a.narayanan லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
a.narayanan லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வெள்ளி, 29 ஜூலை, 2011

கல்வித்தளத்திலும் சேரிகளைக் கட்டமைக்க வேண்டா

பெரும்பாலோர் கருதுவதுபோல்  ஆதிதிராவிடர் விடுதிகளும் பிற்படுத்தப்பட்டோர் விடுதிகளும் அக் குறிப்பிட்ட வகுப்பாருக்கு மட்டும் உரியன என எண்ணிக் கட்டுரை எழுதப்பட்டுள்ளது..  இவ்விடுதிகள் அந்தந்த நலத் துறையால் நடத்தப்பட்டாலும் பிற பிரிவினரும் சேர்க்கப்படுவர். பெரும்பான்மையர் மட்டுமே ஆ.தி. அல்லது பி.வ. ஆக இருப்பர். எனினும் எல்லார்க்கும் தரமான கல்வியும் தரமான விடுதி வசதியும் கட்டணமின்றிக் கிடைக்க வகை செய்ய வேண்டும்.
அன்புடன் இலக்குவனார் திருவள்ளுவன் / தமிழே விழி! தமிழா விழி! / எழுத்தைக் காப்போம்!  மொழியைக் காப்போம்! இனத்தைக் காப்போம்!

கல்வித்தளத்திலும்
சேரிகளை கட்டமைக்க வேண்டாம்

First Published : 29 Jul 2011 01:48:56 AM IST


தமிழக ஆதிதிராவிடர் நலத்துறையின்கீழ் உள்ள 1294 உண்டு உறைவிடப் பள்ளி விடுதிகளில், 1,059 விடுதிகள் அடிப்படை வசதிகளற்ற, மிக மோசமான நிலையில் இருப்பதை உறுதி செய்து கொண்ட இன்றைய முதலமைச்சர் ஜெயலலிதா, ரூ.76.33 கோடி செலவில் அவற்றை உடனடியாகப் புதுப்பித்து மேம்படுத்தும் நடவடிக்கையை எடுத்துள்ளார் என்பது பாராட்டுக்குரியது. ஆதிதிராவிடர் மற்றும் பழங்குடியினர் நலத்துறைப் பள்ளிகளில் விரைவில் 1,200 புதிய ஆசிரியர்களை நியமனம் செய்ய இருப்பதாகவும் அரசு தெரிவித்துள்ளது. ஆயினும், இந்த நடவடிக்கைகள் ஆதிதிராவிட மாணவ, மாணவிகளுக்குத் தாற்காலிகமாக உதவலாமே தவிர நீடித்த, குன்றாத பயனைத் தருமா என்பது, இது காறும் உள்ள மோசமான வரலாற்றின் அடிப்படையில் எழும் நியாயமான ஐயப்பாடு. ஆதிதிராவிட நலப் பள்ளிகளும், வனப் பள்ளிகளும், அவற்றோடு இணைந்த உண்டு உறைவிட விடுதிகளும், சமூகத்தின் விளிம்பு நிலை மாணவ, மாணவிகளின் முன்னேற்றத்துக்குப் படிக்கற்களாக இல்லாமல் தடைக்கற்களாக இருப்பதுதான் கசப்பான உண்மை. சமூகத் தளத்தின் பிரதிபலிப்பாக, கல்வித் தளத்தில் வலுவாக எழுப்பப்பட்ட சேரிகளாக இவை நடைமுறையில் உள்ளன. ஆதிதிராவிட, பழங்குடியின சமூகங்களின் கல்வி மேம்பாட்டுக்கு, அரசியலமைப்புச் சட்டத்தின் 29(1),46,15(4), 350ஏ ஆகிய ஷரத்துக்கள் வாயிலாக உறுதி அளிக்கப்பட்டிருக்கிறது. இவ்வுண்மையை வசதியாக மறந்துவிட்டு அல்லது பொருள்படுத்தாமல், இது ஏதோ அவர்களுக்கு மக்கள் வரிப்பணத்தில் அரசு வழங்கும் சலுகை, இலவசம் என்று கருதும் ஆதிக்க மனநிலையே, ஆட்சியாளர்களிடமும், மற்ற எல்லோரிடமும் பொதுபுத்தியாக ஊறிக்கிடக்கிறது.இதன் வெளிப்பாடாகத்தான், ஆதிதிராவிட நலத்துறையில் மேல்மட்டம் முதல் கீழ்மட்டம் வரை, பள்ளிகளிலும், விடுதிகளிலும், கட்டமைப்புகள், பராமரிப்பு, மேற்பார்வை, ஆய்வு மாணவர்களைப் பொதுவாக நடத்தும் விதம், அவர்களுக்கு வழங்கப்படும் உணவு, கல்வி ஊக்கத்தொகை உள்பட எல்லாவற்றிலும் உச்சகட்ட அலட்சியமும், அதிகபட்ச வெளிப்படையான ஊழல் கொள்ளையும், தட்டிக்கேட்க யாருமில்லாமல் பல ஆண்டுகளாகத் தொடர்கிறது. கழிப்பிடம், குடிநீர், உணவு, சீருடை, ஏன் இரவில் சிறுவர், சிறுமியர் உறங்குவதற்காக வழங்கப்படும் பாய் உள்பட இத்துறையின் எந்த ஓர் அம்சத்திலும் தரநிர்ணயம் என்பது எள்ளளவும் கிடையாது. இவ்வளவு ஏன், ஆசிரியர் தேர்வாணையம் மூலமாக ஆசிரியர்கள் நியமனம் நடைபெறும்போது, தரவரிசைப் பட்டியலில் முன்னிலையில் இருப்பவர்கள் பொதுவாக அரசுப் பள்ளிகளுக்கும், கடைசியில் எஞ்சியவர்கள், ஆதிதிராவிட, பழங்குடியினர் நலப்பள்ளிகளுக்கும் தெரிவு செய்யப்படும் மோசமான பாகுபாடு நடைமுறையில் கடைப்பிடிக்கப்படுகிறது. இப்பள்ளிகளும், விடுதிகளும் கல்வித்துறை தொடர்போ, அனுபவமோ இல்லாத வருவாய்த் துறை அதிகாரிகள், ஆதிதிராவிடர் நலத்துறை அலுவலர்கள் ஆகியோரின் அதிகாரத்துக்குள் வருவதால், அவர்களுக்கும், பள்ளிகளின் தலைமை ஆசிரியர்களுக்கும் நடுவில் புரிதல் அறவே இல்லை என்று குற்றம் சாட்டப்படுகிறது. மாவட்ட ஆட்சியரால் நேரடிக் கவனம் செலுத்த முடியாது. மாவட்ட ஆதிதிராவிட நலத்துறை அதிகாரிகளால், இத்துறை தொடர்பான பல்வேறு அலுவல்களுக்கிடையே, இப் பள்ளிகளை மேற்பார்வையிடுவதும், ஆய்வுசெய்து அறிக்கை தயாரித்து அளிப்பதும் இயலாத, விரும்பாத, பொருந்தாத ஒன்றாகி விடுகிறது.ஆண்டுக்கு ஒரு முறைகூட, இப் பள்ளிகள் மாவட்ட அலுவலர்களாலோ, வட்டாட்சியர்களாலோ ஆய்வுக்கு உள்படுத்தப்படுவதில்லை. கல்வியை மேம்படுத்தும் ஆக்கபூர்வமான செயல்களைச் செய்யாமல், ஆசிரியர்கள், வார்டன்கள் ஆகியோரைப் பணி அமர்த்துதல், பதவி உயர்வு, பணி மாற்றம், மாணவர் தேர்ச்சி இல்லை என்றுகூறி, ஆசிரியர்களுக்குத் தண்டனை வழங்குதல் ஆகிய அதிகாரங்களைக் கோலோச்சுவதும், ஒவ்வொரு வகையிலும் மாமூல் வசூலிப்பதுமே இவர்களின் ஒரே வேலையாக உள்ளது என்றும் குற்றம்சாட்டப்படுகிறது. எல்லா அதிகாரங்களும் வருவாய்த் துறை அதிகாரிகளிடமும், ஆதிதிராவிடர் நலத்துறை அலுவலர்களிடமும் உள்ளதால், இவர்களுடன் இணைந்தோ, இவர்களைத் தாண்டியோ, கல்வித் துறை அதிகாரிகளால் கல்விசார்ந்த எந்த ஒரு திட்டத்தையும் ஒழுங்காக இப் பள்ளிகளுக்குள் கொண்டுபோய்ச் சேர்க்க முடிவதில்லை.சீருடை, புத்தகங்கள், கல்வி உதவித் தொகை என்று எல்லாமே மிகமிகத் தாமதமாகத்தான் ஒவ்வோராண்டும் பள்ளிகளைச் சென்று சேர்கிறது. நோட்டுப் புத்தகங்கள் இல்லாமல் மாணவர்கள் திண்டாடுகிறார்கள். தப்பித்தவறி நோட்டுப் புத்தகங்கள் கிடைத்தால், தேர்வில் பதில் எழுதத் தேவையான விடைத்தாள்கள் இல்லாமல், நோட்டுப் புத்தகங்களைக் கிழித்து விடைத்தாள்களாகப் பயன்படுத்துகிறார்கள். பொதுவாக இம் மாணவ, மாணவிகளிடம் ஊட்டச்சத்துக் குறைபாடு இருக்கும். இதன் விளைவாக உடல் ஆரோக்கியத்தில் ஏற்படும் குறைபாடுகளைச் சோதித்து சீர் செய்தால் மட்டுமே அவர்களது கற்கும் திறன் அதிகரிக்கும் வாய்ப்பு உள்ளது. ஆனால், இப் பள்ளிகளில் முறையாக மருத்துவ முகாம்கள் நடத்தப்படுவதில்லை. அரவிந்தர் கண் மருத்துவமனையின் மருத்துவர் கூறும்போது, தலித்து பள்ளிகளில் உள்ள மாணவ, மாணவிகளில், 20 விழுக்காட்டினருக்காவது பார்வைக் குறைபாடு இருக்கும் வாய்ப்புள்ளது, மற்ற சமூகத்தினரைவிட இது அதிகம், இப்பள்ளிகளில், ஆண்டுத் தொடக்கத்திலேயே, கண் மருத்துவ முகாம் நடத்தி, குறைபாடுகளைக் கண்டறிந்து, களையவில்லையென்றால், பல மாணவ, மாணவிகள் ஆண்டு முழுவதும் கரும்பலகையில் என்ன எழுதப்படுகிறது என்று தெரியாமலே, "மக்கு'ப் பட்டம் வாங்கிக் கொண்டு அவதிப்படும் நிலை ஏற்படும் என்கிறார். ஆனால், இந்த அடிப்படையைப் புரிந்து கொள்ளாத நிர்வாகம், தேர்ச்சி விகிதம் சரியாக இல்லாத பள்ளிகளில், ஆசிரியர்களைப் பலிகடா ஆக்குவதுடன் திருப்திப்பட்டுக் கொள்கிறது. இவையெல்லாம், விளக்கப்பட்ட ஒரு சில பிரச்னைகள்தான், விளக்கப்படாத தடைக்கற்கள் ஏகப்பட்டவை. இன்றைக்கும் ஜாதிய ஏற்றத் தாழ்வுகளும், ஜாதி வன்கொடுமைகளும், கிராமங்கள்தோறும் நிரந்தரமாகிவிட்ட தலித்து காலனிகளும், சேரிக்கும் ஊருக்கும் நடுவே திடீரென்று முளைக்கும் தீண்டாமைச் சுவர்களும்தான் வளர்ந்து வரும் தமிழகத்தைப் பிரித்தாளும் கொடுவாள்கள். இன்றைய ஜாதிய, வர்க்க வேறுபாடுகள் களையப்படுவதற்கான ஒரே வழி, எல்லோருக்கும் தரமான, இலவசமான, சமச்சீரான, கட்டாயக் கல்வியை வழங்கும் சமத்துவமான பொதுப்பள்ளி முறையே. ஆனால், பள்ளிக்கல்வியில் உச்சகட்ட சமத்துவமின்மையே முகத்தில் அறையும் உண்மை. இந்தப் பின்னணியில், இந்த இருபத்தோராம் நூற்றாண்டிலும், ஆதிதிராவிடர் நலப்பள்ளிகள் என்ற பெயரில் தமிழகம் முழுவதிலும், கள்ளர் சீரமைப்புப் பள்ளிகள் என்ற பெயரில் மதுரை, திண்டுக்கல், தேனி மாவட்டங்களிலும், ஜாதி, இனம் வாரியாகப் பெயரிட்டு அரசே நடத்துவது என்ன பயன்தரும்? இந்த மாணவ, மாணவிகளுக்கு வேண்டிய உதவித் திட்டங்கள் தொடரவேண்டியது அவசியம். ஆனால், தனிப் பள்ளிகளாகவே தொடர்வது ஆரோக்கியமானதா என்பதைப் பரிசீலனைக்கு உள்படுத்த வேண்டியது அவசியம் மட்டுமல்ல, அவசரமும் கூட.ஆதிதிராவிடர் நலப் பள்ளி, கள்ளர் சீரமைப்புப் பள்ளி என்ற பெயரில் அடையாளப்படுத்தப்படுவது பற்றியும், அதனால் உளவியல் ரீதியாக இந்த மாணவர்களுக்கு ஏற்படும் பாதிப்புகள் பற்றியும் யாரும் சிந்திப்பதில்லை. அதனால்தான் இளைஞர்களான பின்பும், கல்லூரி வாயிலில் ஒருவருக்கொருவர் கொலைவெறித் தாக்குதலில் ஈடுபடுவதும், ஜாதிச் சங்கங்களில் அதிக ஆர்வம் காட்டுவதும் நடைபெறுகிறது. மேலும், இப் பள்ளிகளை, நலத்துறைகளிலிருந்து விடுவித்து, மற்ற அரசுப் பள்ளிகளைப் போல, கல்வித்துறையின் நேரடி மேற்பார்வையின்கீழ் கொண்டுவந்தால், ஒப்பீட்டளவில் தரம் உயர வாய்ப்புள்ளது. விடுதிகளைப் பொறுத்தவரை, அன்றைக்கு அருகாமைப் பள்ளிகள் கிடையாது, ஆதலால் பள்ளிகளுக்கு அருகில் விடுதிகள் ஏற்படுத்தப்பட்டால் மாணவர்களுக்கு உதவும் என்ற நோக்கில் தொடங்கப்பட்டன. ஆனால், இன்றைக்கு எங்கும் அருகாமைப் பள்ளிகள் உள்ளன. இலவச பஸ் பாஸ், சைக்கிள்கள் வழங்கப்படுகின்றன. இலவச மதிய உணவு முழுமையாக வழங்கப்படுகிறது. குடிசைவீடுகளுக்கு இலவச மின்சாரம் உள்ளது.இவ்வகைக் காரணங்களால், பள்ளி மாணவ, மாணவிகள் விடுதிகளில் தங்கிப்படிக்க விரும்புவதில்லை. பல விடுதிகளில் மிக மிகக்குறைவானவர்களே தங்கிப் படிக்கின்றனர். சனி, ஞாயிற்றுக்கிழமைகளில் எல்லோருமே வீடுகளுக்குப் போய் விடுகின்றனர்.ஆக, உண்டு உறைவிடப் பள்ளிகள் இன்றைக்கு, "பெருச்சாளிகள்' மட்டுமே பல்கிப் பெருகி உண்டு கொழுக்கும் சத்திரங்களாக மாறிவிட்டன. அதாவது, இரண்டுகால் பெருச்சாளிகள் கூட்டுச்சேர்ந்து பொய்யான ஆவணங்களைத் தயாரித்து, திருடி பங்கு போட்டுக் கொள்ளும் ஒரே வேலைதான் பெரும்பாலான மாணவர் விடுதிகளில் நடைபெற்று வருகிறது. எனவே, அவசியமான ஒரு சில ஆதிதிராவிட நலத்துறை விடுதிகளையும், பிற்பட்டோர் நலத்துறையின்கீழ் வரும் விடுதிகளையும் மட்டும் ஒருங்கிணைத்து, பொது மாணவர் விடுதிகளாக மாற்றுவது நல்லது. பொது விடுதிகளாக மாற்றப்பட்டால், அவற்றின் பராமரிப்பில் எல்லோருடைய கூடுதல் கவனமும், கூட்டு கவனமும் கிட்டுவதால், தரமும் உயரும். அதோடு, மாணவர்களுக்கிடையில் புரிதலும், ஜாதி தாண்டிய நட்பும் ஏற்படும்.இடஒதுக்கீட்டைத் தாண்டி, ஆதிதிராவிட மாணவர்களுக்கும், பிற்படுத்தப்பட்ட, மிகவும் பிற்படுத்தப்பட்ட மாணவர்களுக்கும் இடையில் சமூக அளவிலும், கல்வி, வேலை வாய்ப்பு அளவிலும் ஒரே மாதிரியான எதிர்காலச் சவால்களே காத்திருக்கின்றன. பள்ளிக் கல்வியில் அரசு சமத்துவம் கொண்டுவர முனைந்து வெற்றிபெற்றால், தமிழகத்தின் ஜாதி வியாபாரிகள் கடைமூடும் நேரம் வந்துவிடும் என்பது மட்டும் நிச்சயம்.

