Vaidhyanaathan லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
Vaidhyanaathan லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வியாழன், 19 ஜூலை, 2012

புலவரால்தான் புரவலர் அறியப்படுகிறார் -தினமணி ஆசிரியர்

புலவரால்தான் புரவலர் அறியப்படுகிறார் -தினமணி ஆசிரியர் கே.வைத்தியநாதன்

First Published : 19 Jul 2012 02:53:51 AM IST

திருக்கோவிலூர், ஜூலை 18: புலவர்களால் புரவலர்கள் அறியப்படுவதுதான் உலக இயற்கை என்று தினமணி ஆசிரியர் கே.வைத்தியநாதன் தெரிவித்தார்.  திருக்கோவிலூர் பண்பாட்டுக் கழகம் சார்பில் செவ்வாய்க்கிழமை நடைபெற்ற கபிலர் விழாவில் கபிலர் விருது மற்றும் கபிலவாணர் பட்டம் பெற்ற முனைவர் தெ.ஞானசுந்தரத்தைப் பாராட்டி அவர் மேலும் பேசியது:  நட்புக்கு இலக்கணமாகப் பிசிராந்தையாரையும், கோப்பெருஞ்சோழனையும் கூறுவார்கள். அதற்கு எள்ளளவும் குறையாத இலக்கிய நட்பு வள்ளல் பாரியும், புலவர் கபிலரும் கொண்டிருந்த நட்பு.  உலகில் வேறு எங்கும் இல்லாத பெருமை, சிறப்பு இந்தியாவுக்கு உண்டு. அதிலும் குறிப்பாகத் தமிழகத்துக்கு மட்டுமே உண்டு. வெளிநாடுகளில் புலவர்களுக்கும், படைப்பாளிகளுக்கும் விழா எடுத்து சிறப்பிக்கிறார்களா என்று கேட்டால் நாம் அறிந்தவரை இல்லை. ஏதாவது பல்கலைக்கழக அரங்கங்களில் மில்டன், ஷேக்ஸ்பியர் போன்ற கவிஞர்கள் பற்றிய கருத்தரங்குகள் நடைபெறுகின்றனவே தவிர, படைப்பாளிகளுக்கு மக்களால் விழா எடுக்கப்படுகின்ற சிறப்பு இந்தியாவுக்கு மட்டுமே உரித்தது. அதிலும் குறிப்பாகத் தமிழகத்துக்கு மட்டுமே உரித்ததாகும்.  வட நாட்டில் ஒரு சில விழாக்கள் எடுக்கப்படுகின்றன. அவை கூட காளிதாசன், தான்சேன் போன்றவர்களின் பெயரில் நடத்தப்படும் இசை விழாக்கள்தானே தவிர, இலக்கிய விழாவாக நடத்தப்படுவதில்லை.  வள்ளுவனுக்கும் கபிலனுக்கும், இளங்கோவடிகளுக்கும், கம்பனுக்கும் விழா எடுத்து சிறப்பிக்கின்ற பாங்கு தமிழகத்துக்கு மட்டுமே சொந்தமான சிறப்பு.  எத்தனை எத்தனையோ சங்கப் புலவர்கள் இருக்கத்தானே செய்தார்கள். "யாதும் ஊரே யாவரும் கேளிர்' என்று உலகளாவிய சிந்தனையை வெளிப்படுத்திய கணியன் பூங்குன்றனார் போன்ற பல சங்கப் புலவர்கள் இருந்தாலும், கபிலருக்கு நாம் விழா எடுத்துக் கபிலவாணர் விருது வழங்கிக் கொண்டிருக்கிறோம் என்றால் அதற்குக் காரணம், பரம்புமலை வேந்தன் பாரியுடனான அவரது நட்பு அவருக்கு சரித்திரத்திலும் இடம்பெற்றுக் கொடுத்திருப்பதால்தான்.  எனக்கு முன்னால் பேசிய நீதியரசர் வெ.ராமசுப்பிரமணியன், புரவலனாக இருந்தவன் பாரி. அவனிடம் பரிசில் பெற்ற புலவராக இருந்தவர் கபிலர். ஆனால், பாரி ஆண்ட மண்ணிலே கபிலருக்கு விழா எடுக்கப்படுகிறது என்று குறிப்பிட்டார். புலவனால் புரவலன் அறியப்படுகிறான் என்பதுதான் அதற்குக் காரணம்.  கபிலரால் பாரி அறியப்படுகிறார். கம்பனால் சடையப்ப வள்ளல் அறியப்படுகிறார். போஜராஜன் கூட காளிதாசனால்தான் அறியப்படுகிறான். ஆகவே, புலவர்களால் புரவலர்கள் அறியப்படுவது என்பதுதான் உலக இயற்கை.கபிலருக்கு என்ன இவ்வளவு முக்கியத்துவம் என்று கேட்டால் 235 பாடல்கள் எழுதியிருக்கும் புலவர் கபிலர் மட்டுமே என்பதுதான்.  இதற்கு முக்கியமான காரணம், சங்கத் தமிழ் இலக்கியங்களைத் தேடி அலைந்த தமிழ்த் தாத்தா உ.வே.சாமிநாத அய்யருக்குக் கிடைத்த ஓலைச் சுவடிகளில் ஏனைய புலவர்களைவிட கபிலர் எழுதிய பாடல்கள் அதிகம் கிடைத்திருப்பதுதான்.  அந்த காலத்தில் அச்சு இயந்திரம் கிடையாது. ஓலைச்சுவடிகளின் பிரதிகள் எடுக்கப்பட்டு படித்தார்கள். அதிகமான பேர் விரும்பிப் படித்த பாடல்கள்தான் அதிகமான சுவடிப் பிரதிகள் எடுக்கப்பட்டிருக்கும். கபிலரது பாடல்கள் பிரபலமாக இருந்ததால் அதிகம் பிரதிகள் எடுக்கப்பட்டிருந்ததால், செல்லரிக்கப்படாமல் சிதைந்த ஓலைச் சுவடிகளில் அவரது பாடல்கள் அதிகமாக இருந்திருக்கும் என்பது எனது கருத்து.  குறைவாகப் பிரதிகள் எடுக்கப்பட்டிருந்தால் அந்த ஓலைச் சுவடிகள் அழிந்திருக்கும். சங்க காலத்தின் சிறப்பை வருங்கால சந்ததியினர் அறிந்து கொள்ள வாய்ப்பளித்திருக்கிறது சாகாவரம் பெற்ற கபிலரின் பாடல்கள் என்றார் அவர்.   
உலகத் தமிழர்கள் தங்கள் பகுதிகளில் நடைபெறும் நிகழ்வுகள் குறித்த செய்திகளை புகைப்படங்களுடன் webdinamani@gmail.com என்ற முகவரிக்கு மின்னஞ்சல் செய்யலாம்.

திங்கள், 28 நவம்பர், 2011

Dinamani editor about kambar and valluvar: கம்பரும், வள்ளுவரும்-தினமணி ஆசிரியர்


கம்பரும், வள்ளுவரும் இலக்கிய உலகுக்கு அழைத்துச் செல்லும் வாயில்கள்:
தினமணி ஆசிரியர்

First Published : 28 Nov 2011 01:43:15 AM IST

Last Updated : 28 Nov 2011 03:41:12 AM IST

கம்பன் கழகத் தலைவர் சி.டி.எஸ். சிதம்பரத்துக்கு பொன்னாடை அணிவித்து வாழ்த்துத் தெரிவிக்கிறார் தினமணி ஆசிரியர் கே. வைத்தியநாதன். உடன் (இடமிருந்து) கவிஞர
தாம்பரம், நவ. 27: கம்பரின் ராமாயணமும், வள்ளுவரின் திருக்குறளும் இலக்கிய உலகுக்கு அழைத்துச் செல்லும் வாயில்கள் என்று "தினமணி' ஆசிரியர் கே. வைத்தியநாதன் கூறினார்.  சென்னையை அடுத்த தாம்பரத்தில் சனிக்கிழமை நடைபெற்ற கம்பன் கழகம் தொடக்க விழாவில் அவர் பேசியது:  30 ஆண்டுகளுக்கு முன் தாம்பரத்தில் செயலிழந்து போய்விட்ட கம்பன் கழகம் மீண்டும் தொடங்கப்பட்டு இருப்பது பாராட்டத்தக்கது.  ஒரு காலத்தில் கம்பராமாயணத்தை எதிர்த்து "தீ பரவட்டும்' என்று கோஷத்தை எழுப்பி கம்ப காவியத்தைத் தமிழகம் முழுவதும் தீயிட்டுக் கொளுத்தும் போராட்டத்தைத் தொடங்கினார்கள் பகுத்தறிவுவாதிகள் என்று தங்களை அழைத்துக் கொள்ளும் திராவிட இயக்கத்தினர். புதுவையில் பாரதிதாசனிடம் கம்பகாவியத்தை எரிக்கப் போவது பற்றிக் கூறியபோது, அவர் ""சரி, கம்பராமாயணத்தை எரித்துவிடுவோம். கம்பரை எரித்துவிட்டால் அந்த இடத்துக்கு வேறு யார் என்று சொல்லுங்கள்'' என்று திரும்பக் கேட்டார் என்பது சரித்திரம்.  அதேபோல, பேராசிரியர் இலக்குவனார் "தீ பரவட்டும்' அறிவிப்பைப் பற்றிக் கேள்விப்பட்டதும் ""நல்லதொரு தமிழ்க் கவிஞனின் தமிழ்க் கவிதையை எரிக்க வேண்டும் என்று சொல்கிறீர்களே, இதுவா தமிழுணர்வு?'' என்று கடிதம் எழுதினார் என்பதும் சரித்திரம்.  கம்பராமாயணத்தைக் காவியமாக, இலக்கியமாக, வாழ்வில் பாடமாகப் பார்க்க வேண்டும்.  கம்ப காவியத்தில் எந்த ஒரு கதாபாத்திரமும், எவ்வளவு சிறிய கதாபாத்திரமாக இருந்தாலும் சோடை இல்லை என்பது பிரமிக்கத்தக்க விஷயம்.  கடைசிவரை பேசவே மாட்டான் சுக்ரீவன் என்கிற கதாபாத்திரம். அந்தப் பேசாத தம்பிக்குக் கம்பன் இரண்டே இரண்டு பாடல்கள்தான் வைத்திருப்பார். அந்த இரண்டும் மாணிக்கப் பரல்கள்.  கம்பனின் தமிழிலும் கவிதைச் செறிவிலும் மனதைப் பறிகொடுத்தவர்களில் மகாகவி பாரதியும் ஒருவர். அதனால்தான் "யாமறிந்த புலவரிலே கம்பனைப்போல், இளங்கோவைப்போல், வள்ளுவரைப்போல் பூமிதனில் யாங்கணுமே கண்டதில்லை'' என்பான். காலத்தால் வள்ளுவருக்கும் இளங்கோவடிகளுக்கும் பிற்பட்ட கம்பனுக்கு பாரதி முன்னுரிமை கொடுப்பதற்குக் காரணம் கம்பனின் கவிதை நயம். அதேபோல, வள்ளுவன் என்று குறிப்பிடாமல் வள்ளுவர் என்று குறிப்பிட்டு மரியாதை கொடுத்திருப்பதையும் நாம் கருத்தில் கொள்ளல் வேண்டும்.  திருக்குறளும், கம்ப காதையும் தமிழ் இலக்கியச் சோலைக்கு நுழைவு வாயில்கள். நம்மைக் கவர்ந்து இழுத்து சிந்திக்கத் தூண்டும் இந்த இரண்டு படைப்புகளையும் படிக்கத் தொடங்கிவிட்டால் அதன் தொடர்ச்சியாகச் சங்க இலக்கியத்தைச் சுவைக்கும் பக்குவத்தையும் பெறமுடியும்.  கம்பன் விழாபோல, இலக்கியக் கூட்டங்கள் எங்கே நடந்தாலும் அதற்கு தினமணி நாளிதழின் ஆதரவும், உறுதுணையும் நிச்சயமாக உண்டு. தமிழ் இருக்கும் இடத்தில் எல்லாம் தினமணியும் இருக்கும்'' என்றார் அவர்.  விழாவில் தாம்பரம் கம்பன் கழகத் தலைவர் சிடி.எஸ். சிதம்பரம், பொதுச்செயலாளர் கவிஞர்  அரு. நாகப்பன், நெறியாளர் தி.ராசகோபாலன், கெüரவத் தலைவர் அலெக்ஸாண்டர் உள்ளிட்டோர் பங்கேற்றனர்.

