பாரதி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
பாரதி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வெள்ளி, 17 செப்டம்பர், 2021

'செந்தமிழ் வளர்த்த செம்மல்கள்-வ.உ.சி, பாரதி’ – பன்னாட்டுக் கருத்தரங்கம்

அகரமுதல

உலகத் தமிழ்ச் சங்கம்

பன்னாட்டுக் கருத்தரங்கம் 

  உலகத் தமிழ்ச் சங்கம், மதுரையின் சார்பில்

‘செந்தமிழ் வளர்த்த செம்மல்கள்-வ.உ.சி, பாரதி’

என்ற இணையவழிப் பன்னாட்டுக் கருத்தரங்கம் புரட்டாசி 04-08, 2052 (20.09.2021 முதல் 24.09.2021 முடிய) ஐந்து நாள்கள்  இந்திய நேரம்: மாலை 4.00மணிக்கு அணுக்கச் செயலி வழியே நடைபெறவுள்ளது. இக்கருத்தரங்கில் பங்கேற்க. . . 
பதிவுப்படிவம்
https://tinyurl.com/2w8aw8a9
இணைப்பு
https://tinyurl.com/25u64t9y
கூட்ட அடையாள எண்:
203 717 1676
நுழைவுச்சொல்: wts
அனைத்து அமர்வுகளிலும் பங்கேற்றுப் பின்னூட்டம் அளிப்பவர்களுக்கு  மின்சான்றிதழ் வழங்கப்படும். அனைவரும் வருக! அருந்தமிழ் பருக!



ஞாயிறு, 12 மே, 2013

பாரதி, வ.உ.சி.யால் போற்றப்பட்ட தலைவர் வரதராசுலு

பாரதி, வ.உ.சி.யால் போற்றப்பட்ட தலைவர் வரதராசுலு (நாயுடு)

