மின் கம்பி அறுந்தால் . . தானியங்கி நிறுத்தி

மின் கம்பி அறுந்தால் ஆபத்தில்லை!

சூறைக்காற்றால், அறுந்து விழும் மின் கம்பிகளிலிருந்து பாயும் மின்சாரத்தை, தானியங்கி முறையில் நிறுத்தும் கருவியை கண்டுபிடித்த, ஹரிஷங்கர்: நான், விழுப்புரம் மாவட்டத்தை சேர்ந்தவன். வி.ஆர்.எஸ்., பொறியியல் கல்லூரியில், "எலக்ட்ரானிக்ஸ் அண்ட் கம்யூனிகேஷன்' படிக்கிறேன். தானே புயல் போன்று, சூறைக்காற்றுடன் மழை பெய்யும் போது, மின் கம்பிகள் அறுந்து விழுவதால், எதிர்பாராத மனித இழப்பு ஏற்படுகிறது. இப்பிரச்னைக்கு தீர்வு காண வேண்டும் என்ற நோக்கில், நண்பர்களுடன் இணைந்து கண்டுபிடித்ததே, இந்த தானியங்கி கருவி. "டிரான்ஸ்பார்மரில்' இருந்து செல்லும், ஒவ்வொரு மின் கம்பியிலும், மின்சாரத்தின் அளவை உணரும், "சென்சார்'களை இணைத்தேன். புயல் மற்றும் பலத்த காற்று வீசும் போது, மின் கம்பிகள் அறுந்து, நிலத்தில் பட்ட உடன், நிலம் அதிக அளவு மின் சாரத்தை உறிஞ்சுகிறது. இதனால், மின் கம்பியில் இருந்து சாதாரண நிலையை விட, பல மடங்கு மின்சாரம் வெளியிடப்படுகிறது. அதிக அளவு மின்சாரம் வெளியிடப்படுவதை, சென்சார்கள் உணர்ந்ததும், "மைக்ரோ கன்ட்ரோலரு'க்கு, சிக்னல் மூலமாக தகவல் அனுப்பும். அறுந்து விழும் மின் கம்பிகளில் பாயும் மின்சாரத்தை, நிறுத்த வேண்டும் என்ற கட்டளையை, ஒரு, "சிப்'பில் புரோக்ராமாக பதிவு செய்து, மைக்ரோ கன்ட்ரோலரில் பொருத்தி, டிரான்ஸ்பார்மருடன் இணைத்துள்ளேன். இதனால், சென்சாரில் இருந்து தகவல் கிடைத்ததும், மைக்ரோ கன்ட்ரோலர், தன் கட்டுப்பாட்டில் உள்ள, "ரிலே' சுவிட்ச்சை ஆப் செய்யும். இதன் மூலம், அந்த கம்பி வழியாக மின்சாரம் சப்ளை செய்யப்படுவது தானாக நிறுத்தப்படும். மழை மற்றும் வெயில் காலம் என, எல்லா சூழ்நிலையிலும், 24 மணி நேரமும் தொடர்ந்து செயல்படும் தன்மை, இத்தானியங்கி கருவிக்கு உள்ளது. மின்கம்பி அறுபட்டுள்ளதை, அருகில் உள்ள மின்சார அலுவலகம் மற்றும் சம்பந்தப்பட்ட லைன் மேனுக்கு தெரியப்படுத்த, மொபைல் போனில் உள்ள, ஜி.எஸ்.எம்., தொழில் நுட்பம் மூலம், எஸ்.எம்.எஸ்., அனுப்பும் கூடுதல் வசதியும் இதில் உள்ளது. தொடர்புக்கு: 96590 95472.

வணிகம் செய்ய  அகவை தடையில்லை!

