வான்பயணவியலில் அருவினை

ஏவியானிக்சில் உலக ச் சாதனை

உலகிலேயே மிக ச் சிறந்த, குட்டி உளவு விமானத்தை க் கண்டுபிடித்த தமிழன், செந்தில் குமார்: நான், சென்னையில் உள்ள, எம்.ஐ.டி., பொறியியல் கல்லுாரியில், இணை பேராசிரியராக பணியாற்றுகிறேன். ஏவியானிக்ஸ் எனும், வான் பயண மின்னணுவியலில் ஆர்வமுள்ள மாணவர்களை ஒன்றிணைக்கும் விதமாக, தக்ஷா என்ற குழுவை, கல்லுாரியில் உருவாக்கினோம்.இக்குழுவில்உள்ள மாணவர்களின், பல நாள் முயற்சிக்கு பின், ஆட்கள் இல்லாமலே பறக்கும், 1.8 கிலோ எடையுள்ள, ஒரு குட்டி விமானத்தை உருவாக்கினோம். அதன் அடிபாகத்தில், கேமரா மற்றும் ஜி.பி.எஸ்., தொழில்நுட்பம் பொருத்தினோம். ரிமோட் கன்ட்ரோல் மூலம் இயங்கும் இந்த விமானம், வானத்தில் பறந்தபடியே, போட்டோ, வீடியோ எடுத்து அனுப்பினால், கீழே உள்ள, லேப்டாப்பில் பார்க்கும் வசதி உள்ளது.இவ்விமானத்தை நில அளவீடுகள், விண்வெளி, புவியியல் ஆராய்ச்சி, ராணுவம், இயற்கை பேரிடர், கலவரம் மற்றும் மக்கள் நெரிசலை கண்காணிக்க என, பலவற்றிற்கு பயன்படுத்தலாம்.அண்மையில், ஒரு நினைவு நாள் நிகழ்ச்சியின் போது, மதுரையில் பதற்றம் நிலவியது. அப்போது, நாங்கள் உருவாக்கிய ஆளில்லா குட்டி உளவு விமானம் மூலம், போலீசார் எளிமையாக கண்காணித்து பதற்றத்தை தணித்தனர். 2012ல், அமெரிக்க ராணுவத்தின் அங்கமான, டார்பா ஆளில்லா விமானங்களுக்கான, சர்வதேச போட்டியை நடத்தியது.மொத்தம், 150 நாடுகளுடன் போட்டியிட்டு, ஆறு நாடுகள் பங்கேற்கும் இறுதி சுற்றுக்கு முன்னேறினோம். 150 அடி உயரமுள்ள மரங்களுக்கு இடையில், எங்களை விட்டு விட்டு, 5 கி.மீ., தொலைவில் உள்ள சாலையில் நடக்கும் நிகழ்வுகளை, கீழே உள்ள லேப்–டாப்பில் காண்பிக்க கூறினர்.அமெரிக்க கடற்படை விமானம் உட்பட, மற்ற நாடுகளின் குட்டி விமானங்கள் கீழே விழ, எங்கள் விமானம், பேட்டரி தீரும் வரை, மேலேயே பறந்தது.மேலும், அமெரிக்க ராணுவத்தினர் கூறிய அனைத்தையும் சரிவர செய்து, உலகின்மிக சிறந்த குட்டி உளவு விமானம் என, அமெரிக்க ராணுவத்தின் டார்பா, சான்றுஅளித்து பாராட்டியது.

விரைவான அருவினைக்கு வினைத்திறன் இன்றியமையாதது!

வேகமான சாதனைக்கு விவேகம் அவசியம்!

அமெரிக்காவில், மூன்று லட்சம் இளம் ஆராய்ச்சியாளர்களை உருவாக்கியவரும்; பல துறைகளில் ஆராய்ச்சி செய்ததற்காக பத்மஸ்ரீ விருது பெற்ற, சுப்ரா சுரேசு: நான், சென்னையில் வளர்ந்தவன். சென்னை ஐ.ஐ.டி.,யில், ‘கெமிக்கல் இன்ஜினியரிங்’ முடித்து, மேற்படிப்பிற்காக கடன் வாங்கி, 100 டாலர் பணத்துடன், அமெரிக்கா சென்றேன். என் முதல் முனைவர் பட்டத்தை, எம்.ஐ.டி., யில், 1981ல் பெற்று, அங்கேயே ஆசிரியராக பணியாற்றினேன். ஆசிரியப் பணியின் போதே, ஆராய்ச்சியிலும் ஈடுபட்டு, 250 ஆராய்ச்சி கட்டுரைகள், ஆறு புத்தகங்களை எழுதியுள்ளேன். பொறியியல், மருத்துவம், ரசாயனம், உயிரியல் என, பல துறைகளில் ஆராய்ச்சியில் ஈடுபட்டு, 22 புதிய கண்டுபிடிப்புகளுக்கு, காப்புரிமையும் பெற்றிருக்கிறேன். எம்.ஐ.டி., பல்கலை கழகத்தில், ஐந்து வெவ்வேறு துறைகளின் தலைவராக பணியாற்றியதை, இன்றளவும் பெருமையாக கருதுகிறேன். ஏனெனில், இச்சாதனையை செய்த முதல் ஆசிய இனத்தவர் நான் தான். பல துறைகளில் ஆராய்ச்சி செய்து சாதித்ததற்காக, ‘பத்மஸ்ரீ’ விருது வழங்கி, இந்திய அரசு பாராட்டியது.
‘என்.எஸ்.எப்.,’ எனும், தேசிய அறிவியல் அறக்கட்டளை தான், அமெரிக்காவின் மிக உயர்ந்த அறிவியல் அமைப்பு. இங்கு, விஞ்ஞான ஆராய்ச்சிகளையும், புதிய கண்டுபிடிப்புகள் செய்ய இளைஞர்களை ஊக்குவித்து, நிதி உதவியும் செய்து வருகிறது. அமெரிக்க அதிபர் ஒபாமா, இந்த அறிவியல் அறக்கட்டளையின் தலைவராக, 2010ம் ஆண்டு என்னை நியமித்தார்.
நான், கடந்த ஆண்டு மட்டும், மூன்று லட்சம் இளம் ஆராய்ச்சியாளர்களை உருவாக்கியதோடு, 1,500க்கும் மேற்பட்ட நிறுவனங்களுக்கு, நிதி உதவி செய்து, பல புதிய ஆராய்ச்சிகளுக்கு வழிவகுத்துள்ளேன். அமெரிக்க பல்கலை கழகம் ஒன்றின் தலைவர் பொறுப்பை ஏற்க, அறக்கட்டளை பணியிலிருந்து விலகிய போது, அமெரிக்காவின் விஞ்ஞான வளர்ச்சிக்கு உதவியதாக, அதிபர் ஒபாமாவே என் திறமையை பாராட்டினார். சாதனைகளை வேகமாக செய்தாலும், விவேகம் அவசியம்.

மூச்சுக் காற்றால், 86 மெழுகுவர்த்திகளை அணைத்துக் "கின்னசு' அருவினை முயற்சி - பயனுண்டா?

மூச்சு க்காற்றால், 86 மெழுகுவர்த்திகளை அணைத்துக் "கின்னசு'  அருவினை முயற்சி - பயனுண்டா?

இராமநாதபுரம்:ராமநாதபுரத்தில், மூச்சு காற்றால், 86 மெழுகு வர்த்திகளை அணைத்து, "கின்னஸ்' புத்தகத்தில் இடம் பெறுவதற்காக, இளைஞர் சாதனை நிகழ்த்தினார்.

ராமநாதபுரம், வெளிப்பட்டிணத்தை சேர்ந்தவர், சங்கரநாராயணன், 29. இவர், 2008ல், வாயால் தொடர்ந்து ஊதி, 151 மெழுகுவர்த்திகளை அணைத்து, கின்னஸ் சாதனை புரிந்துள்ளார். நேற்று, கின்னஸ் சாதனைக்காக கலெக்டர் அலுவலக வளாகத்தில், ஒரு ஸ்டாண்டில், 153 மெழுகுவர்த்திகளை எரியவிட்டார். பின், மூச்சு காற்றால், 86 மெழுகுவர்த்திகளை அணைத்தார்.இவர் கூறியதாவது: படிக்கும் வயதில் இருந்தே ஏதாவது ஒன்றில் சாதனை புரிய வேண்டும் என்ற ஆசையின் வெளிப்பாடே இது. இதற்காக, ஐந்து மாதம் மூச்சு பயிற்சி பெற்றேன். இதற்கு முன்னர், தென்கொரிய நாட்டை சேர்ந்த கி சாங் ஹான் என்பவர் 2011ல், மூச்சு காற்றால் 54 மெழுகுவர்த்திகளை அணைத்து கின்னஸ் சாதனை புரிந்தார். இதை முறியடிக்கவே, இந்த முயற்சி, என்றார்.

எந்தப் பணியிலும் அருவினை ஆற்றலாம் - தொடரி ஓட்டுநர் தீப்தி

எந்தப் பணியிலும் அருவினை ஆற்றலாம் - தொடரி ஓட்டுநர் தீப்தி

மதுரை :ஆண்களுக்குப் பெண்கள் சளைத்தவர்கள் இல்லை என்பதற்கு உதாரணமாக திகழ்கிறார், மதுரையில் ரயில் இன்ஜின் டிரைவராக (உதவி லோகோ பைலட்) நியமிக்கப்பட்டுள்ள தீப்தி, 26. ""எந்தப் பணியையும், ஆர்வமுடன் செய்தால் சாதிக்கலாம்,'' என்கிறார்.

