உடல் தானம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
உடல் தானம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வியாழன், 3 அக்டோபர், 2013

உடல் தானத்துக்கு ஒரே நாளில் 51 பேர் பதிவு

http://img.dinamalar.com/data/largenew/Tamil_News_large_818093.jpg

மண்ணும் தின்னாது, நெருப்பிலும் எரியாது: உடல் தானத்துக்கு ஒரே நாளில் 51 பேர் பதிவு

கோவை:கோவையில் "பரஸ்பரம்' அமைப்பின் சார்பில் நடந்த உடல் தானம் பதிவு முகாமில், ஒரே நாளில் 7 ஜோடிகள், 2 மாற்றுத் திறனாளிகள் உட்பட 51 பேர், தங்களது பெயர்களை பதிவு செய்துள்ளனர்.

கோவை, "பரஸ்பரம்' மக்கள் அறக்கட்டளையில், அரசு அலுவலர்கள், வங்கி ஊழியர்கள், தொழிலாளிகள், வழக்கறிஞர்கள், மருத்துவர்கள் என பல தரப்பினரும் உறுப்பினர்களாக உள்ளனர். சிறு தொகையை மாதந்தோறும் இவர்கள், அமைப்பிற்குத் தருகின்றனர். கணிசமான தொகை சேர்ந்ததும், அதற்குரிய பயனாளியை தேர்வு செய்ய, குழு அமைக்கின்றனர். ஆதரவற்றோர், முதியோர் காப்பகங்களில் விசாரித்து, தேவை என்ன என்பதை அறிகின்றனர்.
அவிநாசி அருகிலுள்ள ஆதரவற்றோர் இல்ல சிறுவர், சிறுமியர் கழிப்பிட வசதியின்றி, அதிகாலையில் வெளிச்சம் வருவதற்கு முன்பே, வெட்டவெளியில் இயற்கை உபாதைகளை கழித்து வந்தனர்; இதனால், அவர்கள் அனுபவித்த துன்பங்கள் ஏராளம். அந்த இல்லத்துக்குக் கழிப்பிடம் அமைத்துத் தந்து, மும்முனை மின் இணைப்பும் பெற்றுத் தந்தது "பரஸ்பரம்' மக்கள் அறக்கட்டளை. இதேபோன்று, பல்வேறு ஆதரவற்றோர், முதியோர் இல்லங்களுக்கு உதவிகளை செய்து வருகின்றனர்.

மேலும், கண் தானம் குறித்த விழிப்புணர்வை ஏற்படுத்தி, 150 ஜோடி விழிகளை தானமாகப் பெற்று, 300 பேருக்கு பார்வை கிடைக்கச் செய்துள்ளனர்; உடல் தானம் குறித்த விழிப்புணர்வு பிரசாரத்தை செய்து வரும் இவர்கள், பிறருக்கு முன் மாதிரியாக, தங்கள் பெயர்களைப் பதிவு செய்துள்ளனர். ஏற்கனவே, 29 பேர், பெயர்ப்பதிவு செய்துள்ள நிலையில், உடல் தானம் பெயர்ப்பதிவுக்கான சிறப்பு முகாமை இந்த அமைப்பினர் நேற்று நடத்தினர்.

அதில், 7 தம்பதியர் உட்பட 51 பேர், தங்களது உடலை தானம் செய்ய பெயர்களைப் பதிவு செய்தனர். இவர்களில், ஜெகதீஷ் என்ற மாற்றுத்திறனாளியும், வேலுச்சாமி என்ற பார்வையற்றவரும் அடங்குவர். இறந்தவர்களின் உடலை அடக்கம் செய்வதை வழக்கமாகக் கொண்டுள்ள கிறிஸ்தவர், இஸ்லாமியர் சிலரும் உடல் தானம் செய்திருப்பது, குறிப்பிடத்தக்கதாகும். கலெக்டர் இல்ல வளாகத்தில் நடந்த இந்த முகாமை, கலெக்டர் கருணாகரன் துவக்கி வைத்து, உடல் தானம் செய்ய பெயர்களைப் பதிவு செய்த அனைவரையும் பாராட்டினார்.

