S.C. லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
S.C. லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

செவ்வாய், 9 அக்டோபர், 2012

விலங்குகளை ப் போல் மனிதர்களை ஆய்விற்கு ஆட்படுத்துவதா?- human trial of drugs: S.C. Notice


விலங்குகளை ப் போல் மனிதர்களை ஆய்விற்கு ஆட்படுத்துவதா? உச்ச மன்றம் கேள்வி

புதுடில்லி:மருந்து தயாரிப்பு நிறுவனங்கள், மனிதர்களை, பரிசோதனை விலங்குகளை போல், பயன்படுத்துவதற்கு தடை விதிக்க கோரி தொடரப்பட்ட வழக்கில், விளக்கம் அளிக்கும்படி, மத்திய, மாநில அரசுகளுக்கு சுப்ரீம் கோர்ட், நோட்டீஸ் அனுப்பியுள்ளது.

"ஸ்வஸ்த்யா அதிகார் மன்ச்'என்ற, தன்னார்வ தொண்டு நிறுவனம் சார்பில், சுப்ரீம் கோர்ட்டில் பொது நல மனு தாக்கல் செய்யப்பட்டது. அந்த மனுவில் கூறப்பட்டிருந்ததாவது:
டாக்டர்கள் உடந்தை

இந்தியாவில் உள்ள பல்வேறு மருந்து தயாரிப்பு நிறுவனங்கள், தங்கள் தயாரிப்புகள், சம்பந்தபட்ட நோய்களை, சரியான முறையில், குணப்படுத்துகின்றதா என்பதை, சோதனை செய்யும், நடவடிக்கைகளில் ஈடுபட்டு வருகின்றன.இந்த பரிசோதனைக்கு, மனிதர்களையும், பரிசோதனை விலங்குகளைப் போல் பயன்படுத்துகின்றன. மத்திய பிரதேச மாநிலத்தில் மட்டும், 3,300 நோயாளிகள், இதுபோன்ற பரிசோதனைக்கு உட்படுத்தப் பட்டுள்ளனர். இங்கு பணிபுரியும் அரசு டாக்டர்களில், 15 பேருக்கு, இதில் தொடர்பு உள்ளது.இதுதவிர, அரசுத் துறையை சேராத, 40 டாக்டர்கள், இந்த சோதனைகளுக்கு உடந்தையாக உள்ளனர். 10க்கும் மேற்பட்ட, தனியார் மருத்துவமனைகளும், இந்த பரிசோதனை நடவடிக்கைளில் ஈடுபட்டுள்ளன.மன ரீதியான பாதிப்புக்கு ஆளான, 233 பேரும், 1 முதல், 15 வயதுள்ள குழந்தைகளில், 1,833 பேரும், இந்த பரிசோதனைக்கு உட்படுத்தப் பட்டுள்ளனர். இதற்காக, அரசு டாக்டர்களுக்கு மட்டும், 5.5 கோடி ரூபாய் வழங்கப்பட்டுள்ளது.

தடை விதிக்க கோரிக்கை

இது போன்ற பரிசோதனை காரணமாக, 2008ல், 288 பேரும்; 2009ல், 637 பேரும்; 2010ல், 597 பேரும் இறந்துள்ளனர். மத்திய பிரதேசத்தில் மட்டுமல்லாமல், நாடு முழுவதும், இதுபோன்ற பரிசோதனைகள் நடத்தப்பட்டுஉள்ளன. ஏராளமானோர், இதில் இறந்துள்ளனர். எனவே, பரிசோதனை விலங்குகளைப் போல், மனிதர்களை பயன்படுத்துவதற்கு தடை விதிக்க வேண்டும்.இவ்வாறு, அந்த மனுவில் கூறப்பட்டிருந்தது.இந்த மனு, நீதிபதிகள் ஆர்.எம்.லோத்தா, ஏ.ஆர்.தாவே ஆகியோரைக் கொண்ட, சுப்ரீம் கோர்ட், "பெஞ்ச்' முன், நேற்று விசாரணைக்கு வந்தது.

