prohibition லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
prohibition லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வியாழன், 14 ஏப்ரல், 2011

Thirumaa dreams about prohibition : பூரண மதுவிலக்கை நடைமுறைப்படுத்த கருணாநிதியின் முதல் கையெழுத்து: திருமாவளவன் கோரிக்கை

நல்ல வேண்டுகோள். ஆனால் ஏற்கும் நிலையில் இருந்தால் முதல்வர் அதனை இப்பொழுதே செய்திருக்கலாம் அல்லது அறிவித்து இருக்கலாம். தன்னால் செய்யயப்பட்டப் பாவச் செயலைப் போக்கியதாகவும் அமைந்திருக்கும். இலவசங்களும் வேண்டா ! மதுவும் வேண்டா என இயக்கம் தேவை!
அன்புடன் இலக்குவனார் திருவள்ளுவன் 
/ தமிழே விழி! தமிழா விழி! /
எழுத்தைக் காப்போம்!  மொழியைக் காப்போம்! இனத்தைக் காப்போம்! 




பூரண மதுவிலக்கை அமல்படுத்த கருணாநிதியின் முதல் கையெழுத்து: திருமாவளவன் கோரிக்கை


கடலூர், ஏப். 13: கருணாநிதி மீண்டும் முதல்வராக வருவார். அப்போது அவரது முதல் கையெழுத்து, தமிழகத்தில் பூரண மதுவிலக்கை அமல்படுத்துவதற்கான கையெழுத்தாக இருக்க வேண்டும் என்று விடுதலைச் சிறுத்தைகள் கட்சித் தலைவர் திருமாவளன் கோரிக்கை விடுத்தார். திட்டக்குடியில் அவர் செய்தியாளர்களிடம் புதன்கிழமை கூறியது: கருணாநிதி மீண்டும் முதல்வர் ஆவார். ஏற்கெனவே நாங்கள் அறிவித்தபடி, தி.மு.க.வுக்கு நிபந்தனையற்ற ஆதரவு அளிப்போம். கூட்டணி ஆட்சிக்கு வற்புறுத்தமாட்டோம். பா.ம.க.வும், விடுதலைச் சிறுத்தைகளும் இணைந்து பூரண மதுவிலக்குக்காக சட்டமன்றத்தில் குரல் கொடுப்போம். தாழ்த்தப்பட்ட மக்கள் ஒரே வீட்டில், பல குடும்பங்கள் வசிக்கும் அவல நிலை இருந்து வருகிறது. இந்த நிலையைப் போக்க அனைவருக்கும் வீட்டுமனை, அனைவருக்கும் கான்கிரீட் வீடுகள் வழங்க வரும் 5 ஆண்டுகளில் முதல்வர் திட்டமிட்டு செயல்படுத்த வேண்டும். தேர்தலில் ஜெயலலிதா பிரசாரம் செய்ய, திட்டங்கள், சாதனைகள் எதுவும் இல்லாததால் கருணாநிதியின் குடும்பத்தினர் மீது வசைமாரி பொழிந்து இருக்கிறார். அவரது தனிநபர் விமர்சனம், மக்கள் முகம் சுளிக்கும் அளவுக்கு இருந்தது. அவரது இந்த அணுகுமுறை மக்களிடம் கருணாநிதி மீது அனுதாபத்தை ஏற்படுத்தி இருக்கிறது. விடுதலைச் சிறுத்தைகளுக்கும், பாட்டாளி மக்கள் கட்சிக்கும் இடையிலான உறவு தேர்தலுக்காக மட்டுமன்றி மேலும் தொடர்ந்து வலுப்படும். எதிர்பார்த்ததைவிட இரு கட்சித் தொண்டர்களும் தேர்தலில் இணக்கமாகச் செயல்பட்டனர்.சிறுபான்மையினர் நலன்களை பாதுகாக்க பாடுபடுவோம். அ.தி.மு.க.வினர் வன்முறையை தூண்டிவிட்டு தேர்தலை நிறுத்த சதி செய்தனர். ஆனால் அது முடியவில்லை என்றார் திருமாவளவன். பேட்டியின்போது விடுதலைச் சிறுத்தைகள் கட்சி பொதுச் செயலாளர் சிந்தனைச் செல்வன், கடலூர் நகராட்சி துணைத் தலைவர் தாமரைச் செல்வன் உள்ளிட்டோர் உடனிருந்தனர்.

ஞாயிறு, 16 ஜனவரி, 2011

Five revolutions are needed: தமிழகத்தில் ஐந்து புரட்சிகள் தேவை:கோ.க.. மணி

சரியான கருத்து. ஆனால் கல்விப்புரட்சி என்பது தமிழ்வழிக்கல்வி அமையவேண்டும் என்பதாக இருக்க வேண்டும்.மது ஒழிப்பு குறித்தும் கலை பண்பாட்டுப்புரட்சி குறித்தும் பா.ம.க. தொடர்ந்து வலியுறுத்தி வருகிறது. சாதிக்கொடியை எப்பொழுதும் ஏந்தி இருப்பதால்தான் புரட்சிக் குரல்கள் எடுபட வில்லை. புரட்சி ஏற்படும் வரையாவது  சாதி மறுப்புத் தமிழ், தமிழர் கட்சியாக நடந்து கொண்டால் நாடு நலம் பெறும். 
அன்புடன் இலக்குவனார் திருவள்ளுவன்


