பெண்களின் கவனத்திற்கு!

இரண்டாம் குழந்தையை ப் பெற்றெடுக்கும் பெண்கள், முதல் குழந்தையின் பிரச்னையை உளவியல் ரீதியாக சந்திக்கும் முறையை கூறும், வெங்கடேசு: மனநல மருத்துவராக, சென்னையில் பணியாற்றுகிறேன். இரண்டாம் குழந்தையை பெற்றெடுக்கும் பெண்களின் முதல் கவலை, இரண்டாம் குழந்தையின் புது வரவால், முதல் குழந்தையின் மனம் வாடிவிடக் கூடாது என்பது தான். அதனால், குழந்தைகளின் சிக்கலான உளவியலை, பக்குவமாக கடக்கும் வழிமுறைகளை கற்பது அவசியமாகிறது. இரண்டாம் குழந்தையை கருவில் சுமக்கும் போதே, "அம்மா வயித்துல, உன்கூட சேர்ந்து விளையாட ஒரு தம்பி, தங்கச்சி பாப்பா வளருது' என, முதல் குழந்தைக்கு பக்குவமாக அறிமுகப்படுத்துங்கள். "பாப்பா பிறக்கும் போது, அம்மாக்கு சோர்வா இருக்கும். அப்பா தான் உன்னை பார்த்துப்பார். நீ சமத்தா இருக்கணும்' என, சின்ன வேண்டுகோளை முன்கூட்டியே வைப்பது நல்லது.
ஏனெனில், தனக்கான அன்பு பங்கிடப்படுகிறது என்ற தவிப்பை தவிர, வேறு எதுவும் குழந்தைகளுக்கு அப்போது புரியாது. முதல் குழந்தையின் எதிரில், பிறந்த குழந்தையை அதிகம் கொஞ்சுவதை தவிருங்கள். எக்காரணம் கொண்டும், இரண்டாம் குழந்தையோடு ஒப்பிட்டு பேசாதீர்கள். இதனால், குழந்தைகளின் மனதில் தாழ்வு மனப்பான்மையும், தன் உடன்பிறப்பின் மீது தீராத பகையும் ஏற்படும்.
"நீ பெரியவன், விட்டுக் கொடுத்து போ' என, முதல் குழந்தையிடம் பொறுப்புகளை சுமத்தாதீர்கள். இரண்டாம் குழந்தையின் சின்ன சின்ன தேவைகளை, முதல் குழந்தையை செய்ய பழக்குங்கள். "நீ பவுடர் எடுத்து கொடுத்தா தான், பாப்பா போட்டுக்குமாம்' என, அத்தருணத்தை இரு குழந்தைகளுக்கான பாலமாக மாற்றுங்கள். ஒரு தாய் வயிற்றில் பிறந்த குழந்தைகள், சகோதரராகவோ, பங்காளியாகவோ மாறுவது, அத்தாயின் வளர்ப்பு முறையில் தான் உள்ளது. எனவே, குழந்தைகளிடம் பாரபட்சம் காட்டாமல், குழந்தைகளின் உளவியல் ரீதியான பிரச்னைகளை அறிந்து, இருவரையும் ஒரு சேர அரவணைத்து செல்வதில் தான், தாயின் திறமை அடங்கிஉள்ளது. தொடர்புக்கு: 98402 35617

பெண்களின் கவனத்திற்கு!

கோடியிலும் கிடைக்காத மன நிறைவு

கோடியிலும் கிடைக்காத மன நிறைவு
மனநலம் பாதிக்கப்பட்டு, சாலையோரங்களில் சுற்றி திரிபவர்களுக்கு மறுவாழ்வு கொடுக்கும், வெங்கடேசு: நான், சென்னை திரு வான்மியூரைச் சேர்ந்தவன். 10ம் வகுப்பு வரை மட்டுமே படித்திருக்கி றேன். கூரியர் டெலிவரி, மருத்துவமனையில் வார்டு பாய், கம்பி கட்டுவது என, நான் பார்க்காத வேலையே இல்லை. இருந்தாலும், கிடைக்கிற ஓய்வு நேரங்களில், நூலகத்திற்கு செல்லும் பழக்கம் இருந்தது. புத்தர், நபிகள் நாயகம், வள்ளலார் போன்றோரின், புத்தகங்களை படித்த போது, அன்பு ஒன்றை மட்டுமே அவர்கள் வலியுறுத்தி இருந்தனர். இக்கருத்துக்கள், என் மனதில் அப்படியே ஆழமாக பதிந்தன. 1995ல், திருவான்மியூர் பகுதியில், அரை நிர்வாணமாக, ஒரு வட மாநில பெண் சுற்றி திரிந்தார். மற்றவர்கள் வேடிக்கை பார்க்க, நான் முன்வந்து அவரை காப்பகத்தில் சேர்த்து வீடு திரும்பிய போது, எனக்கு ஏற்பட்ட மனதிருப்தி, கோடி ரூபாய் கிடைத்தாலும் வராது. அடுத்த உயிர்கள் மீது அன்பு செலுத்திய போது, உருவான அற்புதமான அனுபவத்தை அன்று தான், உணர்ந்தேன். இந்த அனுபவத்திற்கு பின், குழந்தைகள், பெண்கள், முதியோர் என, சாலையோரங்களில் மனநலம் பாதிக்கப்பட்டு சுற்றி திரிந்த, 1,000த்திற்கும் மேற்பட்டவர்களை, அரசு மற்றும் தனியார் காப்பகங்கள் மற்றும் மருத்துவமனைகளில் சேர்த்திருக்கிறேன். அவர்களுக்கு தெரிந்த மொழியிலேயே பக்குவமாக பேசி, குளிப்பாட்டி, தலை முடியை வாரிவிட்டு, ஆடைகளை அணிவித்து, சாப்பிட வைத்த பின்னரே அங்கு சேர்ப்பேன். சேர்த்த பின்னும், அவர்கள் எப்படி இருக்கின்றனர் என, தொடர்ந்து பார்த்து வருகிறேன். மற்றவர்களுடன் இணைந்து, ஒரு தொண்டு நிறுவனமாகவோ, தனியார் அமைப்பாகவோ இல்லாமல், தனியொரு மனிதனாகவே கடந்த, 18 ஆண்டுகளாக, இச்சேவையை செய்து வருகிறேன். இச்சேவையை செய்யும் போது, ஒரு சில நேரங்களில், வீடு திரும்ப ரொம்ப நேரம் ஆகும்; இருந்தாலும், என் மனைவி சலித்துக் கொள்ளாமல், என்னை ஊக்கப்படுத்துவாள்.
தொடர்புக்கு: 93801 85561

