“தமிழியக்கத் தலைமைப் போராளி இலக்குவனார்” நூலை இரு நாள் இலவயமாகத் தரவிறக்கம் செய்யலாம்.

அகரமுதல

இலக்குவனார் திருவள்ளுவன்      18 April 2020      No Comment

“தமிழியக்கத் தலைமைப் போராளி இலக்குவனார்” நூல்
இரு நாள் இலவயமாகத் தரவிறக்கம் செய்ய வாய்ப்பு!

“தமிழியக்கத் தலைமைப் போராளி இலக்குவனார் என்னும் நூல் பேராசிரியர் முனைவர் மறைமலை இலக்குவனாரால் எழுதப்பெற்றது. இது குறித்து அவர்,

தம் வாழ்நாளெல்லாம் தமிழ்நலனுக்காகப் போராடிப் புகழுடல் எய்திய செந்தமிழரிமா சி.இலக்குவனார் அவர்களின் தமிழ்ப்பணி இன்னும் முறையாகப் போற்றப்படவில்லை. 2013-ஆம் ஆண்டு நாடெங்கும் தமிழியக்க நூற்றாண்டு விழாக்கள்  நடத்தியவேளையிலும் அவ் விழாக்களில் அவர் புறக்கணிக்கப்பட்டார்.தெளிந்த அறிவுக்குத் தமிழ்நாட்டில் பஞ்சம் என்பதே காரணம்.

முள்ளிவாய்க்கால் முற்றத்தில் இத்தகைய தவறு நேரவிருந்தது. மன்னை நடராசன் கவனத்திற்குக் கொணர்ந்து கடைசிநேர இடைச்செருகலாகப் பேராசிரியர் பற்றிய உரை சேர்க்கப்பட்டது. அந்த நேரம் எழுதிய கட்டுரை ”தமிழியக்கத் தலைமைப் போராளி இலக்குவனார்” மன்னை நடராசன் அவர்களால் அவரது ‘புதிய பார்வை’ இதழில் வெளியிடப்பட்டது. அக் கட்டுரையுடன் இலக்குவனார் நூற்றாண்டு விழாக்களில் ஆற்றிய எழுத்துரைகளும் இணைத்து “தமிழியக்கத் தலைமைப் போராளி இலக்குவனார்” என்னும் கிண்டில் வெளியீடாக வெளியிட்டுள்ளேன்.

எனத் தெரிவித்துள்ளார்.

தனித்தமிழ்ப் பணிகளுக்கு வழிகாட்டி வேண்டும் என்போரும் தனித்தமிழ் இயக்கக் கடந்த கால வரலாற்றைத் தெரிந்து கொள்ளவும் உறுதுணையாய் இந்நூல் அமையும்.

கிண்டில் உறுப்பினர்கள் இதனை வழக்கம்போல் படித்திட இயலும். பிறருக்கு விலை 2 அமெரிக்கப் பணம் அல்லது 154 இந்தியப் பணம். எனினும்

 19/4/20 ஞாயிறு & 20/4/20 திங்கள் இரு நாள்களும் யார் வேண்டுமாயினும் இலவசத் தரவிறக்கம்  செய்துகொள்ளலாம். நேரம் கிடைக்கும் பொழுதெல்லாம் படித்துக் கொள்ளலாம்.

இணைப்பிற்கு

https://www.amazon.com/dp/B0876DLZQ3

அல்லது அமேசான் தளம் சென்று நூலின் பெயர் அல்லது நூலாசிரியர் பெயர்வழித் தேடினாலும் புத்தகம் கிடைக்கும்.

தமிழில் பிறமொழிக் கலப்பு 1/4 : மறைமலை அடிகள்

அகரமுதல

இலக்குவனார் திருவள்ளுவன்      16 April 2020      No Comment

(தனித்தமிழ் மாட்சி – மறைமலையடிகள் 3 இன் தொடர்ச்சி)

தமிழில் பிறமொழிக் கலப்பு 1/4 

 இந் நிலவுலகிற் பழமைக் காலந் தொட்டு இன்றுகாறும் வழங்கிவரும் மொழி தமிழ் ஒன்றேயாம் என்பதை முன்னர் ஒருமுறை விளக்கிக் காட்டினாம். மற்றை மொழிகளிற் சில பன்னூறாண்டுகட்கு முன்னே இறந்துபோயின, பல சின்னூறாணடுகளாகவே தோன்றி நடைபெறுகின்றன. சில பழமையாகி இறந்தன. பல புதுமையுற்றுப் பிறந்தன. பழமையும் புதுமையும் ஒருங்குடைய ஒரு மொழியை அவற்றினிடத்தே காண இயலாது. மற்று தமிழ் மொழியோ பழமைக்குப் பழமையுமாய்ப் புதுமைக்குப் புதுமையமாய்த் தன் இயல்பு பிறழாது, ஏறக்குறைய முந்நூறு நூறாயிரம் மக்களினிடையே உலாவி வருகின்றது. இங்ஙனம் இது பண்டுதொட்டே உயிரொடு விளங்கி வருதலின், முற்காலத்தில் வழங்கிய மொழிகளின் சொற்கள் சிலவும் பிற்காலத்தில் நடைபெறும் மொழிகளின் சொற்கள் சிலவும் இதன் கண்ணே கலந்து காணப்படுதல் இயற்கையே யாம். யாங்கனமெனின்; நீண்டகாலம் உயிரோடிருக்கும் ஒருவன் பல நாடுகளிலுஞ் சென்று முயலுந் தொழின் முயற்சியும் மிகுந்த சுறுசுறுப்பும் உடையவனாயிருந்தால், அவன் தனதிளமைக் காலத்தில் தன்னோடிருந்து இறந்து போனவர் வைத்த பொருள்களிற் சிலவற்றையுந், தனது பிற்காலத்தில் தன்னோடிருப்பவர் வழங்கும் பண்டங்களிற் சிலவற்றையுங் கையாள நேர்வதுபோல, உயிரொடு சுறுசுறுப்பாய் உலவிவருந் தமிழ்மொழியுந் தான் வழங்கிய பண்டை நாளில் வழங்கி யிறந்த ஆரியம் இலத்தீன் முதலான மொழிகளின் சில சொற்களையும், இஞ்ஞான்று தன்னொடு சேர்ந்துலாவும் ஆங்கிலம் துலுக்கு முதலான மொழிகளின் சில சொற்களையுந் தான் எடுத்துப் பயன்படுத்தி வருகின்றது.

இன்னும் இதனை விளக்கிக் காட்டல் வேண்டின், உயர்ந்த மலை முகட்டில் என்றும் நீர் ஊறும் ஒரு சுனையிலிருந்து இடையறாது ஓடிவரும் ஓர் அருவிநீருக்குத் தமிழ்மொழியை ஒப்பிட்டுச் சொல்லலாம்; இனி இவ்வருவிநீர் ஓடிவரும் இடையிடையே சுரப்பின்றிச் சேறும் நீருமாய் நிற்குங் குளங்குட்டைகட்கு வழக்கில் இல்லாத ஆரியம் இலத்தீன் முதலான மொழிகளையும், இன்னும் அவ்வழியின் கீழே இருபாலும் ஆங்காங்குப் புதிது தோன்றித் தனித்தனியே ஓடும் யாறுகளுக்கு ஆங்கிலம் துலுக்கு முதலான மொழிகளையும், இவ் யாறுகளிலிருந்து பிரிந்து வந்து அவ்வருவியொடு கலக்குஞ் சிறுசிறு கால்களின் நீருக்கு அம்மொழிகளிலிருந்து தமிழில் வந்து கலக்குஞ் சில சொற்களையும் ஒப்பாகச் சொல்லலாம். பன்னெடுங் காலமாக வறளாது ஓடிவருந் தமிழருவியானது தான் வரும் வழியிலுள்ள ஆரியம் முதலான பழைய குளங் கூவல்களிற் சென்று அவற்றின் சொற்களாகிய நீரையுந் தன்னொடு கலப்பித்துப் புதியவாக்கிப் பின்னும் இடையிடையே தண்கண் வந்து கலக்கும் பின்றைக்காலத்துச் சொற்களாகிய சிறு கால்களின் நீரையுந் தன்னுருவாக்கித் தன்னை வழங்கும் மக்கட்குப் பெரிதும் பயன்பட்டு வருகின்றது.

