மாணவன் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
மாணவன் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

புதன், 16 அக்டோபர், 2013

வற்றியிராயிருப்பு மாணவனுக்குத் தேசிய விருது

http://img.dinamalar.com/data/largenew/Tamil_News_large_82765720131016013454.jpg

வத்திராயிருப்பு மாணவனுக்கு த் தேசிய விருது


மத்திய அரசின் அறிவியல் தொழில்நுட்ப கழகம் மற்றும் அதன் இணை நிறுவனமான தேசிய அறிவியல் கண்டுபிடிப்பு நிறுவனத்தின் சார்பில், ஒவ்வொரு ஆண்டும், பள்ளி மாணவர்களின் அறிவியல் கண்டுபிடிப்புகள் தேர்வு செய்யப்பட்டு, ஜனாதிபதியால் விருது வழங்கப்பட்டு வருகிறது. இந்த ஆண்டு விருதுக்காக, இந்தியா முழுவதும் 20,836 கண்டுபிடிப்புகள் சமர்ப்பிக்கப்பட்டிருந்தன. தமிழகத்தில் விருதுநகர் மாவட்டம் வத்திராயிருப்பு இந்து மேல்நிலைப் பள்ளியை சேர்ந்த மாணவன் டெனித் ஆதித்யா, "அட்ஜஸ்டபிள் எலக்ட்ரிசிட்டி எக்ஸ்டென்சன் போர்டு' என்ற மின்சாதனத்தை கண்டுபிடித்து, சமர்ப்பித்திருந்தார். விருதுக்கான தேர்வு, தேர்வு பெற்ற கண்டுபிடிப்புகளும், அவர்களுக்கான விருதும், நேற்று (அக்.,15) அறிவிக்கப்பட்டது. 38 கண்டுபிடிப்புகள் தேர்வு செய்யப்பட்டதில், வத்திராயிருப்பு மாணவன் டெனித் ஆதித்யாவின் மின்சாதனம், சிறந்த தேசிய கண்டுபிடிப்பாக தேர்வு செய்யப்பட்டு, பரிசும் அறிவிக்கப்பட்டது. தேர்வு பெற்றவர்களுக்கு, நவம்பர் 19 ல் ,அகமதாபாத் ஐ.ஐ.எம். மையத்தில் நடக்கும் விழவில், விருதுகளும், கண்டுபிடிப்புகளுக்கான காப்புரிமையும் வழங்கப்பட உள்ளது. மாணவர் கண்டுபிடிப்பான, "அட்ஜஸ்டபிள் எலக்ட்ரிசிட்டி எக்ஸ்டென்சன் போர்டு' ஒரு வகை பிளக்பாய்ண்ட் . இதில், பேன், மிக்சி, கிரைண்டர், ஓவன் உட்பட அனைத்து அளவு பிளக்குகளையும், இந்த ஒரே சாதனத்தில் பொருத்திக்கொள்ளலாம். அதிகபட்சமாக 17 க்கு மேற்பட்ட பிளக்குகளை பொருத்தலாம். உலக அளவில் 156 நாடுகளில், 8 விதமான பிளக்குகள் நடைமுறையில் உள்ளன. ஒரு நாட்டில் உள்ள பிளக்குகளை, அடுத்த நாட்டில் உள்ள பிளக்குகளில் பொருத்த முடியாது. ஆனால், இந்த மின் சாதனத்தில், உலகத்தில் உள்ள 8 விதமான பிளக்குகளையும், இதில் பொருத்தி, மின்சாரம் பெற்றுக்கொள்ள முடியும்.