செவ்வாய், 28 டிசம்பர், 2010

raghul gandhi and intellectuals: article in dinamani

எந்த அரசுப் பொறுப்பிலும் இல்லாத கல்வியாளராகவோ  மக்கள் நலத் தொண்டராகவோ இல்லாத இராகுல் வருகை அவர் கட்சிக்கு முதன்மையாகஇருக்கலாம். ஆனால் கல்விச்சாலைகளும் அரசு இயந்திரங்களும் அதற்காகப்பயன்படுத்தப்படுவது தவறல்லவா? 
அன்புடன் இலக்குவனார் திருவள்ளுவன்

ராகுல் காந்தியும் தமிழக அறிவு ஜீவிகளும்


இளைஞர் காங்கிரஸôரிடமிருந்து ஓர் அலைபேசி கோரிக்கை வந்தது. தமிழகத்துக்கு இரண்டு நாள் சூறாவளிப்பயணமாக வரும் ராகுல் காந்தி, தமிழக அறிவுஜீவிகளுடன் கலந்துரையாட விரும்புகிறார்; இக் கூட்டத்தில் நீங்களும் கலந்து கொள்ள வேண்டும் என்று கேட்டுக் கொண்டார். தலைக்குப்பின் உடனடியாக ஒரு ஒளிவட்டம் ஏற்பட்டது போலத் தோன்றியது. மார்கழி குளிரையும் மீறி உடலில் சுகமான வெப்பம். அண்ணா சாலையில் உள்ள கன்னிமாரா ஐந்து நட்சத்திர விடுதியில், அறிவுஜீவிகள் குவிந்தனர். ஊடகங்களுக்கு அனுமதி இல்லாத கூட்டமாயிருந்தாலும், கணிசமாக மூத்த பத்திரிகையாளர்கள், பல்வேறு சமூக  ஆர்வலர்கள், ஓவியர்கள், காந்தியவாதிகள் என்று சுமார் எழுபது எண்பது பேர் வந்தனர். ராகுல் 55 நிமிடங்கள் தாமதமாக வந்ததால், இரண்டு மணி நேர நிகழ்வு, ஒரு மணிநேரக் கலந்துரையாடலாகச் சுருங்கியது. ஒரு மணிநேரமும் நின்றபடியே  எளிமையுடனும், மிகுந்த மரியாதையுடனும் ராகுல் நடந்து கொண்டார். கலந்துரையாடல் நடக்கும் அறையில் சிறிய மேடை அமைக்கப்பட்டிருந்தது. உள்ளே சென்று பார்த்தால், முன் வரிசைகளில் கிட்டத்தட்ட 30 திரைப்படத் தயாரிப்பாளர்கள், விநியோகஸ்தர்கள், நடிகர், நடிகைகள். இவர்கள் நாட்டின் அடிப்படைப் பிரச்னைகள் பற்றி ராகுலுடன் அளவளாவ வந்திருப்பார்களோ என்ற நினைப்பு சற்று மகிழ்ச்சியளித்தது.அறிமுகவுரை முடிந்தவுடன் எடுத்த எடுப்பிலேயே, இந்தியாவில் விஸ்வரூபமாகி விட்ட சாராய சுனாமி பற்றி விவாதிக்கப்பட்டது. காங்கிரஸில் லட்சக்கணக்கான இளைஞர்களைச்   சேர்ப்பதில் அதிக ஆர்வம் எடுத்துக்கொண்டுவரும் வேளையில், இந்திய இளைஞர்களின் எதிர்காலம் சாராயத்தில் கரைந்துவிடும் ஆபத்து உள்ளது. 1947-ல் உள்ள நிலை வேறு, 21-ம்  நூற்றாண்டில், மதுவினால் ஏற்படும் பாதிப்புகள் வேறு. மலேரியா, காசநோய், ஊட்டச்சத்துக் குறைபாடு என்று காலங்காலமாக உள்ள ஆரோக்கியப் பிரச்னைகள் சிறிதும் குறையாத நிலையில் வாழ்க்கைமுறை நோய்கள் பெரிய அளவில் இந்திய இளைஞர்களைத் தாக்கும் நிலை ஏற்பட்டுள்ளது. இதில் வரைமுறையில்லாமல் அதிகரித்து வரும் மதுநுகர்வு மிகமுக்கிய பங்காற்றுகிறது. பெண்களுக்கும், குழந்தைகளுக்கும் இதனால் மிகப்பெரிய  பின்னடைவு ஏற்பட்டு வருகிறது என்று எடுத்துச் சொல்லப்பட்டது.யாருடைய தீவிரவாதம் மிக அபாயகரமானது என்று பேசி சர்ச்சையில் மாட்டிக்கொண்ட நீங்கள், மது வியாபாரிகள் தான் இன்றைக்கு இந்திய மக்களுக்கு எதிரான உண்மையான  தீவிரவாதிகள். இவர்களது பிடி, சட்டமன்றங்கள் முதல் நாடாளுமன்றம் வரை இறுகியுள்ளது, இந்தச் சாராய தீவிரவாதத்தை வெளிநாட்டு, உள்நாட்டு நிறுவனங்களுடன், மாநில அரசுகளும் இணைந்து கட்டவிழ்த்து விட்டுள்ளன என்பதைப் புரிந்துகொள்ள வேண்டும் என்றும் விவாதிக்கப்பட்டது. வருவாயைப் பெருக்கும் நோக்கத்தில் மாநில அரசே நேரடியாக இலக்குவைத்து சாராய வியாபாரம் செய்வதை ஆதரிக்கிறீர்களா என்று ராகுல் காந்தியிடம் மூத்த பத்திரிகையாளர் ஒருவர் கேட்டபோது, ""ஆதரிக்கவில்லை'' என்று தெளிவாகவே பதில் கூறினார். உலகிலேயே அதிக இளைஞர்களைக் கொண்ட நாடாகத் திகழும் இந்தியாவில் வேகமான பொருளாதார வளர்ச்சியும் சேர்ந்து கொள்ளும்போது, அது சாராய வியாபாரிகளுக்கு நல்ல வேட்டைக்களமாக அமைகிறது. ஆனால், மக்களுக்கோ, நோயும், உடல் முடக்கமும், சாவும்தான் பிரதிபலனாகக் கிடைக்கிறது. இன்றைக்கு மதுநுகர்வை ஒழுக்க ரீதியாகப் பார்க்காமல், மிகப்பெரிய  சுகாதாரப் பிரச்னையாகப் பார்க்க வேண்டும். அதனால், எய்ட்ஸ், புகையிலை போன்றவற்றுக்கு எதிராகப் போர் தொடுத்திருப்பது போன்று, மத்திய, மாநில சுகாதாரத்துறையின் கீழ், ஒருங்கிணைந்த மதுக்கட்டுப்பாட்டுக் கொள்கையைக் கொண்டுவந்து, மதுவுக்கு எதிராகத் தீவிரமாகப் போர் தொடுக்க வேண்டும் என்று விளக்கியபோது, சொல்வதைக் கூர்ந்து கவனித்தார் ராகுல். மதுவை ஒரு சுகாதாரப் பிரச்னையாகப் பார்க்க வேண்டும் என்பதை ஆமோதித்த ராகுல், அதே வேளையில் தனிமனிதரைக் குடிக்காதே என்று அறிவுரை கூற முடியாது, இது அவரவர் விருப்பம் என்று எடுத்துக்கொள்ள வேண்டும் என்றும், இது எனது தனிப்பட்ட கருத்து என்றும் கூறினார். திருமணம் என்பது ஒருவரின் தனிப்பட்ட விஷயம் என எடுத்துக்கொண்டாலும், குழந்தைத் திருமணத்தை மாவட்ட ஆட்சியரே முன்னின்று தடுத்து நிறுத்துகிறாரே, அப்படியிருக்க, தமிழகமெங்கும் பள்ளிகளுக்கு அருகிலேயே இருக்கும்  டாஸ்மாக் கடைகளில், 13 வயது மாணவர்கள்கூட சரக்கு அடிக்கும் நிலையில், இதை  அவரவர் விருப்பம் என்று விட்டுவிடலாமா என்று ராகுவிடம் விவாதிக்க நேரம் இடம் கொடுக்கவில்லை. 1993-ம் ஆண்டிலேயே  மனிதக்கழிவை மனிதன் அகற்றுவதைத் தடுக்கும் சட்டம் கொண்டு வந்திருந்தாலும், நடைமுறையில் பல்பிடுங்கிய பாம்பாகவே கடந்த 17 ஆண்டுகளாக இச்சட்டம் காட்சியளிக்கிறது. பாதாளச் சாக்கடை வேலை போன்ற அவலங்கள் அதிகரித்துள்ள நிலையில், 21-ம் நூற்றாண்டு இந்தியாவுக்கு ஏற்ற, நடைமுறைப்படுத்தக்கூடிய புதிய சட்டம் ஒன்றை அடுத்த நாடாளுமன்றக் கூட்டத்தொடரிலேயே கொண்டு வர ராகுல் முயற்சி எடுக்க வேண்டும் என்றும் வலியுறுத்தப்பட்டது. அதேபோன்று, மத்திய அரசு நிதி ஒதுக்கி, மாநில அரசால் நடைமுறைப் படுத்தப்படும்  ஜவாஹர்லால் நேரு நகர்ப்புற மேம்பாட்டுத் திட்டம் என்பது இன்றைக்கு நகர்ப்புறத்தில் வசிக்கும் விளிம்புநிலை மக்களுக்கும் உதவும் வகையில் அமல்படுத்தப்படாமல், சேரி மக்களின் தலைக்கு மேலே தொங்கும் கூரிய கத்தியாகிவிட்டது. காண்ட்ராக்டர்களுக்கும், அரசியல்வாதிகளுக்கும், பன்னாட்டு நிறுவனங்களுக்கும் பெரிய ஆதாயமாகவும், நகர்ப்புற ஏழைகள், நகருக்கு வெளியே  உள்நாட்டு அகதிகளாய் தனிமைப்படுத்தப்பட்டு அழிந்தொழியும் திட்டமாகவும் மாறிவிட்டது. ஒரு பக்கம் கல்வி அடிப்படை உரிமை என்று பேசிக்கொண்டு, மறுபுறம் ஏழை தலித் குழந்தைகளுக்குக் கல்வி அறவே மறுக்கப்படும் நிலையை, இந்த நகர்ப்புற மேம்பாட்டுத் திட்டங்கள் உருவாக்கி வருகின்றன. ஆதலால், மத்திய அரசு, மாநில அரசுடன் இதுபற்றிக் கலந்து பேசி, இதை நன்மை பயக்கும் திட்டமாக மாற்றி அமைக்க வேண்டும் என்று அவரிடம் எடுத்துச் சொல்லப்பட்டது. மாற்றுப்பாலினத்தார், திருநங்கைகள் ஆகியோருக்காக, தமிழக அரசு வாரியம் ஒன்று அமைத்துள்ளது. இதனால் உடனடியாகப் பெரிய நன்மை விளையவில்லை என்றாலும், ஒரு நல்ல துவக்கம் ஏற்பட்டுள்ளது. அரசின் அங்கீகாரம் இந்த மக்களுக்குக் கிடைத்துள்ளது. இதைப்போன்று இந்தியா முழுவதுமே மற்ற மாநிலங்களிலும், கொண்டு வர வேண்டும் என்று ராகுலிடம் கூறப்பட்டது. மாற்றுப் பாலினத்தாரின் உரிமைகள் தொடர்பாக உச்ச நீதிமன்றத்தில் உள்ள வழக்கில், இந்திய அரசும், காங்கிரஸ் கட்சியும் முற்போக்காக நடந்து கொள்ள வேண்டும். இளம்வயதுடைய மாற்றுப் பாலினத்தாரின் முன்னேற்றத்திலும், உரிமைகளிலும், ராகுல் அதிக  ஆர்வம் காட்ட வேண்டும் என்று மாற்றுப்பாலினப் பிரதிநிதி கேட்டுக்கொண்டபோது, அதை ஏற்றுக்கொண்டார் ராகுல்.இந்தியா முழுவதும் விளைநிலங்கள், வேகமாக வீட்டுமனைகளாவும், சிறப்புப் பொருளாதார மண்டலங்களாகவும் மாற்றப்பட்டு வருகின்றன. இந்தியாவின் மக்கள் தொகை அதிகரித்து வரும் நிலையில், இன்னும் 20 ஆண்டுகளில் உணவுத் தட்டுப்பாடு ஏற்படும் ஆபத்து உள்ளது. அதனால், விளைநிலங்கள் சூறையாடப்படுவதைத் தடுக்கும் வகையில்  சட்டம் இயற்றி, அவற்றைச் சீரழியாமல் பாதுகாப்பது மிக அவசர அவசியம். இல்லையென்றால், மாவோயிஸ்டுகள் போன்ற ஆயுதப்  போராளிகள் இந்தியா முழுவதும் பரவி விடுவார்கள் என்று ஒருவர் எச்சரிக்கை விடுத்தார்.விடுதலைப்புலிகளுக்காக நான் பரிந்து பேசவில்லை என்றாலும், இலங்கையில் போர்  உச்சகட்டத்தை நெருங்கிவிட்டிருந்த நிலையில், இந்திய அரசு, அப்பாவி இலங்கைத் தமிழ் மக்களைப் பாதுகாக்கத் தவறிவிட்டது என்று ஒரு பெண்மணி மிக அழுத்தமாகக் கூறினார்.ஆனால், தானும், காங்கிரஸ் கட்சித் தலைவரும், மத்திய அரசும் போரின் போது இலங்கையில் நடந்த மனிதஉரிமை மீறல்களைப் பலமுறை கண்டனம் தெரிவித்துப் பேசியிருக்கிறோம். போருக்குப் பின்னர், தமிழ் மக்களை மறுகுடியமர்வு செய்வதற்கும், வீடுகள், ரயில்பாதைகள்  போன்றவற்றை ஏற்படுத்துவதற்கும் மத்திய அரசு தாராளமாக நிதிஉதவி செய்துள்ளது என்றும் ராகுல்காந்தி கூறினார்.இலங்கைத் தமிழர்கள் விஷயத்தில் தமிழ்நாட்டு மக்களின் உணர்வுகளைப் பிரதிபலிக்கும்  விதமாக, பலர் தங்கள் கருத்துகளை சரமாரியாகப் பதிவு செய்தனர். இலங்கையில் நடந்தவற்றை மனித உரிமை மீறல்கள் என்று கருதுவது சிறிதும் நியாயமற்ற கூற்று. அங்கு நடந்து முடிந்தது மிகப்பெரிய இனப்படுகொலை. அதற்கான பல ஆதாரங்கள் வெளி வந்துள்ளன என்று ஒருவர் குரலெழுப்பினார். குழுமியிருந்தவர்களின் உண்மையான உணர்வுகள் அழுத்தம் திருத்தமாகவே அவருக்குப் புரியவைக்கப்பட்டிருந்த நிலையில், இனிமேல், இலங்கைத் தமிழர்களின் பிரச்னையில் அதிக அக்கறை எடுத்துக் கொள்வதாக உறுதியளித்துச் சென்றார் ராகுல். அவரது எளிமையான மனம் திறந்த நடவடிக்கைகளை உண்மையான ஒன்று என்று ஒரு சாராரும், நல்ல அபிப்பிராயம் ஏற்படுத்தும் முயற்சி அவ்வளவுதான் என்று மற்றொரு சாராரும் கருதுவதற்கு வாய்ப்பு உள்ளது.மக்கள் பிரச்னைகளைப் பேசப் போகிறார்கள்  என்று எண்ணியிருந்த நிலையில், திருட்டு விசிடி தொந்தரவாலும், காப்பிரைட் தொடர்பான பிரச்னையாலும், திரைப்படத் தொழிலுக்கு முழுக்குப் போடவேண்டிய  நிலை ஏற்பட்டுள்ளது என்று கூறித் தங்கள் கல்லாப்பெட்டிப் பிரச்னைக்கு மனுப்போடத் தொடங்கினர் திரைப்படத் தயாரிப்பாளர்களும், விநியோகஸ்தர்களும். மனு அளித்தால், உரிய அமைச்சரிடம் கொண்டு சேர்க்கிறேன் என்று சமாதானம் கூறிய ராகுலிடம், மேலும் மேலும் திரைப்படத் துறையினர் அழுத்தம் கொடுத்ததால், சரி, தில்லியில் வந்து சந்தியுங்கள் என்று கூறினார் ராகுல்.இப்படியாக, விவாதத்துக்கான நேரம் ஒரு மணிநேரமாகக் குறைந்ததாலும், திரைப்படத்துறையினரின் குறுக்கீடுகளாலும், தமிழகத்தின் பல மாவட்டங்களிலிருந்து வந்திருந்த பெரும்பாலான அறிவுஜீவிகள்  ஏமாற்றமடைந்திருப்பார்கள் என்று யூகிக்க முடிகிறது. மாலை நேரம் வீட்டுக்கு வந்து, தொலைக்காட்சியைப் பார்க்க நகர்ந்தபோது, அண்மைச் செய்தி ஒன்று மீண்டும் மீண்டும் வந்து போனது.கோலிவுட்டுடன்  ராகுல் காந்தி  சந்திப்பு. திரைப்படத்துறையினர் மகிழ்ச்சி. அதுவரை, தலைக்குப் பின்னால் இருந்ததுபோலத் தோன்றிய ஒளிவட்டம், திடீரென்று மறையத் தொடங்கியது. அதோடு, ஜன்னலுக்கு வெளியே மக்கள் முகம் அலைமோதும் பொதுவெளியில் இருளும் வேகமாகக்  கவ்வத் தொடங்கியது.

திங்கள், 15 நவம்பர், 2010

சாலைகள் நரபலி பீடங்களா?

சாலைகள் நரபலி பீடங்களா?