திங்கள், 1 ஆகஸ்ட், 2011

விரசத்தை விலக்கிக் கவிதை எழுதுங்கள்!

விரசத்தை விலக்கி கவிதை எழுதுங்கள்!

First Published : 01 Aug 2011 03:41:39 AM IST

கோவையில் ஞாயிற்றுக்கிழமை நடைபெற்ற கவிஞர் சிற்பி பவள விழாவில், சிற்பி இலக்கிய விருதுகள் வழங்கும் நிகழ்ச்சிக்குத் தலைமை வகித்துப் பேசுகிறார் தினமணி ஆசிர
கோவை, ஜூலை 31: விரசத்தை விலக்கி கவிதை எழுதுங்கள் என்று இளம் கவிஞர்களுக்கு "தினமணி' ஆசிரியர் கே.வைத்தியநாதன் வேண்டுகோள் விடுத்தார்.
கோவை கிக்கானி மேல்நிலைப் பள்ளி அரங்கில் ஞாயிற்றுக்கிழமை நடைபெற்ற கவிஞர் சிற்பியின் பவள விழாவில் சிற்பி இலக்கிய விருதுகள் வழங்கும் நிகழ்ச்சிக்குத் தலைமை வகித்து அவர் பேசியதாவது:
ஒரு கவிஞருக்கு நடைபெறும் பாராட்டு விழாவுக்கு இவ்வளவு பெரிய கூட்டம் வந்திருக்கிறது என்பது வியப்புக்குரியது. இனிமேல் மீண்டும் ஒரு தமிழ்ச் சங்கம் உருவாக்கப்படுமானால் வேண்டுமெனில் அது கோவையில்தான் அமைக்கப்பட வேண்டும் என்பதை இவ் விழா காட்டுகிறது.
இலக்கியத்துக்காக, தமிழுக்காக, ஒரு கவிஞனைப் பாராட்டுவதற்காக மனமுவந்து இத்தனை பேர் கூடி பாராட்டு விழா நடத்துவது எங்கும் பார்த்திராதது, நடந்திராதது.
கவிஞர் சிற்பி தலைசிறந்த கவிஞர் என்பது ஒருபுறம் இருக்க, அவர் பல மாயைகளை உடைத்தெறிந்திருக்கிறார் என்கிற கோணத்தில்தான் நான் அவரைப் பார்க்கிறேன்.
புலவர்கள் பலர் தலைசிறந்த கவிஞர்களாக இருப்பதில்லை. புலவர்களாக இருப்பவர்கள் இலக்கணத்தில் ஊறி, அவர்களது படைப்புகளில் கவித்துவம் சற்று குறைவாகவும், இலக்கியத் தரவுகளும், மொழி ஆளுமையும்தான் மேலோங்கியதாகவும் இருக்கும். ஆனால், புலவர்கள் கவிஞராக முடியாது என்ற கண்ணோட்டத்தை உடைத்தெறிந்திருப்பவர் சிற்பி. பல்கலைக்கழகத்தின் தமிழ்த் துறைத் தலைவராகப் பணியாற்றிய அவர், மரபுக் கவிதைகளுக்குள்ளே ஊறியிருக்க வேண்டியவர், அதையெல்லாம் விட்டு வானம்பாடிப் பறவையாகப் பறந்து, புதியதொரு வழித்தடத்தை சமைத்திருக்கிறார். தான் புலவனுக்கும் புலவன், கவிஞனுக்கும் கவிஞன் என்று நிரூபித்திருக்கிறார். அவரது கவிதைகளில் கற்பனைச் செறிவும் இருக்கிறது, இலக்கணச் செறிவும் இருக்கிறது. மொழி ஆளுமையும் இருக்கிறது.
அவர் உடைத்தெறிந்த இன்னொரு மாயை, நல்ல கவிஞர்கள் தங்களை அடையாளம் காட்டிக் கொள்ள வேண்டுமெனில் அவர்கள் சென்னையில் தஞ்சமடைய வேண்டும் என்கிற தவறான கண்ணோட்டத்தை. தான் இருக்கும் இடத்திலேயே இருந்து கொண்டே தனது கவித் திறத்தால் அத்தகைய பெருமையைப் பெற முடியும் என்பதை நிரூபித்திருக்கிறார் சிற்பி.
பாரதிக்கு கிடைக்க வேண்டிய அங்கீகாரம் அவர் வாழ்ந்த காலத்தில் கிடைக்கவில்லை என்ற வேதனை அனைவருக்கும் இருக்கிறது.
தாகூருக்கு கிடைத்த நோபல் பரிசு, பாரதிக்கு அல்லவா கிடைத்திருக்க வேண்டும் எனக் கேள்வி எழுப்பாதவர்களே இல்லை. பாரதியின் பாடல்களால் தமிழகம் கொதித்தெழுந்தது.
பாரதி தமிழகத்தின் எல்லைகளைக் கடந்து தேசிய அளவில் தான் ஒரு கவிஞன் என நிலைநாட்டிக் கொண்டது அவரது மறைவுக்குப் பிறகுதான்.
தான் வாழும் காலத்திலேயே இனம், மொழி, மாநிலம் இவற்றையெல்லாம் உடைத்தெறிந்து அகில இந்திய அளவில் ஒரு கவிஞன் எனத் தன்னை நிலைநாட்டிக் கொண்டிருப்பது சிற்பியின் மிகப் பெரிய சாதனை.
நாமக்கல் கு.சின்னப்பபாரதி தனது பிறந்த நாளைக் கொண்டாடும்போது பிற மாநில எழுத்தாளர்களை அழைத்து சிறப்பிக்கிறார். அதேபோல, கவிஞர் சிற்பி தனது பவள விழாவில் கேரளத்து கவிஞரை அழைத்து கெüரவிக்கிறார். இதைப் பார்க்கும்போது, "கற்றாரை கற்றாரே காமுறுவர்' என்பது கோவை மண்ணுக்கே உரிய சிறப்போ என்று நினைக்கத் தோன்றுகிறது.
கவிஞர் சிற்பியின் கவிதைகளில் மொழி ஆளுமை, சமூகப் பார்வை, கவிதை நயம் எல்லாமே இருக்கிறது. ஆனால், எங்கு தேடினாலும் இம்மி அளவுகூட விரசத்தைக் காண முடியாது.
இன்றைய கவிஞர்கள் இதிலிருந்து பாடம் படிக்க வேண்டும். இளம் கவிஞர்கள் தங்களது கவித்துவம், மொழி ஆளுமை, கருத்துச் செறிவு, சமுதாயக் கண்ணோட்டம் ஆகியவற்றை நம்புங்கள். தயவு செய்து விரசத்தை விலக்கி கவிதை எழுதுங்கள் என்பதுதான் கவிஞர் சிற்பியின் பவள விழா தரும் செய்தியாக இருக்க வேண்டும். அப்போதுதான் தலைமுறை கடந்து தமிழ் நிலைத்திருக்கும். நாளைய தலைமுறை நம்மை மதிக்கும் என்றார் "தினமணி' ஆசிரியர் வைத்தியநாதன்.
மலையாளக் கவிஞர் கே.சச்சிதானந்தன்: மண்ணின் மணம், கிராமிய வாழ்வியல், அதன் விழுமியங்கள் ஆகியவற்றை வெளிப்படுத்துவதாக சிற்பியின் கவிதைகள் இருக்கின்றன. அவர் உணர்வுகளை மட்டும் வெளிப்படுத்தும் கவிஞர் அல்ல. மனித வாழ்வியலையே தனது படைப்புகளில் கொண்டு வருபவர். சங்க காலப் புலவர்களின் படைப்புகளில் இருக்கக் கூடிய மனிதப் மாண்புகளை சிற்பியின் கவிதைகளில் காண முடியும்.
அவர் பழமைவாதியல்ல, பழமையை புதிய கண்ணோட்டத்தில் சிந்திக்கக் கூடியவர்.
பழமை என்பது முடிந்துபோனதல்ல, ஒவ்வொரு தலைமுறையும் பழமையில் இருந்தே வாழ்க்கைக்குத் தேவையான விஷயங்களைப் பெற முடியும் என்பதைப் புரியவைத்தவர் கவிஞர் சிற்பி என்றார்.
நூல் ஆசிரியர்கள் கே.எஸ்.சுப்பிரமணியம், பி.மருதநாயகம், நவபாரதி, பதிப்பாளர்கள் சேது சொக்கலிங்கம், மீனாட்சிசுந்தரம், மீரா கதிர், வேனில் ஆகியோருக்கு நினைவுப் பரிசு வழங்கி கெüரவித்தார் "தினமணி' ஆசிரியர் வைத்தியநாதன்.
கவிஞர்கள் அபி, லீலா மணிமேகலை ஆகியோருக்கு சிற்பி இலக்கிய விருதுகளையும், கவிஞர்கள் பா.சத்தியமோகன், சென்னிமலை தண்டபாணி ஆகியோருக்கு சிற்பி இலக்கியப் பரிசுகளையும் மலையாளக் கவிஞர் கே.சச்சிதானந்தன் வழங்கினார். லீலா மணிமேகலை சார்பில் கவிஞர் செல்மா பிரியதர்ஷன் விருதை பெற்றுக்கொண்டார்.