தமிழகத்தில் ஐந்து புரட்சிகள் தேவை: ஜி.கே. மணி

சென்னை, ஜன. 14: தமிழகம் வளம் பெற ஐந்து விதமான புரட்சிகள் தேவை என்று பா.ம.க. தலைவர் ஜி.கே. மணி சட்டப்பேரவையில் வியாழக்கிழமை வலியுறுத்தினார்.
ஆளுநர் உரைக்கு நன்றி தெரிவிக்கும் தீர்மானத்தின் மீது அவர் பேசியது: தமிழகத்தில் வெள்ள நிவாரணத்தை ஆய்வு செய்ய மத்திய அரசு தாமதமாகத்தான் குழுவை அனுப்பியது. அந்தக் குழு தந்த அறிக்கையின் பேரில் இன்னும் தமிழகத்துக்கு மத்திய அரசு நிதியை அறிவிக்கவில்லை. தமிழகம் கேட்டுள்ள வெள்ள நிவாரண நிதியை மத்திய அரசு முழுமையாக வழங்க வேண்டும். மருத்துவக் கல்லூரி மாணவர் சேர்க்கைக்கு நுழைவுத் தேர்வு என்ற நடைமுறை வந்தால், கிராமப்புற ஏழை மாணவர்கள் மருத்துவக் கல்லூரிகளில் நுழைய முடியாத நிலை ஏற்படும். எனவே அதைத் தடுக்க அரசியல் கட்சிகள் ஒன்றுபட்டு போராட வேண்டும். அதைத் தடுப்பதற்கு, இந்தி எதிர்ப்பு போராட்டம் போன்ற தீவிர போராட்டம் நடத்த தயாராக வேண்டும். விலைவாசி உயர்வைத் தடுக்க மாநில அரசு நடவடிக்கை எடுத்தாலும், மத்திய அரசும் இதற்கு உரிய நடவடிக்கை எடுக்குமாறு தமிழக அரசு வற்புறுத்த வேண்டும். இந்தியாவுக்கு கொண்டுவரப்பட்ட வெங்காயம் பாகிஸ்தான் எல்லையில் இருந்து திருப்பி அனுப்பப்படும் சூழ்நிலை உருவாகிவிட்டது. இந்த நிலை நீடித்தால் விலைவாசியைக் கட்டுப்படுத்துவது எட்டாக்கனியாகிவிடும். விலைவாசியைக் குறைக்க மத்திய, மாநில அரசுகள் போர்க்கால அடிப்படையில் நடவடிக்கை எடுக்க வேண்டும். கட்டுமானப் பொருள்கள் விலை உயர்வால், கட்டடத் தொழிலாளர்கள், பொதுமக்கள் பாதிக்கப்பட்டுள்ளனர். கட்டுமானப் பொருள் விலைகளைக் குறைக்க நடவடிக்கை எடுக்க வேண்டும். தமிழகத்தில் இப்போது ஐந்து முக்கிய புரட்சிகள் தேவைப்படுகின்றன. ஏழை, பணக்காரர் என எல்லோருக்கும் கட்டணமில்லா கட்டாயக் கல்வி தரும் கல்விப் புரட்சி முதலாவது தேவையாகும். மதுப் பழக்கம்தான் எல்லா குற்றங்களுக்கும் தாயைப் போன்றது. எனவே மது ஒழிப்பு புரட்சி தேவைப்படுகிறது. உணவுப் பற்றாக்குறை ஏற்படாமல் தடுக்க வேளாண் புரட்சி தேவையாகிறது. பாசனத்துக்கு இப்போதுள்ளதைவிட கூடுதல் நிதி ஒதுக்க வேண்டும். அதன் மூலம் பாசனப் புரட்சி ஏற்பட வேண்டும். நாகரிகம், கலாசாரம், பண்பாடு காப்பதற்கு கலை, பண்பாடு புரட்சி ஏற்பட வேண்டும். இந்த ஐவகைப் புரட்சிகள் ஏற்பட்டால் தமிழகம் செழிக்கும். காவிரிப் பிரச்னை: காவிரி, முல்லைப் பெரியாறு, பாலாறு பிரச்னைகளைத் தீர்க்க இவற்றை மத்திய அரசு தனது கட்டுப்பாட்டில் எடுத்துக் கொள்ள வேண்டும். பக்கத்து நாடுகளுடன் நதி நீர்ப் பிரச்னைகளைத் தீர்க்க முடிகிறது. ஆனால் பக்கத்து மாநிலங்களுக்கு இடையிலான பிரச்னையை மத்திய அரசு தீர்க்கவில்லை. மத்தியப் பிரதேசம், ராஜஸ்தான், பஞ்சாப், ஹரியாணா மாநிலங்களுக்கு இடையிலான பக்ராநங்கல் பிரச்னையைத் தீர்க்க மத்திய அரசு நீர் மேலாண்மை ஆணையத்தை உருவாக்கியது. ஆனால் காவிரிக்கு அதுபோன்ற ஏற்பாடு இல்லை. கிருஷ்ணராஜ சாகர் அணை நிர்வாகத்தை மத்திய அரசு முழுமையாக தன் கட்டுப்பாட்டில் எடுத்துக் கொண்டு, காவிரி மேலாண்மை ஆணையத்தை உருவாக்கி பிரச்னையைத் தீர்க்க வேண்டும். தலித் கிறிஸ்தவர்களுக்கு இட ஒதுக்கீடு தர நடவடிக்கை எடுக்கப்பட வேண்டும். அவர்கள் பிறப்பால் தலித்துகள். வழிபடும் முறைதான் மாறியுள்ளது. எனவே இடஒதுக்கீடு தரப்பட வேண்டும். தென் மாவட்டங்களுக்குச் செல்லும் ரயில்களுக்கான ரயில் நிலையமாக தாம்பரத்தை மாற்றினால் சென்னையில் உள்ள மக்கள் பாதிக்கப்படுவர். எனவே ராயபுரத்தை மூன்றாவது முனையமாக மாற்றுவது பயனுள்ளதாக இருக்கும். அனைத்துத் துறைகளிலும் 15 ஆண்டுகள் வரை தாற்காலிக அடிப்படையில் வேலை பார்ப்பவர்களை பணி நிரந்தரம் செய்ய நடவடிக்கை எடுக்க வேண்டும். மேட்டூரில் அரசு பொறியியல் கல்லூரி தொடங்கப்படும் என ஏற்கெனவே அளித்த வாக்குறுதியை இந்த ஆண்டில் நிறைவேற்றித் தர வேண்டும் என்றார் ஜி.கே. மணி.
கருத்துகள்

The following revolution will also happen Caste revolution Every body to become vannian Cut all trees Cut all roads Anbumani to become minister again and collect more bribes Divide tamil nadu in to 4 parts One caste to fight with another caste Cancel all examinations in colleges Reservation not based on talent but based on caste Caste based degree diploma
By Atcheeswaran
1/15/2011 9:48:00 PM
ஒரு புரட்சிக்கே வழிய காணோம்
By மோகன்ராஜ் ஜெபமணி
1/15/2011 12:35:00 PM
புரட்சி ஓங்குக இன்குலாப் ஜிந்தாபாத்
By பி.டி.முருகன் திருச்சி
1/15/2011 9:30:00 AM
உங்கள் கருத்தைப் பதிவு செய்யுங்கள் *

புதன், 13 அக்டோபர், 2010

கருணாநிதியை இன்று சந்திக்கிறார் ராமதாஸ்

சென்னை, அக். 12: முதல்வர் கருணாநிதியை பாமக நிறுவனர் ராமதாஸ் புதன்கிழமை காலை சந்தித்துப் பேசுகிறார், பல்வேறு சமுதாயத்தைச் சேர்ந்த முக்கிய பிரமுகர்களும் ராமதாஸýடன் முதல்வரைச் சந்திக்கின்றனர். தலைமைச் செயலகத்தில் இந்தச் சந்திப்பு நடைபெறுகிறது. ஜாதிவாரிக் கணக்கெடுப்பை தனியாக மாநில அரசே நடத்த வேண்டும் என பாமக வலியுறுத்தி வருகிறது. இத்தகைய கணக்கெடுப்பை வலியுறுத்தி ஆர்ப்பாட்டங்களும், பொதுக் கூட்டங்களும் நடத்தப் போவதாக அந்தக் கட்சி அறிவித்தது.இதற்கு எதிர்ப்பு தெரிவித்த முதல்வர் கருணாநிதி, "ஜாதிவாரிக் கணக்கெடுப்பு என்பது திராவிடர் இயக்கமான திமுகவுக்கோ அல்லது திமுக ஆட்சிக்கோ உடன்பாடில்லாத ஒன்று என்பதைப் போல கற்பனை செய்து கொள்கின்றனர்' என்றார் அவர்.மேலும், இந்தக் கற்பனையை வைத்துக் கொண்டு கிளர்ச்சிகளில் ஈடுபட்டு தாங்கள்தான் அதற்கு மூலவர்கள் என்று சொல்லிக் கொள்ளும் போக்கினை யார் கடைபிடிக்கிறார்கள் அல்லது எந்தக் கட்சி கடைபிடிக்கிறது என்பதை மக்கள் நன்றாகவே அறிவார்கள் என்றும் முதல்வர் கருணாநிதி கூறியிருந்தார்.ஜாதிவாரிக் கணக்கெடுப்பை நடத்தப் போவதாக மத்திய அரசே அறிவித்துள்ளது. ஆனால்  திமுக ஆட்சியை எதிர்த்து ஏதாவது கிளர்ச்சி செய்ய வேண்டும்; ஆர்ப்பாட்டம் நடத்த வேண்டும் என்பதற்காக இந்த விஷயத்தை கையில் எடுத்துள்ளார்களோ என்று கருணாநிதி கேள்வி எழுப்பி இருந்தார்.ஆனாலும், பாமக தொடர்ந்து ஜாதிவாரிக் கணக்கெடுப்பு நடத்த வேண்டும் என்ற கோரிக்கையை வலியுறுத்தி வந்தது. இதற்காக, பல்வேறு சமுதாயத்தைச் சேர்ந்த முக்கிய பிரமுகர்களுடன் ஆலோசனை நடத்தி, தீர்மானங்களை இயற்றியது. இந்தப் பிரச்னை குறித்து முதல்வர் கருணாநிதியை நேரில் சந்தித்து வலியுறுத்துவோம் என்று பாமக நிறுவனர் ராமதாஸ் தெரிவித்திருந்தார்.இன்று சந்திப்பு: இந்த நிலையில், முதல்வர் கருணாநிதியை தலைமைச் செயலகத்தில் புதன்கிழமை காலை 11 மணிக்கு பாமக நிறுவனர் ராமதாஸ் சந்திக்கவுள்ளார். இந்தச் சந்திப்பில் பல்வேறு சமுதாயத்தைச் சேர்ந்த தலைவர்களும் பங்கேற்கின்றனர்.இதற்கு முன்பு, மதுக் கடைகளை மூட வலியுறுத்தி ஆன்மிகத் தலைவர்கள் உட்பட பல்வேறு முக்கிய பிரமுகர்களுடன் முதல்வர் கருணாநிதியை தலைமைச் செயலகத்தில் சந்தித்து கோரிக்கை மனு அளித்தார் ராமதாஸ்.அவரது கோரிக்கையை ஏற்று, டாஸ்மாக் கடைகள் திறந்திருக்கும் நேரம் காலை 10 மணியிலிருந்து இரவு 10 மணி என நேரம் குறைக்கப்பட்டது குறிப்பிடத்தக்கது.
கருத்துக்கள்