அப்போது, நீதிபதிகள் பிறப்பித்த உத்தரவு:

இது, மிக முக்கியத்துவம் வாய்ந்த பிரச்னை. ஏராளமான மக்களை பாதிக்க கூடிய, இந்த பரிசோதனையை, உடனடியாக நிறுத்தும்படி, ஒரே வரியில், எங்களால் உத்தரவு பிறப்பிக்க முடியும்; ஆனாலும், உடனடியாக அதுபோன்ற உத்தரவு எதையும் பிறப்பிக்க விரும்பவில்லை. எனவே, இந்த விவகாரம் தொடர்பாக, மத்திய, மாநில அரசுகள் விரிவான விளக்கம் அளிக்க வேண்டும். இதுகுறித்து, மத்திய, மாநில அரசுகளுக்கு நோட்டீஸ் அனுப்ப, இந்த கோர்ட் உத்தரவிடுகிறது.

இழப்பீடு தரப்பட்டதா?
கடந்த, 2005 ஜனவரியிலிருந்து, இந்தாண்டு ஜூன் வரை, மருத்துவ பரிசோதனை நடத்துவதற்காக வந்த, விண்ணப்பங்கள் எத்தனை, இதுபோன்ற பரிசோதனைகளில், மரணங்கள் நிகழ்ந்தனவா; அப்படி நிகழ்ந்திருந்தால், எத்தனை மரணங்கள் நிகழ்ந்தன; அதற்கான காரணங்கள் என்ன, பரிசோதனைக்கு உட்படுத்தப் பட்டோருக்கு, பக்க விளைவுகள் ஏதாவது நிகழ்ந்தனவா; அப்படி நிகழ்ந்திருந்தால், எத்தனை பேர், இதனால், பாதிக்கப்பட்டனர். அதற்கான காரணங்கள் என்ன, பரிசோதனையால் பாதிக்கப்பட்டவர்கள் அல்லது இறந்தவர்களின் குடும்பங்களுக்கு, இழப்பீடு வழங்கப்பட்டனவா என்றவிவரங்கள், மத்திய, மாநில அரசுகள் தரப்பில், அளிக்கப்பட வேண்டும்.இவ்வாறு நீதிபதிகள் உத்தரவிட்டனர்.

- தினமலர்


வெள்ளி, 29 ஜூலை, 2011

கல்வித்தளத்திலும் சேரிகளைக் கட்டமைக்க வேண்டா

பெரும்பாலோர் கருதுவதுபோல்  ஆதிதிராவிடர் விடுதிகளும் பிற்படுத்தப்பட்டோர் விடுதிகளும் அக் குறிப்பிட்ட வகுப்பாருக்கு மட்டும் உரியன என எண்ணிக் கட்டுரை எழுதப்பட்டுள்ளது..  இவ்விடுதிகள் அந்தந்த நலத் துறையால் நடத்தப்பட்டாலும் பிற பிரிவினரும் சேர்க்கப்படுவர். பெரும்பான்மையர் மட்டுமே ஆ.தி. அல்லது பி.வ. ஆக இருப்பர். எனினும் எல்லார்க்கும் தரமான கல்வியும் தரமான விடுதி வசதியும் கட்டணமின்றிக் கிடைக்க வகை செய்ய வேண்டும்.
அன்புடன் இலக்குவனார் திருவள்ளுவன் / தமிழே விழி! தமிழா விழி! / எழுத்தைக் காப்போம்!  மொழியைக் காப்போம்! இனத்தைக் காப்போம்!

