பாடம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
பாடம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

புதன், 20 நவம்பர், 2019

கோத்தபய வெற்றியிலிருந்து பாடம் கற்க வேண்டும்! – பெ. மணியரசன் அறிக்கை!


கோத்தபய வெற்றியிலிருந்து பாடம் கற்க வேண்டும்!
  • தமிழ்த்தேசியப் பேரியக்கத் தலைவர் பெ. மணியரசன் அறிக்கை!
கடந்த 16.11.2019 அன்று நடந்த இலங்கை குடியரசுத் தலைவர் தேர்தலில், ‘சிறீலங்கா பொதுசன பெரமுனா’ கட்சியின் வேட்பாளராகப் போட்டியிட்ட, மகிந்த இராசபக்சேவின் தம்பி கோத்தபய இராசபக்சே 52.25% வாக்குகள் பெற்று பெரும் வெற்றியை ஈட்டியுள்ளார். இலங்கையின் வடக்கு கிழக்கு தமிழர் தாயக மாநிலங்களில் உள்ள தமிழர்களும், தமிழ் பேசும் முசுலிம்களும் கோத்தபய இராசபக்சேயை எதிர்த்து நின்ற ‘ஐக்கிய தேசியக் கட்சி’ வேட்பாளரான சயித்து பிரமேதாசாவுக்கு ஒட்டுமொத்தமாக வாக்களித்திருக்கிறார்கள்.
இராசபக்சே குடியரசுத் தலைவராகவும், அவரது தம்பி கோத்தபய இராசபக்சே பாதுகாப்புத் துறைச் செயலாளராகவும் இருந்த காலத்தில் தமிழின அழிப்புப் போரை தீவிரமாக நடத்தினார்கள். 2008 – 2009இல் இலட்சக்கணக்கான தமிழ்ப் பொது மக்களையும், விடுதலைப்புலி வீரர்களையும்  இனப்படுகொலை செய்து நரவேட்டை நடத்தினார்கள்.
சிங்கள பௌத்த பேரினவாத ஆதிக்கத்தை – தமிழர்கள் மீது திணித்ததைப் போலவே, முசுலிம் மக்கள் மீதும் இராசபக்சே அரசு திணித்தது. இதனால் இம்மக்கள் இராசபக்சே தம்பிக்கு வாக்களிக்க மறுத்து, அவரை எதிர்த்துப் போட்டியிட்ட இன்னொரு சிங்களக் கட்சி வேட்பாளருக்கு வாக்களித்தனர். ஆனால், கோத்தபய இராசபக்சே மிகப்பெருவாரியான வாக்குகள் பெற்றது எப்படி என்ற கேள்வி எழுகிறது!
இலங்கையில் தமிழர்கள் செயற்கையாகச் சிறுபான்மையாக்கப்பட்ட மக்கள் ஆவர். வரலாற்றில் தமிழர்களின் அரசு தனித்து அங்கு நடந்து வந்தது. ஐரோப்பிய வணிக வேட்டைக் கொள்ளை நிறுவனங்கள் வேட்டையாட வந்தபொழுது, பீரங்கிகளால் தமிழின அரசை வீழ்த்தி சிங்கள அரசையும் வீழ்த்தி ஒரே நிருவாகக் கட்டமைப்பாக இலங்கையை உருவாக்கினார்கள். அதில் ஆங்கிலேய அரசு கோலோச்சியது. இதனால், செயற்கையாக சிறுபான்மையாக்கப்பட்ட தமிழர்கள் எந்தக் காலத்திலும் நாடாளுமன்றத் தேர்தல் வழியாகத் தம் மொழியை – பண்பாட்டை – தாயகப் பரப்பைப் பாதுகாத்துக் கொள்ளும் அரசு அதிகாரத்தைப் பெறவே முடியாத நிலை ஏற்பட்டது.
இலங்கை மக்கள் தொகையில் வடக்கு கிழக்கு மாநிலங்களில் உள்ள ‘சிறுபான்மை’ மக்கள் எண்ணிக்கை 30 விழுக்காடு. மற்ற சிங்கள மாநிலங்களி்ல் சிங்களரின் மக்கள் தொகை 70 விழுக்காடு.
குடியேற்ற(காலனி) வேட்டையாடிகளாலும், பெருந்தேசிய இன ஆக்கிரமிப்பாளர்களாலும் செயற்கையாக உருவாக்கப்பட்ட நாடுகளில் செயற்கையாக சிறுபான்மையாகிப் போன மக்களின் உரிமையை அந்நாடுகளில் நடைபெறும் தேர்தல் வாக்குரிமை மூலம் அடைந்துவிட முடியாது என்பதற்கு, இப்பொழுது நடந்துள்ள இலங்கைத் தேர்தல் மற்றுமோர் எடுத்துக்காட்டு!
“பெரும்பான்மையினரின் முடிவைச் செயல்படுத்துவது” என்ற சனநாயகக் கோட்பாட்டை பல்வேறு இனங்களைக் கொண்ட நாடுகளில் ஒற்றைப் பொருளில் பயன்படுத்தினால், ஒப்பீட்டளவில் சிறுபான்மையாக உள்ள இனங்கள் நிலையான அடிமைகளாக வாழ வேண்டிய நிலைதான் ஏற்படும்.
