பள்ளிகளை ஆரியமயமாக்குவதைத் தமிழ்நாடு அரசு கைவிட வேண்டும்! – கி. வேங்கடராமன்

அகரமுதல

இலக்குவனார் திருவள்ளுவன்      31 அட்டோபர் 2019      கருத்திற்காக..

ஓகக் கல்வி(யோகா) என்ற பெயரால் பள்ளிகளை

ஆரியமயமாக்குவதைத் தமிழ்நாடு அரசு கைவிட வேண்டும்!

தமிழ்த்தேசியப் பேரியக்கப் பொதுச்செயலாளர் தோழர் கி. வேங்கடராமன் அறிக்கை!

கல்வியாளர்களால் வெறுத்து ஒதுக்கப்பட்ட பா.ச.க. அரசின் ‘தேசியக் கல்விக் கொள்கை’யின் பரிந்துரைகளைத் தமிழ்நாடு பள்ளிக் கல்வித்துறை முந்திக் கொண்டு ஒவ்வொன்றாகச் செயல்படுத்தி வருகிறது.

ஐந்தாம் வகுப்பு – எட்டாம் வகுப்புக்குப் பொதுத் தேர்வு, மாணவர்கள் குறைவாக உள்ள தொடக்கப் பள்ளிகளை மூடுவது, ஒரு மேனிலைப் பள்ளிக்கு அருகில் சில அயிரைப்பேரடி(கிலோ மீட்டர்கள்) தொலைவு வரையிலுள்ள தொடக்கப் பள்ளி நடுநிலைப் பள்ளி உயர்நிலைப் பள்ளிகளை இணைப்பது என அடுத்தடுத்து கல்வி உரிமையின் மீதான தாக்குதல்களைத் தொடுத்து வருகிறது.

தமிழ்வழிக் கல்வி புறக்கணிப்பு, எளிய மக்களின் கல்வி உரிமை பறிப்பு, தேர்வு முறையை தண்டனை முறையாக இறுக்குவது எனப் பிற்போக்குத் திசையில் இந்திய அரசின் ஆணையை கூச்சமின்றிச் செயல்படுத்துகிறது.

 இந்த வரிசையில், ‘ஓகா – ஒழுக்கக் கல்வி’ என்ற பெயரால் ஆரியத்துவ ஆதிக்கத்திற்குக் கதவு திறந்து விட நடவடிக்கைகள் மேற்கொண்டு வருகிறது. கடந்த 25.10.2019 அன்று பள்ளிக் கல்வித்துறை அமைச்சர் செங்கோட்டையன் மும்பையில் செயல்பட்டு வரும் ‘கைவல்ய தம்மா ஓகா ஆய்வு நிலையம்’ என்ற நிறுவனத்தோடு ‘புரிந்துணர்வு’ ஒப்பந்தத்தில் கையெழுத்திட்டிருக்கிறார்.

இந்தக் ‘கைவல்ய தம்மா ஓகா நிலையம்’ மும்பை அருகிலுள்ள இலோனாவாலா குன்றில், தலைமையிடம் அமைத்துச் செயல்பட்டு வருகிறது. சுவாமி குவலயா நந்தா என்பவர் 1924இல் நிறுவி விரிவாக்கிய இந்த ஓகா நிறுவனம், இப்போது ஓ.பி. திவாரி என்பவர் தலைமையில் நடந்து வருகிறது.

 ஓகம், மூச்சுப் பயிற்சி ஆகியவை மனித உடல் நலத்திற்கு எவ்வாறு துணை புரிகின்றன என்பதை ஆய்வுக் கூட ஆராய்ச்சியின் வழியாக மெய்ப்பித்து இந்த ஓகக் கலையை இந்நிறுவனம் கற்பித்து வந்தாலும், இது வெறும் உடல் பயிற்சியாக நடப்பதில்லை. இப்பயிற்சிகள் அனைத்தையும் வேதங்கள், உபநிசத்துகள், சங்கரரின் மாயாவாதம் ஆகியவற்றோடு இணைத்தே வழங்குகிறார்கள். அதையே ஒழுக்கக் கல்வி என்பதாகச், செங்கோட்டையனும் மெச்சிக் கொள்கிறார்.

 தமிழிசைப் பண்கள் ‘இராகங்கள்’ எனப் பெயர் மாற்றப்பட்டு, கருநாடக சங்கீதம் என ஆரியமயமானதைப் போல், நுணுக்கமும் விரிவும் உயர்வும் உள்ள சிற்பக் கலையின் செயல்பாடு, தமிழர்களின் தனித்தன்மையானதாக எங்கும் பரவி இருந்தாலும், ‘சிற்பச் சாத்திரம்’ என்பது வடமொழியில் இருப்பதைப் போல, தமிழர்களின் சதிராட்டம் ‘பரத நாட்டியம்’ என்ற பெயரால் ஆரியமயமானதைப் போல – பண்டைத் தமிழர்களின் ஓகம்தான் ஆரியத்தால் களவாடப்பட்டு ‘யோகம்’ என்ற பெயரால் மீண்டும் வருகிறது என்பதை அறிஞர்கள் பலரும் எடுத்துக் காட்டியிருக்கிறார்கள்.

 அகத்தியர், திருமூலர், போகர், புலிப்பாணி, ஔவையார் என்று அடுத்தடுத்த சான்றோர்களால் தமிழ் மண்ணில் வளர்த்தெடுக்கப்பட்ட ஓகக்கலையும், அதனூடான மூச்சுப் பயிற்சி, தியானம் உள்ளிட்ட உடலுக்கும் உள்ளத்திற்குமான பயிற்சிகள் அறிவியல் வழிப்பட்டவை.