கல்வித்தளத்திலும்
சேரிகளை கட்டமைக்க வேண்டாம்

First Published : 29 Jul 2011 01:48:56 AM IST


தமிழக ஆதிதிராவிடர் நலத்துறையின்கீழ் உள்ள 1294 உண்டு உறைவிடப் பள்ளி விடுதிகளில், 1,059 விடுதிகள் அடிப்படை வசதிகளற்ற, மிக மோசமான நிலையில் இருப்பதை உறுதி செய்து கொண்ட இன்றைய முதலமைச்சர் ஜெயலலிதா, ரூ.76.33 கோடி செலவில் அவற்றை உடனடியாகப் புதுப்பித்து மேம்படுத்தும் நடவடிக்கையை எடுத்துள்ளார் என்பது பாராட்டுக்குரியது. ஆதிதிராவிடர் மற்றும் பழங்குடியினர் நலத்துறைப் பள்ளிகளில் விரைவில் 1,200 புதிய ஆசிரியர்களை நியமனம் செய்ய இருப்பதாகவும் அரசு தெரிவித்துள்ளது. ஆயினும், இந்த நடவடிக்கைகள் ஆதிதிராவிட மாணவ, மாணவிகளுக்குத் தாற்காலிகமாக உதவலாமே தவிர நீடித்த, குன்றாத பயனைத் தருமா என்பது, இது காறும் உள்ள மோசமான வரலாற்றின் அடிப்படையில் எழும் நியாயமான ஐயப்பாடு. ஆதிதிராவிட நலப் பள்ளிகளும், வனப் பள்ளிகளும், அவற்றோடு இணைந்த உண்டு உறைவிட விடுதிகளும், சமூகத்தின் விளிம்பு நிலை மாணவ, மாணவிகளின் முன்னேற்றத்துக்குப் படிக்கற்களாக இல்லாமல் தடைக்கற்களாக இருப்பதுதான் கசப்பான உண்மை. சமூகத் தளத்தின் பிரதிபலிப்பாக, கல்வித் தளத்தில் வலுவாக எழுப்பப்பட்ட சேரிகளாக இவை நடைமுறையில் உள்ளன. ஆதிதிராவிட, பழங்குடியின சமூகங்களின் கல்வி மேம்பாட்டுக்கு, அரசியலமைப்புச் சட்டத்தின் 29(1),46,15(4), 350ஏ ஆகிய ஷரத்துக்கள் வாயிலாக உறுதி அளிக்கப்பட்டிருக்கிறது. இவ்வுண்மையை வசதியாக மறந்துவிட்டு அல்லது பொருள்படுத்தாமல், இது ஏதோ அவர்களுக்கு மக்கள் வரிப்பணத்தில் அரசு வழங்கும் சலுகை, இலவசம் என்று கருதும் ஆதிக்க மனநிலையே, ஆட்சியாளர்களிடமும், மற்ற எல்லோரிடமும் பொதுபுத்தியாக ஊறிக்கிடக்கிறது.இதன் வெளிப்பாடாகத்தான், ஆதிதிராவிட நலத்துறையில் மேல்மட்டம் முதல் கீழ்மட்டம் வரை, பள்ளிகளிலும், விடுதிகளிலும், கட்டமைப்புகள், பராமரிப்பு, மேற்பார்வை, ஆய்வு மாணவர்களைப் பொதுவாக நடத்தும் விதம், அவர்களுக்கு வழங்கப்படும் உணவு, கல்வி ஊக்கத்தொகை உள்பட எல்லாவற்றிலும் உச்சகட்ட அலட்சியமும், அதிகபட்ச வெளிப்படையான ஊழல் கொள்ளையும், தட்டிக்கேட்க யாருமில்லாமல் பல ஆண்டுகளாகத் தொடர்கிறது. கழிப்பிடம், குடிநீர், உணவு, சீருடை, ஏன் இரவில் சிறுவர், சிறுமியர் உறங்குவதற்காக வழங்கப்படும் பாய் உள்பட இத்துறையின் எந்த ஓர் அம்சத்திலும் தரநிர்ணயம் என்பது எள்ளளவும் கிடையாது. இவ்வளவு ஏன், ஆசிரியர் தேர்வாணையம் மூலமாக ஆசிரியர்கள் நியமனம் நடைபெறும்போது, தரவரிசைப் பட்டியலில் முன்னிலையில் இருப்பவர்கள் பொதுவாக அரசுப் பள்ளிகளுக்கும், கடைசியில் எஞ்சியவர்கள், ஆதிதிராவிட, பழங்குடியினர் நலப்பள்ளிகளுக்கும் தெரிவு செய்யப்படும் மோசமான பாகுபாடு நடைமுறையில் கடைப்பிடிக்கப்படுகிறது. இப்பள்ளிகளும், விடுதிகளும் கல்வித்துறை தொடர்போ, அனுபவமோ இல்லாத வருவாய்த் துறை அதிகாரிகள், ஆதிதிராவிடர் நலத்துறை அலுவலர்கள் ஆகியோரின் அதிகாரத்துக்குள் வருவதால், அவர்களுக்கும், பள்ளிகளின் தலைமை ஆசிரியர்களுக்கும் நடுவில் புரிதல் அறவே இல்லை என்று குற்றம் சாட்டப்படுகிறது. மாவட்ட ஆட்சியரால் நேரடிக் கவனம் செலுத்த முடியாது. மாவட்ட ஆதிதிராவிட நலத்துறை அதிகாரிகளால், இத்துறை தொடர்பான பல்வேறு அலுவல்களுக்கிடையே, இப் பள்ளிகளை மேற்பார்வையிடுவதும், ஆய்வுசெய்து அறிக்கை தயாரித்து அளிப்பதும் இயலாத, விரும்பாத, பொருந்தாத ஒன்றாகி விடுகிறது.