நீர் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
நீர் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

ஞாயிறு, 8 செப்டம்பர், 2013

வங்கியில் பணத்தைப் போல் தரையில் நீரைச் சேமிப்போம்

http://img.dinamalar.com/data/largenew/Tamil_News_large_798246.jpg

வங்கியில் பணத்தை ப் போல் தரையில் நீரை ச் சேமிப்போம்
"நீருக்கும் போர் எழும் சூழ்நிலையில் "நிலத்தடிநீர்' என்பது ஒன்றும் அள்ள அள்ள குறையாத அமுதசுரபி அல்ல. வங்கியில் பணத்தை சேமித்து வைப்பது போலத்தான், சேமிப்பதை விட்டுவிட்டு பணத்தை எடுத்துக் கொண்டே இருந்தால் ஒரு கட்டத்தில், கணக்கில் பணம் இருப்பு இல்லை என்றாகி விடும். அதேபோல நிலத்தடிநீரும் அவ்வப்போது கிடைக்கும் நீரை சேமித்து கொண்டே இருந்தால்தான் தேவைக்கேற்றால்போல நாம் எடுத்துக் கொண்டே இருக்க முடியும். சேமிக்கும் பழக்கம் இல்லாமல் போனால், வறட்சி நம்மை தாக்கி, விளைநிலங்கள் பாலைவனமாகும். ""நிலங்களில் விளைபொருட்களைபோல, மழை நீரையும் அறுவடை செய்ய வேண்டும். இதுதான் நிலத்தடிநீர் விவசாயத்தின் முதல்படி,'' என்கிறார் திண்டுக்கல் காந்திகிராம கிராமிய பல்கலை வேளாண்மை மற்றும் கால்நடைத்துறை பேராசிரியர் டி.டி.ரங்கநாதன்.


மழை நீரை வீணாக்க வேண்டாம்:

அவர் கூறியதாவது: மழை நீரை சேகரிப்பதன் மூலமாக, நிலத்தடி நீர் மட்டத்தை கணிசமாக உயர்த்தலாம். மழை நீரை அடுத்தவர் நிலத்துக்கு போக விடாமல், நமது நிலத்திலேயே தேங்குமாறு செய்ய வேண்டும். இதற்காக நிலத்தில், வேகத்தடைகளை உருவாக்க வேண்டும். அதாவது மழைக்காலத்துக்கு முன்பாகவோ அல்லது ஒரு மழை பெய்தவுடனேயோ, நிலத்தை நன்றாக உழவு செய்து வைக்க வேண்டும். இப்படி செய்தால், பெய்யும் மழை நீர், நிலத்தால் முழுமையாக உறிஞ்சப்பட்டு, அடிமட்டம் வரை சென்று நீர் சேமிக்கப்படும். தமிழகத்தில் இருக்கும் லட்சக்கணக்கான ஏக்கர் தரிசு நிலங்கள், மானாவாரி நிலங்களில் இப்படி உழவு போட்டு வைத்தாலே, நிலத்தடி நீர் மட்டத்தை உயர்த்த முடியும். ஆறுகளில் தடுப்பணை அமைப்பது போல, ஒரு குறிப்பிட்ட வயலில் பெய்யும் மழைநீர், அந்த பகுதியிலேயே தேங்கி, மெதுவாக நிலத்துக்குள் இறங்கும் வரப்புகளை ஏற்படுத்த வேண்டும். நீர் தேங்கும் பகுதியில் வரப்புகளை ஒட்டி இரண்டடி ஆழம், அரையடி அகலத்தில் நீளமாக வாய்க்கால்களை வெட்ட வேண்டும். வரப்புகளை தாண்டி வரும் மழைநீர், அந்த வாய்க்கால்களில் நிரம்பி முழுவதுமாக பூமிக்குள் ஊடுருவும். மானாவாரி நிலங்களில், மழை காலத்துக்கு முன், ஒவ்வொரு மரத்தை சுற்றியும் கொத்தி விட்டு, வட்டப்பாத்தி எடுத்து வைக்க வேண்டும். சரிவான நிலங்களில் மரங்களை வளர்ப்பவர்கள், வழிந்து வரும் நீரை தேக்கும் விதமாக மரங்களின் அருகே பிறை வடிவ வாய்க்கால்களை வைக்கலாம்.