தங்கச்சிற்றுருச்சிற்பி வெங்கடேசு...

தங்கச்சிற்றுருச்சிற்பி வெங்கடேசு...

 

ஒவ்வொருவரிடமும் ஏதோ ஒரு திறமை இருக்கத்தான் செய்யும்,அதை வெளிக்கொண்டு வந்து பாராட்டினால் போதும்,அவர் திறமையின் மிச்சத்தை காட்டுவார்,விரைவில் உச்சத்தை தொடுவார்.

அந்த வேலையைத்தான் நமது இணையதளத்தின் பொக்கிஷம் செய்து வருகிறது.
அந்த வரிசையில் வருகிறார் வெங்கடேஷ்.

கோவை சிங்கநல்லூரைச்சேர்ந்தவர்,வயது 27,ஏழாவது வரை படித்துள்ளார்.
அங்குள்ள தங்க நகை கடையில் நகை செய்யும் தொழிலாளியாக உள்ளார்,காலையில் ஒன்பது மணிக்கு வேலைக்குள் நுழைந்தால் இரவு பத்து மணி வரை வேலை,வேலைதான்.

வெங்கடேஷ்க்கு ஏதோ ஒரு வகையில் சாதனை செய்யவேண்டும் என்ற எண்ணம் ஏற்பட்டது,அது பற்றிய சிந்தனையில் இருந்தபோது உடன் வேலை செய்பவர் பத்திரிகையில் வந்த ஒரு செய்தியை ஆச்சர்யத்துடன் படித்துள்ளார்.

செய்தியில் இருந்த ஆச்சர்யம் என்னவென்றால் ஒருவர் இரண்டு கிராம் எடையில் தங்கத்தில் சைக்கிள் செய்து சாதனை படைத்துள்ளார் என்பதுதான்.இதைப்படித்ததும் இதைவிட குறைவான எடையில் நாம் ஏன் சைக்கிள் செய்யக்கூடாது என்று முடிவு செசய்து 180 மில்லி கிராமில் ஒரு தங்க சைக்கிளை செய்துவிட்டார்.,இந்த சைக்கிளின் ஹேண்டில் பாரை திருப்பமுடியும்,பெடலை சுழற்ற முடியும்,சக்கரமும் சுற்றும்.
இவ்வளவு நுணுக்கமாக வெங்கடேஷ் உருவாக்கிய சைக்கிளை பார்த்து முதலில் பாராட்டியவர் இவரது முதலாளி அம்பிகாபதிதான்.இவர் தந்த ஊக்கத்தால் 150 மில்லியில் கிரிக்கெட் உலககோப்பை,கோணியம்மன் கோவில் தேர்,கிட்டார்,தாமரை பூ மற்றும் துப்பாக்கி.

ஊதினால் பறந்துவிடும் 170 மில்லிகிராம் எடையில் இவர் செய்துள்ள துப்பாக்கியை, நிஜ துப்பாக்கி போல மடக்கி திறக்கலாம்,குண்டு போடும் இடத்தை சுழற்றலாம்.
18 காரட் தங்கத்தை உபயோகித்து, இப்படி இவர் செய்யும் தங்க மினியேச்சசரின் மதிப்பு ஐநூறு ரூபாய்க்குள்தான்,ஆனால் இதன் பின்னணியில் உள்ள இவரது உழைப்பு மிகவும் பெரியது.ஒரு மினியேச்சர் செய்ய சமயத்தில் ஒரு நாள் கூட ஆகிவிடுமாம்.வேலை இல்லாத நாளில்,நேரத்தில் இது மாதிரி பொருட்களை இவர் உருவாக்குகிறார்.இவரது தங்க மினியேச்சர் அனைத்துமே நிச்சயம் கின்னஸ் ,மற்றும் சாதனை புத்தகங்களில் இடம் பெறக்கூடியதுதான்.,ஆனால் அதற்கு முதலில் பத்திரிகையில் இது பற்றிய செய்தி வரவேண்டும் என்பது முதல் விதி,நீங்கள் என் சாதனை கனவு,நனவாக வழிகாட்டுவீர்களா என்ற வெங்கடேஷ்க்கு தந்த பதில்தான் இந்த கட்டுரை.வெங்கடேஷின் தொடர்பு எண்:9943971200.

- எல்.முருகராசு