‘அண்டமே பிண்டம்’ என்ற திருமூலரின் திருமந்திரம் கூறும் அறிவியல், நவீன அறிவியலாளர்களாலும் வியந்து பார்க்கக்கூடிய ஒன்றாகும். தமிழர்களின் ஐம்பூதக் கோட்பாடு, இயற்கையின் இயக்கத்திலும் உடலின் இயக்கத்திலும் கிட்டத்தட்ட ஒரே தன்மையில் செயல் படுவதை வேறு எந்த அறிவியலும் சொன்னதில்லை!

 சூழலியல் சிக்கல்களும், அது சார்ந்த நோய்களும், பெருகி வரும் இக்காலத்தில் தமிழர்களின் பண்டை அறிவியல் உலக அறிஞர்களின் மீள் பார்வைக்குச் சென்று கொண்டிருக்கிறது.

 ஔவையாரின் ‘விநாயகர் அகவல்’ குண்டலினி ஓகம் என்ற ஓகக்கலைக்கு விளக்க நூலாகவே கொள்ளப்படுகிறது. பத்தொன்பதாம் நூற்றாண்டில் வள்ளலார், ஓகம், மூச்சுப் பயிற்சி, உணவுப் பழக்கம் உள்ளிட்ட பல அறிவியல் நடவடிக்கைகளை பரந்துபட்ட மக்களிடம் பரப்பியிருக்கிறார்.

 தமிழர்களின் மரபான ஓகக்கலை இயற்கையோடு இயைந்து வாழ்கிற மக்கள் அறிவியலையும், உயிர்மநேயம் என்ற அறவொழுக்கத்தையும் ஒன்றிணைத்துக் கூறுகிறது.

 மனித சமத்துவத்தோடும் உயிர்ம நேயத்தோடும், அதற்கு அடிப்படையான தமிழ் மொழியோடும் அது வளர்த்த தமிழ் மரபோடும் வளர்ந்திருக்கிற தமிழர் ஓகக் கலையைத்தான் தமிழ்நாடு அரசு பள்ளிகளில் கற்பிக்க வேண்டும். இப்போது, ‘கைவல்ய தம்மா யோகா’ நிறுவனத்தோடு தமிழ்நாடு அரசு செய்திருக்கிற ஒப்பந்தம், பள்ளிச் சிறார்களை ஆரியமயமாக்குவதற்கும், அரசு செலவில் ஆர்.எசு.எசு. பயிற்சிக் களங்களை உருவாக்குவதற்கு மட்டுமே பயன்படும்.

 ஏற்கெனவே, பெரியவர்களாலும் அரசியல் கட்சிகளாலும் சாதி முகாம்களாகப் பிரிந்து வரும் பள்ளி மாணவர்களைச் சமத்துவ நோக்கில் திருப்புவதற்கு மாறாக, ஓகா – ஒழுக்கக் கல்வி என்ற பெயரால் இப்போது கொண்டு வரும் ஆரியக்கல்வி நிரந்தரமாக சாதி முகாம்களாகப் பிரித்துவிடும். தமிழ் மரபு அறுந்த ஆரிய அடிமைகளாக நிலைப்படுத்தும்.

 எனவே, தமிழ்நாடு பள்ளிக்கல்வித்துறை  ‘கைவல்ய தம்மா ஓகா ஆய்வு’ நிலையத்தோடு செய்து கொண்டிருக்கிற ஒப்பந்தத்தை உடனடியாகக் கைவிட வேண்டும். தமிழ்நாட்டுப் பள்ளிகளில் ஓகா – மூச்சுப்பயிற்சி – ஒழுக்கக் கல்விக்குத் தமிழ் மரபு வல்லுநர்களையும், சான்றோர்களையும் பயன்படுத்திக் கொள்ள வேண்டும் என்று தமிழ்த்தேசியப் பேரியக்கம் சார்பில் கேட்டுக் கொள்கிறேன்.

தலைமைச் செயலகம்,
தமிழ்த்தேசியப் பேரியக்கம்
=====================================
பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

திருவள்ளுவரின் அறிவியல் குறிப்புகள் 8 – இலக்குவனார் திருவள்ளுவன், தினச்செய்தி

அகரமுதல

இலக்குவனார் திருவள்ளுவன்      29 சூலை 2019      கருத்திற்காக..

திருவள்ளுவரின் அறிவியல் குறிப்புகள் 8

(திருவள்ளுவர், உலகப் பொதுநூலான திருக்குறளில் அறிவியல் பார்வையிலும் கருத்துகளைத் தெரிவித்துள்ளார். ஆங்காங்கே அறிவியல் குறிப்புகளையும் குறிப்பிட்டுச் சென்றுள்ளார். அறிவியல் கலைச்சொற்களையும் கையாண்டுள்ளார். அவற்றில் சிலவற்றை நாம் பார்த்து வருகிறோம்.)

 8

சினத்தைப் பொருளென்று கொண்டவன் கேடு

நிலத்தறைந்தான் கைபிழையா தற்று. (திருவள்ளுவர், திருக்குறள் )

நிலத்தைக் கையால் அடித்தால் அடித்தவன் கைதான் வேதனைக்கு உள்ளாகும். அதுபோல், சினத்தைக் கொண்டால் கொண்டவனுக்குத்தான் துன்பம் என்கிறார் திருவள்ளுவர்.

