செந்தமிழ்ச் சொற்பிறப்பியல் அகரமுதலித் திட்ட இயக்ககம்
தமிழ் அகராதியியல் நாள் 2023
ஆய்வு மலர்
கட்டுரைகள் வரவேற்கப்படுகின்றன
கட்டுரைகள் அனுப்ப வேண்டிய நாள் : 15.09.2023 மாலை 5,00 மணிக்குள்
அனுப்ப வேண்டிய மின்வரி : agarathimalar2020@gmail.com
விவரம் அறிவிப்பில் காண்க
(தோழர் தியாகு எழுதுகிறார் 193 : நலங்கிள்ளி , பொன்.சந்திரன் கருத்தூட்டங்கள்-தொடர்ச்சி)
இனிய அன்பர்களே!
தேசியப் புலனாய்வு முகமையையும் சஎதச(ஊபா) சட்டத்தையும் கண்டித்து அரசவன்முறை(பாசிச) எதிர்ப்பு முன்னணி வெளியிட்டுள்ள அறிக்கையை தாழி (216) மடலில் வெளியிட்டிருந்தோம். இவ்வறிக்கை மேலும் செப்பம் செய்யப்பெற்று மீண்டும் வெளியிடப்படுகிறது. தெளிவு பெறுங்கள். பிறரையும் தெளிவு பெறச் செய்யுங்கள்.
++++
இசுலாமியர்களை வேட்டையாடும் தே.பு.மு.(என்.ஐ.ஏ.)!
வழக்கறிஞர்கள் மீதும் சஎதச(ஊபா)வின் கீழ்ப்
பொய் வழக்கு!
அரசவன்முறையின்(பாசிசத்தின்) வன்முறை நிறுவனமாய்த் தே.பு.மு.(என்.ஐ.ஏ.)!
அரசவன்முறையின்பாசிசத்தின் அடக்குமுறைக் கருவியாய் சஎதச(ஊபா)!
மோடி அரசின் அரச பங்கரவாதத்தை முறியடிப்போம்!
தமிழ்நாட்டில் தே.பு.மு.(என்.ஐ.ஏ.) நடத்திய மற்றுவொரு கைது நடவடிக்கை!.
புகழ்மிகு முன்னணி(பாப்புலர் ஃப்ரண்ட்) அமைப்பு கடந்த ஆண்டு செட்டம்பரில் தடைசெய்யப்பட்டவுடன் அவ்வமைப்பைக் கலைத்து விட்டதாக அதன் நிருவாகிகள் அறிவித்து விட்டனர். அதன் பிறகும் கூட, ஏறத்தாழ ஏழு மாதங்கள் கழித்து, அவ்வமைப்பில் முன்னாள் நிருவாகியாய் இருந்த சென்னையைச் சேர்ந்த தோழர் அத்துல் இரசாக்கு முதலான ஐந்து இசுலாமியர்கள் கடந்த 2023 மே 9 அன்று தேசியப் புலனாய்வு முகமையால் (என்.ஐ.ஏ) புழல் சிறையில் அடைக்கப்பட்டனர்!
இவ்வழக்கில் குற்றஞ்சாட்டப்பட்டவர்களுக்காக வழக்காடிய முகமது அப்பாசும் முகமது யூசுப்பும் அதே வழக்கில் சேர்க்கப்பட்டுச் சிறையிலடைக்கப்பட்டுள்ளனர்.
புகழ்மிகு முன்னணி(பாப்புலர் ஃப்ரண்ட்) இசுலாமியர்கள் மீதான நா.தொ.ச.(ஆர்.எசு.எசு.) – பாசகவின் ஒடுக்குமுறைகளுக்கு எதிராகவும் மாநில உரிமைகளுக்காகவும் சஎதச(ஊபா) முதலான அடக்குமுறைச் சட்டங்களுக்கு எதிராகவும் அரசமைப்புச் சட்ட உரிமைகளைப் பாதுகாக்கவும் மக்களிடையே பரப்புரை செய்தது; இசுலாமியர்களை அமைப்பாக்கியது; இசுலாமியர்கள் அமைப்பாக்கிக் கொள்வதையும் போராடுவதையும் கட்டுப்படுத்தும் நோக்கில் புகழ்மிகு முன்னணி(பாப்புலர் ஃப்ரண்ட்) மீது பயங்கரவாத முத்திரை குத்தி தடை விதித்தது அரசவன்ம பாசக அரசு.
புகழ்மிகு முன்னணி(பாப்புலர் ஃப்ரண்ட்) அமைப்பைத் தடை செய்வதற்குக் காரணமாக அவ்வமைப்பினர் வெளிநாடுகளில் இருந்து பணம் பெற்றுக் கொண்டு பயங்கரவாதச் செயல்களுக்குத் திட்டமிட்டனராம்; சட்டஎதிர் செயல்கள், பயங்கரவாதச் செயல்கள் செய்வதற்குத் சதித்திட்டம் தீட்டினராம்; இரு பிரிவினருக்கு இடையே பகை வளர்க்கும் செயல்களில் ஈடுபட்டனராம்: தங்கள் பயங்கரவாதச் செயல்களுக்கு ஆட்சேர்த்தனராம்; பேரணி நடத்தினராம்; ஈ.சி.இ.அ.(ஐ.எசு.ஐ.எசு.) போன்ற பயங்கரவாத அமைப்புகளுடன் கமுக்கத் தொடர்பு வைத்துக் கொண்டு அவர்களை ஆதரித்தனராம்; இதுபோன்ற தகவல்கள் தே.பு.மு.(என்.ஐ.ஏ.)வுக்குக் கிடைத்ததாம். அதன் அடிப்படையில் அவ்வமைப்பை தடை செய்தார்களாம்! மேற்சொன்ன குற்றச்சாட்டுகளை சுமத்தி வழக்கு தொடுத்திருக்கிறது தே.பு.மு.(என்.ஐ.ஏ.).
கணக்கற்ற கலவரங்களை நடத்தி, பல்லாயிரக்கணக்கான இசுலாமியர்களைப் படுகொலை செய்து, மசூதிகளை இடித்துத் தள்ளி, மசூதிகளுக்கு வெடிகுண்டு வைத்து, காந்தி தொடங்கி பன்சாரே, தபோலர், கவுரி இலங்கேசு, கல்புரிகி எனப் பலரையும் சுட்டுக் கொன்று, இசுலாமியர்களை இனவழிப்பின் அபாயத்தில் நிறுத்தியிருக்கும் நா.தொ.ச.(ஆர்.எசு.எசு.) தலைமையிலான ‘சங்’ பரிவார அமைப்புகள் செயல்படுவதற்கு அனுமதியுண்டு. ஆனால், இதற்கு எதிராக அமைப்பாக்கிக் கொண்டு போராடுவதற்கு தடையாம்! இந்த வெட்கக் கேடான தடையை எதிர்த்து நிற்போம்! அரசவன்ம(பாசிச)த்தை ஒருவர் எதிர்ப்பதாகச் சொல்லிக்கொண்டால் அவர் கட்டாயம் இந்தத் தடையை எதிர்த்துப் போராடியாக வேண்டும்.
புகழ்மிகு முன்னணி(பாப்புலர் ஃப்ரண்ட்) கடந்த 2022 செட்டம்பர் 28 ஆம் நாள் தடைசெய்யப்பட்டது. கடந்த 2022 செட்டம்பர் 19 அன்று போடப்பட்ட முதல் தகவல் அறிக்கையில் இந்தியத் தண்டனைச் சட்டப் பிரிவுகள் 120(ஆ), 153-அ, 153-அஅ ஆகியவற்றின் கீழும் சட்ட எதிர் செயல்கள் தடுப்புச் சட்டப் (ஊபா, UAPA) பிரிவுகள் 13,17,18, 18(ஆ), 38, 39 ஆகியவற்றின் கீழும் வழக்கு தொடுக்கப்பட்டுள்ளது. இதில் ஏற்கெனவே 9 பேர் சிறைபட்டிருந்தனர். சஎதச(ஊபா) முதலான அடக்குமுறைச் சட்டங்களுக்கு எதிரான கூட்டமைப்பு ஒன்றின் தமிழ் மாநில அமைப்பாளராகச் செயல்பட்ட தோழர் காலித்து முகமது முதலான 9 பேர் சிறைபட்டுள்ளனர்.