பாரதியார், வ.உ.சிதம்பரனார், திரு.வி.க. போன்ற தலைவர்களால் போற்றப்பட்ட தேசியத் தலைவர் வரதராஜுலு நாயுடு என எழுத்தாளர் பெ.சு.மணி குறிப்பிட்டார்.
வரதராஜுலு நாயுடு குடும்பத்தினர் சார்பில் குருகுலம் என்ற அறக்கட்டளை தொடங்கும் நிகழ்ச்சி சென்னையில் சனிக்கிழமை நடைபெற்றது. விழாவில் பெ.சு.மணி பேசியதாவது:
வரதராஜுலு நாயுடுவின் தேசியப் பணிகள் குறித்து 1934-ஆம் ஆண்டு வ.உ.சிதம்பரனார் எழுதியுள்ளார். "கடந்த 20 ஆண்டுகளாக மேடைகளில் பேசி வரும் வரதராஜுலு நாயுடு, நாட்டின் விடுதலைக்காக கிராமப்புற மக்களிடத்திலும் எழுச்சியை ஏற்படுத்தியுள்ளார். நமது நாடு இழந்த பண்டைய பெருமைகளை மீட்டெடுக்க மக்களைத் தூண்டி வருகிறார். தமிழ்நாட்டில் இதழியல் துறையின் முன்னோடியான ஜி.சுப்பிரமணிய ஐயரைப் போலவே வரதராஜுலு நாயுடுவும் இதழியல் பணிகளில் தனிச் சுடராக விளங்குகிறார்' என்று அவர் பாராட்டியுள்ளார்.
இதேபோல் பாரதியார், சுப்பிரமணிய சிவா, திரு.வி.க., சி.ஆர்.தாஸ் என பலராலும் போற்றப்பட்ட சிறந்த தலைவராக வரதராஜுலு நாயுடு விளங்கினார்.
ஒவ்வொரு வகுப்பினரும் தங்களது நியாயமான உரிமைகளைப் பெற எந்தத் தடையும் இருக்கக் கூடாது என்று வலியுறுத்தியபோதிலும், வகுப்புவாதத்தை ஆதரிக்க மறுத்த தலைவர் அவர். தேசியம்தான் நாட்டின் எல்லா நோய்களுக்கும் தீர்வு காணும் சிறந்த மருந்து என்பதைக் கொள்கையாகக் கொண்டிருந்தார்.
பிரமணர் அல்லாதவர்களின் உரிமைகளை சற்றும் விட்டுக் கொடுக்காதவர். அதே நேரத்தில் விடுதலைப் போராட்டத்துக்கு எதிரான நீதிக் கட்சியை வேரறுக்கப் போராடியவர்.
என்னைப் பொருத்தவரை அவருடைய பணிகளிலேயே அவரது இதழியல் பணிகளைத்தான் மிகச் சிறந்த பணி என்று கூறுவேன். பிரபஞ்சமித்திரன் இதழ் மூலமாகவும், தமிழ்நாடு இதழ் மூலமாகவும் தமிழுக்கும், தேசியத்துக்கும் வரதராஜுலு நாயுடு ஆற்றிய பணிகள் ஏராளம்.
ஒரு நாட்டின் முன்னேற்றத்துக்கு அடிப்படையானது கல்வி. அத்தகைய கல்வி சாதாரண ஏழைகளுக்கும் கிடைக்க வேண்டும் என்பதற்காக பள்ளிகளைத் தொடங்கி கல்வி அளித்தவர். அவரது வழியிலேயே தற்போது அவரது குடும்பத்தினரும் கல்விப் பணிக்காகத் தொடங்கியுள்ள குருகுலம் அறக்கட்டளை வெற்றி பெற வாழ்த்துகிறேன் என்றார் மணி.
முன்னதாக வரதராஜுலு நாயுடு குறித்து அறிமுகவுரையாற்றிய அவரது மகன் வி.தயானந்தா, "சித்த மருத்துவராக வாழ்க்கையைத் தொடங்கிய எனது தந்தை, "மின்சார ரசம்' என்ற பெயரில் அக்காலத்தில் தயாரித்த வலி நிவாரண மருந்து மிகவும் பிரசித்தி பெற்று விளங்கியது. பின்னர் அரசியலில் நுழைந்த எனது தந்தையார், காமராஜர் போன்ற தலைவர்களுடன் சேர்ந்து பணியாற்றினார். இந்தியன் எக்ஸ்பிரஸ் ஆங்கில நாளிதழைத் தொடங்கினார். பிரபஞ்சமித்திரன், தமிழ்நாடு போன்ற தமிழ் இதழ்களையும் நடத்தினார். ஏழைக் குழந்தைகளுக்கு கல்வி அளிக்கும் நோக்கில் திண்டிவனம் அருகே அசோகபுரி கிராமத்தில் குருகுலத்தைத் தொடங்கினார். அவரது வழியில் தற்போது குருகுலம் மூலம் மீண்டும் கல்வி சேவை வழங்கப்படுகிறது' என்றார்.
காக்னிசன்ட் நிறுவனத்தின் சமூகப் பணிகள் துறை இயக்குநர் அர்ச்சனா ரகுராம், குருகுலம் அறக்கட்டளைக்கான புதிய இணையதளத்தைத் தொடங்கி வைத்தார். "இந்தியா முழுவதும் 110 அரசுப் பள்ளி மாணவர்களோடு தொடர்பில் உள்ளோம். தினமும் ஏராளமான மாணவர்களைச் சந்திக்கும் வாய்ப்பு எங்களுக்கு கிடைக்கிறது. உணவுக்கு வழியின்றி ஏராளமான மாணவர்கள் பசியோடு வகுப்பறைகளில் அமர்ந்துள்ளதை அறிய முடிகிறது. ஏழைகள், தெருவோரக் குழந்தைகளுக்கு கல்வி அளிக்கும் பணியில் ஈடுபடுவோர் இத்தகைய சவால்களையெல்லாம் எதிர்கொண்டாக வேண்டும்' என்றார் அவர்.
சென்னை குழந்தைகள் நலக் குழுவின் தலைவரான அக்னேஸ் சாந்தி, எனது இளமைப் பருவத்தில் பள்ளிகளில் வழங்கப்பட்ட இலவசப் பாட நூல்களையும், மதிய உணவையும் கொண்டே நான் படித்தேன். அதனால் ஏழைக் குழந்தைகள் கல்வி பெறுவதில் உள்ள சிரமங்களை என்னால் புரிந்து கொள்ள முடிகிறது என்றார்.
நிகழ்ச்சியில், ஏழைக் குடும்பங்கள் மற்றும் தெருவோரக் குழந்தைகள் சிலரின் படிப்புக்கான கல்வி உதவித் தொகை குருகுலம் அறக்கட்டளை மூலம் வழங்கப்பட்டது.
முன்னதாக விழாவில் கலந்து கொண்ட சிறப்பு விருந்தினர்களுக்கு வரதராஜுலு நாயுடு குடும்பத்தைச் சேர்ந்த ஜியா ரோஹித் என்ற சிறுமி மலர்க் கொத்துகள் வழங்கி வரவேற்றார். விழா நிகழ்ச்சிகளைத் தொகுத்து வழங்கிய அறக்கட்டளையின் அறங்காவலர்களில் ஒருவரான பத்மாசினி தயானந்தா, இறுதியாக நன்றி
கூறினார்.

