மருத்துவ படிப்பு லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
மருத்துவ படிப்பு லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

திங்கள், 24 ஜூன், 2013

மருத்துவ படிப்புக்கு உதவுமாறு ஏழை மாணவன் வேண்டுகோள்

மருத்துவ படிப்புக்கு உதவுமாறு ஏழை மாணவன் வேண்டுகோள்


ஊத்தங்கரை: அரசு மருத்துவ கல்லூரியில் படிக்க, உதவுமாறு ஏழை மாணவர் வேண்டுகோள் விடுத்துள்ளார்.ஊத்தங்கரை அடுத்த, சோளாக்காப்பட்டியை சேர்ந்தவர் சுமதி, 40, சத்துணவு உதவியாளராக பணிபுரிந்து வருகிறார். இவருடைய கணவர் ராமகிருஷ்ணன், 10 ஆண்டுகளுக்கு முன் இறந்து விட்டார். ஏழ்மையான சூழ்நிலையிலும் சுமதி தன் மகன் சுரேஷ், 17, மகள் சுஷ்மிதா, 15 ஆகியோரை அதியமான் மெட்ரிக் பள்ளியில் படிக்க வைத்தார்.

இவர்களுடைய ஏழ்மை நிலையை பார்த்து, அதியமான் மெட்ரிக் பள்ளி தாளாளர் திருமால் முருகன், சுரேஷ், சுஷ்மிதாவை பள்ளியில் இலவசமாக சேர்த்து கொண்டார். சுரேஷ், எஸ்.எஸ்.எல்.ஸி.,யில், 487 மதிப்பெண் பெற்று பள்ளியில், மூன்றாவது மாணவராக தேர்ச்சி பெற்று, ப்ளஸ் 2 தேர்வில்,1,173 மதிப்பெண் பெற்றுள்ளார். இவருக்கு, கட் ஆப் மதிப்பெண், 198.25 பெற்று, செங்கல்பட்டு அரசு மருத்துவ கல்லூரியில் படிக்க இடம் கிடைத்துள்ளது.
சத்துணவு உதவியாளராக பணிபுரிந்து வரும் சுமதி, தன் மகனுக்கு மருத்துவ கல்லூரியில் படிக்க இடம் கிடைத்தும், ஏழ்மை நிலை காரணமாக, மகனை படிக்க வைக்க முடியாமல், வேதனை அடைந்துள்ளார்.

இது குறித்து சுரேஷ் கூறியது:என் தந்தை இறந்து விட்டதால், என்னையும், என் தங்கையையும் தாய் மிகவும் கஷ்டபட்டு படிக்க வைத்தார். ஊத்தங்கரை அதியமான் மெட்ரிக் பள்ளி நிர்வாகம், எங்களுக்கு இலவசமாக கல்வி அளித்தது. தற்போது, எனக்கு செங்கல்பட்டு அரசு மருத்துவ கல்லூரியில் மருத்துவம் படிக்க இடம் கிடைத்துள்ளது.ஆனால், ஏழ்மை காரணமாக மருத்துவ கல்லூரியில் சேர முடியாத நிலை உள்ளது. தமிழகத்தில், தாராள மனப்பான்மை கொண்ட நல்ல உள்ளம் கொண்டவர்கள் பலர் உள்ளனர். அவர்கள், என் மருத்துவ படிப்புக்கு உதவி செய்வார்கள் என்ற நம்பிக்கை உள்ளது.இவ்வாறு அவர் கூறினார். மாணவன் சுரேசுக்கு உதவி செய்ய விரும்புவர்கள், 96297 01481 என்ற மொபைல் ஃபோன் எண்ணுக்கு தொடர்பு கொள்ளலாம்.