கடந்த 2022 ஏப்பிரல் 13 அன்று மேற்சொன்னப் பிரிவுகளுடன் சஎதச(ஊபா) பிரிவுகள் 20, 22ஆ. ஐயும் சேர்த்து முன்னமே இன்னொரு வழக்குப் போடப்பட்டிருந்தது. முதல் வழக்குப் போடப்பட்டதோ ஏப்பிரலில்! ஆனால், அதற்கான கைது நடவடிக்கையை தே.பு.மு.(என்.ஐ.ஏ.)மேற்கொண்டது செப் 22 இல்! இதில் 21 பேர் சிறைப்பட்டனர். அவர்களில் மூன்று பேர் தமிழ்நாட்டைச் சேர்ந்தோர்.
குறிவைக்கப்படும் வழக்கறிஞர்கள்:
இவ்வழக்கு சட்டத்திற்குப் புறம்பானது என்பதால் அதை நீக்கக் கோரி குற்றஞ்சாட்டப்பட்டவர்கள் உயர்நீதிமன்றத்தை அணுகுகின்றனர். குற்றஞ்சாட்டப்பட்டவர்களை தே.பு.மு.(என்.ஐ.ஏ.) தன் விருப்பப்படி விசாரணைக்கு அழைப்பதையும் பொருட்களைப் பறிமுதல் செய்ததையும் அவர்கள் நீதிமன்றத்தில் கேள்விக்குள்ளாக்குகின்றனர்.
குற்றஞ்சாட்டப்பட்டவர்கள் சார்பாக வழக்கை நடத்திய வழக்கறிஞர்கள்தான் முகமது அப்பாசும் முகமது யூசுப்பும் ஆவர்.
முகமது அப்பாசு தே.பு.மு.(என்.ஐ.ஏ.) போட்ட வழக்குகளில் கைதானவர்களின் சார்பாக 10 வழக்குகளில் வாதாடியவர்; 4 வழக்குகளில் முகமது யூசுப்பும் வாதாடியிருந்தார்.
இதற்கிடையே 5.3.2023 அன்று மதுரை கோரிபாளையத்தைச் சேர்ந்த முகமது அலி சின்னா என்பவரை ’விசாரணை’ என்ற பெயரில் தே.பு.மு.(என்.ஐ.ஏ.)அதிகாரி கா.து.க.(டி.எசு.பி.) செந்தில்குமார் கூட்டிச் சென்று மிக மோசமாகச் சித்திரவதை செய்கிறார். இதனால் மயங்கி விழுந்ததை மறைத்து, மருத்துவமனைக்கு அருகில் வலிப்பு வந்து விழுந்து கிடந்தார் என்று பொய்யாகக் கூறி மதுரை இராசாசி அரசு மருத்துவமனையில் சேர்க்கின்றனர். ஆனால் தே.பு.மு.(என்.ஐ.ஏ.) அதிகாரிகள்தான் சின்னாவைச் சேர்த்ததாக வழக்கறிஞர் முகமது அப்பாசு கமுக்க அகக்காட்சிகளைப்(சிசிடிவி) ) பெற்றுத் தெரிந்துகொள்கிறார். இதை முகநூலில் அம்பலப்படுத்துகிறார். இதனால் ஆத்திரம் அடைந்த தே.பு.மு.(என்.ஐ.ஏ.). கா.து.க.(டி.எசு.பி.) செந்தில்குமார் தல்லாகுளம் காவல் நிலையத்தில் தே.பு.மு.(என்.ஐ.ஏ.). மீதான அவதூறு பரப்பல்’ என்று முகமது அப்பாசு மீது வழக்கு பதிவு செய்கிறார். பின்னர் பயங்கரவாதச் சட்டமான சஎதச(ஊபா)வைப் பயன்படுத்தி கலைக்கப்பட்டுவிட்ட பி.எப்.ஐ அமைப்பின் உறுப்பினர் எனப் பொய்யாகக் குற்றஞ்சாட்டப்பட்டு தே.பு.மு.(என்.ஐ.ஏ.).வால் கைது செய்யப்படுகிறார்.
தே.பு.மு.(என்.ஐ.ஏ.)வால் பொய்யாகப் புனையப்படுகின்ற வழக்குகளில் குற்றஞ்சாட்டப்பட்டோருக்கான வழக்கறிஞராக வருபவர்களை எல்லாம் ’பயங்கரவாதி’ என முத்திரை குத்திக் கைது செய்வது அப்பட்டமான அரசியல் சட்ட மீறலாகும். இது மோடி ஆட்சியின் அரசவன்ம ஒடுக்குமுறையின் கோர வடிவமாகும். இது அரச பயங்கரவாதமாகும். இதைத் தடுத்து நிறுத்த வேண்டுமென்று மேனாள் உச்சநீதிமன்ற நீதியர் மார்க்கண்டேய கட்சுவே கண்டித்திருக்கிறார்.
(தொடரும்)
தோழர் தியாகு
தாழி மடல் 223
(தோழர் தியாகு எழுதுகிறார் 191 : கோயில்கள் கொள்ளைக் கூடாரங்களாக மாற விடோம்!- தொடர்ச்சி)
அன்பர் நலங்கிள்ளி எழுதுகிறார்.
தாழி 221 கண்டேன்.
இந்து அறநிலைத் துறையா? இந்துத்துவ சேவைத் துறையா? என்ற தலைப்பில் நீங்கள் எழுதிய கட்டுரை கண்டேன்.
அனைவருக்கும் தெளிவை ஏற்படுத்தும் கட்டுரை.
இது குறித்து என் கருத்தையும் பதிவிட விரும்புகிறேன்.
மதச் சார்பின்மை என்பது எல்லா மதத்தையும் சமமாக நடத்துவதில்லை, எல்லா மதத்திலிருந்தும் விலகியிருத்தல்.
அமைச்சர்கள் மதப் பண்டிகைகளுக்கு வாழ்த்துத் தெரிவிப்பது, மத விழாக்களில் கலந்து கொள்வது போன்ற செயல்களைத் தவிர்க்க வேண்டும்.
அரசு அலுவலகங்களில் தொங்கும் கடவுளர் படங்களை அகற்ற வேண்டும். அரசு அலுவலகங்கள், பள்ளிகளில் உள்ள கோயில்களை அகற்ற வேண்டும். பள்ளிகளில் மத போதனை கூடவே கூடாது. சொல்லப் போனால், மத அமைப்புகள் பள்ளிகளை நடத்தக் கூடாது. அனைத்துப் பள்ளிகளையும் மதச் சார்பற்ற வகையில் அரசே ஏற்று நடத்த வேண்டும்.
தமிழ்நாடு இந்து அறநிலையத் துறை அமைச்சர் சேகர்பாபுவின் இந்து மதச் சார்பு பற்றிக் குறிப்பிட்டிருந்தீர்கள்.
உடனே எனக்கு ஒரு நிகழ்வு நினைவுக்கு வந்தது. முதலமைச்சர் மு. க. தாலினின் மனைவி துருக்கா தாலின் சுமங்கலிகளை வைத்துக் குத்து விளக்கு பூசை நடத்தினார். அதில் சேகர் பாபுவும் கலந்து கொண்டு சிறப்பித்தார். பெண்களை இழிவுபடுத்தும் பூசையை துருக்கா தாலின் நடத்தி விட்டுப் போகட்டும், அங்கு அமைச்சருக்கு என்ன வேலை?
துருக்கா தாலின் அவரது கணவருக்காக இறை வழிபாட்டை நிறுத்திக் கொள்ள வேண்டிய தேவை இல்லைதான். ஆனால் அவரது வழிபாட்டு முறை பார்ப்பனியத்தைத் தூக்கிப் பிடிப்பதாக உள்ளது. கோயில்களில் யாகம் வளர்ப்பது, புரோகிதர்களை கெளரவிப்பது என மாமி வேடம் போடுகிறார்.