புதன், 17 ஏப்ரல், 2013

முள் இல்லா மூங்கில்!








முள் இல்லா மூங்கில்!

வழுவழுப்பான, முற்கள் இல்லாத மூங்கிலைக் கண்டுபிடித்த விவசாய விஞ்ஞானி, பாரதி: நான், ஓசூரைச் சேர்ந்தவன். 15 ஆண்டுகளுக்கு முன், குரோமோர் பயோடெக் எனும் திசுவளர்ப்பு ஆராய்ச்சி நிலையத்தை நிறுவி, கரும்பு, வாழை, சவுக்கு, பூச்செடிகள் போன்றவற்றில், நல்ல மகசூல் தரும் புது ரகங்களை கண்டுபிடித்து, விவசாயிகளுக்கு கொடுத்து வந்தேன். இதுவரை, 60 வகையான புதுரக நாற்றுகளை, திசு வளர்ப்பு முறையில் உருவாக்கியுள்ளேன்.தொடர்ந்து, 10 ஆண்டுகள் ஆராய்ச்சி செய்து, முள் இல்லாத பீமா என்ற, புதுரக மூங்கிலை கண்டுபிடித்தேன். இது, வீடுகள் கட்டவும், பர்னிச்சர்கள் செய்யவும், ஊதுபத்திக் குச்சிகள் தயாரிக்கவும், இதில் உள்ள பஞ்சு மூலம் ஆடை நெய்யவும் பயன்படுவதால், இதற்கான சந்தை வாய்ப்புகள் அதிகம்.இவ்வகை மூங்கில், ஒரு ஏக்கருக்கு, 40 முதல், 50 டன் வரை விளைச்சல் தருவதோடு, முள் இல்லாமல், வழுவழுப்பாக இருக்கும். மற்ற ரகங்கள் ஏக்கருக்கு, 200 கன்றுகளை மட்டுமே நட்டு, ஐந்து ஆண்டுகளுக்கு பின்னரே வெட்டி விற்க முடியும். ஆனால், பீமாவில் ஏக்கருக்கு, 1,000 கன்றுகள் வரை நட்டு, இரண்டு ஆண்டுகளிலேயே மூங்கிலை வெட்டி, லாபத்தை ஈட்டலாம்.கிருஷ்ணகிரி விவசாயிகள் மூலம், 500 ஏக்கரில் மூங்கில் தோட்டம் அமைத்து மின்சாரம் தயாரிக்க, தமிழக தோட்டக்கலைத் துறை ஒப்பந்தம் செய்துள்ளது. 1 கிலோ மூங்கிலில் இருந்து, 1 யூனிட் மின்சாரம் கிடைக்கும். வெட்ட வெட்ட வளர்ந்தபடி இருப்பதால், ஒரு முறை நட்டு வைத்தாலே போதும், 150 ஆண்டுகளுக்கும் மேல் தொடர்ந்து பலன் தருவதால், ஒவ் வொரு ஆண்டும், 1.5 லட்சம் ரூபாய் வரை வருமானம் ஈட்டலாம்.இயற்கை சீற்றத்தால் வாழை மற்றும் தென்னை மரங்களைப் போல், பீமா ரக மூங்கில்கள் பாதிப்படைவதில்லை. சாதாரண மூங்கிலில் பூ வந்து விட்டால், அந்த மரம் செத்துவிடும். ஆனால், பீமாவில் பூ வந்தும், அழியாமல் இருக்கும். முள்ளில்லா மூங்கில் கன்றுகளை, வெளிமாநிலம் மற்றும் வெளிநாடுகளுக்கும் ஏற்றுமதி செய்கிறோம்.