தடுப்பணை தேவை:


விவசாய நிலங்களுக்கு இடையில் ஓடைகள் குறுக்கிட்டால், அங்கு தடுப்பணைகள் கட்டுவதன் மூலமாக நீரை சேமிக்கலாம். நீரை சேமிப்பதைப்போலவே, அதை சிக்கனமாகவும், முறையாகவும் பயன்படுத்த வேண்டியது அவசியம். நமது கிணற்றில்தான் நீர் இருக்கிறதே... என விரயம் செய்யக்கூடாது. சொட்டு நீர் பாசன முறைக்கு மாற வேண்டும். அதிகம் தண்ணீர் தேவைப்படும் தென்னந்தோப்புகளில் இரண்டு வரிசைக்கு இடையில் அரையடி அகலம், இரண்டடி ஆழத்தில் வாய்க்கால்கள் எடுத்து, தென்னங்கழிவுகளை அதனுள் போட்டு பாசனம் செய்வதன் மூலம் வறட்சியான காலத்திலும் மரங்களை காப்பாற்றலாம். இவ்வாறு கூறினார். பேராசிரியருடன் தொடர்பு கொள்ள 94431-89605.


இஸ்ரேல் போல் வருமா:


தமிழகத்தில் சராசரி மழையளவு ஆண்டிற்கு 936 மி.மீ.,. இஸ்ரேலில் 400 மி.மீ., அவர்கள் மழைநீரை சேமித்து விவசாயம், குடிநீருக்கு பயன்படுத்துகின்றனர். தமிழகத்தில் பெய்யும் அதிகப்படியான மழைநீரில் 14 சதவீதம்தான் சேமிக்கப்படுகிறது. மீதியுள்ள 86 சதவீதம் நீர், கடலில் வீணாக கலக்கிறது. கண்மாய்கள், குளங்கள், வரத்துகால்வாய்களை தூர்வாராத வரை நிலத்தடிநீரை சேமிக்க முடியாது.


கதாநாயகனை கவனியுங்கள்:


தமிழகத்தில், ஆண்டுக்கு ஆண்டு 400 எக்டேர் விளைநிலம், வீட்டு மனைகளாகவும், பிளாட்டுகளாகவும் பிரிக்கப்பட்டு வருகிறது. விளைநிலங்களை பாதுகாக்க வேண்டும். மரங்கள்தான் மழைநீரை நிலத்திற்குள் இறக்கி சேமிக்கும் "கதாநாயகன்கள்'. இதனால் மரங்களை நட்டு வளம் பெறுவோம்.


எப்படி தண்ணீரை தேக்குவது



* வரப்பு தடுப்புகள் அமைக்க வேண்டும்

* கண்மாய், குளங்களின் கரைகளை உயர்த்த வேண்டும்

* சமதள வட்ட கரைகள் அமைக்க வேண்டும்.

* நீர் குழிகள் அமைக்க வேண்டும்.

* நிலத்தில் பள்ளங்கள் அமைக்க வேண்டும்.

* நீர் உறிஞ்சும் குழிகள் அமைக்க வேண்டும்.

* கசிவு நீர் குட்டைகள், பண்ணைக்குட்டைகள், சிறு அணைகள் உருவாக்கலாம்

* நீர் வேகத்தை கட்டுப்படுத்தி, குறிப்பிட்ட இடத்தில் நிற்கவும் வைக்க வேண்டும். இதன் மூலம் மழைநீரை சேமிக்கலாம்.

செவ்வாய், 9 ஜூலை, 2013

நீரிலும், நிலத்திலும் இயங்கும் மிதிவண்டி

நீரிலும், நிலத்திலும் இயங்கும் மிதிவண்டி

பரீதாபாத்து : நீரிலும், நிலத்திலும் ஓடும் சைக்கிளை, பரீதாபாத்தில் உள்ள, சர்வதேச பல்கலை கழக மாணவர்கள் தயாரித்து உள்ளனர்.அரியானா மாநிலம், பரீதாபாத்தில் உள்ளது, மானவ் ரச்சனா சர்வதேச பல்கலை கழகம். இங்கு, மெக்கானிக்கல் இன்ஜினியரிங் பிரிவில், இணை பேராசிரியராக பணியாற்றும், சஞ்சய் தனேஜா மேற்பார்வையில், அவரது துறை மாணவர்கள் ஐந்து பேர் சேர்ந்து, இந்த சைக்கிளை தயாரித்துள்ளனர்.