இனி, ஒரு மொழியின்சொற்கள் மற்றொரு மொழியில் வந்து கலக்கவேண்டுவதுதான் என்னையென்று வினாவினால்; ஒரு மொழியினைப் பேசும் மக்கள் தம் நாட்டையும் தம் இனத்தாரையும் விட்டு நீங்காமல் இருக்கும் வரையில், அவர் தாம் இருக்கும் நாட்டின்கண்ணே பிறமொழி பேசும் பிறநாட்டார் வந்து சேராதிருக்கும் வரையில், அவர் பேசும் மொழியில் அயல்மொழிச் சொற்கள் வந்து கலப்பதற்கு இடமேயில்லை. அங்ஙனமின்றி அவர் பல நாடுகளையும் அந்நாடுகளிலுள்ள பலதிறப்பட்ட மக்களையும் போய் கண்டும், அவர் நாட்டுப் பண்டங்களைத் தாம் விலைகொண்டும், தம்நாட்டுப் பண்டங்களை அவர்கட்கு விற்றும், அவர்தம் வழக்கவொழுக்கங்கள் சிலவற்றைத் தாங் கைப்பற்றியும், தமக்குரிய சிலவற்றை அவர் கைப் பற்றுமாறு தந்தும், ஒருவரது நாகரிகத்தை ஒருவர் பின்பற்றியும் ஒழுகும் உயர்ந்த அறிவும் உயர்ந்த நடையும் வாய்ந்தவர்களா யிருந்தால் அவர் பேசும் மொழியில் மற்ற மொழிச்சொற்கள் புகுந்து கலவாமல் இரா. ஆகவே, இம்முறையால் நோக்குமிடத்துப் பலவகையாலும் உயர்ந்த நாகரிகவாழ்க்கை யுடையராய் விளங்கிய தமிழ் மக்கள் வழங்கிவந்த தமிழிற் பிறமொழிச் சொற்கள் சில வந்து கலக்கலானது இயற்கையேயா மென்பது உணரப்படும்.

அங்கனமாயிற், பழைய காலத்தில் றமிழ் மக்கள் அயல் நாட்டவரொடு சென்று அளவளாவும் நாகரிக முதிர்ச்சி உடையரா யிருந்தா ரென்பதற்குச் சான்று என்னை யெனின்; இற்றைக்கு ஐயாயிர ஆண்டுகட்கு முன்னரே எழுதப்பட்ட தொல்காப்பியம் என்னும் நூல் ஒன்றுமே ஒரு பெருஞ் சான்றாமென்க. அருமை பெருமையிற் சிறந்த இவ் வொருநூலை ஒரு சிறிது உற்றுநோக்குவார்க்கும்; இந்நூல் எவ்வளவு பழமை யுடையதாய் இருக்கவேண்டு மென்பதும், மிகப் பழையநாளிலே இவ்வுயர்ந்தநூலை எழுதிய ஆசிரியரோடு ஒருங்கிருந்த தமிழ் முதுமக்கள் எத்துணைச் சிறந்த அறிவும் நாகரிகமும் வாய்ந்தவராய் யிருந்திருக்கவேண்டுமென்பதும் அவர் உள்ளத்திற் பதியாமற்போகா. இந்நூலின்கண் உள்ள “முந்நீர் வழக்கம் மகடூஉவோடில்லை“ என்னுஞ் சூத்திரத்தாற் பண்டைத் தமிழ்மக்கள் பொருள் ஈட்டும் பொருட்டுத் தம் மனைவி மக்களையும் நாட்டையும் விட்டுக் கடல் வழியே மரக்கலன்களில் ஏறித் தொலைவான நாடுநகரங்களிற் சென்று சேர்வரென்பது பெறப்படுகின்றது. தமிழர்கள் கடல்தாண்டிச் சென்று வேற்றுநாடுகளிற் பொருள்முயற்சி செய்த்ததுபோலவே, வேற்று நாட்டவரும் தமிழ்நாட்டிற் போந்து பல முயற்சிகளை நடத்தினாரென்பது ஈபுருமொழியில் எழுதப்பட்ட பழைய விவிலிய நூலினால் இனிது விளங்குகின்ற தன்றோ?

காவிரிப்பூம்பட்டினத்திற் கரிகாற்சோழன் என்னும் வேந்தர்பெருமான அரசாண்டபோது, பல்வேறு மொழிகள் வழங்கிய பலவேறு தேயத்தாரும் அந் நகரத்தினிடத்தே போந்து கலந்திருந்து பல தொழின்முயற்சி நடத்தினமையும்; கடலுக்கு அப்பாலுள்ள நாடுகளிலிருந்து குதிரைகள் வந்தமையும்; இமயம் மேரு முதலிய மலைகளிலிருந்து பொன்னும் மணியும், மேற்கணவாய் மலைகளிலிருந்து சந்தனைக்கட்டை அகிற்கட்டைகளுந். தென் கடலிலிருந்து முத்துகளுங், கீழ்க்கடலிலிருந்து பவளங்களுங், கங்கையாற்றிலிருந்து அதன் பொருள்களும், இலங்கை பருமா என்னும் நாடுகளிலிருந்து அவற்றின் விளைபொருள்களும் அந்நகரத்தில் வந்து விலயானமையும், இற்றைக்குச் சிறிதேறக்குறைய இரண்டாயிரம் ஆண்டுகளுக்குமுன் இயற்றப்பட்ட பட்டினப்பாலையிலும், அதற்குச் சிறிது பிற்பட்ட சிலப்பதிகாரத்திலும் விளக்கமாகச் சொல்லப்பட்டிருக்கின்றவல்லவோ? கிரேக்க நாட்டிலுள்ள யவனர்கள் தமிழ்நாட்டிற் போந்து தமிழ அரசர்களின் கீழ்ப் பல அலுவல்கள் பார்த்தமை பெருங்கதை, முல்லைப்பாட்டு முதலான பழந்தமிழ்ப்பாட்டுகளில் நன்கு குறிக்கப்ட்டிருக்கின்றது. இங்ஙனம் பண்டைநாளில் தமிழ்நாட்டார் அயல்நாடுகளிலும் அயல்நாட்டார் தமிழ் நாடுகளிலும் போந்து ஒருவரோடொருவர் அளவளாவியிருந்தமை இனிது புலப்படுதலின் வேற்று நாட்டவர்க்குரிய மொழிகளின் சொற்களிற் சில தொன்றுதொட்டே தமிழிற் புகுந்து வழங்கவாயின என்று உணர்தல் வேண்டும். இவ்வாறு நேர்ந்த கலப்பின் றன்மையை ஆராய்ந்து உணர்வார்க்குத் தமிழர் பண்டைக்காலத்திலேயே நாகரிகத்திற் சிறந்து விளங்கினா ரென்பது புலனாகும்.

