சென்னை, மார்ச், 28: ஊதியம் வழங்கப்படாத நிலையில், தமிழகத்தின் கலை-பண்பாட்டை வளர்க்கும் பணியில் ஈடுபட்டுள்ள நூற்றுக்கணக்கான ஆசிரியர்கள் வறுமையில் வாடி வருகின்றனர்.இதனால், ஏழை}எளிய மாணவர்கள் பயன் பெற்று வரும் தமிழக அரசின் சிறப்பான திட்டம் முடங்கும் நிலையில் உள்ளது.கலை-பண்பாட்டுத் துறையின் சார்பில், தமிழகத்தின் பாரம்பரிய கலைகளை பள்ளி மாணவர்களுக்குக் கற்றுத் தரும் திட்டம் கடந்த 11 ஆண்டுகளுக்கு முன்பு தொடங்கப்பட்டது.அதன்படி, ஓவியம், நாட்டியம், வாய்ப்பாட்டு, கராத்தே ஆகிய கலைகள் 4 வயது முதல் 16 வயது வரையிலான பள்ளி மாணவர்களுக்கு கற்றுத் தரப்படுகிறது. மாவட்டந்தோறும் இந்தக் கலைகள் கற்றுக் கொடுக்கப்படுகின்றன.ஏழை மாணவர்கள்:ஒவ்வொரு கல்வியாண்டு தொடங்கும் போதும், இந்தக் கலைகளை கற்றுத் தருவது குறித்த அறிவிப்பை மாவட்ட நிர்வாகங்கள் வெளியிடும்.சம்பந்தப்பட்ட பள்ளிகளைச் சேர்ந்த மாணவர்கள் தங்கள் பெயர்களை பதிவு செய்வர். அதன்பின், ஜூன் மாதம் முதல் கல்வியாண்டு முழுவதும் சனி மற்றும் ஞாயிற்றுக்கிழமைகளில் இந்தப் பயிற்சி அளிக்கப்படும்.ஒவ்வொரு நாளும் 2 முதல் 3 மணி நேரம் வரை மாணவர்களுக்கு பயிற்சி அளிக்கப்படும். ஒரு மாணவர் குறைந்தபட்சம் 2 கலைகள் வரை கற்றுக் கொள்ளலாம். அரசின் இந்த சிறப்பான திட்டத்தின் மூலம், அரசு மற்றும் அரசு உதவி பெறும் பள்ளிகளைச் சேர்ந்த ஏராளமான மாணவர்கள் பலன் பெற்று வருகின்றனர்.ஒவ்வொரு கலைக்கும் ஒரு ஆசிரியர் வீதம் மொத்தம் 4 பேரும், இதைக் கண்காணிக்க ஒரு மேற்பார்வையாளரும் மாவட்டந்தோறும் நியமிக்கப்பட்டுள்ளனர். மாவட்ட ஆட்சியரின் நேரடிக் கண்காணிப்பில் இந்தத் திட்டம் செயல்படுத்தப்பட்டு வருகிறது. ஆண்டுக்கு ரூ.65 மட்டும் மாணவர்களிடம் இருந்து கட்டணமாக வசூலிக்கப்படுகிறது.ரூ.300 மட்டுமே ஊதியம்:மாணவர்கள் மகிழ்ச்சியுடன் தமிழகத்தின் பாரம்பரிய கலைகளை கற்றுக் கொண்டாலும், அதை கற்றுத் தரும் ஆசிரியர்கள் துன்பத்தின் விளிம்பில் உள்ளனர்.''11 ஆண்டுகளுக்கு முன்பு இந்தத் திட்டம் தொடங்கும் போது, ஆசிரியர்களுக்கு மதிப்பூதியமாக மாதத்துக்கு ரூ.300 வழங்கப்படும் என அறிவிக்கப்பட்டது. நாளடைவில் இந்தத் தொகை 6 மாதங்களுக்கு ஒருமுறை என சேர்த்து வழங்கப்பட்டது. கடந்த ஓரண்டாக இந்தத் தொகையும் அளிக்கப்படவில்லை. இதனால், ஆசிரியர்கள் பலரும் தமிழக அரசின் இந்தத் திட்டத்தில் இருந்து விலகி வருகின்றனர். குறைந்த ஊதியம் கிடைத்தாலும் ஏற்றுக் கொண்டு தனியார் பள்ளிகளில் பணிபுரிந்து வருகின்றனர்'' என்று கூறுகின்றனர் பெயர் குறிப்பிட விரும்பாத ஆசிரியர்கள்.முடங்கிப் போகும் நிலை:ஊதியம் வழங்காத நிலையில், ஒவ்வொரு மாவட்டத்திலும் அந்தத் திட்டம் முடங்கும் சூழல் உருவாகியுள்ளதாக ஆசிரியர்கள் தெரிவிக்கின்றனர்.செம்மொழி மாநாட்டை தமிழக அரசு நடத்த இருக்கிறது. இந்தச் சூழலில், தமிழகத்தின் கலை-பண்பாட்டை பள்ளி மாணவர்களுக்கு கற்றுத் தரும் ஆசிரியர்களுக்கு நியாயமான ஊதியத்தை வழங்க வேண்டும் என்று அவர்கள் கோரிக்கை விடுத்துள்ளனர்.
கருத்துகள் இல்லை:
கருத்துரையிடுக