ஏற்கெனவே, பிரித்தானியாவில் (U.K) சிக்கிக் கொண்டுள்ள அயர்லாந்து, காட்லாந்து தேசிய இனங்கள் தங்களின் மொழி மற்றும் இன உரிமைகளைப் பாதுகாக்க நாடாளுமன்ற – சட்டமன்றத் தேர்தல் மூலம் வழியில்லை என்ற முடிவுக்கு வந்து தனிநாடு கேட்டுப் போராடிக் கொண்டிருக்கிறார்கள். உலகத்தில் ஒப்பீட்டளவில் மிகச்சிறந்த சனநாயகம் உள்ள நாடாகக் கருதப்படும் பிரித்தானியாவிலேயே இந்த இனப்பாகுபாடு நடந்து கொண்டுள்ளது.
 இதேபோல்தான், இசுபெயினில் சிக்கிக் கொண்ட ‘சிறுபான்மைத்’ தேசிய இனங்கள் விடுதலைக்குப் போராடுகின்றன. சோவியத்து ஒன்றியத்தில் இரசியப் பேரினவாதத்தின் ஆதிக்கம் தாங்க முடியாத ‘சிறுபான்மைத்’ தேசிய இனங்கள் பிரிந்து தனிநாடு அமைத்துக் கொண்டன.
அனைவருக்கும் வாக்குரிமை இருப்பதால், ‘சிறுபான்மைத்’ தேசிய இனங்களின் உரிமைகள் பாதுகாக்கப்படும் என்று எந்த நாட்டிலும் நம்ப முடியாது. இந்தியாவிலும் அப்படித்தான்!
இந்த உண்மைக்கான இன்றைய எடுத்துக்காட்டுதான், ஒட்டுமொத்த தமிழர்களும், தமிழ் பேசும் முசுலிம்களும் கோத்தபய இராசபக்சேவுக்கு எதிராக வாக்களித்தும், அந்த வாக்குகள் வலிமையற்றவை – அந்தத் தேர்தல் வெறும் சடங்கு என்ற உண்மையை உலகுக்கு உணர்த்தியுள்ளது.
இலங்கை நாடு மிகப்பெரிய பொருளாதாரச் சிக்கலில் தவித்துக் கொண்டுள்ளது. விலைவாசி கடுமையாக உயர்ந்துள்ளது. நாணய மதிப்பு நாள்தோறும் குறைந்து கொண்டுள்ளது. மக்களின் வாழ்க்கைத் தரம் மிக மோசமாகிக் கொண்டிருக்கிறது. வேலையில்லாத் திண்டாட்டம் பெருகியுள்ளது. ஊழல் மலிந்துள்ளது. இவையெல்லாவற்றுக்கும் இராசபக்சே கட்சியும், ஐக்கிய தேசியக் கட்சியும் காரணங்களாக இருக்கின்றன.
போர் வெறி கொண்டு, இலங்கையின் கருவூலத்தைக் காலி செய்தவர், இராசபக்சே! அவருடைய கட்சியைச் சிங்கள மக்கள் பெருமளவு தேர்வு செய்திருக்கிறார்கள் என்றால், அதற்கு என்ன காரணம்? தமிழர்களையும், முசுலிம்களையும் கடுமையாக ஒடுக்குவதில் – அழிப்பதில் முதல் பரிசு பெற வேண்டியது இராசபக்சே குடும்பம் என்ற சிங்களப் பேரினவாத உணர்வு பெரும்பாலான சிங்கள மக்களிடம் இருப்பதுதான் இத்தேர்வுக்குக் காரணம்!
 வெற்றி பெற்ற உடனேயே கோத்தபய இராசபக்சே, “எனக்கு வாக்காளிக்காதவர்களும் என் பக்கம் வாருங்கள், உங்களுக்கும் நான்தான் குடியரசுத் தலைவர். ஒரே இலங்கையை உருவாக்க வேண்டும்” என்று மிரட்டல் பாணியில் கோரிக்கை வைத்துள்ளார். சிங்கள பௌத்த இன ஆதிக்கத்தை – மொழி ஆதிக்கத்தை ஏற்றுக் கொண்டு, முழுமையான சிங்கள பௌத்த நாடாக இலங்கையை மாற்றுவதற்கு, சிறுபான்மையினரே மரியாதையாக என்னோடு வாருங்கள் என்ற  இராணுவ அழைப்புதான் கோத்தபய விடுத்துள்ள அந்த அழைப்பு!
கோத்தபய இராசபக்சே ஒரே நாடு முழக்கத்தை நரேந்திர மோடியிடமிருந்து எடுத்துக் கொண்டாரா என்ற ஐயப்பாடு எழுகிறது.
வடக்கு – கிழக்கு மாநிலங்களில் மிகத் தீவிரமாகச் சிங்களக் குடியேற்றங்கள் நடக்கும் கண்டமிருக்கிறது. வடக்கு கிழக்கு மாநிலப் பகுதிகளில் மணலாறு என்ற தமிழர் பகுதியில் இருந்த தமிழர்களை 1984 வாக்கில் இராணுவத்தை வைத்து வெளியேற்றிவிட்டு, வலுவந்தமாக சிங்களக் குடியேற்றங்களை இலங்கை அரசு கொண்டு வந்தது அன்று வலுவந்தமாக 18 கிராமங்களில் சிங்கள அரசு சிங்களக் குடியேற்றங்களைக் கொண்டு வந்தது. இன்றைக்கு அங்கு சிங்களக் குடியேற்ற ஊர்களின் எண்ணிக்கை சற்றொப்ப நூறு!
