இலங்கை க் கால்பந்து வீரர்களுக்கு ச் சென்னையில் பயிற்சி: திருப்பியனுப்ப முதல்வர் உத்தரவு

இலங்கை க் கால்பந்து வீரர்களுக்கு ச் சென்னையில் பயிற்சி: திருப்பியனுப்ப முதல்வர் உத்தரவு

First Published : 02 Sep 2012 06:06:48 PM IST

தினமணி

Last Updated : 02 Sep 2012 06:44:24 PM IST

சென்னை, செப். 2: இலங்கை கால்பந்து விளையாட்டு வீரர்களுக்கு சென்னையில் பயிற்சி அளித்துள்ளதற்கு கடும் கண்டனத்தை தெரிவித்துள்ள முதல்வர் ஜெயலலிதா, அவர்களை திருப்பி அனுப்ப உத்தரவிட்டுள்ளார். மேலும், நேரு விளையாட்டு அரங்கில் பயிற்சி அளி்க்க அனுமதி அளித்த பொறுப்பு அதிகாரியை தாற்காலிக பணிநீக்கம் செய்யவும் முதல்வர் உத்தரவிட்டுள்ளார்.இது குறித்து முதல்வர் வெளியிட்டுள்ள அறிக்கையில்,இலங்கைத் தமிழர்கள் சிங்களர்களுக்கு சமமான உரிமைகளைப் பெறும் வரை அந்நாடு மீது பொருளாதாரத் தடை விதிக்கப்பட வேண்டும் என்று தமிழக சட்டப் பேரவையில் தீர்மானம் நிறைவேற்றப்பட்டது. அந்த தீர்மானத்தின் மீது மத்திய அரசு நடவடிக்கை எடுக்காமல், தமிழக மக்களின் உணர்வுகளை புண்படுத்தும் வகையில், இலங்கை ராணுவ வீரர்களுக்கு தமிழ்நாட்டில் தொழில்நுட்பப் பயிற்சி அளிப்பதற்கான நடவடிக்கையை எடுத்து வருகிறது.  மத்திய அரசின் இந்த நடவடிக்கையை எதிர்த்து கடும் கண்டனத்தை நான் வெளியிட்டவுடன், இலங்கை ராணுவ வீரர்களை இந்தியாவில் உள்ள வேறு மாநிலத்திற்கு அனுப்பி வைத்து மத்திய அரசு தொடர்ந்து பயிற்சி அளித்து வருகிறது. அண்மையில், இரண்டு இலங்கை ராணுவ வீரர்களுக்கு வெலிங்டன் ராணுவ பயிற்சிக் கல்லூரியில் பயிற்சி அளிக்கப்பட்டு வருவதை அறிந்தவுடன், அவர்களை உடனடியாக இலங்கைக்கு திருப்பி அனுப்ப வேண்டும் என்று நான் வலியுறுத்தினேன். ஒட்டுமொத்த தமிழகமும் இதே கோரிக்கையை விடுத்தது. ஆனால், மத்திய அரசு அதற்கு சிறிதும் மதிப்பளிக்கவில்லை. மாறாக, இது போன்ற பயிற்சிகள் அளிப்பது நிறுத்தப்பட மாட்டாது என மத்திய அமைச்சர் தெரிவித்து, தமிழக மக்களின் உணர்வுகளை புண்படுத்தியுள்ளார்.  இந்தச் சூழ்நிலையில், இலங்கையைச் சேர்ந்த கால்பந்து விளையாட்டு வீரர்கள்,  தங்களுடைய திறமையை வளர்த்துக் கொள்ளும் வகையில், நட்பு ரீதியிலான போட்டிகளில் கலந்து கொள்ள தமிழகம் வர மத்திய அரசு அனுமதி அளித்துள்ளது. மத்திய அரசின் இந்தச் செயல் தமிழக மக்களை அவமானப்படுத்தும் செயல் ஆகும். மத்திய அரசின் இந்தச் செயலுக்கு எனது கடும் கண்டனத்தைத் தெரிவித்துக் கொள்கிறேன்.  