ஆண்டுக்கு ஒரு முறைகூட, இப் பள்ளிகள் மாவட்ட அலுவலர்களாலோ, வட்டாட்சியர்களாலோ ஆய்வுக்கு உள்படுத்தப்படுவதில்லை. கல்வியை மேம்படுத்தும் ஆக்கபூர்வமான செயல்களைச் செய்யாமல், ஆசிரியர்கள், வார்டன்கள் ஆகியோரைப் பணி அமர்த்துதல், பதவி உயர்வு, பணி மாற்றம், மாணவர் தேர்ச்சி இல்லை என்றுகூறி, ஆசிரியர்களுக்குத் தண்டனை வழங்குதல் ஆகிய அதிகாரங்களைக் கோலோச்சுவதும், ஒவ்வொரு வகையிலும் மாமூல் வசூலிப்பதுமே இவர்களின் ஒரே வேலையாக உள்ளது என்றும் குற்றம்சாட்டப்படுகிறது. எல்லா அதிகாரங்களும் வருவாய்த் துறை அதிகாரிகளிடமும், ஆதிதிராவிடர் நலத்துறை அலுவலர்களிடமும் உள்ளதால், இவர்களுடன் இணைந்தோ, இவர்களைத் தாண்டியோ, கல்வித் துறை அதிகாரிகளால் கல்விசார்ந்த எந்த ஒரு திட்டத்தையும் ஒழுங்காக இப் பள்ளிகளுக்குள் கொண்டுபோய்ச் சேர்க்க முடிவதில்லை.சீருடை, புத்தகங்கள், கல்வி உதவித் தொகை என்று எல்லாமே மிகமிகத் தாமதமாகத்தான் ஒவ்வோராண்டும் பள்ளிகளைச் சென்று சேர்கிறது. நோட்டுப் புத்தகங்கள் இல்லாமல் மாணவர்கள் திண்டாடுகிறார்கள். தப்பித்தவறி நோட்டுப் புத்தகங்கள் கிடைத்தால், தேர்வில் பதில் எழுதத் தேவையான விடைத்தாள்கள் இல்லாமல், நோட்டுப் புத்தகங்களைக் கிழித்து விடைத்தாள்களாகப் பயன்படுத்துகிறார்கள். பொதுவாக இம் மாணவ, மாணவிகளிடம் ஊட்டச்சத்துக் குறைபாடு இருக்கும். இதன் விளைவாக உடல் ஆரோக்கியத்தில் ஏற்படும் குறைபாடுகளைச் சோதித்து சீர் செய்தால் மட்டுமே அவர்களது கற்கும் திறன் அதிகரிக்கும் வாய்ப்பு உள்ளது. ஆனால், இப் பள்ளிகளில் முறையாக மருத்துவ முகாம்கள் நடத்தப்படுவதில்லை. அரவிந்தர் கண் மருத்துவமனையின் மருத்துவர் கூறும்போது, தலித்து பள்ளிகளில் உள்ள மாணவ, மாணவிகளில், 20 விழுக்காட்டினருக்காவது பார்வைக் குறைபாடு இருக்கும் வாய்ப்புள்ளது, மற்ற சமூகத்தினரைவிட இது அதிகம், இப்பள்ளிகளில், ஆண்டுத் தொடக்கத்திலேயே, கண் மருத்துவ முகாம் நடத்தி, குறைபாடுகளைக் கண்டறிந்து, களையவில்லையென்றால், பல மாணவ, மாணவிகள் ஆண்டு முழுவதும் கரும்பலகையில் என்ன எழுதப்படுகிறது என்று தெரியாமலே, "மக்கு'ப் பட்டம் வாங்கிக் கொண்டு அவதிப்படும் நிலை ஏற்படும் என்கிறார். ஆனால், இந்த அடிப்படையைப் புரிந்து கொள்ளாத நிர்வாகம், தேர்ச்சி விகிதம் சரியாக இல்லாத பள்ளிகளில், ஆசிரியர்களைப் பலிகடா ஆக்குவதுடன் திருப்திப்பட்டுக் கொள்கிறது. இவையெல்லாம், விளக்கப்பட்ட ஒரு சில பிரச்னைகள்தான், விளக்கப்படாத தடைக்கற்கள் ஏகப்பட்டவை. இன்றைக்கும் ஜாதிய ஏற்றத் தாழ்வுகளும், ஜாதி வன்கொடுமைகளும், கிராமங்கள்தோறும் நிரந்தரமாகிவிட்ட தலித்து காலனிகளும், சேரிக்கும் ஊருக்கும் நடுவே திடீரென்று முளைக்கும் தீண்டாமைச் சுவர்களும்தான் வளர்ந்து வரும் தமிழகத்தைப் பிரித்தாளும் கொடுவாள்கள். இன்றைய ஜாதிய, வர்க்க வேறுபாடுகள் களையப்படுவதற்கான ஒரே வழி, எல்லோருக்கும் தரமான, இலவசமான, சமச்சீரான, கட்டாயக் கல்வியை வழங்கும் சமத்துவமான பொதுப்பள்ளி முறையே. ஆனால், பள்ளிக்கல்வியில் உச்சகட்ட