புதன், 19 ஜூன், 2013

மருத்துவ படிப்புக்கு இடம் கிடைத்தும் ஏமாற்றம்

மருத்துவ படிப்புக்கு இடம் கிடைத்தும் ஏமாற்றமடைந்த திருத்தங்கல் மாணவி
சிவகாசி: விளையாட்டுப்பிரிவின் கீழ், மருத்துவ படிப்பில் சேர இடம் கிடைத்தும், கடைசி நேரத்தில் சேரமுடியாமல், விருதுநகர் மாவட்டம் திருத்தங்கல் மாணவி ஏமாற்றம் அடைந்துள்ளார்
திருத்தங்கல் மாணவி நித்ய லட்சுமி, பிளஸ் 2 தேர்வில் 810 மார்க் பெற்று தேர்ச்சி பெற்றார். இவர், பாட்னா, ஒடிசாவில் நடந்த தேசிய "டென்னிகாய்ட்' போட்டியில், 2 தங்கப்பதக்கமும், கேரளாவில் நடந்த போட்டியில் வெண்கல பதக்கமும் பெற்றவர். விளையாட்டுப் பிரிவின் கீழ், மருத்துவ படிப்பில் சேர, 3 இடங்களை அண்ணா பல்கலை ஒதுக்கியுள்ளது. நித்ய லட்சுமி, விளையாட்டு பிரிவிற்கான மதிப்பீட்டில் 590 மார்க் பெற்று, 2 வது இடம் பெற்றார். இவருக்கு மருத்துவ படிப்பிற்கான கலந்தாய்வில் பங்கேற்க வரும்படி, எஸ்.எம்.எஸ்., மூலம் அழைப்பு வந்தது. கடந்த 17ம்தேதி சென்னையில் நடந்த கலந்தாய்வில், பங்கேற்ற நித்யலட்சுமிக்கு, திருநெல்வேலி மருத்துவ கல்லூரியில் இடம் ஒதுக்கீடு செய்யப்பட்டு, 12 ஆயிரத்து 290 ரூபாய் மற்றும் 500 ரூபாய்க்கு, இரு வங்கி டி.டி., செலுத்தும்படி, அதிகாரிகள் கூறினர். இதற்கான ஆணையை, கீழ்பாக்கம் மருத்துவமனையில் பெற்றுக் கொள்ளும்படி தெரிவிக்கப்பட்டது. விளையாட்டு பிரிவில் ஒதுக்கீடு பெற்ற மாணவி நித்யலட்சுமி குறித்த செய்தி, நாளிதழில்களில் வெளியானது. இதனிடையே, மாணவி நித்யலட்சுமியை சந்தித்த, அண்ணா பல்கலை அதிகாரி ஒருவர்,""மருத்துவ படிப்பில் சேர, வேதியியல் பாடத்தில், 60 சதவீத மார்க் இருக்க வேண்டும். ஒரு சதவீத மார்க் குறைவாக இருப்பதால், மருத்துவ படிப்பில் சேர முடியாது,'' என, கடைசி நேரத்தில் தெரிவித்துள்ளார். இத் தகவலை கேட்ட மாணவி நிலைகுலைந்தார். 

மாணவியின் தந்தை மோகன் கூறுகையில், "" என் மகளுக்கு திருநெல்வேலி மருத்துவ கல்லூரியில் இடம் ஒதுக்கீடு செய்து, பணம் செலுத்தும்படி கூறினர். கடைசியில், ஒருசதவீத மார்க் குறைவு என, அதிகாரிகள் கூறுகின்றனர். இதனால், மகளின் எதிர்காலம் பாதிக்கிறது. ஏழை குடும்பத்தை சேர்ந்த என்னால், பல லட்சம் செலவு செய்து, தனியார் மருத்துவ கல்லூரிகளில் படிக்க வைக்க இயலாது.
பொறியியல் படிப்பில் 15வது இடத்தில் இருந்தார். பொறியியல் படிக்க, நல்ல கல்லூரியை தேர்வு செய்யும் வாய்ப்பையும் இழந்து விட்டோம். இனி,யாரை சந்தித்து முறையிடுவது என தெரியவில்லை,'' என்றார்.