பெல் நிறுவனத்தின் பாய்லர்களுக்கு, உதிரிபாகங்கள் செய்து தரும் தொழிலில் ஆண்டிற்கு, 6 லட்சம் ரூபாய் சம்பாதிக்கும், கீதா: எனக்கு திருமணம் நடைபெறும் போது, வெறும் பிளஸ் 2 மட்டுமே படித்திருந்தேன். குழந்தைகள் பிறந்ததும், கணவர் வெளிநாட்டிற்கு வேலை செய்யச் சென்றார். மேற்கொண்டு படிக்க வேண்டும் என்ற ஆர்வத்தால், குழந்தைகளை கவனித்து கொண்டே, எம்.ஏ., - எம்.பில்., - எம்.எட்., என, என்னால் முடிந்ததை படித்து, பட்டதாரியாக மாறினேன். பட்டதாரியாக இருந்தாலும், வெறும், 2,400 ரூபாய் சம்பளத்தில், ஒரு தனியார் பள்ளியில், ஆங்கில ஆசிரியராக பணியாற்றினேன். 2006ம் ஆண்டு, புதிய பெண் தொழில் முனைவோரை உருவாக்கும் அமைப்பில், உறுப்பினராக சேர்ந்தேன். அங்கு தான், "பெல்' எனும், பாரத மிகு மின் நிறுவனத்தில், உருவாக்கப்படும் பாய்லர்களுக்கு தேவையான உதிரி பாகங்களை செய்வதற்கு, "கான்ட்ராக்ட்' எடுப்பது பற்றி பேசினர். எனக்கும், பிசினஸ் செய்ய ஆர்வம் ஏற்பட்டதால், இது பற்றிய தகவல்களை சேகரிக்க ஆரம்பித்தேன். "பெல்' நிறுவனத்தை பொறுத்த வரை, ஆண்களுக்கு மட்டுமே, "கான்ட் ராக்ட்' தருவர். ஏனெனில், இரும்பு போன்ற கடின உலோகங்களுக்கு வெல்டிங் செய்வது போன்று, வேலை, மிக கடினமாக இருக்கும். குறிப்பாக, இன்ஜினியரிங் படித்தவர்களுக்கு தான் முன்னுரிமை. நான், இன்ஜினியரிங் படிக்காத பெண் என்பதால், மேற்கூறிய இரண்டு தகுதிகளும் என்னிடம் இல்லை. இருந்தாலும், கான்ட்ராக்ட்டை பெற்றே தீர வேண்டும் என்ற எண்ணத்தில், வெல்டிங் செய்ய கற்றுக் கொண்டேன். பின், இன்ஜினியரிங் பிரிவில், "அட்மினிஸ்ட்ரேஷன்' படித்து, புதிய பெண் தொழில் முனைவோராக, "பெல்'லிலேயே, "கான்ட்ராக்ட்' பெற்று, வங்கி கடன் மூலம், பிசினசை ஆரம்பித்தேன். தற்போது, ஆண்டிற்கு ஆறு லட்சம் ரூபாய் சம்பாதிக்கும் அளவிற்கு, பிசினசில் உயர்ந்து, 17 தொழிலாளர்களுக்கு வேலை தருகிறேன். என் பெண்ணிற்கு திருமணம் செய்து, அவளுக்கும் குழந்தை பிறந்த பின்னரே, என் பிசினசை ஆரம்பித்தேன் என்பதால், பிசினஸ் செய்ய வயது தடையில்லை.

108 அகவை "இளம்' மனைவியோடு வசிக்கும் 123 அகவை "இளைஞர்'

108 அகவை "இளம்' மனைவியோடு தனியாக வசிக்கும் 123 அகவை "இளைஞர்'

செஞ்சி:செஞ்சி அருகே, தனியாக வசிக்கும், 100 வயது கடந்த தம்பதியர், தங்கள் உணவை தாங்களே சமைத்து, அனைவரையும் அசத்தி வருகின்றனர்.

விழுப்புரம் மாவட்டம், சம்போதி கிராமத்தை ச் சேர்ந்தவர், இரங்கசாமி. 130 வயது எனக் கூறும் இவருக்கு, 2005ல் வழங்கியுள்ள ரேஷன் கார்டின்படி, 123 வயதாகிறது. இவர், மனைவி சடைச்சியம்மாள், 108. இவருக்கு, மூன்று மகன்கள், 10 பேரன், 3 பேத்திகள், 12 கொள்ளு பேரன், 12 கொள்ளு பேத்தி, ஒரு எள்ளு பேரன், ஒரு எள்ளு பேத்தி உள்ளனர்.கணவன், மனைவி வெற்றிலை போடுவர். ரங்கசாமியின் பற்கள் கரைபடிந்துள்ள போதிலும் விழவில்லை; கைத்தடி உதவியுடன் நடக்கிறார். இருவருக்கும் பார்வை தெளிவாக உள்ளது.