மணலாறு என்ற தமிழ்ப் பெயரை ‘வெலிஓயா’ என்று சிங்களத்தில் மாற்றிவிட்டார்கள். ஏராளமான தமிழ் ஊர்களின் பெயர்களையும் சிங்களத்தில் மாற்றிவிட்டார்கள். அப்பகுதியின் 90 விழுக்காட்டிற்கு மேல் கோத்தபய இராசபக்சேவுக்கு வாக்குகள் கிடைத்துள்ளன. இதே பாணி சிங்களக் குடியேற்றங்களைத்தான், இன்றைக்குள்ள வடக்கு – கிழக்கு தமிழர் மாநிலங்களில் வலுக் கட்டாயமாகக் கொண்டு வரப் போகிறது, கோத்தபய ஆட்சி! ஏற்கெனவே, இந்துக் கோயில்களை பௌத்த கோயில்களாக மாற்றிக் கொண்டுள்ளார்கள். அப்போக்கு இன்னும் தீவிரப்படும்.
தமிழ்நாட்டுத் தமிழர்கள் இலங்கையில் நடந்த தேர்தல் முடிவுகளிலிருந்து மேற்கண்ட பாடங்களைப் படிக்க வேண்டும். தமிழ்நாட்டிலும் இப்படித்தான் குடியேற்றங்களும், தமிழர் ஆன்மிகத்திற்குப் புறம்பான வடஇந்திய ஆன்மிகத் திணிப்பும் நடந்து கொண்டுள்ளன.
வாக்குரிமை மூலம் இலங்கையில் தமிழர்கள் தங்களின் தாயகப் பகுதிகளையும் இன உரிமைகளையும் இன அடையாளங்களையும் தக்க வைத்துக் கொள்ள முடியாது என்று சொல்லும்போது, இதற்கு மாற்று ஆயுதப்போர் என்று கருத வேண்டா!
 இப்போதைய நிலையில், ஒட்டுமொத்த தமிழர்கள் ஒருங்கிணைந்து சனநாயக வழிப்பட்ட போராட்டங்களை நடத்திச் சிங்களப் பேரினவாத அரசுக்கு நெருக்குதல் கொடுத்து, உலகக்  கவனத்தை ஈர்த்து உரிமைகளைப் பெற முயல வேண்டும். அதற்கான முதல் தேவை – சம்பந்தர், சுமந்திரன் போன்றவர்களுக்கு அப்பால் உண்மையான தமிழின உரிமையில் அக்கறையும் ஒப்புக் கொடுப்பும் கொண்டு, மக்களைத் திரட்டிச் சனநாயக வழியில் உரிமைப் போராட்டங்கள் நடத்தும் தலைமை தமிழீழத்தில் உருவாக வேண்டும். தமிழினத்தைச் சேர்ந்த இளம் ஆண்களும், பெண்களும் இதுபற்றி சிந்தித்து சரியான முடிவுக்கு வந்து கூட்டுப் போராட்டங்களை நடத்த வேண்டும்.
இவ்வாறான ஒருங்கிணைந்த மக்கள் திரள் உரிமைப் போராட்டங்கள் தமிழீழத்தில் நடக்கும்போது, தாய்த் தமிழ்நாட்டு மக்கள் அவர்களுக்கு ஆதரவு நல்க வேண்டும். இங்கு சொல்லப்பட்ட படிப்பினைகள், தமிழ்நாட்டுத் தமிழர்களுக்கும் பொருந்தும்!
 கோத்தபய அரசு சீனாவுக்கு ஆதரவாக இருக்கும். அதனால், இந்திய அரசு இலங்கைக்கு எதிரான செயல்பாடுகளில் ஈடுபடும் என்று நம்மில் சிலர் கதைக்கத் தொடங்குவார்கள். இந்தக் கதைப்புகளை நம்ப வேண்டா. கடந்தகாலப் படிப்பினைகள் நமக்கு உணர்த்துவது, எதிர்க்க வேண்டியது சீனர்களையா – தமிழர்களையா என்று முரண்பாடு வந்தால், தமிழர்களைத்தான் எதிர்ப்போம் என்று இந்திய அரசு நிலைப்பாடு எடுக்கும் என்பதுதான்! எனவே, கொக்கு தலையில் வெண்ணெய் வைத்துப் பிடிக்கும் உத்திகளைச் சொல்லும் ‘சிந்தனைச் சிற்பி’களின் ஆசை வார்த்தைகளில் தமிழர்கள் பலியாகக் கூடாது என்ற படிப்பினையும் பெற வேண்டும். உரிமை மீட்பிற்கான வழி மக்கள் திரள் எழுச்சியே!
=====================================
தலைமைச் செயலகம்,
தமிழ்த்தேசியப் பேரியக்கம்
=====================================
பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=====================================