திங்கள், 19 ஆகஸ்ட், 2013

மருத்துவ இடம் கிடைத்தும் தவிக்கும் மாணவன்


Home / சிறப்பு பகுதிகள் / மருத்துவ சீட் கிடைத்தும் கட்டணம் இல்லாமல் தவிக்கும் சேலம் மாணவன்
மருத்துவ சீட் கிடைத்தும் கட்டணம் இல்லாமல் தவிக்கும் சேலம் மாணவன்

மருத்துவ  இடம் கிடைத்தும் கட்டணம் இல்லாமல் தவிக்கும் சேலம் மாணவன்

சேலம், ஆக. 19
மருத்துவ படிப்பிற்கான சீட்டு கிடைத்தும் கட்டணம் செலுத்த பணம் இல்லாமல் திண்டாடுகிறான் சேலத்தை சேர்ந்த மாணவன் ஒருவன்.சேலம் மாவட்டம் சங்ககிரி அருகில் உள்ள வடுகப்பட்டி, தட்டாப்பட்டி பகுதியை சேர்ந்தவர் நெசவுக்கூலித் தொழிலாளி வெங்கடாசலம். இவரது மனைவி பூங்கொடி. இவர் விவசாய கூலி வேலை செய்து வருகிறார். இவர்களுக்கு வினோத்குமார்(17), இளவரசன் என்ற 2 மகன்கள் உள்ளனர்.
வினோத்குமார் அப்பகுதியில் உள்ள வடுகப்பட்டி அரசு மேல்நிலைப்பள்ளியில் 10ம் வகுப்பு முடித்தார். 450 மதிப்பெண் பெற்ற அவரை நாமக்கல்லில் உள்ள தனியார் பள்ளி நிர்வாகம் தனது பள்ளியில் 11 மற்றும் 12ம் வகுப்பில் இலவசமாக படிக்க வைத்தது. வினோத்குமார் 12ம் வகுப்பில் 1107 மதிப்பெண்கள் எடுத்துள்ளார். இவரது கட்டாப் மார்க் 188.5. மருத்துவம் படிக்க வேண்டும் என்பதற்காக கடுமையாக படித்த இவருக்கு கவுன்சிலிங்கில் மதுரை வேலம்மாள் மருத்துவக் கல்லூரியில் இடமும் கிடைத்துவிட்டது.
தாயும், தந்தையும் கூலித்தொழில் செய்வதால் மருத்துவம் படிப்புக்கு கட்டணம் செலுத்தும் அளவுக்கு பணவசதி இல்லாமல் போனது. அதிலும் கவுன்சிலிங்கில் இடம் கிடைத்தாலும் கல்லூரியில் அரசு நிர்ணயித்த கட்டணத்துடன், ஹாஸ்டல், உணவு என பல்வேறு கட்டணங்கள் என சுமார் ரூ.6 லட்சம் வரை கேட்டுள்ளனர்.கல்விக்கட்டணமே கட்டமுடியாத நிலையில் உள்ள தனக்கு உதவி செய்ய வேண்டும் என்று சேலம் மாவட்ட ஆட்சியர் அலுவலகத்தில் மாவட்ட ஆட்சியரின் நேர்முக உதவியாளரிடம் கோரிக்கை மனுவும் கொடுத்துள்ளார்.இரக்க மனம் உள்ளவர்கள் இந்த மாணவனின் கல்விக்கு உதவலாம். உதவுவார்கள் என்று நம்புவோம்.
- தினஇதழ்