திங்கள், 17 ஜனவரி, 2011

world Recognition for tamil writers: தமிழ் எழுத்தாளனுக்கு உலகளாவிய ஏற்பு கிடைக்க வேண்டும்: தினமணி ஆசிரியர் பேச்சு

தகுதியுள்ள நூலகர்களை அமர்த்த வேண்டும் என்றால் முன்னரே அமர்த்தப்பட்ட நூலகர்களை என்ன செய்வது?  எனவே, நூலகர்களிடமும் படிக்கும் ஆர்வத்தைத் தூண்ட வேண்டும். அதற்காகப் பணிநேரத்தில் வெட்டிக் கதைகளைப்படிப்பவர்களாக  இருக்கக்கூடாது. 
அன்புடன் இலக்குவனார் திருவள்ளுவன்

தமிழ் எழுத்தாளனுக்கு உலகளாவிய அங்கீகாரம் கிடைக்க வேண்டும்: தினமணி ஆசிரியர் பேச்சு

சென்னை, ஜன. 16: ""தமிழ்ப் படைப்புகளுக்கு இன்றும் உலகளாவிய அங்கீகாரம் கிடைக்காமல் இருப்பது வேதனை அளிக்கிறது'' என்றார் தினமணி ஆசிரியர் கே. வைத்தியநாதன்.  சென்னைப் புத்தகக் காட்சியையொட்டி, தென்னிந்திய புத்தக விற்பனையாளர், பதிப்பாளர் சங்கம் சார்பில், புத்தகக் காட்சி வளாகத்தில் ஞாயிற்றுக்கிழமை நடைபெற்ற உரை அரங்கில் "நோக்கும் திசையெல்லாம்' என்ற தலைப்பில் அவர் பேசியது:  தமிழகத்தில் நூலகங்களைப் பயன்படுத்தும் நல்ல வழக்கம் குக்கிராமங்களிலும்கூட இன்றளவும் தொடர்கிறது. அரசும் ஒவ்வோர் ஊராட்சியிலும் நூலகங்கள் இருப்பதை உறுதிசெய்யும் வகையில், நூலகங்களை அமைத்துவருகிறது. அந்த நூலகங்களுக்கு நல்ல படைப்புகள் வாங்கப்படுகிறதா என்பதில் எனக்குக் கருத்து வேறுபாடு உண்டு. இருந்தாலும் ஒவ்வொரு கிராமத்திலும் குறைந்தது பத்து இளைஞர்களாவது நூலகர்களையும் வாசக சாலைகளையும் பயன்படுத்துகிறார்கள்.  ஆனால், நம்முடைய நூலகங்களில் - குறிப்பாக கிராமப்புற நூலகங்களில் பணியமர்த்தப்படும் நூலகர்களின் திறன் எப்படி இருக்கிறது? இன்றைய கால சூழலுக்கும் பெருகிவரும் புத்தகங்களுக்கும் ஈடுகொடுக்கும் வகையில் அவர்கள் பயிற்சி பெற்றவர்களாக இருக்கிறார்களா என்றால் இல்லை.  நூலகர் பணி என்பது வெறுமனே புத்தகங்களை எடுத்துக்கொடுக்கும் பணி அல்ல; அது புத்தகங்களுடன் வாசகர்கள் உறவாட உதவும் ஒரு கலை. எத்தனை எத்தனைத் துறைகள், எத்தனை எத்தனைப் படைப்பாளர்கள், எத்தனை எத்தனைப் புத்தகங்கள் வெளியாகின்றன? இவற்றைப் பற்றியெல்லாம் ஆழ்ந்த அறிவு இல்லாவிட்டாலும், குறைந்தபட்சம் அடிப்படை அறிவாவது நூலகர்களுக்கு அளிக்கப்பட வேண்டாமா?  ஆகையால், நூலகங்களை அமைப்பதோடு நிறுத்திக்கொள்ளாமல், அந்த நூலகங்கள்தோறும் தகுதி பெற்ற நூலகர்கள் அரசால் பணியமர்த்தப்பட வேண்டும்.  அடுத்து, இப்படிப்பட்ட புத்தகக் காட்சிகளைப் பார்க்கும்போது, மகாகவி பாரதி கண்ட கனவு நினைவுக்கு வருகிறது. பிறநாட்டு நல்லறிஞர் சாத்திரங்கள் தமிழ் மொழியில் பெயர்த்தல் வேண்டும் என்றார் பாரதி. உலகின் தலைசிறந்த படைப்புகள் எல்லாமே தமிழில் இப்போது மொழிபெயர்க்கப்படுகின்றன.  இறவாத புகழுடைய புது நூல்கள் தமிழில் இயற்றல் வேண்டும் என்பது பாரதியின் இன்னொரு கனவு. வெளிநாடுகளுக்கு இணையாக எல்லா துறைகள் சார்ந்தும் நம் மொழியிலும் ஏராளமான நூல்கள் வெளிவருகின்றன; ஏராளமான படைப்பாளிகள் உருவாகிவருகிறார்கள்.  ஆனால், பாரதி கண்ட இன்னொரு கனவு திறமான புலமையெனில் அதை அயல்நாட்டார் வணக்கம் செய்தல் வேண்டும் என்பது. அந்தக் கனவு மட்டும் நிறைவேறவில்லை. இதுவரை எந்தவொரு தமிழ்ப் படைப்புக்கும் உலகளாவிய அங்கீகாரம் கிடைக்கவில்லையே, ஏன்? நமது படைப்புகள் தரமற்றவையா? நமது படைப்பாளிகள் திறமையற்றவர்களா?  இன்று தமிழன் உலகின் எல்லா மூலையிலும் பரவிக் கிடக்கிறான். ஆனால் தமிழ் எழுத்தாளன் உலக அரங்கில் முறையான அறிமுகம் கிடைக்காமல் தவிக்கிறான். இதற்குக் காரணம் நாம் உலக எழுத்தாளர்களுடன் உறவு கொள்ளவும் அவர்கள் நமது எழுத்துக்கள் பற்றி தெரிந்து கொள்ளவும் வழியில்லாமல் இருப்பதுதான்.  இதற்கான முயற்சிகளை முன்னெடுக்கும் வகையில், இதுபோன்ற பெரிய அளவிலான புத்தகக் காட்சிகளின்போது வெளிநாடுகளைச் சேர்ந்த, வெளிமாநிலங்களைச் சேர்ந்த படைப்பாளிகளை நாம் இங்கு அழைக்க வேண்டும். நம்முடைய படைப்பாளிகள் அவர்களுடன் தொடர்புகளை ஏற்படுத்திக்கொள்ளவும் கலந்துரையாடவும் நம் படைப்பாளிகளைப் பற்றி அவர்கள் தெரிந்துகொள்ளவும் அது உதவும். நம் படைப்பாளிகளின் பெருமை நம்மைத் தாண்டிச் செல்லவும் அவர்கள் உலகளாவிய அங்கீகாரம் பெறவும் இது உதவும்.  மொழி வளர்ச்சியை ஊக்குவிக்கும் வகையில் மாவட்டங்கள்தோறும் இலக்கியச் சந்திப்புகள், விவாதங்கள், புத்தகம் தொடர்பான நிகழ்வுகளை நடத்தத் தக்க அரங்குகள் அமைக்கப்பட வேண்டும். அங்கே இலக்கிய நிகழ்ச்சிகளை குறைந்த கட்டணத்தில் நடத்த வழிவகை செய்ய வேண்டும். தமிழக அரசின் "எங்கும் தமிழ் எதிலும் தமிழ்' முழக்கம் உறுதிசெய்யப்பட புத்தகங்கள் சார்ந்த இந்த நடவடிக்கைகள் முக்கியமானவை''.  சென்னைப் புத்தகக் காட்சிக்கு என்று நிரந்தரமான ஓர் இடத்தை அரசு ஒதுக்க வேண்டும்; தென்னிந்திய புத்தக விற்பனையாளர், பதிப்பாளர் சங்கம் இதற்கான முயற்சிகளை முன்னெடுக்க வேண்டும் என்று அவர் கேட்டுக்கொண்டார்.  உரை அரங்குக்கு, மூத்த பதிப்பாளர் அருணோதயம் அருணன் தலைமை வகித்தார். பேச்சாளர் பாரதி பாஸ்கர், நூலகர் எம். முத்துசாமி ஆகியோர் பேசினர்.  முன்னதாக, பதிப்பாளர் மீனாட்சி சோமசுந்தரம் வரவேற்றார். நிறைவில், சுப. மெய்யப்பன் நன்றி கூறினார்.   