Durga Stalin’s Pooja Room Tour என்ற பெயரில் ஒரு வலையொளி. அந்தக் காணொளியில் துருக்கா தாலின் அவர்கள் தன் வழிபாட்டு முறைகளை விளக்குகிறார். அனுமார் படம் ஒன்றைக் காட்டி, இதுதான் உண்மையான அனுமார் என்கிறார். சரி, இதெல்லாம் அவரது தனிப்பட்ட சமய வாழ்வியல். ஆனால் இந்தப் பூசையறைக் காட்சிகள் மு.க.தாலின் இசைவின்றி வெளிவந்திருக்குமா? அப்படியானால் நாங்கள் இந்து மதத்துக்கு நெருக்கமானவர்கள் எனத் திமுக காட்டிக் கொள்ள விரும்புகிறதா?
இது மட்டுமல்ல, சங்கப் பரிவாரம் நடத்தும் வினாயக சதுர்த்தி ஊர்வலங்களைத் திமுக தலைவர்களும் அமைச்சர்களும் நடத்துகின்றனர்.
அமைச்சர் அன்பில் மகேசு பொய்யாமொழி புரோகிதர்கள் உட்கார்ந்திருக்கும் சாமிப் பல்லக்கைத் தூக்கிச் செல்கிறார்.
சங்கப் பரிவாரததுக்கு அஞ்சி இப்படிப்பட்ட அரசியலைத் திமுக நடத்தினால், நாம் பாசகவுக்கே வாக்களித்து விடலாமே என்ற முடிவுக்கே மக்கள் வந்து விடுவார்கள்.
விழித்துக் கொள்ளுமா திமுக தலைமை?
00000
அன்பர் பொன். சந்திரன் எழுதுகிறார்:
சமய விடுமையின் பால் (மத சுதந்திரம்) ஒரு விடுதலை இயக்கத்தின் அணுகுமுறை எவ்வாறு இருக்க வேண்டும் என்பதில் உங்கள் நிலைப்பாட்டோடு முழுமையாக உடன்படுகிறேன். உங்களால் இதை ஆங்கிலத்தில் தர முடியுமானால் நாடெங்கும் கொண்டுசேர்த்து அனைத்து விடுதலைக் குழுக்களின் கவனத்தையும் ஈர்க்கலாம் என்பது என் முன்மொழிவு. கருதிப்பார்க்க வேண்டுகிறேன்.
தாழி:
அன்பர் கோவை பொன். சந்திரன் சொன்ன படியே செய்வோம்.
(தொடரும்)
தோழர் தியாகு
தாழி மடல் 223
பறவைகளை, மக்களை நேசிப்பவரா?அப்படியானால், இதைப் படியுங்கள்!
“பறவைகள், தேனீக்கள், பட்டாம்பூச்சிகள் ஆகிய மூன்றில் ஏதேனும் ஒன்று மட்டும் இல்லாவிட்டாலும், இந்த உலகம் மனிதர்கள் வாழ்வதற்குத் தகுதி இல்லாமல் ஆகிவிடும். சென்னை போன்ற நகரங்களில் பறவைகள், பட்டாம்பூச்சி இனங்கள் எண்ணிக்கை மிகவும் குறைந்து விட்டது. நமது இயல்பான வாழ்க்கையை அவை சுட்டிக்காட்டுகின்றன. நம்மை சுற்றியுள்ள பறவைகளின் மூலம், நமது வாழ்க்கையின் எதிரொளிப்புகளை கவனிக்க முடியும். அனைவருமே முடிந்த வரையில், தமது வீடுகளில் உள்ள தோட்டம், மரம், செடிகள், மேல் மாடி அல்லது கூரைகளில் வசிக்கும் பறவைகளுக்கு முடிந்த அளவு தானிய வகைகள், தண்ணீர் ஆகியவற்றை வைக்கவேண்டும். அவ்வாறு வைப்பதன் மூலம் கிடைக்கும் உணர்வை உணர்ந்து பாருங்கள்.” இவ்வாறு கூறி வருபவர் பறவை நல ஆர்வலர் மைக்கேல் இயூபருட்டு
கோடம்பாக்கம், இயக்குநர் குடியிருப்பில் உள்ள தன் வீட்டில் மூலிகைச் செடிகளை வளர்க்கிறார். சுற்றிலும் பறவைகள் தங்குவதற்கான சிறு சிறு வீடு போன்ற அமைப்பையும், வீட்டிற்கு வெளியே ஆங்காங்கே செய்து வைத்துள்ளார். “அடுக்கு மாடிக் குடியிருப்புகளில் வசிப்பவர்கள் மாடங்களில்(பால்கனிகளில்) பறவைகளுக்கான உணவையும், தண்ணீரையும் வைத்து வரவேண்டும். பல காரணங்களுக்காக மனிதர்களை மனிதர்களே கண்டுகொள்ளாமல் விட்டுவிடுவதைப்போல பறவைகளையும் நாம் கவனிக்காமல் விடக்கூடாது. பறவைகளை நேசிப்பது நம்முடைய பல உளவியல் சிக்கல்களுக்குத் தீர்வாக இருப்பதாக நான் நினைக்கிறேன்.” என்று அவர் சொல்கிறார்.
நீங்கள் மனித நேயரா? அப்படி என்றால் மேலும் படியுங்கள்!
‘சப்னம்’ என்ற அரசு பதிவு பெற்ற தன்னார்வ அமைப்பின் மூலம் 25 ஆண்டுகளாகச், சென்னை, புறநகர் பகுதி, சிற்றூர்ப் பகுதிகளில் உள்ள வறுமையில் வாடும் குழந்தைகள், இளைஞர்களுக்கான கல்வி, நல்வாழ்வு ஆகிய நிலைகளில் பல உதவிகளை மைக்கேல் இயூபருட்டு செய்து வருகிறார். படிப்பைப் பாதியில் விட்டுவிட்ட மாணவர்களுக்குக் கல்வியை மேற்கொண்டு தொடர உதவி செய்து, பொருளாதாரச் சிக்கலைச் சமாளிக்கத் தற்தொழில் வாய்ப்பையும் ஏற்படுத்தித் தருவதோடு, இளைஞர் முன்னேற்றப் பயிற்சிப் பட்டறைகளையும் நடத்தி வருகிறார்.
இவ்வாறு முதியோர், மூத்தோர், குழந்தைகள், ஊனமுற்றோர், பேரிடர் மேலாண்மை, கல்வி-கல்வியறிவு, சுற்றுச்சூழல்- இயற்கை வள மேலாண்மை, உணவு-வேளாண்மை, புதிய-புதுப்பிக்கத்தக்க ஆற்றல், சிற்றூர்ப்புற மேம்பாடு, வறுமை ஒழிப்பு, அறிவியல், தொழில்நுட்பம், விளையாட்டு, நகர்ப்புறம் ஆகிய துறைகளில் ஈடுபாடுகாட்டிச் செயற்படுகிறது. தமிழ்நாட்டில் செயற்படும் இந்த அமைப்பு, நிலையான வளர்ச்சிக்கான மேம்பாட்டிற்காகத் தொண்டாற்றி வருகிறது.
இங்கே, குழந்தைகள் பறவைகள், ஏரிகள், பிற நீர்நிலைகள், சதுப்பு நிலங்கள் போன்றவற்றைத் தூய்மை செய்வதில் உந்துதல் பெறுகின்றனர். இயற்கையின் அன்பு அவர்களுக்குள் பொதிந்து கிடக்கிறது. பேரழிவுகள், பேரிடர்கள், அவசரநிலைகளை எவ்வாறு கையாள்வது என்பது குழந்தைகளுக்கு நடைமுறையில் பயிற்சி அளிக்கப்படுகிறது. வண்ணப்பூச்சுகள், வண்ணங்கள் மந்தமான நேரங்களிலும் குழந்தைகளை உற்சாகப்படுத்துகின்றன, வண்ணமயமான அட்டைகள் பல இயற்கையில் உருவாக்கப்படுகின்றன. ஆண்டுதோறும் கோடைக்கால முகாம்கள், கலை, கைவினை விளையாட்டுகளில் ஈடுபடச் செய்தல், இவர்களின் உடன்பிறப்பு உணர்வைத் தட்டி எழுப்புகிறது. இவர்களிடையே ஏற்படும் உரசல்களைத் தீர்க்கிறது. குழந்தைகளின் ஆக்கப்பூர்வமான ஆற்றலைத் தூண்டுகிறது. பெண் குழந்தைகள் நலன்களில் கூடுதல் கருத்து செலுத்தப்படுகிறது.