நிலைநிற்றல் என்னும் பொருளில் ‘நில்’ என்னும் சொல்லிலிருந்து நிலம் என்னும் சொல் உருவானது. திருவள்ளுவர், நிலம் என்பதை, நிலம், நிலத்து, நிலன் முதலான வெவ்வேறு சொற்களில் 25 முறை கையாண்டுள்ளார்.

நியூட்டனின் மூன்றாவது விதியானது “ஒவ்வொரு வினைக்கும் (action) அதற்கு இணையான எதிர் வினை உண்டு.”  என்பதைக் கூறுகின்றது. நிலத்தை நாம் அடிக்கும் பொழுது அதன் எதிர் வினையாக அந்நிலம் அழுந்தாமல் உறுதியாக நிற்பதால் நம் கையை எதிர்த்து அது தாக்குவதாக அமைகிறது. எனவேதான் கைக்கு வேதனை உண்டாகிறது.

திருவள்ளுவர் பொறுமைக்கும் நிலத்தைத்தான் எடுத்துக்காட்டாகக் கூறுகிறார்.

அகழ்வாரைத் தாங்கும் நிலம்போலத் தம்மை

இகழ்வார்ப் பொறுத்தல் தலை.(திருவள்ளுவர், திருக்குறள் 151)

எனத் தன்னைத் தோண்டுபவரையும் பொறுமையுடன் நிலம் தாங்கிக் கொள்வதுபோல், தம்மை இகழுபவர்களையும் பொறுத்தல் தலைசிறந்த பண்பு என்கிறார்.

நீருக்கு என்று தனித்த நிறமோ, சுவையோ, மணமோ இல்லை என்பது அறிவியல் உண்மை. இந்த உண்மையை உவமையாகக் கூறி,

நிலத்தியல்பான் நீர்திரிந்து அற்றாகும் மாந்தர்க்கு

இனத்தியல்பது ஆகும் அறிவு (திருவள்ளுவர், திருக்குறள் 452)

என உணர்த்துகிறார்.

இதற்குத் தமிழ்ப்போராளி பேராசிரியர் சி.இலக்குவனார்,

“தான் அடைந்த நிலத்தினது தன்மையால் நீரினது தன்மை வேறுபட்டு அந்நிலத்தின் தன்மையை உடையதாகும். அது போல மக்கட்குத் தாம் அடைந்த கூட்டத்தினது தன்மையைப் பொறுத்து அறிவு உண்டாகும்.” என விளக்கம் தருகிறார்.

நிலம் வளம் நிறைந்தது. என்றாலும் தானாக அதனை வெளிப்படுத்தாது. நாம் முயன்று அவ்வளங்களை வெளியே கொண்டுவந்தால்தான் பயன்படுத்த இயலும். இதனைத் திருவள்ளுவர்,

செல்லான் கிழவன் இருப்பின் நிலம்புலந்து

இல்லாளின் ஊடி விடும். (திருவள்ளுவர், திருக்குறள் 1039)     என விளக்குகிறார்.

“நில உரிமையாளன் நிலத்திற்குச்செல்லாமல் சோம்பலுடன் இருப்பானால், மனைவியிடம் பாராமுகம் காட்டினால் அவள் பிணக்கு கொள்வதுபோல் பிணங்கிப் பயன்தராது” என்கிறார்.

குறுந்தொகையில்(பா.40)  

செம்புலப் பெயல் நீர் போல

அன்புடை நெஞ்சம் தாம் கலந்தனவே

எனப் புலவர் செம்புலப்பெயனீரார் செம்மண் நிலத்தில் விழும் மழைநீர் அதன் தன்மை பெறுவதுபோல அன்பு நெஞ்சங்கள் இரண்டறக் கலந்தன  என்கிறார்.

இதுபோல் திருவள்ளுவர், நிலமும் நீரும் பொருந்திக் கலக்கும் அறிவியல் தன்மையைப்

புலத்தலின் புத்தேள்நாடு உண்டோ நிலத்தொடு

நீரியைந் தன்னார் அகத்து (திருவள்ளுவர், திருக்குறள் 1323)

என்று விளக்குகிறார்; நிலமும் நீரும் கலப்பதுபோல் தலைவியும் தலைவனும் இரண்டறக்கலந்தால், அதனிலும் இன்பம் மேலுலகத்திலும் கிடையாது என்கிறார்.

பொறுமையின் இலக்கணமான நிலமே தன்னை அறைந்தவர்க்குத் துன்பம்தருகின்றது. நாமோ நம் இனத்தை அழித்தவர்க்குத் தண்டனை வழங்க வழிவகுக்காமல் இருக்கிறோமே எனப் பார்த்து நிலம் நம்மைக் கண்டு நகைக்கிறதோ?

– இலக்குவனார் திருவள்ளுவன்

தினச்செய்தி, 29.07.19

புத்தக வாசிப்பினால் வாழ்வில் உயரங்களை அடைய முடியும் – கவிஞர் மு.முருகேசு

அகரமுதல

இலக்குவனார் திருவள்ளுவன்      24 சூலை 2019      கருத்திற்காக..

புத்தக வாசிப்பினால் வாழ்வில் உயரங்களை அடைய முடியும் – கவிஞர் மு.முருகேசு

வந்தவாசி அரசுக் கிளை நூலகத்தின் நூலக வாசகர் வட்டத்தின்
சார்பில் நடைபெற்ற ’வாசிப்பு இயக்கம் – 2022’ எனும் விழிப்புணர்வுப் பேரணி ஆனி 30 / சூலை 15 அன்று வந்தவாசியில் நடைபெற்றது.