நவீன தொழில் நுட்ப உலகில், பெண்கள் அனைத்து துறைகளிலும் கால் பதித்து வருகின்றனர். சைக்கிள் முதல் சகல வாகனங்களையும் ஓட்டி சாதனை படைக்கின்றனர். கடின பணியாக கருதப்படும், ரயில்வே இன்ஜின் டிரைவராக பணியை துவக்கியிருக்கிறார், திருவனந்தபுரம் தீப்தி.அப்பா பாலகிருஷ்ணன், இறந்து விட்டார். அம்மா அம்பிகா குடும்பத் தலைவி. சகோதரி தீபா, தனியார் நிறுவனத்தில் பணிபுரிகிறார். தீப்தி, 2009ல் எலக்ட்ரிக்கல்லில் டிப்ளமோ பெற்றார். சென்னையில் வேலை தேடிய நிலையில், ரயில்வே தேர்வாணையம் லோகோ பைலட் தேர்வு அறிவிப்பை வெளியிட்டது. சிறிய வயதிலிருந்து, ரயில் பயணத்தில் உற்சாகம் கொண்ட தீப்தி, ரயில்வே தேர்வில் வெற்றி பெற்று, 2012ல் லோகோ பைலட் பயிற்சி பெற்றார். ஜூலை 4 முதல் மதுரை கோட்டத்தில், பாசஞ்சர் ரயிலில் டிரைவராக பணிபுரிந்து வருகிறார்.

நேற்று திண்டுக்கல்-மதுரை ரயிலை, பைலட் வினோத்குமாருடன் இணைந்து, தீப்தி ஓட்டி வந்தார். மதுரை ஸ்டேஷனில் நின்ற பெண் பயணிகள், அவருக்கு கை குலுக்கி வாழ்த்து தெரிவித்தனர்.""எந்த பணியையும் ஆர்வம், உற்சாகத்துடன் திட்டமிட்டு செய்தால், சாதிக்கலாம். இரவில் ரயில் ஓட்டுவது, பிரச்னையாக தோன்றவில்லை. ரயிலை ஓட்டும் போது, பயணிகளின் பாதுகாப்பு தான் மனதில் தோன்றுகிறது. அதை வைத்து, கவனம் செலுத்துவதால், பணி கடினமாக தெரியவில்லை,'' என்கிறார் தீப்தி. இவரை வாழ்த்த 86810 28212.

மூன்றாம் நபர்:

மதுரை ரயில்வே கோட்டத்தில் ஏற்கனவே சாந்தி, பெல்ஷியா ஆகியோர் இன்ஜின் டிரைவர்களாக பணிபுரிந்துள்ளனர். தற்போது அவர்கள் அலுவலக பணியில் உள்ளனர். தீப்தி, மூன்றாவது நபர். "இவர் ரயில்களை நேர்த்தியாக இயக்குவதாக,' சக ஊழியர்கள், குறிப்பிட்டனர்.

80 அகவை சப்பான் முதியவர் எவரெசுட்டில் ஏறி அருவினை

80  அகவை சப்பான் முதியவர் எவரெசுட்டில் ஏறி  அருவினை

பதிவு செய்த நாள் : வியாழக்கிழமை, மே 23, 11:48 AM IST

  0 

காட்மாண்டு, மே 23- 

ஜப்பானைச் சேர்ந்தவர் யுசிரோ மியுரா. இவருக்கு வயது 80. இவர் உலகிலேயே உயரமான சிகரமான எவரெஸ்டில் ஏறி சாதனை  படைத்துள்ளார். கடல் மட்டத்திலிருந்து 29 ஆயிரத்து 28 அடி உயரம் கொண்ட எவரெஸ்ட் சிகரத்தின் உச்சியை இவர் இன்று காலை 8.30  மணியளவில் அடைந்தார். 

நான்கு முறை இதய அறுவை சிகிச்சை செய்து கொண்ட இந்த முதியவர், 60 ஆண்டுகளுக்கு முன் எட்மன்ட் ஹிலாரி ஏறிய அதே  பாதையில் சென்று இந்த சாதனையை செய்துள்ளார். இவருடன் மகன், 3 ஜப்பானியர்கள், 6 நேபாள மலையேற்ற வீரர்களும் சென்றனர். 

மியுரா முதல் முறையாக கடந்த 2003-ம் ஆண்டு எவரெஸ்ட் சிகரத்தில் ஏறினார். அதை தொடர்நது 2008-ம் ஆண்டு தனது 76 வது வயதில் இரண்டாம் முறையாக எறினார். 

நோபாளைச் சேர்ந்த மின் பகாதூர் 2008-ம் ஆண்டு தனது 76 வது வயதில் எவரெஸ்டில் ஏறி கின்னஸ் சாதனை படைத்தார். இந்த சாதனையை 80 வயது மியுரா தற்போது முறியடித்துள்ளார். 

ஆனால் இந்த வார இறுதியில், எவரெஸ்ட் சிகரத்தில் 81 வயதாகும் மின் பகாதூர் மீண்டும் ஏறவுள்ளார். இதனால், மியுராவின் சாதனை மிக விரைவில் முறியடிக்கப்படலாம் எனறு கூறப்படுகிறது. 

எவரெஸ்ட் சிகரத்தில் இது வரை 4 ஆயிரம் பேர் ஏறியுள்ளனர். அதில் 240 பேர் தங்கள் முயற்சியின் போது உயிரிழந்துள்ளனர்.

காலை இழந்த அருணிமா : எவரெசுட்டு ஏறி அருவினை

ஒரு காலை இழந்த கைப்பந்து வீராங்கனை அருணிமா : எவரெசுட்டு உச்சியில்  ஏறி  அருவினை

காத்மாண்டு: ஓடும் ரயிலில் இருந்து தூக்கி எறியப்பட்டதால், ஒரு காலை இழந்த இளம் பெண், அருணிமா சின்கா, உலகின் மிக உயரமான சிகரம், எவரெஸ்டில் ஏறி, சாதனை படைத்துள்ளார்.உத்தர பிரதேசத்தை சேர்ந்தவர், அருணிமா சின்கா, 25. தேசிய அளவில், கைப்பந்து போட்டிகளில் பங்கேற்றவர். 2011ம் ஆண்டு, லக்னோவிலிருந்து, டில்லிக்கு ரயிலில் சென்று கொண்டிருந்தார்.ரயிலில் நுழைந்த கொள்ளையர்கள், பயணிகளிடம் இருந்து உடமைகளை திருடினர். அவர்களை தீரத்துடன் எதிர்த்து போராடிய அருணிமாவை தாக்கிய கொள்ளையர்கள், ஓடும் ரயிலில் இருந்து வெளியே தூக்கி எறிந்தனர்.அடுத்த தண்டவாளத்தில் சென்ற ரயில் மோதி, பலத்த காயமடைந்த அருணிமா, ஒரு காலை இழந்தார்.
முழங்காலுக்கு கீழே, அவரின் ஒரு கால் வெட்டி எடுக்கப்பட்டது. இடுப்புப் பகுதியில் படுகாயமடைந்த அவர், பல மாதங்கள், படுத்த படுக்கையாக சிகிச்சை பெற்றார்.பிறர் தன்னை பரிதாபமாக பார்ப்பதை தவிர்க்க, மிகப் பெரிய சாதனையை செய்ய வேண்டும் என நினைத்த அவர், உத்தரகண்ட் மாநிலத்தில் உள்ள, மலையேற்றக் குழுவில் சேர்ந்து, பயிற்சி பெற்றார்.எவரெஸ்ட் சிகரம் மீது ஏறிய, உலகின் முதல் இந்தியப் பெண் என போற்றப்பட்ட, பச்சேந்திரி பால், காலை இழந்த அருணிமாவுக்கு பயிற்சி அளித்தார்.உலகின் மிக உயர்ந்த சிகரமான எவரெஸ்ட் உச்சியை, நேற்று காலை, 10:55 மணிக்கு அடைந்த அருணிமா, அந்த சாதனையை படைத்த, ஒரு காலை இழந்த, முதல் இந்தியப்பெண் என்ற சாதனையைப் படைத்தார்.

சூரியத் திறனில் இயங்கும் மிதிவண்டி பொறி. கல்லூரி மாணவர் அருவினை

சூரியத் திறனில் இயங்கும் மிதிவண்டி பொறி. கல்லூரி மாணவர் அருவினை

திருவண்ணாமலை: திருவண்ணாமலை, அருணை இன்ஜினியரிங் கல்லூரி மாணவர்கள், சூரிய ஒளி சக்தியில் இயங்கும் சைக்கிளை உருவாக்கியுள்ளனர்.

இக்கல்லூரி மின்னியல் மற்றும் மின்னணுவியல் துறை மாணவர்கள் பார்த்தசாரதி, பிரவீன்குமார், ஜீவரத்தினம், சேகர் ஆகியோர் ஒருங்கிணைந்து, திட்டக்குழு கணேஷ்குமாரன் வழிகாட்டுதலின்படி சூரிய சக்தியில் இயங்கும் சைக்கிள் வடிவமைத்துள்ளனர். சூரிய சக்தியில் இயங்கும் சைக்கிளை நேற்று கல்<லூரி வளாகத்தில் செயல் விளக்கம் செய்து காட்டினர்.