சாலை விபத்துகளில் குடும்பம் குடும்பமாகப் பலியாகும் செய்தி ஒவ்வொரு நாளும் உள்ளத்தைச் சுட்டெரிக்கிறது, இதயத்தை அலைக்கழிக்கச் செய்கிறது என்று தமிழக முதல்வர் சமீபத்தில் வெளியிட்ட அறிக்கை ஒன்றில் தனது ஆதங்கத்தை வெளிப்படுத்தி இருந்தார்.ஒவ்வொரு நாளும் உள்ளத்தை உலுக்குகிற விபத்துகள், நெஞ்சைப் பிழியும் கோரச்சாவுகள், இந்த விபத்துகள் குறைய வழியே இல்லையா என்று பெருமூச்சு விடுவதாகவும், வாகன ஓட்டிகளுக்கு 8-ம் வகுப்பு வரையிலாவது கல்வித்தகுதி அவசியம் என்று கருதுவதாகவும் அந்த அறிக்கையில் பதிவு செய்திருந்தார். நாடு வாழுமா, நல்லது நடக்குமா என்பதை நல்லோரே, நீவிர் தான் எண்ணிப்பார்க்க வேண்டும் என்றும் வேண்டியிருந்தார். முதல்வர் கூறியபடி எண்ணிப்பார்த்து, நல்லது நடக்குமா என்ற ஆதங்கத்தில், சில உண்மைகளைத் தோண்டித் துருவி எடுத்து வைப்பதே இக்கட்டுரையின் நோக்கமாகிறது.  செம்மொழி மாநாட்டுக் கண்கவர் விழாவில், முதல்வர் தலைமையில் கோவையில் லட்சக்கணக்கானோர் தமிழமுதம் பருகிக் களித்திருந்தபோது, தருமபுரியில் உள்ள பாலக்கோடு, அவலத்தின் உச்சியில் வீறிட்டுக் கதறியது. திருமண கோஷ்டியை ஏற்றி வந்த மினி லாரி கவிழ்ந்து, 18 உயிர்கள் நசுங்கிச் செத்ததற்கும், 35 பேர் பல்வேறு வகைகளில் படுகாயம் அடைந்ததற்கும், டிரைவரின் கல்வித் தகுதியின்மையா காரணம்? மினி லாரியை ஓட்டுவதற்கு முன், அரசு நடத்தும் டாஸ்மாக் கடையை ஒட்டிய பாரில், குமரவேல், சரக்கு அடித்த தகுதியின்மைதான் காரணம். சந்தேகம் இருந்தால், ஐ.ஜி. சிவனாண்டியையும், தருமபுரி முன்னாள் மாவட்ட ஆட்சியர் அமுதாவையும் தமிழக முதல்வர் நினைவுகூரச் சொல்லலாம். ஓட்டுநர்களுக்கு 8-ம் வகுப்பு கல்வித்தகுதியை உறுதி செய்வது நல்ல முற்போக்கு நடவடிக்கைதான். ஆனால், முச்சந்திகள்தோறும் உள்ள 7,000-க்கும் மேற்பட்ட டாஸ்மாக் பார்களில் குடித்துவிட்டு, குறைந்தபட்சமாக 10 லட்சம் பேர்களாவது தினமும் சட்ட விரோதமாக வண்டி ஓட்டுகிறார்கள். இதைத் தடுக்காமல், பிற்போக்குத்தனமாக நடந்து கொள்கிறதே முதல்வரின் கீழுள்ள உள்துறை. கூட்டம் கூட்டமாகக் குடித்துவிட்டு ஓட்டுவதைத் தடுப்பதற்கு முதல்வர் தனது சுண்டு விரலை அசைத்தால்கூட, சாலை விபத்துகளைக் கணிசமாகக் குறைக்க முடியுமே! ஒரு சில புள்ளிவிவரங்களையாவது கணக்குப் போட்டுப் பார்க்கலாம். 2004-2005-ம் ஆண்டு  5,890 கோடியாக இருந்த டாஸ்மாக் சாராய விற்பனை, 2009-10-ம் ஆண்டு ஒரேயடியாக  14,000 கோடிக்கும் அதிகமாக அதிகரித்துள்ளது. டாஸ்மாக் விற்பனைக்கு இணையாக, 2005-ம் ஆண்டு 9,215 சாலை விபத்துச்சாவுகள் என்ற நிலையிலிருந்து, 2009-ம் ஆண்டு 13,746 சாலை விபத்துச்சாவுகளாக உயர்ந்திருக்கிறது. வேறுவிதத்தில் சொல்வதானால், 2004-05-ல் தினசரி  16 கோடியாக இருந்த டாஸ்மாக் விற்பனை, 2009-10-ல் தினசரி  38 கோடியாக உயர்ந்துள்ளது. அதேநேரத்தில்,  2005-ம் ஆண்டு, தினசரி 26 உயிர்கள் தமிழகச் சாலைகளில் பலியிடப்பட்டன. 2009-ம் ஆண்டோ, அவை வேகமாக அதிகரித்து, தினசரி 38 உயிர்கள் பலி கொடுக்கப்பட்டன. வெளிப்படையாகச் சொல்ல வேண்டுமானால், தமிழகச் சாலைகள் இப்பொழுது நரபலி பீடங்களாக ஆகிவிட்டன. கடந்த 5 ஆண்டுகளில் மட்டும் சாலை விபத்துகளில் காயமடைந்தோர் மற்றும் படுகாயமடைந்தோர் எண்ணிக்கை மூன்று லட்சம் இருக்கும். இன்றைய அரசின் ஐந்தாண்டு காலத்தில் மட்டும் தமிழகச் சாலை விபத்துகளில் இறந்தவர்களின் மொத்த எண்ணிக்கை 65,000 ஆக, உலக அளவில் புதிய கின்னஸ் சாதனை புரிந்திருக்கும். ஆமாம், சாராய விற்பனை லாபத்திலும்தான். போலியோ மற்றும் இதர நோய்களால், உடல் ஊனமுற்றவர்களைவிட, விபத்துகளில் தங்கள் கை, கால்களை, கண்களை, முதுகுதண்டுகளை இழப்பவர்கள் தமிழகத்தில் அதிகரித்துக் கொண்டு வருகிறார்கள்.மாற்றுத்திறனாளிகளுக்காக நலவாரியம் அமைத்துள்ள நிலையில், இப்படி விபத்துகளில் அவயவங்களை இழந்து முடங்குபவர்கள், தமிழக அரசின் பார்வையில், ஊனமுற்றவர்களா, மாற்றுத்திறனாளிகளா முதல்வர்தான் விளக்க வேண்டும்.முதல்வர் தலைமையில் மாநில அளவிலும், மாவட்டங்கள் அளவிலும், சாலைப்பாதுகாப்பு கவுன்சில்கள் அமைக்கப்பட்டன. ஆனால், சமூக ஆர்வலர்கள், மருத்துவ நிபுணர்கள் போன்றோர் இடம்பெறாமல், காவல்துறை மற்றும் போக்குவரத்து அதிகாரிகளை மட்டுமே இவை கொண்டுள்ளன. தெளிவான நடவடிக்கைகள், பரிந்துரைகள், திட்டங்கள் இல்லாமல் இக்கவுன்சில் வெறும் காகிதப் புலியாக உள்ளது. தீபாவளி, பொங்கல், கிறிஸ்துமஸ் போன்று, ஆண்டுக்கு ஒருமுறை சாலைப்பாதுகாப்பு வார விழாச் சடங்கு கொண்டாடுவது மட்டும்தான் ஒற்றை அம்சக்கொள்கையாக உள்ளது. 2006-ம் ஆண்டு, 11,009 சாலை விபத்துச்சாவுகள் தமிழகத்தில் ஏற்பட்டன. இவற்றைப் படிப்படியாக 20 சதவீதம் குறைத்து 2013-ம் ஆண்டுக்குள் 8,800 சாவுகள் என்று குறைக்கப் போவதாக  உள்துறை உறுதிமொழி எடுத்தது. ஆனால், இந்தச் சாவு எண்ணிக்கை கடந்த ஆண்டு 13,840-ஆக உயர்ந்துள்ளபோதிலும், வெறுமனே கைகளைக் கட்டிக்கொண்டு வேடிக்கை பார்த்து வருகிறது. அதேசமயத்தில், தமிழகத்தில் ஏற்கெனவே 6 சாராய ஆலைகளுக்கு அனுமதி இருந்தநிலையில், இதே உள்துறை, மேலும் 8 ஆலைகளுக்கு அனுமதி அளித்து, சுறுசுறுப்பைக் காட்டியுள்ளது. இனி மொத்தம் 14 ஆலைகள் இரவும் பகலும் சாராய உற்பத்தி செய்து, தமிழக ஆண் மக்களின் வாய்களில் மதுவைத் திணிக்கும். அதனால், 2013-ம் ஆண்டு, குறைய வேண்டும் என்று உள்துறை வைத்துள்ள இலக்குக்கு மாறாக, சாலை விபத்துச்சாவுகள் அதிகரிப்பதோடு, அவற்றுக்கு மிகப்பெரிய காரணியான சாராய விற்பனையும் புதிய வரலாறு படைக்கும் என்றால் மிகையில்லாத கூற்று. 96 சதவீத சாலை விபத்துகளுக்கு, ஓட்டுநர்களின் தவறுகளே காரணம் என்று தமிழகப்  போக்குவரத்துத்துறை கூறுகிறது. வேகமாக ஓட்டுவதும், குடித்துவிட்டு ஓட்டுவதும்தான் சாலை விபத்துகளுக்கு முதன்மைக் காரணம் என்று உள்துறையும் மீண்டும் மீண்டும் பதிவு செய்துள்ளது. தமிழகத்தில் ஓராண்டில் நடக்கும் 60,000 சாலை விபத்துகளுக்கு, பல்வேறு காரணங்கள் மற்றும் சூழ்நிலைகள் இருக்கலாம். ஆனால், 60 விழுக்காடு சாலை இறப்புகளுக்குக் குடித்துவிட்டு ஓட்டுவதே முதன்மைக் காரணம் என்று பல புள்ளிவிவரங்கள் மூலம் யூகிக்க முடிகிறது. காவல்துறைத் தலைவர்களும் இதையே உறுதி செய்துள்ளனர். இன்று, தமிழக அரசின் சொந்த வருவாயில், கிட்டத்தட்ட 30 சதவீத அளவுக்குச் சாராய விற்பனையில் இருந்து கிடைக்கும் நிலைதான் உச்சகட்ட அவலமாக மாறியுள்ளது. இன்றைய 15,000 கோடி சாராய விற்பனையை, இனி ஆண்டுதோறும் அதிகரிக்க வேண்டுமானால், மேலும் மேலும் அதிக விற்பனை இலக்கு வைக்க வேண்டும்.இலக்குகள் எட்டப்பட வேண்டுமானால், யாரும், எந்த வயதினரும், எந்த நேரமும், எங்கும், எவ்வளவு வேண்டுமானாலும், குடித்துவிட்டு ஓட்டலாம், விபத்து ஏற்பட்டு சாகலாம் அல்லது யாரையாவது சாகடிக்கலாம், அரசும், காவல்துறையும் கண்டுகொள்ளாது. உள்துறையின் வலது கையான டாஸ்மாக் நிர்வாகம் இலக்கு வைத்து விற்பனை செய்து, குடித்துவிட்டு ஓட்ட உற்சாகப்படுத்தும்போது, உள்துறையின் இடது கையான காவல்துறை, என்ன செய்து விட முடியும்? குடித்துவிட்டு ஓட்டுவதைத் தடுப்பதற்கு, காவல்துறை எடுக்கும் முயற்சிகள் மிக மிக மோசம் என்றும், அப்படி ஏதாவது முயற்சி எடுத்து ஓட்டுநர் உரிமத்தை ரத்து செய்வதற்கு போக்குவரத்துத் துறைக்குப் பரிந்துரை செய்தாலும், போக்குவரத்துத்துறை கண்டுகொள்வதில்லை என்றும்  முன்னாள் காவல்துறைக் கூடுதல் தலைவர் டாக்டர் ஷியாம் சுந்தர் தெளிவாக எழுதியுள்ளார். அதனையே, அரசின் சிறப்புச் செயலரும் துறை சார்ந்த சுற்றறிக்கைகளில் வழிமொழிந்துள்ளார். 21 வயதுக்குக் குறைந்தவர்களுக்கு சாராயம் விற்பனை செய்யக் கூடாது என்று அரசாணையே உள்ளது. ஆனால், நடைமுறையில் 18 வயது இளைஞர்களும், விடலைகளும்கூட, குறுக்கும் நெடுக்குமாக டூ வீலர்களை நிறுத்திவிட்டு, டாஸ்மாக் பார்களில் ஆற அமரக் குடித்துவிட்டு, மீண்டும் ஓட்டிச் செல்வதுதான் தினசரி அலங்கோலக் காட்சியாக உள்ளது. தண்ணீர் மற்றும் மணல் லாரி ஓட்டுநர்கள், ஆட்டோ, டாக்ஸி, வேன் டிரைவர்கள், ஏன் அரசுப் பேருந்து ஓட்டுநர்களில் கூட, பலர் குடித்துவிட்டோ, குடித்த பாதிப்புடனோ, தினமும் வண்டிகளை இயக்குவதுதான் நிதர்சனம்.விபத்துகளில் அடிபட்டு மயக்க நிலையில் வருபவர்கள் குடித்திருந்தால், அவர்களுக்கு அவசர சிகிச்சைகூட அளிக்க முடியாத நிலையில் தவித்து வருகின்றனர் மருத்துவர்கள். தமிழக மருத்துவமனைகளின் அவசர சிகிச்சைப் பிரிவுகளுக்குக் கொண்டு வரப்படும் விபத்தில் சிக்குண்டவர்களின் எண்ணிக்கை வேகமாக அதிகரித்து வருவதால், அவசர சிகிச்சைப் பிரிவு மருத்துவர்களும், உதவியாளர்களும் மன அழுத்தத்துக்கு ஆள்பட்டு வருகிறார்கள். அதனால், அவர்களுக்கே மனநோய் சிகிச்சை தேவைப்படும் அளவுக்கு நிலைமை மோசமடைந்து வருகிறது. குடித்துவிட்டு ஓட்டுபவருக்கு, மோட்டார் வாகனச் சட்டத்தின்படி, 6 மாதம் சிறைத் தண்டனை அளிக்க முடியும். குடித்துவிட்டு, விபத்து ஏற்படுத்துபவருக்கு, செக்ஷன் 304(ஏ) பிரிவின்படி, இரண்டு ஆண்டு சிறைத்தண்டனை அளிக்க முடியும். ஆனால், தமிழக அரசும், உள்துறையும், அதன் அங்கமான டாஸ்மாக் நிர்வாகமும், பார் உரிமையாளர்களும் இணைந்து, மது விற்பனையை அதிகரிக்க வெளிப்படையாகவே பல சட்ட மீறல்களில் ஈடுபடுவதோடு, குடித்து விட்டு ஓட்டுவதற்கும் தாராளமாக அனுமதிக்கின்றனர். டாஸ்மாக் பார்கள் மட்டுமல்ல, ஐந்து நட்சத்திர விடுதிகள், "பப்', கடற்கரைச்சாலை உல்லாச ரெசார்ட்கள், ஹோட்டல்களில் உள்ள பார்கள் எல்லாவற்றிலுமே இந்தச் சட்டவிரோதச்  செயல்பாடுகள்தான் வாடிக்கை. இந்த நிலையில், தமிழக அரசு என்ன செய்யப்போகிறது?
கருத்துகள்

