புது தில்லி, அக். 10: இலங்கைக்கு எம்.பி.க்கள் குழுவை அனுப்பியதன் நோக்கம் என்ன என்று இந்திய கம்யூனிஸ்ட் தேசியச் செயலர் டி.ராஜா கேள்வி எழுப்பியுள்ளார். இலங்கைக்கு சென்றுள்ள எம்.பி.க்கள் குழுவை அமைக்கும் முன்னதாக அனைத்து கட்சிகளையும் ஆலோசிக்கவில்லை. திமுக, காங்கிரஸ் ஆகிய இரு கட்சிகள் மட்டும் ஆலோசித்து தன்னிச்சையாக முடிவெடுத்துள்ளன. இதனால் இலங்கை சென்றுள்ள எம்.பி.க்கள் குழுவை ஒரு பிரதிநிதிக் குழுவாகக் கருத முடியாது. அதை திமுக-காங்கிரஸ் குழுவாகவே எடுத்துக்கொள்ள முடியும் என்றும் டி.ராஜா தெரிவித்தார். இலங்கையில் போர் முடிந்த உடனேயே ஈழத்தமிழர்கள் குடியமர்த்தப்படுவார்கள் என்று இலங்கை அதிபர் ராஜபட்ச உறுதி அளித்தார். ஆனால் அவர் சொல்லியபடி வாக்கைக் காப்பாற்றவில்லை. போர் முடிந்து பல மாதங்கள் ஆகியும் ஈழத்தமிழர்களை குடியமர்த்த நடவடிக்கை ஏதும் எடுக்கவில்லை. அங்குள்ள முகாம்களில் 3 லட்சம் தமிழர்கள் அடிப்படை வசதிகூட இல்லாமலும், வாய்பேச முடியாத ஊமைகளாக இன்னல்களுக்கு ஆளாகியுள்ளனர். இலங்கை அரசுக்கோ ஈழத்தமிழர்கள் நலனில் சிறிதும் அக்கறை இல்லை. போர்க்குணத்துடனையே தொடர்ந்து செயல்பட்டு வருகிறது. இந்நிலையில் எம்.பி.க்கள் குழுவை அங்கு அனுப்புவதன் நோக்கம் புரியவில்லை என்றும் டி.ராஜா கூறினார்.
--------------------------------------------------------------------------------------------------
--- இலக்குவனார் திருவள்ளுவன்