தொடர்ந்து மதுவிலக்கை வலியுறுத்தும் ஒரே தலைவராக மரு.இராமதாசு உள்ளார். எனவே, அவர் கட்சி நலனுக்காக இந்தச் சந்திப்பைப் பயன்படுத்த வேண்டா. குறுங்கால உடனடி அரசியல் பதவிகளை நாடாமல், சாதிப்போர்வையைத் தூக்கி எறிந்து விட்டுத் தமிழ்நலக்கூட்டணியை அமைக்கட்டும்.
அன்புடன் இலக்குவனார் திருவள்ளுவன்
By Ilakkuvanar Thiruvalluvan
10/13/2010 3:33:00 AM
Yes. Yes. Thats is why during the last election, voters of the Erode, inserted a stick into the butt of Periyar's grandson.
By PA Valarmathi
10/13/2010 1:12:00 AM
விஷயம் இதுதான் ! சோனியா காலில் கருணாநிதி விழுந்ததைப் பார்த்து ...கருணாநிதி காலில் ராமதாஸ் விழுவதற்கு வருகிறார் ! நீங்கள் அனைவரும் சேர்ந்து வந்து மக்கள் காலில் விழுந்து கதறினாலும் இனிப் பயன் இல்லை ! மக்கள் முடிவெடுத்து விட்டார்கள் ! இனி அருவருக்கத் தக்க அரசியல் வியாபாரம் போணியாகாது !
By பெரியாரின் பேரன்
10/13/2010 1:03:00 AM
உங்கள் கருத்தைப் பதிவு செய்யுங்கள் *

திங்கள், 6 செப்டம்பர், 2010

கூட்டணி மாற வேண்டும்!


பணி நிரந்தரம், ஊதிய உயர்வு உள்ளிட்ட கோரிக்கைகளை வலியுறுத்தி டாஸ்மாக் மதுக்கடை ஊழியர்கள் அறிவித்திருந்த, மிகவும் எதிர்பார்க்கப்பட்ட ஒருநாள் வேலைநிறுத்தம் அரசின் தகுந்த முன்னேற்பாடுகளால் பிசுபிசுத்துப் போய்விட்டது. ஆனால், மேகமூட்டத்துடன் காணப்பட்ட வானம் தாமதமாக மழை பெய்தாற்போல டாஸ்மாக் ஊழியர்களுக்கு சில நாள்கள் கழித்து ஊதிய உயர்வு அறிவிக்கப்பட்டுள்ளது. வேலைநிறுத்தம், ஊதிய உயர்வு ஆகிய இவை இரண்டுமே அடைமழை பெய்யும் என எதிர்பார்த்தோருக்கு லேசான சாரல் பெய்ததைப்போல இருந்தது என்பதே உண்மை. வேலைநிறுத்தத்தை முறியடிக்க தமிழக அரசு காவல் துறையின் உதவியுடன் மதுக்கடைகளைத் திறந்திருந்தது. இதனால், அன்றைய தினம் மட்டும் குடிமகன்களுக்கு பலத்த போலீஸ் பாதுகாப்புடன் மது அருந்தி மகிழ்ந்த திருப்தி. இது தமிழக வரலாற்றில் மட்டுமல்ல, உலக வரலாற்றில்கூட முதன்முறையாக இருந்திருக்கலாம்.  மதுவிலக்கையும் மீறி மது அருந்தினால் காவலர்கள் கண்டுபிடித்து விடுவார்களோ, கைது செய்து விடுவார்களோ என்று குடிமகன்கள் அஞ்சியஞ்சி மது குடித்தனர். அது கர்மவீரர் காமராஜ் காலம்!  தற்போது நடப்பது காமராஜ் ஆட்சிதான் என்று மேடைதோறும் முழங்குபவர்களின் ஆட்சியிலோ இப்படி ஒரு காண்பதற்கரிய காட்சி.  பள்ளிக்கூடங்களின் எண்ணிக்கையை அதிகரித்து அறிவு தீபமேற்ற அல்லும்பகலும் பாடுபட்டார் காமராஜ். அறிவை அழிக்கும் மதுக்கூடங்களை அதிகரித்து மகத்தான சாதனை புரிந்துகொண்டிருக்கின்றனர் இன்றைய ஆட்சியாளர்கள்.  தங்கள் ஆட்சியிலும் பள்ளிகளின் எண்ணிக்கை அதிகரித்திருக்கிறதே என இவர்கள் கூறலாம். ஆனால் இளம் பருவத்தினர் "பார் வசதி உண்டு' என எழுதப்பட்ட குறைந்தது இரண்டு, மூன்று மதுபானக் கடைகளையாவது தாண்டித்தான் தினமும் பள்ளிக்கூடத்துக்குச் செல்ல வேண்டிய நிலை. விளைவு...படித்துப் பயன்பெற வேண்டிய நஞ்சை நிலம், மது என்னும் நஞ்சைக் குடிக்கத் தொடங்கி எவருக்கும் பயன்படாத களர் நிலமாகிவிடுகிறது. இப்போதெல்லாம் மாணவர்கள் பயமின்றி பள்ளிச் சீருடைகளிலேயே மதுக்கடைகளுக்கு வருவதாகவும் ஆய்வுகள் தெரிவிக்கின்றன.  நலத்திட்டங்கள் குறித்தோ, அரசின் செயல்பாடுகள் குறித்தோ எதிர்க்கட்சிகள் ஏதேனும் கேள்வி எழுப்பினால் கேரளத்தைப் பாருங்கள், மேற்குவங்கத்தைப் பாருங்கள் என்பது தமிழக முதல்வரின் வழக்கம். மதுகுறித்த கேள்விகளுக்கு மட்டும் மெüனத்தையே பதிலாகத் தந்து, அரசின் இலவசத் திட்டங்களுக்கு டாஸ்மாக் மது மூலம் வரும் நிதிதான் பக்கபலமாக இருக்கிறது என்பதைச் சொல்லாமல் சொல்லும் முதல்வர், மதுவை முற்றிலும் ஒழித்தாலும் மாநிலத்தின் வளர்ச்சி தடைபடாது என்பதற்கு எடுத்துக்காட்டாக குஜராத்தைப் பார்க்கலாமே! காந்தி பிறந்த புண்ணிய பூமியில் மது முற்றிலும் ஒழிக்கப்பட்டிருக்கிறது. கள் கூடாது என்பதற்காக தனது தோப்பில் இருந்த தென்னை மரங்களை வெட்டித்தள்ளிய, சுயமரியாதை உணர்வை உசுப்பிவிட்ட பெரியார், ஏழைகளின் சிரிப்பில் இறைவனைக் கண்ட "தென்னாட்டு காந்தி" அண்ணா, மதுவிலக்கை முழுமையாக ஆதரித்த ராஜாஜி, காமராஜ் போன்ற புண்ணியர்கள் பலர் பிறந்த தமிழகத்திலும் மது முற்றிலும் ஒழிக்கப்படுவதுதானே நியாயம்?  தாம் மதிப்போரின் கொள்கைகளைக் காற்றில் விட்டுவிட்டு அவர்களுக்கு சிலைகளும், சித்திர மண்டபங்களும் எழுப்புவதால் என்ன பயன்?   மதுவிலக்கு குறித்து ஓர் அதிகாரமே தந்தார் அய்யன் திருவள்ளுவர். தென்கோடியில்  அவருக்கு சிலை வைத்த ஆட்சியாளர்களோ, அவர் சொன்னதை விலக்கிவிட்டு, மதுவுக்கு அதிகாரம் தந்திருக்கின்றனர்.  ஆண்டுக்காண்டு மது விற்பனை மெல்ல அதிகரித்த காலம்போய் மாதந்தோறும், நாள்தோறும் மது விற்பனை அசுர வேகத்தில் அதிகரிப்பதைப் புள்ளிவிவரங்கள் மூலம் அறிய முடிகிறது. மதுவிற்பனை மூலம் அரசுக்கு ஆயிரக்கணக்கான கோடி கிடைக்கிறதாம். ஆனால், குடித்துக்குடித்து குடல் வெந்துபோகும் ஏழைக் குடிமகன் விழுந்து கிடக்கவும், அவன் இறந்துவிட்டால் அவன் குடும்பத்துக்கும் தெருக்கோடிதானே கிடைக்கிறது.  டாஸ்மாக் பணியாளர்களுக்கு நல்ல வருவாயில், நிரந்தரமான மாற்றுப் பணி தருவதுடன், குடி என்னும் தவறான பாதையிலிருந்து மக்களை மாற்றும் பணியையும் மேற்கொள்ள வேண்டியது அரசின் முக்கிய கடமைதானே!   இளைஞர் நலனில் அக்கறை கொண்டு இளைய சமுதாயத்துக்கு நன்மை செய்ய பல்வேறு திட்டங்கள் தீட்டப்படுவதாகக் கூறப்படுகிறது. வீதிகள்தோறும் குறைந்த கட்டணத்தில் உடற்பயிற்சிக் கூடங்களைத் திறந்தால் எதிர்காலத் தூண்களின் உடல் நலத்தை வளர்க்கலாம். பள்ளிக்கூடங்களை அதிகம் திறந்தால் பகுத்தறிவை வளர்க்கலாம். மாறாக, மதுக்கூடங்களைத் திறப்பதன் மூலம் இளைய சமுதாயத்துக்கு என்ன நன்மைகளைச் செய்துவிட முடியும்? தமிழகத்தில் பிரதான இரு கட்சிகள் மற்ற விஷயங்களில் எப்படியோ, மது விஷயத்தில் மட்டும் ஒன்றாகவே சிந்திக்கின்றன. ஒற்றுமையுடன் செயல்படுகின்றன.   இங்கு எந்தக் கட்சி ஆட்சிக்கு வந்தாலும் வற்றாமல் வாரி வழங்கும் மது அரக்கனுடன் கூட்டணி வைத்துக்கொள்வதே வழக்கமாக உள்ளது. அந்த நிலை மாறி மதுவுடனான கூட்டணி முறை முற்றிலும் ஒழிய வேண்டும். மக்கள் வாழ்வில் நிம்மதியும், அமைதியும் ஏற்பட கட்சிகள் மதுவிலக்குடன் புதிய கூட்டணி அமைக்க வேண்டும்.
கருத்துக்கள்