சாதாரணை சைக்கிளின் இருபுறங்களிலும், தண்ணீர் நிரம்பிய கேன்களை, எவர்சில்வர் பிரேம்களால் இணைத்துள்ளனர். எவர்சில்வர் பிரேம்கள் மற்றும், 20 லிட்டர் கொள்ளளவு உள்ள, தண்ணீர் கேன்கள், இதற்காக பிரத்யேகமாக வடிவமைக்கப்பட்டுள்ளன. 75 கிலோ எடையை தாங்கும் திறன் கொண்ட, இந்த சைக்கிளின் சோதனை ஓட்டம், மாநில அரசின் விளையாட்டுத் துறைக்கு சொந்தமான, நீச்சல் குளம் ஒன்றில், சமீபத்தில், நடைபெற்றது.எவர்சில்வர் பிரேம்கள் மற்றும் தண்ணீர் கேன்களுடன் தண்ணீரிலும், அவற்றை அகற்றி விட்டு நிலத்திலும், இந்த சைக்கிளை ஓட்டலாம். "வெள்ள பாதிப்பு பகுதிகளில், மீட்புப் பணிகளை மேற்கொள்ள, இந்த சைக்கிளை பயன்படுத்தலாம்' என, அதை வடிவமைத்த மாணவர்கள் கூறியுள்ளனர். மேலும், சூரிய சக்தியில் இயங்கும், புல் வெட்டும் கருவியையும், இதே பல்கலை கழக மாணவர்கள் தயாரித்து உள்ளனர்.

புதன், 22 மே, 2013

விதைகளால் நீர் தூ்ய்மையாகிறது!

விதைகளால் நீர்  தூ்ய்மையாகிறது!

விதைகளை ப்  பயன்படுத்திக், கலங்கல் நீரை ச் சுத்தப்படுத்தும் கல்லூரி மாணவி, எசு.சசிகலா: நான், சென்னை மாநில கல்லூரியில், வேதியியல் துறை ஆராய்ச்சி மாணவியாக இருக்கிறேன். கடைகளில் விற்கப்படும், பெரும்பாலான தனியார் நிறுவனங்களின் குடிநீர் பாட்டில்களை சோதனை கூடத்தில், "பாக்டீரீயோலாஜிக்கல்' பரிசோதனை செய்தபோது, நச்சு தன்மை உள்ள கனிமங்கள் இருப்பதுடன், மனித கழிவில் இருக்கும், "ஈகோலி, கோலிபாம்' பாக்டீரியாக்கள் இருப்பதை உறுதி செய்தேன். இவற்றால், புற்றுநோய் உண்டாகும். நோய் ஆபத்தை தவிர்க்கவும், தமிழகத்தில் நிலவி வரும் குடிநீர் தட்டுப்பாட்டை நீக்கவும் முயற்சித்தேன். குடிக்க முடியாத, மாசடைந்த கலங்கலான நீரை, நச்சு தன்மை இல்லாமல், குறைந்த செலவில், நாம் பயன்படுத்தும் விதைகளைக் கொண்டே, குடிநீராக மாற்ற ஆய்வு செய்தேன். அப்போது, முருங்கை விதை, தேத்தாங்கொட்டை, அவரை விதை என, இம்மூன்றையும் பொடியாக்கி நீரில் கலந்த போது, நீரில் உள்ள நச்சு தன்மை நீங்கி, குடிநீராக மாறியது. குடிக்கும் நீரின் நச்சு தன்மையை, என்.டி.யூ., எனும், "நிபிலோமெட்ரிக் டர்பிடிட்டி யூனிட்' என்ற அலகால் அழைக்கிறோம். குடிக்கும் நீரின் நச்சு தன்மை, 1என்.டி.யூ., விற்கு மிகாமல் இருக்க வேண்டும். ஒரு லிட்டர் நீரில், 1 மி.கி., சோடியம் குளோரைடு கலவையை சேர்த்து, அதில் இம்மூன்று விதைகளின் பொடியையும் போட்டு, 10 நிமிடங்கள் ஊறியவுடன், அடியில் தேங்கிய கலவையை, 200 மில்லி நீருக்கு, 0.5 கிராம் கலந்து, 12 மணி நேரம் வைக்க வேண்டும். பாக்டீரியா, வைரஸ், பூஞ்சை மற்றும் வேதிபொருட்களை முருங்கை விதை, அழித்தது. தேத்தாங்கொட்டை, கன உலோகங்களை பிரித்தது. அவரை விதை, நீரின் கலங்கல் தன்மையை நீக்கியது. இந்த இயற்கையான தொழில்நுட்பத்தால், நச்சு தன்மை உள்ள நீர், 98 சதவீதம் தூய்மையாகி, குடிநீராக மாறுகிறது. தொழில் ரீதியிலான செயற்கை முறைகளை விட, மூன்று விதைகளை பயன்படுத்தி, ஆய்வில் கண்டுபிடித்த, இயற்கையான இப்புதிய தொழில்நுட்பம், மிகவும் பாதுகாப்பானது.