‘சப்னம்’ என்றால் என்ன பொருளாம்? முதல் துளி – அஃதாவது, வறட்சிக் காலங்களில் பெய்யும் முதல் மழையின் பெயர் அது. இமயமலைப் பகுதியில் உள்ள இலடாக்கு பழங்குடியினரின் வழக்கு மொழியில் இந்தச் சொல் இருக்கிறது என்கிறார் இயூபருட்டு.
இவ்வாறு பல நிலைகளிலும் உதவி தேவைப்படச் சூழலில் உள்ளவர்களுக்கு வேண்டிய உதவிகளைச் செய்து மறுவாழ்வு அளித்து வருகிறார். ஆனால், இவரின் உடல்நிலை இயல்பான வாழ்விற்கு இடையூறாக இருக்கிறது. சில ஆண்டுகளுக்கு முன்னர் நச்சுநோய்(typhus)க்கு ஆளாகிப் பல மாதங்களாகப் படுத்த படுக்கையாகி, மரணத்தின் விளிம்பு வரை சென்று மீண்டு வந்துள்ளார். இப்போது ஊன்று நடையன்(walker) மூலம் மெல்ல நடக்கிறார். ஆதலின் அங்குமிங்கும் சென்று பணம் திரட்ட முடியவில்லை. நற்பணி தொடர நல்லுள்ளங்கள் உதவி தேவைப்படுகிறது.
என்ன எண்ணுகிறீர்கள்? மறுவாழ்வு தேவைப்படும் குழந்தைகள், இளம்பெண்கள், முதியோர்களுக்கு எப்படி உதவலாம் என்றா?
மைக்கேல் , சப்னம் வளங்கள் / Michael Hubert, SHABNAM RESOURCES
பழைய எண் 5, புதிய எண் 13
புத்தர் தெரு, இரங்கராசபுரம், சென்னை 600024
பேசி + 91 44 24721379 ; 9962430097
மின்வரி: mrhubert72@gmail.com
வங்கி விவரம்
இந்தியன் வங்கி, கோடம்பாக்கம் கிளை, ஆற்காட்டுச்சாலை, சென்னை 600 024
கணக்குப் பெயரும் எண்ணும் : Shabnam Resources 401673346
குறியீட்டு எண் Swift Code : ID IB IN BB MAS
மறுவாழ்வுப் பணிகளில் இணைவோருக்கு நன்றி.
மும்பையில் பாண்டுப்பு தமிழ்ச் சங்கம் சார்பில் இலவசத் தமிழ் வகுப்புகள்
தமிழ்ச் சங்கம் பாண்டுப்பு சார்பில் இலவசத் தமிழ் வகுப்பு அடுத்த மாதம்(செப்டம்பர்) 3-ந்தேதி முதல் தொடங்குகிறது. வகுப்புகள் ஞாயிற்றுக்கிழமை தோறும் இரவு 7 மணி முதல் 9 மணி வரை பாண்டுப்பு மேற்கு, காவுதேவி சாலைப் பகுதியில் உள்ள அன்னை சிவகாமி தேசிய நினைவு மன்றத்தில் நடைபெறும்.
முதல் நாள் வகுப்பை அன்னை சிவகாமி தேசிய நினைவு மன்றத் தலைவர் மாயாண்டி தொடங்கி வைக்கிறார். தமிழ்ச் சங்கம் பாண்டுப்பு தலைவர் ச.சி.தாசன், மன்ற செயலாளர் எட்வர்ட்டு, பொருளாளர் வில்சன் முதலான பலர் முன்னிலை வகிக்கின்றனர். வகுப்பில் சிறியவர்கள் முதல் பெரியவர்கள் வரை யார் வேண்டுமானாலும் சேர்ந்து தமிழ் எழுத, படிக்கக் கற்றுக்கொள்ளலாம்.
வகுப்பில் சேரும் அனைவருக்கும் தேவையான புத்தகங்களும் ஏடுகளும் வழங்கப்படும்.
!
(தோழர் தியாகு எழுதுகிறார் 191 : இந்து அறநிலையத் துறையா? இந்துத்துவ சேவைத் துறையா?- தொடர்ச்சி)
கோயில்கள் கொள்ளைக் கூடாரங்களாக மாற விடோம்!
இனிய அன்பர்களே!
உலகில் தமிழர்கள் வாழும் நாடுகளில் எல்லாம் அவர்கள் தமக்கான சமய வழிபாட்டுக் கூடங்களை அமைத்துள்ளார்கள். அவை அவர்களின் பன்மையப் பண்பாட்டின் அடையாளங்களாக விளங்கி வருகின்றன. நான் அயல்நாடுகள் செல்லும் போது நேரம் கிடைக்கும் போது அவற்றைச் சென்று பார்ப்பதுண்டு. சிலநேரம் நான் கலந்து கொள்ளும் நிகழ்ச்சிகளே அங்கு நடப்பதும் உண்டு.
அப்படித்தான் கடந்த 1994ஆம் ஆண்டு வட அமெரிக்கத் தமிழ்ச் சங்கங்களின் கூட்டமைப்பு மாநாட்டுக்காக அமெரிக்கா சென்றிருந்த போது என் உரைக்காக சிக்காகோ தமிழ்ச் சங்கக் கூட்டம் அங்குள்ள பாலாசி கோயிலில் நடைபெற்றது. இந்தியாவிலிருந்து பிராமணர்கள் வரவழைக்கப்பட்டு அருச்சகர்களாகப் பணியாற்றி வரக் கண்டேன். அவர்கள் என்னைச் சாமி கும்பிட அழைத்த போது “நம்பிக்கை இல்லை” என்று சொல்லி விட்டாலும், கோயிலையும் அதன் கோபுரங்களையும் பல கோணத்தில் படம்பிடித்துக் கொண்டேன். இந்த நாட்டில் நம் கட்டடக் கலையின் சிறப்பைக் காட்டுவதாக இந்தக் கோயில் இருப்பதாகத் தமிழ் அன்பர்களிடம் சொல்லி மகிழ்ந்தேன்.
கடந்த 1998ஆம் ஆண்டும் 2000ஆம் ஆண்டும், முதலில் மாவீரர் நாள் நிகழ்வுக்காகவும், பிறகு ஒரு கல்வி மாநாட்டுக்ககவும் ஐரோப்பா சென்றிருந்தேன். அந்தப் பயணம் முழுவதிலும் என்னோடு இருந்தவர் ‘சர்வே’ எனப்படும் அன்பர் சர்வேசுவரன். மார்க்குசு பிறந்த திரையர் இல்லம், இடிக்கப்பட்ட பெருலின் சுவர் எல்லா இடத்துக்கும் அவர்தான் என்னை அழைத்துச் சென்றார்.
பாரிசு நகரத்தில் சர்வேயிடம் “கோயிலுக்குப் போகலாமா?” என்று கேட்ட போது “அண்ணா போக விரும்பினால் போகலாமே!” என்றார். ஒரு மாலை நேரம் பனிப் பொழிவிற்கிடையில் ஒரு சிவன் கோயிலில் நின்றோம். “அண்ணா, நாங்கள் யாருக்கும் சொல்ல மாட்டோம், நீங்கள் கும்பிட்டுக்கலாம்” என்று சிரித்தார். “டேய் தம்பி, அண்ணா கோயிலுக்கு வந்ததைப் படம் எடு, தமிழ்நாட்டுக்கு அனுப்போணும்” என்று பகடி செய்தார். சிறிய கோயில்தான், சுற்றிப் பார்த்தேன். இறையன்பர்கள் வழிபாடு செய்து உண்டியலில் காணிக்கை செலுத்திக் கொண்டிருந்தார்கள்.