புதிய கண்டுபிடிப்பை உருவாக்கிய மாணவ குழுவினர் கூறியதாவது:புவி வெப்பமயமாக, பெரிதும் காரணம் பெட்ரோலிய எரிபொருள் மூலம் இயங்கும் வாகனங்கள் தான். அதற்கு மாற்றாக, சூரிய சக்தியில் இயங்கும் இரு சக்கர வாகனமான சைக்கிளை உருவாக்கியுள்ளோம்.புதிய கலப்பின முறையில் சூரிய ஒளி ஆற்றல், மின்னோட்டம் உண்டாக்கும் இயந்திரம் மற்றும் மரபுவழி மின்சாரம் ஆகியவை மூலம் பசுமை புரட்சிக்கு வித்திடும் வகையில், இரு சக்கர வாகனத்தை வடிவமைத்திருக்கிறோம்.

ஆரம்ப நிலையில் மட்டும் சிறிது மின்சாரம் மூலம் மின் கலத்தை மின்னூட்டம் செய்ய வேண்டும். பின், அனைத்து தேவைகளுக்கும் சூரிய ஒளி மின்னூட்டம் உண்டாக்கும், இயந்திர வழியாக ஆற்றல் பெறப்பட்டு இயக்கப்படும்.வாகனத்தில் பயன்படும் மோட்டார்கள் இதற்கு முன், மின்னூட்டம் அல்லது மின்னிறக்கம் ஏதாவது ஒரு செயலை மட்டுமே செயல்படுத்த முடிந்தது. இதற்கு மாறாக, புதிய முயற்சியின் மூலம், இரு செயல்களும் ஒரே நேரத்தில் செய்ய முடியும்.

இதன் மூலம், பயண தூரம் அதிகரிப்பதுடன், மொபைல்ஃபோன்களுக்கும் சார்ஜ் செய்து கொள்ளும் வசதி உள்ளது.இவ்வாறு கூறினர்.புதிய கண்டுபிடிப்பை உருவாக்கிய மாணவர்களை, கல்லூரி துணை தலைவர் குமரன், முதல்வர் ராமநாதன், இயக்குனர் ஆறுமுகம், பதிவாளர் சத்தியசீலன் உள்ளிட்ட பலர் பாராட்டினர்.

தொடரட்டும் அருவினை ! தொலையட்டும் பார்வையற்றோர் தீவினை!: - எல்.முருகராசு

போட்டோ கேலரி

தொடரட்டும்   அருவினை ! தொலையட்டும் பார்வையற்றோர்  தீவினை!: - எல்.முருகராசு

 

சிவகாசி.
வியர்வை சிந்துபவர்களுக்கு உயர்வைதரும் ஊர்.
உழைப்பு எனும் உதிரம் சிந்துபவர்களால் வீட்டிற்கு மட்டுமல்ல நாட்டிற்கே அந்நிய செலவாணி என்ற படியளக்கும் கந்தக பூமி.
மண்தான் வறட்சியானது, மக்களின் மனமோ வளமானது.
தன்னை வளர்த்து ஆளாக்கிய ஊருக்காக முடியாவிட்டாலும், யாருக்காவது நன்மை செய்யவேண்டும் என்ற துடிப்பு கொண்ட மனிதர்களை கொண்ட பூமி,
இப்படிப்பட்ட சிவகாசியை விரும்பி ஏற்றுக்கொண்ட ஒருவரது சேவையால் இன்று இந்தியாவே திரும்பி பார்க்கிறது.
அவர்தான் நாட்டிலேயே அதிக அளவு தனி நபர் கண்களை தானமாக திரட்டி தந்தவரும், தந்து வருபவருமான பட்டாஸ்நகர் அரிமா சங்கத் தலைவர், கண்தானக்குழு பட்டயத் தலைவருமான ஜெ.கணேஷ்.
இதுவரை 2200 பேரிடம் இருந்து கண்களை தானமாக பெற்றதன் மூலம் 4400 பேர் பார்வை பெறுவதற்கு காரணமாக இருந்துள்ளார். தனது இந்த சேவைக்காக டாக்டர் பட்டம் உள்ளிட்ட பல்வேறு விருதுகளையும், பட்டங்களையும் பெற்றவர்.
ஒருவர் தனது கண்களை தானம் செய்வதாக எழுதி கொடுத்திருந்தால் கூட, இறந்த பிறகு அவரது குடும்ப உறவுகளைத் தாண்டி கண்களை தானமாக பெறுவது என்பது சென்னை போன்ற பெரு நகரங்களிலே அரிதான விஷயமாக இருக்கும் போது, சிவகாசியில் இருந்து கொண்டு இது எப்படி சாத்தியம் என்ற கேள்விக்கு வந்த உற்சாகமான ஒரு வரி பதில், நல்ல மனதோடு முயற்சித்தால் முடியாதது எதுவுமில்லை என்பதுதான்.
இன்னும் கொஞ்சம் விவரமாக என்றவுடன்...
நான் சிவகாசியில் பட்டாசு தொழில் செய்யறேன், இந்த தொழிலைத் தாண்டி ஒரு ஆத்ம திருப்தி வேண்டும் என்பதற்காக 18 வருஷத்துக்கு முன்னாடி சிவகாசி லயன்ஸ் கிளப்பில் சேர்ந்தேன். உறுப்பினரா சேர்ந்த புதுசல தையல் மிஷின் கொடுப்பது, பசங்களுக்கு பாடபுத்தகம் வழங்குவது போன்ற நிகழ்வுகளில் கலந்து கொண்டு போட்டோவுக்கு போஸ் கொடுத்துட்டு ஓடிவந்துட்டு இருந்தேன்.
சங்கத்தோட தலைவர்ங்ற பொறுப்புக்கு வந்ததும், ஏதாவது உருப்படியா செய்யணும்னு தோணுச்சு. அந்த நேரம் மதுரை அரவிந்த் கண் ஆஸ்பத்திரி நிர்வாகியை பார்க்க போயிருந்தேன், அவர் கார்னியா பிளாக்குக்கு கூட்டிட்டு போனார், நாலைஞ்சு வயது குழந்தைங்கள்ல இருந்து வயசானவங்க வரை பலர் தானமா வர்ர கண்ணுக்காக காத்திட்டு இருந்தாங்க..
ஒரு நாள் இரண்டு நாள் அல்ல பல வாரங்கள், மாதங்கள், ஆண்டுகளாக காத்திருப்பவர்களும் அதில் உண்டு.
இன்றைக்கு நமக்கான கண்வந்துரும், நாளைக்கு பார்வை கிடைச்சுடும் என்ற அவர்களது ஏக்கத்தை அருகில் இருந்து பார்த்தேன். அன்று என் தூக்கத்தை தொலைத்தேன்.
எத்தனையோ பேர் தினம், தினம் இறந்து போகிறார்கள். அவர்கள் யாருமே கண்களை தானமாக தரவில்லையா, நடிகர்கள், அரசியல்வாதிகள் பிறந்த நாளின் போது நிறைய பேர் கண்களை தானமாக தருவதாக பதிவு செய்கிறார்களே, அவர்கள் யாரும் இறப்பது இல்லையா என்று மருத்துவரிடம் கேட்டபோது அதெல்லாம் "பப்ளிசிட்டிக்காக' செய்பவை, சுத்த வேஸ்ட் என்றார். எனக்கு ஆச்சர்யத்தைவிட அதிர்ச்சியே மேலோங்கியது.
இறந்தவர்களின் நெருங்கிய உறவினர்களிடம் மனமாற்றம் ஏற்பட்டால்தான் இந்த கண்தானம் என்பது நடக்கும், எங்களுக்கு கண்கள் கிடைக்கும் என்றார் இறுதியாகவும், உறுதியாகவும்.
கனத்த இதயத்துடன் சிவகாசி திரும்பியதும் இனி கண்தானங்களை பெறுவதே பிரதான வேலை என்று தீர்மானித்துக்கொண்டேன்.
கண் தானத்தை வலியுறுத்தி ஊர் முழுவதும் டிஜிட்டல் போர்டு, பேனர், பல ஆயிரம் நோட்டீஸ், ஸ்டிக்கர், பஸ் பின்புறம் விளம்பரம் என்று நிறைய செலவழித்தேன் ஆனால் ஒரு கண்கூட தானமாக வரவில்லை
வேறு மாதிரி முயற்சிப்போம்னு கண்தானத்தை வலியுறுத்தி கோயில், சர்ச், மசூதி என்று எல்லா இடங்களிலும் எனது அணியோடு போய் பேசினேன், ம்ஹீம் பிரயோசனமில்லை.
பிறகு மாணவர்களை தயார்படுத்தினேன், அவர்கள் கண்களை பத்து நிமிடம் கட்டிவிட்டு அங்கேயும், இங்கேயும் போகவிட்டு, இந்த பத்து நிமிட பார்வை இல்லாததையே நம்மால் தாங்க முடியவில்லையே, வாழ்க்கை முழுவதும் பார்வை இல்லாமல் இருப்பதை எப்படி தாங்கமுடியும், இறந்த பிறகு புதையுண்டோ, எரிக்கப்பட்ட யாருக்கும் பிரயோசனமில்லாமல் போகக்கூடிய கண்களை தானமாக கொடுத்தால் இரண்டு பேர் கண்தானமாக பெறுவார்களே என்று சொன்னதும் அந்த வார்த்தை நிறையவே பலன் தந்தது.
அவர்கள் வீட்டைச் சேர்ந்தவர்கள் இறந்ததும் அவர்களே பேசி எங்களை வரச் சொல்லி கண்களை எடுத்துக்கொள்ளச் சொன்னார்கள், அப்படிக் கிடைத்த கண்கள் பொருத்தப்பட்ட இருவர் பார்வை கிடைத்த மகிழ்ச்சியை பரவசமாக எங்களிடம் பகிர்ந்து கொண்ட போது, இதற்காக என்ன வேண்டுமானாலும் செய்யலாம் என்று கண்களை தானமாக பெறுவதில் இன்னும் தீவிரமானேன்.
கண்களை தானமாக பெற்றவர்களை பேசவைப்பது, கண்களை தானமாக தந்தவர் பெயரைப் போட்டு போஸ்டர் அடித்து அவரது குடியிருப்பு பகுதி முழுவதும் நன்றியும், பாராட்டு சொல்லியும் ஒட்டுவது, கண்தானம் செய்தவரின் புகைப்படம் ஒட்டிய ஷீல்டை உள்ளூர் பிரமுகர் கையால் சம்பந்தபட்டவரின் குடும்பத்தாரிடம் கொடுத்து கவுரவிப்பது என்றெல்லாம் செய்தபின் தானமாக கண்கள் கிடைத்தது.
தானமாக கிடைக்கும் கண்கள் தாராளமாக கிடைக்க என்ன செய்வது என்று யோசித்தேன், அப்ப நீங்கதான் எனக்கு உதவ முடியும் என்று சுடுகாட்டில் இருப்பவர்கள், ஆம்புலன்ஸ் ஒட்டுபவர்கள், ஆஸ்பத்திரி எமர்ஜென்சி வார்டில் வேலை செய்பவர்கள் போன்றவர்களிடம் யாசித்தேன்.
இதன் காரணமாக ஊருக்குள் யார் இறந்தாலும் தகவல் வந்துவிடும்.
இறந்தவர்கள் வீட்டில் உள்ள மாணவர்கள் எப்படியும் பேசி வைத்திருப்பார்கள்.
இல்லாவிட்டாலும் கவலை இல்லை என்று மாலையோடு போய் மரியாதை செய்தபிறகு, உரியவர்களிடம் பக்குவமாக பேசி கண்களை தானமாக பெற்றுவிடுவோம். இறந்து போனது பெண்களாக இருந்தால் என் மனைவி பிரேமலதா தலைமையிலானவர்கள் போய் பேசி விடுவார்கள்.
நாங்களே சோகத்துல இருக்கோம், கண்ணை புடுங்க வந்துட்டான்ய்ங்க என்று கோபாவேசமாகத்தான் பேச ஆரம்பிப்பார்கள். ஆனால் அவர்களிடம் பொறுமையாக பேசி, பேசி கண்களை தானமாக பெற்றுவிடுவோம்.
இப்படி ஏற்பட்ட விழிப்புணர்வு காரணமாக கண்களை தானமாக தரும் முதல் மாவட்டம் என்ற பெயரை இவர் சார்ந்த விருதுநகர் மாவட்டம் பெற்றுள்ளது. இப்போது சிவகாசி மட்டுமின்றி நெல்லை, தூத்துக்குடி, மதுரை, தேனி, கன்னியாகுமரி, ஈரோடு, கோவை வரை பிரச்சாரத்திற்கு செல்கிறார். அங்குள்ள பள்ளி, கல்லாரி மாணவர்களிடம் மட்டும் இதற்காகவே இதுவரை 585 கருத்தரங்குகள் நடத்தியுள்ளார்.
கருத்தரங்கு என்பது கேள்வி, பதிலாக. பதிலுக்கு ஒரு பரிசாக நடக்கும், முடிவில் மாணவ, மாணவியரின் இதயத்தில் கண்தானம் குறித்து ஆழமாக பதிவு செய்வதாக இருக்கும்.
இது எனக்கு கிடைத்த வெற்றி அல்ல மக்களின் விழிப்புணர்வுக்கு கிடைத்த வெற்றி எனது அணியைச் சேர்ந்த டாக்டர் ராமன், ஒரு பைசா கூட வாங்கிக் கொள்ளாமல், இதுவரை 800 பேரின் கண்களை எடுத்து தந்துள்ளார். நள்ளிரவில் போன் வந்தால் கூட நானாச்சு என்று ஒடோடி சென்று உரிய வேலைகளை பார்க்கும் நண்பர்கள் ராமர், தனசேகரன், கணேசன், ராம்தாஸ், நர்ஸ் ராணி மற்றும் என் மனதை புரிந்து கொண்டு எனக்கு பக்கபலமாக இருக்கும் மகன் கோபி அவர்களின் ஒத்துழைப்பால் கிடைத்த வெற்றி.
ஆனாலும் இதனை வெற்றி என்று சொல்ல முடியாது காரணம் பார்வையில்லாதவர்கள் இந்த பாரத தேசத்தில் பல ஆயிரம் உள்ளனர். கண்களை தானமாக தருபவர்கள் வெறும் சில நூறு பேர்களாகவே இருக்கின்றனர், அதுவும் இப்போதுதான்.இந்த கண்தானம் என்ற இயக்கம் அனைவருக்கும் பரவி, பெருகி நாட்டில் பார்வையற்றவர்களே இல்லை என்ற நிலை வரவேண்டும், அதுவரை எனது கைகளும்,இதயமும் கண்களை தானமாக கேட்கும் இல்லையில்லை கெஞ்சும்...
இது குறித்து மேலும் விளக்கம் பெற தொடர்பு கொள்ளவும் ஜெ.கணேஷ் போன் எண்: 9843088828.