(தொடரும்)

மறைமலை அடிகள்,  தனித்தமிழ் மாட்சி

திருவள்ளுவர் வரையறுத்த வறுமை ஒழிப்பியல் சிந்தனைகள் 3/4 – பேராசிரியர் வெ.அரங்கராசன்

அகரமுதல

இலக்குவனார் திருவள்ளுவன்      15 April 2020      No Comment

(திருவள்ளுவர் வரையறுத்த வறுமை ஒழிப்பியல் சிந்தனைகள் 2/4 இன் தொடர்ச்சி)

திருவள்ளுவர் வரையறுத்த வறுமை ஒழிப்பியல் சிந்தனைகள் 3/4

–    9.0.0.தனிமனிதர் அளவில் வறுமை ஒழிப்புச் சிந்தனைகள் — குறள்கள் 10

            தனிமனிதன், தன் அளவில் வறுமை ஒழிப்புக்கு எவற்றை, எப்படிச் செய்ய வேண்டும் என்பது பற்றித் திருவள்ளுவர் பதிவு செய்துள்ளவற்றை இங்குக் காணலாம்.

9.1.0.அக்குறள்கள்:

            92, 221, 222, 223, 225, 226, 227, 228, 230, 231

9.2.0.தனிமனிதர் அளவில் வறுமை ஒழிப்புச் சிந்தனைகள் — தொகுப்பு

1.மனமகிழ்ச்சியுடன் வறியவர்க்கு வழங்குதல்

2.ஏழைகளது வறுமை ஒழிக்கத் தேவையான ஒன்றைக் கொடுத்தல் 

3.மேல்உலகம் இல்லை எனச் சொன்னாலும் ஏழைகளுக்குக் கொடுத்தல்

4.”ஏதும் இல்லை” எனும் துன்பச் சொல் சொல்லாமல் கொடுத்தல்

5.வறுமை ஒழிப்பு முயற்சியில் ஒன்றாக ஏழைகளது பசியைத் தீர்க்கும் பேராற்றலைக் கொண்டு வாழ்தல்  

6.செல்வம் ஏழைகளின் பசி தீர்க்கவே என உணர்ந்து ஈதல்

7.ஏழைகளோடு உணவைப் பகிர்ந்து அளித்துத் தானும் உண்ணல் 

8.ஏழைகளின் வறுமை ஒழிப்புக்குப் பயன்படும் வகையில் தேவை யாவை கொடுத்து இன்புறுதல்

9.ஈயா நிலைத் துன்பம், சாவுத் துன்பத்தினும் கொடியது என உணர்ந்து இடைவிடாது ஈதல்  

10.புகழ் தரும்படி உண்மை சார்ந்து ஈதல்

10.0.0.குடும்ப அளவில் வறுமை ஒழிப்புச் சிந்தனைகள் — குறள்கள் 10

            கொடுமை பல செய்யும் வறுமையின் வேரறுக்கக் குடும்பங் களின் பங்களிப்பும் மிகவும் இன்றியமையாதது. அந்த வகையில் வறுமை ஒழிப்பில் குடும்பங்கள் எவற்றைச் செய்ய வேண்டும் என்பதையும் பன்முக ஆய்வுத் திறனார் திருவள்ளுவர் வரை யறுத்துள்ளார். அவை கீழே அளிக்கப்பட்டுள்ளன.

10.1.0.அக்குறள்கள்:

             42, 43, 44, 81, 83, 84, 85, 86, 90, 1107

10.2.0.குடும்ப அளவில் வறுமை ஒழிப்புச் சிந்தனைகள் – தொகுப்பு

 1.துறவர்கள், ஏழைகள், ஆதரவற்றோர் ஆகியோர்  வறுமையைப் ஒழித்தல் 

2.தென்புல அகதிகள், விருந்தினர்கள், உறவர்கள் ஆகியோரை    வறுமையிலிருந்து காத்தல்

3.ஏழை, எளியோருடன் உணவைப் பகிர்ந்து அளித்து உண்ணல்  .

4.விருந்தினர்கட்கு விருந்து அளித்தல், வேண்டிய உதவிகளைச் செய்தல்

5.விருந்தினர்களுக்கு நாள்தோறும் விருந்து அளித்துக் காத்தல் 

6.முகமலர விருந்தினர்கள் விரும்பும் நல்ல விருந்து அளித்தல் 

7.விருந்து அளித்தபின் மீதி உணவை உண்ணும் விருந்து ஓம்பல்

8.வந்த விருந்தினர்க்கு விருந்து அளித்துவிட்டு, இனி வரும் விருந்தினர்களை எதிர்பார்த்துக் காத்திருத்தல்

9.வருத்தும் பசியால் வாடி வரும் விருந்தினர் முகம் கோணாமல் விருந்து அளித்துக் காத்தல்

10.தம் உழைப்பால் கட்டிய வீட்டில் வாழ்க்கைத் துணையுடன் ஏழை களோடு பகிர்ந்து அளித்து உண்டு இன்புறுதல்

11.0.0.சமுதாய அளவில் வறுமை ஒழிப்புச் சிந்தனைகள் — குறள்கள் 10

            சமுதாயத்தார்கள் தங்களது வறுமையின் வேரினை அறுத்து வீழ்த்த வேண்டும்; மற்றவர்களது வறுமையின் வேர்களையும் அறுத்து வீழ்த்த வேண்டும்.

அவற்றிற்கு என்ன என்ன செயற்பாடுகளைச் செய்தல் வேண்டும் என்பதைத் திருவள்ளுவர் ஆழமாகச் சிந்தித்து, அழகாகத் திருக்குறளில் பதிவு செய்துள்ளார். அவற்றை  இங்கு அறியலாம்.

11.1.0.அக்குறள்கள்:

            212, 216, 217, 218, 322, 480, 1005, 1054, 1057, 1067

11.2.0.சமுதாய அளவில் வறுமை ஒழிப்புச் சிந்தனைகள் — தொகுப்பு

1.முயன்று சேர்த்த எல்லாப் பொருள்களையும் தகுதியான வறிய வர்களுக்குக் கொடுத்தல்

2.பொதுக்கொடை விருப்பத்தோடு செல்வத்தை உலகத்தார் பசி தீர்க்கப் பயன்படக் கொடுத்தல்

3.பெரும்தன்மையர் செல்வம் உலகத்தார் நோய் தீர்க்கப் பயன்படக் கொடுத்தல்

4.கொடைக்கு வழிஇல்லாக் காலத்தும் பொதுக்கொடை செய்தல் 

5.உணவைப் பல உயிர்களோடும் பகிர்ந்து உண்ணல்

6.செல்வம் நிலையற்றது; அது பெற்றால், வறுமை ஒழியும்படி நிலையான அறச் செயல்களைச் செய்தல்

7.சம வாய்ப்பு வாய்க்கும்படி பொதுக்கொடை செய்தல்

8.தேடிய கோடிப் பொருள்கள் எல்லாம் கொடுப்பதற்கும் தாம் துய்ப்பதற்கும் என உணர்தல்

9.வறியர்களது வறுமையை ஒழிக்கப் பொருள் கேட்டுப் பெறுதல் கொடுத்தலுக்குச் சமம். ஆதலால், அத்தகு அறத்தைச் செய்தல்

10.வறியவர்களைக் கண்டு எள்ளி நகையாடாது, முகமலர்ந்து பொதுக்கொடை செய்தல்

12.0.0.நாட்டு அளவில் வறுமை ஒழிப்புச் சிந்தனைகள் — குறள்கள் 10

ஒரு நாட்டு ஆட்சியர் தமது நாட்டு மக்களைத் துன்புறுத்தும்   கொடிய வறுமையிலிருந்து காக்க வேண்டும். செல்வ வளத்தைப் பெருக்க வேண்டும். பிற நாடுகளில் நிலவும்  வாட்டும் வறுமை யையும் ஓட்ட வேண்டும்.