தமிழக அரசின் பொது நூலகத்துறையும் எம்.எசு.சுவாமிநாதன் ஆராய்ச்சி மையமும் இணைந்து தேசிய அளவில் ‘வாசிப்பு இயக்கம் – 2022’ எனும் இயக்கத்தைத் தொடங்கியுள்ளன. அந்த இயக்கத்தின் செயல்பாட்டை விளக்கும் வாசிப்பு விழிப்புணர்வு

பேரணி வந்தவாசி அரசுக் கிளை நூலகத்தின் நூலக வாசகர் வட்டத்தின் சார்பில் நடைபெற்றது.

இந்நிகழ்வில் பங்கேற்ற அனைவரையும் நல்நூலகர் பூ.சண்முகம் வரவேற்றார். 

அரசு பெண்கள் மேல்நிலைப் பள்ளித் தலைமை ஆசிரியை பொ.பத்மாவதி, கிளை நூலகர் க.மோகன் ஆகியோர் முன்னிலை வகித்தனர். 

இந்நிகழ்விற்குச் சிறப்பு விருந்தினராக பங்கேற்ற வந்தவாசி காவல் துறை துணைக் கண்காணிப்பாளர் பி.தங்கராமன், வாசிப்பு இயக்க விழிப்புணர்வுப் பேரணியைக் கொடியசைத்துத் தொடங்கி வைத்தார். 

இப்பேரணிக்குத் தலைமையேற்ற நூலக வாசகர் வட்டத் தலைவர் கவிஞர் மு.முருகேசு பேசும்போது, “கல்விக்கண் திறந்த கருமவீரர் காமராசரின் 117-ஆவது பிறந்த நாளான இன்று, வாசிப்பு இயக்கத்திற்கான விழிப்புணர்வுப் பேரணியைத் தொடங்குவது

மிகவும் பொருத்தமான நாளாகும். பாடப் புத்தகங்களைப் படிப்பதிலேயே இன்றைய தலைமுறைக் குழந்தைகள் கவனம் செலுத்துகிறார்கள். பெற்றோர்களும் குழந்தைகள் நன்றாகப் படித்து அதிக மதிப்பென் பெற வேண்டும் என்பதிலேயே

குறியாக இருக்கிறார்கள். பாடப் புத்தகங்களைக் கடந்து மற்ற நூல்களையும் குழந்தைகள் படிக்க வேண்டும். இதற்குப் பெற்றோர்கள் தூண்டுகோலாக இருக்க

வேண்டும். நூலகங்களுக்கு வரும் பெற்றோர்கள், குழந்தைகளையும் அழைத்து வர வேண்டும். நாம் எவ்வளவு பொது அறிவு சார்ந்த புத்தகங்களை வாசிக்கின்றோமோ, 

அந்த அளவிற்கு நன் வாழ்வின் உயரங்களை நம்மால் அடைய முடியும்” என்று குறிப்பிட்டார்.

பேரணியில் ஆசிரியைகள் எசு.கலைவாணி, பி.சுசாதா, எசு.சந்தானலட்சுமி, சமூக ஆர்வலர் அறிவொளி வெங்கடேசன் முதலானோர் கலந்து கொண்டனர். இதில்,

வந்தவாசி அரசு பெண்கள் மேல்நிலைப்பள்ளியைச் சேர்ந்த 100க்கும் மேற்பட்ட மாணவிகள் பங்கேற்றனர். இப்பேரணி அரசுக் கிளை நூலகத்திலிருந்து புறப்பட்டுத், தேரடி, காந்தி சாலை, பழைய பேருந்து நிலையம் சென்று காமராசர் சிலை, கடைவீதி 

வழியாக அரசு பெண்கள் மேல்நிலைப்பள்ளியின் முன் நிறைவடைந்தது.
நிறைவாக ச.தமீம் நன்றி கூறினார்.

கருத்துக் கதிர்கள் 14-15: இலக்குவனார் திருவள்ளுவன் [14. தண்ணீர்ப் பஞ்சமா? அப்படி என்றால் என்ன? 15. அயற்பெயர்ப் படங்களை ஓட்டிய மக்கள்]

அகரமுதல

இலக்குவனார் திருவள்ளுவன்      20 சூன் 2019      கருத்திற்காக.

கருத்துக் கதிர்கள் 14-15

[14. தண்ணீர்ப் பஞ்சமா? அப்படி என்றால் என்ன? 15. அயற்பெயர்ப் படங்களை ஓட்டிய மக்கள்]

14. தண்ணீர்ப் பஞ்சமா? அப்படி என்றால் என்ன?

 “தமிழ்நாட்டில் தண்ணீர்ப்பஞ்சம் ஏற்பட்டுள்ளது போன்ற மாயையை ஏற்படுத்த வேண்டா” என மாண்புமிகு தமிழக முதல்வர் எடப்பாடி பழனிசாமிவேண்டியுள்ளார். அவர் சொல்வது உணமைதான். அதுபோல் தண்ணீர்ப்பஞ்சம் என்பது இல்லை என மாண்புமிகு அமைச்சர் வேலுமணி பேசியுள்ளார். ஒரு முறை போதிய அளவு தண்ணீர் இருப்பதாகவும் மின்தடையால் உரிய நேரத்தில் கொண்டு சேர்க்க இயலவில்லை என்றும் பேசியுள்ளார். இதன் மூலம்  மின்தடை இருப்பதை ஒப்புக் கொண்ட துணிவைப் பாராட்ட வேண்டும்.