புதன், 25 ஏப்ரல், 2018

எந்த இராமனின் கதையைப் பாடமாக வைக்க வேண்டும்? – குவியாடி


அகரமுதல

எந்த இராமனின் கதையைப் பாடமாக வைக்க வேண்டும்?


விசுவ இந்து பரீச்சத்து என்னும் அமைப்பு இராமனின் கதையைப் பாடமாக வைக்க வேண்டும் எனக் கோரியுள்ளது.
தமிழ்நாட்டு மாணவர்கள், தமிழ்ப்பாடத்தில் மேனிலைக்கல்வியை முடிக்கும் முன்னர் இராமகாதையைக் கம்பரின் வரிகளில் படித்து விடுகின்றனர். பிற மாநிலங்கள் குறித்துத் தெரியவில்லை.
ஒரே நாடு, ஒரேமொழி, ஒரே கல்வி ஒரே சமயம் என வெறி பிடித்துக் கூக்குரலிடும் அமைப்பு இப்பொழுது நாடு முழுவதும் இராமன் கதையைப் பாடமாக வைக்க வேண்டும் எனச் சொல்வதால் சில ஐயங்கள் ஏற்படுகின்றன.
வரலாறு என்று சொல்லாமல் கதை என்று அவர்களே ஒத்துக் கொண்டது மகிழ்ச்சிதான். ஆனால்  வால்மீகி இராமாயணம், துளசிதாசு இராமாயணம், பௌத்த இராமாயணம், சமண இராமாயணம், திபேத்து இராமாயணம், கம்பர் இராமாயணம் எனப் பல்வேறுமொழிகளிலும் 300 இராமாயணங்கள் உலகம் முழுமையும் உள்ளன. இராவணனின் மகள் சீதை, தசரதன் மனைவியர் வரிசை முறை கோசலை, சுமத்திரை, கைகேயி, என்பனபோன்று 80 வகையான இராமகாதைகள் உள்ளன. இவற்றுள் எந்தக் கதையைப் பாடமாக வைக்க வேண்டும் எனச் சொல்கிறார்கள்? தெரியவில்லையே!
 இராமன் முதலானவர்கள் பிறப்பும் வெவ்வேறு வகையாகச் சொல்லப் படுகின்றன. தசரதன் மனைவிகள் வேள்வியில் பாயாசம் குடித்ததால் பிறந்தவர்கள், பானம் பருகியதால் பிறந்தவர்கள், விந்து உண்டு பிறந்தவர்கள், குதிரைப் பிணத்தைக் கட்டிக் கொண்டமையால் பிறந்தவர்கள் எனப் பிறப்பு முறைகள் வெவ்வேறாக க் கூறப்படுகின்றன.
மற்றொரு கதையும் உள்ளது. இராமன், உத்காதா என்னும் பூசாரிக்கும் கோசலைக்கும் பிறந்தவன்; இலக்குமணனும் சத்துருக்கனனும் பரிவிருத்தி என்னும் பூசாரிக்கும் சுமத்திரைக்கும் பிறந்தவர்கள்; பரதன், மற்றொரு பூசாரிக்கும் சுமத்திரைக்கும் பிறந்தவன் என்பது ஒரு கதை.
இவற்றுள் எதனைப் பாடமாக வைப்பார்கள்? எல்லாக் கதைகளிலுமுள்ள ஒற்றுமை தசரதனுக்கும் மனைவியருக்குமான உறவில் இராமன் முதலானோர் பிறந்தமையாகத்   தெரிவிக்காத துதான்.
கடவுளுக்குப் பிறப்பு கிடையாது. தாய்க்கும் அவரின் கணவர் அல்லாத மற்றொருவருக்கும் பிறந்தவரைக் கடவுளாகச் சொல்ல முடியாது  அல்லவா? 
கடவுளுக்கு இறப்பும் கிடையாது. ஆனால், இராமன் சரயு ஆற்றில் இலக்குவனை(இலக்குமணனை)த் தள்ளிக் காென்றுவிட்டுத் தானும் குதித்துத் தற்கொலை செய்து கொள்கிறான். அப்படியானால் கடவுளாகவோ கடவுளின் பிறப்பாகவோ இராமன் இருக்க முடியாதே! 
இராமன் பட்டத்து அரசனானால் அவனுடைய மனைவிமார்களின்  ஏளனத்திற்கும் ஆளாவாள் எனக் கைகேயியைக் கூனி எச்சரிக்கிறாள். இராமனின்  ஒற்றை மனைவி – ஏகப்பத்தினி – உடையவன் என்னும் பிம்பம் உடைந்து ஏகப்பட்ட பத்தினி உடையவன் என மக்கள் தூற்றமாட்டார்களா?