பெட்டிச் செய்தி ஒன்று... பார்வையற்றோரே இல்லையெனும் பாரதம் படைப்போம்.

ஒருவர் கண்தானம் இருவர் வாழ்வில் பிரகாசம்.

மண்ணுக்கும், நெருப்புக்கும் கொடுப்பதை மனிதர்க்கும் கொடுப்போம்.
இறந்தும் இறவாப்புகழுடன் வாழ இருவர் வாழ்வில் ஒளியேற்ற கண்தானம் செய்வோம்.

முயற்சி செய்யுங்கள், முடியும் உங்களால்.
பெட்டிச் செய்தி இரண்டு:

* ஒருவர் இறந்த பிறகே கண்களை தானமாக வழங்கமுடியும்.

* இறந்த நான்கு மணி நேரம் முதல் ஆறு மணி நேரத்திற்குள்ளாக கண்கள் அகற்றப்பட வேண்டும்.

* போன் செய்தால் போதும் கண்தானம் பெறுவோம் நேரில் வந்து கண்களை எடுத்துச்செல்வர்.

* கண்களை எடுக்க தனி அறையோ, இடமோ தேவையில்லை.

* பத்து நிமிடத்தில் கண்கள் எடுக்கப்பட்டுவிடும்.

* கண்தானம் பெறுவோர் வரும்வரை மின்விசிறியை நிறுத்திவிட்டு கண்களின் மீது ஈரமான பஞ்சை வைக்கவும். குளிர்சாதன வசதியிருந்தால் அதனை ஒடவிடவும்

* ஆண், பெண் இருபாலர்களும் எந்த வயதினரும் கண்களை தானம் செய்யலாம்.

* மஞ்சள் காமாலை, எய்ட்ஸ், மூளைக்காய்ச்சசல், வெறிநாய்கடியால் இறந்தவர்கள் மட்டும் கண்களை தானம் செய்யமுடியாது.

* கண்தானம் செய்ய முடிவு செய்தவர்கள் உள்ளூர் கண்மருத்துவமனையை உடனடியாக தொடர்பு கொள்ளவும். சிவகாசி மற்றும் அதன் சுற்று வட்டார பகுதி என்றால் 9842120908, 9442627556, 0462-2337103 போன்ற எண்களை தொடர்பு கொள்ளவும்.
 

ஓவியமாகத் தீட்டப்பட்ட தமிழ் : கல் உடைக்கும் தொழிலாளி அருவினை

http://www.dinamalar.com/more_picture_html.asp?Nid=691090

ஓவியமாக த் தீட்டப்பட்ட தமிழ் எழுத்து : கல் உடைக்கும் தொழிலாளி அருவினை

சேலம்: தமிழ் எழுத்துகளை, தூரிகையால், ஓவியமாக தீட்டி, சாதனை படைத்துள்ளார் கல் உடைக்கும் தொழில் செய்யும் வாலிபர்.சேலம் மாவட்டம், ஓமலூர் அடுத்த களரம்பட்டியை சேர்ந்த லட்சுமணன் மகன் நாராயணசாமி, 24. இவர் தாய் ராஜாத்தி. தாய், மகன் இருவரும், கிருஷ்ணகிரி மாவட்டம், ஓசூர், தொரப்பள்ளி கிராமத்தில் தங்கி, கல் உடைக்கும் தொழிலில் ஈடுபட்டு வருகின்றனர்.வேலை நேரம் தவிர்த்து, நாராயணசாமி, தமிழ்நாடு திறந்தநிலை பல்கலையில், பி.காம்., படித்து வருகிறார். தமிழில் உள்ள, 247 எழுத்துக்களை, 247 அடி பேனரில் எழுதி, சாதனைக்கு விதை போட்டுள்ளார்.

இதுகுறித்து, நாராயணசாமி கூறியதாவது:சிறு வயதிலேயே தந்தையை இழந்த நான், வறுமையால், மழைக்குக்கூட பள்ளிக்கூடம் ஒதுங்க முடியவில்லை. எனினும், படிக்க வேண்டும் என்ற ஆசை எனக்குள் ஊற்றெடுத்தது. என் தாத்தா பெரமச்சி வழிக்காட்டுதல்படி, அரிச்சுவடு வாங்கி, தமிழ் எழுத்துக்களை எழுதி, படிக்க கற்றுக் கொண்டேன். காலப்போக்கில், தமிழ் எழுத்துக்கள், 247ம் மனப்பாடம் செய்த பின், குறிப்பிடும் தமிழ் எழுத்தின், முன், பின் உள்ள எழுத்துக்களை, முறை பிறழாமல், சொல்லுவதில் தேர்ச்சி பெற்றேன். அதையடுத்து, "நன்றி' என்ற வார்த்தையை, ஒரு மி.மீ., அளவில் எழுதி, 11.11.2011 அன்று, "நன்றி என்றும் மறவாதே' என விழிப்புணர்வு ஏற்படுத்தி, உலக சாதனை புத்தகத்தில் இடம் பெற்றேன். அன்று முதல், நன்றி நாராயணசாமி என அழைக்கப்பட்டேன்.

