சாதனை லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
சாதனை லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

ஞாயிறு, 6 அக்டோபர், 2013

பதனீரில் இருந்து புதிய வகை சருக்கரை : மாணவிகள் அருந்திறல்

தமிழில் பெயர் வைக்கத் தெரியவில்லையா? இப்பொழுது உள்ள பனஞ்சீனிக்கும் இதற்கும் என்ன வேறுபாடு? ஒருவேளை இவர்கள் கண்டுபிடித்தது பனஞ்சீனியை விரைவில்  உருவாக்கும் முறையாக இருக்கலாம். அன்புடன் இலக்குவனார் திருவள்ளுவன் /தமிழே விழி! தமிழா விழி!எழுத்தைக்காப்போம்! மொழியைக் காப்போம்! இனத்தைக் காப்போம்!/
+++++++++++++++++++++++++++++++++++++++++++++++++++++++++++++++++++++++++


http://img.dinamalar.com/data/largenew/Tamil_News_large_82014420131006011154.jpg

பதனீரில் இருந்து புதிய வகை சர்க்கரை கண்டுபிடிப்பு: கீழக்கரை கல்லூரி மாணவிகள் சாதனை


கீழக்கரை:  இராமநாதபுரம் மாவட்டம் கீழக்கரை தாசிம்பீவி அப்துல்காதர் மகளிர் கல்லூரி மனையியல் துறை மாணவிகள், பதனீரிலிருந்து "பாம் சுகர்' என்ற, புதிய வகை சர்க்கரையை, கண்டு பிடித்துள்ளனர்.

ராமநாதபுரம் மாவட்டத்தில், பனை மரங்களை வெட்டி, விறகாக பயன்படுத்துவது அதிகரித்து வருகிறது. பனைத்தொழிலுக்கு புத்துயிரூட்டும் முயற்சியாக, பதனீரில் இருந்து சர்க்கரை தயாரிக்கும் ஆராய்ச்சியை மேற்கொண்ட, கீழக்கரை தாசீம்பீவி அப்துல் காதர் மகளிர் கல்லூரி மனையியல் பிரிவு மாணவிகள், அதில் வெற்றி கண்டுள்ளனர்.

கல்லூரி முதல்வர் சுமையா கூறியதாவது: பதனீரிலிருந்து தயாரிக்கப்படும் பனங்கற்கண்டு முழு நிலையை அடைய, 30 முதல் 40 நாட்கள் வரை ஆகிறது. இதனால் இத்தொழிலில், மக்கள் ஆர்வம் காட்டவில்லை. வருமானக்குறைவால், பனை மரங்கள் வெட்டி சாய்க்கப்படுகிறது. இயற்கையை காக்கும் நோக்கத்துடன், கிராமப்புற மக்களின் வாழ்வாதாரம் உயரும் வகையில், எங்கள் கல்லூரி மனையியல் துறை மாணவிகள், புதிய தொழில் நுட்பத்தில் உடலுக்கு தீங்கு விளைவிக்காதபடி, பதனீரிலிருந்து "பாம் சுகர்' என்ற சர்க்கரையை (பவுடர் போல உள்ளது) கண்டு பிடித்துள்ளனர். இயற்கையான பச்சை தாவர தண்டுகள், இலைகளை, பதனீரில் போட்டு, கெடாத வகையில், இயந்திரத்தின் உதவியுடன் ஒரு மணி நேரத்தில் குறிப்பிட்ட அளவு "பாம் சுகர்' தயாரிக்க முடியும். இதை தயாரிப்பது குறித்து, கிராம மக்களுக்கு பயிற்சி அளித்தால், பலருக்கும் வேலை வாய்ப்பு கிடைக்கும். மக்களின் பொருளாதார நிலை உயரும். வெளிநாடுகளில் நல்ல வரவேற்பு இருக்கும். அன்னியச் செலாவணி அதிகரிக்கும். எங்களது ஆய்வுக்காக, 75 லிட்டர் பதனீரில், 3 கிலோ "பாம் சுகர்' தயாரிக்கும் அளவில், இயந்திரம் தயாரித்துள்ளோம். இதற்கு 5.25 லட்சம் ரூபாய் செலவானது. இதை, பெரிய அளவிலும் செய்ய முடியும். பால் கூட்டுறவு சங்கத்தை போல், பதனீருக்கும் கூட்டுறவு சங்கம் ஏற்படுத்தி, இந்த திட்டத்தை செயல்படுத்த, அரசு முன்வர வேண்டும், என்றார்.
 +++++++++++++++++++++++++++++++++++++++++++++
பனை வெல்லக் கூட்டுறவுச் சங்கம் இப்பொழுதும் உள்ளது. பதநீர் விற்பனைக்கும் பனம்பொருள் விற்பனைக்கும்  அரசு சார் நிறுவனங்களும் கூட்டுறவு அமைப்புகளும் உள்ளன. இவர்கள் பிறரின் திட்டத்தைப் பார்த்து உருவாக்கவில்லை எனில், அரசுசார் அமைப்பின் மூலமே முயலலாம். பால் கூட்டுறவுச் சங்கம் இருப்பதை அறிந்த இவர்கள் இதனை அறியாததால்  இப்போதைய பனஞ்சீனியை முற்றிலும் அறியாமல் கருத்து தெரிவிக்கிறார்கள் என எண்ணுகிறேன். அன்புடன் இலக்குவனார் திருவள்ளுவன் /தமிழே விழி! தமிழா விழி!எழுத்தைக்காப்போம்! மொழியைக் காப்போம்! இனத்தைக் காப்போம்!/

வெள்ளி, 4 அக்டோபர், 2013

வான்பயணவியலில் அருவினை

http://img.dinamalar.com/data/largenew/Tamil_News_large_818720.jpg


ஏவியானிக்சில் உலக ச் சாதனை

உலகிலேயே மிக ச் சிறந்த, குட்டி உளவு விமானத்தை க் கண்டுபிடித்த தமிழன், செந்தில் குமார்: நான், சென்னையில் உள்ள, எம்.ஐ.டி., பொறியியல் கல்லுாரியில், இணை பேராசிரியராக பணியாற்றுகிறேன். ஏவியானிக்ஸ் எனும், வான் பயண மின்னணுவியலில் ஆர்வமுள்ள மாணவர்களை ஒன்றிணைக்கும் விதமாக, தக்ஷா என்ற குழுவை, கல்லுாரியில் உருவாக்கினோம்.இக்குழுவில்உள்ள மாணவர்களின், பல நாள் முயற்சிக்கு பின், ஆட்கள் இல்லாமலே பறக்கும், 1.8 கிலோ எடையுள்ள, ஒரு குட்டி விமானத்தை உருவாக்கினோம். அதன் அடிபாகத்தில், கேமரா மற்றும் ஜி.பி.எஸ்., தொழில்நுட்பம் பொருத்தினோம். ரிமோட் கன்ட்ரோல் மூலம் இயங்கும் இந்த விமானம், வானத்தில் பறந்தபடியே, போட்டோ, வீடியோ எடுத்து அனுப்பினால், கீழே உள்ள, லேப்டாப்பில் பார்க்கும் வசதி உள்ளது.இவ்விமானத்தை நில அளவீடுகள், விண்வெளி, புவியியல் ஆராய்ச்சி, ராணுவம், இயற்கை பேரிடர், கலவரம் மற்றும் மக்கள் நெரிசலை கண்காணிக்க என, பலவற்றிற்கு பயன்படுத்தலாம்.அண்மையில், ஒரு நினைவு நாள் நிகழ்ச்சியின் போது, மதுரையில் பதற்றம் நிலவியது. அப்போது, நாங்கள் உருவாக்கிய ஆளில்லா குட்டி உளவு விமானம் மூலம், போலீசார் எளிமையாக கண்காணித்து பதற்றத்தை தணித்தனர். 2012ல், அமெரிக்க ராணுவத்தின் அங்கமான, டார்பா ஆளில்லா விமானங்களுக்கான, சர்வதேச போட்டியை நடத்தியது.மொத்தம், 150 நாடுகளுடன் போட்டியிட்டு, ஆறு நாடுகள் பங்கேற்கும் இறுதி சுற்றுக்கு முன்னேறினோம். 150 அடி உயரமுள்ள மரங்களுக்கு இடையில், எங்களை விட்டு விட்டு, 5 கி.மீ., தொலைவில் உள்ள சாலையில் நடக்கும் நிகழ்வுகளை, கீழே உள்ள லேப்–டாப்பில் காண்பிக்க கூறினர்.அமெரிக்க கடற்படை விமானம் உட்பட, மற்ற நாடுகளின் குட்டி விமானங்கள் கீழே விழ, எங்கள் விமானம், பேட்டரி தீரும் வரை, மேலேயே பறந்தது.மேலும், அமெரிக்க ராணுவத்தினர் கூறிய அனைத்தையும் சரிவர செய்து, உலகின்மிக சிறந்த குட்டி உளவு விமானம் என, அமெரிக்க ராணுவத்தின் டார்பா, சான்றுஅளித்து பாராட்டியது.

சனி, 28 செப்டம்பர், 2013

விரைவான அருவினைக்கு வினைத்திறன் இன்றியமையாதது!

http://img.dinamalar.com/data/largenew/Tamil_News_large_81427220130928005710.jpg
வேகமான சாதனைக்கு விவேகம் அவசியம்!