சனி, 15 ஜனவரி, 2011

music sense is basic sense

தாய்மொழியைக் கற்றுக் கொடுங்கள் என்னும் ஆசிரியரின் அறிவுரையை அனைவரும் பின்பற்றினால் நாடு நலம் பெறும்! வளம் பெறும்! ஆனால், தமிழ் நாட்டில் பிற மொழிக்கல்விக்குத் தரும் ஊக்கம் தாய்த்தமிழுக்கு இல்லையே! அன்புடன் இலக்குவனார் திருவள்ளுவன்

சங்கீத ரசனை இந்தியரின் அடிப்படை உணர்வு: 
தினமணி ஆசிரியர் கே.வைத்தியநாதன்

சென்னை, டிச. 14: சங்கீத ரசனை இந்தியர்களின் அடிப்படை உணர்வு என்று தினமணி ஆசிரியர் கே.வைத்தியநாதன் தெரிவித்தார்.  ஹம்ஸத்வனி அமைப்பின் 21-வது ஆண்டு இசை, நாடக விழா சென்னையில் வெள்ளிக்கிழமை தொடங்கியது. இந்த விழாவைத் தொடக்கி வைத்து தினமணி ஆசிரியர் கே.வைத்தியநாதன் பேசியதாவது: உலகில் வேறு எந்த நாட்டுக்கும், பகுதிக்கும் இல்லாத பெருமை சென்னைக்கு உண்டு. ஆண்டின் 365 நாள்களும் - இலக்கியம், கலை, நாடகம், ஆன்மிகம் என ஏதாவது ஒரு நிகழ்ச்சி தினந்தோறும் ஏதாவது ஒரு பகுதியில் நடத்தப்பட்டு வரும் பெருமை சென்னைக்கு மட்டுமே உண்டு.  உலகில் பல்வேறு இனங்கள் உள்ளன. அந்தந்த இனங்களுக்கு என்று சில தனித்தன்மைகள் உண்டு. சில இனங்கள் செல்வத்துக்கு முன்னுரிமை அளிக்கும். நாடுகளைப் பிடிப்பதிலும் மதத்தைப் பரப்புவதிலும் வேறு சில இனங்கள் ஆர்வம் காட்டும். ஆனால் மனிதன் எப்படி வாழ வேண்டும் என காட்டுவதுதான் நம் இனத்தின் தலையாய பண்பு.  "ஈதலும் இசைபட வாழ்தலும்' தான் நமது இனத்தின் சிறப்பு, தனித்தன்மை. நம்மிடம் இருப்பதை பிறருடன் பகிர்ந்து கொள்வது, இசையோடு இயைந்து வாழுவது என்பதுதான் இதன் பொருள்.  இசையோடு ஏன் வாழ வேண்டும்? இசை இல்லாவிட்டால் இரக்கம் இருக்காது; இரக்கம் இல்லாவிட்டால் மனிதாபிமானம் இருக்காது; மனிதாபிமானம் இல்லாவிட்டால் மானுடனாக இருப்பதற்கே அர்த்தம் இருக்காது.  இன்றைய காலகட்டத்தில் சமுதாய மாற்றங்களுக்கு ஏற்ப கிராமங்களிலிருந்து அவசர கதியில் இயங்கும் நகர்ப்புறங்களை நோக்கி மனிதர்கள் இடம்பெயருகிறார்கள். அலுவலகங்களில் இருப்பதைவிட அலுவலகங்களுக்குப் போய் விட்டு வருவதே மக்களுக்கு மிகப் பெரிய "டென்ஷன்' ஆக இருக்கிறது. போக்குவரத்து நெரிசல் ஒன்று போதும், மனஅழுத்தத்தையும் ரத்த அழுத்தத்தையும் ஒருசேர அதிகரிக்க.  அலுவலகம் உள்ளிட்ட எல்லா இடங்களிலும் இந்த இறுக்கமான சூழ்நிலை தொடருகிறது. தொலைக்காட்சி, சினிமா, ஏன் பத்திரிகைகள் என எதை எடுத்தாலும் நமது அழுத்தத்தை மேலும் அதிகரிப்பதாகவே இருக்கின்றன. இதிலிருந்து விடுபட வேண்டுமானால் அதற்கு ஒரே வழி இசைதான். அதற்கு இதுபோன்ற சபாக்கள்தான் உதவுகின்றன.  நாகரிக மாற்றங்களில் பல, நம்மை பாதித்துக்கொண்டே இருப்பதால் நமது அடித்தளம் அசைக்கப்படுகிறது. நமது நாகரிகம், கலாசாரம், பண்பாடு இவையெல்லாம் உலகமயம் என்ற சூழலில் தகர்ந்து கொண்டிருக்கிறது.  நமது முன்னோர்கள் தீர்க்கதரிசிகள். மனிதனின் அடிப்படை பயம் நிலையாமைதான். நிலையாமை உள்ளவரை இறையுணர்வும் இருக்கும் என்பதை உணர்ந்ததால்தான் மொழியையும், சமயத்தையும் இணைத்தார்கள். மொழியை சமயமும், இறையுணர்வை மொழியும், ஒன்றையொன்று பாதுகாக்கும் என்று கணித்தனர்.  இன்று பேச்சு வழக்கில் இல்லாவிட்டாலும்கூட உலகின் தொன்மையான மொழிகளுள் ஒன்றாக சம்ஸ்கிருதம் தொடர்வதற்குக் காரணம் அந்த மொழி இறையுணர்வுடன் பிணைந்திருப்பதுதான்.  அதுமட்டுமல்ல, இசை, நாட்டியம், ஓவியம், சிற்பம் என்று கலைகளையும் சமயத்துடன் இணைத்தார்கள் நம் முன்னோர்கள். இந்தக் கலைகள் காப்பாற்றப்பட வேண்டுமென்றால், நமது பண்புகள், பாரம்பரியம் பாதுகாக்கப்பட வேண்டுமென்றால் நாம் மொழியைக் காப்பாற்ற வேண்டும். தமிழோ, தெலுங்கோ, ஹிந்தியோ, பஞ்சாபியோ, தயவு செய்து தாய்மொழியில் பேசுங்கள். உங்கள் குழந்தைகளுக்கு தாய்மொழியைக் கற்றுக் கொடுங்கள்.  மொழியை மறக்கும்போது நமது கலாசாரம், பண்பாடு போன்றவற்றை நாளைய சமுதாயம் இழந்துவிடும்.  சங்கீத ரசனை என்பது ஒவ்வோர் இந்தியக் குடிமகனுக்கும் அடிப்படையிலேயே உள்ளது. இல்லாவிட்டால் இசையைப் பிரதானப்படுத்தி வெளியான எத்தனையோ திரைப்படங்கள், அவை வேறு மொழியாக இருந்தபோதிலும் வெற்றி பெற்றிருக்க முடியுமா?  கொஞ்சும் சலங்கையும், தில்லானா மோகனாம்பாளும், சலங்கை ஒலியும், சங்கராபரணமும், சிந்து பைரவியும் பெரும் வெற்றி பெற்றதற்கு காரணம், பாமரர்களுக்கும் இசையுணர்வு இருக்கிறது என்பதால்தானே?  ஒரு மனிதன் எப்படிப்பட்ட இக்கட்டான சூழலில் இருந்தாலும் இசைதான் மிகப் பெரிய அமைதியைக் கொடுக்கும். அப்படிப்பட்ட இசையின் வளர்ச்சிக்காக ஹம்ஸத்வனி அமைப்பு சேவை செய்து வருவது பாராட்டுக்குரியது என்றார் தினமணி ஆசிரியர்.  விழாவில் ஹம்ஸத்வனி அமைப்பின் துணைத் தலைவர் சீனிவாசன் தேவய்யா, செயலாளர்கள் ஆர்.சுந்தர், டி.ஆர்.கோபாலன், சென்னைத் தொலைக்காட்சியின் முன்னாள் இயக்குநர் ஏ.நடராஜன், புல்லாங்குழல் இசை மேதை என்.ரமணி உள்ளிட்ட பலர் கலந்துகொண்டனர்.   