“உண்டியலில் சேரும் காசு முழுவதும் தமிழர் மறுவாழ்வுக் கழகத்துக்குப் போய் விடும்” என்று சர்வே எனக்குச் சொன்னார். மக்களுக்கும் இது தெரியும் என்றார். அவர் பல முறை என்னிடம் சொன்ன ஒரு செய்தியை ஈண்டு பதிய வேண்டும். “மக்களிடம் எதைச் சொல்லிக் காசு தண்டுகிறோமோ, அந்தக் காசை அந்த நோக்கத்துக்குத்தான் பயன்படுத்த வேண்டும், வேறு எதற்கும் பயன்படுத்தக் கூடாது, இது தலைவர் கட்டளை” என்றார்.
கோயில் நிருவாகியை எனக்கு அவர் அறிமுகம் செய்த போது உண்மையிலேயே வியப்பாய் இருந்தது. அவர் ஒரு கிறித்தவர் என்பது பெயரிலேயே தெரிந்தது. “இது எப்படி?” என்று கேட்காமல் கேட்ட என் வியப்புக் குறியைப் புரிந்து கொண்டு சர்வே சொன்னார்:
“இவர் கிறித்தவர்தான், ஆனால் சிவன் கோயிலை முறையாக நிருவாகம் செய்கிறார்.”
“யார் இவரை இந்தப் பணியில் அமர்த்தியது?”
“தலைவர்தான்.”
பாரிசு நகர சிவன் கோயிலைப் பரிபாலனம் செய்ய ஒரு கிறித்தவரைத் தாயகத்திலிருந்து தலைவர் பிரபாகரன் அமர்த்துகிறார், அதை அந்தச் சைவ பக்தர்களும் ஏற்றுக் கொள்கிறார்கள். இதுதான் குடியாட்சிய உலகியல் (சனநாயக சமயச் சார்பின்மை). ஈழத் தமிழ் மக்களின் இந்தப் பண்பு இன்னும் விரிந்த அளவில் வெளிப்பட்ட ஒன்றே! சைவர்களாகிய அவர்கள் சாமுவேல் சேம்சு வேலுப்பிள்ளை செல்வநாயகம் என்ற கிறித்தவரைத் தேசத் தந்தையாக ஏற்றுக் கொண்டவர்கள் அல்லவா?
இந்துக் கோயிலுக்கு இந்துதான் அருச்சகராக வேண்டும் என்று சொன்னால் அதில் நியாயமுண்டு. ஆனால் இந்துதான் அறங்காவலராக வேண்டும் என்ற கட்டாயமில்லை. அறங்காவலரின் பணி இறையியல் சார்ந்தது அன்று, அது உலகியல் சார்ந்தது. திராவிட இயலுக்கு இந்தப் புரிதல் இருந்தால் சேகர்பாபு போன்ற பார்ப்பனிய அடிமையை இந்தப் பணிக்குத் தேர்வு செய்ய வேண்டியிருக்காது.
அனைத்துச் சாதியினரும் அருச்சகராதல், தமிழ் வழிபாட்டு மொழி ஆகிய முகன்மையான சமூகநீதித் திட்டங்களில் சேகர்பாபு வகையறாக்களின் அலட்சியத்தால் ஏற்பட்டுள்ள சேதம் கண்கூடான ஒன்று.
இந்து அறநிலையத் துறை எதற்காகத் தொடங்கப்பெற்றது? என்பதே சேகர்பாபுவின் நடவடிக்கைகளால் குழம்பிக் கிடக்கிறது. இதுதான் வாய்ப்பென்று கோயில்களை இந்துத்துவ அரசியல் தளங்களாக மற்ற ஆர்எசுஎசு வரிந்து கட்டி வேலை செய்கிறது. இந்து அறநிலையத் துறையின் பொறுப்பில் இருக்கும் கோயில்களை இந்துக்களிடமே கொடுத்து விடு என்று எச்சு. இராசா போன்ற இந்துத்துவ வெறியர்கள் கூக்குரலிடுகின்றார்கள். இந்த வாய்ப்பைப் பயன்படுத்தி இந்துக் கோயில்களைப் பார்ப்பனர்களும் பார்ப்பனியர்களும் கைப்பற்றத் துடிக்கின்றார்கள். நிருவாகத்தில் சமூகநீதியை மாய்த்து சாதி ஆளுகையை நிறுவிக் கோயில்களைக் கொள்ளைக் கூடாரங்களாக மாற்றுவதே அவர்களின் நோக்கம்.
சில நாள் முன்பு (தாழி 207) குமாரபாளையம் அருகே (சேலம் மாவட்டம் சங்ககிரி வட்டம்) கத்தேரி வட்டமலை அருள்மிகு வேலாயுதசுவாமி ஆலயம் மீட்புக் குழுவினரின் போராட்டம் பற்றி எழுதியிருந்தேன். இந்தக் கோயில் நிருவாகத்தில் இதுகாறும் அருந்ததியர், நாடார் உட்பட அனைத்துச் சாதியினரும் இடம்பெற்றிருந்தார்கள். இதை மாற்றி ஒரு சமுதாயத்தைச் சேர்ந்த ஒரு குடும்பத்தினர் மட்டும் இடம் பெறுவதற்கான முயற்சிகள் ஊழல் அரசியல்வாதி ஒருவரின் துணையோடு நடைபெற்று வந்தன. இதைக் கண்டித்து சென்ற 10.06.2023இல் நடைபெற்ற பெருந்திரள் ஆர்ப்பாட்டத்தில் நானும் தோழர் ப.பா. மோகன் முதலானோருடன் கலந்து கொண்டேன்.
ஆனால் மக்கள் கருத்துக்கு மதிப்பளிக்காமல் ஒரே சமுதாயத்தைச் சேர்ந்த மூன்று பேரைப் பரம்பரைசாரா அறங்காவலர்களாக அமர்த்தி இந்து அறநிலையத் துறை ஆணையிட்டுள்ளது. மக்கள் கொதித்துப் போயுள்ளனர். அவர்கள் தொடர்ந்து போராட உறுதி ஏற்றுள்ளனர். தமிழ்நாட்டில் பல இடங்களில் ஒலிக்கும் வினா வட்டமலையிலும் மோதி எதிரொலிக்கிறது: இது மு.க. தாலினுக்குத் தெரியுமா?
(தொடரும்)
தோழர் தியாகு
தாழி மடல் 222
26 August 2023 அகரமுதல
(தோழர் தியாகு எழுதுகிறார் 190 : மணிப்பூர் ஒலிக்கும் எச்சரிக்கை மணி!- தொடர்ச்சி)
இந்து அறநிலையத் துறையா? இந்துத்துவ சேவைத் துறையா?
நான் இறைமறுப்பாளன். சமய மறுப்பாளன். ஆனால் தமிழ்த் தேசிய விடுதலை இயக்கம் இறைமறுப்பு, சமயமறுப்பு இயக்கமன்று. அதே போல் இறைநம்பிக்கைக்கான இயக்கமும் அன்று. தமிழர்களில் பல சமயத்தவர் இருப்பது மெய். சமய மறுப்பாளர்களும் உள்ளனர். சமய விடுமை என்பது ச்மய மறுப்பு விடுமையும் அடங்கலானது. பொது அமைதிக்கும் பொது ஒழுங்குக்கும் உட்பட்டு சமயத்தைக் காட்டிக்கொள்ளவும் கடைப்பிடிக்கவும் சமயத்தைப் பரப்பவுமான விடுமையே சமய விடுமை ஆகும். இதுவே சமய மறுப்பு விடுமைக்கும் பொருந்தும். சமய மறுப்பைக் காட்டிக் கொள்ளவும் கடைப்பிடிக்கவும் பரப்பவும் விடுமை உண்டு.