மது விலக்கை நீக்கியது மிகப்பெரிய குற்றம்தான் . மறுக்க இயலாது. ஆனால், மதுப பழக்கம் உள்ள மாநிலங்கள் மது விலக்கை நடைமுறைப்படுத்தினால் தரும் நிதியுதவியை எவ்வளவோ மன்றாடி மதுப்பழக்கம் இல்லா தமிழகத்திற்குக் கேட்ட போது அன்றைய மத்திய (காங்கிரசு) ஆட்சியினர் புதிய மது விலக்கினர்க்கு மட்டுமே நிதியுதவி தரப்படும; தமிழ் நாட்டிற்குத் த்ர முடியாது என விடாப்பிடியாக அடம்பிடித்து மறுத்து இராது இருந்திருந்தால் தமிழ்நாடும் மதுவிலக்கு நாடாகத் திகழ்நதிருக்கும் அல்லவா? எனவே, கழகங்களின் குற்றச் செயலில் காங்கிரசிற்கும் பெரும்பங்கு உண்டு என்பதை மறவாதீர்! 
அன்புடன் இலக்குவனார் திருவள்ளுவன்
By Ilakkuvanar Thiruvalluvan
9/6/2010 3:32:00 AM
உங்கள் கருத்தைப் பதிவு செய்யுங்கள் *

புதன், 11 ஆகஸ்ட், 2010

டாஸ்மாக்' கடைகள் திறந்திருக்கும்: தமிழக அரசு

First Published : 11 Aug 2010 03:20:22 AM IST


சென்னை, ஆக. 9: சென்னை உள்பட தமிழகம் முழுவதும் "டாஸ்மாக்' கடைகளை திறந்து வைக்க அரசு நடவடிக்கை எடுத்துள்ளது.  எட்டு மணி நேர வேலை, பணி நிரந்தரம் உள்ளிட்ட கோரிக்கைகளை வலியுறுத்தி, "டாஸ்மாக்' ஊழியர்கள் புதன்கிழமை வேலை நிறுத்தப் போராட்டத்தில் ஈடுபடப் போவதாக அறிவித்துள்ளனர்.  இந்த நிலையில், கடைகளை திறந்து வைக்க தமிழக அரசு பல்வேறு நடவடிக்கைகளை எடுத்துள்ளது. காவல் துறையினரின் உதவியுடன் இந்தப் பணி மேற்கொள்ளப்படும் என அரசுத் துறை வட்டாரங்கள் தெரிவிக்கின்றன. இதுகுறித்து, தலைமைச் செயலக அதிகாரிகள் கூறியது: சென்னை உள்பட தமிழகம் முழுவதும் 6 ஆயிரத்து 700 மதுபானக் கடைகள் உள்ளன. பணியாளர்கள் வேலை நிறுத்தம் செய்து கடைகளுக்கு வராமல் இருந்தால், அந்தக் கடைகளை இயக்குவதில் அரசுக்கு எந்தப் பிரச்னையும் இல்லை. ஆள் பற்றாக்குறை ஏற்படும் பட்சத்தில் மாற்றுத் துறைகளில் உள்ள பணியாளர்களையும் ஈடுபடுத்த அரசு நடவடிக்கை எடுத்துள்ளது என்று தெரிவித்தனர்.  எனவே, தமிழகம் முழுவதும் டாஸ்மாக் கடைகள் புதன்கிழமை திறந்திருக்கும் எனத் தெரிகிறது. முன்னதாக, மது விற்பனை இருக்காது என்ற எண்ணத்தில் சென்னை உள்பட தமிழகத்தின் பல்வேறு பகுதிகளில் செவ்வாய்க்கிழமை இரவு டாஸ்மாக் கடைகளில் வழக்கத்துக்கு மாறாக கூட்டம் நிரம்பி வழிந்தது.
கருத்துக்கள்

குறளோவியம் எழுதிய கலைஞர்அவர்கள் இப்படியாவது மதுக்கடைகளைத் திறந்துவைக்க வேண்டுமா என்ன? இதை வாய்ய்பாகக் கொண்டு படிப்படியாக மதுக்கடைகளை மூடலாமே! சாதனை மன்னரின் கணக்கில் இதுவும் ஒரு சாதனையாகச் சேரட்டுமே!
அன்புடன் இலக்குவனார் திருவள்ளுவன்
By Ilakkuvanar Thiruvalluvan
8/11/2010 4:36:00 AM
புரட்சித் தலைவி ஆட்சியோடு ஒப்பிட்டுப் பேசுவதற்கு உமக்கு அருகதை இருப்பதாக நான் கருதவில்லை ! தொடக்கத்தில் இந்த துறையால் மது எவ்வளவு விற்பனை செய்யமுடியும் அரசுக்கு எவ்வளவு வருமானம் கிடைக்கும் என்று தெரியாத நிலையில் நியமிக்கப் படும் ஊழியர்களுக்கு சரியான ஊதியத்தையோ அல்லது உரிமைகளையோ கொடுத்துவிட முடியாது என்பதனை அனைவரும் அறிவர் ! மது விற்பனை மூலம் அரசுக்கு கோடி கோடியாக பணம் கொட்டும் போது அந்த தொழிலாளர்களுக்கும் உரிய உரிமையினை வழங்க வேண்டியது அரசின் கடமை தானே ! அவர்களும் வாழப் பிறந்தவர்களே ! அவர்களுக்கும் குடும்பம் குழந்தைகள் கனவுகள் இருக்கும் அல்லவா ? எழுந்து உட்கார முடியாமல் மல்லாக்கவே படுத்துக் கிடக்கும் உனக்கு எவ்வளவு ஆசைகள் ! தூக்க எடுக்க கொட்டையை தாங்க என்று எத்தனை எடுபிடிகளை வைத்துக் கொண்டு மக்கள் பணத்தை சூரையாடுகிறாய் ! மக்கள் விவரம் புரிந்தவர்கள் ! இனி உன் கப்சா எடுபடாது ! புரட்சித் தலைவியின் பொன்னான ஆட்சியோடு ஒப்பிட்டு உன் மரியாதையை கெடுத்துக் கொள்ளாமல் அனைவரையும் அரசு ஊழியர்களாக அங்கீகரி ! அதற்கான உரிமைகளை கொடு ! சுமையாக இராமல் நேரத்தோடு ஓய்வு எடு ! தமிழினத்தை வாழ விடு ! நன்றி பெர
By rajasji
8/11/2010 4:07:00 AM
உங்கள் கருத்தைப் பதிவு செய்யுங்கள் *