புதன், 5 டிசம்பர், 2012

10 ஆயிரம் கன அடி நீர் திறந்துவிடக் கருநாடகாவுக்கு உச்சநீதிமன்றம் உத்தரவு

10 ஆயிரம் கன அடி நீர் திறந்துவிடக் கருநாடகாவுக்கு உச்சநீதிமன்றம் உத்தரவு

கர்நாடக அரசு காவிரியில் விநாடிக்கு 10 ஆயிரம் கன அடி நீர் திறந்து விட உச்ச நீதிமன்றம் உத்தரவு பிறப்பித்துள்ளது.
கர்நாடக அரசு காவிரியில் விநாடிக்கு 10 ஆயிரம் கன அடி நீர் திறந்துவிட உச்ச நீதிமன்றம் உத்தரவு பிறப்பித்துள்ளது. இன்றிலிருந்து ஞாயிறு வரை பத்தாயிரம் கன அடி நீர் திறந்து விடப்பட வேண்டும்.
நாளை அல்லது நாளை மறுநாள் தமிழக கர்நாடக தரப்பு இணைந்த காவிரி கண்காணிப்புக் குழுக் கூட்டம் கூட்டப்பட வேண்டும்.
தமிழகத்திலும் கர்நாடகத்திலும் பயிரிடப்பட்டுள்ள பயிர்களுக்கு எவ்வளவு நீர் தேவைப்படும் என்று கணக்கிட்டு இறுதி முடிவு எடுக்க வேண்டும்.
இந்த முடிவை திங்கள்கிழமை உச்ச நீதிமன்றத்தில் சமர்ப்பிக்க வேண்டும்.
மேலும், காவிரி நடுவர் மன்றத்தின் இறுதி உத்தரவினை மத்திய அரசு, அரசிதழில் வெளியிட எத்தனை நாட்கள் ஆகும் என்பது குறித்து உச்ச நீதிமன்றத்தில் பதிலளிக்க வேண்டும்
- இவ்வாறு உச்ச நீதி மன்றம் உத்தரவு பிறப்பித்துள்ளது.