அன்னைக்கும் மேலாக அண்ணனை மதிப்பவன் இலக்குவன். அண்ணி சீதையையும் அன்னையாகப் போற்றுபவன். உடன்பிறப்புப் பாசத்திற்கு இராமன் இலக்குவனைத்தான் மக்கள் கூறுவர். மூத்த பிள்ளைக்கு இராமன் பெயரை வைத்தால் இளையவனுக்கு இலக்குவன் பெயரை வைப்பது மக்கள் வழக்கம்.
இராமன் காட்டிற்குச் செல்ல நேரிட்டதும் தன் அன்பு மனைவியைப் பிரிந்து உடன் செல்கிறான் பாசமிகு தம்பி இலக்குவன். ஆனால் இலக்குவன் பாசத்தினால் வரவில்லை; தன்மீதுள்ள காமத்தினால் வந்ததாகச் சீதை கூறுகிறாள்.இலக்குவனின் பாசம் பற்றிய நம்பிக்கையைத் தவறு என்பதா? பாசப்பார்வையைக் காமப் பார்வையாக நோக்கும் சீதையின் ஒழுக்கத்தில் ஐயப்படுவதா?
இலங்கையுடனான போருக்கு அடிப்படை சூர்ப்பனகையின் மூக்கு, காதுகள், மார்புக்காம்புகள் ஆகியவற்றை இலக்குவன் அறுத்துத் துன்புறுத்தியதுதான். காரணம், சூர்ப்பனகை, இராமன் தனியாக இருப்பதாக எண்ணி அவனைத் திருமணம் செய்து கொள்வதாகத் தெரிவித்ததுதான். ஒழுக்கமுடையவனாகப் போற்றப்படும் இராமன் தான் மணமானவன் என்பதை முதலிலேயே தெரிவித்திருக்க வேண்டும். அவ்வாறில்லாமல் தானும் உடன்படுவதுபோல் முதலில் பேசியிருக்கக் கூடாது. சீதை, குடிலில் இருந்து வெளியேவந்த பின், சூர்ப்பனகையும் சீதையும் அதிர்ச்சிக்கு உள்ளாகிறார்கள். அப்பொழுதுதான் தனக்கு மணமான உண்மையைத் தெரிவிக்கிறான். அதுவரை இராமன் விளையாட்டிற்குப் பேசினானாம். காதற்சொற்களைப் பேசிவிட்டு விளையாட்டாகப் பேசியதாகக் கூறுவது ஏமாற்று வேலை அல்லவா? பாதிக்கப்பட்ட பெண்ணிற்குப் பரிகாரம் தண்டனை வழங்குவது என்பது கொடுமை அல்லவா? இராமனையும் இலக்குவனையும் எப்படி அறவடிவங்களாகக் கூறுவார்கள்?
பிறரின் தம்பியர் தத்தம் தமையன்மாருக்கு எதிராகத் திரும்பினால் உடன்பிறப்புப் பாசத்திற்கு எடுத்துக்காட்டாகக் கூறப்படும் இராமன் என்ன செய்திருக்க வேண்டும்? அவர்களிடையே ஒற்றுமை அல்லவா ஏற்படுத்தி யிருக்க வேண்டும். மாறாக அண்ணன்களைக் கொன்று ஆட்சியைப் பறித்து அரசாளத்தானே உதவி செய்துள்ளான். இதனைப் படிக்கும் மாணவர்கள், இராமனை எப்படி நல்ல அண்ணனாக எண்ணுவார்கள்?
இராமர் பாலம் கட்டுக்கதை என்பதை விரிவாகத் தனியாகப் பார்க்கலாம். ஆனால் புத்தத்துறவிகளையும் புத்த மடங்களையும் இராமாயணத்தில் படிக்கும் மாணவர்கள் பொய்யான இராமர் பாலத்தை வைத்து ஏய்ப்போரின் உண்மை முகத்தை அறிந்து கொள்வார்கள் அல்லவா? 
இவ்வாறு அடுக்கிக்கொண்டே போகும் அளவுள்ள உண்மைகளைப் படிப்பவர் உணர்ந்தால் இராமனின் புகழ் மங்கும். அப்படி யென்றால் நமக்கு ஒன்றும் இல்லை. மாறாக, மதவெறியைத்தூண்டுவதற்காக இராமனின் பாடம் என்றால், அதற்கு முற்றுப்புள்ளி வைக்க வேண்டியது நம் அனைவரின் முதற்கடமை!