அமெரிக்காவில், மூன்று லட்சம் இளம் ஆராய்ச்சியாளர்களை உருவாக்கியவரும்; பல துறைகளில் ஆராய்ச்சி செய்ததற்காக பத்மஸ்ரீ விருது பெற்ற, சுப்ரா சுரேசு: நான், சென்னையில் வளர்ந்தவன். சென்னை ஐ.ஐ.டி.,யில், ‘கெமிக்கல் இன்ஜினியரிங்’ முடித்து, மேற்படிப்பிற்காக கடன் வாங்கி, 100 டாலர் பணத்துடன், அமெரிக்கா சென்றேன். என் முதல் முனைவர் பட்டத்தை, எம்.ஐ.டி., யில், 1981ல் பெற்று, அங்கேயே ஆசிரியராக பணியாற்றினேன். ஆசிரியப் பணியின் போதே, ஆராய்ச்சியிலும் ஈடுபட்டு, 250 ஆராய்ச்சி கட்டுரைகள், ஆறு புத்தகங்களை எழுதியுள்ளேன். பொறியியல், மருத்துவம், ரசாயனம், உயிரியல் என, பல துறைகளில் ஆராய்ச்சியில் ஈடுபட்டு, 22 புதிய கண்டுபிடிப்புகளுக்கு, காப்புரிமையும் பெற்றிருக்கிறேன். எம்.ஐ.டி., பல்கலை கழகத்தில், ஐந்து வெவ்வேறு துறைகளின் தலைவராக பணியாற்றியதை, இன்றளவும் பெருமையாக கருதுகிறேன். ஏனெனில், இச்சாதனையை செய்த முதல் ஆசிய இனத்தவர் நான் தான். பல துறைகளில் ஆராய்ச்சி செய்து சாதித்ததற்காக, ‘பத்மஸ்ரீ’ விருது வழங்கி, இந்திய அரசு பாராட்டியது.
‘என்.எஸ்.எப்.,’ எனும், தேசிய அறிவியல் அறக்கட்டளை தான், அமெரிக்காவின் மிக உயர்ந்த அறிவியல் அமைப்பு. இங்கு, விஞ்ஞான ஆராய்ச்சிகளையும், புதிய கண்டுபிடிப்புகள் செய்ய இளைஞர்களை ஊக்குவித்து, நிதி உதவியும் செய்து வருகிறது. அமெரிக்க அதிபர் ஒபாமா, இந்த அறிவியல் அறக்கட்டளையின் தலைவராக, 2010ம் ஆண்டு என்னை நியமித்தார்.
நான், கடந்த ஆண்டு மட்டும், மூன்று லட்சம் இளம் ஆராய்ச்சியாளர்களை உருவாக்கியதோடு, 1,500க்கும் மேற்பட்ட நிறுவனங்களுக்கு, நிதி உதவி செய்து, பல புதிய ஆராய்ச்சிகளுக்கு வழிவகுத்துள்ளேன். அமெரிக்க பல்கலை கழகம் ஒன்றின் தலைவர் பொறுப்பை ஏற்க, அறக்கட்டளை பணியிலிருந்து விலகிய போது, அமெரிக்காவின் விஞ்ஞான வளர்ச்சிக்கு உதவியதாக, அதிபர் ஒபாமாவே என் திறமையை பாராட்டினார். சாதனைகளை வேகமாக செய்தாலும், விவேகம் அவசியம்.

வியாழன், 23 மே, 2013

80 அகவை சப்பான் முதியவர் எவரெசுட்டில் ஏறி அருவினை


80  அகவை சப்பான் முதியவர் எவரெசுட்டில் ஏறி  அருவினை
80 வயதான ஜப்பான் முதியவர் எவரெஸ்டில் ஏறி சாதனை
காட்மாண்டு, மே 23- 

ஜப்பானைச் சேர்ந்தவர் யுசிரோ மியுரா. இவருக்கு வயது 80. இவர் உலகிலேயே உயரமான சிகரமான எவரெஸ்டில் ஏறி சாதனை  படைத்துள்ளார். கடல் மட்டத்திலிருந்து 29 ஆயிரத்து 28 அடி உயரம் கொண்ட எவரெஸ்ட் சிகரத்தின் உச்சியை இவர் இன்று காலை 8.30  மணியளவில் அடைந்தார். 

நான்கு முறை இதய அறுவை சிகிச்சை செய்து கொண்ட இந்த முதியவர், 60 ஆண்டுகளுக்கு முன் எட்மன்ட் ஹிலாரி ஏறிய அதே  பாதையில் சென்று இந்த சாதனையை செய்துள்ளார். இவருடன் மகன், 3 ஜப்பானியர்கள், 6 நேபாள மலையேற்ற வீரர்களும் சென்றனர். 

மியுரா முதல் முறையாக கடந்த 2003-ம் ஆண்டு எவரெஸ்ட் சிகரத்தில் ஏறினார். அதை தொடர்நது 2008-ம் ஆண்டு தனது 76 வது வயதில் இரண்டாம் முறையாக எறினார். 

நோபாளைச் சேர்ந்த மின் பகாதூர் 2008-ம் ஆண்டு தனது 76 வது வயதில் எவரெஸ்டில் ஏறி கின்னஸ் சாதனை படைத்தார். இந்த சாதனையை 80 வயது மியுரா தற்போது முறியடித்துள்ளார். 

ஆனால் இந்த வார இறுதியில், எவரெஸ்ட் சிகரத்தில் 81 வயதாகும் மின் பகாதூர் மீண்டும் ஏறவுள்ளார். இதனால், மியுராவின் சாதனை மிக விரைவில் முறியடிக்கப்படலாம் எனறு கூறப்படுகிறது. 

எவரெஸ்ட் சிகரத்தில் இது வரை 4 ஆயிரம் பேர் ஏறியுள்ளனர். அதில் 240 பேர் தங்கள் முயற்சியின் போது உயிரிழந்துள்ளனர்.

