work in the day, write in the night: பகல் உழைப்பு; இரவில் எழுத்து!

பகல் உழைப்பு; இரவில் எழுத்து!

ந.ஜீவா

First Published : 02 Oct 2011 12:00:00 AM IST

நாகர்கோவில். வடசேரி பகுதி. வீடுகளுக்கு கேஸ் சிலிண்டர்களை டெலிவரி செய்கிறார் லட்சுமணன். மாலை வரை கடும் உடல் உழைப்பு. இரவில் கோதை கிராமத்தில் உள்ள வீட்டையடைந்ததும் சாப்பிட்டுவிட்டு எல்லாரும் படுத்துவிடுகிறார்கள். ஆனால் லட்சுமணனின் உலகம் அப்போது விழித்துக் கொள்கிறது. இரவின் ஆழ்ந்த அமைதியில் லட்சுமணன் எழுதத் தொடங்குகிறார்.ஆம். லட்சுமணன் ஒரு படைப்பாளி. இதுவரை 16 சிறுவர் நூல்களை எழுதியிருக்கிறார்.2006 ஆம் ஆண்டில் "குமரி மாவட்ட நூலகக் கூட்டமைப்புக் குழு' நடத்திய இலக்கியப் போட்டியில் இவருடைய "விலங்குகள் கூறும் விசித்திரக் கதைகள்' என்ற நூல் இரண்டாம் பரிசைப் பெற்றது.""நான் என் 13 வயதிலேயே எழுத ஆரம்பித்துவிட்டேன். அப்போது நான் கடும் முருக பக்தன். அப்பா என்னிடம் ஒரு வள்ளலாரின் படத்தைக் கொடுத்தார். அவர் வாய் பேச முடியாதவர். நான் வள்ளலாரை வணங்க வேண்டும் என்பது அவர் விருப்பம். எனக்கோ முருகனைத் தாண்டி வேறு தெய்வமில்லை. அப்போது என் மாமா என்னிடம் வள்ளலாரின் வாழ்க்கை வரலாற்றுப் புத்தகம் ஒன்றைப் படிக்கக் கொடுத்தார். புத்தகத்தைப் படித்த பிறகு என் மனது மாறிவிட்டது. தொடர்ந்து திருவருட்பாவைப் படித்தேன். அதன் விளைவாக அந்த வயதிலேயே  பாடல்கள் எழுத ஆரம்பித்தேன்.எங்கள் பகுதியில் இருந்து "குமரி முரசு' என்ற இதழ் வந்து கொண்டிருக்கிறது. அதில் கண்ணன் என்கிற பெயரில் அதற்குப் பின்பு சிறுகதைகள் எழுத ஆரம்பித்தேன். அதில் எனது தொடர்கதையும் வெளிவந்தது. உலகம்மா, கோதை சிவகண்ணன் ஆகிய புனை பெயர்களில் "பாக்யா' இதழில் எனது சிறுகதைகள் வெளிவந்திருக்கின்றன'' என்ற அவரிடம், ""கடுமையான உடல் உழைப்பில் ஈடுபடும் நீங்கள் எழுதுவதை எப்படி உணர்கிறீர்கள்?'' என்று கேட்டோம்.""என்னுடைய மனதிருப்திக்காக எழுதுகிறேன். புத்துணர்ச்சி பெறுவதற்காக எழுதுகிறேன். என் மாதிரி உடல் உழைப்புச் செய்பவருக்கு உடல் வலி அதிகமாக இருக்கும். எனக்கு உடல் வலியுடன் கூட மனதில் வலியும் அதிகமாக இருக்கும். கேஸ் சிலிண்டர் டெலிவரி செய்பவரை மனிதனாகக் கூட  சில வீடுகளில் மதிக்கமாட்டார்கள். அந்த மன வலிகளை மறக்கவும் எழுதுகிறேன்'' என்கிறார்.""இப்போது குழந்தைகள் படிக்கும் பழக்கம் குறைவாக இருக்கிறது. ஆங்கில வழியில் படிக்கிறார்கள். அவர்கள் எங்கே தமிழ்ப் புத்தகங்களைப் படிக்கப் போகிறார்கள் என்ற ஐயம் பரவலாக உள்ளது. ஆனாலும் எங்கள் மாவட்டத்தில் 70 சதவீதம் பேர் தமிழ் வழியில்தான் படிக்கிறார்கள். எனவே குழந்தை நூல்களுக்கு வரவேற்பு இருக்கவே செய்கிறது.ஒருமுறை என் நண்பர் ஒருவர் மதுரைக்குப் போய்விட்டு வந்தார். வந்ததும் என்னிடம் ஒரு தகவலைச் சொன்னார். மதுரையில் பேருந்து ஒன்றில் ஒருவர் என் புத்தகத்தைப் படித்துக் கொண்டிருந்தாராம். அதைப் பார்த்து நம் ஊர் ஆள் எழுதிய புத்தகத்தை ஒருவர் வாங்கிப் படிக்கிறார் என்று நினைத்துச் சந்தோஷப்பட்டதை என்னிடம் சொன்னார். அதைக் கேட்டு நான் ரொம்பவும் மகிழ்ச்சியடைந்தேன்'' என்கிறார் நெகிழ்வுடன்.