அஃது இருக்கட்டும். தண்ணீர்ச்சிக்கல்பற்றிப் பார்ப்போம். சென்னை முதலான நகரங்களில் உள்ள பற்றாக்குறையைச் சிக்கல் என எளிமையாகச் சொல்லக் கூடாது. எனவேதான் முதல்வர் அப்படி கூறியுள்ளாரோ என்று தெரியவில்லை. மேலும் சில இதழ்கள் சென்னையில் தண்ணீர்ப்பஞ்சம் என ஒரிசாவில் உள்ள வறட்சியைக் காட்டுகின்றனர்.  இதுபோல் வேறு சில மாநிலத் தண்ணீர்ப் பஞ்சத்தைத் தமிழ்நாட்டுப் பஞ்சத்திற்குப் படமாகச் சில இதழ்கள் வெளியிட்டுள்ளன. இதனால் தண்ணீர்ப் பஞ்ச மாயையைத்தான் உருவாக்குகின்றனர். உண்மை இல்லை என முதல்வர் எண்ணுகிறாரோ தெரியவில்லை.

எப்படி இருந்தாலும் தண்ணீருக்காகப் படும் இடர்களைத் தண்ணீர்ப்பஞ்சம் என்று சொல்ல முடியாது!

எடுத்துக்காட்டிற்காகச் சென்னையைப் பார்ப்போம். குடங்களை ஆண்கள் தோள்களிலும் பெண்கள் இடுப்புகளிலும் சுமந்து கொண்டும் மிதிவண்டிகளிலும் தங்களிடம் உள்ள பிற வண்டிகளிலும் ஏறற்றிக் கொண்டும் அலைவதைப் பார்க்க முடிகிறது. எப்படியோ எங்கிருந்தோ சில குடங்களிலாவது தண்ணீர் பிடித்துக் கொண்டு அவர்கள் திரும்புகின்றனர். அப்படிஎன்றால் இதை எப்படிப் பஞ்சம் என்று சொல்ல முடியும்! தவறுதான் எனச் சொல்லலாம் அல்லவா?!

மயிலராப்பூர் கபாலிசுவரர் கோயில் குளம் போல் பல குளங்களிலும் தண்ணீரே இல்லை. இந்தக் குளங்களின் நீரை யார் குடிக்கப் பயன்படுத்துகின்றனர். எனவே, தண்ணீர்ப் பஞ்சம் என்று சொல்ல முடியாது அல்லவா?!

நீர்நிலைகளில் தண்ணீர் இல்லை என்பது உண்மைதான். எடுத்துக்காட்டாக நாங்கள் புழுதிவாக்கம் (மடிப்பாக்கம்) ஓட்டேரிச்சாலையில் குடியுள்ளோம். தெரு முடியும் இடம்தான் ஓட்டேரி. அங்கே தண்ணீர் இல்லைதான். மடிப்பாக்கத்தில் உள்ள கார்த்திகேயபுரம் ஏரி மிகப் பெரிய நீர்நிலை. ஏரிக்கரைப் பாதையில் கடற்கரைபோல் மக்கள் நடை பயிலவும் காற்று வாங்க அமரவும் செய்வர். அங்கும் தண்ணீர் இருந்ததற்கான சுவடே தெரியவில்லை. உண்மைதான். அதனால் மக்கள் செத்தா போனார்கள்?! வேறு எங்கோ அடிகுழாயைக் கண்டுபிடித்துத் தண்ணீர் பிடித்து வரவில்லையா? அப்புறம் எப்படிப் பஞ்சம் என்று சொல்வது!

எங்கள் அடுக்ககத்தின் கிழக்கு வாயிலில் மாநாகராட்சிக் குழாயில் பிற பயன்பாட்டிற்கான தண்ணீர் வரும். அதில் சாக்கடை தண்ணீர் கலந்து வருவதால் முறையிட்டோம். உடன் நிறுத்தி நற்பணி புரிந்தனர் மாநகராட்சியினர். (இன்று மறுபடியும் நல்ல தண்ணீர் விடுவதாகக் கூறியுள்ளனர்.) சாக்கடை நீரையாவது மாநாகராட்சி தந்துள்ள பொழுது எப்படிப் பஞ்சம் என்று சொல்வது!

 எங்கள் தெருப் பகுதியில் தொட்டியில் மாநகராட்சிக் குடிநீர் ஊர்தியில் இருந்து குடிநீரை நிரப்பிச் செல்வர். இப்பொழுது அது கனவுபோல் ஆகிவிட்டது.  எல்லா இடங்களிலும் அதே நிலைதான்! அதற்காக மக்கள்மடிந்தா போயினர்?!

கடந்த ஆண்டில் தண்ணீர் தனியாரிடம் இருந்து வாங்கும் பொழுது 1000 கன  உரி(Litre) தண்ணீரின் கட்டணம் 300 உரூபாய். இப்பொழுது 2 நாளில் தருகிறோம்; 3 நாளில் தருகிறோம் எனச் சொல்லி  எப்படியும் ஒரு வாரத்தில் தந்து விடுகின்றனர். கட்டணம்தான் கேட்கும் பொழுது 800 உரூபா எனச் சொல்லிக் கொடுக்கும் பொழுது 1200 உரூபாய் வாங்கி விடுகின்றனர். எப்படியோ நான்கு மடங்கு கட்டணம் செலுத்தினாலும் 1 வாரத்தில் தண்ணீர் வந்து விடுகிறது அல்லவா? அப்புறம் எப்படிப் பஞ்சம் என்று சொல்வது?!  சென்னை வாசிகளுக்குத் தண்ணீர்ப் பஞ்சம் என்றால் என்னவென்றே தெரியாது. இதுபோல்தான் பிற மாவட்டங்களிலும் நிலைமை.  