ஞாயிறு, 28 ஏப்ரல், 2013

தொடரட்டும் அருவினை ! தொலையட்டும் பார்வையற்றோர் தீவினை!: - எல்.முருகராசு


தொடரட்டும்   அருவினை ! தொலையட்டும் பார்வையற்றோர்  தீவினை!: - எல்.முருகராசு
 
சிவகாசி.
வியர்வை சிந்துபவர்களுக்கு உயர்வைதரும் ஊர்.
உழைப்பு எனும் உதிரம் சிந்துபவர்களால் வீட்டிற்கு மட்டுமல்ல நாட்டிற்கே அந்நிய செலவாணி என்ற படியளக்கும் கந்தக பூமி.
மண்தான் வறட்சியானது, மக்களின் மனமோ வளமானது.
தன்னை வளர்த்து ஆளாக்கிய ஊருக்காக முடியாவிட்டாலும், யாருக்காவது நன்மை செய்யவேண்டும் என்ற துடிப்பு கொண்ட மனிதர்களை கொண்ட பூமி,
இப்படிப்பட்ட சிவகாசியை விரும்பி ஏற்றுக்கொண்ட ஒருவரது சேவையால் இன்று இந்தியாவே திரும்பி பார்க்கிறது.
அவர்தான் நாட்டிலேயே அதிக அளவு தனி நபர் கண்களை தானமாக திரட்டி தந்தவரும், தந்து வருபவருமான பட்டாஸ்நகர் அரிமா சங்கத் தலைவர், கண்தானக்குழு பட்டயத் தலைவருமான ஜெ.கணேஷ்.
இதுவரை 2200 பேரிடம் இருந்து கண்களை தானமாக பெற்றதன் மூலம் 4400 பேர் பார்வை பெறுவதற்கு காரணமாக இருந்துள்ளார். தனது இந்த சேவைக்காக டாக்டர் பட்டம் உள்ளிட்ட பல்வேறு விருதுகளையும், பட்டங்களையும் பெற்றவர்.
ஒருவர் தனது கண்களை தானம் செய்வதாக எழுதி கொடுத்திருந்தால் கூட, இறந்த பிறகு அவரது குடும்ப உறவுகளைத் தாண்டி கண்களை தானமாக பெறுவது என்பது சென்னை போன்ற பெரு நகரங்களிலே அரிதான விஷயமாக இருக்கும் போது, சிவகாசியில் இருந்து கொண்டு இது எப்படி சாத்தியம் என்ற கேள்விக்கு வந்த உற்சாகமான ஒரு வரி பதில், நல்ல மனதோடு முயற்சித்தால் முடியாதது எதுவுமில்லை என்பதுதான்.
இன்னும் கொஞ்சம் விவரமாக என்றவுடன்...
நான் சிவகாசியில் பட்டாசு தொழில் செய்யறேன், இந்த தொழிலைத் தாண்டி ஒரு ஆத்ம திருப்தி வேண்டும் என்பதற்காக 18 வருஷத்துக்கு முன்னாடி சிவகாசி லயன்ஸ் கிளப்பில் சேர்ந்தேன். உறுப்பினரா சேர்ந்த புதுசல தையல் மிஷின் கொடுப்பது, பசங்களுக்கு பாடபுத்தகம் வழங்குவது போன்ற நிகழ்வுகளில் கலந்து கொண்டு போட்டோவுக்கு போஸ் கொடுத்துட்டு ஓடிவந்துட்டு இருந்தேன்.
சங்கத்தோட தலைவர்ங்ற பொறுப்புக்கு வந்ததும், ஏதாவது உருப்படியா செய்யணும்னு தோணுச்சு. அந்த நேரம் மதுரை அரவிந்த் கண் ஆஸ்பத்திரி நிர்வாகியை பார்க்க போயிருந்தேன், அவர் கார்னியா பிளாக்குக்கு கூட்டிட்டு போனார், நாலைஞ்சு வயது குழந்தைங்கள்ல இருந்து வயசானவங்க வரை பலர் தானமா வர்ர கண்ணுக்காக காத்திட்டு இருந்தாங்க..
ஒரு நாள் இரண்டு நாள் அல்ல பல வாரங்கள், மாதங்கள், ஆண்டுகளாக காத்திருப்பவர்களும் அதில் உண்டு.
இன்றைக்கு நமக்கான கண்வந்துரும், நாளைக்கு பார்வை கிடைச்சுடும் என்ற அவர்களது ஏக்கத்தை அருகில் இருந்து பார்த்தேன். அன்று என் தூக்கத்தை தொலைத்தேன்.
எத்தனையோ பேர் தினம், தினம் இறந்து போகிறார்கள். அவர்கள் யாருமே கண்களை தானமாக தரவில்லையா, நடிகர்கள், அரசியல்வாதிகள் பிறந்த நாளின் போது நிறைய பேர் கண்களை தானமாக தருவதாக பதிவு செய்கிறார்களே, அவர்கள் யாரும் இறப்பது இல்லையா என்று மருத்துவரிடம் கேட்டபோது அதெல்லாம் "பப்ளிசிட்டிக்காக' செய்பவை, சுத்த வேஸ்ட் என்றார். எனக்கு ஆச்சர்யத்தைவிட அதிர்ச்சியே மேலோங்கியது.
இறந்தவர்களின் நெருங்கிய உறவினர்களிடம் மனமாற்றம் ஏற்பட்டால்தான் இந்த கண்தானம் என்பது நடக்கும், எங்களுக்கு கண்கள் கிடைக்கும் என்றார் இறுதியாகவும், உறுதியாகவும்.
கனத்த இதயத்துடன் சிவகாசி திரும்பியதும் இனி கண்தானங்களை பெறுவதே பிரதான வேலை என்று தீர்மானித்துக்கொண்டேன்.
கண் தானத்தை வலியுறுத்தி ஊர் முழுவதும் டிஜிட்டல் போர்டு, பேனர், பல ஆயிரம் நோட்டீஸ், ஸ்டிக்கர், பஸ் பின்புறம் விளம்பரம் என்று நிறைய செலவழித்தேன் ஆனால் ஒரு கண்கூட தானமாக வரவில்லை
வேறு மாதிரி முயற்சிப்போம்னு கண்தானத்தை வலியுறுத்தி கோயில், சர்ச், மசூதி என்று எல்லா இடங்களிலும் எனது அணியோடு போய் பேசினேன், ம்ஹீம் பிரயோசனமில்லை.
பிறகு மாணவர்களை தயார்படுத்தினேன், அவர்கள் கண்களை பத்து நிமிடம் கட்டிவிட்டு அங்கேயும், இங்கேயும் போகவிட்டு, இந்த பத்து நிமிட பார்வை இல்லாததையே நம்மால் தாங்க முடியவில்லையே, வாழ்க்கை முழுவதும் பார்வை இல்லாமல் இருப்பதை எப்படி தாங்கமுடியும், இறந்த பிறகு புதையுண்டோ, எரிக்கப்பட்ட யாருக்கும் பிரயோசனமில்லாமல் போகக்கூடிய கண்களை தானமாக கொடுத்தால் இரண்டு பேர் கண்தானமாக பெறுவார்களே என்று சொன்னதும் அந்த வார்த்தை நிறையவே பலன் தந்தது.
அவர்கள் வீட்டைச் சேர்ந்தவர்கள் இறந்ததும் அவர்களே பேசி எங்களை வரச் சொல்லி கண்களை எடுத்துக்கொள்ளச் சொன்னார்கள், அப்படிக் கிடைத்த கண்கள் பொருத்தப்பட்ட இருவர் பார்வை கிடைத்த மகிழ்ச்சியை பரவசமாக எங்களிடம் பகிர்ந்து கொண்ட போது, இதற்காக என்ன வேண்டுமானாலும் செய்யலாம் என்று கண்களை தானமாக பெறுவதில் இன்னும் தீவிரமானேன்.
கண்களை தானமாக பெற்றவர்களை பேசவைப்பது, கண்களை தானமாக தந்தவர் பெயரைப் போட்டு போஸ்டர் அடித்து அவரது குடியிருப்பு பகுதி முழுவதும் நன்றியும், பாராட்டு சொல்லியும் ஒட்டுவது, கண்தானம் செய்தவரின் புகைப்படம் ஒட்டிய ஷீல்டை உள்ளூர் பிரமுகர் கையால் சம்பந்தபட்டவரின் குடும்பத்தாரிடம் கொடுத்து கவுரவிப்பது என்றெல்லாம் செய்தபின் தானமாக கண்கள் கிடைத்தது.
தானமாக கிடைக்கும் கண்கள் தாராளமாக கிடைக்க என்ன செய்வது என்று யோசித்தேன், அப்ப நீங்கதான் எனக்கு உதவ முடியும் என்று சுடுகாட்டில் இருப்பவர்கள், ஆம்புலன்ஸ் ஒட்டுபவர்கள், ஆஸ்பத்திரி எமர்ஜென்சி வார்டில் வேலை செய்பவர்கள் போன்றவர்களிடம் யாசித்தேன்.
இதன் காரணமாக ஊருக்குள் யார் இறந்தாலும் தகவல் வந்துவிடும்.
இறந்தவர்கள் வீட்டில் உள்ள மாணவர்கள் எப்படியும் பேசி வைத்திருப்பார்கள்.
இல்லாவிட்டாலும் கவலை இல்லை என்று மாலையோடு போய் மரியாதை செய்தபிறகு, உரியவர்களிடம் பக்குவமாக பேசி கண்களை தானமாக பெற்றுவிடுவோம். இறந்து போனது பெண்களாக இருந்தால் என் மனைவி பிரேமலதா தலைமையிலானவர்கள் போய் பேசி விடுவார்கள்.
நாங்களே சோகத்துல இருக்கோம், கண்ணை புடுங்க வந்துட்டான்ய்ங்க என்று கோபாவேசமாகத்தான் பேச ஆரம்பிப்பார்கள். ஆனால் அவர்களிடம் பொறுமையாக பேசி, பேசி கண்களை தானமாக பெற்றுவிடுவோம்.
இப்படி ஏற்பட்ட விழிப்புணர்வு காரணமாக கண்களை தானமாக தரும் முதல் மாவட்டம் என்ற பெயரை இவர் சார்ந்த விருதுநகர் மாவட்டம் பெற்றுள்ளது. இப்போது சிவகாசி மட்டுமின்றி நெல்லை, தூத்துக்குடி, மதுரை, தேனி, கன்னியாகுமரி, ஈரோடு, கோவை வரை பிரச்சாரத்திற்கு செல்கிறார். அங்குள்ள பள்ளி, கல்லாரி மாணவர்களிடம் மட்டும் இதற்காகவே இதுவரை 585 கருத்தரங்குகள் நடத்தியுள்ளார்.
கருத்தரங்கு என்பது கேள்வி, பதிலாக. பதிலுக்கு ஒரு பரிசாக நடக்கும், முடிவில் மாணவ, மாணவியரின் இதயத்தில் கண்தானம் குறித்து ஆழமாக பதிவு செய்வதாக இருக்கும்.
இது எனக்கு கிடைத்த வெற்றி அல்ல மக்களின் விழிப்புணர்வுக்கு கிடைத்த வெற்றி எனது அணியைச் சேர்ந்த டாக்டர் ராமன், ஒரு பைசா கூட வாங்கிக் கொள்ளாமல், இதுவரை 800 பேரின் கண்களை எடுத்து தந்துள்ளார். நள்ளிரவில் போன் வந்தால் கூட நானாச்சு என்று ஒடோடி சென்று உரிய வேலைகளை பார்க்கும் நண்பர்கள் ராமர், தனசேகரன், கணேசன், ராம்தாஸ், நர்ஸ் ராணி மற்றும் என் மனதை புரிந்து கொண்டு எனக்கு பக்கபலமாக இருக்கும் மகன் கோபி அவர்களின் ஒத்துழைப்பால் கிடைத்த வெற்றி.
ஆனாலும் இதனை வெற்றி என்று சொல்ல முடியாது காரணம் பார்வையில்லாதவர்கள் இந்த பாரத தேசத்தில் பல ஆயிரம் உள்ளனர். கண்களை தானமாக தருபவர்கள் வெறும் சில நூறு பேர்களாகவே இருக்கின்றனர், அதுவும் இப்போதுதான்.இந்த கண்தானம் என்ற இயக்கம் அனைவருக்கும் பரவி, பெருகி நாட்டில் பார்வையற்றவர்களே இல்லை என்ற நிலை வரவேண்டும், அதுவரை எனது கைகளும்,இதயமும் கண்களை தானமாக கேட்கும் இல்லையில்லை கெஞ்சும்...
இது குறித்து மேலும் விளக்கம் பெற தொடர்பு கொள்ளவும் ஜெ.கணேஷ் போன் எண்: 9843088828.
பெட்டிச் செய்தி ஒன்று... பார்வையற்றோரே இல்லையெனும் பாரதம் படைப்போம்.

ஒருவர் கண்தானம் இருவர் வாழ்வில் பிரகாசம்.

மண்ணுக்கும், நெருப்புக்கும் கொடுப்பதை மனிதர்க்கும் கொடுப்போம்.
இறந்தும் இறவாப்புகழுடன் வாழ இருவர் வாழ்வில் ஒளியேற்ற கண்தானம் செய்வோம்.