"அலைபேசிக் குரல்கள்': தேனியில் புதுமைப் பெண்கள்

ஏற்றம் காட்டும் "அலைபேசி க் குரல்கள்': தேனியில் பாரதி கண்ட புதுமைப் பெண்கள்

 



போடி : தேனி மாவட்டம், போடி அருகே கிராமத்து பெண்கள் "மொபைல் போன் வாய்ஸ்' அடிப்படையில் ஆடு, மாடுகளை வளர்க்கின்றனர். இவர்களிடம் ஆலோசனை பெற, வெளிநாடுகளிலிருந்தும் ஏராளமானோர் வருகின்றனர்.

போடி அருகே சின்னபொட்டிபுரம், ராசிங்காபுரம், மணியம்பட்டி, ராமகிருஷ்ணாபுரம், புதுக்கோட்டை உள்ளிட்ட கிராமங்களில், பெண்கள் ஆடு, மாடுகளை மேய்க்கின்றனர். உழைப்பிற்கேற்ற பயனை பெறும் வகையில், ராசிங்காபுரத்தை சேர்ந்த "விடியல்' தன்னார்வ தொண்டு நிறுவனம் இவர்களுக்குவழிகாட்டியுள்ளது. இதன் நிறுவனர் காமராஜ் கெப்பன், மகளிர் சுய உதவி குழுக்களை அமைத்துள்ளார்.57, உறுப்பு நாடுகளை கொண்ட, காமன்வெல்த் ஆப் லேர்னிங் அமைப்பில்,குழு பெண்களை இணைத்துள்ளார். தகவல் தொழில் நுட்பத்துடன், வாழ்நாள் கல்வியில் சேர்ந்து(இப்கோ கிசான் சன்சார் லிமிடெட்) ஏர்டெல் கிரீன் சிம்கார்டு உதவியுடன், " மொபைல் போன் வாய்ஸ்' மூலம் ஆடு, மாடுகளை இவர்கள் வளர்க்கின்றனர். ஆடு, மாடுகளுக்கு வரும், அம்மை நோய், தொண்டை அடைப்பான் போன்ற நோய்கள் வராமல் தடுப்பது எப்படி. தடுப்பூசி போட்டு நோய்களை குணப்படுத்துவது மற்றும் அதற்கான உணவு வகைகள், அதன் எடை, உயரம், எவ்வளவு இருக்க வேண்டும். தக்க வளர்ச்சிக்கு, தேவையான உணவு வகைகள் கொடுப்பது, போன்ற தகவல்களை "வாய்ஸ் மொபைல் போன்' பயன்படுத்தி எளிதாக பெறுகின்றனர்.எழுதப்படிக்க தெரியாத, 33 சுயஉதவி குழுக்களில் உள்ள 300 பெண்களுக்கு, வங்கி கடன் மூலம், நபர் ஒருவருக்கு 9 ஆடுகள், ஒரு கிடா, ஒரு மொபைல் போனுடன், 43 ஆயிரத்தி 500 ரூபாய் கடனாக வழங்கப்பட்டுள்ளது.கடனை 5 ஆண்டுகளில் திரும்ப செலுத்த வேண்டும்.

ஆடு மாடுகளை வளர்த்து, கடனை 2 ஆண்டுகளுக்குள் திருப்பி செலுத்தி விட்டனர் இப்பெண்கள். அத்துடன் ஒவ்வொருவரும், ஒரு லட்சம் ரூபாய் வரை லாபம் ஈட்டியுள்ளனர். விடியல் தொண்டு நிறுவனத்தின் கீழ் செயல்படும்,விடிவெள்ளி கூட்டமைப்பில் உள்ள இப்பெண்களுக்கு பெரும்பாலும் எழுத, படிக்க தெரியாது. இதில் உள்ள பெண்கள், ஒவ்வொருவரும் குறைந்தது 30 க்கும் மேற்பட்ட ஆடுகளை பராமரித்து வருகின்றனர். வெளிப்பழக்கம், போன் தொடர்பு அதிகரித்துள்ள நிலையில் இன்று சர்வ சாதரணமாக வங்கிகளுக்கு சென்று வருகின்றனர். இந்த, "மொபைல் போன் வாய்ஸ்', கல்வியறிவு இல்லாத பெண்களிடையே பெரிய மாற்றத்தை ஏற்படுத்தி உள்ளது. தன்னம்பிக்கையை வளர்த்து, ஆர்வத்தை தூண்டுவதாக உள்ளது. இதனை கண்டு, "காமன்வெல்த் ஆப் லேர்னிங்' உறுப்பு நாடுகள், ஆடு வளர்ப்பை தங்களது நாடுகளில் அறிமுகப்படுத்த வேண்டும், என்ற ஆவலில் நியூ கினியா, மொரீஷியஸ், கென்யா, உகாண்டா உள்ளிட்ட பல்வேறு நாடுகளிலிருந்து இக்கிராமத்திற்கு வந்து, தகவல்களை பெற்று செல்கின்றனர். மொபைல் போன் வாய்ஸ் மூலம் ஆடு வளர்ப்பது குறித்து, கனடா நாட்டிற்கு சென்று படிப்பறிவு இல்லாத இக்கிராமத்து பெண்கள் பேசியுள்ளனர். செல்ல முடியாத நிலையில், வீடியோ கான்பரன்சிங் முறையில் உரையாற்றியுள்ளனர். "மொபைல் போன் வாய்ஸ்' மூலம், ஆடு வளர்ப்பது மட்டுமின்றி, படிப்பறிவு இல்லாத பெண்களின் தன்னம்பிக்கை, கல்வி அறிவை வளர்த்து, பொருளாதாரம் மேம்படுத்தப்பட்டுள்ளது.ஆரம்பத்தில் 300 நபர்கள் மூலம் ஆரம்பிக்கப்பட்ட மொபைல் போன் வாய்ஸ், தற்போது 3000 நபர்களை எட்டியுள்ளது.இப்பெண்கள் கூறுவது என்ன...