திங்கள், 22 அக்டோபர், 2012

நீர் இடித்து நீர் விலகுவதா? கருணாநிதி கவலை

நீர் இடித்து நீர் விலகுவதா? கருணாநிதி கவலை

First Published : 22 October 2012 04:53 PM IST
திமுக கட்சியினருக்குள் ஏற்பட்டுள்ள கருத்து மோதல்கள் குறித்து கவலை அடைந்துள்ள திமுக தலைவர் கருணாநிதி நீர் இடித்து நீர் விலகுவதா என்ற தலைப்பில் கடிதம் எழுதியுள்ளார்.
அதில், நேற்று காலையிலே சேப்பாக்கம் ராஜுவுடைய வளர்ப்பு மகனுக்கு என் வீட்டிலே திருமணத்தை நான் நேற்று நடத்தி வைத்தேன். சேப்பாக்கத்தில் நான் தேர்தலில் போட்டியிட்ட போது இரவும் பகலும் உழைத்தவர் ராஜு. திருமணம் முடிந்து மணமக்கள் எல்லாம் போய் விட்டார்கள். ஆனால் ராஜு மட்டும் மேலே தாழ்வாரத்தில் அமர்ந்திருந்த என்னிடம் வந்து என் கால்களில் விழுந்தார். “என்ன?” என்றேன். “அய்யா, என் வாழ்நாளில் எனக்கு எந்தப் பதவியும் தேவையில்லை, தங்கள் கையால் தாலியெடுத்துக் கொடுத்து, என் மகனை வாழ்த்தினீர்களே, அதுவே எனக்குப் போதும். இந்தப் பிறவியின் பயனை அடைந்து விட்டேன்” என்றார். இப்படிப்பட்ட தன்னலமற்ற, தலை வணங்கத்தக்க உடன்பிறப்புகள் எல்லாம் - கழகத்திலே பதவிச் சுகம் கண்டு, முன்னணித் தலைவர்களாக இருப்பவர்கள் - ஒருவரோடொருவர் திறந்தவெளி மைதானத்தில் மோதிக் கொள்வதைக் கண்டு, ரத்தக் கண்ணீர் வடிக்காமல் என்ன செய்வார்கள்?
ஒரு குழுவினர் துண்டுப் பிரசுரங்களை பொது மக்களிடம் கொடுத்து விட்டுச் சென்ற சிறிது நேரத்திற்குப் பிறகு, நமது கழகத்தைச் சேர்ந்த இன்னொரு குழுவினர் தனியாக வந்து அதே துண்டுப் பிரசுரங்களைக் கொடுக்கிறார்கள் என்றெல்லாம் கேள்விப்படுகிறேனே, அந்தச் செய்திதான் என்னைப் பெரிதும் வருந்தச் செய்கிறது. அந்த வருத்தம், என்னை உண்ண விடாமலும் இரவு முழுவதும் தூங்க விடாமலும் செய்து விடுகிறது.
1967ஆம் ஆண்டு முதன் முதலாகக் கழகம் பொதுத் தேர்தலில் வெற்றி பெற்றபோது, அண்ணா மட்டும் அந்த அளவுக்கு மகிழ்ச்சியாக இல்லை. அமைப்புச் செயலாளர் என்.வி. நடராசன் அப்போது அண்ணாவிடம், “என்ன அண்ணா?  உங்கள் முகத்திலே மகிழ்ச்சி இல்லையே” என்று கேட்ட போது, “ஆட்சி வந்து விட்டது, ஆனால் கட்சி போச்சே” என்று அண்ணா சொன்னார். அவர் என்ன அர்த்தத்தில் அப்படிச் சொன்னார் என்பதை நான் இப்போது அனுபவ ரீதியாக உணருகிறேன். இரவு 11 மணி வரை கழக முன்னணியினரோடு அமர்ந்து பேசிக் கொண்டிருந்து விட்டு, படுக்கச் சென்றால், உள்கட்சியை அரித்து வரும் இத்தகைய குழுக்களைப் பற்றிய வேதனை தான் என்னை சூழ்ந்து கொள்கிறது. தூங்கவிடாமல் செய்கிறது.
நேற்று மாலையில் மத்திய இணை அமைச்சர் பழனிமாணிக்கம் அளித்த பேட்டி பற்றி அறிந்ததும், “இன்றிரவு என் தூக்கம் போச்சு” என்றுதான் கூறினேன். அதுபோலவே இரவு முழுவதும் நான் உறங்கவில்லை.
அண்ணா சொன்னாரே; “குற்றம் பார்க்கின் சுற்றம் இல்லை” என்று! அதெல்லாம் மறந்து போய் விட்டதா? அதுவும் தஞ்சை மாவட்டத்திலா? கடந்த சில நாட்களுக்கு முன்பு, தஞ்சை மாவட்டத்தில் கீழ் மட்டத்திலே இரண்டு பிரிவினருக்கு இடையே உள்ள பிரச்சினையைச் சமாதானப்படுத்துவதற்காக, கழக அலுவலகத்திற்கே அழைத்து நானும், பேராசிரியரும் இரண்டு மணி நேரம் செலவிட்டோம். தம்பி துரைமுருகன் அந்தக் கூட்டத்தில் பேசும்போது தஞ்சை, திருவாரூர், நாகை மாவட்டங்கள் இணைந்த மாவட்டம், நம் தலைவரின் நேரடிக் கட்டுப்பாட்டில் உள்ள அவருடைய சொந்த மாவட்டம். அங்கே அவர் கூறுவதுதான் “வேதவாக்கு” என்றெல்லாம் தெரிவித்து, அங்கே குழு உருவாகலாமா என்று கண்ணீர் மல்கக் கேட்டாரே! அந்த மாவட்டத்திலா இந்தத் தலைக்குனிவு?