முயற்சி செய்யுங்கள், முடியும் உங்களால்.
பெட்டிச் செய்தி இரண்டு:

* ஒருவர் இறந்த பிறகே கண்களை தானமாக வழங்கமுடியும்.

* இறந்த நான்கு மணி நேரம் முதல் ஆறு மணி நேரத்திற்குள்ளாக கண்கள் அகற்றப்பட வேண்டும்.

* போன் செய்தால் போதும் கண்தானம் பெறுவோம் நேரில் வந்து கண்களை எடுத்துச்செல்வர்.

* கண்களை எடுக்க தனி அறையோ, இடமோ தேவையில்லை.

* பத்து நிமிடத்தில் கண்கள் எடுக்கப்பட்டுவிடும்.

* கண்தானம் பெறுவோர் வரும்வரை மின்விசிறியை நிறுத்திவிட்டு கண்களின் மீது ஈரமான பஞ்சை வைக்கவும். குளிர்சாதன வசதியிருந்தால் அதனை ஒடவிடவும்

* ஆண், பெண் இருபாலர்களும் எந்த வயதினரும் கண்களை தானம் செய்யலாம்.

* மஞ்சள் காமாலை, எய்ட்ஸ், மூளைக்காய்ச்சசல், வெறிநாய்கடியால் இறந்தவர்கள் மட்டும் கண்களை தானம் செய்யமுடியாது.

* கண்தானம் செய்ய முடிவு செய்தவர்கள் உள்ளூர் கண்மருத்துவமனையை உடனடியாக தொடர்பு கொள்ளவும். சிவகாசி மற்றும் அதன் சுற்று வட்டார பகுதி என்றால் 9842120908, 9442627556, 0462-2337103 போன்ற எண்களை தொடர்பு கொள்ளவும்.
 

வியாழன், 18 ஏப்ரல், 2013

காற்று இல்லாமலே காற்றாலை மின்சாரம்





காற்று இல்லாமலே காற்றாலையை இயக்கி மின்சாரம்: சலகண்டபுரம் இளைஞர் அருந்திறல்

சேலம்: காற்று இல்லாமலே, காற்றாலையை இயக்கி மின்சாரம் தயாரித்து செயல் வடிவம் காட்டியுள்ளார், பத்தாம் வகுப்பு வரை மட்டுமே படித்துள்ள கிராமத்து வாலிபர்.

சேலம் மாவட்டம், ஜலகண்டாபுரத்தை சேர்ந்த விசைத்தறி தொழிலாளி விஸ்வநாதன், 38. பத்தாம் வகுப்பு வரை படித்துள்ள இவர், காற்றாலையை, காற்று இல்லாமல் இயக்க முடியும் என்பதை, கண்டுபிடித்துள்ளார்.

இதற்கான முயற்சியில், மூன்று ஆண்டுகளாக ஈடுபட்ட அவர் கூறியதாவது:சேலம் மாவட்டம், மேச்சேரி அரசு மேல்நிலைப் பள்ளியில், பத்தாம் வகுப்பு வரை படித்தேன். குடும்ப சூழ்நிலை காரணமாக, மேலும் படிக்க முடியாமல், விசைத்தறி தொழிலில் ஈடுபட்டு வருகிறேன். காற்றாலையை, காற்று இல்லாமலே இயக்க முடியும் என, கண்டுபிடித்துள்ளேன். காற்று வீசும் காலத்தில் மட்டுமே, காற்றாலையில் இருந்து, மின்சாரம் பெற முடியும்; மற்ற காலங்களில் காற்றாலையில் உள்ள இறக்கைகள் சுற்றாது. தற்போது, காற்றாலையில், மூன்று இறக்கைகள் உள்ளது.என்னுடைய தொழில்நுட்பப்படி, காற்றாலையில் நான்கு இறக்கைகள் பொருத்த வேண்டும். மேலும், கீழும் உள்ள இரண்டு இறக்கையின் நடுவில், ஹீலியம் வாயுவை நிரப்ப வேண்டும். காற்றாலையின், இரு பக்கமும் உள்ள, இரண்டு இறக்கைகளின் அளவு ஒரே சீராக இருக்கும்படி வைத்துக் கொள்ள வேண்டும்.ஹீலியம் வாயு நிரப்பப்பட்டுள்ள ஒரு இறக்கையில் இருந்து, கீழுள்ள இறக்கைக்கு வாயு செலுத்தப்படும் போது, எடை தாங்காமல், கீழுள்ள இறக்கை மேல் நோக்கி தள்ளப்படும். இதனால், இறக்கைகள் ஒன்றன் பின் ஒன்றாக சுழலத்தொடங்கும். ஹீலியம் வாயு, தானியங்கி சென்சார் மூலம், இரண்டு இறக்கைகளிலும் மாறி மாறி செலுத்தப்படுவதால், இறக்கைகள் தொடர்ந்து சுழன்று கொண்டே இருக்கும். இதனால் காற்று இல்லாமலும், மின்சாரம் உற்பத்தி செய்ய முடியும்.

நான் கண்டுபிடித்த தொழில் நுட்பத்தை, சென்னை, கிண்டியில் உள்ள மத்திய அரசின் காப்புரிமை நிறுவனத்தில், வரை படங்களின் மூலமும், எழுதியும் காண்பித்தேன். என் கண்டுபிடிப்புக்கு, மத்திய அரசு காப்புரிமை கொடுத்துள்ளது. ஓராண்டுக்குள், நான் அவர்களுக்கு செய்முறை பயிற்சி அளித்து காட்ட வேண்டும் என்பதால், ஜலகண்டாபுரத்தை சேர்ந்த செந்தில்குமார், மேச்சேரியை சேர்ந்த ஜெயவேல், சேலம், கருப்பூரை சேர்ந்த ராஜசேகர், குமாரபாளையத்தை சேர்ந்த சிவராஜ் ஆகியோரின் உதவியுடன், என் சக்திக்கு தகுந்தவாறு காற்றாலை அமைத்து, அதில் சிறிய அளவில் மின்சாரமும் கிடைக்க செய்துள்ளேன். போதிய பணவசதி இல்லாததால், ஆராய்ச்சியை தொடர தடை ஏற்பட்டுள்ளது.நான் செய்த செயல் வடிவத்தை, மத்திய அரசின் காப்புரிமை நிறுவனத்தில் ஒப்படைக்க உள்ளேன். ஐந்து பேர் சேர்ந்து பவர் விஷன் சேரிட்டபிள் டிரஸ்ட் ஆரம்பித்துள்ளோம். டிரஸ்ட்டுக்கு பணம் செலுத்த விரும்புவோர், 99944-97959 என்ற எண்ணில் தொடர்பு கொள்ளலாம்.இவ்வாறு அவர் கூறினார்.


செவ்வாய், 16 ஏப்ரல், 2013

ஓவியமாகத் தீட்டப்பட்ட தமிழ் : கல் உடைக்கும் தொழிலாளி அருவினை










ஓவியமாக த் தீட்டப்பட்ட தமிழ் எழுத்து : கல் உடைக்கும் தொழிலாளி அருவினை

சேலம்: தமிழ் எழுத்துகளை, தூரிகையால், ஓவியமாக தீட்டி, சாதனை படைத்துள்ளார் கல் உடைக்கும் தொழில் செய்யும் வாலிபர்.சேலம் மாவட்டம், ஓமலூர் அடுத்த களரம்பட்டியை சேர்ந்த லட்சுமணன் மகன் நாராயணசாமி, 24. இவர் தாய் ராஜாத்தி. தாய், மகன் இருவரும், கிருஷ்ணகிரி மாவட்டம், ஓசூர், தொரப்பள்ளி கிராமத்தில் தங்கி, கல் உடைக்கும் தொழிலில் ஈடுபட்டு வருகின்றனர்.வேலை நேரம் தவிர்த்து, நாராயணசாமி, தமிழ்நாடு திறந்தநிலை பல்கலையில், பி.காம்., படித்து வருகிறார். தமிழில் உள்ள, 247 எழுத்துக்களை, 247 அடி பேனரில் எழுதி, சாதனைக்கு விதை போட்டுள்ளார்.

இதுகுறித்து, நாராயணசாமி கூறியதாவது:சிறு வயதிலேயே தந்தையை இழந்த நான், வறுமையால், மழைக்குக்கூட பள்ளிக்கூடம் ஒதுங்க முடியவில்லை. எனினும், படிக்க வேண்டும் என்ற ஆசை எனக்குள் ஊற்றெடுத்தது. என் தாத்தா பெரமச்சி வழிக்காட்டுதல்படி, அரிச்சுவடு வாங்கி, தமிழ் எழுத்துக்களை எழுதி, படிக்க கற்றுக் கொண்டேன். காலப்போக்கில், தமிழ் எழுத்துக்கள், 247ம் மனப்பாடம் செய்த பின், குறிப்பிடும் தமிழ் எழுத்தின், முன், பின் உள்ள எழுத்துக்களை, முறை பிறழாமல், சொல்லுவதில் தேர்ச்சி பெற்றேன். அதையடுத்து, "நன்றி' என்ற வார்த்தையை, ஒரு மி.மீ., அளவில் எழுதி, 11.11.2011 அன்று, "நன்றி என்றும் மறவாதே' என விழிப்புணர்வு ஏற்படுத்தி, உலக சாதனை புத்தகத்தில் இடம் பெற்றேன். அன்று முதல், நன்றி நாராயணசாமி என அழைக்கப்பட்டேன்.