ஞாயிறு, 12 மே, 2013

வறுமையின் பிடியில் மாநில முதலிட மாணவன்

வறுமையின் பிடியில் மாநில அளவில் முதலிடம் பிடித்த மாணவன்: நிறைவேறுமா இலட்சிய க் கனவு ?
நாமக்கல்: பிளஸ் 2 தேர்வில் மாநில அளவில் முதலிடம் பிடித்த நாமக்கல் மாணவர் செயசூர்யா, வறுமையின் காரணமாக, தனது லட்சியம் கனவாகிவிடுமோ என்ற அச்சத்தில் இருக்கிறார்.
தமிழகத்தில் பிளஸ் 2 தேர்வு முடிவுகள் கடந்த வியாழன் அன்று வெளியானது. இதில் நாமக்கல் மாவட்டம் திருச்செங்கோடு வித்யா விகாஸ் பள்ளி மாணவர் ஜெயசூர்யா 1189 மதிப்பெண்கள் பெற்று மாநில அளவில் முதலிடம் பிடித்தார். மாநில அளவில் முதலிடம் பிடித்ததும் நிருபர்களிடம் பேசிய மாணவர் ஜெயசூர்யா, "நான் 8ம் வகுப்பு முதல், இந்த வித்யவிகாஸ் பள்ளியில், எனது குடும்ப சூழல் காரணமாக, இலவச சலுகையின்கீழ் படித்து வருகிறேன். பத்தாம் வகுப்பு தேர்விலேயே, மாநிலத்தில் முதலிடம் வரவேண்டும் என்று முயற்சி செய்தேன். ஆனால், மாவட்டத்தில் மூன்றாமிடம்தான் கிடைத்தது. எனவே, பிளஸ் 2 தேர்வில், எப்படியும் முதலிடம் பிடித்துவிட வேண்டும் என்ற குறிக்கோளுடன் படித்தேன். எனக்கு ஆசிரியர்கள், பள்ளி நிர்வாகத்தினர், எனது தாயார் உள்ளிட்ட பலரும் உதவி புரிந்தனர். மருத்துவப் படிப்பில் சேர்ந்து படித்து, பின்னர், முதுநிலை மருத்துவப் படிப்பில் எம்.எஸ்.,ஆர்த்தோ படிக்க விரும்புகிறேன்" என்று தெரிவித்தார்.

வறுமை: மாணவர் ஜெயசூர்யாவின் தந்தை செந்தில் குமார், விபத்து ஒன்றில் சிக்கி முதுகு தண்டுவடம் பிரச்னை காரணமாக கடந்த சில ஆண்டுகளாக கோமா நிலையில் இருந்துள்ளார். தற்போது கோமா நிலையில் இருந்து மீண்டுள்ள செந்தில் குமார், தன்னால் தனது மகனின் படிப்புக்கு உதவ முடியவில்லையே என்ற வருத்ததில் உள்ளார். ஜெயசூர்யாவின் தாய் ஆனந்தி, கூலி வேலை செய்து குடும்பத்தை காப்பாற்றி வருகிறார்.

ஆர்த்தோ டாக்டராக விருப்பம்: தனது தந்தை விபத்துக்குள்ளாகி முதுகு தண்டுவடப்பிரச்னையில் சிக்கிய போது, தான் ஒரு ஆர்த்தோ டாக்டராகி தனது தந்தையைப் போல் கஷ்டப்படுவோரை குணமாக்க வேண்டும் என உறுதி எடுத்தார் ஜெயசூர்யா. தற்போது அந்த லட்சியத்தை நோக்கிய பயணத்தில் மாநில அளவில் முதலிடம் என்ற பெரும் வெற்றி பெற்றுள்ள போதும், குடும்ப வறுமை என்பது ஜெயசூர்யாவையும், அவரது குடும்பத்தாரையும் பெரும் அச்சத்தில் ஆழ்த்தி வருகிறது. எனினும் தனது லட்சிய கனவு நனவாகும் என்ற நம்பிக்கையுடன் காத்திருக்கிறார் ஜெயசூர்யா.