இலங்கை நாட்டைச் சேர்ந்த கால்பந்து விளையாட்டு வீரர்கள் பயிற்சி பெறும் வகையில், சென்னையில் உள்ள பாரத ரிசர்வ் வங்கியில் பணிபுரியும் அலுவலர் ஒருவரை ராயல் காலேஜ் ஆப் கொழும்பு நிர்வாகம் தொடர்பு கொண்டு, இங்குள்ள கால்பந்து அணிகளுடன் நட்பு ரீதியிலான விளையாட்டுப் போட்டிகளில் விளையாட ஏற்பாடு செய்யும்படி கேட்டுக் கொண்டதாகவும், அதன்பேரில், அந்த அலுவலர் அதற்கான ஏற்பாட்டை செய்ததாகவும், கடந்த ஆகஸ்ட் 30-ல் தமிழகம் வந்த இலங்கை கால்பந்து விளையாட்டு வீரர்கள் மறுநாள் சென்னை சுங்க இலாகா அணியுடன் நேரு விளையாட்டரங்கில் விளையாடியுள்ளதாகவும் தகவல் வந்துள்ளது. இது குறித்து  நடத்தப்பட்ட விசாரணையில், பாரத ரிசர்வ் வங்கி அலுவலர் நட்பு ரீதியிலான கால்பந்து போட்டியை நடத்துவதற்கு வாய்மொழியாக நேரு விளையாட்டரங்கத்தின் பொறுப்பு அதிகாரியை அணுகியதாகவும், அந்த பொறுப்பு அதிகாரி விளையாட்டுப் போட்டிகளுக்கு நேரு விளையாட்டரங்கத்தை பயன்படுத்த வாய்மொழியாக அனுமதி வழங்கியதாகவும் தெரிய வந்தது.  நேரு விளையாட்டரங்கில் விளையாட்டுப் போட்டிகளை அனுமதிக்க நேரு விளையாட்டரங்க பொறுப்பு அதிகாரிக்கு எந்தவித அதிகாரமும் இல்லை. தமிழ்நாடு விளையாட்டு மேம்பாட்டு ஆணையத்திற்கு தான் அந்த அதிகாரம் உள்ளது. தனக்கு இல்லாத அதிகாரத்தை பயன்படுத்தி இலங்கை விளையாட்டு வீரர்களை நேரு விளையாட்டரங்கில் கால்பந்து விளையாட அனுமதி அளித்ததன் மூலம் தமிழக மக்களின் உணர்வுகளை நேரு விளையாட்டரங்க பொறுப்பு அதிகாரி கொச்சைப் படுத்தியுள்ளார்.  எனவே, அந்த அதிகாரியை தற்காலிக பணிநீக்கம் செய்து துறைரீதியான நடவடிக்கை எடுக்கும்படி தலைமைச் செயலாளருக்கு உத்தரவிடப்பட்டுள்ளது. மேலும், இலங்கை கால்பந்து வீரர்களுக்காக எந்த போட்டிகளும் தமிழகத்தில் நடத்தக் கூடாது என்றும், அவர்களை இலங்கைக்கு உடனடியாக திருப்பி அனுப்ப நடவடிக்கை எடுக்க வேண்டும் என்றும் உத்தரவிடப்பட்டுள்ளது.  இதே போன்று வேலம்மாள் மேல்நிலைப் பள்ளியுடன் கால்பந்து போட்டி விளையாட சென்னை வந்துள்ள இலங்கை, ரத்தினபுராவைச் சேர்ந்த ஹில்பர்ன் இன்டர்நேஷனல் பள்ளியின் 8 மாணவர்கள் மற்றும் ஒரு பயிற்சியாளரையும் திருப்பி அனுப்ப உத்தரவிட்டுள்ளேன் என்று கூறியுள்ளார் முதல்வர் ஜெயலலிதா.