சனி, 16 அக்டோபர், 2010

இனத்தின் அடையாளம் மொழிதான்: தினமணி ஆசிரியர் கே.வைத்தியநாதன்


விழாவில் பேசுகிறார் லட்சுமியம்மாள் கல்வியியல் கல்லூரித் தலைவர் எம்.வருவான் வடிவேலன். உடன் (இடமிருந்து) தருமபுரி தமிழ்ச் சங்கச் பொருளாளர் பொ.சச்சிதானந
தருமபுரி, அக். 15: ஒரு இனத்தின் அடையாளமே மொழிதான் என்று தினமணி ஆசிரியர் கே.வைத்தியநாதன் பேசினார்.  தருமபுரி தமிழ்ச் சங்கம் வெள்ளிக்கிழமை நடத்திய கூட்டத்தில் சிறப்பு அழைப்பாளராகக் கலந்து கொண்டு அவர் பேசியது:  தமிழ்ச் சங்கங்கள் ஊருக்கு ஊர் ஏன் உருவாக்கப்பட வேண்டும் என்று கேட்கின்றனர். ஒரு இனத்தின் அடையாளமே மொழிதான். என்னதான் ஆங்கிலத்தில் பேசினாலும், ஆங்கிலேயர் போல் உடையணிந்து கொண்டாலும், வெளிநாடுகளுக்குச் சென்று அந்த நாட்டின் குடியுரிமையே பெற்றிருந்தாலும், அவர்கள் சார்ந்த இனத்தின் பெயரால்தான் ஒருவர் அடையாளம் காணப்படுவார்.  அமெரிக்க அதிபர் பராக் ஒபாமாவை ஆப்பிரிக்க இனத்தைச் சேர்ந்த அமெரிக்கர் என்பதால் ஆப்ரோ அமெரிக்கர் என்றுதான் அழைக்கின்றனர். அதுபோலதான் தெலுங்கு பேசுபவர்களை தெலுங்கர்கள் என்றும், மலையாளம் பேசும் மக்களை மலையாளிகள் என்றும், தமிழ் பேசுபவர்களைத் தமிழர்கள் என்றும் அந்தந்த மொழியின் அடையாளத்தில்தான் இனம் காண்கின்றனர். எனவே நாம் நமது மொழியின் அடையாளம் அழிந்துபோகாமல் பாதுகாப்பதில் கவனமாக இருக்க வேண்டும்.  நமது நாட்டில் இருந்து ஏராளமான மாணவர்கள் வெளிநாடுகளுக்குச் சென்று மருத்துவம், பொறியியல், பொருளாதாரம் படித்து பல்வேறு உயர் பதவிகளில் உள்ளனர். அதற்கேற்ப ஏராளமான மேலாண்மைக் கல்வியியல், மருத்துவம், பொறியியல் கல்லூரிகள் தொடங்கப்படுகின்றன. இதன் மூலம் தான் ஆயிரக்கணக்கான மாணவர்கள் உருவாக்கப்படுகின்றனர்.  ஆனால் அந்தக் கல்லூரிகளில் தரமான மாணவர்கள் எத்தனை பேர் உருவாக்கப்படுகின்றனர் என்பதுதான் கேள்விக்குறியாக உள்ளது. அடிப்படைக் கல்வி தரமாகப் போதிக்கப்பட்டு, அதன் பிறகு மேற்படிப்புகள் சிறப்பாக இருந்தால் மட்டுமே நல்ல மனிதர்களை நாம் உருவாக்க முடியும். தரமான மாணவர்கள் உருவாக்கப்பட அவர்களுக்கான அடிப்படைக் கல்வியில் கவனம் செலுத்தும் வகையிலான போதிய ஆசிரியர்கள் நம்மிடம் இல்லை.  மாணவர்களின் அடிப்படை பலமாக அமையாவிட்டால் நாளைய இந்தியா இன்று உள்ள பெருமைகள் அனைத்தையும் தக்க வைத்துக் கொள்ள முடியாது. எனவே அவர்களை அடிப்படையில் தரமானவர்களாக உருவாக்க வேண்டிய பொறுப்பு பள்ளிக் கல்வி ஆசிரியர்களுக்கு உள்ளது.  அரை நூற்றாண்டுக்கு முன்பு வரை ஆசிரியர் படிப்பு என்றால் மதிப்பு மிக்கதாகவும், ஆசிரியர் பணி என்றால் கெüரவமானது என்றும் கருதப்பட்டது, போற்றப்பட்டது. அப்போது அவர்களுக்குப் போதுமான ஊதியம் இல்லை. ஆனால் இப்போதோ அதிகமான ஊதியம் வழங்கப்படுகிறது. இருப்பினும் இப்போது அவர்களுக்கு உரிய மரியாதையோ, கெüரவமோ வழங்கப்படுவதில்லை.  ஒரு நாடு நன்றாக இருக்க வேண்டும் என்றால் ஆசிரியர்கள், விவசாயிகள், ராணுவ வீரர்கள் ஆகிய மூன்று பிரிவினரும் மதிக்கப்பட வேண்டும். இளைஞர்கள் ஆசிரியர்களாக வேண்டும்; விவசாயத்தில் ஈடுபட வேண்டும், ராணுவத்தில் பணிபுரிய வேண்டும் என்று விழைய வேண்டும். ஆனால் இந்த மூன்று பிரிவினரும் இன்றைய சமுதாயத்தில் இழிவாகவே நடத்தப்படுகின்றனர். இந்த நிலையை மாற்ற வேண்டும். அப்போதுதான் நாளைய தலைமுறை வளமையாகவும், பலமானதாகவும் இருக்கும்.  ஆசிரியர் பணி என்பது பாடப்புத்தகத்தை போதிக்கும் பணி மட்டுமல்ல, மாணவர்களை மொழி, இன, நாட்டுப் பற்று உள்ளவர்களாக, மனித நேயமுள்ளவர்களாக மாற்றுவதேயாகும்.  நாளைய இந்தியா வளமானதாகவும், பலமானதாகவும் இருக்க நாம் அடிப்படைக் கல்வியிலும் கவனம் செலுத்தியாக வேண்டும். அஸ்திவாரம் சரியாக அமைந்து விட்டால் மட்டுமே கட்டடம் பலமாக இருக்கும். ஆசிரியர் பயிற்சிப் பள்ளி மாணவர்களாகிய நீங்கள் ஆற்ற வேண்டிய தேசிய கடமை அதுதான்' என்றார் வைத்தியநாதன்.  சங்கத் தலைவர் வழக்கறிஞர் ந.ராசேந்திரன் வரவேற்றார். செயலர் மருத்துவர் கி.கூத்தரசன், கல்வி நிறுவனத் தலைவர்கள் எம்.வருவான் வடிவேலன்,பி.ராஜமாணிக்கம், சா.கனகராஜ் ஆகியோர் முன்னிலை வகித்தனர்.  ÷நிகழ்ச்சியில் தமிழ் ஆர்வலர்கள் மற்றும் பல்வேறு ஆசிரியர் பயிற்சி நிறுவனங்களைச் சேர்ந்த நூற்றுக்கணக்கான மாணவ-மாணவிகள் கலந்து கொண்டனர்.  
கருத்துக்கள்

இனத்தின் அடையாளம் மொழிதான் என்பதன் மூலம் தமிழினத்தின் அடையாளம் தமிழ் மொழி ; அதனைக் காக்க வேண்டும் என்ற உண்மையை உரைத்த ஆசிரியர் திரு வைத்தியநாதன் அவர்களை எவ்வளுளவு பாராட்டினாலும் தகும். சாலமன் போன்றோர் அறியாமையால் ஏதோ எண்ணுகின்றனர்; எனவே தவறாக எழுதுகின்றனர். தமிழர்களின் தேசிய மொழி தமிழே எனப் பேராசிரியர் சி.இலக்குவனார் அன்றே உணர்த்தியதையும் நாம் தமிழர் என்ற உணர்வைத் தமிழர் தந்தை சி.பா.ஆதித்தனார் விதைத்ததையும் நினைவு கூர வேண்டும். அன்புடன் இலக்குவனார் திருவள்ளுவன்
By Ilakkuvanar Thiruvalluvan
10/16/2010 2:43:00 PM
Aasiriyar, Intha soll vilakkam ithuva? Aa_Seer_Iyam_ar Aa=In depth Seer=Clearing Iyam=Doubts Engo padithullen, ithu sariyaa?
By Muthapan
10/16/2010 2:40:00 PM
ஆப்பிரிக்கர் கருப்பாக இருப்பதால் பார்த்தவுடனே தெரிந்து விடுகிறது. தமிழ் தெலுங்கு மலையாளம் பேசுபவனை எப்படி வித்தியாசம் காண முடியும். எல்லோரும் இந்தியன். மொழி என்பது முக்கியம்தான். அதற்காக நம்மை மற்றவர்களிடமிருந்து அன்னியப்படுத்திக்கொள்ளக்கூடாது! ஏனென்றால் நம் மொழிப்பற்றை பயன்படுத்தி கருணாநிதி போன்ற அரசியல்வாதிகளின் குடும்பம் கொழுத்ததுதான் மிச்சம். மற்றபடி தமிழுக்கு எதிர்ப்பாக சொல்லவில்லை.
By Solomon
10/16/2010 1:41:00 PM
ஏனென்றால் நம் மொழிப்பற்றை பயன்படுத்தி நம்மை கருணாநிதி போன்ற அரசியல்வாத்களின் குடும்பம் கொழுத்ததுதான் மிச்சம்.மற்றபடி தமிழுக்கு எதிர்ப்பாக சொல்லவில்லை.
By Solomon
10/16/2010 1:37:00 PM
ஆப்பிரிக்கர் கருப்பாக இருப்பதால் பார்த்தவுடனே தெரிந்து விடுகிறது. தமிழ் தெலுங்கு மலையாளம் பேசுபவனை எப்படி வித்தியாசம் காண முடியும். எல்லோரும் இந்தியன். மொழி என்பது முக்கியம்தான். அதற்காக நம்மை மற்றவர்களிடமிருந்து அன்னியப்படுத்திக்கொள்ளக்கூடாது!
By Solomon
10/16/2010 1:35:00 PM
// இளைஞர்கள் ஆசிரியர்களாக வேண்டும்; விவசாயத்தில் ஈடுபட வேண்டும், ராணுவத்தில் பணிபுரிய வேண்டும் என்று விழைய வேண்டும். // மிக மிக நல்ல கருத்து ஆசிரியர் அவர்களே! நாளைய சமுதாயத்தை நலமுள்ளதாக்க எல்லா பணிகளையும் விட ஆசிரியர் பணி தான் மிகச் சிறந்த பணி/சேவை. ஆதலால் இளைஞர்கள் புதியதோர் உலகைப் படைக்க ஆசிரியர் பணிக்கு முன்வர வேண்டும். ஆனால் ஒரு விஷயத்தை அறியாமல் பேசுகிறீரே என்று வேதனையாக உள்ளது. விவசாயிகளின் இன்றைய நிலை தெரியாமல் இளைஞர்களை அந்த தொழிலுக்கு வந்து கஷ்டப்படச் சொல்கிறீரே. கண்ணையும் காதையும் கட்டிக்கொண்டு வாழ்கிறீரா? ராணுவத்துக்கு இளைஞர்களை வரச்சொல்கிறீர். நல்ல எண்ணம்தான். அப்படியென்றால் இப்பொழுது ராணுவத்தில் பல் போன கிழடுகள்தான் சேர்கிறார்கள் என்கிறீர்களா? எத்தனை இளைஞர்கள் கையில் கட்டு கட்டாக பணத்தை வைத்துக்கொண்டு Military recruitment office முன்னால் தவம் கிடக்கிறார்கள் என்று தெரியாதா உமக்கு? இதுகூட தெரியாமல் எப்படி பத்திரிகை ஆசிரியராக இருக்கிறீர் நீங்கள்?
By வெங்கட்
10/16/2010 1:28:00 PM
தமிழ்நாட்டில் கருத்து பகுதி தணிக்கை இல்லாமல் உடனடியாக பிரசுரம் செய்தது தினமணி மட்டுமே. இப்போது மற்றவர்களும் இதே வழியை பின்பற்ற தொடங்கிவிட்டார்கள். தினமணி எதற்கும், எல்லாவற்றிக்கும் முன்னோடி. எதிர்காலத்தை அறியும் இன்றைய தொலைநோக்கி. தமிழ் வளர்க்கும் தினமணிக்கும் ஆசிரியருக்கும் என் இதயப்பூர்வமான வாழ்த்துக்கள். கருத்து எழுதுபவர்கள் அதிகம் வரக்காரணம் தினமணி. தமிழ் வளருகிறது. தமிழன் வளருகிறான். இனி தமிழ் அழியாது.
By Dillu Durai
10/16/2010 11:29:00 AM
தமிழ் வளர்க்கும் தின மணிக்கும் ஆசிரியருக்கும் நல் வாழ்த்துக்கள். ஆசிரியர் உரை கேட்டதும் அந்த நாட்களில் [1950 களில்]குமரித் தமிழர் பட்ட பாடுகளும், 'கண்டால் அறியும்' என்று கூறி, தமிழரை அடையாளம் கண்டு அழிக்க முயன்ற திரு. பட்டம் தாணு பிள்ளை அரசின் கொடுமைகளும், அவற்றை மேற்கொண்டு முன்னேறிய தமிழரின் துணிவும் உழைப்பும் நினைவுக்கு வந்தன. ஆனால் இன்று, தமிழரே தமிழ் பண்பாட்டை அழிக்கிறோமா எனும் எண்ணமும் எழத்தான் செய்கிறது!
By GERSHOM CHELLIAH
10/16/2010 8:59:00 AM
அப்படியா னால் திராவிடம் என்பது ஏமாற்று வேலை என்பது நிறுபிக்கப்படுகிறது.
By Unmai
10/16/2010 8:25:00 AM
Let me add a little more. In those days, it was the care of mother & then that of father in a family + grand-parents that helped all round development in an individual. If a mother feeds her child telling great moral stories, fables, songs, folk-lore, talk in own native tongue, help gently to understand right vs wrongs, good conduct etc., then all will be well!
By ASHWIN
10/16/2010 8:24:00 AM
தெருவெல்லாம் தமிழ்முழக்கம் செழிக்கச்செய்யும் தினமணி ஆசிரியருக்குப் பாராட்டுகள்.
By மு.இளங்கோவன்,புதுச்சேரி
10/16/2010 6:34:00 AM
உங்கள் கருத்தைப் பதிவு செய்யுங்கள் *

