சென்னை, பிப்.3: தமிழக முன்னாள் முதல்வர் அண்ணாவின் 41}வது நினைவு தினத்தை முன்னிட்டு செவ்வாய்க்கிழமை பல்வேறு அரசியல் கட்சிகளைச் சேர்ந்த தலைவர்கள் சென்னை மெரினாவிலுள்ள அவரது நினைவிடத்தில் அஞ்சலி செலுத்தினர்.தி.மு.க. சார்பில் முதல்வர் கருணாநிதி தலைமையில் சேப்பாக்கம் விருந்தினர் மாளிகை எதிரிலிருந்து புறப்பட்ட அமைதிப் பேரணி, அண்ணா நினைவிடத்தில் முடிவடைந்தது. அங்கு முதல்வர் கருணாநிதி, துணை முதல்வர் மு.க. ஸ்டாலின், நிதியமைச்சர் க. அன்பழகன் மற்றும் மத்திய, மாநில அமைச்சர்கள், தி.மு.க. நிர்வாகிகள் மலர் அஞ்சலி செலுத்தினர்.அ.தி.மு.க.: அ.தி.மு.க. சார்பில் அக்கட்சியின் அவைத் தலைவர் இ. மதுசூதனன் மற்றும் ஓ. பன்னீர்செல்வம், சி. பொன்னையன், டி. ஜெயக்குமார், மு. தம்பிதுரை, கே.ஏ. செங்கோட்டையன், மைத்ரேயன் உள்ளிட்ட தலைமைக் கழக நிர்வாகிகள் அண்ணாவின் நினைவிடத்தில் மலர் வளையம் வைத்து அஞ்சலி செலுத்தினர்.மேலும் ம.தி.மு.க. பொதுச் செயலாளர் வைகோ, திராவிடர் கழகத் தலைவர் கி. வீரமணி, எம்.ஜி.ஆர். கழகத் தலைவர் ஆர்.எம். வீரப்பன், நீதிக் கட்சித் தலைவர் ஏ.சி. சண்முகம் உள்ளிட்டோர் அண்ணா நினைவிடத்தில் அஞ்சலி செலுத்தினர்.தே.மு.தி.க. தலைவர் விஜயகாந்த் கோயம்பேட்டில் உள்ள அக்கட்சித் தலைமை அலுவலகத்தில் வைக்கப்பட்டிருந்த அண்ணாவின் படத்துக்கு மலர் மாலை அணிவித்து மரியாதை செலுத்தினார்.
உங்கள் கருத்தைப் பதிவு செய்யுங்கள் *