Email

Print

Delicious

Digg

Facebook

Twitter

2 கருத்துகள்

கருத்துகள்

சரியான நடவடிக்கை. தம் மீது தமிழ் மக்கள் கொண்டுள்ள வெறுப்புக்கு என்ன காரணம் என்பதை திரும்பியவர்கள் சிந்திக்கட்டும். முதல்வரின் நடவடிக்கை பாராட்டுதலுக்குரியது என்றே நான் கருதுகிறேன்.

By sivasubramanian
9/2/2012 8:19:00 PM

சபாஷ்.... எல்லாம் இந்த எட்டப்பன் கருணாநிதியின் கையாகாததனம். ஆட்டை கடித்து மாட்டை கடித்து கடைசியில் மனிதனை கடித்த கதையாக, மத்திய அரசு இப்படி நடந்துகொள்வதை எதிர்த்து ஒரு வார்த்தை கூட பேச முடியாத எட்டப்பன் கருணாநிதி ஐ. நா சபையில் தனது தீர்மானத்தை கொடுக்கிறாராம். கூரை ஏறி கோழி பிடிக்க முடியாதவன் வானம் ஏறி வைகுண்டம் போனானாம். வெட்க கேடு.

By இராசாராமன் வெ இராமன்
9/2/2012 7:31:00 PM

மருத்துவ வசதியில் அலட்சியம் பறிபோனது கால்பந்து வீரர் உயிர்

மருத்துவ வசதியில் அலட்சியம் பறிபோனது கால்பந்து வீரர் உயிர்

தினமலர் 10-07-2012 IST

கோல்கட்டா:கால்பந்து மைதானத்தில் உரிய மருத்துவ வசதிகள் இல்லாததால் மேற்குவங்க வீரர் ஒருவர் பரிதாபமாக மரணம் அடைந்தார். இவரை மருத்துவமனையில் உடனடியாக அனுமதிக்காமல் அலட்சியம் காட்டியதால் உயிரை காப்பாற்ற முடியவில்லை.  மேற்கு வங்கத்தின் ஜல்பாய்குரியில் <உள்ள நேதாஜி வித்யாபத் மைதானத்தில் ஒளிவெள்ளத்தில் உள்ளூர் கால்பந்து போட்டி நடந்தது. இதில் தோரல்பாரா -பானு நகர் அணிகள் மோதின. தோரல்பாரா அணி சார்பில் விளையாடிய மகேஷ் தபா, 27, கோல் அடிக்க பாய்ந்தார். அப்போது எதிரணி கோல்கீப்பரின் முழங்கால், தபாவின் நெஞ்சில் பலமாக தாக்கியது. இதையடுத்து சுருண்டு கீழே விழுந்தார். உடனே "பைக்' மூலம் தபாவை அருகில் இருந்த அரசு மருத்துவமனைக்கு அழைத்துச் சென்றனர். தீவிர சிகிச்சைப்பிரிவில்(ஐ.சி.யு.,) படுக்கை வசதி பற்றாக்குறை காரணமாக இவரை அனுமதிக்க மறுத்துள்ளனர். உடனடியாக மரினா என்ற தனியார் மருத்துவமனைக்கு கொண்டு சென்றனர். அங்கும் ஐ.சி.யு.,வில் இடமில்லை. மற்றொரு தனியார் மருத்துவமனைக்கு கொண்டு செல்லும் வழியில் தபா மரணம் அடைந்தார். பின் இவர் மீண்டும் அரசு மருத்துவமனைக்கு கொண்டு செல்லப்பட்டார். அங்கு ஏற்கனவே மரணம் அடைந்து விட்டதாக டாக்டர்கள் உறுதி செய்தனர்.  