shortest girl : உல​கின் குள்​ள​மான பெண்

உல​கின் குள்​ள​மான பெண்

First Published : 02 Oct 2011 12:00:00 AM IST

அமெரிக்க நாட்டைச் சேர்ந்த ஜோர்தான் (22) உலகின் மிகச் சிறிய பெண்ணாக கின்னஸ் சாதனைப் பட்டியலில் இடம் பிடித்துள்ளார். இவரின் உயரம் 2.3 அடி ஆகும். இவரின் சகோதரர் 3.2 அடி உயரம் உள்ளார். இவர்கள் இருவரும் உலகின் குள்ளமான உடன்பிறப்புகள் என்ற மற்றொரு சாதனையையும் படைத்துள்ளனர். ""குள்ளமாக இருப்பதால் நான் மிகவும் சந்தோஷமாக இருக்கிறேன்''என்கிறார் ஜோர்தான். இந்தியாவின் நாக்பூரில் உள்ள ஜோதி என்ற 2 அடி உயரப் பெண்தான் "உலகின் மிகச்சிறிய இளம் பெண்' என்று அங்கீகரிக்கப்பட்டுள்ளார். ஜோதிக்கு 18 வயது ஆனவுடன் ஜோர்தானின் சாதனையை முறியடிப்பார் என்பது குறிப்பிடத்தக்கது.

வாழ்வு தந்த வாய் வித்தை!

வாழ்வு தந்த வாய்ஜாலம்!