— குவியாடி

சனி, 21 செப்டம்பர், 2013

பாடத்தைப் பாடலாக்கிய ஆசிரியர்!

பாடத்தை ப் பாடலாக்கிய ஆசிரியர்!

நாட்டுப்புற பாடல் மூலம் கணித சூத்திரம், வேதியியல் சமன்பாடு மற்றும் தனிமங்களை, மாணவர்களுக்கு எளிதில் புரிய வைக்கும்,
ஆசிரியர் தவமணி: நான், கொட்டாம்பட்டி அருகில் உள்ள, நாகப்பன் செவல்பட்டி கிராமத்தை சேர்ந்தவன். எங்கள் ஊரில், பேருந்து வசதி இல்லாததால், தினமும், 8 கி.மீ., தூரம் நடந்தே, அரசு பள்ளிக்கு செல்வேன். இதனால், நாட்டுப்புற பாடல் பாடிக் கொண்டே, பள்ளிக்கு செல்லும் பழக்கம், சிறுவயதிலேயே ஏற்பட்டது. ஆசிரியர் பணியின் மீதான ஆர்வத்தால், 1989ல் பி.எட்., படித்தாலும், ஏனோ ஆசிரியர் வேலை கிடைக்கவில்லை. நாட்டுப்புற பாடல்களை நன்கு பாடும் திறமை இருந்ததால், நண்பர்கள் வலியுறுத்தலின்படி, அகில இந்திய வானொலியில், நாட்டுப்புறப் பாடல்களை பாடி வந்தேன். கடந்த, 1996ல், என் விருப்பப்படியே, ஆசிரியர் பணி கிடைத்தது. அறிவியல் மற்றும் கணித பாடங்களை படிக்க, கிராமத்து மாணவர்கள் படாத பாடு பட்டனர். சிலர், இதற்காகவே பள்ளிப் படிப்பை, பாதியிலேயே கைவிட்ட செய்தியையும் அறிந்தேன். அதனால், கணித சூத்திரம், வேதியியல் சமன்பாடு மற்றும் தனிம அட்டவணைகளை, நாட்டுப்புற பாடல் வடிவில் மாற்றியமைத்து, மாணவர்களை பாட வைத்தேன். நாட்கள் செல்ல செல்ல, என் முயற்சிக்கு பலன் கிடைக்க ஆரம்பித்தது. மாணவர்கள் ஆர்வத்துடன் கற்று, 100 சதவீத தேர்ச்சி பெற்றனர். சுனாமி பாதித்த அதிர்ச்சியிலிருந்து மீளாத, நாகப்பட்டினம் கடற்கரையோர மாணவர்கள், பள்ளிக்கு செல்லவே ஆர்வமின்றி, மன உளைச்சலுடன் இருந்தனர். 2005ல் அங்கு சென்று, நாட்டுப்புற பாடல் வழியாக பாடம் நடத்தினேன். இதையறிந்து, மற்ற குழந்தைகளும் மீண்டும் பள்ளிக்கு வர ஆரம்பித்தனர். பழையபடி கல்வியில் கவனம் செலுத்தியது, மனதிற்கு மகிழ்ச்சியாக அமைந்தது. கிராமப்புற பெற்றோருக்கு, போதுமான படிப்பறிவு இல்லாததால், தங்கள் குழந்தைகளையும் படிக்க விடுவதில்லை. எனவே, கிராமப்புற பகுதிகளுக்கு சென்று, நாட்டுப்புற பாடல்கள் வழியாக, அறிவொளி இயக்கம் பற்றிய விழிப்புணர்வை ஏற்படுத்துகிறேன்.

வியாழன், 19 செப்டம்பர், 2013

பிழைகளுடன் தமிழ் வினாத்தாள்:மறுதேர்வு நடத்தத் தயாரா?

பிழைகளுடன் வினாத்தாள்: தமிழ்ப் பாடத்துக்கு மறுதேர்வு நடத்தத் தயாரா?