தமிழக அரசு வேறு என்ன செய்யப் போகிறது? யாருக்கோ எழுப்பப்பட்ட கேள்வி என்று அமைதி காக்கும். தன் மது விற்பனையைப் பெருக்க வேறு வழிகளை ஆராயும். உண்மையில் சாலை நேர்ச்சிகளிலும் (விபத்துகளிலும்) மருத்துவமனகைளிலும் இறப்பவர்கள் பெரும்பகுதியினர் குடிக்கு அடிமைகளே! பல இல்லறங்கள் சிதையவும் காரணம் குடி அடிமையரே! குடி அடிமையரை ஊக்குவிக்கும் மதுவழிப்படுத்தும் தமிழக அரசே முதல் குற்றவாளி.அரசியல ்தலைவர்களில் திரு இராமதாசு ஒருவர் மட்டுமே மதுவிற்கு எதிரான குரலைத் தொடர்ந்து எதிரொலித்து வருகிறார். தற்கொலைக்கு இணையான மதுக் குடியிலிருந்து பெறும் வருவாய் கொண்டே அரசு இலவசங்களை அளித்து வருகிறது என்பதைக் கட்டுரையாளர் பொது மக்களிடையே விளக்கித் தொண்டாற்ற வேண்டும். கட்டுரையாளருக்குப் பாராட்டுகள். அன்பன் இலக்குவனார் திருவள்ளுவன்
By Ilakkuvanar Thiruvalluvan
11/15/2010 5:16:00 AM
What you have written are 100 percent correct. But who is going to bell the cat.
By Gokarnesan
11/15/2010 2:29:00 AM
உங்கள் கருத்தைப் பதிவு செய்யுங்கள் *

வியாழன், 14 அக்டோபர், 2010

பிளாஸ்டிக் பயங்கரத்தை தடை செய்க!


சென்னை மாநகராட்சி முழுவதும் 20 மைக்ரான் தடிமனுக்குக் குறைவான பிளாஸ்டிக் பைகள் தடை செய்ய நடவடிக்கை மேற்கொள்ளப்படும் என்று கடந்த வாரம் சென்னை மேயர் அறிவித்திருப்பது வரவேற்புக்கு உரியது. ஆயினும், திடீரென்று வந்துள்ள இந்த அறிவிப்பை, ""மிகத் தாமதமாக வந்துள்ள மிகக் குறைந்தபட்ச நடவடிக்கை'' என்றும் விமர்சிக்காமல் இருக்க முடியவில்லை.  1999-ம் ஆண்டே, சென்னை மாநகராட்சி 20 மைக்ரான் பிளாஸ்டிக் பொருள்களைத் தடை செய்யும் தீர்மானம் நிறைவேற்றி, அதனடிப்படையில் தமிழக அரசிடம் உள்ளாட்சி சட்டத்தில் உள்ள நடைமுறைச் சிக்கலைத் தீர்க்கக்கேட்டு விண்ணப்பித்தது. பின்னர், திடக்கழிவு மேலாண்மை மூலமே மெல்லிய பிளாஸ்டிக் பொருள்களைப் பிரித்து விடுவோம் என்று நேற்றுவரை கூறி வந்துள்ளது மாநகராட்சி. இவ்வாறு பதினோரு ஆண்டுகள் கழிந்துள்ள நிலையில், இப்பொழுதுதான் இப்பிரச்னையின் தீவிரத்தைச் சிறிதாவது உணரத் தொடங்கியுள்ளது சென்னை மாநகராட்சி.  ஆனால், 20 மைக்ரான் தடிமன் எனும் அளவுகோல் ஒன்றுக்கும் உதவாது என்பதை நாம் உணர வேண்டும். மிக எளிதாக 21 மைக்ரான் அல்லது 24 மைக்ரான் என்று சான்றிதழ் வைத்துக்கொண்டு பிளாஸ்டிக் வியாபாரிகள் வண்ணமயமான, ஆனால் மிக ஆபத்தான மெல்லிய பைகளைத் தாராளமாகப் புழக்கத்தில்விட முடியும். மேலும், மிக மலிவான விலை என்பதால் 40 அல்லது 50 மைக்ரான்வரை கூட பிளாஸ்டிக் பைகளைப் பிரித்து காசாக்க முயல்வது, இன்றைக்கு சிறிதும் லாபமற்ற தொழில் என்றே கருதப்படுகிறது. அதனால்தான், யாரும் மிக மெல்லிய பிளாஸ்டிக் பொருள்களை ஆர்வமுடன் பிரித்துச் சேகரிக்க முன்வருவதில்லை.  இக்காரணத்தின் அடிப்படையிலேயே, மேற்கு வங்கம், மும்பை, தில்லி, சண்டீகர் போன்ற இந்தியாவின் பல பகுதிகளில் 40 மற்றும் 50 மைக்ரான் வரையிலான பிளாஸ்டிக் பொருள்கள் மாநில அரசுகளால் தடை செய்யப்பட்டுள்ளன. இமாச்சலப் பிரதேசத்தில் ஒருமுறை மட்டுமே பயன்படுத்தப்படும் எல்லாவிதமான பிளாஸ்டிக் பொருள்களும் தடை செய்யப்பட்டு தீவிரமாகக் கண்காணிக்கப்படுகின்றன.  தில்லி அரசு பிளாஸ்டிக் பைகளுக்கு கொண்டு வந்த தடையை எதிர்த்து, தில்லி உயர் நீதிமன்றத்திலும், பின்னர் உச்ச நீதிமன்றத்திலும், பிளாஸ்டிக் நிறுவனங்களின் சங்கங்கள் மேல்முறையீடு செய்து தங்கள் தரப்பு வாதங்களை முன்வைத்தன. அந்த வாதங்களை எல்லாம் கேட்ட பின்னரே, அவர்களது வழக்கைத் தள்ளுபடி செய்து, பிளாஸ்டிக் தடையை தில்லி உயர் நீதிமன்றமும், உச்ச நீதிமன்றமும் உறுதி செய்தன என்பது குறிப்பிடத்தக்கது.  இக்கட்டுரை ஆசிரியர் கடந்த ஆண்டு தொடர்ந்த வழக்கில் சென்னை உயர் நீதிமன்ற அமர்வு, கீழ்க்கண்ட பரிந்துரையை தமிழக அரசுக்கு வழங்கியுள்ளது. பிளாஸ்டிக் நிறுவனங்கள் சார்பாக வைக்கப்பட்ட பல ஆவணங்களையும், வாதங்களையும், தெளிவாகக் கேட்டு உள்வாங்கிய பின்னர் வெளியிடப்பட்ட நீதிமன்றப் பரிந்துரையின் சாராம்சம் இதுதான்.  சென்னை உயர் நீதிமன்ற ஆணையின் சுருக்கம் :-  உதகமண்டலம் போன்ற ஒரு சில இடங்கள் தவிர, தமிழகத்தில் பிளாஸ்டிக் பைகள் போன்ற பொருள்கள் தடை செய்யப்படவில்லை. மத்திய அரசின் சட்டத்தைக்கூட இன்றுவரை, தமிழ்நாடு மாசுக்கட்டுப்பாடு வாரியம் அமல்படுத்தவில்லை. தமிழகத்தின் எல்லாத் தெருக்களிலும் பிளாஸ்டிக் பைகள், டெட்ரோ பேக்குகள், கப்புகள் போன்றவை விசிறியடிக்கப்படுவதை எவரும் காணமுடியும். ஹோட்டல்களில், பிளாஸ்டிக் பைகளில் கொடுக்கப்படும் உணவுப் பதார்த்தங்களில், பிளாஸ்டிக்கில் உள்ள விஷக் கெமிக்கல்கள் கலந்து புற்றுநோய் வரும் அபாயம் உள்ளது என்று அறிவியல் ஆய்வுகள் கூறுகின்றன. நிலத்தடி மண்ணும், நீரும் மாசுபடுவதுடன், செடிகளும், மரங்களும் வளர்வதைத் தடுக்கின்றன. இப்படிச் சொல்லிக்கொண்டே போகலாம். சுற்றுச்சுழலுக்குப் பிளாஸ்டிக்குகளால் ஏற்படும் தீங்குகளைக் கருதும்போது, மாசுக்கட்டுப்பாடு வாரியத்தின் செயல்பாடுகள் ஏமாற்றமளிக்கின்றன.  தமிழ்நாடு அரசு 2003-ம் ஆண்டு கொண்டு வந்த சட்டமசோதா ஆறு ஆண்டுகள் ஆகியும் சட்டமாக்கப்படவில்லை. அப்பொழுதே செயல்பட்டிருந்தால் இந்த ஆறு ஆண்டுகளில் பிளாஸ்டிக் பயன்பாட்டை ஓரளவுக்கு முறைப்படுத்தியிருக்க முடியும்.  முன்னாள் நீதிபதி ரங்கநாத் மிஸ்ரா தலைமையில் ஏற்படுத்தப்பட்ட கமிட்டியின் சில பரிந்துரைகளை தமிழக அரசு கவனத்தில் கொள்ள வேண்டும். உலகின் பல நாடுகள், தீங்கு விளைவிக்கும் பிளாஸ்டிக் பொருள்களுக்குத் தடைவிதிக்கத் தொடங்கியுள்ளன.  ஆஸ்திரேலியாவில் சமீபத்தில் தண்ணீர் விற்பனை செய்யப்படும் பெட் பாட்டில்களுக்குக்கூட தடை விதிக்கப்பட்டுள்ளது. இந்தியாவிலும் பல மாநிலங்கள் கடுமையான நடவடிக்கைகளை எடுத்து வருகின்றன.  தமிழக அரசும், மாசுக்கட்டுப்பாடு வாரியமும் மிகப்பெரிய அளவில் தமிழகம் முழுவதும் பிளாஸ்டிக் பொருள்களால் சுற்றுச்சூழலுக்கு ஏற்படும் அபாயம் குறித்த விழிப்புணர்வு பிரசாரத்தை முடுக்கிவிட வேண்டும். மற்ற மாநிலங்கள் எடுத்துவரும் நடவடிக்கைகளைக் கவனத்தில் கொண்டு, முதற்கட்ட நடவடிக்கையாக 60 மைக்ரான் தடிமனுக்குக் குறைந்த பிளாஸ்டிக் பொருள்களுக்குத் தடை விதிக்க பரிசீலனை செய்ய வேண்டும்.  சுத்தமான காற்று, நீர் போன்ற தனிமனிதர்களின் உரிமைகளையும், மரங்கள் மற்றும் விலங்கினங்களுக்கு வேண்டிய சுத்தமான நிலம் ஆகியவற்றைக் கணக்கில் எடுத்துக் கொண்டால், தமிழக அரசு 2003-ம் ஆண்டு கொண்டு வந்த பிளாஸ்டிக் தடைக்கான சட்டமசோதாகூட போதுமானதாக இருக்காது. ஆதலால், அதைவிடக் கடுமையான சட்டதிட்டங்களை விரைவில் சட்டசபையில் தாக்கல் செய்து, அமல்படுத்த வேண்டும் என்று தமிழக அரசைக் கேட்டுக்கொள்கிறோம்.  - சென்னை உயர் நீதிமன்றம் 27.7.2009.  சென்னை உள்பட, தமிழகத்தில் பல நகராட்சிகளில் வெள்ள நீர் கால்வாய்கள் அடைத்து வெள்ளப்பெருக்கு ஏற்படுவதற்கும், கழிவுநீர் பாதாளச் சாக்கடைகள் அடைத்துக் கொண்டு சுகாதாரச் சீர்கேடுகள் ஏற்படுவதற்கும், கொசுக்கள் பெருகி மர்மக்காய்ச்சல், சிக்குன் குனியா போன்ற பலநோய்கள் ஏற்படுவதற்கும், விசிறியடிக்கப்படும் பைகள், கப்புகள், ஸ்பன்கள் போன்றவைதான் முதன்மைக் காரணம்.  அதுபோல, பெரிய ஹோட்டல்கள் முதல் தெருமுனை கையேந்தி பவன்கள் வரை உணவுப் பொருள்களை பிளாஸ்டிக் பேக்கேஜிங்குகளில் அல்லது பைகளில் பார்சல் செய்து தருகிறார்கள். உணவுப் பொருள்களின் சூடு மற்றும் எண்ணெய்ப்பதத்தால், பிளாஸ்டிக்கில் உள்ள ஆபத்தான பல வேதிப் பொருள்கள், ரசாயன சாயங்கள் மற்றும் காரீயம், ஆர்சனிக், நிக்கல், மெர்க்குரி போன்ற உலோகங்கள் உணவுடன் கலப்பதற்கான வாய்ப்பு உள்ளது. தொடர்ந்து இவ்வாறு உண்பது உடலில் பல விளைவுகளை ஏற்படுத்தும் ஆபத்து கொண்டது. அதேபோல, மீந்துவிடும் உணவுடன் பிளாஸ்டிக் பைகளையும் கால்நடைகள் சேர்த்து விழுங்கிவிடுகின்றன.  அதனால், நகர்ப்புறம் மட்டுமல்லாது கிராமங்களிலும்கூட மேய்ச்சலுக்குப் போகும் கால்நடைகள் மற்றும் கன்றுக்குட்டிகள், நூற்றுக்கணக்கில் தமிழகத்தில் இறந்து வருவது நடைமுறையாகிவிட்டது. பிளாஸ்டிக் பொருள்கள் கால்நடைகளின் குடலில் தங்கிவிடுவதால், அவை கறக்கும் பாலில் உண்டாகும் நச்சுத்தன்மையை ஆராய தமிழ்நாடு கால்நடைப் பல்கலைக்கழகம் முற்பட்டு வருகிறது.  இவ்வளவு ஆபத்துகள் கொண்ட பிளாஸ்டிக் பைகள், கப்புகள் போன்றவை தடை செய்யப்பட்டால், கணிசமான வேலை இழப்புகள் ஏற்படும் எனும் வாதம் மிகத் தவறானது. மாறாக, தையல் இலை, வாழை இலை, தாமரை இலை மற்றும் மட்டை, பாக்கு மட்டை, துணிப்பை, காகிதப்பை, சணல்பை என்று பல விதங்களில் இயற்கைக்கு உகந்த பொருள்களை உற்பத்தி செய்ய முடியும். அதிக அளவில் சுய உதவிக் குழுக்களுக்கும், சிறு நிறுவனங்களுக்கும் வேலைவாய்ப்பு பெருகும். அதோடு, தமிழக விவசாயிகளுக்கும், இவ்வகை மூலப்பொருள்களை விளைவிக்கும் வாய்ப்புக் கிடைக்கும்.  150 மைக்ரான் வரையிலான பிளாஸ்டிக் பொருள்கள் தடை செய்யப்பட்டுள்ள முற்போக்கு சிந்தனை கொண்ட வங்கதேசத்தில், இந்த உண்மை உறுதி செய்யப்பட்டுள்ளது. பிளாஸ்டிக் தடை செய்யப்பட்டால், பொதுமக்களும் சரி, உணவு விடுதிகளும் சரி அவசியமான மாற்று வழிகளைக் கண்டுபிடித்துக் கொள்வார்கள்.  இப்பொழுது மத்திய சுற்றுச்சூழல் அமைச்சகம் தயாரித்துள்ள மசோதாவின்படிகூட, 40 மைக்ரான் வரையிலான பிளாஸ்டிக் பொருள்களைத் தடை செய்யும் சட்டமசோதா கொண்டு வர உள்ளது. ஆக, சென்னை மாநகராட்சியாகட்டும், தமிழக அரசாகட்டும், 1999-ம் ஆண்டு யோசித்த, இன்றைக்கு ஒன்றுக்கும் உதவாத 20 மைக்ரான் அளவுகோலைத் தாண்டி யோசிக்க வேண்டிய அவசர அவசியம் எழுந்துள்ளது.  இனி, எதிர்காலச் சந்ததியினரின் நலனையும் கருத்தில் கொண்டு, தெளிவான முடிவுகளை எடுக்க வேண்டும். இந்தச் சுற்றுக்சூழல் மற்றும் மக்கள் நலன் சார்ந்த முடிவில், அரசியல் வேறுபாடுகளைப் புகுத்தாமல் இருப்பது அனைவரின் கடமையாகும். சென்னையின் மேயரும் சரி, தமிழக அரசும் சரி தொலைநோக்குப் பார்வையுடன் முடிவெடுப்பார்களா என்பதே சமூக ஆர்வலர்களின் எதிர்பார்ப்பு.          
கருத்துக்கள்

