009 2:15:00 AM
By மு. கருணாநிதி
11/2/2009 12:26:00 AM
உங்கள் கருத்தைப் பதிவு செய்யுங்கள்
*