என்னுடைய குணம் முக தாட்சண்யம்! சில கட்சிகளின் தலைமையைப் போல எவ்வளவு பெரியவர்களாக இருந்தாலும், கட்சிக்காக உழைத்தவர்களாக இருந்தாலும், மூத்தவர்களாக இருந்தாலும் கணநேரத்தில் “கட்டம் கட்டி” விடுகிறார்கள்? என்னால் அப்படி - இத்தனை ஆண்டுகளுக்குப் பிறகும் - இதயத்தைக் கல்லாக்கிக் கொண்டு, கடினமாக இருக்க முடிவதில்லை. அதையே காரணமாகக் கொண்டு, தாங்கள் எது வேண்டுமானாலும் செய்யலாம் என்று கருதினால் பிறகு நான் என்ன தான் செய்ய முடியும்? இரண்டு நாட்களுக்கு முன்பு பழனிமாணிக்கம் என்னைச் சந்தித்தார். அவருடைய தொகுதியிலே நடைபெறுவதைப் பற்றியெல்லாம் என்னிடம் கூறினார். பொறுத்திருங்கள், தலைமைக் கழகத்திற்குப் புகாராக எழுதிக் கொடுங்கள், என்று சொன்னேன். அதற்குள் என்ன அவசரம்? எதற்காக இந்தப் பேட்டி? நான் எல்லாவற்றையும் மன்னித்து விடுகிறேன், மறந்து விடுகிறேன் என்பதற்காக எதையும் செய்யத் துணிவதா? எதிர்க் கட்சிகளிடமிருந்து கட்சியைக் காப்பாற்றுவதா? நமக்குள்ளேயே உலவுகின்ற இத்தகைய குழு பேதத்தைப் போக்குவதா?
இலை நிறைய பண்டங்களையும், பதார்த்தங்களையும் பரிமாறி விட்டு, அதன் மூலையிலே சாணத்தையும் சிறிது வைப்பதற்குப் பெயர் விருந்தோம்பலா? எதற்காக நான் இருக்கிறேன்? எதற்காகக் கழகத் தலைமை இருக்கிறது? மாவட்டத்திற்கு மாவட்டம் இது போன்றதொரு நிலைமை உருவானால் அதற்கு எங்கே எல்லை? தம்பி பழனிமாணிக்கம் தஞ்சையிலே பேட்டி கொடுத்து விட்டு, அவரது மனச்சாட்சியே உறுத்திய காரணத்தால் நேற்றிரவே அவசர அவசரமாகச் சென்னை வந்து என்னைச் சந்தித்து என்ன காரணத்தால் அந்தப் பேட்டியைக் கொடுக்க நேரிட்டது என்பதை விளக்கினார்.
இவர்கள் இருவருமே ஒரே மாவட்டத்தைச் சேர்ந்தவர்கள். கடந்த சில ஆண்டுகளுக்கு முன்பு நாடாளுமன்றத்தில் ஒரு விவாதம் - அதாவது தமிழகத்திற்கு வர வேண்டிய ஒரு திட்டம் மேற்கு வங்கத்திற்கு எடுத்துச் செல்லப்படுகிறது என்பதைப் பற்றி தம்பி டி.ஆர். பாலு காரசாரமாக ஆளுங் கட்சியைத் தாக்கிப் பேசிக் கொண்டிருக்கிறார்.
அப்போது மேற்கு வங்கத்தைச் சேர்ந்த நாடாளுமன்ற உறுப்பினர்கள் சிலர், டி.ஆர். பாலுவைத் தாக்குவதற்காக வருகிறார்கள். ஆனால் அவர்கள் பாலுவை நெருங்குவதற்கு முன்பாக, பழனிமாணிக்கம்ஓடி வந்து, டி.ஆர். பாலுவிற்கு அரணாக அவர் முன்பு நின்று கொண்டு மேற்கு வங்க நாடாளுமன்ற உறுப்பினர்களைத் தடுத்தார்! அந்த உணர்வு இன்று எங்கே போய் விட்டது? “ஊரிடத்துப் பகை என்றால் உறவிடத்துப் போயுரைப்பேன்; உறவிடத்தே பகை என்றால், யாரிடத்துப் போயுரைப்பேன்?” என்ற நிலையில் நான் நிம்மதி இழந்திருக்கிறேன்! பாலுவிற்காக பழனிமாணிக்கம் அல்ல பழனிமாணிக்கத்தைத் தாக்குவதற்கு அங்கே யார் முற்பட்டிருந்தாலும், பழனிமாணிக்கத்தை விட வேகமாக ஓடி வந்து பாதுகாக்கக் கூடியவர் தான் டி.ஆர். பாலு! என்ன செய்வது? அதைத் தான் அண்ணா “குற்றம் பார்க்கின் சுற்றம் இல்லை” என்றார். “நீர் இடித்து நீர் விலகாது” என்பது முதுமொழி அல்லவா? மறந்து விடாமல் அதை நினைப்போம்; மறந்திருந்தாலும் மீண்டும் அதை நினைப்போம் என்று கூறியுள்ளார் கருணாநிதி.