சமத்துவமின்மையே முகத்தில் அறையும் உண்மை. இந்தப் பின்னணியில், இந்த இருபத்தோராம் நூற்றாண்டிலும், ஆதிதிராவிடர் நலப்பள்ளிகள் என்ற பெயரில் தமிழகம் முழுவதிலும், கள்ளர் சீரமைப்புப் பள்ளிகள் என்ற பெயரில் மதுரை, திண்டுக்கல், தேனி மாவட்டங்களிலும், ஜாதி, இனம் வாரியாகப் பெயரிட்டு அரசே நடத்துவது என்ன பயன்தரும்? இந்த மாணவ, மாணவிகளுக்கு வேண்டிய உதவித் திட்டங்கள் தொடரவேண்டியது அவசியம். ஆனால், தனிப் பள்ளிகளாகவே தொடர்வது ஆரோக்கியமானதா என்பதைப் பரிசீலனைக்கு உள்படுத்த வேண்டியது அவசியம் மட்டுமல்ல, அவசரமும் கூட.ஆதிதிராவிடர் நலப் பள்ளி, கள்ளர் சீரமைப்புப் பள்ளி என்ற பெயரில் அடையாளப்படுத்தப்படுவது பற்றியும், அதனால் உளவியல் ரீதியாக இந்த மாணவர்களுக்கு ஏற்படும் பாதிப்புகள் பற்றியும் யாரும் சிந்திப்பதில்லை. அதனால்தான் இளைஞர்களான பின்பும், கல்லூரி வாயிலில் ஒருவருக்கொருவர் கொலைவெறித் தாக்குதலில் ஈடுபடுவதும், ஜாதிச் சங்கங்களில் அதிக ஆர்வம் காட்டுவதும் நடைபெறுகிறது. மேலும், இப் பள்ளிகளை, நலத்துறைகளிலிருந்து விடுவித்து, மற்ற அரசுப் பள்ளிகளைப் போல, கல்வித்துறையின் நேரடி மேற்பார்வையின்கீழ் கொண்டுவந்தால், ஒப்பீட்டளவில் தரம் உயர வாய்ப்புள்ளது. விடுதிகளைப் பொறுத்தவரை, அன்றைக்கு அருகாமைப் பள்ளிகள் கிடையாது, ஆதலால் பள்ளிகளுக்கு அருகில் விடுதிகள் ஏற்படுத்தப்பட்டால் மாணவர்களுக்கு உதவும் என்ற நோக்கில் தொடங்கப்பட்டன. ஆனால், இன்றைக்கு எங்கும் அருகாமைப் பள்ளிகள் உள்ளன. இலவச பஸ் பாஸ், சைக்கிள்கள் வழங்கப்படுகின்றன. இலவச மதிய உணவு முழுமையாக வழங்கப்படுகிறது. குடிசைவீடுகளுக்கு இலவச மின்சாரம் உள்ளது.இவ்வகைக் காரணங்களால், பள்ளி மாணவ, மாணவிகள் விடுதிகளில் தங்கிப்படிக்க விரும்புவதில்லை. பல விடுதிகளில் மிக மிகக்குறைவானவர்களே தங்கிப் படிக்கின்றனர். சனி, ஞாயிற்றுக்கிழமைகளில் எல்லோருமே வீடுகளுக்குப் போய் விடுகின்றனர்.ஆக, உண்டு உறைவிடப் பள்ளிகள் இன்றைக்கு, "பெருச்சாளிகள்' மட்டுமே பல்கிப் பெருகி உண்டு கொழுக்கும் சத்திரங்களாக மாறிவிட்டன. அதாவது, இரண்டுகால் பெருச்சாளிகள் கூட்டுச்சேர்ந்து பொய்யான ஆவணங்களைத் தயாரித்து, திருடி பங்கு போட்டுக் கொள்ளும் ஒரே வேலைதான் பெரும்பாலான மாணவர் விடுதிகளில் நடைபெற்று வருகிறது. எனவே, அவசியமான ஒரு சில ஆதிதிராவிட நலத்துறை விடுதிகளையும், பிற்பட்டோர் நலத்துறையின்கீழ் வரும் விடுதிகளையும் மட்டும் ஒருங்கிணைத்து, பொது மாணவர் விடுதிகளாக மாற்றுவது நல்லது. பொது விடுதிகளாக மாற்றப்பட்டால், அவற்றின் பராமரிப்பில் எல்லோருடைய கூடுதல் கவனமும், கூட்டு கவனமும் கிட்டுவதால், தரமும் உயரும். அதோடு, மாணவர்களுக்கிடையில் புரிதலும், ஜாதி தாண்டிய நட்பும் ஏற்படும்.இடஒதுக்கீட்டைத் தாண்டி, ஆதிதிராவிட மாணவர்களுக்கும், பிற்படுத்தப்பட்ட, மிகவும் பிற்படுத்தப்பட்ட மாணவர்களுக்கும் இடையில் சமூக அளவிலும், கல்வி, வேலை வாய்ப்பு அளவிலும் ஒரே மாதிரியான எதிர்காலச் சவால்களே காத்திருக்கின்றன. பள்ளிக் கல்வியில் அரசு சமத்துவம் கொண்டுவர முனைந்து வெற்றிபெற்றால், தமிழகத்தின் ஜாதி வியாபாரிகள் கடைமூடும் நேரம் வந்துவிடும் என்பது மட்டும் நிச்சயம்.