முதுநிலைப் பட்டதாரி ஆசிரியர்களுக்கான போட்டித் தேர்வில் எழுத்துப் பிழைகளுடன் இருந்த தமிழ்ப் பாடத்துக்குப் பதிலாக மறுதேர்வு நடத்தத் தயாரா என, ஆசிரியர் தேர்வு வாரியத் தலைவர் விபு நய்யாரிடம், நீதிபதி எஸ்.நாகமுத்து நேரில் கேள்வி எழுப்பினார்.
ஆசிரியர் தேர்வு வாரியம் கடந்த ஜூலை 21-ஆம் தேதி முதுகலைப் பட்டதாரி ஆசிரியர் போட்டித் தேர்வை நடத்தியது. இதில் தமிழ்ப் பாடத்துக்கான பி வரிசை வினாத்தாளில் 47 வினாக்கள் எழுத்துப் பிழைகளுடன் இருந்தன.
பிழைகளுடன் இருந்த கேள்விகளுக்கு கருணை மதிப்பெண் வழங்க வேண்டும் அல்லது மறுதேர்வு நடத்த வேண்டும் எனக் கோரி மதுரை கோ.புதூரைச் சேர்ந்த விஜயலட்சுமி உயர்நீதிமன்ற மதுரை கிளையில் வழக்குத் தொடர்ந்தார்.
இதை விசாரித்த நீதிபதி நாகமுத்து, முதுநிலைப் பட்டதாரி ஆசிரியர் தமிழ்ப் பாடத் தேர்வு முடிவுகளை வெளியிட இடைக்காலத் தடை விதித்தார். மேலும் ஆசிரியர் தேர்வு வாரியத் தலைவர் விபு நய்யார் ஆஜராக வேண்டும் எனவும் உத்தரவிட்டார். இந்த வழக்கு திங்கள்கிழமை (செப்டம்பர் 16) விசாரணைக்கு வந்தபோது, ஆசிரியர் தேர்வு வாரிய உறுப்பினர் க.அறிவொளி ஆஜராகியிருந்தார். ஆசிரியர் தேர்வு வாரியத் தலைவர் ஆஜராகாதது குறித்து கேள்வி எழுப்பிய நீதிபதி, அவரை புதன்கிழமை ஆஜராக வேண்டும் என உத்தரவிட்டார்.
இதையடுத்து, நீதிமன்றத்தில் ஆசிரியர் தேர்வு வாரியத் தலைவர் விபு நய்யார், உறுப்பினர்கள் அறிவொளி, தங்கமாரி ஆகியோர் ஆஜராயினர். அப்போது, பிழையான கேள்விகளில் 39 கேள்விகளை நீக்கிக் கொள்வதாகவும், ஒரு கேள்வி எளிதில் புரிந்துகொள்ளக் கூடியது என்பதால், அதை நீக்கத் தேவையில்லையென்றும், அரசின் கூடுதல் தலைமை வழக்குரைஞர் கே.செல்லப்பாண்டியன் குறிப்பிட்டார். நீக்கத் தேவையில்லை எனக் கூறிய கேள்வியையும் படித்துப் பார்த்த நீதிபதி, அக்கேள்வியையும் நீக்க உத்தரவிட்டார்.
முதுநிலை தமிழாசிரியர் தேர்வுக்கு தாய்மொழியில் பிழையின்றி கேள்வித்தாள் தயாரிக்க முடியாதது துரதிருஷ்டவசமானது. இந்தத் தேர்வை 39 ஆயிரத்து 983 பேர் எழுதியுள்ளனர். அதில் பிழையான கேள்வித்தாளில் 8 ஆயிரம் பேர் எழுதியிருக்கின்றனர்.
ஓரிரு கேள்விகள் பிழையாக இருந்தால், அக் கேள்விகளுக்கு மதிப்பெண் வழங்கலாம். அதிக கேள்விகள் பிழையாக இருப்பின் மறுதேர்வு நடத்த வேண்டும் என இதேபோன்ற வழக்கு ஒன்றில் உச்சநீதிமன்றம் உத்தரவிட்டுள்ளது.
தொடர்ந்து, நேரில் ஆஜராகாதது குறித்து விபு நய்யாரிடம் கேள்வி எழுப்பிய நீதிபதி, மறுதேர்வு நடத்துவதற்குத் தயாராக இருக்கிறீர்களா என்றார். இதற்கு அரசின் கருத்தை அறிந்து நீதிமன்றத்தில் தெரிவிக்க கால அவகாசம் வேண்டும் என்று கூடுதல் தலைமை வழக்குரைஞர் தெரிவித்தார். இதையடுத்து, இவ் வழக்கு விசாரணை செப்டம்பர் 24-ஆம் தேதிக்கு ஒத்திவைக்கப்பட்டது.