வியாழன், 29 ஜூலை, 2010

டாஸ்மாக் ஊழியர்கள் விரைவில் பணி நிரந்தரம்: முதல்வர் கருணாநிதி


சென்னை, ஜூலை 28: தமிழகத்தில் மதுவிலக்கு கொள்கையை அமல்படுத்துவது குறித்தும், பணி நிரந்தரம் கோரும் டாஸ்மாக் ஊழியர்களின் கோரிக்கைகள் குறித்தும் விரைவில் நல்ல முடிவு எடுக்கப்படும் என முதல்வர் கருணாநிதி தெரிவித்துள்ளார்.÷இதுகுறித்து, கேள்வி-பதில் வடிவில் புதன்கிழமை அவர் வெளியிட்ட அறிக்கை:÷டாஸ்மாக் ஊழியர்களின் கோரிக்கையை ஏற்றுக் கொள்ள வேண்டும் என்று பாமக நிறுவனர் ராமதாஸ் கோரிக்கை விடுத்துள்ளார்.÷ஊழியர்களின் கோரிக்கைகளை மாத்திரமல்ல - மதுவிலக்குக் கொள்கையை அமல்படுத்த வேண்டுமென்று பாமக நிறுவனர் ராமதாஸ் வலியுறுத்தி வருகின்ற கோரிக்கையை நிறைவேற்றுவதற்கும் தமிழக அரசு பரிசீலித்து வருகிறது. விரைவில் அதுபற்றி நல்ல முடிவு எடுக்கப்படும்.÷பத்திரிகை ஆசிரியர் கைது: தினபூமி பத்திரிகை ஆசிரியரின் கைது குறித்த செய்தி பத்திரிகைகளில் வெளியானது. இதைத் தொடர்ந்து, உடனடியாக காவல் துறை அதிகாரிகளைத் தொடர்பு கொண்டு விவரம் கேட்டேன்.÷என்ன காரணம் இருந்தாலும், உடனடியாக அவர்களை விடுவிக்க வேண்டுமெனக் கூறினேன். அவர்களும் ஒருசில மணி நேரத்துக்குள் விடுவிக்கப்பட்டு விட்டனர். இது என்னுடைய நடைமுறை.÷எந்தவொரு பிரச்னை என்றாலும் மார்க்சிஸ்டுகள் தமிழக அரசைத் தாக்கி அறிக்கை விடுகிறார்கள். அவர்கள் கட்சி ஆளும் மேற்கு வங்கத்தில் என்ன நிலை என்பதை அவர்கள் நினைத்தே பார்க்க மாட்டார்கள்.÷ஐ.நா.வின் சர்வதேச மனித வள மேம்பாட்டுத் திட்டத்தின் இருபதாவது ஆண்டு நிறைவை ஒட்டி, வறுமை ஒழிப்பு நடவடிக்கை தொடங்கப்பட்டுள்ளது.÷இந்தத் திட்டத்தைச் செயல்படுத்துவதற்காக ஆக்ஸ்போர்டு வறுமை மற்றும் மனித வள மேம்பாடு முனையத் திட்டத்துடன் இணைந்து பல்நோக்கு ஆய்வு நடத்தப்பட்டது.÷அதில், இந்தியாவில் 8 மாநிலங்கள் ஆப்பிரிக்காவில் உள்ள 26 நாடுகளை விட, அதிக அளவில் வறுமையால் பாதிக்கப்பட்டுள்ளதாகத் தெரிவிக்கப்பட்டுள்ளது. இந்தியாவில் பிகார், சத்தீஸ்கர், ஜார்க்கண்ட், மத்தியப் பிரதேசம், ஒரிசா, ராஜஸ்தான், உத்தரப் பிரதேசம் மற்றும் மேற்கு வங்கம் ஆகிய மாநிலங்களில் 42 கோடி மக்கள் ஏழ்மையில் வாழ்கின்றனர் என அந்த ஆய்வில் தெரிவிக்கப்பட்டுள்ளது என்பதை மார்க்சிஸ்டுகள் உணர வேண்டும்.÷மத்திய அரசின் மானியமா? மத்திய அரசு மானியத்தில்தான் ஒரு ரூபாய் அரிசி வழங்கப்படுவதாக ஈ.வி.கே.எஸ். இளங்கோவன் பேசியிருக்கிறார். ÷மத்திய அரசு மானியத்தில்தான் இந்தத் திட்டம் செயல்படுத்தப்படுகிறது என்றால் அனைத்து மாநிலங்களிலுமே அதை நடைமுறைப்படுத்தி இருக்கலாமே? மத்திய அரசு எல்லா மாநிலங்களுக்கும் வழங்கும் அரிசியைத்தான் நமது மாநிலத்துக்கும் அதே விலையில் வழங்குகிறது.÷ஆனால், தமிழக அரசு மட்டும்தான் இந்தியாவிலேயே ஒரு மாநிலமாக ஒரு கிலோ அரிசியை ஒரு ரூபாய்க்கு வழங்கும் திட்டத்தைச் செயல்படுத்தி வருகிறது. மேலும், சிறப்பு பொது விநியோகத் திட்டத்தையும் அரசு செயல்படுத்தி வருகிறது. இதற்காக, இந்த ஆண்டு மட்டும் ரூ.3 ஆயிரத்து 750 கோடி நிதி அளிக்கப்பட்டுள்ளது.  108 ஆம்புலன்ஸ் திட்டத் தொகை முழுவதையும் கூட மத்திய அரசு அளித்து வருவதாகப் பேசியிருக்கிறார் இளங்கோவன். அதுவும் தவறான செய்திதான்.÷அந்தத் திட்டம் உலக வங்கியிடம் இருந்து நிதி கடனாகப் பெற்று செயல்படுத்தப்படுகிறது. இந்தத் திட்டத்துக்கான நடைமுறைச் செலவிலே ஒரு பகுதியை மட்டும்தான் மத்திய அரசு வழங்குகிறது என்று முதல்வர் கருணாநிதி தெரிவித்துள்ளார்.
கருத்துக்கள்

தலைப்பு சரயில்லையே! மதுவிலக்கு மீண்டும் வரலாம் என்று கூடக் குறிப்பிட்டிருக்கலாம். 
அன்புடன் இலக்குவனார் 
                                               திருவள்ளுவன்
By Ilakkuvanar thiruvalluvan
7/29/2010 3:21:00 AM
உங்கள் கருத்தைப் பதிவு செய்யுங்கள் *

புதன், 26 மே, 2010

நெஞ்சில் உரமும் இல்லை;​ நேர்மைத் திறமும் இல்லை!


நெஞ்சில் உரமும் இல்லை;​ நேர்மைத் திறமும் இல்லை!