பல விடுதிகள் மூடப்பட்டு வருதல், பள்ளிகளில் நேரங்கள் மாற்றம், உணவகங்களில் உணவுக் குறைப்பு சிக்கல் போன்ற பிறவும் தண்ணீர்ப் பஞ்சத்தால் என்று யார் சொன்னது? தொடர்ந்து உழைத்தவர்கள், ஓய்வு வேண்டி இத்தகைய நடவடிக்கைகளை எடுக்கின்றனர். வேறு ஒன்றுமில்லை!

எனவே, அரசை யாரும் குறை கூற வேண்டா!

 – இலக்குவனார் திருவள்ளுவன்

 15. அயற்பெயர்ப் படங்களை ஓட்டிய மக்கள்

தமிழ்ப்பெயர் சூட்டும் படங்களுக்கு அரசு நிதியுதவி செய்தபொழுது பிறமொழிப்பெயர்களைக் கூடத் தமிழாக மாற்றிப்பணம் வாங்கிய திரைத்துறையினர்,  பணத்திற்காக முதலில் சூட்டிய பெயரை அடைப்பிற்குள் இட்டுவிட்டுத் தமிழ்ப்பெயர் சூட்டியே விளம்பரப்படுத்திய திரைத்துறையினர், இப்பொழுது பிற மொழிப்பெயர்களைச் சூட்டுவதில் சிறிதும் வெட்கம் கொள்ள வில்லை. எனினும் இந்தப் போக்கை மக்கள் எண்ணினால் மாற்ற முடியும். அதற்கான சூழல் வந்துள்ளது. சிவ.கார்த்திகேயன் வெற்றிப்பட நாயகனாகவும் வெற்றிப்படஆக்குநராகவும் புகழ்பெற்று விளங்குகிறார். அவர் நட்சத்திர நாயகி நயன்தாராவுடன் நடித்த படத்திற்கு ஆங்கிலப் பெயரைச் (Mr.Local ) சூட்டினார். மக்களுக்கு அந்தப் படம் மொழிமாற்றுப் படம் போல் தோன்றியது. எனவே, அவரே தோல்விப்படம் என ஒப்புக்கொள்ளும் வகையில் மக்கள் அதனைத் திரைஅரங்குகளில் இருந்து ஓட வைத்தனர்.

அதுபோல், சூரியா நடித்த படத்தின் பெயர் ஆங்கிலத் தலைப்பெழுத்துகளில் (NGK) சூட்டப்பட்டது. இந்தப் படத்தையும் மக்கள் விரட்டி அடித்துத் தலையில் துண்டுபோட்டுக் கொள்ள வைத்து விட்டனர். இந்த நிலை தொடர்ந்தால்  அயல்மொழிப்பெயர் தாங்கிய படங்கள் மண்ணைக் கெளவும். இதனால் அவர்களுக்கு இழப்பு வருவதுடன் திரைத்துறையில் ஈடுபட்டுள்ள ஆயிரக்கணக்கானவர்களின் குடும்பத்தினரும் துன்புறுவர்.  இனிமேலாவது திரைத் துறையினர் நல்ல தமிழ்ப்பெயர்களையே சூட்ட வேண்டுகிறோம்.

இலக்குவனார் திருவள்ளுவன்

பூம்புகார் அவலநிலை – க.தமிழமல்லன்

அகரமுதல

இலக்குவனார் திருவள்ளுவன்      14 சூன் 2019      கருத்திற்காக..

பூம்புகார் அவலநிலை

1975இல் தமிழக முதல்வராக இருந்த இலக்கியப்பேராசான் கலைஞர் தம் கற்பனை வளத்தால் சிலப்பதிகாரம் என்னும் ஒப்பற்ற இலக்கியத்திற்கு உயர்வாழ்வு அளித்தார். சிலப்பதிகாரக் கதைக்காட்சிகளை நுட்பம் மிக்க சிற்பப் பலகைகளாக உருவாக்கினார். சிலப்பதிகாரத்தில் சொல்லப்பட்ட எழுநிலைமாடத்தைப் பூம்புகாரில்  கட்டி அதில் மக்கள் பார்த்து மகிழுமாறு பதிக்கச்செய்தார். அவற்றை ஒருமுறை பார்த்தாலே சிலப்பதிகாரத்தைப்  படித்த எண்ணம் நமக்குத் தோன்றும்.மிக அழகான கண்ணகி, மாதவி  சிலைகளையும் அங்கு நிறுவச் செய்தார். மக்கள் அவர்களை நேரில் பார்க்கும் தோற்றத்தையே அச்சிலைகள் உண்டாக்கும்.