இவற்றை எல்லாம் நுட்பமாக — திட்பமாகச் சிந்தித்துப் பார்த் திருக்கின்றார் நுண்ணறிவர் முப்பாலார். அச்சிந்தனைகளை உலகம் முழுவதற்கும் பொருந்தும் வகையில் முப்பாலில் பதிவுகளாகத் தந்துள்ளார்.

அச்சிந்தனைகளை உலக நாடுகள்  அனைத்தும் தலைமேற் கொண்டு கடைப்பிடியாகக் கொண்டால் எங்கும் எப்போதும் வறுமை என்னும் வருத்தும் பெருங்கொடுமையின் வேர் அறுபடும்;  வறுமை, வறுமையுற்று வீழும். வளமை வாழும். அத்திருவள்ளு வப் பதிவுகளை இனி இங்குக் காண்போம். 

12.1.0.அக்குறள்கள்

            381, 385, 390, 554, 555, 558, 582, 731, 732, 733

பேராசிரியர் வெ.அரங்கராசன்

 முன்னாள் தமிழ்த் துறைத் தலைவர்

 கோ.வெங்கடசுவாமி நாயுடு கல்லூரி

          கோவிற்பட்டி — 628 502

பேரா.எழுத்தாளர் அய்க்கண், காலனிடம் கதை சொல்லச் சென்றார்!

அகரமுதல

இலக்குவனார் திருவள்ளுவன்      12 April 2020      No Comment

பேரா.எழுத்தாளர் அய்க்கண், காலனிடம் கதை சொல்லச் சென்றார்!

உலகத் தமிழ் எழுத்தாளா் சங்கத்தின் சிவகங்கை மாவட்டத் தலைவர், பேராசிரியர் எழுத்தாளர் அய்க்கண் நேற்று(11.04.2020)பகலில் நெஞ்சுவலி ஏற்பட்டு இரவில் உயிாிழந்தார்.

திருப்பத்தூர் ஆறுமுகம் பிள்ளை சீதையம்மாள் கல்லூரித் தமிழ்த் துறைத் தலைவராகப் பணியாற்றி ஓய்வு பெற்றவர்.

மாணவர்களின் அன்பிற்குரியவராகத்திகழ்ந்தவர் எழுத்தாளராக எண்ணற்ற வாசகர்களின் அன்பிற்கும் உரியவரானார்.

ஏறத்தாழ 1,000 சிறுகதைகள், புதினங்கள், நாடகங்களை எழுதியுள்ளார். இவரது படைப்புகள் 71 நூல்களாக வெளிவந்துள்ளன. பல்கலைக்கழக மாணவர்கள் இவரது படைப்புகளை இளமுனைவர், முனைவர் பட்டங்களுக்கு ஆய்வு செய்துள்ளனர்.

ஆங்கிலம், இந்தி, வங்காளி, மலையாளம், கன்னடம், தெலுங்கு, ஒரியா முதலிய மொழிகளில் இவரது கதைகள் மொழிபெயர்க்கப் பட்டுள்ளன.

தமிழக அரசு ஆங்கிலம் முதலான 22மொழிகளில் பெயர்த்து வெளியிட்டசிறுகதைத் தொகுப்பில் இவரது சிறுகதையும் இடம் பெற்றுள்ளது.சாகித்திய அகாதமியின் தமிழ்ச்சிறுகதைத் தொகுப்பிலும் இவரது சிறுகதை இடம் பெற்றுள்ளது.

அகில இந்திய வானொலி நிலையத்தின் நாடகப் போட்டியில் முதல் பரிசு பெற்ற இவரது நாடகம் 19 தேசிய மொழிகளில் மொழிபெயர்க்கப்பட்டு வானொலியில் ஒலிபரப்பப்பட்டது.

தமிழக அரசின் முதற் பரிசை இவரது படைப்புகள் மூன்று முறை வென்றுள்ளன.

தினமணி கதிர், கல்கி, கலைமகள், அமுதசுரபி முதலான இதழ்கள்நடத்திய வரலாற்றுப்புதினம், சிறுகதை, குறும்புதினம் முதலான போட்டிகளில் பங்கேற்றும் முதல் பரிசுகள் பெற்றுள்ளார்.

மலேசியாவில் 2005இல் நடைபெற்ற உலகத் தமிழ்மறை ஆராய்ச்சி மாநாட்டின் உலகச் சிறுகதைப்போட்டியிலும் 2007இல் பாரிசு தமிழ்ச் சங்கம் பாரதியாரின் 125ஆம் ஆண்டு விழாவை முன்னிட்டு  நடத்திய அனைத்துலகச் சிறுகதைப் போட்டியிலும் முதல் பரிசு வென்றுள்ளார்.

உத்தரப் பிரதேச மாநில அரசு தமிழகம், கேரளம், ஆந்திரம், கருநாடகம் ஆகிய நான்கு மாநில எழுத்தாளரிடையே நடத்திய சிறுகதைப் போட்டியிலும் இவரே முதல்பரிசு பெற்று வாகை சூடினார்.

ஆசியவியல் நிறுவனம் ஆங்கிலத்தில் வெளியிட்டுள்ள தமிழ் இலக்கியக் கலைக்களஞ்சியத்தில் இவரைப்பற்றிய மதிப்பீட்டுக்கட்டுரையைச் சேர்த்துள்ளது.

தமிழக அரசின் அண்ணா விருது, நற்கதை நம்பி, பொற்கிழி விருது, புதிய இலக்கியச் செல்வர், எழுத்துவேந்தர் முதலான பல பட்டங்களையும் விருதுகளையும் பெற்றுள்ளார்.

இவருடைய புத்தகங்கள் சென்னை, மதுரை, கோவை, திருச்சி பல்கலைக் கழகங்களிலும், தன்னாட்சிக் கல்லூரிகளிலும் சிங்கப்பூர்ப் பள்ளிகளிலும் பாட நூல்களாக வைக்கப்பெற்றுள்ளன.

தமிழக அரசின் +2 ஆம் வகுப்புத் துணைப்பாட நூலில் இவருடைய கதைகள் பாடமாகச் சேர்க்கப்பெற்றுள்ளன.

இறுதிச்சடங்கு காரைக்குடி கம்பன் மணிமண்டபம் அருகே கைலாசநாதா் 3-ஆம் வீதியில் ஞாயிற்றுக்கிழமை பிற்பகலில் நடைபெறுகிறது. இருப்பினும் மகுடைத் தொற்றினால் உள்ள கட்டுப்பாடுகளால் பங்கேற்பதைத் தவிர்க்கவும். தொடா்புக்கு 8903433292.