தமிழில் மொத்தமுள்ள, 247 எழுத்துக்களையும், 247 அடி, அளவு பேனரில் ஓவியமாக தீட்டினேன். அதில், தமிழ் எழுத்து, 3.33 லட்சத்து, 333 முறையும், 247 தமிழ் எழுத்துக்கள், 9.99 லட்சத்து, 999 முறையும் இடம் பெற்றுள்ளன.இந்த பேனரை, 100 அடி தொலைவில் நின்று பார்த்தால், "தமிழ்' என்ற மூன்றெழுத்து மட்டும் தெரியும். 40-50 அடி தொலைவில் இருந்து பார்த்தால், 247 எழுத்துக்கள், 247 சதுரஅடி ஓவியமாக தெரியும். அருகில் சென்று பார்த்தால், எல்லா எழுத்துக்களும், தமிழ், தமிழ் என்றே தெரியும். இந்த எழுத்து சாதனைகள், 13 அடி உயரம், 19 அடி அகல பேனரில் இடம் பெற்றுள்ளது.இவ்வாறு, அவர் கூறினார். 

தானியங்கித் துடைப்பான், : மதுரையில் கல்லூரி மாணவர்கள் அருவினை

http://img.dinamalar.com/data/large/Tamil_News_large_684996.jpg

தானியங்கித் துடைப்பான்,  : மதுரையில் கல்லூரி மாணவர்கள்  அருவினை

கரும்பலகையில் உள்ள எழுத்துகளை த் தானே அழிக்கும் இயந்திரத்தை (டஸ்டர்) மதுரை வேலம்மாள் பொறியியல் கல்லூரி மாணவர்கள் உருவாக்கியுள்ளனர்.பள்ளி, கல்லூரிகளில் கரும்பலையில் ஆசிரியர்கள் எழுதியதை அழிக்கும் பழக்கம், பல ஆண்டுகளாக வழக்கத்தில் உள்ளது. இதில் எழும் தூசி, ஆசிரியர்கள், முதல் வரிசையில் உள்ள மாணவர்களின் நாசி, வாயில் புகுந்து, கண்களையும் "பதம்' பார்க்கின்றன. காற்றில் தூசி பறப்பதால் மூச்சு குழாயில் படிந்து திணறல், இரப்பை பாதிப்பு, ஆஸ்துமா பிரச்னைகளும் ஏற்படுகிறது. இதற்கு தீர்வு கிடைக்கும் வகையில், இக்கல்லூரி இயந்திரவியல் துறை தலைவர் மணிகண்டன் வழிகாட்டுதலில், தூசிகளை தானாக உள்வாங்கும் வகையிலான இயந்திரத்தை, மாணவர்கள் சுதர்சன், ஜான் பேட்ரிக், லக்ஷ்மண பாண்டியன் கண்டுபிடித்துள்ளனர்.

இயந்திரம் எவ்வாறு செயல்படுகிறது என்பது குறித்து மாணவர்கள் கூறியதாவது:இக்கருவி மிக சிறிய "டி.சி.', பேட்டரிகள் உதவியுடன், சுழலக்கூடிய உருளையும், கரும்பலகையின் மேற்பரப்பினை துடைக்கும் வகையில் "ஸ்பான்ச்' அடைப்பையும், தூசியை உறிஞ்சி உள்வாங்கும் வகையில் வெற்றிடத்தையும் கொண்டுள்ளது. "ஸ்பான்ச்' பரப்பு மூலம் கரும்பலகையை துடைக்கும்போது எழும் தூசியை, இயந்திரத்தில் உள்ள "இம்பெல்லரின்' உதவியுடன், காற்று அழுத்த வேறுபாட்டால் உள்வாங்கப்படுகிறது. பின், இத்தூசி, இயந்திரத்தின் பின்புறம் உள்ள மூடியினை சுற்றி எளிதாக அப்புறப்படுத்த முடியும். "டி.சி.', மோட்டாரினை 6 வோல்ட் ரீ சார்ஜர் பேட்டரி மூலம் இயக்கலாம். இக்கண்டுபிடிப்புக்கு மத்திய, மாநில அரசுகளின் விருதுகள் கிடைத்துள்ளன. காப்புரிமைக்கும் விண்ணப்பிக்கப்பட்டுள்ளது, என்றனர். தொடர்புக்கு: 96003 75600

தமிழக சிலந்தி மனிதன் சோதிராசு அருவினை

தமிழக சிலந்தி மனிதன் சோதிராசு  900 அடி உயரத்தில் இருந்து கீழே விழுந்தார்: காயத்துடன்  மருத்துவ மனையில் சேர்ப்பு

பதிவு செய்த நாள் : ஞாயிற்றுக்கிழமை, ஏப்ரல் 07, 10:03 AM IST

 

பெங்களூர், ஏப்.7-

தமிழகத்தின் சிலந்தி மனிதன் ஜோதிராஜ், ஜோக் அருவி மலையில் 900 அடி ஏற முயன்றபோது, கீழே விழுந்ததில் தலையில் படுகாயம் அடைந்தார்.

தமிழகத்தை சேர்ந்த சிலந்தி மனிதன் என்று புகழப்படுபவர் ஜோதிராஜ். 25 வயது ஆன அவர் மலை, உயரமான கட்டிடங்கள் போன்றவற்றில் எந்த பிடிமானமும் இல்லாமல், பாதுகாப்பு சாதனங்கள் இல்லாமல் ஏறி சாதனை படைத்தவர்.

சிறுவர்களுக்கும், இளைஞர்களுக்கும் அவர் பயிற்சி அளித்து வருகிறார். மேலும் பல்வேறு இடங்களுக்கு சென்று சிலந்திபோல மலையில் ஏறி சுற்றுலா பயணிகளை மகிழ்வித்து வருகிறார்.

குறிப்பாக கர்நாடக மாநிலம் சித்ரதுர்காவில் உள்ள கோட்டை சுவர்களில் அவர் அடிக்கடி ஏறி சுற்றுலா பயணிகளை பரவசத்தில் மூழ்கடிப்பது உண்டு. ஜோதிராஜ், சிமோகா மாவட்டம் சாகர் தாலுகாவில் உள்ள ஜோக் அருவி அருகே உள்ள மலையில் சுமார் 900 அடி உயரம் ஏறி சாதனை படைக்க திட்டமிட்டார்.

இதற்காக நேற்று காலை ஜோக் அருவி மலைக்கு வந்தார். அவருடைய அண்ணன் பாலகிருஷ்ணாவும் உடன் வந்திருந்தார். பொதுமக்களும், சுற்றுலா பயணிகளும் ஜோதிராஜின் சாதனையை பார்க்க அங்கு திரண்டனர்.

எந்த பிடிப்பும் இல்லாத ஜோக் அருவி மலையில் ஜோதிராஜ் கிடுகிடுவென ஏறினார். வெறும் கைகளால் மலையை பிடித்தபடி சுமார் 400 அடி உயரம் வரை ஏறியபோது, அவரது பிடி நழுவியது. இதனால் அங்கிருந்து அவர் கீழே விழுந்தார்.

அவர் மின்னல் வேகத்தில் மலையில் ஏறியபோது கைதட்டி உற்சாகம் அடைந்த பொதுமக்கள், அவர் கீழே விழுந்தபோது அதிர்ச்சியில் உறைந்து போனார்கள். அவர் கீழே விழுந்தபோது, மலையில் பெயர்ந்து இருந்த ஒரு கல் அவரது தலையின் பின் பகுதியில் வந்து மோதியது.

இதில் தலையில் இருந்து ரத்தம் கொட்டியது. என்றாலும் ரத்தம் சொட்டச்சொட்ட ஜோதிராஜ் எழுந்து தொடர்ந்து மலையேறினார். நிர்ணயிக்கப்பட்ட 900 அடியை அவர் வெற்றிகரமாக ஏறி சாதனை படைத்தார்.

பின்னர் அவரை உடனடியாக ஆஸ்பத்திரிக்கு அழைத்துச் சென்றனர். அங்கு அவருக்கு தீவிர சிகிச்சை அளிக்கப்பட்டது. தலையின் பின் பகுதியில் தையல்கள் போடப்பட்டது. அவருடைய அண்ணன் பாலகிருஷ்ணா அருகில் இருந்து கவனித்துக்கொள்கிறார்.

பாலகிருஷ்ணா கூறும்போது, ஜோதிராஜை பரிசோதித்த டாக்டர்கள், அவருக்கு ஆபத்து எதுவும் இல்லை என்று தெரிவித்தனர். அவர் நன்றாக இருக்கிறார் என்றார்.

கடந்த சில மாதங்களுக்கு முன் இதேபோன்று சித்ரதுர்காவில் கோட்டை சுவர் மீது ஏறியபோது ஜோதிராஜ் கீழே விழுந்து படுகாயம் அடைந்தார். ஆஸ்பத்திரியில் சிகிச்சை பெற்று, மீண்டும் தனது சாதனைகளை அவர் நிகழ்த்தி வருகிறார்.  