சமயம் அல்லது சமய மறுப்பை அரசிலோ அரசியலிலோ கலக்கக் கூடாது என்பதுதான் சமயச் சார்பின்மை [SECULARISM] எனப்படும் உலகியல். சமய வழிபாட்டில் அல்லது சமய நிறுவனங்களில் சொத்துச் சிக்கல் போன்ற உலகியல் செய்திகள் தொடர்புற்றிருக்கும் நேர்வுகளில் மட்டுமே அரசு தலையிட வேண்டும். தேவையான நேரத்தில் தலையிடவும் வேண்டும். காட்டாக, சமயத்தின் பெயரால் ஒரு சிறு கும்பல் மக்களின் சொத்தை வன்பறிப்பு செய்யுமானால் அரசு தலையிட வேண்டும். சமய உரிமையின் பெயரால் ஒருசில சமுதாயங்களுக்குக் கோயில் நுழைவு அல்லது தெரு நுழைவு மறுக்கப்படுமானால் அரசும் அரசியல் ஆற்றல்களும் தலையிடத்தான் வேண்டும். கருவறை நுழைவும் இப்படித்தான்.
இந்தியாவில், குறிப்பாகத் தமிழ்நாட்டில் பல பெரிய கோயில்கள் மன்னராட்சிக் காலத்திலிருந்தே சில மேல்சாதி நிலக்கிழார்களின் பிடியில் இருந்தன. இவை பார்ப்பனர்களின் பண்பாட்டுக் கோட்டைகளாகவும் விளங்கின. நான் பிறந்த திருவாரூரில் தியாகராசர் கோயில் வி.எசு. தியாகராச முதலியாரின் தலைமையிலான அறக்கட்டளை அல்லது அறங்காவலர் குழுவின் ஆட்சிப் பொறுப்பில் இருந்தது. இந்தக் கோயிலுக்கு ஓராயிரம் வேலி நன்செய் நிலம் இருந்தது. வேலி என்றால் 20 மா. ஆறு மா சற்றொப்ப ஒரு ஏக்கர் வரும் என நினைக்கிறேன்.
தியாகராச சாமிக்கு ஆயிரம் வேலியும், அதே பெயர் கொண்ட ஆசாமிக்கு 1,001 வேலியும் இருந்ததாம். ஆசாமி ஒரு வேலியைச் சாமிக்கு எழுதி வைத்து விட்டாராம். ஆனால் மொத்தம் 2.001 வேலியும் ஆசாமியின் ஆளுகையில் நீடித்ததாம். கோயில் நிலங்களில் குத்தகை சாகுபடி செய்தவர்களின் பாதுகாப்புக்காகவும் உரிமைகளுக்காகவும் செவ்வியக்கம் பல போராட்டங்களை நடத்தியது வரலாறு. அதே செவ்வியக்கத் தலைவர்கள் சிலர் கோயில் அறங்காவலர்களாகி குத்தகை சாகுபடியாளர்களை வஞ்சித்த நேர்வுகளும் உண்டு.
சைவ வைணவக் கோயில்களின் பெயரில் பெரும் நிலச்சொத்துகள் இருப்பதையும், இவற்றைப் பரம்பரை அறங்காவலர்களோ மடாதிபதிகள் அல்லது ஆதீனகர்த்தர்களோ ஆண்டு அனுபவித்து வருவதையும் மன்னராட்சிகள் காலங்காலமாய்ப் பாதுகாத்து வந்தன. சாதிய-நிலக்கிழாரிய அமைப்பின் ஒரு முகன்மைக் கூறாக இந்தக் கோயில் சொத்துடைமை ஆட்சி அமைந்திருந்தது.
பிரித்தானியக் குடியேற்ற(காலனி)ஆதிக்கம் கிழக்கிந்தியக் கும்பினியின் வடிவில் தொடங்கிய போது இந்த கோயில் சொத்துடைமையின் மீது வெள்ளையர் ஒரு கண் வைக்கலாயினர். ஒரு புறம் அவர்களின் வரித் தண்டல் கொள்ளைக்கும், மறுபுறம் வணிக அங்காடி வளர்ச்சிக்கும் கோயில் சொத்துடைமையை ஓரளவு கட்டுக்குள் கொண்டுவர நினைத்தனர். 1810, 1817 ஆண்டுகளில் கிழக்கிந்தியக் கும்பினி இந்துக் கோயில்களின் ஆட்சியில் தலையிடுவதற்கான சட்டங்கள் இயற்றியது.
பல வகையிலும் எதிர்ப்புக் கிளம்பியதால் 1841க்குப் பின் அரசு பின்னடித்தது. 1857 சிப்பாய்க் கலகம் என்று அழைக்கப்பட்ட முதல் இந்திய விடுதலைப் போருக்குப் பின் கிழக்கிந்தியக் கும்பினியின் ஆட்சியை மாற்றி பிரித்தானிய முடியரசே 1858 விக்குடோரியா சாற்றுரை வழியாக தன் நேரடி ஆட்சியை நிறுவிய பின் குறுநில மனனர்கள், நிலக் கிழார்களின் ஆளுகையில் தலையிடாமைக் கொள்கையை மேற்கொண்டது. அறமற்ற அறங்காவலர்களை அவிழ்த்து விட்டாற்போலாயிற்று. அவர்கள் கோயில் நிதியையும் நகைகளையும் விருப்பம் போல் கொள்ளையடித்தனர். கோயில் நிலங்களைக் குறைந்த விலைக்கு விற்றும் குத்தகைக்கு விட்டும் ஆதாயமடைந்தனர்.
“சிவன் சொத்து குலநாசம்” போன்ற அச்சுறுத்தல்களுக்கு யார் அஞ்சினாலும் அறங்காவலர்களும் அருச்சகர்களும் அஞ்சுவதில்லை. நிதி ஆதாரமில்லமல் பல கோயில்களில் பூசைகள் நின்று போயின. இறையன்பர்களே இப்போது அரசுத் தலையீட்டைக் கோரினர். 1863இல் இசுலாமிய நிறுவனங்கள் உட்பட இந்து சமயக் கோயில்களின் ஆட்சியில் தலையிடுவதற்கான அறநிலையச் சட்டம் போடப்பட்டது. இது தயங்கித் தயங்கிச் செய்த ஒரு தொடக்கம் மட்டுமே.
இரட்டையாட்சி முறைப்படி சென்னை மாகாணத்தில் நீதிக் கட்சி ஆட்சியமைத்த பிறகுதான் 1925ஆம் ஆண்டு பனகல் அரசர் ஆட்சியில் இந்து சமய அறநிலைய வாரியம் அமைக்கப்பட்டது. சில மாற்றங்களுடன் 1926ஆம் ஆண்டு செட்டம்பர் 17ஆம் நாள் மதராசு இந்து சமயம் அறநிலையச் சட்டம், 1927 என்ற சட்டம் வரையப்பெற்றது. இதன்படி ஒரு தலைவரையும் மூன்று உறுப்பினர்களையும் கொண்டதாக வாரியம் அமைக்கப்பட்டது. இவ்வாரியத்தின் கீழ் நிருவாக அதிகாரிகள் அமர்த்தப்பட்டனர்.
இந்திய விடுமை (சுதந்திரம்) என்ற அதிகாரக் கைமாற்றத்துக்குப் பிறகு ஓய்வுபெற்ற நீதியர் பி. வெங்கட்ரமணராவு(நாயுடு) தலைமையில் அறுவர் கொண்ட குழுவின் அறிக்கையின்படி மதராசு இந்து சமயம்-அறநிலையச் சட்டம், 1959 நிறைவேற்றப்பட்டது. இதன்மூலம் அறநிலைய வாரியங்கள் மாற்றப்பட்டு அறநிலையத் துறை உருவானது. இதன்படி, அறங்காவலர்களால் இயற்றப்படும் தீர்மானங்களை அரசால் நியமனம் செய்யப்பட்ட நிருவாக அதிகாரிகள் அனுமதியைப் பெற்று நடைமுறைப்படுத்துவார்கள்.