விதிமுறை என்ன: விபத்து மற்றும் இருதயம் தொடர்பான பிரச்னையின் போது பாதிக்கப்பட்டவரை விரைவாக மருத்துவமனைக்கு கொண்டு செல்ல வேண்டும். "பொன்னான நேரத்தை' வீணடித்து அலைக்கழிக்கப்பட்டதால், தபாவின் உயிர் அநியாயமாக பறிபோகியுள்ளது. தவிர, சர்வதேச கால்பந்து கூட்டமைப்பின் விதிமுறைகளும் பின்பற்றப்படவில்லை. இதன்படி மைதானத்தில் டாக்டர் அடங்கிய ஆம்புலன்ஸ் வசதிகள் எப்போதும் இருக்க வேண்டும். ஆனால், நேதாஜி மைதானத்தில் இது போன்ற வசதிகள் இல்லை என்று கூறப்படுகிறது.  இது குறித்து மாவட்ட விளையாட்டு சங்கத்தின் இணை செயலர் போலா மண்டல் கூறுகையில்"" வீரரை ஆஸ்பத்திரிக்கு கொண்டு செல்வதில் எவ்வித தாமதமும் ஏற்படவில்லை. ஆம்புலன்சில் தான் அழைத்துக் சென்றோம். முதலில் சென்ற இரண்டு மருத்துவமனைகளிலும் படுக்கை வசதி இல்லை. காத்திருக்க சொன்னார்கள். ஆனால், அவரின் உடல்நிலையை கருத்தில் கொண்டு தான் இன்னொரு ஆஸ்பத்திரிக்கு கொண்டு செல்ல நேர்ந்தது,'' என்றார். தபாவுக்கு தவறான பழக்கங்கள் எதுவும் இல்லையென்று அவரது உறவினர்கள் கூறுகின்றனர். இதனால், மைதானத்தில் நடந்த சம்பவம் மற்றும் மருத்துவ வசதிகள் இல்லாதது தான் மரணத்துக்கு காரணமாக இருக்க வேண்டும். இவரது பிரேத பரிசோதனை அறிக்கை கிடைத்த பின், மரணத்துக்கான உண்மையான காரணம் தெரியவரும்.  --- தொடரும் சோகம் இந்தியாவில், கால்பந்து மைதான நிர்வாகிகளின் அலட்சியம் காரணமாக, இளம் வீரர்களின் மரணம் தொடர்கிறது.  * கடந்த 2004ல் மோகன் பகான் அணிக்கு எதிரான பெடரேஷன் கோப்பை போட்டியின் போது, டெம்போ வீரர் கிறிஸ்டியானோ ஜூனியர், மயங்கி விழுந்து மரணம் அடைந்தார். * கடந்த ஆண்டு இந்துஸ்தான் ஏரோநாட்டிக்ஸ் அணியின் கோல் கீப்பர் அருண் குமார், 24, மாரடைப்பால் களத்தில் மரணம் அடைந்தார். * கடந்த மார்ச் மாதம், சவுத் வெஸ்டர்ன் ரயில்வே அணிக்கு எதிரான போட்டியின் போது, பெங்களூரு மார்ஷ் ஸ்டிரைக்கர் வீரர் வெங்கடேஷ், 25, திடீரென மைதானத்தில் மயங்கி விழுந்தார். இவரை பரிசோதிக்க டாக்டர்கள் யாரும் மைதானத்தில் இல்லை. ஆம்புலன்ஸ் வசதியும் இல்லை. கடைசியில் வெங்கடேஷை, ஆட்டோ ரிக்ஷாவில் ஏற்றி கொண்டு செல்ல, வழியிலேயே மரணம் அடைந்தார்.  * இந்த சோகம் மறையும் முன், மேற்கு வங்கத்தை சேர்ந்த கால்பந்து வீரர் மகேஷ் தபா, 27, மரணம் அடைந்தது, பெரும் அதிர்ச்சியை ஏற்படுத்தியுள்ளது. --