தமிழில் மொத்தமுள்ள, 247 எழுத்துக்களையும், 247 அடி, அளவு பேனரில் ஓவியமாக தீட்டினேன். அதில், தமிழ் எழுத்து, 3.33 லட்சத்து, 333 முறையும், 247 தமிழ் எழுத்துக்கள், 9.99 லட்சத்து, 999 முறையும் இடம் பெற்றுள்ளன.இந்த பேனரை, 100 அடி தொலைவில் நின்று பார்த்தால், "தமிழ்' என்ற மூன்றெழுத்து மட்டும் தெரியும். 40-50 அடி தொலைவில் இருந்து பார்த்தால், 247 எழுத்துக்கள், 247 சதுரஅடி ஓவியமாக தெரியும். அருகில் சென்று பார்த்தால், எல்லா எழுத்துக்களும், தமிழ், தமிழ் என்றே தெரியும். இந்த எழுத்து சாதனைகள், 13 அடி உயரம், 19 அடி அகல பேனரில் இடம் பெற்றுள்ளது.இவ்வாறு, அவர் கூறினா
ர். 






புதன், 10 ஏப்ரல், 2013

புற்று நோய்க்குப் புதிய மருத்துவ முறை-மாணவன் சாதனை

புற்று நோய்க்குப் புதிய மருத்துவ முறை கண்டுபிடிப்பு-கனடா இந்திய மாணவன் சாதனை
 
புற்று நோய்க்கு புதிய சிகிச்சை முறை கண்டுபிடிப்பு-கனடா இந்திய மாணவன் சாதனை
ஒட்டாவா, ஏப். 10-

கனடாவில் பள்ளியில் படித்துவரும் அர்சூன் நாயர்(16) என்ற மாணவன் நுண்ணுயிர் எதிரிகளை ஒன்று சேர்த்து சிறிய மாற்றங்களுடன் புற்று நோய் சிகிச்சைக்கு ஒரு புதிய சோதனை ஒன்றை செய்துள்ளார். இதை மூத்த விஞ்ஞானிகள் குழுவும் வரவேற்றுள்ளனர்.

கேன்சர் போட்டோதெர்மல் சிகிச்சை என்ற இந்த புதிய முறையின் மூலம் நோயாளியின் உடம்பில் தங்கத்துகல்கள் செலுத்தப்படுகிறது. பின்னர் அது ஒரு கட்டியைபோன்று ஒன்றுதிரள்கிறது. அப்போது ஒளியை பாய்ச்சி கேன்சர் செல்கள் மீது தாக்குதல் நடத்த்ப்படுகிறது.

இந்த முறை பயனுள்ளதாக இருந்தாலும், மிகுந்த பயனுள்ளதாக அமையவில்லை. கேன்சர் செல்கள் தாக்கப்படுகிறதுபோது, வெப்ப அதிர்ச்சி புரதங்கள் அங்கு உற்பத்தி செய்யப்படுகின்றன.

எப்படியோ, கேன்சர் செல்கள் அதிகரிப்பதை தடுக்க முடியும் என்பதால் இந்த முறை மிகவும் பயனுள்ள ஒரு முறையாக உருவாகும் என்று கருதப்படுகிறது. இதனால் இரண்டு வருடங்களாக தீவிர ஆராய்ச்சியில் ஈடுபட்டுள்ள மாணவன் அர்சூன் நாயருக்கு முதல் பரிசு வழங்கப்பட்டுள்ளது.

வெள்ளி, 29 மார்ச், 2013

செருமனி வீரரின் சாதனையை முறியடித்துள்ளார் சேலத்தை சேர்ந்த மாற்றுத்திறனாளி வீரர் மாரியப்பன்...

பாராலிம்பிக் போட்டியில் உயரம் தாண்டுதலில் தங்கம் வென்ற ஜெர்மனி வீரரின் சாதனையை முறியடித்துள்ளார் சேலத்தை சேர்ந்த மாற்றுத்திறனாளி வீரர் மாரியப்பன்...

12 ஆம் வகுப்பு படிக்கும் இந்த மாணவர், பெங்களூருவில் இந்த ஆண்டு நடைபெற்ற தேசிய அளவிலான விளையாட்டுப் போட்டியில் பங்கேற்றார்.

இதில் உயரம் தாண்டுதலில் 1.75 மீட்டர் உயரம் தாண்டி புதிய உலக சாதனை படைத்தார்.

கடந்த ஆண்டு பாராலிம்பிக் போட்டியில் தங்கம் வென்ற ஜெர்மனி வீரர் டெலானா 1.74 மீட்டர்தான் தாண்டியிருந்தார்.

செங்கல் சூளையில் வேலை செய்து 70 ரூபாய் தினக்கூலி பெற்று குடும்பத்தை காப்பாற்றி வருகிறார் மாரியப்பனின் தாய் சரோஜா. சர்வதேச போட்டிகளில் பங்கேற்க தனது மகனுக்கு தகுதி இருந்தும் வறுமை தடையாய் இருப்பதை எண்ணி வேதனையில் உழல்கிறார்.

தேசிய அளவிலான போட்டியின் மூலம் தனது திறமையை நிரூபித்த மாணவர் மாரியப்பன், சர்வதேச போட்டிகளிலும் அதனை நிரூபிக்க முனைப்பாக இருக்கிறார்.

அதற்கான வாய்ப்பை அரசு உருவாக்கித் தருமானால், மாரியப்பனால் ஃப்ரான்சில் நடைபெறவுள்ள காமன்வெல்த் போட்டியில் பங்கேற்று புதிய சாதனைகளை நிகழ்த்த முடியும். அந்த வாய்ப்புக்காகவும் உதவிக்காகவும் காத்திருக்கிறார் மாரியப்பன் நம்பிக்கையுடன்.

காணொளி: http://youtu.be/WeC_CN1vNAs

www.puthiyathalaimurai.tv

வியாழன், 21 மார்ச், 2013

முனைவர் பட்டம் பெற்று 71 அகவை மூதாட்டி அருந்திறல்






முனைவர் பட்டம் பெற்று 71  அகவை மூதாட்டி 
அருந்திறல்


புதுதில்லி: டில்லி பல்கலைக்கழகத்தில், 71 வயதான பெண், முனைவர் (டாக்டர்) பட்டம் பெற்று, சாதனை படைத்துள்ளார். இவர், சிந்தி மொழி பாடப்பிரிவில் ஆய்வு மேற்கொண்டதற்காக, ஜனாதிபதியிடம் பட்டம் பெற்றுள்ளார்.டில்லியை சேர்ந்தவர், உஷா சாஸ்வத்,71, பள்ளி ஆசிரியையாக பணியாற்றி, ஓய்வு பெற்றவர். பணி ஓய்வுக்கு பின், சிந்தி இலக்கியத்தில் ஆர்வம் கொண்டு, பல ஆராய்ச்சி கட்டுரைகளை எழுதினார். இதன் காரணமாக, சி.பி.எஸ்.சி., எனப்படும், மத்திய பள்ளி கல்வி வாரிய பாடத் திட்டத்தின் கீழ், 10ம் வகுப்பு முதல், 12ம் வகுப்பு வரையிலான, சிந்தி மொழி இலக்கண பாடத் திட்டத்தை வடிவமைக்கும் பொறுப்பு, இவரிடம் ஒப்படைக்கப்பட்டது.மேலும், 2007ம் ஆண்டு, டில்லி பல்கலையின், சிந்தி துறையில், ஆராய்ச்சி மாணவியாக தன்னை இணைத்து கொண்ட இவர், கடந்த ஆண்டு, ஆய்வை நிறைவு செய்தார். டில்லி பல்கலைக்கழகத்தில் நடைபெற்ற, பட்டமளிப்பு விழாவில், ஜனாதிபதி, பிரணாப் முகர்ஜியிடமிருந்து, உஷா சாஸ்வத், முனைவர் பட்டம் பெற்றார்.அப்போது பேசிய உஷா, ""என் கல்வி தாகம் இனிமேலும் அடங்காது; மேலும் படிக்க உள்ளேன்,'' எனக் கூறி, அனைவரையும் ஆச்சர்யத்தில் மூழ்க வைத்தார்.


புதன், 20 பிப்ரவரி, 2013

நெல் சாகுபடியில்அருந்திறல்!


நெல் சாகுபடியில் சாதனை!
அதிக நெல் சாகுபடிக்காக, முதல்வர் செயலலிதாவிடம், 5 லட்ச ரூபாய் பரிசு பெற்ற விவசாயி, சோலைமலை: மதுரையிலிருந்து, 17 கி.மீ., தொலைவில் உள்ள, அண்டமான் கிராமத்தை சேர்ந்தவன். தமிழக வேளாண் அதிகாரிகள், எங்கள் கிராமத்திற்கு வந்து, "திருந்திய நெல் சாகுபடி' முறையை, அவ்வப்போது விளக்கினர். இது பற்றிய என் சந்தேகங்களை, வேளாண் அதிகாரிகள் அனைவரும் உடனடியாக தீர்த்ததால், திருந்திய நெல் சாகுபடி முறையில், சாதனை செய்ய ஆர்வம் ஏற்பட்டது. சாதாரண முறையில், நெல் சாகுபடி செய்தால் ஏக்கருக்கு, 3,800 கிலோ நெல் விளையும். ஆனால், திருந்திய நெல் சாகுபடி முறையில் மொத்தம், 8,272 கிலோ நெல் விளையச் செய்து, சாதித்தேன். இதற்கு, குடியரசு தின விழாவில், முதல்வர் ஜெயலலிதா, தமிழ அரசின் வேளாண்மை சிறப்பு பரிசாக, 5 லட்ச ரூபாயும்; 3,500 ரூபாய் மதிப்புள்ள, தங்க மெடலும் வழங்கி பாராட்டினார்.