வெள்ளி, 31 டிசம்பர், 2010

meetting for changing the name of aadhi draavidar: 'ஆதிதிராவிடர்' பெயரை மாற்றக் கலந்தாய்வுக்கூட்டம்

எசு.சி. என்பது பட்டியலிட்ட வகுப்பினர் என்றுதான் பொருள்படும். நாம்தான் தேவையின்றி மாறி மாறி அழைத்துக் கொண்டு வருகிறோம். ஆதித்திராவிடர்கள் எனச் சொல்வது தவறென உணர்ந்து ஆதித்தமிழர்கள் எனச் சொல்வாரும் உண்டு. மக்கள் வழக்கில்  இவ்வாறு கூறலாம். ஆனால், அரசு பட்டியல் வகுப்பினர் என அரசியல் யாப்பிற்கு இணங்கக் குறிப்பிடுவதே முறையாகும். அதே நேரம பெயரில் ஒன்றும் இல்லை; வாழ்க்கை முறையில்தான் சிறப்பு உள்ளது என்பதையும் புரிந்து கொள்ள வேண்டும். கடவுளின் குழந்தைகள் (அரிசனம்)  எனக் காந்தியடிகளால் அழைக்கப்பட்டபொழுதும் தீண்டாமை இருந்தது. இப்பொழுதும் முழு முன்னேற்றம் இல்லை. அவர்களின் நிலை மாறினால் எப்படி அழைத்தாலும்   ஒன்றும்  இல்லை என்னும் நிலைக்கு வந்து விடுவர். எனவே, பட்டியல் வகுப்பினர் நிலையை உயர்த்துவதில் அரசு கருத்து செலுத்த வேண்டும். அன்புடன் இலக்குவனார் திருவள்ளுவன்