*எஸ்.வளர்மதி: நான்காம் வகுப்பு படித்துள்ளேன். ஆரம்பத்தில் ஆடு வளர்ப்பு கஷ்டமாக இருந்தது. வங்கி கடன் பெற்று 6 ஆண்டுகளாக ஆடு வளர்ப்பில் ஈடுபட்டுள்ளேன். நல்ல வருமானம் கிடைக்கிறது. தரகர்கள் மூலம் ஆடுகள் விற்பதை தவிர்த்து, இனி எங்கள் கூட்டமைப்பின் மூலம் வெளி மார்க்கெட்டில் வியாபாரிகளிடம் நேரடியாக விற்பனை செய்ய முயற்சி செய்து வருகிறோம். ஆட்டுப்பாலை பாக்கெட் போட்டு வெளிமார்க்கெட்டில் விற்பனை செய்யவும் திட்டமிட்டுள்ளோம்.

*ஏ.திலகவதி: ஆடு வளர்ப்தால்,எங்கள் கையில் ஏ.டி.எம்., கார்டு உள்ளது போல சந்தோஷமாக உள்ளது. மஞ்சள் காமாலை நோயிலிருந்து விடுபடுவதற்கு ஆட்டுப்பால் முக்கிய பங்கு வகிக்கிறது. இதனால் ஆட்டுப்பால் 100 மில்லி ரூ. 20 க்கு விற்பனை செய்கின்றோம். இதில் கிடைக்கும் வருமானம், எங்களுக்கு மன நிறைவை தருகிறது.

*டி.சொர்ணமணி : நானும், எனது கணவரும் 14 ஆண்டுகளாக ஆடுவளர்ப்பில் ஈடுபட்டு வருகின்றோம். கேரளாவில் இருந்து வியாபாரிகள் 15 கிலோ கொண்ட ஆட்டு சாண பெட்டி 25 ரூபாய்க்கு வாங்கி செல்கின்றனர். இனி எங்களது கூட்டமைப்பின் மூலம், நாங்களே சாணத்தை மொத்தமாக சேகரித்து, இயற்கை உரமாக்கி விற்பனை செய்ய உள்ளோம்.