அதிக நெல் மகசூலுக்காக, மத்திய அரசின், 2011-2012ம் ஆண்டிற்கான, "கிரிஷி கர்மான்' விருதையும் பெற்றுள்ளேன். கோடை மற்றும் நீர் இருப்பு குறைவான காலத்தில், இம்முறை நன்கு பயன்படும். சாதாரண முறையில், ஒரு ஹெக்டேரில், நெல்லை பயிர் செய்ய, 20 சென்ட் பரப்பளவுள்ள, நாற்றங்கால் தேவை. "திருந்திய நெல் சாகுபடி' முறையில், 2.5 சென்ட் பரப்பளவுள்ள நாற்றங்கால் போதுமானது. நெல் விதையை, 24 மணி நேரம் ஊற வைத்து, இருட்டறையில் முளை கட்ட வைத்து, உயிர் உரத்துடன் கலந்து, 1 ச.மீ., நிலத்தில், நேர்த்தி செய்யப்பட்ட, 130 கிராம் விதை நெல்லை விதைத்தேன். மக்கிய தொழு உரம் மூலம், நடவு வயலை தயாரித்தேன். நாற்றை நடுவதற்கு முன், வயலில், நீரை வடித்து விடுவது அவசியம். 25க்கு, 25 செ.மீ., சதுர இடைவெளியில், நாற்று நட்டேன். முதல் ஐந்து நாட்களுக்கு, நாளொன்றுக்கு மூன்று முறை, பூவாளியால் நீர் ஊற்றினேன். களை எடுத்தல், நீர் பாய்ச்சுதல், உரமிடுதல் என, அனைத்திலும் கவனம் செலுத்தியதால், திருந்திய நெல் சாகுபடி முறையில், அதிக நெல்லை எளிதில் சாகுபடி செய்ய முடிந்தது.

செவ்வாய், 12 பிப்ரவரி, 2013

மிதியூர்தி ஓட்டும் பெண், வழக்கறிஞர்

மிதியூர்தி(ஆட்டோ)  ஓட்டும் பெண், வழக்கறிஞராகிய  அருந்திறல்



பெங்களூரு: பெங்களூரு நகரில், ஆட்டோ ஓட்டி, பிழைப்பு நடத்திய பெண், வழக்கறிஞராகி, சாதனை படைத்துள்ளார்.வெங்கடலட்சுமி, 40, பெங்களூரு நகர வீதிகளில், ஆட்டோ ஓட்டும் பெண்களில் ஒருவர். பட்டப்படிப்பு முடித்திருந்த இவர், வழக்கறிஞராக வேண்டும் என, சிறு வயதிலிருந்தே விரும்பினார்.எனினும், பட்டப்படிப்பு முடித்ததும், திருமணம், குழந்தை, வாழ்க்கையை ஓட்ட, ஆட்டோ ஓட்ட வேண்டிய நிர்பந்தம் போன்ற கட்டாயங்களால், நேரடியாக அவரால், வழக்கறிஞர் ஆக, தேவையான படிப்பை படிக்க முடியவில்லை.கடந்த, 13 ஆண்டுகளாக, ஆட்டோ ஓட்டி வரும் வெங்கடலட்சுமி, தினமும் காலை, 8:00 மணிக்கு, தன் பணிகளை துவக்கி விடுவார். 8:30 மணிக்கு, மகளை, பள்ளியில் கொண்டு விடும் இந்த பெண், 10 கி.மீ., தூரத்தில், பசவேஸ்வர் நகரில் உள்ள, பாபு ஜெகஜீவன் ராம் சட்ட கல்லூரியில், எல்.எல்.பி., படிக்க, ஆட்டோவிலேயே செல்வார்.வகுப்புகள் மதியம் முடிந்ததும், கறுப்பு, வெள்ளை சீருடையை கழற்றி, வீட்டில் போட்டு விட்டு, ஆட்டோ டிரைவருக்குரிய, காக்கி சீருடையை அணிந்து, ஆட்டோ ஓட்ட செல்வார். நள்ளிரவு வரை, ஆட்டோ ஓட்டும் வெங்கடலட்சுமி, இரவில் வீட்டுக்கு சென்ற பிறகும், சிறிது நேரம் படித்த பின், தூங்குவார்.சில மாதங்களுக்கு முன் வெளியான, எல்.எல்.பி., தேர்வில், அவர் வெற்றி பெற்றார். எனினும், பார் கவுன்சில் தேர்வில் வெற்றி பெற்றால் தான், வழக்குகளில் ஆஜராக முடியும் என்பதால், அந்த தேர்வுக்காக, கடுமையாக தயாரானார்.கடந்த வெள்ளிக்கிழமை வெளியான, பார் கவுன்சில் தேர்வு முடிவுகளில், வெற்றி பெற்று, முழு அளவில் வழக்கறிஞர் ஆகிவிட்டார்.தேர்வு முடிவை, கம்ப்யூட்டரில் பார்த்த, வெங்கடலட்சுமியின், 17 வயது மகள், "அம்மா, நீங்க, பார் கவுன்சில் தேர்வில், பாஸ் ஆயிட்டீங்க' என கூறிய போது, வெங்கடலட்சுமியால், ஆட்டோவை தொடர்ந்து ஓட்ட முடியவில்லை.சில நிமிடங்கள், ஓரமாக ஆட்டோவை நிறுத்தி, தன் வெற்றியை நினைத்து, பூரித்த அவர், "இனிமேல் ஆட்டோ ஓட்ட மாட்டேன்; முழு நேர வழக்கறிஞராக பணியாற்றுவேன்' என, உறுதி பூண்டார்.வறுமை காரணமாக, தவறான பாதைகளை பலர் தேர்ந்தெடுக்க, கடுமையான பெங்களூரு நகர வீதிகளில், ஆட்டோ ஓட்டி, கிடைத்த நேரத்தில், ஐந்தாண்டுகள் கஷ்டப்பட்டு, எல்.எல்.பி., படித்து முடித்து, வழக்கறிஞராகவும் மாறியுள்ள, "ஆட்டோ வெங்கடலட்சுமியை' இனி அனைவரும், "வழக்கறிஞர் வெங்கடலட்சுமி' என, அழைப்பர் என்பது நிச்சயம்.

ஞாயிறு, 27 ஜனவரி, 2013

8 ஆண்டுகளாக விடுப்பு இல்லை: ஆசிரியை

8 ஆண்டுகளாக விடுப்பு இல்லை: அரசு பள்ளி ஆசிரியை  அருவினை!

"சாட்டை' படத்தை ப் பார்த்தால் அரசு பள்ளிகள் ஒரு வித "கிலி'யை ஏற்படுத்துகின்றன. ஆனால், அரசு பள்ளிகளிலும் கடமையை தவறாமல் செய்யும் ஆசிரியர்கள் உள்ளனர் என்பதற்கு, ஆசிரியை சசிகலா தேவி ஒரு எடுத்துக்காட்டு.

இவர், கடந்த எட்டு ஆண்டுகளாக ஒரு நாள் கூட விடுப்பு எடுக்காமல் பள்ளிக்கு செல்வதோடு, தன் துறையில் சிறந்த தேர்ச்சி விகிதத்தையும் தக்க வைத்து, அசத்தலான சாதனை படைத்து வருகிறார்.கன்னியாகுமரி மாவட்டம், தக்கலையை சேர்ந்த இவர் 2004ம் ஆண்டு முதல் வேளச்சேரி அரசு மேல்நிலை பள்ளியில் விலங்கியல் ஆசிரியையாக பணியாற்றி வருகிறார். தினமும் காலை 7:45 முதல் 8:00 மணிக்குள் பள்ளிக்கு வருவதை வழக்கமாக கொண்டுள்ளார்.

இதுகுறித்து இவர் கூறியதாவது:நான் பள்ளி படிக்கும் காலத்தில் இருந்தே விடுப்பு எடுப்பது என்பது அரிதுதான். இதை ஒரு சாதனையாக நான் எப்போதும் கருதியது கிடையாது. கடமையாகவே நினைக்கிறேன். அதிலும், அரசு பள்ளி ஆசிரியை என்பதால் கூடுதல் பொறுப்பு உள்ளதாக நினைக்கிறேன். தினமும் அதிகாலை 5:00 மணிக்கே எனக்கு நாள் பணி துவங்கிவிடும்.காய்ச்சல் வந்தபோது, விபத்து நேரிட்ட போது கூட பள்ளிக்கு வந்து விட்டேன். உறவினர்களின் சுப நிகழ்ச்சிகள் விடுமுறை நாட்களில் வந்தால் மட்டுமே நான் கலந்து கொள்வேன். மற்ற நாட்களில் எனக்கு பதில் கணவர் செல்வார். என் பணிக் காலத்தில் இதுவரை 20 நாட்கள் மட்டுமே விடுப்பு எடுத்துள்ளேன்.