ஞாயிறு, 3 அக்டோபர், 2010


தலைவனுக்குரிய எல்லா தகுதியும் பாரதிக்கு இருந்தது


புதுச்சேரி, அக். 2: பாரதி கவிஞனாக இருந்தாலும் தன்னை உலகை உய்விக்க வந்த தலைவனாகக் கருதிச் செயல்பட்டவன். தலைவனுக்குரிய அத்தனை தகுதிகளும் பாரதியிடம் இருந்தது என்றார் தினமணி ஆசிரியர் கே. வைத்தியநாதன்."புதுவை பாரதி' மாத இதழின் வெள்ளிவிழா புதுச்சேரியில் சனிக்கிழமை நடைபெற்றது. இதில் தினமணி ஆசிரியர் ஆற்றிய சிறப்புரை:சிற்றிதழ் நடத்துவது சாதாரண விஷயமல்ல. சிற்றிதழ்களில் தமிழ் காப்பாற்றப்படுகிறது. நல்ல இலக்கியங்கள் நிலை நிறுத்தப்படுகின்றன. அதனால்தான் சிற்றிதழ்கள் பற்றி அதிகம் பேசி வருகிறேன். கால் நூற்றாண்டு காலம் வெளிவந்துள்ள புதுவை பாரதி இதழையும், ஆசிரியர் பாரதிவாணர் சிவாவையும் வாழ்த்துகிறேன்.பாரதியின் நூற்றாண்டு விழா முடிந்துவிட்டது. 2021-ல் பாரதி இறந்து 100 ஆண்டுகள் ஆகப் போகின்றன. ஆனால் இன்னும் பாரதியைப் பற்றி பேசுகிறோம். பாரதி இறந்த பிறகு மயானத்துக்கு 1 டஜன் பேர் கூட போகவில்லை. ஆனால் பாரதி பேசப்படுகிறான். அதற்கு என்ன காரணம்? காலத்தை மீறி எழுத்தும், செயல்களும்தான் பதிவு செய்யப்படும்.பாரதியைப் பற்றி விமர்சனம் செய்யும் சிலர் ஒரு விஷயத்தை மறந்து விடுகிறார்கள். பாரதியின் காலத்தில் இருந்துதான் அவர்கள் பாரதியையும், பாரதி படைப்புகளையும் ஆய்வு செய்ய வேண்டும். அப்படியில்லாமல் இன்றைய சூழலில் ஆய்வு நடத்த முடியாது. அப்படி செய்தால் அந்த ஆய்வு சரியாக இருக்காது.பாரதியைப் பற்றி கண்ணதாசன் குறிப்பிடுகையில், நான் வாழும்போதே என்னுடைய கவிதையை மற்றவர்கள் பாராட்டுவதையும், என்னுடைய பாடல்களை லட்சக்கணக்கானவர்கள் பாடுவதையும் கேட்டு மகிழும் அதிர்ஷ்டத்தைப் பெற்றவன் நான். ஆனால் பாரதிக்கு அந்த வாய்ப்பு கிடைக்கவில்லை. என்ன எழுதினோம், அதை மற்றவர்கள் எப்படி ரசித்தார்கள் என்று அனுபவிக்கக் கொடுத்து வைக்காதவன் கவிஞன் பாரதி என்கிறார்.பாரதியிடம் தலைவனுக்குரிய எல்லா தகுதியும் இருந்தன. மக்களிடம் மூடநம்பிக்கையை அகற்ற வேண்டும் என்று நினைக்கிறான். வறுமை ஒழிய வேண்டும் என்று விழைகிறான். தனது பாட்டுத் திறத்தாலே இந்த வையத்தைப் பாலித்திட வேண்டும் என்று பராசக்திக்கு வேண்டுகோள் விடுக்கிறான். வயிற்றுக்குச் சோறிட வேண்டும் இங்கு வாழும் மனிதருக்கெல்லாம் என்றும், தனி ஒருவனுக்கு உணவில்லையெனில் இந்த ஜகத்தினை அழித்திடுவோம் என்றும் பாடியவன் பாரதி. இது போன்ற சமூக சிந்தனையுடன் கூடிய தலைவனின் பார்வை காரணமாகத்தான் காலத்தைக் கடந்து நிற்கிறான் பாரதி என்றார் தினமணி ஆசிரியர் கே.வைத்தியநாதன்.
கருத்துக்கள்

பாரதி மட்டுமல்ல ;எந்த ஒரு படைப்பாளியும் அவரது காலச்சூழலுக்கேற்பத்தான் ஆய்வு செய்யப்பட வேண்டும். 
அன்புடன் இலக்குவனார் திருவள்ளுவன்
By Ilakkuvanar Thiruvalluvan
10/3/2010 3:37:00 AM
I want to know "what honour has been given to Our Maha kavi Barathi and Kaviyarasar kannadasan in the Sentamiz Manadu conducted by our Government of Tamilnadu".
By Ram
10/3/2010 1:44:00 AM
உங்கள் கருத்தைப் பதிவு செய்யுங்கள் *

செவ்வாய், 23 மார்ச், 2010

தமிழில் படித்தவர்களுக்கே வேலையில் முன்னுரிமை ​: 'தினமணி' ஆசிரியர் வலியுறுத்தல்



மதுரை, ​​ மார்ச் ​ 22:​ தமிழில் படித்தவர்களுக்கே அரசு அலுவலகங்களில் வேலையில் முன்னுரிமை அளிக்கப்பட வேண்டும் என்று "தினமணி' ஆசிரியர் கே.வைத்தியநாதன் வலியுறுத்தினார்.மதுரை,​​ யாதவர் கல்லூரியில் தமிழ் உயராய்வு மையத்தின் வெள்ளி விழா திங்கள்கிழமை நடைபெற்றது.​ இதில் "மாணவர் முன்னேற்றத்தில் இதழ்களின் பங்கு' எனும் தலைப்பில் அவர் ஆற்றிய சிறப்புரை:இன்றைக்கு தமிழ் மற்றும் தமிழ் உணர்வின் நிலை என்பது மிகவும் கவலை கொள்ளச் செய்வதாக உள்ளது.சமுதாயத்தில் நிலை பிறழ்ந்த செயல்களை,​​ தவறான செய்திகளை,​​ நடைமுறைகளைப் பற்றி கவலைப்படாமல்,​​ எது நடந்தாலும் பரவாயில்லை என்று வீணாக இருக்கின்றோமே,​​ ஏன் இந்த கையறு நிலை என்று நான் வருத்தப்படுவதுண்டு.எந்த ஒரு சமுதாயமும் சுய சிந்தனை இல்லாததாகிவிட்டால்,​​ தவறான செய்திகள்,​​ தவறான நிகழ்வுகள்,​​ வழிமுறைகள் காணப்படும்போது அதுபற்றி கவலைப்படாமல் இருந்துவிட்டால்,​​ அதுதான் அந்த சமுதாயத்துக்கு ஏற்படுகின்ற மிகப் பெரிய ஆபத்து.பேராபத்து எதுவென்றால் கவலைப்படாமல் இருப்பது.​ தவறு செய்தால் கூட தவறில்லை.​ ஆனால்,​​ தவறு செய்கிறோம் என்று தெரிந்திருந்தும் அதுபற்றி கவலைப்படாமல் இருப்பதுதான் பெரும் தவறாகும்.நாம் தமிழைப் படித்தால் வாழ்ந்து விட முடியுமா?,​​ தமிழ் படித்தால் எனக்கு வேலை கிடைக்குமா என்று கேட்கின்ற ஒரு அவல நிலை தமிழருக்கும்,​​ தமிழகத்துக்கும் ஏற்பட்டுவிட்டதே என்று நினைக்கும்போதும்,​​ இதைப் பற்றி கவலையின்றி இருக்கிறோமே என்று நினைக்கும்போதும் உண்மையிலேயே மனம் வேதனைப்படுகிறது.தமிழகத்தில் இரண்டாயிரம் ஆண்டுகளுக்கு முன்பே வட மொழி இருந்தது.​ அதனால் தமிழ் அழிந்ததா,​​ இல்லை தமிழ் இலக்கியங்கள் குறைந்திருந்ததா?​ சங்க இலக்கியங்கள்,​​ சிலப்பதிகாரம் வரவில்லையா?1,100 ஆண்டுகளுக்கு முன் தமிழகத்தில் இஸ்லாமியப் படையெடுப்புகள் நிகழ்ந்தபோதும் தமிழ் அழியவில்லை.​ 800 ஆண்டுகளுக்கு முன் நாயக்கர்கள் படையெடுப்பு ஏற்பட்டது.​ அதன் பின் மராத்தியர்கள் 500 ஆண்டுகள் ஆட்சி செய்தபோதும்,​​ தமிழ் பாதிக்கப்படவில்லை.ஆனால், ​​ வெறும் 250 ஆண்டுகள்தான் ஆங்கிலேய ஆட்சி இருந்தது.​ நம்முடைய பேச்சு,​​ உடை,​​ நடை,​​ பாவனை,​​ உணவுப் பழக்கம் என அத்தனையும் மேற்கத்திய கலாசாரமாக மாறிவிட்டதே ஏன்?இந்தியாவுக்குள் ஆங்கிலேயர் நுழைந்த போது அவர்கள் போட்ட முதல் சட்டமே ஆங்கிலம் படித்தவர்களுக்கே அரசு வேலைகளில் முன்னுரிமை என்பதுதான்.நாம் என்ன செய்திருக்க வேண்டும்?​ நாட்டின் விடுதலைக்குப் பிறகு அத்தனை மாநிலங்களிலும்,​​ அந்தந்த மாநில மொழிகளில் படித்தவர்களுக்கே அரசு வேலையில் முன்னுரிமை என்றல்லவா சட்டம் இயற்றப்பட்டிருக்க வேண்டும்.ஆனால்,​​ நமது ஆட்சியாளர்களுக்கு அது பற்றிய சிந்தனை இல்லை.​ அதற்காக நாம் குரல் கொடுக்க வேண்டிய நேரம் வந்துவிட்டது.கடந்த 30 ஆண்டுகளாக நாளிதழ்கள்,​​ வார இதழ்கள்,​​ மாத இதழ்கள் ஆகியவை சமுதாயச் சிந்தனை இன்றி வியாபாரச் சிந்தனையை மட்டுமே கொண்டுள்ளன.​ ​ சமுதாயத்தின் பிரச்னைகளை பிரதிபலிப்பதுதான் பத்திரிகைகளின் பணி.தேவையில்லாத செய்திகளையும்,​​ ஆபாசமான படங்களையும் கொண்டு பத்திரிகைகள் வெளிவருமானால் அவற்றைப் புறக்கணிக்க வேண்டியது இளந்தலைமுறையினரின் கடமையாகும் என்றார்.பின்னர், ​​ சமூக மேம்பாட்டுக்கு இதழ்களின் பங்கு குறித்து பல்வேறு மாணவர்களின் கேள்விகளுக்கு "தினமணி' ஆசிரியர் வைத்தியநாதன் பதில் அளித்தார்.
கருத்துக்கள்