ஞாயிறு, 23 டிசம்பர், 2012

பாரதி, இராமானுசத்தை மாணவர்கள் நேசிக்க வேண்டும்: மயில்சாமி அண்ணாதுரை

பாரதி, இராமானுசத்தை மாணவர்கள் நேசிக்க வேண்டும்: மயில்சாமி அண்ணாதுரை பேச்சு




பாரதியார், கணித மேதை ராமானுஜம் ஆகியோரை மாணவ, மாணவிகள் நேசிக்க வேண்டும் என்று இஸ்ரோ நிறுவனத்தின் சந்திரயான் திட்ட இயக்குநர் மயில்சாமி அண்ணாதுரை கூறினார்.
ஈரோடு மக்கள் சிந்தனைப் பேரவை சார்பில் ஈரோட்டில் சனிக்கிழமை நடைபெற்ற ராமானுஜனின் 125-வது பிறந்த தின விழாவில் அவர் பேசியது:
பாரதியை விட பாரதி பற்றிய பாடல்களையும், காந்தியை விட காந்தியத்தையும், ராமானுஜத்தைவிட அவரது கணிதத்தையும், பெரியாரைவிட பகுத்தறிவையும் படிக்க வேண்டும். வரலாறு என்பது படிப்பதற்காக மட்டும் அல்ல. அதை படிப்பவர்கள் தங்களது வாழ்விலும் வரலாறு படைக்க வேண்டும். 
கணிதம் என்பது கசப்பானது அல்ல. வார்த்தைகளை கவிதைகளாக்குவது போல எண்களை கவிதைகளாக மாற்றத் தெரிந்தால் கணித மேதை ஆகலாம். எண்களின் கவிஞராக இருந்தவர் ராமானுஜம். 
கணிதத்தின் காதலன் ராமானுஜம். ஒவ்வொருவருக்கும் ஒவ்வொன்றின் மீது காதல் வரும். ராமானுஜத்துக்கு கணிதம் மீது காதல் வந்தது. ஒன்றின் மதிப்புக்கு பின்பு பூஜ்ஜியத்தை போட்டால் ஒன்றின் மதிப்பு அதிகமாகும்.
எண்ணும், எழுத்தும் நன்கு தெரிந்தால்தான் கல்வியில் முன்னேற முடியும். எண்ணுக்கு ராமானுஜரும், எழுத்துக்கு பாரதியும் தலைவராக இருந்து வருகின்றனர். எனவே, ராமானுஜத்தையும், பாரதியையும் மாணவ, மாணவிகள் நேசிக்க வேண்டும். எண்ணும், எழுத்தும் உள்ளவரை ராமானுஜமும், பாரதியும் வாழ்வார்கள்.
குறைந்த ஆண்டுகளே வாழ்ந்த இருவரது தனிப்பட்ட வாழ்வில் பல சோதனைகள் இருந்தன. ஆனால், அதையெல்லாம் மீறி இருவரும் சாதனை படைத்தனர். எனவே இளைஞர்கள் தன்னம்பிக்கையுடன் சாதிக்க வேண்டும் என்றார்.
விழாவையொட்டி ஈரோட்டின் கணித முன்னோடிகளான ஏ.பி.நாடார், யு.எஸ்.லட்சுமி நாராயணன், கே.வி.சுப்பிரமணியன் ஆகியோரின் திருவுருவப்படங்களை திருவுருவப்படங்களை மாவட்ட ஆட்சியர் வே.க.சண்முகம் திறந்துவைத்தார். ராமானுஜம் கைப்பட எழுதி அச்சிடப்பட்ட அரிய கணித நூல்கள், அறிவியல் நூல்கள் அடங்கிய சிறப்பு புத்தகக் கண்காட்சி நடைபெற்றது. இங்கு வைக்கப்பட்டிருந்த ராமானுஜனின் சிலையை  மாணவ, மாணவிகள் ஆர்வமுடன் பார்வையிட்டன். விழாவில் மக்கள் சிந்தனைப் பேரவைத் தலைவர் த.ஸ்டாலின் குணசேகரன், செயலர் க.நா.பாலன், செயற்குழு உறுப்பின் டி.ராஜன உள்பட பலர் பங்கேற்றனர்.