நான் மட்டும் இல்லை. என் மகன் அரவிந்தன், மகள் அபர்ணா ஆகியோரும் பெரும்பாலும் விடுப்பு எடுப்பதுஇல்லை. நான் எடுக்கும் பாடப்பிரிவில் அனைத்து மாணவ, மாணவியரும் 100 சதவீத தேர்ச்சி பெற வேண்டும் என்பது மட்டும்தான் குறிக்கோள். பெரும்பாலான ஆண்டுகளில், 100 சதவீத தேர்ச்சி கொடுத்துள்ளேன். மீதமுள்ள ஒன்பது ஆண்டுகள் விடுப்பு எடுக்காமல் பள்ளி சென்று மாணவ, மாணவியர்கள் முன்னேற்றத்திற்கு பாடுபட வேண்டும் என்பது தான் என் லட்சியம்.இவ்வாறு ஆசிரியை சசிகலாதேவி உற்சாகத்துடன் கூறினார்.

வெள்ளி, 25 ஜனவரி, 2013

தமிழ் வழியில் படித்து அருந்திறல் - மாணவி பெருமிதம்



""பள்ளிக்கல்வியை தமிழ் மீடியத்தில் படித்து, "சார்ட்டர்ட் அக்கவுன்டன்ட்' தேர்வில், அகில இந்திய அளவில் முதலிடம் பிடித்தது பெருமையாக உள்ளது,'' என, மும்பையில் ஆட்டோ ஒட்டும் தமிழகத்தை சேர்ந்த, டிரைவர் மகள் பிரேமா நெகிழ்ச்சியுடன் தெரிவித்தார்.
விழுப்புரம் மாவட்டம், சங்கராபுரம் அடுத்த பெரிய கொள்ளியூர் கிராமத்தைச் சேர்ந்தவர் ஜெயக்குமார், 53; ஆட்டோ டிரைவர். மும்பையில், மலாட் எஸ்.பி., கான்சால் என்ற பகுதியில் குடும்பத்துடன் வசித்து வருகிறார். இவரது மனைவி லிங்கம்மாள், 45, மகள்கள் மகாலட்சுமி, 27, பிரேமா, 25, மகன் தன்ராஜ், 23. மகாலட்சுமிக்கு திருமணம் ஆகிவிட்டது.
கடந்த, 20 ஆண்டுகளுக்கு முன், பெரிய கொள்ளியூரில் விவசாய கூலிவேலை செய்து வந்த ஜெயக்குமார், போதிய வருவாய் கிடைக்காததால், தன் மைத்துனர் குப்புசாமி என்பவர் ஆதரவுடன், 1990ம் ஆண்டு, மும்பைக்கு பிழைப்பு தேடி சென்றார்.
துணி நெசவு செய்யும் ஆலையில் பணிபுரிந்தார். அதிலும் எதிர்பார்த்த வருவாய் கிடைக்காததால், ஆட்டோ ஓட்டுனரானார். அதன் மூலம் கிடைத்த வருவாயை கொண்டு, சொந்தமாக ஆட்டோ வாங்கி, தன் குழந்தைகளை படிக்க வைத்தார்.
இத்தனை சிரமமான சூழலுக்கு இடையே படித்த, இவரது இரண்டாவது மகள் பிரேமா, "சார்ட்டட் அக்கவுன்டன்ட்' தேர்வில், 800க்கு, 607 மதிப்பெண்கள் எடுத்து, அகில இந்திய அளவில், முதலிடம் பெற்று சாதனை படைத்துள்ளார்.
இதுகுறித்து, பிரேமா கூறியதாவது:என் வெற்றியை பெற்றோரின் பாதங்களில் சமர்ப்பிக்கிறேன். அவர்கள் இல்லை என்றால், என்னால், இச்சாதனையை பெற்று இருக்க முடியாது. வறுமையான சூழலிலும், எங்களை படிக்க வைக்க வேண்டும், என்று பல தியாகங்களை செய்தனர்.ஒன்று முதல், 7ம் வகுப்பு வரை, மலாடு நகராட்சி பள்ளியில், தமிழ் மீடியத்தில் படித்தேன். ஆங்கில பாடத்தை தவிர்த்து, மற்ற அனைத்து பாடங்களையும், தமிழில் தான் கற்றேன்.
அதன்பின், மலாடு செகன்டரி பள்ளியில், 8 முதல், 10ம் வகுப்பு வரை, தமிழ் பாடத்தை தவிர மற்ற பாடங்களை, ஆங்கில மீடியத்தில் படித்தேன். என்.எல்., காலேஜில், பிளஸ் 2 முடித்து, நாகின்தாஸ் கண்டவாலி கல்லூரியில், பி.காம்., முடித்தேன். அதன்பின் மும்பை பல்கலையில் எம்.காம்., பட்டம் பெற்றேன்.எனக்கு திருமண ஏற்பாடுகளை செய்தபோது, அக்கவுன்டன்ட் படிப்பில் பெரிய அளவில் சாதிக்க வேண்டும் என்ற, என் விருப்பத்தை தந்தையிடம் கூறினேன். அதை மறுக்காமல், அதற்கான அனைத்து வசதிகளையும் செய்து கொடுத்தார்.
என் தம்பி தன்ராஜும், பி.காம்., முடித்து, சி.ஏ., தேர்வை எழுத விரும்பியதால், இருவரும் சேர்ந்தே படித்தோம். மலாட் பகுதியில் வாடகை குடியிருப்பில் உள்ள எங்கள் வீடு சிறியது. அதில் நாங்கள் இருவரும், இரவில் கண் விழித்து படிக்க தேவையான வசதிகளை, என் தாய் ஏற்படுத்தி தந்தார். "டிவி' இணைப்பை துண்டித்து, படிப்பிற்கு உதவி செய்தனர்.
எங்களின் முயற்சிக்கு ஆசிரியர்களும் பல உதவிகளை செய்தனர். சி.ஏ., படிப்பில் இந்திய அளவில் சாதிக்க வேண்டும் என்ற குறிக்கோள் எனக்குள் இருந்தது. இதில் அகில இந்திய அளவில் முதலிடம் பெற்றது, என் பெற்றோரின் தியாகத்திற்கும், என் விடா முயற்சிக்கும் கிடைத்த வெற்றியாக நினைக்கிறேன். தன்ராஜூம் சி.ஏ., படிப்பில் தேர்ச்சியடைந்தது, இரட்டிப்பு மகிழ்ச்சி.மிகுந்த ஏழ்மையான நிலையில், மும்பைக்கு பிழைப்பு தேடி வந்தபோது, ஆதரவு அளித்த என் தாய்மாமன்கள் குப்புசாமி, பெருமாள் இவர்களின் உதவியை மறக்க முடியாது.தமிழ் மீடியத்தில் படித்த நான், சி.ஏ., படிப்பில் சாதனை படைத்ததை பெருமையாக கருதுகிறேன். தாய் மொழியான தமிழும், சொந்த ஊரும் என் அடையாளங்கள் என்பதை மறக்க மாட்டேன். சூழ்நிலை எப்படி இருந்தாலும், சரியான வகையில் முயன்றால் வெற்றி கிடைக்கும் என்பதை அனுபவபூர்வமாக தெரிந்து கொண்டேன்.நல்ல நிறுவனத்தில் வேலைக்கு சேர்ந்து, விரைவில் என் தந்தைக்கு ஓய்வு கொடுக்க வேண்டும். படிக்க ஆர்வம் இருந்தும், பணமின்றி கஷ்டப்படும் மாணவர்களுக்கு எதிர்காலத்தில் உதவி செய்ய விரும்புகிறேன். சி.ஏ., படிப்பில் சாதிப்பதற்கான முறைகளை, இப்படிப்பை தேர்வு செய்து படிப்பவர்களுக்கு கூறி, வழிகாட்ட தயாராக இருக்கிறேன்.இவ்வாறு, சாதனையாளர் பிரேமா நெகிழ்ச்சியுடன் கூறினார்.


படிப்பில் சுட்டி

பிரேமா, 10ம் வகுப்பு பொதுத்தேர்வில், 79 சதவீதம் மதிப்பெண் எடுத்தார். பிளஸ் 2 தேர்வில், 80 சதவீதமும், பி.காம்., படிப்பில், 90 சதவீதமும், எம்.காம்., படிப்பில், 80 சதவீதமும் மதிப்பெண் எடுத்து, தொடர்ந்து படிப்பில் சிறந்து விளங்கி வந்துள்ளார். விடாமுயற்சியுடன் படித்ததால் மிகவும் கடினமான தேர்வாக கருதப்படும் , சி.ஏ., படிப்பிலும், 75.87 சதவீதம் எடுத்து சாதித்துள்ளார்.

மாணவிக்கு ரூ.10 லட்சம்

தமிழக முதல்வர் ஜெயலலிதா வெளியிட்டுள்ள அறிக்கை:அனைவராலும் வெற்றி பெறுவதே கடினம் என கூறும், சார்ட்டட் அக்கவுண்டன்ட் இறுதித் தேர்வில், அகில இந்திய அளவில் முதலிடம் பெற்று, சாதனை படைத்துள்ளார். சாதாரண ஏழை குடும்பத்தில் பிறந்து, நிதித்துறையில் உயரிய கல்வியாக கூறப்படும், சி.ஏ., தேர்வில், முதலிடம் பெற்ற பிரேமாவிற்கு பாராட்டுக்கள்.பிரேமாவிற்கு, தமிழக அரசின் சார்பில், 10 லட்சம் ரூபாய், ஊக்கத் தொகை வழங்கப்படும்.இவ்வாறு, அதில் கூறியுள்ளார்.