அருவினை ஆற்ற ஊனம் தடையல்ல: முதல் இடம் பெற்றார் மாற்றுத்திறனாளி

அருவினை ஆற்ற ஊனம் ஒரு தடையல்ல: பல்கலை., முதல் இடம் பெற்றார் மாற்றுத்திறனாளி

கோவை: "சாதிக்க ஊனம் ஒரு தடையல்ல; உறுதியான மனம் இருந்தால் போதும்' என்பதை நிரூபித்துக்காட்டியுள்ளார், பார்வை குன்றிய, கால்கள் செயலிழந்த இளைஞர் ஒருவர். தமிழ்நாடு திறந்த நிலை பல்கலைக்கழகம் நடத்திய பி.ஏ., தேர்வில் முதல் ரேங்க் பெற்று, தங்கப்பதக்கம் வென்றுள்ளார், இந்த மாற்றுத்திறனாளி இளைஞர்.

பல்லடம் அருகேயுள்ள சுல்தான்பேட்டையை சேர்ந்தவர் கிருஷ்ணமூர்த்தி - மல்லிகா தம்பதியர். இவர்களின் ஒரே மகன் சங்கர் சுப்ரமணியம், 26. பிறவியிலேயே 90 சதவீத பார்வை குறைபாடு உடையவர்; இரண்டு கால்களுக்கும் வளர்ச்சியில்லாமல், நடக்க முடியாது. பெற்றோர் உதவியின்றி நடமாட முடியாது. பார்வை குறைபாடு காரணமாக, உருவங்கள் நிழல்களாக தான் தெரியும்; வண்ண வேறுபாடுகளை முழுமையாக அறிய முடியாது. கண்ணொளி இல்லாவிட்டாலும், காதொலியை ஆழமாக மனதில் பதிய வைக்கும் அபார திறன் ஒன்று மட்டுமே, தெய்வம் தந்த வரம்; எந்த விஷயத்தையும் எளிதில் மறந்துவிடாத, நுட்பமான ஞாபக சக்தி உண்டு. அதைவிட மேலாக, சாதிக்க வேண்டும் என்ற திடமான உறுதி மனதில் உண்டு. இதுவே, சங்கர் சுப்ரமணியத்தை சாதனையாளராக மாற்றி வருகிறது. முழுமையாக பார்வை குறைபாடு இருப்போர், "பிரெய்லி' முறையில் படிக்க முடியும்; ஆனால், சங்கர் சுப்ரமணியத்துக்கு 10 சதவீத பார்வை இருக்கிறது; எனினும், பாட புத்தகங்களை படிக்க முடியாது; பிறரை வாசிக்கச் சொல்லி தான், இவரால் படிக்க முடியும். பாடங்களை மனம் பாடம் செய்து, "ஸ்கிரைப்' ஆசிரியர் உதவியுடன், தேர்வு எழுதி வருகிறார்.

கணுவாய் ஹோலிகிராஸ் மெட்ரிக் பள்ளியில் படித்து, 10ம் வகுப்பு தேர்வில் 62 சதவீத மதிப்பெண் பெற்று தேர்ச்சியடைந்தார். பாட புத்தகத்தை புரட்டாமல், பள்ளியில் ஆசிரியர்கள் சொல்லித் தந்த பாடங்களை மனதில் பதிய வைத்தே, இவர் தேர்வில் சாதித்து காட்டியுள்ளார். தற்போது, சென்னை தமிழ்நாடு திறந்தநிலை பல்கலைக்கழக பி.ஏ., பொருளாதாரம் பட்டப்படிப்பில், முதல் ரேங்க் வாங்கி, தங்கப்பதக்கம் வென்றுள்ளார். பல்கலையில் நடந்த விழாவில், கவர்னர் ரோசைய்யா தங்கப்பதக்கம் வழங்கி, சாதனை மாணவர் சங்கர் சுப்ரமணியத்தை கவுரவித்துள்ளார். இவரது தந்தை கிருஷ்ணமூர்த்தி, பல்லடம் அருகேயுள்ள காற்றாலையில் ஆபரேட்டராக பணிபுரிந்து வருகிறார். தாய், தந்தையின் தளராத ஊக்கமும், அரவணைப்பும், சிறப்பாசிரியர்களின் பயிற்சியும் சங்கர்சுப்ரமணியத்தை, படிப்பின் சாதனை படிகளில் ஏற வைத்துள்ளது. ""பொருளாதாரத்தில் முதுகலை பட்டம் பெறுவதே, எனது அடுத்த லட்சியம்,'' என்கிறார், சங்கர் சுப்ரமணியம்.

அவரது தந்தை கிருஷ்ணமூர்த்தி, தாய் மல்லிகா கூறியதாவது: பிறவியிலேயே கால்கள் ஊனம், கண் பார்வை குறைவுடன் பிறந்ததால், குழந்தையை வளர்ப்பதும், படிக்க வைப்பதும் சிரமம் என கருதினோம். எனினும், அர்ப்பணிப்புடன் வளர்த்து வந்தோம். இன்று, அந்த குழந்தை சாதனை இளைஞனாக மாறி எங்களுக்கு பெருமை சேர்த்துள்ளான். முதலில், பள்ளியில் சேர்க்க மிகவும் சிரமப்பட்டோம்; பல பள்ளிகளிலும் அட்மிஷன் கிடைக்கவில்லை. கணுவாய் ஹோலிகிராஸ் பள்ளியில், சேர்த்துக் கொண்டனர். அங்குள்ள ஆசிரியர்களின் ஊக்குவிப்பு, சிறப்பு ஆசிரியர்கள் ரகுபதி ஐயர், பத்மநாபன் ஆகியோரின் பயிற்சி ஆகியவை, எங்கள் மகனின் திறமையை வெளியே கொண்டு வர மிகவும் உதவியது.

சங்கர் சுப்ரமணியத்துக்கு இசையிலும் ஆர்வம் உண்டு. கோவை அரசு இசைக்கல்லூரியில் குரலிசை பிரிவில் படிக்க "அட்மிஷன்' கிடைத்தது. பார்வை குறைபாடு மற்றும் கால் ஊனம் உள்ள மாற்றுத்திறனாளி என்பதை கருத்தில் கொண்டு, வாரம் இரு முறை மட்டும் வகுப்புக்கு வர தனிப்பட்ட சலுகை அளிக்கப்பட்டது. ஆனால், சுல்தான்பேட்டையில் இருந்து கோவைக்கு காரில் வர வேண்டும் என்றால், தினமும் 1,000 ரூபாய் செலவாகும் என்பதால், பயிற்சியில் பங்கேற்க முடியவில்லை. எங்கள் மகனின் எதிர்காலத்தை கருத்தில் கொண்டு, அரசு வேலை அளித்து உதவ வேண்டும். இவ்வாறு, அவர்கள் தெரிவித்தனர்.

செயலிழந்த சிறுநீரகங்கள் - ஆனால், அருவினை ஆற்றத் துடிப்பு

 

சிறுநீரகங்கள் செயல் இழந்த நிலையிலும் சாதிக்க த் துடிக்கும் சிறுமியின் சோக க் கதை

அசாமில், இரண்டு சிறுநீரகமும் செயல் இழந்த நிலையில், உயிருக்கு போராடும் ஏழை மாணவி ஒருவர், 10ம் வகுப்பு தேர்வில் சாதனை படைக்கும் முயற்சியில், தேர்வுக்கு தீவிரமாக தயாராகி வருகிறார்.

அசாம் மாநிலம், ஜோர்கத் மாவட்டத்தில், ஒரு குக்கிராமத்தை சேர்ந்தவர் அவந்திகா. 15 வயது சிறுமியான இவர், படிப்பில் மிகவும் கெட்டிக்காரர்; நத்மால் - சுதா அகர்வாலா தம்பதியரின் மூன்றாவது மகள். மிகவும் ஏழை குடும்பத்தை சேர்ந்த இவருக்கு, ஆறாம் வகுப்பு படிக்கும்போதே சிறுநீரக கோளாறு ஏற்பட்டது. குடும்பத்தின் ஏழ்மை காரணமாக, நல்ல சத்தான உணவுகளை சாப்பிட முடியவில்லை. நாளுக்கு நாள் சிறுநீரகங்கள் சீர்கெட்டு வந்தன; இரண்டு சிறுநீரகங்களும் செயல் இழந்த நிலையில், சிகிச்சை பெறுவதற்காக ஐதராபாத்திற்கு அழைத்து சென்றுள்ளனர். அவந்திகாவை பரிசோதித்த டாக்டர்கள், கண்டிப்பாக, சிறுநீரக மாற்று அறுவை சிகிச்சை செய்தால் தான், காப்பாற்ற முடியும் என, கூறியுள்ளனர்.

சிறுநீரக மாற்று அறுவை சிகிச்சை செய்வதற்கு, போதுமான பணம் தங்களிடம் இல்லை என கூறி, அவந்திகாவின் பெற்றோர், ஆயுர் வேத சிகிச்சை அளிப்பதற்காக, மகாராஷ்டிரா மாநிலம் நாசிக்கிற்கு அழைத்து சென்றனர். ஆயுர்வேத சிகிச்சைக்கு பின், சில நாட்கள் அவர் நன்றாக இருப்பதுபோல் தெரிந்தாலும், கடந்த இரண்டு ஆண்டுகளாக தொடர்ந்து உடல் நிலை பாதிக்கப்பட்டு வந்து உள்ளது. இருப்பினும், மாற்று அறுவை சிகிச்சையை தவிர அவந்திகாவை காப்பாற்றுவதற்கு வழியில்லை என்ற கட்டத்திற்கு வந்து விட்டார் அவரின் தந்தை. இதற்காக, அரசு உதவி, தனிநபர் உதவி என, பலரையும் நாடி வருகிறார். ஆனால், அவரால் போதிய நிதியை திரட்ட முடியவில்லை. உயிருக்கு போராடி வரும் நிலையிலும், எப்படியும், 10ம் வகுப்பு தேர்வை எழுதியே தீருவேன் என்ற நம்பிக்கையுடன் அவந்திகா படித்து வருகிறார். அவரது குடும்பத்தாரும், பள்ளி நிர்வாகத்தினரும், தேர்வு எழுத வேண்டாம்; அறுவை சிகிச்சை செய்து கொள்ளலாம் என, முயற்சிகளை மேற்கொண்டு வருகின்றனர்.