உலக மகா அதிசயம்.​ அதுவும்,​​ களைத்துப்போன தொழிலாளர்களின் உடல் வலிக்குக் ​ கட்டாயம் சாராயம் வேண்டும் என்றே நேற்று வரை கருதி வந்த கம்யூனிஸ்டுகள் கூட,​​ டாஸ்மாக் சாராயம் ஒரு மிகப்பெரிய பிரச்னை என்று இன்று ஒத்துக் கொண்டுள்ள அதிசயம்.நடந்து முடிந்த சட்டப்பேரவைக் கூட்டத் தொடரில்,​​ பா.ம.க.,​​ கம்யூனிஸ்டு மற்றும் காங்கிரஸ் கட்சிகள் தமிழகத்தில் அதிகரித்து வரும் டாஸ்மாக் மதுப்பழக்கத்தைப் பற்றிக் கவலை தெரிவித்துள்ள நிகழ்வு வரவேற்க வேண்டிய மாற்றம்.இந்திய கம்யூனிஸ்டு கட்சியின் சிவபுண்ணியம்,​​ ஆறரைக் கோடி மக்களில்,​​ இரண்டு கோடி மக்கள் டாஸ்மாக் சாராயத்தில் கரைகிறார்களே,​​ இது என்ன வளர்ச்சி என்று கூறி புண்ணியம் தேடிக் கொண்டுள்ளார்.சில மாதங்களுக்கு முன் சி.பி.ஐ.​ கட்சித் தலைவர் நல்லகண்ணுவிடம் வரைமுறையற்ற டாஸ்மாக் சாராய வியாபாரம் பற்றிக் கருத்து பரிமாறிக் கொண்டபொழுது,​​ ""அது தான் வருமானம் வேணும்னுதான் முச்சந்தியில் எல்லாம் கவர்மெண்ட் சாராயக்கடை வெச்சிருக்கிறாங்களே,​​ மேலும் குடிகாரனாகப் பார்த்து திருந்தினாத்தான் உண்டு'' என்று பேசினார்.​ அனுபவம் மிக்க அரசியல் தலைவர்களிடம் கூட,​​ இந்தியாவில் ​ அசுர வளர்ச்சி பெற்று எல்லா சமூகத்தினரையும் புதை குழிக்குள் தள்ளிக் கொண்டிருக்கும் சாராயச் சந்தையைப் பற்றிய முழுமையான புரிதல் இல்லை என்பதே உண்மை.இன்றைக்கு இந்திய மக்களின் மிகப்பெரிய பொது எதிரியானது சாராயச் சந்தைதான் என்றால் மிகையில்லை.​ தமிழக அரசு தனது மிகக் கேவலமான சாராய வருமான மூர்க்கத்தனத்தை உடனடியாக மாற்றிக் கொள்ளவில்லை என்றால்,​​ இன்னும் பத்துப் பதினைந்து ஆண்டுகளில்,​​ தமிழகத்தில் மதுவுக்கு அடிமையாகாத இளைஞர்களை-மதுவால் ​ பாதிக்கப்படாத குடும்பங்களை விரல் விட்டு எண்ணிவிடலாம்.​ இதை ஏதோ வீரியத்துடன் எழுத வேண்டும் என்பதற்காகக் கூறவில்லை.​ மதுப்புழக்கத்தால்,​​ சமூகம்,​​ பொருளாதாரம்,​​ மனித வளம்,​​ கலாசாரம்,​​ நடத்தை மற்றும் ஒழுக்கவியல்,​​ சுகாதாரம் போன்ற பல்வேறு தளங்களில் மிக வேகமாக ஏற்பட்டுக் கொண்டிருக்கும் நுணுக்கமான பாதிப்புகளைக் கூட தொடர்ந்து உன்னிப்பாகக் கவனித்து புரிந்து வைத்திருப்பதால் தான் இதனை உறுதியுடன் கூற முடிகிறது.​ இன்றைக்கு எந்த ஒரு பொது நிகழ்வுகளிலும் இளைஞர்களைக் காண முடிவதில்லை.​ இளைஞர்கள் நுகர்வுக் கலாசாரத்தில் சிக்கிக் கொண்டிருக்கிறார்கள்.​ மிக அதிகமான எண்ணிக்கையில் இளைஞர்கள்,​​ கூடிக் களிக்கும்-இல்லையில்லை-விட்டில் பூச்சிகளாக விழுந்து கொண்டிருக்கும் இடங்களாக டாஸ்மாக் விடுதிகள் உள்ளன.தமிழகம் முழுவதுமுள்ள ​(அரசின் அடுத்த சாதனையாக கட்டிக் கொண்டிருக்கிற பிரம்மாண்டமான அண்ணா நூலகம் உள்பட)​ நூலகங்கள்,​​ இளைஞர்களைக் கவர்வது இப்பொழுதெல்லாம் முடியாத காரியமாகி விட்டது.ஜூன் மாதக் கடைசியில் ​ கோவையில் அரசு நடத்த இருக்கும் செம்மொழி மாநாடு வரலாறு படைக்குமா என்பது வேண்டுமானால் கேள்வியாக இருக்கலாம்.​ ஆனால்,​​ மாநாடு நடக்க இருக்கும் வாரத்தில்,​​ கோவை மாவட்ட டாஸ்மாக் சாராய விற்பனை புதிய சாதனை படைக்கும் என்பதை இன்றே உறுதியுடன் கூற முடியும்.தமிழக அரசு,​​ டாஸ்மாக் நிறுவன அதிகாரிகள்,​​ ஊழியர்கள்,​​ சாராய நிறுவனங்கள்,​​ இடைத்தரகர்கள்,​​ கட்சிக்காரர்கள் எல்லோரும் இணைந்து கொள்ளையடிக்கும் மையப் புள்ளியாக,​​ மாஃபியாவாக,​​ டாஸ்மாக் சந்தை மாறி உள்ளது.​ இதன் மூலம் தமிழகத்தில் ஒரு நிழல் உலகம் உருவாக்கப்பட்டுள்ளது என்பதை சமூகத்தில் அக்கறை உள்ளவர்கள் புரிந்து கொள்ள வேண்டும்.​ எல்லாவகை குற்றங்களுக்குமான இடங்களாக டாஸ்மாக் விடுதிகள் மாறிவிட்டன.​ ​​ இந்தியா முழுவதுமே மதுக் கலாசாரத்தில் சிக்கிக் கொண்டுதான் இருக்கிறது.​ அதிலும்,​​ தமிழகத்தில் அரசு இயந்திரம் இயங்குவதற்கே,​​ மது வருமானத்தைத்தான் மிக அதிகமாக நம்பியுள்ள நிலை உள்ளது.​ அதனால்,​​ தமிழக அரசு மிக வேகமாக மது விற்பனையை அதிகரிக்க வேண்டிய நிர்பந்தத்திற்குள் சிக்கிக் கொண்டுள்ளது.​ மற்ற அண்டை மாநில அரசுகளும் தமிழக அரசின் வெற்றி பார்முலாவை அப்படியே நடைமுறைப்படுத்த முயன்று வருகின்றன.எதிர்க்கட்சிகளிடமும்,​​ பொது மக்களிடமும் இந்த மது வியாபாரம் ஒரு சுனாமி போன்று உருவெடுத்துள்ளது என்ற பொதுக் கருத்து இல்லாமையால்தான்,​​ தமிழக அரசால்,​​ இப்படி பொது நன்மையை முற்றிலும் முறிக்கும் கொள்கையைச் செயல்படுத்த முடிகிறது.எதிர்காலத்தில்,​​ மற்றொரு அரசோ அல்லது இன்றைய ஆளுங்கட்சி அரசோ கூட மதுவிலிருந்து மக்களைப் பாதுகாக்க வேண்டும் என்ற முற்போக்கு நடவடிக்கை எடுக்க நினைத்தால்,​​ முடியாது போய்விடும்.