'ஆதிதிராவிடர்' பெயரை மாற்ற ஆலோசனைக் கூட்டம்

First Published : 30 Dec 2010 12:46:35 PM IST


சென்னை, டிச.30: ஆங்கிலத்தில் ஷெட்யூல்டு கேஸ்ட் என்ற சொல்லுக்கு தற்போது ஆதிதிராவிடர் என்று பயன்படுத்துவதை மாற்றி வேறு ஒரு சிறந்த மாற்றுப் பெயரை தேர்ந்தெடுப்பதற்காக அமைக்கப்பட்ட செய்தித்துறை அமைச்சர் பரிதி இளம்வழுதி தலைமையிலான குழுவின் முதல் கூட்டம் இன்று நடைபெற்றது.இக்கூட்டத்தில் குழுவின் துணைத் தலைவரான ஆதிதிராவிட நலத்துறை அமைச்சர் தமிழரசி, உறுப்பினர்களான சட்டத்துறைத் செயலர் தீனதயாளன், ஆதிதிராவிடர் மற்றும் பழங்குடியினர் நலத்துறையின் முதன்மைச் செயலர் விஷ்வநாத் ஷெகாவ்கர், ஆதிதிராவிட நலத்துறை ஆணையர் சிவசங்கரன் மற்றும் உயர் அதிகாரிகள் கலந்துகொண்டதாக அரசின் செய்திக்குறிப்பில் தெரிவிக்கப்பட்டுள்ளது.
கருத்துகள்

எஸ் .சி. என்றால் யார் சொன்னது ஆதி திராவிடர் என எஸ் சி என்றால் தாழ்த்தபட்டடவர்கள் என அர்த்தம்
By pmuruga
12/30/2010 6:02:00 PM
உண்மை திராவிடர்கள் என்று பெயர் வைக்கலாம்
By senthilkumar
12/30/2010 4:59:00 PM
பெயர் எல்லாம் மற்ற வேண்டாம் அவகளுக்கு உரியதை கிடக்க வழிய செய்யவும் மினிஸ்டர் அண்ட் FAMILY மட்டும் முன்னேறினால் போதாது.
By KANDASAMY
12/30/2010 4:39:00 PM
முதுகுடிகள்-ன்னு வைங்க..
By சுதேசி
12/30/2010 1:28:00 PM
உங்கள் கருத்தைப் பதிவு செய்யுங்கள் *


சனி, 3 ஏப்ரல், 2010

தலித் கிறிஸ்தவர்களை எஸ்.சி. பட்டியலில் சேர்க்க வேண்டும்: பிரதமருக்கு கருணாநிதி கடிதம்



சென்னை, ஏப்.2: தலித் கிறிஸ்தவர்களை எஸ்.சி. பட்டியலில் சேர்க்க வலியுறுத்தி பிரதமர் மன்மோகன் சிங்குக்கு முதல்வர் கருணாநிதி கடிதம் எழுதியுள்ளார்.
இதுகுறித்து, வெள்ளிக்கிழமை அவர் அனுப்பிய கடிதத்தில் கூறியிருப்பதாவது:
""தலித் இனத்தைச் சேர்ந்தவர்கள் கிறிஸ்தவ மதத்தில் சேர்ந்த பிறகும், அவர்களை தாழ்த்தப்பட்டவர்களாகக் கருத வேண்டும். அவர்களுக்கு தாழ்த்தப்பட்டவர்களுக்கு உரிய சலுகைகளை வழங்க வேண்டும் என்று தமிழக அரசு ஏற்கெனவே பலமுறை மத்திய அரசை வலியுறுத்தியுள்ளது.
1950}ம் ஆண்டுக்கான தாழ்த்தப்பட்டோர் சட்டம், 1956}ம் ஆண்டு தாழ்த்தப்பட்டோர் சீரமைப்புச் சட்டம், 1976}ம் ஆண்டு எஸ்.சி., எஸ்.டி., சட்டத் திருத்தம் ஆகியன தாழ்த்தப்பட்ட இனத்தைச் சேர்ந்த ஒருவர் இந்து, சீக்கியர், புத்த மதங்களைச் சேர்ந்தவராக இருந்தாலும் அவர்களை தாழ்த்தப்பட்டவர் என்று கருத வேண்டும் எனக் கூறியுள்ளது.
1990}ம் ஆண்டு இந்தச் சட்டத்தில் மீண்டும் திருத்தம் செய்யப்பட்டது. அப்போது, புத்த மதத்தைத் தழுவியர்களும் தாழ்த்தப்பட்டவர்களாகக் கருதப்பட்டனர்.
தாழ்த்தப்பட்ட இந்துக்கள் என்னென்ன சலுகைகள் பெறுகிறார்களோ, அத்தனை சலுகைகளையும் அவர்கள் வேறு மதத்துக்கு மாறினாலும் கொடுப்பதாக அரசு உறுதிமொழி வழங்கியது.
எனவே, தலித் கிறிஸ்தவர்களையும் தாழ்த்தப்பட்டவர்கள் பட்டியலில் சேர்த்து உரிய சலுகைகள் வழங்க வேண்டும். நாடாளுமன்ற சட்டப் பிரிவுகளின் கீழ், நீங்கள் (பிரதமர்) தனிப்பட்ட முறையில் இந்தப் பிரச்னையில் தலையிட்டு உதவ வேண்டும்.
தாழ்த்தப்பட்ட மக்கள் கிறிஸ்தவ மதத்துக்கு மாறும்போது அவர்கள் தாழ்த்தப்பட்டவர்களுக்கு உரிய அனைத்து சலுகைகளையும் குறிப்பாக, இடஒதுக்கீடு பெற அவர்களை தாழ்த்தப்பட்டவர்கள் பட்டியலில் சேர்க்க உறுதி செய்ய வேண்டும்'' என்று முதல்வர் கருணாநிதி கேட்டுக் கொண்டுள்ளார்.