இதற்கிடையில், அவந்திகாவுக்கு, ஒரு சிறுநீரகமாவது தானமாக கிடைக்குமா என, டாக்டர்கள் முயற்சிகளை மேற்கொண்டனர். ஆனால், துரதிருஷ்டவசமாக, அவந்திகாவின் ரத்த வகை "ஏபி பாசிட்டிவாக' இருப்பதால் இதுவரை, ஒரு சிறுநீரகம் கூட பெற முடியவில்லை. கடந்த ஒரு மாதமாக, அவருக்கு அளிக்கப்பட்ட மருந்து, மாத்திரைகள் வேலை செய்யவில்லை; தற்போது கடவுளின் கருணையை மட்டுமே நம்பி, உடல் நலிவடைந்த நிலையிலும், தேர்வுக்கு மும்முரமாக தயாராகி வருகிறார். அறுவை சிகிச்சைக்கு வாய்ப்பு ஏற்படும் பட்சத்தில், தேர்வுக்கு பிறகு பார்த்து கொள்ளலாம் என, நாட்களை நகர்த்தி வரும், அவந்திகா கூறுகையில், ""நோய் அதன் வேலையை செய்கிறது; நான் என் வேலையை செய்து கொண்டிருக்கிறேன்,'' என்கிறார். அவந்திகா படிக்கும் பள்ளியின் முதல்வர் அலோக் நந்தா கூறுகையில்,""அவந்திகா உடல்நிலை பாதிக்கப்பட்ட நிலையில் படிப்பில் என்றும் சோடை போனதில்லை;அவள் கண்டிப்பாக சாதிப்பாள். அவருக்காக பிராத்தித்து வருகிறேன்,'' என்றார்.

ஊரக அருவினைப் பெண்

முதல் பெண்காவலர்!
காவல் துறையில் சேவை செய்வதற்காக வே, திருமணம் செய்யாமல், 39 ஆண்டுகள் பணியாற்றி ஓய்வு பெற்ற ஆய்வாளர், செல்வி. வசந்தி: என், சொந்த ஊர் விழுப்புரம். அப்பா சாரங்கன், டீசல் இன்ஜின் மெக்கானிக். நான், எஸ்.எஸ்.எல்.சி., படித்து முடித்த நேரத்தில், தமிழக காவல் துறைக்கு, முதன் முறையாக, பெண்களையும் தேர்வு செய்வதாக, பத்திரி கையில் படித்தேன். வீட்டிற்கு தெரிந்தால், தடுத்து விடுவர் என, எண்ணி, பக்கத்து வீட்டிலுள்ள ஆசிரியர் துணையுடன், காவல் துறை பணிக்கு விண்ணப்பித்தேன்.கடந்த, 1973ம் ஆண்டு நடைபெற்ற முதல் தேர்வில், நான் உட்பட, 21 பெண்கள் தேர்வு பெற்றோம். முதல் பெண்கள் குழு என்பதால், இரவு பகல் பாராமல், கூடுதல் பயிற்சிகள் நடைபெற்றன. திருமணம் மற்றும் பல காரணத்தால், என்னைத் தவிர அனைவரும், காவலர் பணியில் தொடர முடியாமல், பாதியில் விலகினர்.எனவே, திருமணத்தை வேண்டுமென்றே தவிர்த்தேன். ஒரு கட்டத்தில், குடும்பமே வலியுறுத்திய போது, திருமணமே வேண்டாம் என, மறுத்தேன். அவர்கள் கோபத்தில் என்னை திட்டி தீர்த்தனர். காவல் பணி கொடுத்த ஊக்கத்தால், உறுதியுடன் நின்றேன்.சமுதாயக் கொடுமைகளிலிருந்து, ஒரு பெண்ணாக துணிய முடியாததை, ஒரு காவல் துறை அதிகாரியாக துணிந்து, எதிர்த்து நின்றேன் என்பதில் மகிழ்ச்சி. பெண்களுக்கு எதிரான குற்றத்தில் ஈடுபட்ட பலரை, நீதிமன்றங்கள் மூலம், சரியான தண்டனை வாங்கி தந்துள்ளேன். உறவு முறைகளின், எந்தவித நல்ல, கெட்ட நிகழ்ச்சிக்கும் செல்ல முடியாது. அப்படி சென்றாலும், மற்றவர்களைப் போல் புடவையில் இல்லாமல், காவலர் சீருடையிலேயே செல்ல வேண்டியிருக்கும்.பணிக் காலங்களில், 10 ஆண்டுகள் காவல் துறை ஆய்வாளராக பணியாற்றி இருக்கிறேன். காவல் துறை பணியை, மக்களுக்கு உதவும் கருவியாக, பயன்படுத்த வேண்டும் என்பதே என் ஆசை; அதை கடைசி வரை நிறைவேற்றியதால், மன நிறைவு கிடைத்தது.

கிராமத்து சாதனைப் பெண்!

ஒரு பெண்ணாக, விவசாயத்தில் வெற்றி பெற்று, "கிராமிய சாதனையாளர் விருது' பெற்ற, செல்வி: நான், ஏழை விவசாயக் குடும்பத்தில் பிறந்து, பத்தாம் வகுப்பு வரை, படித்திருக்கிறேன். எனக்கு திருமணம் செய்து கொடுத்த இடமும், புதுக்கோட்டையின் குருந்தடிமலை கிராமத்திலுள்ள, விவசாயக் குடும்பம் தான். வயல் வேலைகளை செய்து, பால் கறந்து கடைகளில் விற்று வந்தேன். இதன் மூலம், ஒரு குண்டு மணி தங்கம் கூட, சேர்க்க முடியவில்லை. வறுமையால், பிறந்த இரண்டு குழந்தைகளையும் வளர்க்க முடியாமல், எதிர் காலம் கேள்வி குறியாக நின்றது."சக்தி மகளிர் சுய உதவிக் குழு' என்ற பெயரில், 20 பெண்களைச் சேர்த்து, குழு துவங்கினேன். வெளியில் வட்டிக்கு கடன் வாங்கி, விவசாயம் செய்வதை தவிர்த்து, குழு மூலம், வங்கியில் விவசாயக் கடன் வாங்கி, விவசாயம் செய்ய ஆரம்பித்தேன்."வம்பன் வேளாண் ஆராய்ச்சி நிலையத்தில்' உளுந்து பயிரிட, தொழில்நுட்ப பயிற்சியும், சொந்த நிலம் இருந்தால், உளுந்து பயிரிட தேவையான பொருள் உதவி செய்வதையும் அறிந்து, பயிற்சிக்கு சென்றேன். முன்பு, கடையில் விற்பதை வாங்கி, கண்மூடி தனமாக விவசாயம் செய்தேன். பயிற்சியில் கிடைத்த தகவல் மூலம், ஒரு ஏக்கருக்கு, 8 கிலோ விதையை, வரிசை முறையில் விதைக்கிறேன். இதற்கு, 6,500 ரூபாய் செலவாகும். மகசூல், 30 ஆயிரத்திற்கும் குறையாது. லாபம் மட்டும் குறைந்தது, 20 ஆயிரம் கிடைக்கும். புதுரக உளுந்திலும், நல்ல மகசூலை கொண்டு வந்தேன்.உளுந்து அறுவடைக்கு குறைந்தது, 65 முதல், 75 நாட்கள் மட்டுமே ஆகும். எனவே, குறைந்த நாட்களில், லாபம் ஈட்டலாம். விதை உளுந்தாக விற்றால், கூடுதல் லாபம் என்பதால், நான் விதையாக விற்று, "சிறந்த விதை உற்பத்தியாளர்' என, பாராட்டு சான்றிதழும் பெற்றிருக்கிறேன்.

8 ஆண்டுகளாக விடுப்பு இல்லை: ஆசிரியை

8 ஆண்டுகளாக விடுப்பு இல்லை: அரசு பள்ளி ஆசிரியை  அருவினை!

"சாட்டை' படத்தை ப் பார்த்தால் அரசு பள்ளிகள் ஒரு வித "கிலி'யை ஏற்படுத்துகின்றன. ஆனால், அரசு பள்ளிகளிலும் கடமையை தவறாமல் செய்யும் ஆசிரியர்கள் உள்ளனர் என்பதற்கு, ஆசிரியை சசிகலா தேவி ஒரு எடுத்துக்காட்டு.

இவர், கடந்த எட்டு ஆண்டுகளாக ஒரு நாள் கூட விடுப்பு எடுக்காமல் பள்ளிக்கு செல்வதோடு, தன் துறையில் சிறந்த தேர்ச்சி விகிதத்தையும் தக்க வைத்து, அசத்தலான சாதனை படைத்து வருகிறார்.கன்னியாகுமரி மாவட்டம், தக்கலையை சேர்ந்த இவர் 2004ம் ஆண்டு முதல் வேளச்சேரி அரசு மேல்நிலை பள்ளியில் விலங்கியல் ஆசிரியையாக பணியாற்றி வருகிறார். தினமும் காலை 7:45 முதல் 8:00 மணிக்குள் பள்ளிக்கு வருவதை வழக்கமாக கொண்டுள்ளார்.