நிஜமான சேவை!


கோவையை தலைமையிடமாகக் கொண்ட "பரஸ்பரம்' அமைப்பு, இப்போது திருப்பூரிலும் துவக்கப்பட்டுள்ளது. இந்த அறக்கட்டளையின் சிறப்பு அம்சமே, தலைமைப் பொறுப்பு என்று யாரும் இல்லை என்பதுதான். அது மட்டுமின்றி, எந்த நிகழ்ச்சி நடத்தினாலும், யாரும் தங்களை முன்னிலைப் படுத்திக் கொள்வதில்லை; தங்களது பெயரையும், முகத்தையும் ஊடகங்களில் காண்பிக்கவும் விரும்புவதில்லை. கண் தானம், உடல் தானத்துக்காக பெயர்களைப் பதிவு செய்ய விரும்புவோர், 90426 64683, 98432 70300 ஆகிய எண்களில் தொடர்பு கொள்ளலாம்.

வியாழன், 12 செப்டம்பர், 2013

உயிர் காத்த மருத்துவமனைக்கு உடல் தானம்



உயிர் காத்த மருத்துவமனைக்கு உடல் தானம் செய்த இணையர்

சிவகங்கை: கடந்த 20 ஆண்டுக்கு முன், தற்கொலைக்கு முயன்றபோது, உயிரை காப்பாற்றிய அரசு மருத்துவமனைக்கு, தங்களது உடல்களை தானமாக வழங்க உறுதிமொழி கடிதம் கொடுத்துள்ளனர், சிவகங்கை தம்பதி.

சிவகங்கை சி.பி., காலனியைச் சேர்ந்த, கார் டிரைவர், சந்திரமவுலீஸ்வரன், 47. மனைவி மீனாம்பாள், 42. மேலப்பூங்குடி அரசுப் பள்ளியில் ஆசிரியையாக உள்ளார். இருவரும்,நேற்று, சிவகங்கை அரசு மருத்துவக்கல்லூரி டீன் சாந்தக்குமாரை சந்தித்து, தங்களது உடல்களை, மருத்துவக்கல்லூரிக்கு தானம் அளிப்பதற்கான உறுதி மொழிக் கடிதத்தை வழங்கினர்.
தம்பதி கூறியதாவது: வெவ்வேறு சமூகத்தை சேர்ந்த நாங்கள், 1992 ல், திருமணம் செய்தோம். இரு தரப்பிலும் ஏற்பட்ட கடும் எதிர்ப்புகளை சமாளிக்க முடியாமல், தற்கொலைக்கு முயன்றோம். எங்களது உயிரை, அரசு மருத்துவமனை டாக்டர்கள்தான் காப்பாற்றினர். இதற்கு நன்றிக் கடனாகவும், மருத்துவ மாணவர்களுக்கு உதவும் வகையிலும், இருவரின் உடல்களை தானம் செய்ய முயன்றபோது, கடந்த 2 ஆண்டுக்கு முன், பிள்ளைகள் தடுத்தனர். தற்போது, பி.டெக்., படிக்கும் எனது மகன், ""எனது உடலை தானம் செய்யப் போகிறேன், நீங்களும் தானம் செய்யுங்கள்,'' என்றான். இதன்படி, உறுதி மொழிக் கடிதத்தை வழங்கினோம். இவ்வாறு கூறினார்.

கல்லலைச் சேர்ந்த இலட்சுமணன் மனைவி, ஓய்வு பெற்ற அரசு மருத்துவர் காந்தி, 73; நேற்று, உடலை தானம் செய்வதற்கான கடிதம் கொடுத்தார். அவர் கூறுகையில், ""உயிரோடு, மருத்துவ சேவை புரிந்தேன். உயிரற்ற நிலையில், மாணவர்களுக்கு எனது உடல் சேவை புரிய வேண்டும் என்பதற்காக உடல் தானம் செய்கிறேன்,'' என்றார்.