​ ஏனென்றால்,​​ இந்த நிழல் உலகத்தில் பலரது தொழில்,​​ வருமானம் பாதிக்கப்படும்.​ அதனை அவர்கள் விட்டுவிட மாட்டார்கள்.​ மதுச் சந்தை மூலம் சுலபமாக குறுக்கு வழியில் வருமானம் ஈட்டி வருபவர்கள்,​​ நாளை தங்கள் வருமானத்தைத் தக்க வைத்துக் கொள்வதற்காக எந்த ஒரு பாதகச் செயலிலும் ஈடுபடத் தயங்கமாட்டார்கள்.​ இன்றைக்கு லட்சக்கணக்கான ஆண்கள் குடிநோயில் சிக்கித் தவித்துக் கொண்டிருக்கிறார்கள்.​ அரசு நடத்தும் குடிநோய் மையங்கள் தமிழகத்தில் மொத்தமே எட்டு ​ மருத்துவமனைகளில்தான் உள்ளன.​ இந்த நிலையில்,​​ ஊருக்கு ஊர் தனியார்கள்,​​ குடி சிகிச்சை மையங்களை ஏற்படுத்திக் கொண்டு வருகின்றனர்.​ இவ்வகை குடிசிகிச்சை மையங்களில்,​​ 90 சிகிச்சை மையங்கள் போலியானவை.​ "எத்தைத் தின்றால் பித்தம் தெளியும்' என்ற ​ விரக்தி மனநிலையில் உள்ள மனைவிமார்கள்,​​ தங்கள் குடிநோயுள்ள கணவர்களை இப்போலி மையங்களில் சேர்த்து எப்படியாவது குணமடைய வேண்டும் என்று கடன் வாங்கியாவது செலவு செய்கின்றனர்.​ ஆனால்,​​ சிகிச்சை என்ற பெயரில்,​​ இங்கு துன்புறுத்தலும்,​​ அறிவியல் சாராத ஏமாற்று சிகிச்சைகளும்தான் அளிக்கப்படுகின்றன.போலி மருந்துகளுக்கு எதிராக நடவடிக்கை எடுக்கும் அரசு,​​ இம்மையங்களுக்கு எதிராக எந்தவித நடவடிக்கையும் எடுப்பதில்லை.​ அரசே,​​ தமிழகம் முழுவதும் ஒவ்வொரு தாலுகாவிலும் குடிமுறிவு மையங்களை ஏற்படுத்தினால்தான் இவ்வகை போலி நிறுவனங்களை ஒழித்துக் கட்ட முடியும்.​ குடிநோயில் இருந்து ஒருவரை மீட்பது மிகமிகக் கடினம்.​ மீட்டாலும் அது மிகத் தாற்காலிக நடவடிக்கையாகவே இருக்க முடியும்.​ ஆனால்,​​ குடிநோய் வராமல் ​ தடுப்பது சுலபம்.​ ​​ போலி குடிமுறிவு மையங்களைப் போலவே,​​ சித்தா,​​ ஆயுர்வேதா,​​ யுனானி என்று விதவிதமான போலி குடிநோய் மருத்துவர்கள் தமிழகம் முழுவதும் கடை பரப்பி உள்ளனர்.​ இப்படிப்பட்ட போலி மருத்துவர்களின் விளம்பரங்களை ஏமாற்று வேலை என்று தெரிந்து கொண்டே வெளியிடும் பத்திரிகைகளை என்னவென்று சொல்வது.​ பல மனைவிமார்கள் இவ்வகை போலி மருத்துவர்களிடம்,​​ குளிகைகளையும்,​​ மருந்துப்பொடிகளையும் மிகுந்த விலை கொடுத்து வாங்கி ரகசியமாக கணவர்களுக்கு உணவிலும்,​​ பாலிலும் கலந்து கொடுத்து ​(மருத்துவர் அறிவுரைப்படி)​ ஏமாந்துபோய் வருவது சகஜமாகி விட்டது.தாய்மார்களோ,​​ இந்தப் போலி குளிகைகளுக்காக,​​ தங்கள் தாலிகளைக் கூட அடமானம் வைக்கிறார்கள்.​ தமிழக அரசோ,​​ சாராய வருமானத்துக்காக தனது ஆன்மாவையே அடமானம் வைக்கிறது.​ சமீபத்தில் சென்னைக்கு அருகில் புழல் பகுதியில் உள்ள 50 பள்ளிகளில் படிக்கும் 13-16 வயதுக்குள்பட்ட மாணவர்களிடம் ஓர் ஆய்வு நடத்தப்பட்டது.இதில் 11 சதவிகிதம் பள்ளி மாணவர்கள் மது அருந்துகிறார்கள் என்று தெரிய வந்ததுள்ளது.​ இந்த 11 சதவிகிதம் இன்னும் சில ஆண்டுகளில் 30 சதவிகிதம் ஆகாது என்பதற்கு எந்த உத்தரவாதமும் இல்லை.​ ஏனென்றால்,​​ அரசின் மது விற்பனை நடவடிக்கைகள் அத்தனை கேவலமாக உள்ளது.ஆட்சி அதிகாரத்தில் இருப்பவர்கள்,​​ நாட்டின் இன்றைய நிலவரத்தைப் பற்றியும்,​​ எதிர்காலத்தில் ஏற்படக்கூடிய பின் விளைவுகள் பற்றியும் உச்சகட்ட அலட்சியத்தைத் தன்னுள் கொண்டுள்ளனர்.எந்த ஒரு பள்ளி மாணவனும் பள்ளிக்கு வரும் போதும்,​​ வீடு திரும்பும் போதும் டாஸ்மாக் கடையைத் தாண்டாமல் போக முடியாது என்ற நிலையே உள்ளது.​ சட்டசபையில் எதிர்க்கட்சி உறுப்பினர்கள் டாஸ்மாக் கடைகளை மூட வேண்டும் என்ற கோரிக்கையை வைத்தபோது,​​ இதனால் வேலை இழப்பு ஏற்படுமே என்ற கேள்வியைத் தான் ​ ​ ​ புத்திசாலித்தனமாக முதல்வர் கேட்டுள்ளார்.​ ​​ நடு இரவில் தோன்றிய கடவுளிடம்,​​ நாளை காலை உலகில் யாருக்குமே எய்ட்ஸ் நோய் இருக்கக் கூடாது என்று வரம் கேட்டு,​​ கடவுள் அருள் புரிந்தால் என்ன ஆகும்?எய்ட்ஸ் நோயை நம்பி,​​ கடை பரப்பியுள்ள நூற்றுக்கணக்கான தொண்டு நிறுவனங்கள்,​​ மருந்து நிறுவனங்கள்,​​ ஆராய்ச்சி நிறுவனங்கள்,​​ மருத்துவர்கள்,​​ செவிலியர்கள்,​​ விளம்பர நிறுவனங்கள்,​​ அரசின் எய்ட்ஸ் கட்டுப்பாட்டுத்துறை ஊழியர்கள் எல்லோருக்கும் அடுத்த நாள் காலையே வேலை போய்விடும்.​ அதனால்,​​ நாட்டில் எப்பொழுதும எய்ட்ஸ் நிலைத்துநின்று வேலை வாய்ப்பை வழங்க வேண்டும் என்கிறாரா முதலமைச்சர்.​ டாஸ்மாக் கடைகளை மூடி விட்டால்,​​ 35,000 ஊழியர்களின் வேலை போய் விடும் எனும் முதலமைச்சரின் விளக்கம்,​​ பாரதியின் இந்தக் கவிதை வரிகளைத்தான் நினைவுபடுத்துகிறது.""நெஞ்சில் உரமும் இன்றி,​​ நேர்மைத் திறமும் இன்றி வஞ்சனை சொல்வாரடி கிளியே,​​ வாய்ச்சொல்லில் வீரரடி.''
கருத்துக்கள்