பேராசிரியர் எழுத்தாளர் அய்க்கண் மறைவிற்கு அகரமுதல மின்னிதழும், தமிழ்நாடு-புதுச்சேரி தமிழ்அமைப்புகளும், தமிழ்க்காப்புக்கழகம், இலக்குவனார் இலக்கிய இணையம், ஆகியனவும் ஆழ்ந்தஇரங்கலைத் தெரிவிக்கின்றன.

நன்றி – தினமணி, தமிழ் விக்கிபீடியா

00

முகநூல் பதிவு:

என் அன்பிற்குரிய என்மீது அன்பு கொண்ட ஐக்கண்/அய்க்கண் அவர்கள் மறைவிற்கு ஆழ்ந்த இரங்கல்கள். அவருடைய சந்திப்புகளில் மறக்க முடியாத ஒன்று. மாநிலக்கல்விக்கருவூலத்தின் வெளியீடுகளில் படைப்பாளர்கள் பிழைகளுடன் எழுதுவதைச் சுட்டிக் காட்டினேன்(1992). அப்போதைய இயக்குநர் முனைவர் இரஞ்சன்தாசு அதற்கு என்ன செய்யலாம் என்றார்.  அவர்களுக்கு ஒரு பட்டறை நடத்தி அவர்களைக் கொண்டே திருத்தச் செய்யலாம் என்றேன். அதன்படி குமரியில் பட்டறை நடந்தது. அப்பொழுது என் தமிழ்ச்செயலாக்கப் பணிகளை அறிந்தவரும் அங்கே என் தமிழ்க்குரலைப் பாராட்டியவருமான எழுத்தாளர் ஐய்க்கண், “தமிழ், தமிழ்நாட்டில் முழுமையாகச் செயல்பட, திருவள்ளுவனை ஒரே ஒருநாள் முதல்வராக ஆக்கினால் போதும். நம் நாடு உண்மையில் தமிழ்நாடாக விளங்கும்” என்றார். அவர் மகன் அரசியலுக்கு வர அப்போதைய அமைச்சர் பொன்னையனைப் பார்க்க வந்திருந்தார். அப்பொழுது அவருடன் பேசியுள்ளேன். சிறுகதை, புதினம், நாடகம், கட்டுரை என அனைத்துத்துறைகளிலும் நூல்கள் எழுதி விருதுகள் பெற்ற படைப்பாளியின் மறைவிற்கு அவர் குடும்பத்தினருக்கு என் ஆழ்ந்த இரங்கலைத் தெரிவித்துக்கொள்கிறேன். துயரத்துடன் இலக்குவனார் திருவள்ளுவன், தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்!

மகுடை 19 விளைவித்த எண்ணங்கள்- பேரரசி முத்துக்குமார்

அகரமுதல

இலக்குவனார் திருவள்ளுவன்      11 April 2020      No Comment

மகுடை 19 விளைவித்த எண்ணங்கள்

       அனைவருக்கும் வணக்கம்.

எனது பெயர் பேரரசி. நான் பாரிட்டின் மாரா இளம் அறிவியல் கல்லூரி, படிவம் 2 மாணவி ஆவேன். ‘இயக்கக் கட்டுப்பாட்டு ஆணை’ (Movement Control Order)  இன் போது எனது பட்டறிவைப் பற்றி நான் உங்களுடன் பகிர விரும்புகிறேன்.  உலகமயமாக்கலின் இந்த நூற்றாண்டில், நமது அன்புக்குரிய நாடான மலேசியா, மகுடை 19(கொரானா 19) நோயால் தாக்கப்பட்டுள்ளது. மகுடை 19(கொரானா 19) என்றால் என்ன? WHO அதாவது ‘உலக நலவாழ்வு அமைப்பின்’ படி மகுடை 19/COVID 19, 2019 புதிய மகுடைத் தொற்று என்று அழைக்கப்படுகிறது. இந்த நோய், சீனாவின் உஃகானில் 2019 திசம்பர் 31 அன்று அப்பகுதியில் அமைந்துள்ள கால்நடைச் சந்தை மூலம் தொற்றியது. மகுடை 19 இன் தொற்று, காற்று, இருமல் மற்றும் உமிழ்நீர்ச் சுரப்பிகள் வழியாகப் பரவுகிறது. ஒருவருக்கு மகுடை 19 மகுடை 19 இருந்தால் அவர்களுக்கு இருமல், காய்ச்சல், மூச்சுச் சிக்கல்கள் போன்ற அறிகுறிகள் காணப்படும். COVID 19 நம் நாட்டில் தற்போதைய முதன்மைச் சிக்கல்களில் ஒன்றாக மாறிவிட்டது, ஏனெனில் அது மரணத்திற்கு வழிவகுக்கிறது.

             இன்றுவரை, மலேசியாவில்  4,346 மற்றும் அதற்கு மேற்பட்ட மகுடை 19 தொற்று நோயாளிகள் கண்டறியப்பட்டுள்ளனர். அதனால், 8 ஆவது மலேசியப் பிரதமரான தான் சிரீ முகைதீன் யாசின் மார்ச்சு 18 முதல் ஏப்பிரல் 14 வரை அனைத்து மலேசியர்களுக்கும் நடை இயக்கக் கட்டுப்பாடு (movement control order) என்ற பாதுகாப்பு நடவடிக்கையை வெளியிட்டுள்ளார். நடமாட்டக் கட்டுப்பாட்டு உத்தரவு ஏப்பிரல் 28ஆம் நாள் வரை நீட்டிக்கப்பட்டுள்ளது. மகுடை 19-ஐ கட்டுப்படுத்த முடியாவிட்டால், ஒரு குறிப்பிட்ட நேரம் வரை நடை இயக்கக் கட்டுப்பாடு  அதிகரிக்கக் கூடும். இவ்வகையான சிக்கல்கள் அனைத்து மலேசியர்களும் தங்கள் உடல்நலம் மற்றும் அவர்களது குடும்பங்களின் உடல்நலத்தைப் பற்றியும் கவலைப்பட வைக்கிறது. எனவே, பாதுகாப்பு நடவடிக்கைகளின் அடிப்படையில் அனைத்துக் கடைகளும் மூடப்படும் என்பதால் அவர்கள் கடையில் இன்றியமையாப் பொருட்களை வாங்கத் தொடங்கினர். எல்லா உணவையும் வாங்கக்கூடிய வர்களையும்,  அதனை வாங்க இயலாத மக்களையும் பார்க்கும்போது எனக்கு வருத்தமாக இருக்கிறது.

இந்த விடுமுறை நீண்டது என்றாலும் அது மகிழ்ச்சியாகவே இல்லை. ஏனென்றால், சிறையில் அடைத்து வைத்தது போல நடைக் கட்டுப்பாடு என்னை உணர வைக்கிறது. இது மிகவும் சலிப்பை ஏற்படுத்துகிறது. அன்றாடம் என் அம்மாவின் சுவையான சமையல் உண்டாலும்,   வீட்டில் எதுவும் செய்யாமல் உட்கார்ந்திருப்பதால் எனது உடலின் எடை அதிகரிக்கின்றது என்று கவலைப்படுகிறேன். ஆனால் மாரா இளம் அறிவியல் கல்லூரி மாணவராக இருப்பதற்கு நான் மிகவும் நன்றியுள்ளவளாக இருக்கிறேன். ஏனென்றால், மாணவர்களின் கற்றலைக் குறித்து அக்கறை கொண்ட பல ஆசிரியர்கள் அங்கு உள்ளனர். இதன் விளைவாக, அவர்கள் ஏற்கெனவே கூகுள் வகுப்பறை, ‘ஓஎசுஇஎம்’, ‘பிளிப்கிரிட்’ பிறவற்றின் மூலம் மெய்நிகர் வகுப்பறைக் கற்றலைத் தொடங்கினர். தற்போதைய கற்றலின் அடிப்படையில் தகவல்களைக் கண்டுபிடிக்க அனைத்து ஆசிரியர்களும் சிரமப்படுவதைக் கண்டு நான் மிகவும் நன்றியுள்ளவளாகக் கருதுகிறேன். இந்தச் சூழ்நிலையை என் அம்மா, அப்பா மூலமும் உணர்ந்தேன், ஏனென்றால் அவர்களும் ஆசிரியர்களாக வேலை செய்கிறார்கள்.