சடைச்சியம்மாள் ஒரு ஆண்டுக்கு முன் கீழே விழுந்ததில், சரியாக நடக்க முடியவில்லை. உடல் நலக்குறைவுக்காக, ஒரே ஒரு முறை மட்டும் மருத்துவமனைக்கு சென்றதாக, ரங்கசாமி கூறுகிறார்.மகன்கள் இருப்பதாலும், வயது அதிகமாக இருப்பதாலும் அரசு உதவித் தொகை கிடைக்கவில்லை. தனி வீட்டில் வசிக்கும் இவர்களுக்கு, உள்ளூரில் இருக்கும் பிள்ளைகள், உணவிற்கான பொருட்களை வாங்கித் தருகின்றனர்.தங்களுக்கான உணவை அவர்களே சமைக்கின்றனர். நூறாண்டு கடந்த இருவரும், உடல் ஆரோக்கியத்துடன் இருப்பதைப் பார்த்து, அனைவரும் வியப்பில் ஆழ்கின்றனர்.

106 அகவையில் பள்ளிபடிப்பை முடித்த அமெரிக்கர்

106 வயதில் பள்ளிபடிப்பை முடித்த அமெரிக்கர்

பெவர்லி:அமெரிக்காவை சேர்ந்த பிரட் பட்லர், பள்ளிப்படிப்பை தனது 106 ஆவது வயதில் படித்து முடித்துள்ளார். பிரட் பட்லர், தாய் மற்றும் உடன்பிறந்த 5 பேருடன் வசித்து வந்தபோது தனது பள்ளி படிப்பை ‌தொடர முடியாமல் போனது. ஆனால் அவரது மனதில் பள்ளி படிப்பை முடிக்க வேண்டும் என வைராக்கியம் இருந்தது.பின்னர் ராணுவத்தில் சேர்ந்து பணியாற்றினார். தனது 41 வயதில் திருமணம் செய்துகொண்டார்.65 ஆண்டு திருமண வாழ்க்கையில் 5 குழந்தைகளுக்கு தந்தையானார். தொடர்ந்து தனது 106 வது வயதில் பள்ளி இறுதிப்படிப்பை முடித்‌தார். மசாசூசெட்ஸில் உள்ள பெவர்லி பள்ளியில் சேர்ந்து படித்து தேர்ச்சி பெற்றார். இந்நிலையில் அப்பள்ளியில் நேற்று நடந்த பட்டமளிப்பு விழா நிகழ்ச்சியில் அவருக்கு பாராட்டு தெரிவிக்கப்பட்டு பட்டமளிக்கப்பட்டது.

13இல் பருவம் எய்தும் ஆண்கள்,"எதையும் திணிக்காதீர்கள்!