இப்படிப் பிறந்ததே தமிழக அரசின் இந்து அறநிலையத் துறை. இது சமயச் சார்பற்ற அரசமைப்புச் சட்டத்துக்கு உட்பட்டதே தவிர, இந்து சமய ஆகம விதிகளுக்கு உட்பட்டதன்று. இஃது உலகியல் நிறுவனமே தவிர சமய நிறுவனம் அன்று. கோயில்கள் கொள்ளைக் கூடாரங்களாக மாற்றப்படுவதைத் தடுப்பதுதான் அதன் கடமையே தவிர இந்துத்துவ நிகழ் நிரலைச் செய்து முடிப்பதன்று.
இதையெல்லாம் இப்போது யாருக்கு நினைவுபடுத்துகிறோம்? தமிழக அரசுக்குத்தான்! குறிப்பாக அறநிலையத் துறை அமைச்சர் சேகர்பாபு அவர்களுக்குத்தான்! பார்ப்பானை விஞ்சிய பார்ப்பனாக இருப்பதுதான் இந்து அறநிலையத் துறை அமைச்சருக்குரிய தகுதி என்று அவர் எண்ணிக் கொள்வார் போலும்! இந்துத்துவ நிகழ்நிரலின் படி கோசாலை அமைத்தால் போதாதென்று கோமாதா கோமியம் கழிக்கும் பின்பக்கம் நின்று தீபாராதனையும் காட்டி வழிபாடு செய்கிறார்.
அரிசனங்கள் கோயிலில் நுழையக் கூடாது என்று கோயில் வாசலில் அறிவிப்புப் பலகை தொங்கிய ஒரு காலத்தில், பி. பரமேசுவரன் என்ற ‘அரிசன்’ ஒருவரையே இந்து அறநிலையத் துறை அமைச்சராக்கிக் கோயில் நிர்வாகத்துக்குப் பொறுப்பாக்கியதோடு, அவருக்குப் பார்ப்பனப் பூசாரிகளே பூரண கும்ப மரியாதை தர வேண்டிய கட்டாயத்தையும் ஏற்படுத்தியவர் அன்றைய முதலமைச்ச்சர் காமராசர்.
சேகர்பாபுவின் பொறுப்பில் இந்து அறநிலையத்துறை எப்படிச் செயல்படுகிறது என்பதில் முதலமைச்சர் சற்றே கவனம் செலுத்த வேண்டுமெனக் கோருகிறேன். அமைச்சரவைக் கூட்டுப் பொறுப்பு என்ற நெறிப்படி சேகர்பாபுவின் நடவடிக்கைகள் தமிழக அரசுக்கும், அதன் திராவிடக் கொள்கைகளுக்கும் பெருங்கேடாகிக் கொண்டிருப்பதை விரைவில் உணர்ந்தால் நல்லது.
சாதி வெறி சமய வெறி அரசியலின் கோட்டை கொத்தளங்களாகத் தமிழ்நாட்டுப் பெருங்கோயில்களும் சிறு கோயில்களும் மாற்றப்பட்டு வருகின்றன. தமிழக அரசு இப்போதாவது விழித்துக் கொள்ள வேண்டும்.
(தொடரும்)
தோழர் தியாகு
தாழி மடல் 221
25 August 2023 அகரமுதல
(தோழர் தியாகு எழுதுகிறார் 189 : மணிப்பூர் வன்முறையை நிறுத்துக!-தொடர்ச்சி)
| மணிப்பூர் ஒலிக்கும் எச்சரிக்கை மணி! மணிப்பூர் என்றதும் எனக்கு வரக்கூடிய சில நினைவுகள்: 1) மணிப்பூரில் இந்தியப் படை இழைத்த வன்கொடுமைகளை எதிர்த்து நடந்த அந்தப் போராட்டம்; படை முகாமுக்கு எதிரில் ஒரு பத்துப் பெண்கள் ஆடை களைந்து வரிசையாக நின்று “INDIAN ARMY RAPE US” (இந்தியப் படையே! எங்களை வன்புணர்வு செய்!) என்ற பதாகை தாங்கி நின்றார்களே, அந்தப் போராட்டம்! 2) இந்தியப் படையை மணிப்பூரிலிருந்து வெளியேறக் கோரி இரோம் சருமிளா நடத்திய அந்த நீண்ட நெடிய பட்டினிப் போராட்டம். அந்தப் போராட்டம் தன் கோரிக்கையில் வெற்றி பெறவில்லை என்றாலும் ஆய்தப் படைகள் சிறப்பதிகாரச் சட்டம் (AFSPA) போன்ற கொடுஞ்சட்டங்களையும், இந்தியப் படையின் கொடிய தன்மையையும் உலகின் பார்வையில் தோலுரித்துக் காட்ட உதவியது. இரோம் சருமிளாவின் போராட்டம் முடிந்த விதம் அந்த நீண்ட போராட்டத்துக்குப் பெருமை சேர்ப்பதாக அமையவில்லை என்ற குறை எனக்குண்டு. 3) குடியேற்ற( காலனி)ஆதிக்கக் காலத்தில் மணிப்பூர் குறுநில அரசாக (சுதேச சமத்தானமாக) இருந்தது. அஃது இந்தியாவில் இணைக்கப்பட்டது எப்படி? என்பதை மும்பை உயர்நீதிமன்ற முன்னாள் நீதியர், மாந்தவுரிமைவுப் போராளி திரு ஓசுபெட்டு சுரேசு சொல்வார்: அதிகாரக் கைமாற்றத்துக்காக இந்தியாவுடனும் பாகித்தானுடனும் பிரித்தானிய அரசு செய்து கொண்ட உடன்படிக்கையின் படி சமத்தானம் ஒவ்வொன்றும் தன் வருங்காலம் குறித்து மூன்றிலொரு முடிவு எடுக்கலாம்: (1) இந்தியாவுடன் இணைந்து கொள்ளலாம், அல்லது (2) பாகித்தானுடன் இணைந்து கொள்ளலாம், அல்லது (3) தனியரசாகத் தொடரலாம். மணிப்பூர் எந்த முடிவும் எடுக்காமலிருந்த போது மணிப்பூர் அரசரை இந்திய உள்துறை அமைச்சர் வல்லபாய் படேல் பேச்சுவார்த்தைக்கு அழைத்தாராம். தில்லி வந்த மன்னரிடம் இந்திய அரசு இணைப்பு ஒப்பந்தத்தை நீட்டிக் கையொப்பம் இடச் சொன்னதாம்! இட்டால் பதவி, பணம், பகட்டோடு வாழலாம்; மறுத்தால் திகார் சிறைக்குப் போகலாம் என்று அச்சுறுத்தினார்களாம். மன்னரும் மணிப்பூரை இணைத்து விட்டு ஊர் திரும்பினாராம். எச். சுரேசு சொல்வார்: “நாளைக்கே மணிப்பூரில் சுதந்திர வாக்கெடுப்பு நடத்தினால், மணிப்பூர் இந்தியாவில் இருக்காது.” ++ நேற்றைய மடலில் மணிப்பூர் தொடர்பாக நானும் வழிமொழிந்துள்ள ஒரு வேண்டுகோள் அறிக்கையை (மணிப்பூர் வன்முறையை நிறுத்துக!) வெளியிட்டிருந்தேன். மணிப்பூர் வன்முறையில் பாரதிய சனதாக் கட்சிக்கும், இந்திய ஒன்றிய அரசுக்கும், மணிப்பூர் மாநில அரசுக்கும், மணிப்பூர் நீதிமன்றத்துக்கும் முகன்மைப் பங்கு உண்டு என்று சொல்லியிருந்தேன்: 1) 2023 ஏப்பிரல் 27ஆம் நாள் மணிப்பூர் உயர் நீதிமன்றத்தின் இடைக்காலத் தலைமை நீதியர் எம்.