           தற்செயலானது என்றாலும் மகுடை 19 இன்னும் பலரின் உயிரை எடுத்துக்கொண்டிருக்கின்றது என்று நினைக்கும்போது மிகவும் வருத்தமாகவும் கவலையாகவும் உள்ளது. ஏனென்றால் இது பலருக்குப் பரவி  மிரட்டலாக உள்ளது. இறந்தவர்களில் சிலர் மருத்துவர்கள் ஆவர். மகுடை 19  தொற்றிய நோயாளிகளின் பாதுகாப்பிற்காகவும் ஆரோக்கியத்துக்காகவும் தங்கள் உயிரைப் பணயம் வைத்து நேரத்தைத் தியாகம் செய்த மருத்துவர்களுக்கு நான் மிகவும் நன்றியுள்ளவளாக இருக்கிறேன். நோயாளிகளுக்காக மருத்துவர்கள்  தினமும் மருத்துவமனையில் உட்கார்ந்து வீட்டிற்குச் செல்லாமலும், குடும்ப உறுப்பினர்களுடன் நேரத்தைச் செலவிடாமலும் இருக்கின்றனர். குறைந்த எண்ணிக்கையிலான மருத்துவர்கள் மகுடை 19(COVID 19) நோயால் பாதிக்கப்பட்டுத் தீவிரப்பண்டுவப் பிரிவில்  இருந்தனர். என் நலவாழ்வுமிக்கக் குடும்பத்துடன் இருப்பதற்கு நான் கடவுளுக்கு மிகவும் நன்றியுள்ளவளாக இருக்கிறேன். ஒவ்வொரு நாளும் சுவையான உணவை வழங்கிய என் அம்மாவுக்கும் நான் நன்றி கூறுகிறேன்.

மிகவும் சலிப்பான இந்த விடுமுறையில், நான் என் நண்பர்களைப் பார்க்காமல் இருக்கும் வாய்ப்பை இழக்கிறேன். நான் முழு உறைவிடப் பள்ளியில் பயின்ற மாணவியாக இருந்ததால், குடும்பத்தினருடன் விட நண்பர்களுடன் அதிக நேரம் செலவிட்டேன். அங்குள்ள கற்றல் சூழ்நிலையையும் நான் இழக்கிறேன். வீட்டில் நான் சாப்பிடுகிறேன், தூங்குகிறேன், திறன்பேசியுடன் விளையாடுகிறேன், என் அம்மாவுக்கு உதவுகிறேன். கல்லூரியில் நான் பூப்பந்து, வட்டை ஆட்டம்(Frisbee game) விளையாடுவதால் இந்த நடவடிக்கைகள் அனைத்தும் எனக்கு மிகவும் சலிப்பை ஏற்படுத்துகின்றன. இருப்பினும் அண்மையில் நான் என் அம்மாவுக்கு உதவுவதில் விடாமுயற்சியுடன் இருந்தேன். ஒவ்வொரு மாலையும், நான் என் அப்பா, தங்கை ஆகியோருடன் வட்டாட்டம்(கேரம்) விளையாட்டை விளையாடுவேன். இரவில், இணையப் பக்கத்திலிருந்து பதிவிறக்கம் செய்யப்பட்ட திகில் திரைப்படங்களைப் பார்ப்போம்.

       என் ஓய்வு நேரத்தால் நான் சலிப்படைகிறேன். நான் சமூக ஊடகங்களில் குறிப்பாக படவரி(Instagram), உம் குழலி(youtube) முதலியவற்றில் இணைந்திருப்பேன். படவரியில் நகைச்சுவைகள், படவரித்தொலைக்காட்சி ஆகியவற்றைப் படிக்க பார்க்க விரும்புவேன். திரு பீனின் காணொளிகைளப் பார்க்க விரும்புவேன். ஏனென்றால் உரோவன் அட்கின்சன் எனக்கு மிகவும் பிடித்த நடிகர் ஆவார். இந்த வகையான உடற்பயிற்சி எனக்கு மன அழுத்தத்தைக் குறைக்க உதவுகிறது, மேலும் எனது நேரத்தையும்  செலவிட உதவுகிறது. தற்போது, மாணவர்களின் நேரத்திற்குப் பயனளிக்கும் வகையில் சில  கட்சிகள், சங்கங்கள் பல போட்டிகளை நடத்துகின்றன. போட்டியில் பங்கேற்க என் பெற்றோர் என்னை ஊக்குவித்தனர். எனவே இந்த வழியில் எனது ஓய்வு நேரத்தை நிரப்ப முடியும். 5 ஆம் ஆண்டு மாணவியாக இருக்கும் என் தங்கைக்குக் கற்பிக்க என்  நேரத்தைச் செலவிட முடிந்தது. இது எனது குழந்தைப் பருவக் கற்றல் பட்டறிவுகளை நினைவூட்டுகிறது.

மகுடை 19 நோய்த்தொற்று பற்றி நான் கவலைப்பட்டாலும், அதை எவ்வாறு தடுப்பது என்ற  வழிமுறைகள் உள்ளன என்பதைக்கண்டு நான் நிம்மதியடைந்தேன். அவற்றில், கண்கள், மூக்கு, வாயைத் தொடாதீர்கள், ஏனெனில் இது மகுடை 19 தொற்றும் இடமாகும் என்ற கூற்று, 31/3/2020 அன்று வெளியான ‘தி சன்’ செய்திக்குறிப்புக்கு இணங்க, மனிதர்கள் தங்கள் முகத்தை ஒரு மணி நேரத்திற்கு 23 தடவைகள் தங்களின் வாய், மூக்கு, கண்களைத் தொடுகிறார்கள். கூடுதலாக, நாம் அடிக்கடி கைகளைக் கழுவ வேண்டும் ஏனெனில் இது நம் கைகளில் உள்ள நோய்மிகளைக் கொல்லும். மக்களுக்கிடையேயான தூரம் குறைந்தது 1 பேரடி(மீட்டர்) என்பதை  அனைவரும் அவசியம் உறுதிப்படுத்த வேண்டும்.

இதற்குமுன் என்னைப்போல் விடுமுறையை எப்படிக் கழித்திருந்தாலும் நாம் மகுடைநோய் பரவாமல் இருக்க நம்மால் ஆன கட்டுப்பாடுகளைக் கடைப்பிடிக்கவும் அடுத்தவர்களுக்கு உதவவும் வேண்டும்.