நல்ல கட்டுரை. கட்டுரையாளர் இக்கட்டுரையின்படியையும் உயர்நீதிமன்றத் தீர்ப்பின்படியையும் இணைத்துத் தமிழகஅரசிற்கும் தொடர்புடைய துறைகளுக்கும் உள்ளாட்சி அமைப்புகளுக்கும் அனுப்பி வைத்தால் ஏதும் அவர்களுக்கு விழிப்புணர்வு வரலாம்.
அன்புடன் இலக்குவனார் திருவள்ளுவன்
By Ilakkuvanar Thiruvalluvan
10/14/2010 2:52:00 AM
"பிளாஸ்டிக் தடை செய்யப்பட்டால், பொதுமக்களும் சரி, உணவு விடுதிகளும்/('அனைவரும்') சரி அவசியமான மாற்று வழிகளைக் கண்டுபிடித்துக் கொள்வார்கள்" இதை இங்கே நான் கண்கூடாக பார்க்கிறேன். நம் அரசும், மக்களும், வியாபாரிகளும் என்றாலும் ஒரு நாள் விழிப்படைவார்கள் என்ற நம்பிக்கையுடன்,
By செந்தில் குமார், Germany
10/14/2010 2:50:00 AM
ஒவ்வோர் வீட்டு (அபார்ட்மென்ட்) வாசலிலும் மூன்று குப்பைத் தொட்டிகள் உள்ளன, வீட்டிலும் மக்கள் 3 குப்பை கூடைகள் வைத்து பேப்பர் , பிளாஸ்டிக், உணவுக்கழிவு என குப்பைகளை மூன்றாகப் பிரித்து அதற்கான தொட்டிகளில் மட்டுமே போட வேண்டும். தவறினால் அபராதம். இதனால் இங்கு சுற்றுப் புறம் மிகத தூய்மையாக பேணப்படுகிறது. பள்ளியில் இருந்தே சுற்றுப்புறத் தூய்மையின் இன்றியமையாமை போதிக்கப்படுவதால் பெரும்பாலான மக்கள் அதன் அவசியம் உணர்ந்து பொறுப்புடன் செயல்படுகிறார்கள்.
By செந்தில் குமார், Germany
10/14/2010 2:47:00 AM
கூல்ட்ரிங்க்ஸ் வாங்கும் போது பாட்டிலுக்கும் சேர்த்தே விலை. அது மொத்த விலையில் சுமார் பாதியாக இருக்கும். பயன்படுத்திய பாட்டில்களை எந்த சூப்பர் மார்கெட்டிலும் திருப்பிக் கொடுத்தால் காசு திரும்பக் கிடைக்கும். So, பிளாஸ்டிக் புட்டிகள்அலட்சியமாக வீசப்படுவதில்லை. மாதத்தில் ஒருமுறை மொத்தமாக திருப்பிக் கொடுத்து காசாக்கிக் கொள்கிறார்கள். உணவகங்கள், துணிக்கடைகளில் பெரும்பாலும் காகிதப்பைகள் மட்டுமே.
By செந்தில் குமார், Germany
10/14/2010 2:46:00 AM
அருமை, மிக முக்கியமான கருத்துக்களைக் கொண்ட அவசியமான கட்டுரை. பொதுவாகவே இந்தியாவில் சூழியல் விழிப்புணர்வு மிகக் குறைவாக உள்ளது. தற்போது நான் வசிக்கும் ஜெர்மனியில், பிளாஸ்டிக் உபயோகம் பெருமளவில் மட்டுப்படுத்தப்பட்டுள்ளது. சூப்பர் மார்க்கெட்களில் எவ்வளவு பொருள் வாங்கினாலும் பிளாஸ்டிக் பைகள் வேண்டுமெனில் காசு கொடுத்துதான் வாங்க வேண்டும். அதுவும் குறைந்தது ஒரு யூரோ. இனாமாக எங்கும்,எதுவும் கிடைக்காது. ஆகையால் கடைக்குச் செல்வோர் தம் கையோடு தம் பைகளைக் கொண்டுவருகின்றனர். வயது வித்தியாசமின்றி ஒவ்வோர் ஆணும் பெண்ணும் லேப்டாப் அல்லது ஹான்ட்பேகில் குறைந்தபட்சம் ஒரு மஞ்சள் பை அளவுள்ள துணிப்பையை எப்போதும் வைத்துள்ளனர். நம்மூரில் துணிப்பை வைத்துக் கொள்வது நிறைய பேருக்குக் கவுரவக் குறைச்சல் அல்லவா?
By செந்தில் குமார், Germany
10/14/2010 2:45:00 AM
உங்கள் கருத்தைப் பதிவு செய்யுங்கள் *