சனி, 8 ஜூன், 2013

"இப்படி நடந்தால், என்ன செய்ய வேண்டும்...': மூன்றாம் வகுப்பிலே வந்துவிட்டது பாடம்

"இப்படி நடந்தால், என்ன செய்ய வேண்டும்...': மூன்றாம் வகுப்பிலே வந்துவிட்டது பாடம்



கோவை :எதுவும் அறியாத, எதிர்க்கும் சக்தியில்லாத குழந்தைகள், பாலியல் கொடுமையில் சிக்கினால், என்ன செய்ய வேண்டும்? இதற்கு, விழிப்புணர்வு ஏற்படுத்தும் பாடம், மூன்றாம் வகுப்பு, தமிழ்ப் பாடத்தில், சேர்க்கப்பட்டு உள்ளது.

விழிப்புணர்வு:குழந்தைகளிடம் பாலியல் வன்முறை செய்வது அதிகரித்து வருகிறது. இதனால், குழந்தைகளுக்கு விழிப்புணர்வு ஏற்படுத்தும் விதமாக, மூன்றாம் வகுப்பு, தமிழ்ப் பாடப் புத்தகத்தில், பாடம் சேர்க்கப்பட்டுள்ளது.மூன்றாம் வகுப்பு தமிழ்ப் பாடப் புத்தகத்தில், முதல் பருவ புத்தகத்தில், ஒன்பதாவது பாடமாக, "இப்படி நடந்தால்...' என்ற தலைப்பில், அந்த பாடம் சேர்க்கப்பட்டுள்ளது. பாடத்திலுள்ள படத்தில், குழந்தையின் வாயை, ஒருவரின் கை இறுக்கமாக அழுத்தியிருப்பது போன்றும், அந்த கையை, குழந்தை இழுப்பது போன்றும், சமூக அவலத்தை, பறைசாற்றும் விதமாக உள்ளது.

அந்த பாடத்தில் இருப்பதாவது:வகுப்பறையில் சுறுசுறுப்பாக, சிரித்த முகத்துடன் இருக்கும் மீனா, சில நாட்களாக சோர்வாக இருந்தாள். வகுப்பாசிரியர் விசாரித்தார். நாட்கள் செல்லச் செல்ல, அவளிடம் மாற்றம் மிகுதியானது. படிப்பிலும், நாட்டம் குறைந்தது; யாருடனும் பேசுவதில்லை; வீட்டில் ஏதாவது பிரச்னையா என, அறிய ஆசிரியை, மீனாவின் அம்மாவை பள்ளிக்குவரவழைத்தார்.மீனா பற்றி கேட்டதும், "சில நாட்களாக, அவள் இப்படித்தான் இருக்கிறாள். வீட்டில் அவளுக்கு எந்த குறையும் இல்லை; மருத்துவரிடம் காண்பித்தேன். உடல் அளவில் ஏதுமில்லை என, கூறிவிட்டார். நானும் பலமுறை கேட்டு விட்டேன்; வாயே திறக்கவில்லை' எனக் கூறினார் அம்மா.

மீனாவை, தனியே அழைத்து, ஆசிரியை விசாரித்தபோது, மீனா கண் கலங்கினாள். "ஒருநாள் என் அம்மாவும், அப்பாவும், என்னை, பக்கத்து வீட்டில் விட்டு விட்டு, அவசர வேலையாக வெளியே சென்றனர். அந்த வீட்டு மாமா... அவரோட மொபைல் போனில் இருந்த படங்களை காண்பித்து, பார்க்குமாறு வற்புறுத்தினார். தொட்டுத் தொட்டு பேசினார்; இதை யாரிடமும் சொல்லக் கூடாது என, மிரட்டினார். எனக்கு பயமாய் இருந்ததால் யாரிடமும் சொல்லவில்லை; நான் தவறு செய்து விட்டேனா?' என, மீனா அழுதாள்.ஆசிரியையின் ஆறுதலால், மீனா, பழைய நிலைக்கு திரும்பினாள்.இப்படிப்பட்ட கருத்துடன், பாடம் முடிகிறது.
மூன்று கேள்விகள்:

இது குறித்து, அரசு பள்ளி தமிழாசிரியர் ஒருவர் கூறியதாவது: சமூகத்தில் ஏற்படும் பிரச்னைகளுக்கு தீர்வு காண, பாடப் புத்தகங்கள் மட்டுமே சிறந்த வழி. எதுவும் அறியாத, எதிர்க்கும் சக்தியற்ற குழந்தைகளுக்கு விருப்பமில்லாத, கசப்பான அனுபவங்கள் ஏற்பட்டால், என்ன செய்ய வேண்டும் என்பதற்கு மூன்று கேள்விகள் கேட்கப்பட்டுள்ளன. இதன் மூலம், குழந்தைகளுக்கு நிச்சயம் விழிப்புணர்வு ஏற்படும்.இவ்வாறு அவர் கூறினார்.