- தினமலர் செய்தியாளர்

திங்கள், 12 நவம்பர், 2012

சூரிய ஒளி அடுப்பு - கண்டறிந்து அருந்திறல்

சூரிய ஒளி அடுப்பு - கண்டறிந்து சாதனை
தேவகோட்டை: மின்வெட்டை சமாளிக்க, தேவகோட்டை மாணவர்கள், "சூரிய ஒளி அடுப்பை' கண்டுபிடித்து சாதனை படைத்து உள்ளனர்.தினமும், 16 மணி நேரம் மின்வெட்டு செய்யப்படுகிறது. காஸ் சிலிண்டர், மண்ணெண்ணெய் தட்டுப்பாடும் பெண்களை அச்சுறுத்துகிறது.இதற்குத் தீர்வுகாண, தேவகோட்டை லோட்டஸ் பள்ளி மாணவர்கள், "சூரிய ஒளி சமைப்பான்' என்ற பெயரில், சூரிய ஒளி அடுப்பை கண்டறிந்து உள்ளனர்.மாணவர்கள் ரஞ்சனி, மணிமாறன், அபினேஷ், அட்சயா, பார்கவி ஆகியோர் ஆசிரியைகள் சண்முகவள்ளி, ஜாஸ்மின் வழிகாட்டுதல்படி, அடுப்பு தயாரித்து உள்ளனர். மரப் பெட்டிக்குள் கறுப்பு வண்ணமிட்ட துத்தநாகத் தகட்டை வைத்துள்ளனர். அதில், ஒளி ஊடுருவும் வகையில் கண்ணாடி தட்டும், ஒளியை பிரதிபலிக்கும் வகையில், முகம் பார்க்கும் கண்ணாடியை மேலேயும் இணைத்துள்ளனர். சமைக்கத் தேவையான பொருளை பாத்திரத்தில் போட்டு, கண்ணாடியால் மூடினர். முகம் பார்க்கும் கண்ணாடி மூலம் சூரியஒளி பிரதிபலித்து, அடுப்புக்குள் செல்லும்போது, துத்தநாகத் தகட்டில் வெப்பம் அதிகரிக்கும். இதன் மூலம் சமையல், "ரெடி'. முதற்கட்டமாக, மாணவர்கள் அடுப்பில் வெந்நீர், காய்கறி, பருப்பை வேகவைத்து காண்பித்தனர்.நவ., 18 இல் மானாமதுரையில், தேசிய இளம் விஞ்ஞானிகள் மாநாடு நடக்கிறது. அதில், இத்தயாரிப்பு வைக்கப்படும் என, கூறப்பட்டது.
-தினமலர்

ஞாயிறு, 14 அக்டோபர், 2012

"யார் வேண்டுமானாலும் சாதிக்கலாம்!'

"யார் வேண்டுமானாலும் சாதிக்கலாம்!'
தினமலர்
கண்ணாடிச் சிற்பங்கள் மற்றும் நவீன மெழுகுவர்த்திகள் செய்யும் தொழிலில் ஈடுபட்டுள்ள வர்ஷா: என் சொந்த ஊர், குஜராத். "ஆர்க்கிடெக்சர்' டிப்ளமா முடித்தேன். வேலை தேடிக் கொண்டிருந்த சமயத்தில் தான், சென்னையில் பிசினஸ் செய்து கொண்டிருந்தவருடன், எனக்குத் திருமணம் நடந்தது. பின், ஒரு நடன நிறுவனத்தில், வரவேற்பாளராகப் பணியில் சேர்ந்தேன். குடும்பத்தை கவனிக்க நேரம் போதாததால், வேலையை விட்டுவிட்டேன். அடுத்த சில மாதங்களில், என் கணவருக்கு, பிசினசில், பெருத்த நஷ்டம் ஏற்பட்டு விட்டது.
குழந்தைகளுக்கு பள்ளி கட்டணம் கட்டக் கூட, கையேந்தி நிற்க வேண்டிய நிலை. அப்போது தான், ஒரு கண்காட்சி மூலம், கண்ணாடிச் சிற்பங்கள் செய்யும் தொழில், எனக்கு அறிமுகமானது. கண்காட்சியில், கண்ணாடிச் சிற்பங்களின் விற்பனையும், அதற்கு மக்களிடம் இருந்த வரவேற்பையும் கவனித்தேன். "இந்த தொழிலை, நாமே செய்யலாமே' என, யோசித்தேன்.கண்ணாடிச் சிற்ப தொழில் பயிற்சி எடுத்தேன். கடன் வாங்கி, மூலப் பொருட்கள் வாங்கினேன். வீட்டிலேயே விதவிதமான கண்ணாடிச் சிலைகள் செய்து, தெரிந்தவர் மூலம், தயாரிப்புகளை விற்பனைக்கு வைத்தேன். நேர்த்தியான வடிவமைப்பால், நல்ல வரவேற்பும், வருமானமும் கிடைத்தது.கண்ணாடிச் சிற்ப தொழிலுடன் கூடவே, மெழுகுவர்த்திகள் செய்யும் தொழிலிலும் இறங்கினேன். நட்சத்திர ஓட்டல்களில் பயன்படுத்தும் மெழுகுவர்த்திகளை தயாரித்தால், வெற்றி நிச்சயம் என்பதால், அதற்கான பயிற்சிகளை எடுத்தேன்.சமையல் நேரம் போக, மீதி நேரங்களில் என் வீட்டு அடுப்படி, மெழுகுவர்த்தி தொழிற்சாலையாக மாறியது. கற்பனைத் திறனை பயன்படுத்தி, பூ, பட்டாம் பூச்சி என, பல வடிவங்களில் மெழுகுவர்த்திகள் செய்தேன். இதற்காக, "நம்பர் ஒன் குவாலிட்டி' மெழுகை மட்டுமே பயன்படுத்தினேன்.என் மகன், மகள் இருவரும், என் தயாரிப்புப் பொருட்களின் விற்பனைக்காக, "வெப் சைட்' உருவாக்கித் தந்தனர். இதனால், என் தயாரிப்புகளுக்கு, வெளிநாடுகளிலும், வரவேற்பு கிடைக்கிறது. கொஞ்சம் பணம், கற்பனைத் திறன், மனதில் உறுதி இருந்தால், யார் வேண்டுமானாலும் சாதிக்கலாம்.

வியாழன், 13 செப்டம்பர், 2012

அருந்திறலுக்கு அகவை தடை யல்ல!

சொல்கிறார்கள்
 
 
அருந்திறலுக்கு அகவை தடை  யல்ல!  
 
தன் 86 வயதிலும், மாணவர்களுக்கு கைப் பந்து விளையாட்டு பயிற்சி அளிக்கும், நடேச ரெட்டி: திருத்தணியிலுள்ள, டாக்டர் ராதாகிருஷ்ணன் மேல் நிலைப் பள்ளியில் படித்த போது, தாலுகா அலுவலகத்தில், "கிளார்க்'காகப் பணிபுரிந்த, பாலகிருஷ்ணன் என்பவரின் தூண்டுதலால், பள்ளியில் நடக்கும், கைப்பந்து விளையாட்டில் பங்கேற்றேன். பள்ளியில் படித்த போதே குண்டு எறிதல், தட்டு எறிதல் போட்டிகளிலும் பரிசுகள் வென்றுள்ளேன். சைதாப்பேட்டை, ஒய்.எம்.சி.ஏ., உடற்கல்வியியல் கல்லூரியில், ஓராண்டு படிப்பு முடித்ததும், நான் படித்த பள்ளியிலேயே, எனக்கு வேலை கிடைத்தது. அங்கு இரண்டு ஆண்டுகள் பணிபுரிந்த பின், ஒரு கல்லூரியில் உதவி உடற்கல்வி இயக்குனராகப் பணியாற்றினேன். அப்போது, கைப்பந்து அணியை தயார் செய்து, மாநில அளவிலான போட்டிக்கு அனுப்பி வைத்தேன். எங்கள் கல்லூரி அணியினர், முதல் பரிசு வென்றனர். கைப்பந்து பயிற்றுனர் பயிற்சிக்காக, தமிழக கைப்பந்து சங்கம் என்னை, பஞ்சாப் மாநிலம், பாட்டியாலாவுக்கு அனுப்பி வைத்தது. அங்கு பயிற்சி முடித்த பின், கடலூர், அண்ணா விளையாட்டு மைதானத்தில், கைப்பந்து பயிற்றுனராக, அரசு வேலை கிடைத்தது. அந்தப் பணியின் போது, 10க்கும் மேற்பட்ட மாநில அளவிலான, கைப்பந்துப் போட்டிகளை நடத்தி உள்ளேன். 26 ஆண்டுகள் கைப்பந்து பயிற்றுனராக இருந்து, ஓய்வு பெற்றேன். உத்தர பிரதேசத்தில் நடந்த முதியோர் தடகளப் போட்டியில், குண்டு எறிதல், ஈட்டி எரிதல், வட்டு எறிதல் போட்டிகளில் பங்கேற்று, தங்கப்பதக்கம் வென்றேன். வரும், நவம்பர் மாதம், சீனாவில் நடக்கும், ஆசிய அளவிலான மூத்தோர் தடகளப் போட்டியில் பங்கேற்க முயற்சிக்கிறேன். இன்னும் எவ்வளவு நாள் விளையாட முடியுமோ, விளையாடிக் கொண்டே இருப்பேன். தினமும் காலை ஒரு மணி நேரம் உடற்பயிற்சி, நடைப் பயிற்சி, உணவுக் கட்டுப்பாடு, மாணவர்களுக்கு கைப் பந்து விளையாட்டுப் பயிற்சி ஆகியவையே, என் இளமை ரகசியம்.