செவ்வாய், 12 அக்டோபர், 2010

அனைவருக்கும் வேண்டும் இலவச ஆயுள் காப்பீடு


தனி ஒருவனுக்கு உணவில்லை எனில் ஜகத்தினை அழித்திடுவோம்' என்ற பாரதியின் பாடலில் உணவு என்பதை உண்ணும் உணவு என்று மட்டுமே கருத்தில் கொள்ளக் கூடாது. தனிமனித உரிமை என்றும் பொருள் கொள்ளலாம்.  அந்த வகையில் நாட்டு மக்கள் கல்வி மற்றும் மருத்துவ வசதியை இலவசமாகப் பெறுவது உரிமை. அவற்றை ஏற்படுத்தித் தருவது அரசின் கடமை.  தமிழகத்தைப் பொறுத்தவரை இலவச மருத்துவ வசதியை அனைவரும் பெறும் வகையில் ஏராளமான அரசு மருத்துவமனைகள், ஆரம்ப சுகாதார நிலையங்கள் செயல்பட்டு வருகின்றன. இதுதவிர உயிர் காக்கும் உயர் சிகிச்சைக்காக கலைஞர் காப்பீட்டுத் திட்டமும் செயல்பட்டு வருகிறது.  இதேபோல அனைவரும் இலவசக் கல்வி கற்கும் வகையில் அரசுப் பள்ளிகள் செயல்பட்டு வருவதுடன், பாடப்புத்தகங்கள், கல்வி உதவித்தொகை, இலவச பஸ் பாஸ்கள் வழங்கப்பட்டு வருகின்றன. மேலும், முதல் தலைமுறை பட்டதாரிகளுக்காக பொறியியல் கல்லூரிகளில் சேரவும் கட்டணச் சலுகை உள்ளது.  இந்த வரிசையில் அரசால் நிறைவேற்றப்பட வேண்டிய கடமை, அனைவருக்கும் இலவச ஆயுள் காப்பீட்டுத் திட்டம்.  "எதை எடுத்தாயோ அது இங்கிருந்தே எடுக்கப்படுகிறது; எதைக் கொடுக்கிறாயோ அது இங்கிருந்தே கொடுக்கப்படுகிறது' என்ற கீதாச்சார வாக்குப்படி பொதுமக்களிடம் பெறப்பட்ட வரிப்பணத்தின், ஒரு பகுதியை மக்களுக்கே வழங்குவது தானே நியாயம்?  விபத்து, இயற்கைச் சீற்றம், காட்டு விலங்குகள் தாக்குதல், கலவரங்கள் உள்ளிட்ட சம்பவங்களின்போது உயிரிழந்தவர்களுக்கும், அரசு ஊழியர்கள் உயிரிழந்தால் அவர்களுக்கும் இழப்பீடு வழங்கப்படுகிறது. சில தனியார் நிறுவனங்களிலும் இச்சலுகை உள்ளது.  ஆனால், சாதாரண மக்களில் ஒருவர் திடீரென உயிரிழக்க நேரிட்டால் அவர்களின் குடும்பத்தினருக்கு எவ்வித நிவாரணத் தொகையும் கிடைக்காத நிலையுள்ளது. எத்தனையோ குடும்பங்கள், வருவாய் ஆதாரமான குடும்பத் தலைவனையோ, தலைவியையோ, சகோதர, சகோதரிகளையோ இழந்து துன்பத்தில் தவிக்கின்றன.  உழைக்கும் கூலித் தொழிலாளி எப்போதும் உழைத்துக் கொண்டேதான் இருக்கிறான். அவர்களுக்கு பணிஓய்வு என்பதும், ஓய்வு பெறும்போது அரசு ஊழியர்களுக்குக் கிடைப்பது போன்ற வைப்புத்தொகை என்பதும் "கானல்' நீராகவே உள்ளது. அவற்றை "காணும்' நீராக மாற்றும் வகையில் இலவச ஆயுள் காப்பீட்டுத் திட்டத்தைச் செயல்படுத்துவது குறித்து அரசு ஆலோசிக்கலாம்.  தமிழகத்தில் 6 கோடியே 64 லட்சம் பேர் இருப்பதாகக் கணக்கிட்டாலும் அவர்களில் 40 வயதிலிருந்து 58 வயது வரை உள்ள, அரசு ஊழியர் அல்லாதோர் சுமார் 2 கோடி பேர் இருப்பர். இவர்களுக்கு ஆண்டுக்கு ஆயிரம் ரூபாய் வீதம் செலுத்தும்பட்சத்தில் ரூ.2,000 கோடி தேவை.  2007-08-ம் நிதியாண்டில் டாஸ்மாக் மூலம் வருவாய் ரூ. 10 கோடிக்கும் மேல். பல்வேறு வகையில் வரிவிலக்கு அளிப்பதன் மூலம் அரசுக்கு ஆண்டுதோறும் தோராயமாக ரூ. 200 கோடிக்கும் அதிகமாக இழப்பு ஏற்படுகிறது. 5 ஆண்டுகளில் இலவச கலர் டி.வி. வழங்குவதற்காக ஒதுக்கப்பட்ட மொத்தத் தொகை ரூ. 2,500 கோடி. இதில் 5-வது கட்டமாக இலவச கலர் டிவி வழங்குவதற்காக ஒதுக்கப்பட்ட தொகை ரூ. 824 கோடியே 40 லட்சம். இதுதவிர ஆடம்பரமான அரசு விழாக்களுக்காக கோடிக்கணக்கான ரூபாய் விரயம் ஆகிறது.  இந்த வருவாய் இனங்களிலிருந்து சிக்கனமாகவும், சிறப்பாகவும் பட்ஜெட்டை அமைப்பதன் மூலம் ஆயுள் காப்பீட்டுக்குத் தேவையான தொகையை பிரீமியமாகச் செலுத்த அரசால் முடியும்.  இப்போது ஒரு குறிப்பிட்ட பிரீமியத் தொகையை ஆயுள் காப்பீட்டுத் திட்டத்தில் செலுத்தும்போது அதில் 20 சதம் அந்த முகவர்களுக்குச் செல்கிறது. 10 சதம் பிராஸசிங் தொகையாகக் கழிகிறது. மீதமுள்ள 70 சதம் தொகைதான் நமது கணக்கில் சேருகிறது. இவற்றுக்குத்தான் வட்டி கணக்கிடப்பட்டு, பாலிசி முதிர்வடையும்போது ஒரு தொகையாக உரியவர்களுக்குக் கிடைக்கிறது.  ஆனால், அரசால் இலவச ஆயுள் காப்பீட்டுத் திட்டம் செயல்படுத்தப்படும்போது முகவர் கமிஷன் இல்லாமல் செலுத்தும் வகையில், காப்பீட்டு நிறுவனத்துடன் புரிந்துணர்வு ஒப்பந்தம் செய்துகொள்ள முடியும்.  இதனால் ஒருவரின் 58-வது வயது நிறைவில் பாலிசி நிறைவுற்று குறைந்தபட்சமாக ரூ. 50 ஆயிரத்துக்கும் அதிகமாகக் கிடைக்க வாய்ப்புள்ளது. இடையே அவர்கள் உயிரிழந்தாலும் காப்பீட்டுத் தொகை அவர்கள் குடும்பத்துக்குக் கிடைக்கிறது.  இத் திட்டத்தைச் சட்டம் இயற்றி நிறைவேற்றினால், அடுத்து வரும் ஆட்சியாளர்களும் தொடர்ந்து பிரீமியத்தை கட்டுவர். இதன்மூலம் அரசு அலுவலர்கள் மட்டுமே வாக்கு வங்கி என்ற அரசின் (மனக்) கோட்டைக்குள் பொதுமக்களும் நுழைய முடியும்.  இலவசத் திட்டங்கள் எத்தனை இருப்பினும் காலத்தால் அழியாத, சாமானிய மக்களுக்குப் பயனுள்ள இத்திட்டத்தை நிறைவேற்றுவதன் மூலம் தமிழக அரசு இதர மாநிலங்களுக்கு முன்னோடியாகத் திகழும் என்பதில் ஐயமில்லை.  
கருத்துக்கள்

நல வாரியங்கள் மூலம் அரசு இபபொழுது இலவச இடர் காப்பீட்டுத் திட்டத்தை அறிமுகப்படுத்தியுள்ளது. (ஆயுள் காப்பீடு என்று சொல்வது சரியல்ல.) எனவே, கட்டுரையாளர் கூறுவது போல் அனைவருக்கும் விரிவாக்கலாம். ஆனால், 58 ஆம் அகவையில் குறைந்த அளவு 50,000 என்பது குறைவான தொகை. கட்டுரையாளர் கணக்கிட்டுப் பாராமலும் குறைந்து வரும் பணத்தின் மதிப்பை உணராமலும் தெரிவித்துள்ளார். 
அன்புடன் இலக்குவனார் திருவள்ளுவன்
By Ilakkuvanar Thiruvalluvan
10/12/2010 2:20:00 AM
உங்கள் கருத்தைப் பதிவு செய்யுங்கள் *

