கோ.க.மணி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கோ.க.மணி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

திங்கள், 10 ஜூன், 2013

இலங்கை இராணுவ அதிகாரிகளுக்கு இந்தியாவில் பயிற்சி கூடாது: கோ.க.மணி

இலங்கை இராணுவ அதிகாரிகளுக்கு இந்தியாவில் எங்கும் பயிற்சி கூடாது: கோ.க.மணி

இலங்கை ராணுவ அதிகாரிகளுக்கு இந்தியாவில் எங்கும் பயிற்சி கூடாது என்று பாமக தலைவர் ஜி.கே.மணி அறிக்கை ஒன்றில் மத்திய அரசுக்கு வேண்டுகோள் விடுத்துள்ளார்.
இது குறித்து அவர் இன்று வெளியிட்ட அறிக்கை:
இலங்கை ராணுவத்தை சேர்ந்த உயரதிகாரிகள் இருவருக்கு  நீலகிரி மாவட்டம் வெலிங்டனில் உள்ள ராணுவ பயிற்சிக் கல்லூரியில் மே 27&ஆம் முதல் பயிற்சி அளிக்கப்படுவதாக செய்திகள் வெளியாகியுள்ளன. இலங்கையில் நடைபெற்ற இனப்படுகொலைகளுக்காக அந்நாட்டு அதிபர் இராஜபக்சே மற்றும் ராணுவ உயரதிகாரிகள் மீது போர்க்குற்ற விசாரணை நடத்த வேண்டும் என்று ஒட்டு மொத்த தமிழகமும் வலியுறுத்தி வரும் நிலையில், சிங்கள அதிகாரிகளுக்கு தமிழகத்திலேயே ராணுவ பயிற்சி அளிப்பது தமிழக மக்களின் உணர்வுகளை அவமதிக்கும் செயலாகும்.
 இலங்கையில் கடந்த 2009&ஆம் ஆண்டு நடைபெற்ற போரில் ஒரு லட்சத்திற்கும் மேற்பட்ட அப்பாவி  தமிழர்களை சிங்களப் படையினர் படுகொலை செய்தனர். இலங்கை இனப்படுகொலையை நடத்திய சிங்களப் படையினருக்கு இந்தியா தான் பயிற்சி அளித்ததாக இலங்கை அரசே ஒப்புக்கொண்டிருக்கிறது. தமிழக மீனவர்கள் மீதும் சிங்கள கடற்படையினர் தொடர்ந்து தாக்குதல் நடத்தி வருகின்றனர். ஈழத்தமிழர்களையும், தமிழக மீனவர்களையும் படுகொலை செய்த சிங்களப் படையினருக்கு இந்தியாவில் எந்தப் பகுதியிலும் பயிற்சி அளிக்கக்கூடாது என்று பாட்டாளி மக்கள் கட்சி உள்ளிட்ட தமிழக அரசியல் கட்சிகள் வலியுறுத்தி வருகின்றன. அதை மதிக்காமல் கடந்த ஆண்டு சென்னை தாம்பரத்திலும், ஊட்டி வெலிங்டனிலும் சிங்களப்படையினருக்கு பயிற்சிகள் அளிக்கப்பட்ட போது அதைக் கண்டித்து தமிழகத்தில் மிகப்பெரிய அளவில் போராட்டங்கள் நடத்தப்பட்டன.
இதையடுத்து தமிழகத்தில் பயிற்சி பெற்று வந்த இலங்கை ராணுவ வீரர்களும், அதிகாரிகளும் பெங்களூர் மற்றும் டேராடூனுக்கு அனுப்பப்பட்டனர். அதுமட்டுமின்றி, தமிழக மக்களின் உணர்வுகளை மதித்து தமிழகத்தின் எந்தப் பகுதியிலும்  இலங்கை வீரர்களுக்கு பயிற்சி அளிக்கப்படாது என்று மத்திய அரசு அறிவித்தது. கடந்த சில நாட்களுக்கு முன் தஞ்சாவூரில் செய்தியாளர்களிடம் பேசிய பாதுகாப்புத்துறை அமைச்சர் ஏ.கே. அந்தோணியும் இதை உறுதி செய்திருந்தார். அந்தோணி இவ்வாறு அறிவித்த அதே நாளில், அதே நேரத்தில் இலங்கை ராணுவ அதிகாரிகளுக்கு வெலிங்டனில் பயிற்சி தொடங்கப்பட்டிருப்பது மத்திய அரசின் இரட்டை வேடத்தைக் காட்டுகிறது. ஒருபுறம் தமிழக மக்களின் உணர்வுகளை மதிப்பதாக கூறிக் கொண்டு,  இன்னொரு புறம் சிங்களப் படையினருக்கு பயிற்சி அளித்து தமிழக மக்களின் உணர்வுகளை மிதிப்பது கண்டிக்கத் தக்கதாகும்.
இலங்கை ராணுவத்தினருக்கு தமிழகத்தில் பயிற்சி அளிப்பது முறையல்ல. தமிழக மக்களின் உணர்வுகளை மதித்து, வெலிங்டனில் இலங்கை ராணுவ அதிகாரிகளுக்கு அளிக்கப்பட்டு வரும் பயிற்சியை நிறுத்தி அவர்களை சொந்த நாட்டிற்கு திருப்பி அனுப்ப வேண்டும். இலங்கைப் படையினருக்கு  இந்தியாவின் எந்தப் பகுதியிலும் இனி பயிற்சி அளிக்கப்படாது என்று அறிவிப்பதுடன், இலங்கை ஆட்சியாளர்கள் மற்றும் ராணுவ தளபதிகள் மீது போர்க்குற்ற நடவடிக்கையையும் மேற்கொள்ளவேண்டும். அதுமட்டுமின்றி, இனப்படுகொலை பூமியான இலங்கையில் வரும் நவம்பர் மாதம் நடைபெறவிருக்கும் காமன்வெல்த் மாநாட்டை வேறு நாட்டிற்கு மாற்றவும், காமன்வெல்த் அமைப்பிலிருந்து இலங்கையை நீக்கவும் இந்தியா நடவடிக்கை எடுக்க வேண்டும் என்பது தான் தமிழக மக்களின் கோரிக்கை ஆகும். இந்தக் கோரிக்கையை நிறைவேற்றவும் மத்திய அரசு நடவடிக்கை எடுக்க வேண்டும் என வலியுறுத்துகிறேன்.