மதுக்கடையில் வேலைபார்ப்பவர்களுக்கும் அவரது குடும்ப உறுப்பினருக்கும் பெண் கொடுக்க மாட்டோம்; குடும்பத்தினருடன் மண உறவு கொள்ள மாட்டோம் எனப் பொதுமக்கள் மாறும் அளவிற்கு நாட்டை மாற்ற நாராயணன் போன்றோர் முயல வேண்டும். விழவிலும் இழவிலும் குடிப்பது நாகரிகம் என்னும் போக்கை நிறுத்த வேண்டும். மதுக்குடியரல்லர் என்னும் மருத்துவச் சான்றிதழ் பெற்றவர்க்கு மட்டுமே வேலை என்னும் நிலை உருவாக்கப்பட வேண்டும். அதே நேரம் அரசே மதுவையும விற்பனை செய்து கொண்டு குடி நிறுத்த முகாம்களை அல்லது மையங்களை நடததுவது என்பது கேலிக் கூத்தாகும். ஆனால், அனைத்து அரசு மரு்துவ மனகைளிலும் ஒரு பிரிவைத் தொடங்கலாம். அன்புடன் இலக்குவனார் திருவள்ளுவன்

By Ilakuvanar Thiruvalluvan
5/26/2010 3:29:00 AM

மதுப்பெருக்கம் குறித்த நலல எச்சரிக்கை. இதற்குக் காங்கிரசும் மூல காரணம். மது விலக்கு மாநிலங்களுக்கு அளிக்கும் உதவித் தொகையைத்தமிழக அரசிற்குத் தருமாறு வேண்டியபொழுது மதுப் பழக்கம் நடைமுறையில் இருந்து அதை நிறுத்தும் மாநிலங்களுக்கு மட்டும் நல்கை உதவி அளிக்கப்படும் என்றும் ஏற்கெனவே நடைமுறையில் உள்ள தமிழகத்திற்கு நிதியுதவி அளிக்க முடியாது என்றும் மறுத்து விட்டது. அப்படியாயின் ஒருநாள் மது விலக்கை விலக்கி வைத்து விட்டுப் பின்னர் நடைமுறைப்படுத்தினால் மத்திய அரசு உதவுமா எனக் கலைஞர் கேட்டார். அவ்வாறாவது செய்திருக்கலாம். மதுச்சுவைக்குப் பாண்டிச்சேரிக்கும்தேக்கடிக்கும் சென்று வந்த சிறுபான்மையர் நிலை மாறி இன்று பள்ளி மாணவ மாணவியர் கூட மதுவிற்கு அடிமையாக மாறிய கேடுகெட்ட சூழல் எழுந்துள்ளது. மதுக்கடையில் வேலைபார்ப்பவர்களுக்கும் அவரது குடும்ப உறுப்பினருக்கும் பெண் கொடுக்க மாட்டோம்; குடும்பத்தினருடன் மண உறவு கொள்ள மாட்டோம் எனப் பொதுமக்கள் மாறும் அளவிற்கு நாட்டை மாற்ற நாராயணன் போன்றோர் முயல வேண்டும். விழவிலும் இழவிலும் குடிப்பது நாகரிகம் என்னும் போக்கை நிறுத்த வேண்டும். மதுக்குடியரல்லர் என்னும் மருத்

By Ilakuvanar Thiruvalluvan
5/26/2010 3:26:00 AM

The last bharath's wordings are very super.the same CM once he started very first the arrock shop in tamil nadu.now he keep the TASMAC shop for,revenue and small group of peoples.He has no long run view,which openly reveal the truth of future generations.o god only save the tamil nadu people.

By n.s.prabaharan
5/22/2010 4:23:00 PM

மஞ்சத்துண்டுகாரருக்கு தன்குடும்பம்முழுவதும் சினிமா தொழிலில் உள்ளதால் சினிமாகாரர்கள் மற்றும் அவர்கள்தேவைகள்தான் முக்கியம் .தமிழ்நாட்டு மக்கள் எக்கேடுகேட்டால்என்ன. மஞ்சத்துண்டு வாழ்க. அவரது குடும்பம் வாழ்க. யார் செத்தால் என்ன. ISLAM IS PERFECT WAY FOR HUMAN.

By INDIAN
5/21/2010 11:15:00 PM

THIRUTTU KARUNANIDHI அரசோ,THAN KUDUMBAM VAZHA​​ சாராய வருமானத்துக்காக தனது ஆன்மாவையே அடமானம் வைக்கிறது.""நெஞ்சில் உரமும் இன்றி,​​ நேர்மைத் திறமும் இன்றி வஞ்சனை சொல்வாரடி கிளியே,​​ வாய்ச்சொல்லில் வீரரடி.''

By INDIAN
5/21/2010 10:25:00 PM

மஞ்சத்துண்டுகாரருக்கு தன்குடும்பம்முழுவதும் சினிமா தொழிலில் உள்ளதால் சினிமாகாரர்கள் மற்றும் அவர்கள்தேவைகள்தான் முக்கியம் .தமிழ்நாட்டு மக்கள் எக்கேடுகேட்டால்என்ன.

By anbu
5/21/2010 6:50:00 PM

it is jsut foolish for DMK government to say that 35000 people have been given jobs. NO doubt oprohibition has failed in the pst but should the government be the retailer of drinks. POliticians, media and the soceity have a role to ensure that our people live healthy lives and not fritter away their small earnings on drinks. This does not come about by asking TV channels to show a remakr of how smoking and drinking ruin us. The least the DMK could have done wws not to open liquor shops like streetcorner 'maligai kadai'. Good that DInamani is begining to encourage articles tht highlight the evils in soceity no matter if these have to swim against current trends in soceity. Especially, the language prfewss has a great role in this movement.

By s subramanyan
5/21/2010 4:05:00 PM

GOOD EDITORIAL. THE LEGACY OF KARUNANIDHI TO TAMILIAN YOUNGSTERS.VAAZHGA TAMILNADU. VAAZHGA KUDIMAGANGAL.

By S Raj
5/21/2010 12:53:00 PM

சிறப்பான கட்டுரை! திரு அ.​ நாராயணன் அவர்களே நன்றி! மதுவை குடிப்பது என்னவோ பெரிய சாகசம் என்பதுபோல் எல்லா திரைப்படங்களும்/சனியன் பெட்டிகளும்/ விளையாட்டுப் போட்டிகளும் காட்டுகிறது. மது மற்றும் போதை வஸ்துகளை விளம்பரம் செய்யகூடாது என்பது சட்டம்! ஆனால் இப்போது சட்டம் குப்பையில் (அ) அதே பெயரில் வேறு ஏதேனும் பொருட்களை சந்தைக்குவிட்டு (சோடா,தண்ணீர்,கேசட் இன்னபிற..) விளம்பரம் கன ஜோர்!.மக்கள் நலன் அரசாக இருந்தால் ஏதேனும் செய்யும், இந்தியாவில் நடப்பது "குடும்பநலஅரசு" அல்லவா! பி.கு:அடுத்தது "விபசாரவிடுதி" என்று நம்பத்தகுந்த வட்டாரத்தில் இருநதுதகவல் வந்திருக்கு!(புதுசாய் சேர்ந்தவர்தான் தலைமையாம்!)

By Ind!an
5/21/2010 11:58:00 AM

பேய் செய்யும் ஆட்சியில் பிணம் தின்னும் சாத்திரங்கள் - பாரதியின் கவிதையும் நினைவில் வருகிறது. பிணம் செய்யும் ஆட்சியில் பேய் தின்னும் சாத்திரங்கள் - இப்ப பாரதி இருந்த இப்படிதான் சொல்லி இருப்பாரோ...

By இனியவாசகம்
5/21/2010 10:45:00 AM

கட்டுரையாளரின் கவலையும் ஆழ்ந்த ஏக்கமும் புரிந்து கொள்ளமுடிகிறது. சமுக சீர்கேட்டை மாற்ற முடியாத இயலாமை நம்மை வாட்டுகிறது. காலத்தின் தேவை கருதி இளைய சமுதாயத்திற்கு விழிப்புணர்வு கொள்ள அவசியமான கருத்துக்கள். கட்டுரையாளருக்கு நன்றியும் வாழ்த்தும், தொடர்ந்து மேலும் பல அறிய கட்டுரைகளை எதிர்நோக்கும்....இனியவாசகம்

By இனியவாசகம்
5/21/2010 10:15:00 AM

மஞ்சத்துண்டு வாழ்க. அவரது குடும்பம் வாழ்க. யார் செத்தால் என்ன.

By திமுக தொண்டன்.
5/21/2010 8:54:00 AM

Excellent Article.

By Kumaran
5/21/2010 8:28:00 AM

இன்றைய நிலையில் பெரும்பாலான இளைஞர்கள் குடிப்பழக்கத்திற்கு அடிமையாகி வருவதை நாள்தோறும் காணமுடிகிறது. இந்நிலை நீண்டாள் எதிர்கால தமிழ்ச் சமூகம் மதிமங்கிப்போன சமூகமாக மாறிவிடும். இந்நிலையைப் போக்க வேண்டிய அரசே மதுக்கடைகளை நடத்துவது மிகக் கேவலமான ஒன்று. பணத்திற்காக எதையும் செய்யலாம் என்பதையே இது காட்டுகிறது. மதுக்கடைகளை மூடினால் 35,000 தொழிலாளர்களின் பணி பாதிக்கப்படும் என்பது ஏற்றுக் கொள்ளக்கூடிய வாதமல்ல. அப்பணியாளர்களுக்கு மாற்று ஏற்பாடுகளை அரசுதான் செய்து கொடுக்க வேண்டும். அவர்களின் பணிப் பாதுகாப்பிற்காக தமிழகத்தில் உள்ள ஏழு கோடி குடும்பங்களை வயிறெரிய விடலாமா?

By புதுவை ஏ.எழில்வசந்தன்
5/21/2010 8:19:00 AM
உங்கள் கருத்தைப் பதிவு செய்யுங்கள்