செவ்வாய், 2 ஜூலை, 2013

அரசு மருத்துவ கல்லூரிக்கு உழவர்கள் உடல் தானம்

முதியவர்கள் பாலுச்சாமி, இராமன் ஆகிய இருவருக்கும்  பாராட்டுகள். இவர்களைப்போல் சிவகங்கையைச் சேர்ந்த, தன்மானச்சுடர் இராமச்சந்திரனாரின் இளைய மகனான திரு இராசமுத்துராமலிங்கம் தன் 85 ஆம் அகவையில் (கடந்த அக்டோபர்) உடல்கொடைக்கான விருப்பத்தினைத் தெரிவித்து ஏற்றுக் கொள்ளப்பட்டுள்ளது. கண்ணாடி அணியாத இவர்,  வாழும் பொழுதே தன் கண்களில் ஒன்றைத் தானமாக அளிக்க முன் வந்துள்ளார். ஆனால், வாழும் பொழுதே கண் தானம் பெறுவதில்லை என்பதால் சட்டச்சிக்கல்களை ஆராய்ந்து முடிவெடுப்பதாகச் சென்னை  மருத்துவக் கல்லூரியில் தெரிவித்துள்ளனர். சிவகங்கைக்கும் தமிழ்நாட்டிற்கும் புகழ் சேர்க்கும் இவர்களுக்குப் பாராட்டுகள். அன்புடன் இலக்குவனார் திருவள்ளுவன் /தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்!/

அரசு மருத்துவ கல்லூரிக்கு உழவர்கள் உடல் தானம்
சிவகங்கை : அரசு மருத்துவக் கல்லூரியில், மாணவர்களின் படிப்பிற்கு உதவ, இரண்டு விவசாயிகள், உடல்களை தானம் செய்துள்ளனர். சிவகங்கை மாவட்டம், மானாகுடி கிராமத்தை சேர்ந்தவர் பாலுச்சாமி, 75. அதே ஊரைச் சேர்ந்தவர், ராமன், 76. இருவரும் நண்பர்கள். தங்களது உடல்களை, சிவகங்கை அரசு மருத்துவக் கல்லூரி மருத்துவமனைக்கு, தானம் கொடுத்துள்ளனர்.

அவர்கள் கூறியதாவது: மனிதனாக பிறந்தால், எதையாவது சாதிக்க வேண்டும். எனவே, எங்களால் முடிந்ததை செய்ய விரும்பினோம். மண் தின்னும் இந்த உடல்களை, சிறந்த டாக்டர்களை உருவாக்க, அரசு மருத்துவக் கல்லூரிக்கு, தானம் செய்வது என முடிவு செய்தோம். குடும்பத்தினருடைய ஒப்புதலை பெற்று, இதை செய்துள்ளோம். உடல் தானம் செய்வது எப்படி என யோசித்தபோது, ஓராண்டுக்கு முன், "தினமலர்' நாளிதழில், "உடல், உறுப்பு தானம் செய்வது எப்படி' என்ற செய்தியை படித்தோம். இதில் இருந்த விளக்கங்களை பின்பற்றி, உடல்களை தானம் செய்துள்ளோம். எங்களிடம், எந்த கெட்ட பழக்கமும் இல்லை. சிவகங்கை மாவட்ட மருத்துவக் கல்லூரியில், சிறந்த டாக்டர்கள் உருவாக வேண்டும். இதற்கு, ஏதோ ஒரு வகையில் உதவுகிறோம் என்பதில், மகிழ்ச்சி அடைகிறோம்.இவ்வாறு, அவர்கள் கூறினர்.

டீன் சாந்தகுமார் கூறுகையில், ""சாதாரண விவசாயிகள், உடல் தானம் செய்திருப்பது பெருமை. இவர்களை போன்ற பலரும் உடல், உறுப்பு தானம் செய்தால், இம்மருத்துவமனை மேலும் வளரும்,'' என்றார்.