சனி, 8 செப்டம்பர், 2012

பாரதி போன்ற ஒரு போராளி தேவை: திருமாவளவன்




பாரதி போன்ற ஒரு போராளி தேவை: திருமாவளவன்


தில்லித் தமிழ்ச் சங்கத்தில், "பாரதியின் தொலைநோக்கு' என்ற தலைப்பில் உரையாற்றுகிறார் விடுதலைச் சிறுத்தைகள் கட்சித் தலைவர் தொல். திருமாவளவன். (வலது படம்)
புது தில்லி, செப். 7: பாரதி போன்ற போராளி இன்றைய இந்தியாவின் தேவை என்று விடுதலைச் சிறுத்தைகள் கட்சித் தலைவர் தொல். திருமாவளவன் கூறினார்.தில்லி தமிழ்ச் சங்கத்தில், "பாரதியின் தொலைநோக்கு' என்ற தலைப்பில் வியாழக்கிழமை அவர் இலக்கியச் சொற்பொழிவு நிகழ்த்தினார். அதில் அவர் பேசியதாவது:நம் நாட்டில் சுதந்திரப் போராட்டத்தை பல தலைவர்கள் தீவிரப்படுத்தும் முன்பே அதன் தாக்கத்தை உணர்ந்தவர் மகாகவி பாரதி. 1882-1921-ம் ஆண்டுவரை அவர் வாழ்ந்தார். அவரது காலச் சூழல் சாதியம், பார்ப்பனியம், வெள்ளையர் ஆதிக்கம் நிறைந்தவையாக இருந்தது. அந்த காலகட்டத்திலும் சமூக விழிப்புணர்வு, பெண் விடுதலை, சுதந்திரம், தொழில்நுட்பம், அறிவியல், உலக நாடுகளின் வளர்ச்சி போன்றவற்றையெல்லாம் பாரதியால் சிந்திக்க முடிந்தது. ஒரு கவிஞனாகவும் சமூகப் போராளியாகவும் வாழ்ந்தவர் பாரதி. ஆணுக்குப் பெண் சமம், சாதிய ஒழிப்பு போன்ற அவரது நூற்றாண்டுக்கு முந்தைய கனவுகள் இன்று நிஜங்களாகி வருகின்றன. சுதந்திரத்துக்கு வித்திட்ட மகாத்மா காந்தியடிகள், சட்ட மேதை அண்ணல் அம்பேத்கர் போன்றவர்கள் எல்லாம் வெளிநாடுகளில் படித்துவிட்டு வந்து, தாய் நாட்டில் சுதந்திர தாக்கத்தை ஏற்படுத்தினர். சமூகச் சீர்திருத்தவாதியான பெரியார், காங்கிரஸ் கட்சியில் இருந்து வெளியேறி நீதிக் கட்சியைத் தொடங்கி மொழிச் சுதந்திரத்துக்காகவும், இந்தி திணிப்புக்கு எதிராகவும் குரல் கொடுத்தார். ஆனால், எந்தப் பின்னணியும் இல்லாமல் சாதிய அடக்குமுறை நிறைந்த சூழலில் தேச விடுதலை, சமூகச் சீர்த்திருத்தங்கள் ஆகியவை குறித்து கனவு கண்டு அதைத் தனது கவிப் புலமையால் வெளிப்படுத்த பாரதியால் மட்டுமே முடிந்தது. ஒடுக்கப்பட்ட சமூகத்தில் பிறந்த ஒருவர் இந்த நாட்டில் பிரதமராக வர முடியுமா?அதை அக்காலத்திலேயே சிந்தித்த பாரதி, "எல்லோரும் இந்நாட்டு மன்னர்கள்' என்றார். சந்திர மண்டலத்தில் அடி எடுத்து வைத்த முதல் மனிதன் நீல் ஆர்ம்ஸ்டிராங் 82 வயதில் அண்மையில் காலமானார். நீல் ஆம்ஸ்டிராங் சந்திர மண்டலத்தில் தண்ணீர் இருக்கிறதா என்பதை 1960 ஜூலை 20-ம் தேதிதான் அறிந்தார்.ஆனால், சந்திர மண்டலத்துக்கு நீல் ஆர்ம்ஸ்டிராங் செல்லும் முன்பே "வானை அளப்போம், விண்மீனை அளப்போம்; சந்திர மண்டலத்தியல் கண்டு தெளிவோம்' என கவிதை படைத்தார் பாரதி. அவரைப் போன்ற போராளி எங்கள் இயக்கத்துக்கு இல்லை. இன்று அவர் இருந்திருந்தால் எங்கள் இயக்கத்துக்குத் தலைவராகியிருப்பார். அவ்வாறான போராளி இன்றைய இந்தியாவின் தேவை என்றார் திருமாவளவன்.நிகழ்ச்சிக்கு தில்லித் தமிழ்ச் சங்கத்தின் தலைவர் முனைவர் எம்.என். கிருஷ்ணமணி தலைமை வகித்தார். ஆன்மிகச் சொற்பொழிவாளர் நாகை முகுந்தன் சிறப்புரை ஆற்றினார். தமிழ்ச் சங்கத்தின் பொதுச் செயலாளர் இரா. முகுந்தன் வரவேற்றார். பொருளாளர் பி. அறிவழகன் நன்றி கூறினார். செயற்குழு உறுப்பினர் எம். ஆறுமுகம் நிகழ்ச்சியைத் தொகுத்தளித்தார்.