திங்கள், 20 செப்டம்பர், 2010

தமிழக அரசின் "ஜிம் க்ரோ' சட்டங்கள்


பத்தொன்பதாம் நூற்றாண்டு - அமெரிக்காவில், கருப்பர்களை அடிமைகளாக நடத்துவது நிறுத்தப்பட்ட பின்பும், தீண்டாமைக் கொடுமை மட்டும் தொடர்ந்தது. கருப்பு நீக்ரோக்கள் வெள்ளையர்களுக்கு சமம், ஆனால் தனித்தனியே என்ற "ஜிம் க்ரோ' சட்டங்கள் 1876 முதல் 1965 வரை, கிட்டத்தட்ட 90 ஆண்டுகள் அமலில் இருந்தன. தீண்டாமை இருந்த அமெரிக்காவில் "ஜிம் க்ரோ' சட்டங்களின் படி, கருப்பர்கள் வசிக்க தனி காலனிகள், தனி விடுதிகள், தனி பொதுக் கழிப்பிடங்கள், தனி பள்ளிகள், தனி வணிக வளாகங்கள், தனி கல்லூரிகள் என்று எல்லாமே தனித்தனி தான். ÷வெள்ளை, கருப்பு இரண்டு இனமும் சரி சமம் என்று சொல்லப்பட்டாலும், கருப்பர்களுக்கான எல்லா அமைப்புகளும் வசதிக்குறைவாக, நிலையற்ற தன்மை உடையனவாக இருக்கும். இதே போன்றதொரு நிறவெறிக் கொடுமை, காந்தி நெல்சன் மண்டேலா, 1994-ல் ஜனாதிபதியாகும் வரை தென் ஆப்பிரிக்காவில் தொடர்ந்தது. ÷உலகெங்கும் தீண்டாமைக் கொடுமைகள் மங்கிவரும் நிலையிலும், மக்களாட்சி அமையப் பெற்று 63 ஆண்டுகளும், அரசியலமைப்புச் சட்டம் அமையப்பெற்று 60 ஆண்டுகளும் முடிந்துவிட்ட நிலையில், இந்தியாவில் மட்டும் சாதியின் பெயரால், தீண்டாமை மங்காமல் சுடர்விட்டு எரிவதை என்னவென்று சொல்வது? இன்றும் ஒவ்வொரு கிராமங்களுக்கு வெளியிலும் சேரிகள். அந்தச் சேரி மக்கள் பயன்பாட்டுக்காக தனி சுடுகாடு. திடீர்திடீரென்று  முளைக்கும் தீண்டாமைச் சுவர்கள். ÷இந்நிலையில், தலித் மக்களின் முன்னேற்றத்துக்காக என்று தொடங்கப்பட்டு, அரசின் ஆளுமையில் இருக்கும் ஆதிதிராவிட நலப் பள்ளிகளும், விடுதிகளும், தலித் குழந்தைகளின், இளைஞர்களின் முன்னேற்றத்துக்குப் படிக்கற்களாக இருப்பதற்கு பதில் மிகப்பெரிய தடைக்கற்களாக நடைமுறையில் இருப்பதையும் பார்க்க முடிகிறது. ஆக, கல்வியில் முன்னேற்றம் அடைந்து, சமூகப் பொருளாதார விடுதலை கிடைப்பதற்குப் பதில், இந்தத் தலித்துகளுக்காக தனியாக உள்ள கல்வி நிறுவனங்கள் இக்காலகட்டத்திலும் தரமற்ற முறையில் தொடர்வது என்பது, அரசுகளே நடைமுறைப்படுத்தும் எழுதப்படாத "ஜிம் க்ரோ' சட்டங்கள் என்று கூறுவதுதானே சரியாக இருக்கும். ÷கிராமங்களில் உள்ள தீண்டாமையையும், வாழ்வாதார இழப்பையும் தாக்குப்பிடிக்க முடியாமல் நகரத்துக்கு வந்து, பொது சமுதாய நீரோட்டத்துடன் கலந்து வாழ்ந்து முன்னேறத் துடிக்கும் தலித்துகளுக்கு இப்பொழுது, அரசுகளின் வளர்ச்சித் திட்டங்கள் பேரவலமாக அமைந்து விட்டது. ÷நகர்ப்புறச் சேரிகளில் உள்ளவர்களுள் 92 சதவீதத்துக்கும் அதிகமானோர் தலித்துகள் என்பதை குடிசை மாற்று வாரியம் எடுத்த கணக்கெடுப்பே உறுதி செய்கிறது. இதில் கணிசமான குடும்பங்கள், ஓரிரு தலைமுறைகளுக்கும் மேலாக, சென்னையில் வசித்து வருபவர்கள். ÷கிராமங்களில் வேறூன்றியுள்ள சாதிப்பிளவு போதாதென்று, நகர்ப்புற விளிம்பு மக்களை, பொருளாதார அடிப்படையில் அரசுகளும், பெரிய நிறுவனங்களும் கூட்டுச்சதி செய்து பொது சமூகத்திலிருந்து தனிமைப்படுத்தி, ஒரு நவீன தீண்டாமையை ஆழமாக ஊன்ற முனைப்புடன் செயல்படுவதை என்னவென்று புரிந்து கொள்வது.÷ ÷தில்லியில் உள்ள வளரும் சமுதாயங்கள் பற்றிய ஆராய்ச்சி மையத்தின் சமூக அறிவியலாளர் அஷிஷ் நந்தி சமீபத்தில் அருமையான கட்டுரை ஒன்றை எழுதியுள்ளார். இன்றைய, சேரிகள் இல்லா இந்திய நகரங்களை உருவாக்கும் திட்டம் என்பது வெறுமனே சேரிகளை பொதுக்கண்களுக்குத் தெரியாமல் மறைத்து வைக்கும் திட்டம் தான். இது ஒன்றும் புதிய திட்டமல்ல, அன்றைக்கு சஞ்சய் காந்தி தில்லியில் முயற்சி செய்தார், பின்னர் ஜக்மோகன் முயற்சி செய்தார், அவர்களைக் குறைகூற முடியாத வகையில் இன்றைக்கு எல்லா அரசுகளும் கடைபிடிக்கின்றனர் என்கிறார் அவர். ÷சேரிகளை, கண்களுக்குத் தெரியாமல் செய்வதற்கான உந்துதல், மனசாட்சி இல்லாதவர்களிடமும், பெரும் செல்வாக்குப் பெற்றவர்களிடமும், முட்டாள்தனமானவர்களிடமும் மட்டும் இல்லை; யோசிக்கத் தெரியாத ஒவ்வொரு இந்தியனிடமும் இருக்கிறது என்கிறார் அஷிஷ் நந்தி. ÷சேரி மக்களிடமிருந்து தங்களுக்குத் தேவையான பணிகளை மட்டும் உறிஞ்சிக் கொண்டு, அவர்களைத் தங்கள் கண்களுக்குப் புலப்படாமல் இருக்கச் செய்யும் இக்குணம், இப்பொழுது ஒரு நோயாக - ஒரு பெரும் கொள்ளை நோயாக உருவெடுத்து வருகிறது என்று வருத்தத்துடன் அக் கட்டுரையை நிறைவு செய்திருக்கிறார் அவர். ÷தமிழகத்தைப் பொறுத்தவரை, இந்த விஷயத்தில் தமிழக அரசின் செயல்பாடுகளும், திட்டங்களும், நகர்ப்புற ஏழை மக்களிடம் வெளிக்காட்டும் கரிசனமும் சிறுவர்கதைகளில் வரும் குள்ளநரிகளின் தந்திரத்தை ஞாபகப்படுத்துகிறது. ÷சென்னைக்கு வெளியே கண்ணகி நகர், செம்மஞ்சேரி பகுதிகளில் மறுகுடியமர்வு என்ற பெயரில் நடக்கும் மானுட அவலத்தைப் பற்றி ஏற்கெனவே "தினமணி' கட்டுரை மூலம் பதிவு செய்தாகி விட்டது. இப்பொழுது, செம்மஞ்சேரியைத் தாண்டி, தமிழக அரசு கட்ட முற்பட்டு வரும் பெரும்பாக்கம் மெகா மறுகுடியமர்வுத் திட்டம், எதிர்காலத்தில் அங்கு அனுப்பப்பட்டு, நிச்சயமாக வாழ்க்கை சூன்யமாகி விடக்கூடிய குழந்தைகளையும், பெண்களையும் நினைத்து கவலை கொள்ளச் செய்கிறது. ÷சில நாள்களுக்கு முன், சென்னையின் சேரிப்பகுதிகளுக்குச் சென்று அங்குள்ள குடும்பங்களுக்கு, குடிசை அகற்று வாரிய அமைச்சர் சுப. தங்கவேலன் செய்த அறிவுரையையும், அந்த அறிவுரைக்குள் நயவஞ்சகமாகப் பொதிந்திருக்கும் நவீன தீண்டாமையையும், சிந்திக்கும் திறனுடன் மனசாட்சியும் கொண்டவர்களால் சிறிதும் ஜீரணிக்க முடியாது. ÷பெரும்பாக்கத்தில் மட்டும் 23,320 குடியிருப்புகளைக் கட்டி, கிட்டத்தட்ட ஒரு லட்சத்து