சொல்கிறார்கள்

"13 இல்  அகவைக்கு  வரும் ஆண்கள்!'
மூலிகை மருத்துவர் வி.ஜமுனா: பெண்கள், பன்னிரண்டு, பதிமூன்று வயதில் வயசுக்கு வருவது மாதிரி, ஆண்களும், சிறுவர்களாக இருக்கும் போது, கிட்டத்தட்ட அதே வயதுகளில், வயசுக்கு வருகின்றனர்.ஆனால், பெண்களுக்கு, வெளிப்படையாக, "பீரியட்ஸ்' ஏற்படுவது போல, ஆண்களுக்கு ஏற்படுவதில்லை என்பதால், அவர்கள், வயசுக்கு வருவது, அவர்களது குடும்பத்தினருக்கே தெரிவதில்லை.பெண்கள் எனில், 12 முதல், 15 வயதுக்குள் பருவம் எய்துகின்றனர். இப்போது எல்லாம், 10 வயதில் கூட இது நிகழ்கிறது. ஆண்கள் எனில், 13 முதல், 18 வயதுக்குள், பருவம் எய்துகின்றனர்.ஆண்களுக்கு மீசை, தாடி மற்றும் மறைவிடங்களில் மென் முடி முளைப்பது, குழந்தை போன்ற குரல் உடைந்து கரகரப்பாக மாறுவது, தசைகள் இறுகுவது, பிறப்புறுப்பு வளர்ச்சி பெறுவது என்று, பல மாறுதல்கள் நிகழ்கின்றன.அந்த சமயம் தான், அந்தச் சிறுவனின் உடம்பில், அதுவரை தூங்கிக் கொண்டிருந்த விதைகள், பிட்யூட்டரி சுரப்பியால் தூண்டப்பட்டு, உயிரணுக்களைத் தயாரிக்கும் பருவத்தை அடைகின்றன. விந்து உற்பத்தியும், அந்த வயதில் தான் ஆரம்பிக்கிறது. பிரச்னையில்லாத சிறுவனுக்கு, இப்படி, இந்த வயதில், விந்து மற்றும் உயிரணு உற்பத்தி தடையின்றி நிகழ்கிறது.குழந்தை பருவத்தில், அவனுக்கு, வாரத்தில் ஒரு நாள், கருணைக் கிழங்கு, இரண்டு நாள், முருங்கைக் கீரை, தினமும் நெய் சாப்பிடக் கொடுக்க வேண்டும். அசைவத்தில், ஆட்டு இறைச்சி கொடுக்கலாம்; மாட்டிறைச்சி வேண்டாம்; அது மலட்டுத் தன்மையை அதிகரிக்கும்.புரோட்டீன், விட்டமின், தாதுப் பொருட்கள் என, அனைத்து சத்துகளும் கலந்த சரிவிகித உணவு எடுத்துக் கொள்ள முடியாமல் போனாலோ அல்லது ரசாயனக் கலவை அதிகம் சேர்ந்த செயற்கையான ரெடிமேட் உணவுகள் சேர்த்துக் கொள்ளும் போதோ, அந்தச் சிறுவனுக்கு, இயல்பாக உண்டாக வேண்டிய விந்தணுக்கள் வராமல் போய்விடும் வாய்ப்பு உள்ளது.அதுபோலவே, அந்தச் சிறுவனுக்கு, உடல் நிலை சரியில்லாமல் போனால் எடுத்துக் கொள்ளும் தொடர் மருந்துகளிலும் அதிக கவனம் வைக்க வேண்டும். இவை அனைத்தும், அந்தச் சிறுவனின் உயிரணு உற்பத்தியை பாதிக்கிறது.

"எதையும் போட்டு த் திணிக்காதீங்க!'
குழந்தை நல மருத்துவர் டாக்டர் சுப்ரமணியன்: பொதுவா, இரண்டு வயதுக்கு மேற்பட்ட குழந்தைகள், "துறுதுறு'ன்னு இருப்பாங்க. எதையாவது எடுத்து வாயில போட்டுக்குவாங்க. அதனால, இந்த வயசு குழந்தைகள, ரொம்ப ஜாக்கிரதையா பார்த்துக்கணும். "சைக்காலாஜிக்'கலாகவும், ரொம்ப கேர்புல்லா பார்த்துக்க வேண்டிய வயசு. பெரியவங்க என்ன பண்றாங்களோ, அதைப் பார்த்து தான், குழந்தைங்க கத்துக்கும். எந்த மாதிரியான வார்த்தைகள், சுற்றி இருக்கிறவங்க பேசுறாங்களோ, அதைத் தான், குழந்தைகளும் பேசும். அதனால, குழந்தைங்க எதிரில் சண்டை போடறது, கெட்ட வார்த்தைகள் பேசறது போன்றவற்றை தவிர்க்கணும். நல்ல விஷயங்கள் கத்துக் கொடுக்கணும். நல்ல விஷயங்களை அவங்களுக்கு எடுத்து சொல்லணும்.ஸ்கூல் போக ஆரம்பிச்சதுக்கப்புறம், கொஞ்சம் கொஞ்சமா அடம் பிடிக்கிறது குறைய ஆரம்பிக்கும். ஊசி போட்டா வலிக்கும்னு சொல்லி அழுதாலும், ஒழுங்கா காட்டுவாங்க. சொன்னா புரிஞ்சுக்க ஆரம்பிக்கிற வயசு.குழந்தைகள் புரிஞ்சுக்க ஆரம்பிக்கற வயசுல, பெரியவங்க சில விஷயங்களைப் புரிஞ்சுக்கறது இல்லை. ஸ்கூல் சேர்த்த உடனே, எல்லா பெற்றோருமே, தங்கள் குழந்தைங்க முதல் மார்க் வாங்கிடணும்னு ஆசைப்பட்டு, அவங்களை, "போர்ஸ்' பண்றாங்க; அது ரொம்ப தப்பு. குழந்தைகள் வயதிற்கு மீறி கல்வி திணிக்கப்படும் போது, நிறைய குழந்தைக தன்னால முடியாதுன்னு சொல்லி அந்த போட்டியிலிருந்து விலகிக்குவாங்க; சிலர் உடனே புரிஞ்சுக்குவாங்க; சிலர் கொஞ்சம் லேட்டா புரிஞ்சுக்குவாங்க.அந்த மாதிரி சந்தர்ப்பங்கள்ல, பெற்றோர் ஒரு பக்கம், ஆசிரியர் ஒரு பக்கம்னு குழந்தைகளுக்கு, "பிரஷர்' கொடுக்கும் போது, தன்னால முடியலையோன்னு நினைக்க ஆரம்பிப்பாங்க. அப்ப, அந்த வயசுல எவ்வளவு கத்துக் கொடுக்கணுமோ, அவ்வளவு தான் கத்துக் கொடுக்கணும். எதையும் போட்டு திணிக்காம, அவங்கவங்க திறமையை கண்டுபிடிச்சி வளர்க்கப் பாருங்க