        இந்த மகுடை 19 மிகவும் ஆபத்தானது. எனவே, மலேசியர்களாகிய நாம் உடனடியாகச் செயல்பட வேண்டும்.  கடுமையான நோய்மிகளைத் தடுக்க அரசாங்கத்தின் பரிந்துரைக்கப்பட்ட நடவடிக்கைகளுக்கு இணங்க வேண்டும். மகுடை 19 நோயாளிகளை விரைவாகக் குணப்படுத்தவும், மலேசியர்கள் அனைவரையும் கோவிட் 19 அச்சுறுத்தலிலிருந்து காப்பாற்றவும் என்று நான் கடவுளிடம் வழிபடுவேன். ஏப்பிரல் 28 க்குப் பிறகு கல்லூரிக்குச் செல்வதற்கு மிகவும் ஆர்வமாக உள்ளேன்.

மலேசியாவை நேசி! தூய்மையான மலேசியா!

நன்றி.

– பேரரசி முத்துக்குமார்

படிவம் 2

மாரா இளம் அறிவியல் கல்லூரி பாரிட்டு, மலேசியா

குவிகம் இணைய அளவளாவல் – பா.இராகவன்

அகரமுதல

இலக்குவனார் திருவள்ளுவன்      10 April 2020      No Comment

பங்குனி 30, 2051

ஞாயிறு மாலை 6.30

12.04.2020

மகுடை – கரோனா நோயர் தொடர்பான சொற்களை அறிவோம்! இலக்குவனார் திருவள்ளுவன்

அகரமுதல

இலக்குவனார் திருவள்ளுவன்      07 April 2020      No Comment

மகுடை – கரோனா நோயர் தொடர்பான சொற்களை அறிவோம்!

 

மகுடை(கரோனா) நோய் பற்றிய செய்திகள் நாளும் வருகின்றன. அவற்றிற்கு உரிய தமிழ்ச்சொற்களை அறிவதன் மூலம், நோய் தொடர்பான விளக்கங்களையும் அறியலாம்.

தொற்றுத் தடுப்பிற்காக முகத்தில் அணியும் கவசத்திற்கு எண்கள் குறிப்பிடுகின்றனர். இப்பொழுது குறிப்பிடப்படுவது என்.95 ஆ? எண் 95ஆ என்ற ஐயப்பாடு பலருக்கு வருகிறது. இங்கே’ என்’ என்பது எண்ணைக் குறிக்கவில்லை.

NIOSH – National Institute for Occupational Safety and Health என்பதன் ஆங்கில முதல் எழுத்தான ‘என்’(N) என்பதைக் குறிக்கிறது. அமெரிக்காவில் உள்ள இதனை, நாம் ‘தேசியத் தொழிற்பாதுகாப்பு நலவாழ்வு நிறுவனம்’ எனலாம். அப்படியானால் தமிழில் இதன் முதல் எழுத்தான ‘தே’ என்பதைப் பயன்படுத்தலாமா? சிலர் இதனைத் ‘தொழிற்பாதுகாப்பு நலவாழ்விற்கான தேசிய நிறுவனம்’ என்றுகூடச் சொல்வர். மேலும் இந்நிறுவனத்தின் நோக்கம் நலவாழ்விற்கான பாதுகாப்புதான். அப்படியானால் ‘பா’ என்று சொல்லலாமா? இதனைவிடக் கா என்று குறிப்பது மிகப் பொருத்தமாக இருக்கும். ‘கா’ என்றாலே தீமை வரவொட்டாமல் காப்பாற்றுதல், தீதிலிருந்து விலக்குதல், தீயவற்றைத் தடுத்தல் என்னும் பொருள்கள் உள்ளன. எனவே, தொற்றுக் காப்பிற்கான இதனைச் சுருக்கமாகக் ‘கா’ என்றே குறிக்கலாம்.

அப்படியானால் 95 என்பது எதனைக் குறிக்கிறது என்ற எண்ணம் வரும். இது காற்று வடிகட்டுதலின்  மதிப்பீட்டு அளவைக் குறிப்பதாகும். அஃதாவது, வான்வழித் துகள்களில் வடிகட்டும் அளவைக் குறிப்பதே இந்த எண். இந்த இடத்தில் 95 விழுக்காட்டுத் துகள்களை வடிகட்டுகிறது என இதன் சிறப்பைக் குறிக்கிறது. (எனினும் இஃது எண்ணெயை எதிர்க்காது.) எனவே, நாம் என்.95 எனக் குறிப்பதை விட 95 விழுக்காட்டுக் காப்புப் பயன் உடைய கவசத்தைக் கா 95 எனத் தமிழில் குறிப்பதே சிறப்பாகும்.

இந்த இடத்தில் கவசம் தமிழ்ச்சொல்தானா என்ற ஐயப்பாடு வரும். mask என்பதை,  முகத்திரை, முகமூடி, பகுதி மறைப்பு, முகக்காப்பு வலை, கவசம் எனப் பல சொற்களால் குறிப்பிடுகின்றோம்.  கவ் என்பதில் இருந்து உருவான கவயம் என்பது கவசமாக மாறி உள்ளது. இதனைச் சமசுகிருதத்தில் கவச என்று குறிப்பிட்டதும் நாம் தமிழலல்ல என எண்ணி விட்டோம். கவசம் தமிழ்ச்சொல்தான். எனினும் முகம் முழுவதையும் மறைக்காமல், மூக்கு, வாய்ப்பகுதிகளை மட்டும் மறைப்பதால் நாம் பயன் அடிப்படையில் மூச்சுக்காப்பு எனலாம். எனவே, அரசு கா 95 மூச்சுக்காப்புகளைப் போதிய அளவில் வாங்கி அனைவருக்கும் வழங்க வேண்டும் எனலாம்.

தொற்றுத் தவிர்ப்பிற்காகச் சொல்லப்படும் தொடர் social distancing என்பதாகும். அப்படி என்றால் குமுகாயத்திலிருந்து விலகி இருத்தல் அல்ல. நாம் அதன் ஒரு பகுதிதான். ஆனால், மன்றங்கள், கலை நிகழ்ச்சிகள், விளையாட்டு நிகழ்ச்சிகள், விருந்துகள் என்பனபோன்று குமுகாய நடவடிக்கைகளின் பகுதியான பொது நிகழ்வில் இருந்து விலகி இருத்தலையே குறிக்கிறது. விலகி இருத்தல் என்பதைக் குறிக்கத் தமிழில் பல சொற்கள் உள்ளன.

இராமலிங்க அடிகளார் (மூன்றாம் திருமுறை, 005. சல்லாப வியன்மொழி, பாடல் 5 அடி 4) விலகி இருப்பதைக் குறிப்பிட, “ஒற்றியிரும் என்றுரைத்தேன்” என்கிறார்.

ஒற்றிப்போதல் என்றால் விலகிச் செல்லுதல் எனப்பொருள். ஒற்றிப்போடுதல் என்றால் தள்ளிவைத்தல் என்று பொருள். இதுவே இப்போது ஒத்திவைத்தல் என மாறி வழங்கி வருகிறது. எனினும் விலகி இருத்தலை ஒற்றியிருத்தல் எனக் குறிப்பது மிகப் பொருத்தமாக இருந்தாலும் இன்றைய வழக்கத்தில் நாம் உரிய பொருளை நேரடியாகப்புரிந்து கொள்ள இயலாது.