வியாழன், 4 ஏப்ரல், 2013

மே.வங்கத்தில் காவலர் தாக்கியதில் மாணவன் பலி : நாடு முழுவதும் கொந்தளித்த மாணவர்கள்




மே.வங்கத்தில் காவலர்  தாக்கியதில் மாணவன் பலி : நாடு முழுவதும் கொந்தளித்த மாணவர்கள்
கல்கத்தா -  மேற்குவங்க மாநிலத்தில் மாணவர் கூட்டமைப்பு தலைவர், போலீசார் தாக்கியதில் மரணமடைந்ததாக எழுந்த புகாரால் அம்மாநிலத்தில் மாணவர்களிடையே பெரும் கொந்தளிப்பு ஏற்பட்டு்ள்ளது. இந்த சம்பவத்தினை கண்டித்து நாடு முழுவதும் மாணவர்கள் போராட்டத்தில் ஈடுபட்டு வருகின்றனர். இது தொடர்பாக மனித உரிமை கமிஷன் விசா‌ரணைக்கு உத்தரவிடப்பட்டுள்ளது.

மேற்கு வங்க மாநிலத்தில் திரிணாமுல் காங்., ஆட்சி நடக்கிறது. முதல்வராக மம்தா பானர்ஜி உள்ளார். இம்மாநிலத்தில் மாணவர் சங்க தேர்தல் நடத்தும் முடிவினை அம்மாநில அரசு தள்ளிவைத்து உத்தரவிட்டிருந்தது. இதற்கு மாணவர்கள் சங்க கூட்டமைபினரிடையே பலத்த எதிர்ப்பு கிளம்பியது. நேற்று மாணவர்கள் கூட்டமைப்பினர் (எஸ்.எப்.ஐ.) சார்பில் கோல்கட்டாவில் பேரணி நடந்தது. அப்போது மாணவர் சங்க தேர்தலை நடத்த வேண்டும் என கோரி கோஷம் எழுப்பினர். இதில் போலீசார் அவர்கள் மீது தாக்குதல் நடத்தியதாக கூறப்படுகிறது.

போலீஸ் தாக்கியதில் தான் மாணவர் பலி
: இந்த தாக்குதலில் சுதீப்தா குப்தா (23) என்ற கல்லூரி மாணவரை, போலீசார் தாக்கியதில் காயமடைந்தார். கோல்கட்டா எஸ்.எஸ்.கே.எம். மருத்துவமனையில் சிகிச்சைக்காக கொண்டு செல்லப்பட்டு அங்கு சிகிச்சை பலனின்றி இறந்தார். மாணவர் இறந்த சம்பவம் மாநிலம் முழுவதும் காட்டுத்தீயாக பரவியது. சம்பவம் தொடர்பாக கண்ணால் பார்த்த சக மாணவர் கூறிய போது, போலீசார் சுதீப்தா குப்தாவை தலையில் தாக்கினர். காயத்துடன் போலீஸ் காவலில் தான் இருந்தார். பின்னர் அவரை மருத்துவமனைக்கு அழைத்துச்செல்வதில் தாமதம் ஏற்பட்டது. இதனால் அவர் இறந்தார் என்றார்.

நீதி விசாரணை நடத்த கோரிக்கை
இது குறி்த்து முதல்வர் மம்தா பானர்ஜி கூறுகையில், மாணவர் சுதீப்தா குப்தா இறந்தது துரதிருஷ்டவசமானது. மம்தாவின் இந்த கருத்திற்கு எதிர்க்கட்சிகள் கண்டனம் தெரிவித்தன. தற்போது இந்த விவகாரம் பூதாகரமாக வெடித்துள்ளது. மாணவர் பலியான சம்பவத்திற்கு கண்டனம் தெரிவித்து டில்லியில் மாணவர்கள் தீவிர போராட்டம் நடத்தி வருகின்றனர். சென்னையிலும் சில மாணவ அமைப்புகள் போராட்டம் நடத்தினர்.