வியாழன், 15 நவம்பர், 2012

இலங்கைத் தமிழர்காக அனைத்துக் கட்சி கூட்டம்: கோ.க.மணி

இலங்கைத் தமிழர்  சிக்கலுக்குத் தீர்வு காண அனைத்துக் கட்சி கூட்டம்:  

கோ.க.மணி கோரிக்கை

First Published : 15 November 2012 07:02 PM IST
இலங்கைத் தமிழர் பிரச்னைக்கு தீர்வு காண்பது குறித்து விவாதிóக்க அனைத்துக் கட்சி கூட்டத்தை கூட்ட வேண்டும் என்று தமிழக அரசுக்கு பாமக தலைவர் ஜி.கே. மணி கோரிக்கை விடுத்துள்ளார்.
பிரிட்டானியா தமிழர் பேரவை சார்பில் நவம்பர் 7 முதல் 9-ம் தேதி வரை லண்டனில் நடைபெற்ற உலகத் தமிழர் மாநாட்டில் பங்கேற்ற பாமக தலைவர் ஜி.கே. மணி, வியாழக்கிழமை காலை சென்னை திரும்பினார்.
மீனம்பாக்கம் விமான நிலையத்தில் அவரை பாமக இளைஞரணித் தலைவர் அன்புமணி ராமதாஸ், முன்னாள் மத்திய இணை அமைச்சர் ஏ.கே. மூர்த்தி உள்ளிட்டோர் வரவேற்றனர்.
பின்னர், செய்தியாளர்களிடம் ஜி.கே. மணி பேசியது:-
லண்டனில் நடைபெற்ற மாநாட்டில் இலங்கையில் நடைபெற்ற இனப் படுகொலை குறித்து சுதந்திரமான விசாரணை குழுவை அமைக்க வேண்டும் என்று வலியுறுத்தப்பட்டது. இலங்கைத் தமிழர்களுக்காக தமிழகத்தில் உள்ள அரசியல் கட்சிகள் தனித்தனியாக போராடாமல் ஒன்றுபட்டுப் போராட வேண்டும் என்றும் தமிழகத்தில் உள்ள கட்சிகள் அனைத்தும் ஒன்றிணைந்து இந்திய அரசை வலியுறுத்த வேண்டும் என்றும் மாநாட்டில் பங்கேற்ற உலகத் தமிழர்களும், இங்கிலாந்து எம்.பி.க்களும் வேண்டுகோள் விடுத்தனர்.
எனவே, இலங்கைத் தமிழர் பிரச்னைக்கு தீர்வு காண்பது குறித்து விவாதிக்கவும், இந்தப் பிரச்னைக்காக மத்திய அரசை வலியுறுத்தவும் அனைத்துக் கட்சிக் கூட்டத்தை முதல்வர் ஜெயலலிதா கூட்ட வேண்டும் என்றார் ஜி.கே. மணி.