காலங்காலமாக நாட்டுப் பற்றாளர்கள் வேண்டுவதைத் தினமணி ஆசிரியர் வலியுறுத்தியுள்ளதற்குப் பாராட்டுகள். அவர் அரசிடம் நெருக்கமாக உள்ளதால் தமிழைச் சொல்லி ஆட்சிக்கு வந்ததற்காகவாவது தமிழ் வழி பயின்றவர்களுக்கும் தமிழைப் பயின்றவர்களுக்கும் வேலையில் முன்னுரிமை அளிக்கப்படும் என அரசை அறிவிக்கச் செய்ய முயல வேண்டும். தமிழுக்காகப் பல போராட்டங்களை நடத்திய திமுக ஆட்சியே தமிழைப் புறக்கணித்தால் வேறுயார்தான் தமிழை அரியணையில் ஏற்றுவார்கள்? செம்மொழி மாநாட்டுக் குழுவில் இடம் பெற்றுள்ள ஆசிரியர் மாநாட்டுக்கு முன்னதாக மிக விரைவில் இதற்கான சட்டம் இயற்ற அரசிடம் வற்புறுத்தி வெற்றி காண வேண்டும். தமிழ் மொழி வளர்ச்சி தமிழினக் காப்பு முதலியவற்றில் கருத்து செலுத்தும் ஆசிரியருக்குப் பாராட்டுகள்.

அன்புடன் இலக்குவனார் திருவள்ளுவன்

By Ilakkuvanar Thiruvalluvan
3/23/2010 2:46:00 AM
உங்கள் கருத்தைப் பதிவு செய்யுங்கள்

சனி, 8 ஆகஸ்ட், 2009

சகமனிதன் மீது அன்பு
ஆற்றல் பயன்பட வேண்டும்:
பாரதி கிருஷ்ணகுமார்



ஈரோடு,ஆக. 7: சகமனிதன் மீது அன்பு செலுத்த மட்டுமே மனித ஆற்றல் பயன்படவேண்டும் என்று திரைப்பட இயக்குநர் பாரதி கிருஷ்ணகுமார் கூறினார்.ஈரோடு புத்தகத் திருவிழாவில் வெள்ளிக்கிழமை இரவு "எய்த விரும்பியதை எய்தலாம்' என்ற தலைப்பில் மேலும் அவர் பேசியது:இலக்கியப் படைப்புகள் சமயங்களுக்கு அப்பாற்பட்டவை. நல்ல புத்தகங்கள்தான் மனித வாழ்க்கையை செம்மைப்படுத்துகின்றன. அணு ஆயுதம் வைத்திருக்கும் நாடுகள் யாவும் வல்லரசாகிவிட முடியாது. வறுமையும், மதப் பிரச்னைகளும் எங்கு இல்லையோ அந்த நாடுதான் வல்லரசு தகுதியைப் பெறுகிறது.பேச்சும், எழுத்தும் சம அளவில் வைத்து போற்றப்பட வேண்டும். ஆற்றல்மிக்க பேச்சுகள் மூலம் உலகில் பல மாற்றங்கள் ஏற்பட்டுள்ளன. அன்பினால் பெறும் அதிகாரம்தான் நிலைக்கும். உலகில் பல நாடுகள் தன்னுடைய அதிகாரத்தை தக்கவைத்துக்கொள்ள, தன் சொந்த நாட்டு மக்களோடு சண்டையிட்டு வருகின்றன. அதிகாரத்தைப் பயன்படுத்தி மக்களின் சிந்தனைகளை அடக்க நினைக்கும் நாடுகள் கண்டிப்பாக சிதைந்துபோகும்.சகமனிதனின் வளர்ச்சிக்கு மட்டுமே மனித ஆற்றலை பயன்படுத்தும் நிலை உருவாக வேண்டும். தற்போது உள்ள சந்ததியினர் ஒரு நல்ல சமுதாயத்தைப் பார்க்க வாய்ப்பில்லாமல் போனாலும், எதிர்கால சந்ததி, நல்ல சமுதாயக் கட்டமைப்பில் வாழ்வதற்கு களம் அமைத்துக் கொடுக்கவேண்டியது நம் ஒவ்வொருவரின் கடமையாகும். எனவே ஒவ்வொரு பெற்றோரும், குழந்தைகள் மனதில் நல்ல சிந்தனைகளை விதைக்க வேண்டியது அவசியமாகும் என்றார்.தவறுகளை தட்டிக்கேட்கும்தன்னம்பிக்கை வேண்டும்"இனி ஒரு விதி செய்வோம்' என்ற தலைப்பில் "தினமணி' ஆசிரியர் கே.வைத்தியநாதன் பேசியது:உலகில் உள்ள அனைத்து மொழிகளைக் காட்டிலும், தமிழ்மொழியில்தான் திறமையான எழுத்தாளர்கள் பலர் உள்ளனர். ஆனால் இவர்களுக்குரிய அங்கீகாரம் இதுவரை கிடைக்கவில்லை. கேரளம் போன்று தமிழகத்திலும் சாகித்ய அகாதெமி ஏற்படுத்த வேண்டும். பிழைப்புக்காக தமிழை உரிமை கொண்டாடும் நிலை மாறி, தமிழுக்காக உண்மையாக உழைக்கும் நிலை ஏற்பட வேண்டும். உணவுக்கு வழியில்லாதவர்களின் வாழ்க்கை நிலையை எவ்வாறு முன்னேற்ற முடியும் என்பதை ஒரு நாடு சிந்திக்க வேண்டும். இதேபோல் வசதியுள்ளவர்களுக்குக் கிடைக்கும் தரமான கல்வி, மருத்துவம் போன்றவை சாதாரண மக்களுக்கும் கிடைக்க என்ன செய்ய வேண்டும் என்பதையும் சிந்திக்க வேண்டும். காந்திய சிந்தனைகள் உள்ள மக்கள் இந்த நாட்டில் இன்னும் வாழ்ந்து கொண்டிருக்கிறார்கள். தவறுகளைத் தட்டிக்கேட்கும் தன்னம்பிக்கை, படித்தவர்களிடமும் உருவாக வேண்டும். நாட்டின் கலாசாரம், உணவு, உடை ஆகியவற்றில் ஏற்படும் மாற்றம் சமுதாய கட்டமைப்பை சீரழித்துவிடும். இந்தியர்களுக்கு உலகியல் சிந்தனை உண்டு. இவர்கள் மூலம் இந்தியா உலகுக்கு நிச்சயம் வழிகாட்டும் என்றார்.எழுத்தாளர் கு.சின்னப்ப பாரதி கெüரவிக்கப்பட்டார். கொங்கு பொறியியல் கல்லூரித் தாளாளர் வி.ஆர்.சிவசுப்பிரமணியன் தலைமை வகித்தார். மக்கள் சிந்தனை பேரவைத் தலைவர் த.ஸ்டாலின் குணசேகரன் பேசினார்.