இதற்கிடையே மாணவர் இறந்தது குறித்து மனித உரிமை கமிஷன் விசாரணை நடத்த உத்தரவிட்டுள்ளது. இறந்த மாணவனின் இறுதி சடங்கிற்காக அவரது வீட்டின் முன்பு அரசியல் கட்சிகள், பொதுமக்கள் , மாணவர் அமைப்புகள் குவிந்து வருகின்றனர். மாணவர் இறந்த சம்பவத்தினை எதிர்க்கட்சிகள் அரசியலாக்கிவிட்டனர். எனினும் முதல்வர் மம்தா, இறந்த மாணவனின் குடும்பத்திற்கு தேவையான உதவிகளை அரசு செய்யும் என உறுதியளித்துள்ளார். இது தொடர்பாக இருவர் கைது செய்யப்பட்டதாக மம்தா கூறினார். மாணவர் இறந்தது குறித்து நீதி விசாரணை நடத்த வேண்டும் என எதிர்க்கட்சியான மார்க்சிஸ்ட் கட்சி தெரிவித்துள்ளது. காங். கட்சியும் கண்டனம் தெரிவித்துள்ளது.

சனி, 16 பிப்ரவரி, 2013

சூரியஒளி மருந்து தெளிப்பான்: மாணவனின் செயல் விளக்கம்




சூரியஒளி மருந்து தெளிப்பான்: வியக்க வைத்தது மாணவனின் செயல் விளக்கம்

புதுச்சேரி: காரைக்கால் பள்ளி மாணவன் வடிமைத்துள்ள சூரிய ஒளி மருந்து தெளிப்பான் அனைவரையும் வியக்க வைத்துள்ளது.
வயல்களில் மனித தி கொண்டு இயக்கும் ஸ்பிரேயர்கள் பயன்படுத்துவதால் விவசாயிகளுக்கு சோர்வு ஏற்படுகிறது.பெட்ரோல் ஸ்பிரேயர்கள் பயன்படுத்தினால் விரைவாக மருந்து தெளிக்க வேண்டும். இரைச்சல், அதிகமாக இருக்கும்.இதற்கு மாற்றாக சூரிய ஒளி பூச்சி கொல்லி மருந்து தெளிப்பானை காரைக்கால் கீழக்காசாகுடி ஆத்மாலயா பள்ளி 8ம் வகுப்பு மாணவன் முகேஷ் நாராயணன்,13; வடிமைத்துள்ளார். முதல்வர் ரங்கசாமியை நேற்று சந்தித்து செயல்விளக்கம் காண்பித்தார்.இது குறித்து பள்ளி மாணவன் முகேஷ் நாராயணன் கூறியதாவது:இந்த புதிய வகை ஸ்பிரேயரில் சோலர் பேனல், டி.சி., மோட்டார், டேங்க், நாசில், பேட்டரி, சுவிட்ச் போர்டு, மொபைல் போன் சார்ஜர், புல் வெட்டி, மின்சார பல்புகளுடன் ஒருங்கிணைந்து உருவாக்கப் பட்டுள்ளது. இவை அனைத்தும் முற்றிலும் சூரிய ஒளியில் இயங்கும்.விவசாயிகளுக்கு தலைகவசம் போல் செயல்படும் சூரிய ஒளி தகட்டில் இருந்து கிடைக்கும் மின்சாரம் உற்பத்தியாகி பேட்ரியில் சேமிக்கப்படும்.டி.சி.,மோட்டார், மருந்து சேமிப்பு கலனில் இருந்து, மருந்து மிகவும் எளிதாக பயிர்கள் மேல் தெளிக்கும். இதனை மற்ற வகை ஸ்பிரேயர்கள் போல் வேகமாக இயக்க வேண்டிய அவசியம் இல்லை. வேகத்தை மாற்றியமைத்துகொள்ளலாம். தேவையற்ற சப்தமும் வராது. இதில் உள்ள லெட் விளக்குகளை வீடுகளுக்கு மின் விளக்காகவும் பயன்படுத்திக்கொள்ளலாம். 3 கிலோ எடை கொண்ட சூரிய ஒளி மருந்து தெளிப்பான் உருவாக்க 5 ஆயிரம் ரூபாய் மட்டுமே தேவைப்பட்டது' என்றார்.