கருத்துக்கள்

2/2) பிற சமயம் மாறுபவர்கள் அந்தப் பழக்க வழக்கங்களைப்பின்பற்றுவதால் காலம் காலமாகப்பின்பற்றி வந்த மண்ணின் பண்பாட்டை உதறுகிறார்கள். (ஈழத்தில் இசுலாமியச் சமயத்தைப்பின்பற்றியதாலேயே தமிழர்களும் இசுலாமியர்களும் என வேறுபடுத்திக் காட்டி நடந்து கொள்வதை மறக்க வேண்டா.) சமய, சாதி வேறுபாடின்றி அனைவருக்கும் எல்லா வாய்ப்பும் கிடைக்க உறுதி செய்ய வேண்டியது அரசின் கடமை. அதே நேரம் சமயம் மாறுபவர்களுக்குச் சலுகைகள் நீடிப்பது மடமை என உணர வேண்டும். அன்புடன் இலக்குவனார் திருவள்ளுவன்

By Ilakkuvanar Thiruvalluvan
4/3/2010 3:15:00 AM

1/2) இவ்வாறான கோரிக்கையும் செயல்பாடும் தாய்மண்பண்பாடடிற்கான சாவுமணி என்பதை யாரும் உணருவதில்லை. நேற்று வரை தமிழராக இருந்தவர் கிறித்துவராக மாறியதும், தமிழர் திருநாளாம் பொங்கல் நாளில் கடவுளுக்குப்படைக்கவில்லை எனக் கூறிப் பொங்கல் அளித்தாலும் ஏற்பதில்லை. கிருத்துவ ஆண்டைத்தான் பின்பற்றுவோம் எனத் திருவள்ளுவர் ஆண்டைக் குறிப்பதில்லை. ஐரோப்பிய கிருத்துவ அறிஞர்கள் தமிழ் இலக்கியச் சிறப்பால் கவரப்பட்டு சமய இலக்கியங்களைப்படித்தாலும் மொழி பெயர்த்தாலும் சமயம் மாறவில்லை. அதுபோல் ஒருவர் எச்சமயக் கருத்தையும் போற்றத் தடையில்லை. ஆனால், சமய மாற்றம் என்பது பத்தாயிரத்துக்கு ஒன்று என்ற அளவில் மிகக் குறைவாகத்தான் இருக்க வேண்டும். வேறு சமயத்திற்குச் சென்றால் உயர்ந்த நிலை அடைவோம் எனக் கருதி அல்லது கற்பிக்கப்பட்டு அச் சமயத்தைப் பின்பற்றி மாறுபவர்கள் தாம் சார்ந்திருந்த சமயச் சலுகைகளை இழக்க வேண்டியதே முறையாகும். (தொடர்ச்சி காண்க) அன்புடன் இலக்குவனார் திருவள்ளுவன்

By Ilakkuvanar Thiruvalluvan
4/3/2010 3:12:00 AM
உங்கள் கருத்தைப் பதிவு செய்யுங்கள் *