வே.சுந்தரேஸ்வரன் படம்: கே.டி.ராமகிருஷ்ணன்

First Published : 02 Oct 2011 12:00:00 AM IST

"முதலீடு இல்லை என்பது மூடத்தனம், கைவிரல்கள் பத்தும் மூலதனம்' என்று  தன்னம்பிக்கை ஏற்படுத்த சொல்வதுண்டு. இதை உணர்ந்ததால்தான், மாற்றுத் திறனாளியாக இருந்தாலும், தனக்கிருக்கும் குறையை நினைத்து நொந்துவிடாமல், குரலை மூலதனமாகக் கொண்டு வாழ்வில் வெற்றிநடை போடுகிறார் ஈ.கே.டி.செந்தில்குமார் என்ற "மிமிக்ரி' செந்தில்!சிறு வயதிலேயே இளம்பிள்ளை வாத நோயால் பாதிக்கப்பட்டாலும், தன்னுடைய குரலின் பக்கபலத்தால் மேடைகளில் பல்சுவை நிகழ்ச்சிகள் மூலம் பல குரல்களில் பேசி அசத்தி வருகிறார் இவர்.அண்மையில் தில்லியில் பல்சுவை கலை நிகழ்ச்சி ஒன்றை நடத்துவதற்காக வந்திருந்த "மிமிக்ரி' செந்திலிடம் பேசினோம். ""திருத்தணி அருகே உள்ள பொதட்டூர்பேட்டைதான் எங்க ஊர். அப்பா பள்ளித் தலைமையாசிரியர். சிறு வயதிலேயே இளம்பிள்ளைவாதத்தால் எனது கால்கள் முடங்கிப் போயின.அதன்பிறகு தீவிர பயிற்சியும், முயற்சியும் செய்ததால் நடக்க ஆரம்பித்தேன். பள்ளிப் படிப்புக்குப் பிறகு பாலிடெக்னிக் கல்லூரியில் படித்தேன். 1996-ம் ஆண்டில், கல்லூரி ஆண்டு விழாவில் முதல் முறையாக பலகுரலில் பேசினேன். அதற்கு ஏகோபித்த வரவேற்பு கிடைத்தது. இது எனக்கு ஊக்கம் அளித்ததாகவே உணர்ந்தேன். தொடர்ந்து குரல் பயிற்சியில் ஈடுபட்டு நடிகர்கள், விலங்குகள், பறவைகள், மோட்டார் வாகனங்களின் சப்தம் ஆகியவற்றைப் பேசினேன்.லஷ்மண்-ஸ்ருதி இசைக் குழுவில் 6 ஆண்டுகள் மிமிக்ரி ஆர்டிஸ்டாகப் பணியாற்றினேன். பல குரலில் பேசத் தொடங்கி 1996-ம்ஆண்டிலேயே 105 குரல்களில் பேசினேன். தற்போது 450 குரல்களில் பேசி வருகிறேன்.பழைய நடிகர்களின் குரல்களில் பேசியே இன்னும் பலர் நிகழ்ச்சி நடத்தி வருகின்றனர். தற்காலப் போக்குக்கு ஏற்ப புதுக் குரல்களில், பிரபலமான குரல்களில் பேசும்போது பொதுமக்களிடம் நல்லதொரு வரவேற்பு கிடைக்கிறது.இதுதவிர, ராஜ் டி.வி.யில் 6 ஆண்டுகளாக நிகழ்ச்சி தொகுப்பாளராக உள்ளேன். மேலும் "டெலி காமெடி', "கொக்கரக்கோ', "தினம், தினம்', "ஆள்பாதி ரீல் பாதி' போன்ற நிகழ்ச்சிகளில் பங்கேற்று வருகிறேன். எம்.ஜி.ஆர்., கலைஞர், அஜித், விஜய் போன்ற குரல்களில் பேசுவதை மக்கள் அதிகம் ரசிக்கின்றனர்.எனது கலைச் சேவையைப் பாராட்டி 2000-ம் ஆண்டில் தமிழ்நாடு அரசின் "கலைமாமணி' விருது கிடைத்தது. தொடர்ந்து பல விருதுகள் பல்வேறு அமைப்புகளால் கிடைத்தன.2010-ம் ஆண்டில் தமிழ்நாடு மாற்றுத் திறனாளிகள் அரசுத் துறை சார்பில் "சிறந்த பணியாளர் விருது' கிடைத்தது. தொடர்ந்து மூன்று மணிநேரம் பலகுரல் நிகழ்ச்சியை தனி நபராக இருந்து நடத்திய அனுபவமும் உண்டு."வாய்ஜாலம்' என்ற பெயரில் கலைக் குழுவை 2006-ஆம் ஆண்டில் ஆரம்பித்தேன். நகைச்சுவை நடிகர்கள் அல்வா வாசு, போண்டா மணி, பெஞ்சுமன், "மேடை எம்ஜிஆர்' தியாகராஜன் உள்பட 25 பேர் எனது குழுவில் உள்ளனர்.வெளிநாட்டிலும் நிகழ்ச்சி நடத்தியிருக்கிறோம். இதுவரை 6,500 மேடைகளில் நிகழ்ச்சி நடத்தியுள்ளேன். ஊனத்தையே சவாலாக எடுத்துக்கொண்டு குரலை நம்பிக் களத்தில் இறங்கினேன். அதற்கு இன்றைக்கு நல்ல பலனும் கிடைத்துள்ளது..''என்றார் அவரின் நிஜக் குரலில்!