கருத்துகள்

2/2) (1/2 இன் தொடர்ச்சி) எதற்கெடுத்தாலும் அரசையே நம்பி யிருப்பதை விட இலக்கிய ஆர்வலர்களும் படைப்பாளர்களும் வெளியீட்டாளர்களும் இலக்கியக்கழகம் ஒன்றைத் தொடங்க முன் வர வேண்டும். பேச்சுத் திறனும் செயல் திறனும் மிக்க ஆசிரியர் அதற்கான ஒருங்கிணைப்புப் பணியை மேற்கொள்ள வேண்டும். அன்புடன் இலக்குவனார் திருவள்ளுவன்
By Ilakkuvanar Thiruvalluvan
8/8/2009 2:52:00 AM

1/2) புத்தகத் திருவிழாவில் அனைவரும் அருமையாகப் பேசியுள்ளனர். பழ.கருப்பையா, பாரதி கிருட்டிணகுமார், ஆசிரியர் வைத்தியநாதன் ஆகியோர் உரைகள் அனைவரும் உள்ளத்தில் பதிந்து வைத்துப் போற்றப்பட வேண்டியவையே. தமிழ் நாட்டில் 'சாகித்ய அகாதமி' தொடங்க வேண்டும் என ஆசிரியர் பேசியுள்ளார். அதன் கிளை தமிழ் நாட்டில் உள்ளது. அது போன்ற அமைப்பு தொடங்க வேண்டும் என்று பேசியிருந்தார் எனில், அவ்வாறு சொல்லித்தான் 'குறள் பீடம்' தொடங்கப்பட்டது. ஆனால், செயல்பாடின்றியே மறைந்து விட்டது. தமிழ் நாட்டில் யாருக்கேனும் பதவி கொடுக்க வேண்டும் என்றால் அமைப்பு தொடங்கப்படும். வைரமுத்துவிற்குப் பதவி கொடுக்கப்பட வேண்டும் என்று பேசப்பட்டு வருகிறது. அவ்வாறு முடிவெடுத்தால்கூடக் குறள்பீடம் தொடங்கப்படலாம். ஆனால், தமிழ்நாட்டு அமைப்புகள் எல்லாம் துதி பாடவும் தமிழ்நலச் செயல்பாடின்மைக்காகவுமே இருக்கின்றன. ஆளுங்கட்சியினர் பயன்பெற உதவலாம். ஆகவே, எந்த அமைப்பு இருந்தாலும் பயன் என்ன? புத்தக விழாக்கள் நடத்தும் அமைப்பினர் ஒன்று கூடி அப்படிப்பட்ட ஓர் இலக்கிய அமைப்பைத் தொடங்கி 'சாகித்ய அகாதமியின்' பணியை ஆற்றலாம். தொடர்ச்சி 2/2 காண்க.

By Ilakkuvanar Thiruvalluvan
8/8/2009 2:52:00 AM

திங்கள், 20 ஜூலை, 2009

தெருவெல்லாம் தமிழ் முழக்கம் முழங்க வேண்டும்

திருக்கோவிலூர், ஜூலை 19: "தெருவெல்லாம் தமிழ் முழக்கம் முழங்க வேண்டும்' என்று பாரதி கண்ட கனவை நாம் அனைவரும் நனவாக்க வேண்டும் என்று "தினமணி' ஆசிரியர் கே.வைத்தியநாதன் பேசினார்.திருக்கோவிலூரில் கபிலர் விழா கடந்த 17-ம் தேதி தொடங்கியது. இவ் விழாவில் பாராட்டு மன்றம் ஞாயிற்றுக்கிழமை நடைபெற்றது. இதில் இந்திய அரசின் ஊழல் கண்காணிப்பு முன்னாள் ஆணையர் என்.விட்டலுக்கு "நேர்மையின் சிகரம்' விருதையும், அன்பு பாலம் நிறுவனத் தலைவர் பா.கல்யாணசுந்தரத்துக்கு "சேவையின் சிகரம்' விருதையும் தினமணி ஆசிரியர் கே.வைத்தியநாதன் வழங்கினார். பின்னர் அவர் பேசியது:உச்ச நீதிமன்றத் தலைமை நீதிபதி பதவிக்கு இணையான ஊழல் தடுப்பு கண்காணிப்பு அமைப்பின் ஆணையர் பதவியை வகித்தவர் என்.விட்டல். இந்த மண்ணின் மைந்தரான இவருக்கு வழங்கப்படும் "நேர்மையின் சிகரம்' விருது மற்றும் பாராட்டு திருக்கோவிலூர் மக்களுக்கே வழங்கப்படும் பாராட்டு. இந்த விருதை வழங்க வாய்ப்பளித்த திருக்கோவிலூர் பண்பாட்டுக் கழகத்துக்கு மனமார்ந்த நன்றி.தியாகம், தொண்டு என்ற வார்த்தைக்கு தமிழர்கள் அகராதியில் புதிய விளக்கம் பாலம் கல்யாணசுந்தரம். இவரது சேவைக்காக வழங்கப்படும் "சேவையின் சிகரம்' விருது திருக்கோவிலூர் மக்களுக்கே வழங்கப்படும் விருது.இதுபோன்ற இலக்கிய விழாக்கள் பள்ளி, கல்லூரிகள்தோறும் நடத்தப்பட வேண்டும், தமிழ் இலக்கிய அமைப்புகள் தொடங்கப்பட வேண்டும் என்று நான் முந்தைய விழாக்களில் பேசி வந்தேன். திருக்கோவிலூர் பண்பாட்டுக் கழகம் நடத்தும் இது போன்ற விழாக்கள் ஊர்தோறும் நடத்தப்பட வேண்டும். இதுபோன்ற விழாக்களை நடத்தி முத்தமிழை வளர்ப்பதற்கு நாம் உறுதுணையாக இருக்க வேண்டும். அப்போதுதான் நாளைய தலைமுறையிடம் தமிழ் சீர்குலையாமல் சென்றடையும்.தினமணி முன்னாள் ஆசிரியர்கள் ஏ.என்.சிவராமன், ஐராவதம் மகாதேவன் போன்றோர் திருக்கோவிலூர் பண்பாட்டுக் கழக விழாவுக்கு வந்துள்ளனர். அந்தப் பாரம்பரியம் தற்போது என் காலத்திலும் தொடர்வது எனக்கு பெரும் மகிழ்ச்சி அளிக்கிறது."தெருவெல்லாம் தமிழ் முழக்கம் முழங்க வேண்டும்' என்று பாரதி கண்ட கனவை நனவாக்க வேண்டும். இதற்கு திருக்கோவிலூர் தமிழ் பண்பாட்டுக் கழகம் நடத்துவதுபோல் பல்வேறு இலக்கிய விழாக்கள் நடத்தப்பட வேண்டும் என்றார்.மத்திய அரசின் ஊழல் கண்காணிப்பு முன்னாள் ஆணையர் என்.விட்டல் பேசும்போது, "இந்த விருது எனக்கு கிடைத்ததில் மிக்க மகிழ்ச்சி. நான் பதவியில் இருந்தபோது என்னிடம் பலர் ஊழலை ஒழிக்க முடியுமா என்று கேட்டனர். அவர்களிடம் நான் முடியும் என்று கூறினேன். ஊழலை ஒழிக்க ஒரே வழி வெளிப்படையான நிர்வாக அமைப்பு இருக்க வேண்டும்' என்றார்.பா.கல்யாணசுந்தரம் பேசும்போது, "ஊதியக் குழுவின் பரிந்துரைகள் அமல்படுத்தப்படும்போது, அரசு ஊழியர்களுக்கு நிலுவைத் தொகைகள் அதிகம் கிடைக்கும். அதில் ஒரு சதவீதத்தை அவர்கள் சேவைக்காகச் செலவிட்டால் கல்வியில் தன்னிறைவு அடைய முடியும். வாய்ப்புகளை உருவாக்கிக் கொண்டு சேவைகள் செய்ய வேண்டும்' என்றார்.சென்னை டாக்டர் சாமிநாதன் தனது பாராட்டுரையில் "இந்த விருதுகள் மிகச் சரியானவர்களுக்கு, மிகச் சரியான முறையில் வழங்கப்படுகிறது. தினமணி ஆசிரியர் பங்கேற்று விருதுகளை வழங்கியிருப்பது மகிழ்ச்சி அளிக்கிறது' என்றார்.விருது பெற்ற என்.விட்டல் மத்திய ஊழல் தடுப்பு கண்காணிப்பு ஆணையராக இருந்தவர். இந்திய நிர்வாகத் துறையிலும், தொழில் துறை மேலாண்மையிலும் 42 ஆண்டுகள் பணி புரிந்தவர். இவரது நேர்மைக்கு இந்த விருது வழங்கப்பட்டது.பா.கல்யாணசுந்தரம் தனது 14 வயதில் சேமிப்பு தொகையைக் கொண்டு கல்வி மேம்பாட்டுக்கான சங்கம் அமைத்தார். தனது ஊதியம், ஓய்வூதியப் பயன் ஆகியவற்றையும் கல்வி மேம்பாட்டுக்கு நன்கொடையாக வழங்கியவர். அன்பு பாலம் என்ற பத்திரிக்கை நடத்தி வருகிறார்.இந் நிகழ்ச்சியில் திருக்கோவிலூர் பண்பாட்டுக் கழகத் தலைவர் தியாகராஜன் வரவேற்றார். திருக்கோவிலூர் பண்பாட்டுக் கழகத்தைச் சேர்ந்த நிர்வாகிகள் கவிஞர்கள் சி.உதயன், பாலகிருஷ்ணன், மூர்த்தி, நடராஜன், அன்பழகன், ஜெயக்குமார் உள்ளிட்ட பலர் பங்கேற்றனர். விழாவுக்கு முன் சேலம் காயத்ரி வெங்கடேசன் குழுவினரின் இன்னிசை நிகழ்ச்சி நடைபெற்றது.
கருத்துகள்

நாளைய தலைமுறையினரிடம் தமிழ் சீர்குலையாமல் சென்றடைய வேண்டும் என்னும் நல்ல கருத்தைத் தினமணி ஆசிரியர் தெரிவித்துள்ளமை அனைவரும் பின்பற்ற வேண்டிய ஒன்றாகும். அவர் பேசியவாறு பாரதிகனவை நனவாக்கத் தெருவெல்லாம் தமிழ் முழங்கச் செய்ய அரசியல்வாதிகளும் பிற ஊடகத் துறையினரும் ஒத்துழைக்க வேண்டும். தமிழ் படித்தவர்கள் உண்மையிலேயே தமிழ் மீது ஈடுபாடு காட்டி ஊர்கள் தோறும் தமிழ விழாக்கள் நடைபெற வழிகாட்ட வேண்டும். திருக்கோவிலூர் தமிழ்ப் பண்பாட்டுக் கழகத்திற்குப் பாராட்டுகள்!
அன்புடன் இலக்குவனார் திருவள்ளுவன்
By Ilakkuvanar Thiruvalluvan
7/20/2009 2:53:00 AM