வி. முரளிதரன் வழங்கிய தீர்ப்புதான் முதலில் கலகத்தைத் தூண்டியது. மைத்தி சமுதாயத்தை அட்டவணைப் பழங்குடியாக வகைபடுத்த இந்திய அரசுக்கு மாநில அரசு பரிந்துரை வழங்க நான்கு மாத அவகாசம் கொடுப்பதுதான் இந்தத் தீர்ப்பு. இது தவறான தீர்ப்பு என்று உச்ச நீதிமன்றமே கூறியுள்ளது. இந்தத் தீர்ப்பை வழங்கிய நீதியர் முரளிதரன் தமிழ்நாட்டுக்காரர். மைத்தி சமுதாயத்தைப் பழங்குடி அட்டவணையில் சேர்ப்பது ஏற்கெனவே அந்த அட்டவணையில் இடம்பெற்றுள்ள குக்கி, சோ ஆகிய சமுதாயங்களின் உரிமைகளை, முகன்மையாக நிலவுரிமைகளை அச்சுறுத்துவதாக இருக்கும். இது இனமோதல் ஏற்படத் தூண்டுதலாக அமைந்து விட்டது. 2) மைத்தி சமுதாயத்தையும் குக்கி (+சோ) சமுதாயத்தையும் ஒன்றுடன் ஒன்று மோதவிட்டு அரசியல் ஆதாயம் தேடுவது பாசகவின் முயற்சி. மறு புறம் பழங்குடிகளின் நிலவுரிமைகளைப் பறிப்பது இந்திய அரசின் புதுத்தாராளியக் கொள்கைக்குத் தேவைப்படுகிறது. பழங்குடி மக்களை “வெளியார்” என்றும் “வந்தேறிகள்” என்றும் “சட்டப்புறம்பானவர்கள்” என்றும் சொல்லி நிலவெளியேற்றம் செய்யும் முயற்சிகளை இந்த ஆண்டு சனவரி மாதமே பிரேன் சிங்கு தலைமையிலான மணிப்பூர் மாநில அரசு தொடங்கி விட்டது. இந்தப் பின்னணியில் குக்கிகளிடையே எழுந்த பதற்றத்தையும் அச்சத்தையும் உயர்நீதிமன்றத் தீர்ப்பு மோசமாக்கி விட்டது. 3) மேத் திங்கள் முழுக்க மணிப்பூர் குட்டி (உ)ருவாண்டா போலவே மாறிப் போயிற்று. மைத்தி சமுதாய மக்களும் குக்கி சமுதாய மக்களும் மூர்க்கமாக மோதிக் கொண்டனர். படுகொலைகளும் பாலியல் வன்கொடுமைகளும் நிகழ்ந்தன. வழிபாட்டுக் கூடங்கள் தாக்கி அழிக்கப்பட்டன. காவல்துறையும் பிற ஆய்தப் படைகளும் இந்தக் குற்றங்களைத் தடுக்காமல் வேடிக்கை பார்த்தன என்று சொல்வது குறைக்கூற்றே ஆகும். ஏனென்றால் இரு தரப்புக்கும் காவல்துறையே ஆய்தங்கள் வழங்கிற்று. ஆங்கில இந்து நாளேடு சூன் 5 திங்கள் கிழமை இதழில் விசைத்தா சிங்கு எழுதிய செய்திக் கட்டுரை வந்துள்ளது. மணிப்பூரில் சூறையாடப்பட்ட காவல்துறை ஆய்தங்களில் 18% திருப்பித் தரப்பட்டதாக இதில் சொல்லப்பட்டுள்ளது. மே 3ஆம் நாள் மோதல் வெடித்த நாளில் சற்றொப்ப 1,600 ஆய்தங்கள் பறித்துச் செல்லப்பட்டன. உள்துறை அமைச்சர் அமித்துசா மணிப்பூர் செல்லவிருந்த போது மே 27-28இல் 2,557 ஆயதங்கள் சூறையாடப்பட்டன. பெரும்பாலான ஆயதங்கள் பள்ளத்தாக்குப் பகுதியிலுள்ள காவல் நிலையங்களிலிருந்தும் ஆய்தச் சாலைகளிலிருந்தும் சூறையாடப்பட்டன. சூறையாடப்பட்ட ஆய்தவகைகளை வரிசைப்படுத்திய பின் இந்து செய்திக் கட்டுரை சொல்கிறது: “A senior government official said on condition of anonymity that most weapons were given away to groups belonging to the same community as those deployed in the police camps. In some cases, the weapons were taken away after huge mobs gheraoed police camps.” இந்தச் செய்தியை மீண்டும் படித்துப் பாருங்கள். பெரும்பாலான ஆய்தங்கள் சூறையாடப்படவில்லை. அவை காவல் முகாம்களிலிருந்து வாரி வழங்கப்பட்டன. முகாம்களில் மைத்திக் காவலர்கள் இருந்தால் மைத்திக்களுக்கும் குக்கி காவலர்கள் இருந்தால் குக்கிகளுக்கும் வாரி வழங்கப்பட்டன. அவர்கள் ஒருவரை ஒருவர் கொலையும், பாலியல் வன்கொடுமையும் செய்து கொள்வதற்காக வழங்கப்பட்டன. மே மாதம் முழுக்க மணிப்பூர் பெருந்திரள் கொலைக் களமாக மாறிப் போனதற்கு ஆய்தங்களை வாரி வழங்கியதே காரணம். இந்திய அரசும் மாநில அரசும் – இரண்டும் பாசக அரசுகள் – முடிவெடுக்காமல் இது நிகழ்ந்திருக்க முடியவே முடியாது. மணிப்பூர் அரசின் பாதுகாப்பு அறிவுரைஞர் குல்தீப்பு சிங்கு சொன்னதாக இந்து மேற்கோள் காட்டுகிறது, பல பகுதிகளில் ஆய்தங்களை ஒப்படைக்கும் படி மக்களுக்கு எடுத்துச் சொல்ல அரசியல்வாதிகள் கூடுதல் அவகாசம் கேட்டார்களாம். அரசுக்குச் சொந்தமான ஆய்தங்களை வன்முறைக் கும்பல்களிடம் வழங்கச் சொன்னதோடு, திருப்பிக் கொடுக்கச் சொல்லவும் அவகாசம் கேட்கின்றார்கள் இந்த அரசியல்வாதிகள் என்றால், மணிப்பூரில் நடந்த மூர்க்க வன்முறைக்கு இந்த அரசியல்வாதிகள்தானே பொறுப்பு? ஆடுகளை மோத விட்டுக் குருதி குடிக்கும் ஓநாய்கள்! மணிப்பூர் மைத்திகளிடம் ஆயுதங்களை களையக் கூடாது என்று இந்துத்துவ மைத்திக் குழுக்கள் தில்லியில் நடத்தியுள்ள ஆர்ப்பாட்டம் மணிப்பூர் வன்முறை தொடர வேண்டும் என்ற இந்துத்துவ அக்கறையின் இன்னொரு வெளிப்பாடே ஆகும். மணிப்பூர் வன்முறையால் பழங்குடி மக்கள் ஏதிலியாக்கபடுவதன் விளைவுகள் மணிப்பூருக்கு வெளியே மிசோரம், நாகாலாந்து போன்ற வடகிழக்கு தேசங்களிலும் எதிரடித்து வருகின்றன. ஆர்எசுஎசு பாசக கும்பல் மக்களைப் பிரித்து மோத விட்டு அரசியல் ஆதாயம் ஈட்ட எந்த அளவுக்குச் செல்லும் என்பதையே மணிப்பூர் நிகழ்ச்சிகள் உணர்த்துகின்றன. ஆர்எசுஎசு – பாசக பாசிசக் கும்பல் தனது அரசியல் ஆதாயத்துக்காக மாந்த உயிர்கள் பலியாவதைப் பற்றியோ குமுக அமைதி கெடுவதைப் பற்றியோ கிஞ்சிற்றும் கவலைப்படுவதில்லை. தமிழ்நாட்டில் இதெல்லாம் நடக்காது என்று நம்பி உறங்கிக் கொண்டிருந்தால் விழிக்கும் போது எதுவும் மிஞ்சியிருக்காது |
| (தொடரும்) தோழர் தியாகு தாழி மடல் 219 |