அருந்திறலுக்கு அகவை தடை யல்ல!

சொல்கிறார்கள்

 

 

அருந்திறலுக்கு அகவை தடை  யல்ல!  

(சாதிக்க வயது தடையல்ல! )

 

தன் 86 வயதிலும், மாணவர்களுக்கு கைப் பந்து விளையாட்டு பயிற்சி அளிக்கும், நடேச ரெட்டி: திருத்தணியிலுள்ள, டாக்டர் ராதாகிருஷ்ணன் மேல் நிலைப் பள்ளியில் படித்த போது, தாலுகா அலுவலகத்தில், "கிளார்க்'காகப் பணிபுரிந்த, பாலகிருஷ்ணன் என்பவரின் தூண்டுதலால், பள்ளியில் நடக்கும், கைப்பந்து விளையாட்டில் பங்கேற்றேன். பள்ளியில் படித்த போதே குண்டு எறிதல், தட்டு எறிதல் போட்டிகளிலும் பரிசுகள் வென்றுள்ளேன். சைதாப்பேட்டை, ஒய்.எம்.சி.ஏ., உடற்கல்வியியல் கல்லூரியில், ஓராண்டு படிப்பு முடித்ததும், நான் படித்த பள்ளியிலேயே, எனக்கு வேலை கிடைத்தது. அங்கு இரண்டு ஆண்டுகள் பணிபுரிந்த பின், ஒரு கல்லூரியில் உதவி உடற்கல்வி இயக்குனராகப் பணியாற்றினேன். அப்போது, கைப்பந்து அணியை தயார் செய்து, மாநில அளவிலான போட்டிக்கு அனுப்பி வைத்தேன். எங்கள் கல்லூரி அணியினர், முதல் பரிசு வென்றனர். கைப்பந்து பயிற்றுனர் பயிற்சிக்காக, தமிழக கைப்பந்து சங்கம் என்னை, பஞ்சாப் மாநிலம், பாட்டியாலாவுக்கு அனுப்பி வைத்தது. அங்கு பயிற்சி முடித்த பின், கடலூர், அண்ணா விளையாட்டு மைதானத்தில், கைப்பந்து பயிற்றுனராக, அரசு வேலை கிடைத்தது. அந்தப் பணியின் போது, 10க்கும் மேற்பட்ட மாநில அளவிலான, கைப்பந்துப் போட்டிகளை நடத்தி உள்ளேன். 26 ஆண்டுகள் கைப்பந்து பயிற்றுனராக இருந்து, ஓய்வு பெற்றேன். உத்தர பிரதேசத்தில் நடந்த முதியோர் தடகளப் போட்டியில், குண்டு எறிதல், ஈட்டி எரிதல், வட்டு எறிதல் போட்டிகளில் பங்கேற்று, தங்கப்பதக்கம் வென்றேன். வரும், நவம்பர் மாதம், சீனாவில் நடக்கும், ஆசிய அளவிலான மூத்தோர் தடகளப் போட்டியில் பங்கேற்க முயற்சிக்கிறேன். இன்னும் எவ்வளவு நாள் விளையாட முடியுமோ, விளையாடிக் கொண்டே இருப்பேன். தினமும் காலை ஒரு மணி நேரம் உடற்பயிற்சி, நடைப் பயிற்சி, உணவுக் கட்டுப்பாடு, மாணவர்களுக்கு கைப் பந்து விளையாட்டுப் பயிற்சி ஆகியவையே, என் இளமை ரகசியம்.