முப்பதாயிரத்திற்கும் மேற்பட்ட குடிசைவாசிகளை சென்னையிலிருந்து காலி செய்யவைத்து, அவர்கள் எல்லோரையும் வெறும் 125 ஏக்கர் பரப்பளவுக்குள் ஒரு முகாம் ஏற்படுத்தி முடக்கிவிட முன்வந்துள்ளது தமிழக அரசு. சென்னையைச் சுற்றி பெரிய நிறுவனங்கள் ஏக்கர் ஒன்றுக்குப் பல கோடிகள் கொடுக்கத் தயாராக உள்ள நிலையில், 23,320 ஏழைக் குடும்பங்களுக்கு 125 ஏக்கர் என்பதே மிகப்பெரிய அதிர்ஷ்டம் என்பது அரசின் நினைப்பு. ÷இந்த பிரம்மாண்டமான குடியிருப்புக்குள், நவீன வணிக வளாகங்கள், ஏழு அடுக்கு குடியிருப்புகள், குடியிருப்புகள் ஒவ்வொன்றிலும் லிஃப்ட் வசதி, பள்ளிகள், ஏன் ஒரு கல்லூரி கூடத் திறக்கப்படும் என்றும் குடிசை அகற்று வாரிய அமைச்சர் தூண்டில் போடுகிறார். ÷ஏற்கெனவே கட்டப்பட்டுள்ள மற்ற வளாகங்களின் ஒவ்வொரு அம்சத்திலும் அவலட்சணம். இன்று வரை அவற்றைச் சீர் செய்ய முடியவில்லை; முடியவும் முடியாது. இப்பொழுது பெரும்பாக்கத்தில் கட்டப்படும் ஏழு மாடி குடியிருப்புகள் எப்படி இருக்கும், அங்கு அரசு நிறுவும் லிஃப்ட் வசதி எப்படி இருக்கும் என்பதை எளிமையாக யூகிக்க முடியும். மக்களின் பங்களிப்பு, கலந்தாலோசனை இல்லாமல் கட்டப்படும் வளாகங்களில், குடிசை மாற்று வாரியத்தால் மட்டும் லிஃப்டுகளையும் மற்ற வசதிகளையும் எப்படிப் பராமரிக்க முடியும்? ÷பொருத்தப்பட்ட சில நாள்களுக்குள்ளோ, வாரங்களுக்குள்ளோ இந்த லிஃப்டுகள் பழுதடைவதோடு, அதன் உதிரி பாகங்களும் சமூக விரோதிகளால் சுரண்டப்பட்டு விடும். அது போன்றே, இவ்வளாகங்களில் மின்தடையே வராது என்றும், தரமான ஜெனரேட்டர்கள் பொருத்தப்பட்டு வேலை செய்யும் என்றும் அரசு உத்தரவாதம் தந்தால், வடிகட்டிய ஏமாளிகள் மட்டுமே நம்பமுடியும். ÷விளிம்பு நிலை மக்களுக்கான வளாகங்களில் குடிநீரும், தரமான கழிப்பிடச்சேவையும் ஏழு மாடிகள் வரை ஏறி வராது என்பது திண்ணம். நடுத்தர மக்கள் வசிக்கும் அடுக்குமாடிகளிலேயே மின்சாரம் தடைப்பட்டாலோ, லிஃப்டுகள் பழுதடைந்தாலோ, அந்த மக்கள் திணறிப்போய் விடுவார்கள். ÷பொதுக்கழிப்பிடத்துக்குச் செல்வது, பிளாஸ்டிக் குடங்களில் குடிநீர் பிடிப்பது, குழந்தைகளைப் பள்ளிக்கு அனுப்புவது, வேலைக்குச் சென்று வருவது என்று ஒவ்வொரு விஷயத்துக்கும் ஏழு மாடி ஏறி இறங்க இப் பெண்களால் முடியுமா? கருவுற்ற பெண்கள் 7 மாடிகள் ஏறி இறங்கி, படிகளிலேயே குழந்தை பிறப்போ, கருச்சிதைவோ ஏற்பட்டால்கூட ஆச்சரியப்பட ஒன்றுமில்லை. இப்படி, தண்ணீருக்கும், ஒவ்வொரு அத்தியாவசியத் தேவைகளுக்கும் ஏறி இறங்கி, ரத்த சோகை கொண்ட விளிம்புநிலைப் பெண்களின் மூட்டுகள் தேய்ந்து, நரம்புகள் புடைத்துப் போய்விடும். முழு மூட்டு மாற்றுச்சிகிச்சை போன்ற அதிக செலவாகும் நவீன அறுவைச் சிகிச்சைகளுக்கு, கலைஞர் காப்பீட்டுத்திட்டத்தில் இடமில்லையே. ÷இந்த ஒரு லட்சத்து முப்பதாயிரம் மக்களில் எத்தனை பேர் முதியவர்களாகவும், உடல் ஊனமுற்றவர்களாகவும் இருக்கப் போகிறார்களோ? அவர்கள் ஆறேழு மாடி ஏறி இறங்க முடியாமல், அரசு ஒதுக்கும் சிறு கான்கிரீட் அறைகளுக்குள்ளேயே வாழ்க்கையை முடக்கிக்கொள்ள வேண்டியது தான். ஆக, விளிம்பு நிலை மக்களுக்கு ஏழுமாடிக் குடியிருப்புகள் என்று யோசித்துள்ள அரசுத் துறைகளில் உள்ளவர்கள் இதயம் இல்லாதவர்கள் என்பது மட்டுமல்லாது, சிந்திக்கவும் மறுக்கும் அபூர்வப்பிறவிகளாகவே இருக்க முடியும். ÷பெரும்பாக்கம் வளாகத்தில் கொண்டு விடப்படும் ஏழை மக்களுக்காக அங்கு கல்லூரியும் அமைக்கப்படும் எனும் அமைச்சரின் அறிவிப்பின் மூலம், மறைமுகமாக ஒரு செய்தி வெளிப்படுகிறது.  பெரும்பாக்கம் முகாம்களுக்கு செல்லவிருக்கும் நாற்பதாயிரம் விளிம்புநிலை  குழந்தைகளே, நீங்கள் முகாமுக்குள்ளேயே உள்ள பால்வாடிகளில் உருண்டு புரண்டு, முகாமுக்குள்ளேயே உள்ள பள்ளிகளில் முடிந்தால் படித்து, முகாமுக்குள்ளேயே அமைய இருக்கும் கல்லூரியில் நுழைந்து கொள்ளுங்கள், கல்விக்காகக்கூட பொதுவெளிக்கு நீங்கள் வரத்தேவையில்லை என்பதாகும் இச்செய்தி. ÷பெரும்பாக்கம் மறுகுடியமர்வுத் திட்டத்துக்கு எதிராக நீதிமன்றத்தில் வழக்குத் தொடுத்தால், எல்லா வசதிகளையும் உள்ளடக்கிய நவீன வளாகம்தான் கட்டித் தருகிறோம் என்று அரசுத் தரப்பில் வாதம் வைக்கப்படும். அந்த வாதத்தை ஏற்று, அரசு கூறுவது சரிதான் என்று நீதிமன்றம் தீர்ப்பளிக்கவும் வாய்ப்பு அதிகம். அது, தீண்டாமை இருந்த அமெரிக்காவின் நீதிமன்றம் அங்கீகாரம் அளித்த "ஜிம் க்ரோ' சட்டத்தை நினைவுபடுத்தும். ஆனால், நீதியைத்தாண்டி, நியாயம் என்று ஒன்று உண்டு என்பார் அரசியல் பொருளாதார மேதை அமர்த்தியா சென்.  அரசின் பெரும்பாக்கம் பிரம்மாண்ட மறு குடியமர்வுத் திட்டம் என்பது நியாயமற்றது - விழுமியமற்றது, குறிப்பாக யோசனையற்றது. நாளை பிறக்க இருக்கும் ஏழைக் குழந்தைகளுக்கு இன்றைய அரசும், பெரிய நிறுவனங்களும் இணைந்து செய்யும் கூட்டுத்  துரோகம். இந்த துரோகத்தை முறியடிப்பதுடன், நிலையான மற்றும்  நியாயமான மாற்றுத்திட்டங்களைப் பற்றி அரசை யோசிக்க வைப்பது, கட்சிகளின், மக்கள் இயக்கங்களின், மனசாட்சி உள்ளவர்களின் உடனடிக் கடமை என்பதில் மாற்றுக்கருத்து இருக்க முடியாது.
கருத்துக்கள்

அரசுத் திட்டத்தின் மாற்று முகத்தை அ.நாராயணன் நன்கு வெளிப்படுத்தி உள்ளார்.கறுப்பர்களுக்குப் பொது இடங்களில் தனியிடங்களில் தனி யிடங்களை ஒதுக்கித் தீண்டாமையைச் சட்ட முறைப்படி ஏற்ற யி்ம்கிரோ (Jim Crow) சட்டங்களுக்கு இணையாகக் குறிப்பிட்டாற்போல் மாறாதிருக்க அரசு முனைப்பான நடவடிக்கை எடுக்க வேண்டும். வேண்டுதலுடன் இலக்குவனார் திருவள்ளுவன்
By Ilakkuvanar Thiruvalluvan
9/20/2010 3:36:00 AM
உங்கள் கருத்தைப் பதிவு செய்யுங்கள் *