ஏறத்தாழ 34 குறுக்கம் (ஏக்கர்) பரப்பளவில் அந்தச் சிலப்பதிகாரக் கலைக்கூடம் அமைக்கப் பட்டது. அங்குச் செல்லும் சாலையின் தொடக்கத்திலிருந்தே கரிகாலன் தோரண வாயில், இளங்கோஅடிகள் தோரணவாயில் போன்ற அழகான வாயில்களை அமைத்தது அன்றைய கலைஞர் அரசு. அங்கே கலையரங்கம் பாவைமன்றம்,நெடுங்கல் மன்றம் போன்ற மன்றங் களை அமைத்து உண்மையான பழங்காலப் பூம்புகாரைப் பார்ப்பது போன்ற தோற்றத்தை ஏற்படுத்தியது அன்றைய அரசு. எந்த நாட்டிலும் ஓர் இலக்கியத்திற்கு இவ்வளவு உயர்மதிப்பு அளிக்கப்பட்டதாகச் சான்று இல்லை.

மக்கள் மனங்கவரும் சுற்றுலா, பொழுதுபோக்கு நல்லிடமாக அதைக் கலைஞர் உருவாக்கி யிருந்தார்.

இன்று அதன் நிலை மிகவும் அருவருப்பாக ஆகிவிட்டது.

1.எழுநிலை மாடத்தில் இருந்த மின்இணைப்பு உடைக்கப்பட்டுக் கிடக்கிறது. விளக்கு எரிய வாய்ப்பில்லை. இருட்டாக இருப்பதால் சரியாகப் பார்க்க இயலவில்லை.

 2“.தொடாமல் பார்க்கவும்” என்னும் அறிவிப்போடு இரண்டு பேழைகள் இருக்கின்றன. அவற்றில் பழங்கால இசைக்கருவிகள் வைக்கப்பட்டுள்ளன. ஆனால் அதில் உள்ள சில பொருள்கள் உடைக்கப்பட்டுள்ளன.அந்த நிலைப்பேழைகள் திறந்தே கிடக்கின்றன.

3.அங்கே அழகிய வேலைப்பாடமைந்த கண்ணகிசிலையும் மாதவிசிலையும்  உள்ளே திறந்த அரங்கில் கண்ணாடிக் கதவால் பூட்டப்பட்டுக் கிடக்கின்றன. அச்சிலைகள் இருக்குமிடத்தில் புதர் மண்டிக்கிடக்கிறது.

4.வேட்டியை மடித்துக்கட்டிக் கொண்டு சட்டைபோடாமல் வாயிலுக்கு வெளியே கட்டைமேல் வழிப்போக்கர் போல அமர்ந்திருந்த முதியவர் ஒருவர் ஐந்து உருவா கொடுத்துவாங்கிய நுழைவுச் சீட்டை வாங்கிக் கொண்டு உள்ளே அனுப்புகிறார். அவரிடம் அவலநிலை பற்றிக் கேட்டது தவறாகி விட்டது. என்னை ஒன்றும் செய்யமுடியாது யாரிடம் வேண்டுமானாலும் சொல்….என்று சொல்கிறார்.

5.திறப்புவிழாக் கல்வெட்டு ஒன்றும் கண்ணில் படவில்லை.

6.ஆனால் சற்றுத் தொலைவில் கடலையொட்டி அமைந்துள்ள நெடுங்கல் மன்றத்துக்கு எதிரில் ஒரு கல்வெட்டு சிதைந்து போய்க்கிடக்கிறது. அதில் திறந்த ஆண்டு அதைத் திறந்தவர் பெயர் கள் இருக்கின்றன. மன்றத்தைப் பார்ப்பவர் முயன்றால் தான் தேடிப்பார்க்க முடியும்.

அந்த நெடுங்கல் மன்றம் மிகஅழகானது. அதைச் சுற்றிலும் பெரிய வட்டமான தரை அமைக்கப் பட்டுள்ளது. ஆனால் அத்தரை இப்போது மண் தரையாக மாறிவிட்டது.

7.நெடுங்கல் மன்றத்தின் துாண்கள் உடைந்துபோய்க் கிடக்கின்றன. சுற்றுலாப்பயணிகளின் மண்டைமேல் அது விழுவதற்கும் வாய்ப்பிருக்கிறது. அப்படி விழுந்தால் ஒருவேளை விடிவுபிறக்குமோ என்னவோ?  நாம் பார்க்கும் போது காதலன் காதலி ஆகியோர்  திகைப்புடன் நின்று நெளிந்தனர்.நெடுங்கல்மன்றத்தின் எதிர்ப்பக்கத்தில் ஒருபெரிய கட்டடம் இருக்கிறது. பாழடைந்து  இடிந்துபோய்க் கிடக்கிறது. அங்குச் சில அறைகள் இருக்கின்றன. மேலே போக மாடிப்படி அமைத்திருக்கிறார்கள். எல்லாம் பாழடைந்த கிணறு போலக் கிடக்கின்றன.

8.அங்கு ஐந்தாறு சிறுகட்டடங்கள் தோப்புக்குள் இருக்கின்றன. அவை முத்துச்சிப்பி போல அமைக்கப்பட்டிருந்தன. ஆனால் அவை அனைத்தும் உடைந்து போய் காரை பெயர்ந்த நிலை யில் அருகில் போக முடியாத அளவுக்கு மோசமாக இருக்கின்றன.