இதுகுறித்து இவர் கூறியதாவது:நான் பள்ளி படிக்கும் காலத்தில் இருந்தே விடுப்பு எடுப்பது என்பது அரிதுதான். இதை ஒரு சாதனையாக நான் எப்போதும் கருதியது கிடையாது. கடமையாகவே நினைக்கிறேன். அதிலும், அரசு பள்ளி ஆசிரியை என்பதால் கூடுதல் பொறுப்பு உள்ளதாக நினைக்கிறேன். தினமும் அதிகாலை 5:00 மணிக்கே எனக்கு நாள் பணி துவங்கிவிடும்.காய்ச்சல் வந்தபோது, விபத்து நேரிட்ட போது கூட பள்ளிக்கு வந்து விட்டேன். உறவினர்களின் சுப நிகழ்ச்சிகள் விடுமுறை நாட்களில் வந்தால் மட்டுமே நான் கலந்து கொள்வேன். மற்ற நாட்களில் எனக்கு பதில் கணவர் செல்வார். என் பணிக் காலத்தில் இதுவரை 20 நாட்கள் மட்டுமே விடுப்பு எடுத்துள்ளேன்.

நான் மட்டும் இல்லை. என் மகன் அரவிந்தன், மகள் அபர்ணா ஆகியோரும் பெரும்பாலும் விடுப்பு எடுப்பதுஇல்லை. நான் எடுக்கும் பாடப்பிரிவில் அனைத்து மாணவ, மாணவியரும் 100 சதவீத தேர்ச்சி பெற வேண்டும் என்பது மட்டும்தான் குறிக்கோள். பெரும்பாலான ஆண்டுகளில், 100 சதவீத தேர்ச்சி கொடுத்துள்ளேன். மீதமுள்ள ஒன்பது ஆண்டுகள் விடுப்பு எடுக்காமல் பள்ளி சென்று மாணவ, மாணவியர்கள் முன்னேற்றத்திற்கு பாடுபட வேண்டும் என்பது தான் என் லட்சியம்.இவ்வாறு ஆசிரியை சசிகலாதேவி உற்சாகத்துடன் கூறினார்.

"லிம்கா அருவினையில் இடம் பெற்றேன்!

சொல்கிறார்கள்


"லிம்கா சாதனையில்இடம் பெற்றேன்!'
டிரைவிங் ஸ்கூல் நடத்தி வரும் பூங்கொடி: என் சொந்த ஊர், ஈரோடு. சாதாரண குடும்பத்தைச் சேர்ந்தவள். பத்தாம் வகுப்பு வரை தான் படித்திருக்கிறேன். 18 வயதில் திருமணம் முடிந்தது.என் கணவர், மில்லில் மெக்கானிக் வேலை செய்பவர். வீட்டில் ஓய்வாக இருக்கும் நேரங்களில், ஒயர் கூடை பின்னுவது, இட்லி மாவு அரைத்து விற்பது, வீட்டில் இருந்த படி, அரிசி வியாபாரம் செய்வது என, சின்ன சின்ன வேலைகளைப் பார்த்தேன்.இது, ஆரம்பக்கால, மண வாழ்க்கைக்கு பேருதவியாக இருந்தது.ஆரம்பத்தில், என் கணவரின் டி.வி.எஸ்., 50 வண்டியை மட்டும் ஓட்டுவேன். கார் டிரைவிங் மேல் விருப்பம் இருந்ததால், அதையும் கற்றுக் கொண்டேன்.லைசென்ஸ் எடுக்க, திருச்சி, ஆர்.டி.ஓ., ஆபீஸ் போன போது, பெண்கள், கார் ஓட்ட ஆர்வமாக இருக்கின்றனர்; ஆனால், சொல்லித் தருவதற்கு தான், ஆட்கள் இல்லை என்பது தெரிந்தது.உடனே, "நாம் ஏன், பெண்களுக்கென்று, ஒரு டிரைவிங் ஸ்கூல் ஆரம்பிக்கக் கூடாது?' என யோசித்து, கணவரிடம் கேட்டேன். ஒரு டிரைவிங் ஸ்கூலில் வேலைக்குச் சேர்ந்து, பல்வேறு விஷயங்களைக் கற்றுக் கொண்டேன். நான் கற்றுக் கொண்டதை, மற்றவர்களுக்கும் சொல்லித் தர வேண்டும் என நினைத்தேன்.நண்பர்கள் உதவியுடன், 2005ல், டிரைவிங் ஸ்கூல் துவங்கினேன். வீட்டிலேயே ஆபீஸ் அமைத்து, "பியட்' காரை, குறைந்த விலைக்கு வாங்கினேன். முதலில், என் குழந்தைகள் இருவரையும், ஸ்கூலில் கொண்டு போய் விட்டு வந்தேன். பின், ஸ்கூல் ட்ரிப் அடிக்க ஆரம்பித்தேன்.ஸ்டிமிலேட்டர் (வீடியோ கேம் விளையாடுவது) மூலம் டூவீலர், போர்வீலர் என, டிரைவிங்கில் அத்தனை விஷயங்களையும் சொல்லித் தருகிறேன். இதுவரை, 4,000 பெண்களுக்கு பயிற்சி கொடுத்திருக்கிறேன்.லிம்கா சாதனை புத்தகத்திலும் இடம் பெற்றுள்ளேன். மும்பையில் உள்ளது போல, பெண்களே ஓட்டும் கால் டாக்சியை, திருச்சியில் நிறுவ வேண்டும் என்பது, என் கனவாக இருக்கிறது.

201 நாடுகளுக்கு வானூர்தியில் பறக்காமல் உலகைச் சுற்றி வந்த இளைஞர் உலக அருவினை புரி்ந்தார்

201 நாடுகளுக்கு வானூர்தியில் பறக்காமல் உலகைச் சுற்றி வந்த இளைஞர் உலக  அருவினை புரி்ந்தார்

இலண்டன்: நான்கு ஆண்டுகளில் விமானத்தில் பறக்காமல் கடல் மற்றும் தரைவழி என பஸ், ரயில் ஆகியவற்றின் மூலம் 201 நாடுகளுக்கு பயணித்து பிரிட்டனைச்சேர்ந்த வாலிபர் சாதனை படைத்துள்ளார். இதன் மூலம் பல லட்சம் கிலோ மீட்டர் பயணம் செய்து உலகை சுற்றி வந்த முதல் வாலிபர் என்ற பெருமையினை பெற்றுள்ளார்.
பிரி்ட்டனைச் சேர்ந்தவர் கிராஹம் ஹக்கிஸ் (33). இவர் பிரிட்டனின் லிவர்பூல் மாகாணத்தைச் சேர்ந்தவர். கடந்த 2009-ம் ஆண்டு ஜனவரி மாதம் 1-ம் தேதியன்று தனது பயணத்தை துவக்கினார். மொத்தம் 201 நாடுகளுக்கு இவர் சுற்றுப்பயணம் செய்தார். எந்த சூழ்நிலையிலும் வேறு நாட்டிற்கு செல்ல இவர் விமானத்தை பயன்படுத்தவே இல்லை. கடந்த 2009-ம் ஆண்டு புத்தாண்டு அன்று (ஜனவரி 1-ம் தேதி) தனது பயணத்தை துவக்கி மொத்தம் 1,426 நாட்களில் 1லட்சத்து 60 ஆயிரம் மைல்கள் ( 2 லட்சத்து 46 ஆயிரம் கிலோ மீட்டர்கள்) பயணித்துள்ளர். இவற்றில் சில நாடுகளுக்கு கடலில் படகு மூலமாகவும், பக்கத்து நாடுகளுக்கு ரயில், பஸ், டாக்ஸி போன்ற வாகனங்கள் வாயிலாகவும் மொத்தம் 201 நாடுகளுக்கு சென்றார். இறுதியில் ஆப்ரிக்க நாடான தெற்கு சூடானை நேற்று சென்றடைந்தார்.

தற்போது அந்நாட்டின் தலைவர் ஜூபாவில் தங்கியுள்ளார்.வரும் ஜனவரி மாதம் அதே புத்தாண்டு அன்று தாய்நாடு திரும்ப உள்ளார். இதன் மூலம் பல லட்சம் கிலோமீட்டர் பயணித்து உலகம் சுற்றிய முதல் வாலிபன் என்ற சாதனையையும், விரைவில் கின்னஸ் சாதனை புத்தகத்திலும் இடம் பெற உள்ளதாக டெய்லிமெயில் பத்திரிகை செய்தி வெளியிட்டுள்ளது.

மேலும் தனது செலவிற்காக வாரத்திற்கு 100 டாலர் செலவிட்டுள்ளார். தவிர பயணத்தின் போது ஆப்ரிக்க நாடான காங்கோ நாட்டிற்கு சென்ற போது அந்நாட்டு பாதுகாப்புப்படையினர் சந்தேகத்தின் பேரில் கைது செய்து அநாட்டின் கேப்‌வெர்தே நகர் சிறையில் ஒரு வாரம் வைக்கப்பட்டதாகவும், பின்னர் ரஷ்யாவிற்குள் நுழைந்த போது இவரை உளவாளி என நினைத்து போலீசாரால் கைது செய்யப்பட்டதாகவும் தனது பயண அனுபவங்களை தெரிவித்துள்ளார்.தாம் மேற்கொண்ட இந்த மெகா பயணத்தை ஆவணப்படமாக தயாரித்துள்ளார். இவற்றை வெளியிட்டு அதன் வாயிலாக அறக்கட்டளை ஒன்றிற்கு நிதி திரட்டள்ளார்.