எழவாங்குதல்  என்றாலும் முகம் காட்டாமல் தொலைவில் இருத்தல் என்று பொருள். மேலும், கவிப்பு, தாவு, துலை முதலான சொற்களும் விலகி இருத்தலைக் குறிக்கின்றன. இவற்றையெல்லாம் வெவ்வேறு பொருள்களில் இப்பொழுது பயன்படுத்துவதால் வேறு சொல்லே சிறப்பாக அமையும். குமுகாயம் என்பதை அவ்வாறே குறிப்பிடாமல் குமுகாய  நிகழ்வு என்பதைக் குறிப்பாகக் கொண்டு நாம் நிகழ்வுச்சேய்மை எனலாம். அஃதாவது கூடிக்களிக்கும் நிகழ்வுகளில் இருந்து சேய்மையாக இருத்தல். ( distance = சேய்மை என்றும் பொருள்.)

            எனவே, மகுடைத் தொற்றிலிருந்து காத்துக் கொள்ளகூட்ட நிகழ்வுகளில் இருந்து விலகும் கூட்ட விலகலை – நிகழ்வுச் சேய்மையைக் கடைப்பிடிப்போம் என்போம்.

            அடுத்துத் தற்தடைக் காப்பு.

Quarantine என்பது, தொற்றுத் தடைக்காப்பு, நோய்த்தொற்றுத்தடுப்பு, தொற்றுத்தடுப்புத் தனிப்படுத்தல் என்னும் பொருள்களை உடையது. மருத்துவர்கள் கூறுவதும் அரசு வலியுறுத்துவதும் நம்மை நாமே தனிப்படுத்தி வைத்துக் கொள்ளல். அதுவே,  தற்தடைக் காப்பு(self-quarantine). மகுடைத் தொற்று நோய்மியானது தொற்று உள்ளவரிட மிருந்து வெறும் ஆறு அடி தொலைவு தான் செல்ல இயலும். எனவே, நாம் தனிமைப்படுத்திக்கொண்டு விலகி இருப்பதன் மூலம் உடன்இருக்கும் யாருக்கேனும் இத் தொற்று இருப்பின் நம்மைக் காப்பாற்றிக் கொள்ள இயலும்.

அடுத்து வல்லுநர்கள் சொல்வது, அளவுக்கோட்டை மட்டப்படுத்தல்.

flattening the curve என நோய் நிலை வரைபடத்தில் உள்ள வளைவுக்கோடு தட்டையாகும் வண்ணம்  நோய்நிலையைக் குறைக்க வேண்டும் என்பதற்காக இவ்வாறு கூறுகின்றனர். (நோய்நிலை வரை)வளைவு தட்டையாக்கல் எனலாம்.

அடுத்தது ஒதுக்கம்(isolation)

ஒதுக்கம் என்பது தற்தடைக்காப்பிலிருந்து மாறுபட்டது. இங்கே, தொற்றுக்கு ஆளானவர்களை அவர்கள் மூலம்தொற்றுக்கு ஆளாகாதவர்களிடம் நோய் பரவக்கூடாது என்பதற்காகத் தனித்து ஒதுக்கி வைப்பதைக் குறிப்பது. இதனைப் பின்பற்றினால்தான் ஒருவருக்கு வந்த தொற்று பிறருக்குப் பரவாது. மகுடைத் தொற்றிலும் இது பின்பற்றப்படவேண்டும்.

 அடுத்தது தொற்று ஐயப்பாட்டில் உள்ளவர்களை ஆய்வு செய்தல். இது குருதி ஆய்வு, உறிகை ஆய்வு என இருவகைப்படும். உறிகை ஆய்வு என்பதைச் சிலர், ஆங்கிலத்தில் தவறுதலாக ‘swap test’ எனக் குறிப்பிடுகின்றனர். swap என்றால் பகர மாற்றம் எனப் பெயர். இது ‘swab test’ எனக் குறிக்கப்பெற வேண்டும்.

அடுத்தது தொற்றுப் பெருக்க விகிதம். ஒவ்வொரு தொற்றுநோய்மிக்கும் இரண்டு குணங்கள் உண்டு. முதலாவது தொற்றுப் பெருக்க விகிதம் எனப்படும் R0 (ஆர் நாட் – ‘R Naught’). தொற்றுநோய்மி உள்ள ஒருவர் இயல்பாக எவ்வளவு பேருக்கு இந்த நோய்மித் தொற்றைத் தர வாய்ப்பு உள்ளது என்பதே தொற்றுப் பரவு விகிதம். இதுவே அடிப்படை இனப்பெருக்க எண் என்றும்  சில நேரங்களில் அடிப்படை இனப்பெருக்க விகிதம்  என்றும் சொல்கின்றனர். இனப் பெருக்கம் என்பதைவிடத் தொற்றுநோய்மிப் பெருக்கம என்பதன் சுருக்கமாகத் தொற்றுப்பெருக்கம் என்பது சரியாக இருக்கும்.

அடுத்து நோயரைத் தனிமைப்படுத்தி வைக்கும் அறை அல்லது கூடம் பற்றியது. பகுக்கப்படுவது பகுதி என்பதுபோல் தனித்தனியே வகுத்து அமைக்கப்படும் வார்டு(ward) என்பதை வகுதி எனலாம்.

நோயருக்கு மூச்சுயிர்ப்பிற்கு உதவும் இயந்திரம் பற்றிப் பார்ப்போம்.

அறைகளில் இருக்கும் வெண்டிலேட்டர் என்பதை நாம் காலதர் என்கிறோம். கால்+அதர்;  கால் என்றால் காற்று; அதர் என்றால் வழி. காற்று வரும் வழி எனப்பொருள். காற்றுவாரி என்றும் இதனைச் சொல்வர். அதேபோல் நோயருக்கு மூச்சு உயிர்ப்பு உதவியாக உள்ள வெண்டிலேட்டரையும் காலதர் என்றால் தவறில்லை. ஆனால், பொருள் குழப்பம் வரும். எனவே, வேறு சொல் தேவை. எல்லாருமே வெண்டிலேட்டர் என்றே குறித்து வருகின்றனர். ஓர் அகராதி மூச்சுக்காற்றுவாரி என்று குறிப்பிடுகிறது. சொல்வழக்கில் செயற்கைச் சுவாசக் கருவி என்போரும் உள்ளனர். மூச்சுக்காற்றுக்கு உதவும் இதனை மூச்சதர் எனலாம்.

சீரான மூச்சிற்கு உதவும் மற்றொன்று மூச்சுச்சீராக்கி (respirator). சிலர் மூச்சதரை மூச்சுச் சீராக்கி என்கின்றனர். பலர், கவசம் என நாம் சொல்கின்ற மூச்சுக்காப்பினை மூச்சுச் சீராக்கி என்கின்றனர். பொதுவாக மூச்சதர் நோயருக்கு உதவுவதுபோல், அவர்களைக் கவனிக்கும் மருத்துவப் பணியாளர்களுக்கு உதவுவது மூச்சுச் சீராக்கி.

நோய்த்தொற்றுக்கு ஆளானவர்களுக்கும் அந்நோய்த்தொற்றின் காரணமாக இறந்தவர்களுக்கும் உள்ள விகிதம் ஆட்கொல்லி விகிதம்(case fatality rate- CFR) எனப்படுகிறது. மகுடைநோயின் ஆட்கொல்லி விகிதம் நாளும் மிகுதியாவதுதான் வேதனையான ஒன்று.

மகுடை நோய் தொடர்பானவை மட்டுமல்ல, பிற நோய் தொடர்பாகவும் உள்ள இவற்றை நாம் தமிழிலேயே குறிப்பிட்டுப் பயன்படுத்துவோம்!

இலக்குவனார் திருவள்ளுவன்

காண்க –

மகுடை – கரோனா தொற்றி தொடர்பான சொற்களை அறிவோம்!