9.கலைக்கூடத்தின் எதிரில் இருப்பது பாவை மன்றம். அது ஒரு தோப்பு. அங்கே சுற்றுலாக் குழந்தைகள் விளையாடச் சறுக்குமரம் போன்றவை இருக்கின்றன. அங்குள்ள பாவை மன்றம் உயரமாகவும் வட்ட வடிவிலும் மிக அழகாக அமைக்கப்பட்டிருந்தது. எட்டு அழகிய பெண் களின் சிலைகள் சுவர்களில் புடைப்புச் சிற்பங்களாகப் பெரிதாக அமைக்கப்பட்டுள்ளன.. திருக்குறள் காமத்துப்பாலின் சில குறட்பாக்களுக்கு விளக்கமாக அச்சிலைகள் அமைந்துள்ளன. ஆனால் அவை குப்பைத் தொட்டிக்குள் இருப்பதுபோல் இப்போது காட்சியளிக்கின்றன. பெருக்கித் துப்புரவு செய்து பலஆண்டுகள் ஆகியிருக்கும் போலும். பக்கத்திலும் சுற்றிலும் ஒரே குப்பைகள். உணவை உண்டு மக்கள் எறிந்த பாக்குத் தட்டுகளும் தாள்தட்டுகளும் குப்பையாய்க் குவிந்துள்ளன.அவற்றைப் பார்க்கும் போது மனம் குமுறுகிறது. இலக்கிய ஆர்வலர்களுக்கும் பொதுமக்களுக்கும் செய்யும் ஏமாற்றாக இந்நிலையை உணரவேண்டும். கும்பகோணம், காரைக்கால், தாராசுரம் போன்ற சிறப்பான சுற்றுலா இடங்களைப் பார்ப்பவர்கள் ஆர்வத்தோடு இங்கு வந்து ஏமாற்றத்தைப் பார்த்துவிட்டுப் போகிறார்கள்.

கலைக்கூடத்தைப் பார்ப்பதற்கு நுழைவுக் கட்டணம்வேறு வாங்குகிறார்கள்.  சீட்டில் தமிழைக் காணவில்லை ஆங்கிலத்தில் மட்டுமே அந்த நுழைவுச்சீட்டு இருக்கிறது. அதில்  மீண்டும் வருக என்று அச்சிட்டு வைத்திருக்கிறார்கள். பாவைமன்ற முகப்பில் சீட்டு கொடுக்கும் ஒரே ஒர் ஆள் தன் நண்பருடன் பேசிக்கொண்டிருந்தார். கேட்டால் சுற்றுலா அலுவலகத்தில் கேட்கச் சொன்னார்.

அவர் சொன்னபடி அங்கே சென்றோம். அங்கே மின்சாரம் இருந்தது. மூன்றுபேர் அங்கே இருந்தனர். சுற்றுலா அலுவலர் மாதவன் நம்மைப் பார்த்ததும் விரைந்து சட்டையைப் போட்டுக்கொண்டார். அவரிடம் பூம்புகார் கலைக்கூடத்தைப் பற்றிய விளக்கப் புத்தகம் கேட்டோம் தயங்கியபடியே கொடுப்பதாகச் சொன்ன அவர் கடைசிவரை கொடுக்க வில்லை. சிரிப்பைத்தான் கொடுத்தார்.

“ஆட்கள் போடவில்லைங்க, துப்புரவு செய்தாலும் மக்கள் ஒத்துழைப்பு இல்லைங்க ” என்று மீண்டும் மீண்டும் சொல்லிக்கொண்டிருந்தார். மின்சாரம் இருக்குமே என்றெல்லாம் “உண்மை ”யைச் சொல்லிக்கொண்டிருந்தார். கண்ணகி மாதவி சிலைக்கருகில் பாம்பு இருப்பதாகச் சொல்கிறார்கள் அதனால் பூட்டிவைத்திருக்கிறோம் என்று தான் பார்க்காத பாம்பின்மேல் குற்றம் சொன்னார். 34ஏக்கரில் உள்ள இப்பரப்பைப் பராமரித்தல் இயலவில்லை என்றார். “கல்லுாரிமாணவர்களை அழைத்துவந்து நாங்கள் துப்புரவு செய்யலாமா?” என்று கேட்ட தற்குச் சரி என்று சொன்னார்.

பூம்புகாரை நன்றாக வைத்திருந்தால் நல்ல வருவாயும் கிடைக்கும். பொதுமக்களுக்கு நல்ல இடத்துக்கு வந்து போன மன நிறைவும் இருக்கும். பொறுப்புள்ள முதல்வரும் அமைச்சரும் அதிகாரிகளும் இதைக் கவனிப்பார்களா? பூம்புகார் மயிலாடுதுறை வட்டங்களில் உள்ள பொதுநல ஆர்வலர்கள் கவனித்து நடவடிக்கை எடுத்தால் சிறப்பாக இருக்கும். பொது மக்க ளிடம் பேசும் போது, “கலைஞரிடம் உள்ள வெறுப்பை இன்னும் மாற்றிக்கொள்ளாமல் இருக்கிறார்கள். இருள் விலக ஒருநாள் வரவேண்டும்” என்று கூறினர்.

பிரித்தானியாவில் பூபதித் தாயின் 31ஆம் ஆண்டு நினைவு நாளும் நாட்டுப் பற்றாளர் நிகழ்வும்

அகரமுதல

இலக்குவனார் திருவள்ளுவன்      18 ஏப்பிரல் 2019      கருத்திற்காக..

பிரித்தானியாவில் பூபதித் தாயின் 31ஆம் ஆண்டு நினைவு நாளும் நாட்டுப் பற்றாளர் நிகழ்வும்

சித்திரை 7, 2050 சனி 20.04.2019 மாலை 6.00

இலண்டன்

சித்திரை 8, 2050 ஞாயிறு 21.04.2019 மாலை 5.00

இலெசிசுடர்

தமிழர் ஒருங்கிணைப்புக் குழு, பிரித்தானியா