news article லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
news article லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

ஞாயிறு, 23 அக்டோபர், 2011

அதிகப் பணக்காரர்களை உருவாக்கிய பொருளியல் கொள்கைகள்

  திரு இராமலிங்கம்  போராட்டச் சிக்கல்களைப் புரியும்படி நன்றாக எழுதியுள்ளார்.  பாராட்டுகள்.

அன்புடன் இலக்குவனார் திருவள்ளுவன் / தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்! /
++++++++++++++++++++++++++++++++++++++++++++++++++++++++++++++++++++++++++
 




நியூயார்க் "வால் ஸ்ட்ரீட்'டில் உள்ள வர்த்தக நடவடிக்கைகளை எதிர்த்த மக்கள் ஆவேசம், ஐரோப்பா, பிரிட்டன் உட்பட பல நாடுகளை ஆட்டுவிக்கிறது.

முன்பு அதிபர் கோர்பசேவ்' பின்பற்றிய"பிரஸ்டோரிகா' என்ற தாராளக் கொள்கையால், சோவியத் யூனியன் கரைந்ததும் கம்யூனிசம் என்ற வார்த்தைக்கு மவுசு குறைந்ததும் வரலாறு. அவர்களும் பொருளாதார தாராளமயக் கொள்கைக்கு ஆட்பட்டு வருகின்றனர்.காபிடலிசத்துக்கு எதிராக... ஆனால்,"காபிடலிசம்' என்ற முதலாளித்துவ தத்துவம் தற்போது இப்போராட்டங்களால் பெரிய கேள்விக்குறியாகி வருகிறது."காபிடலிசம்' என்ற வார்த்தைக்கு எதிராக மக்கள் ஆர்ப்பரித்து எழவில்லையே தவிர, பணக்கார நாடுகளில் வங்கிகள் நடைமுறை மற்றும் அரசு கையாளும் நிதிநிலை நடைமுறைகளை மக்கள் எதிர்க்கின்றனர்.சமூக சீர்திருத்தம் என்ற பெயரில் நிதித்துறை சீர்திருத்தச் சட்டங்கள் அல்லது நடைமுறைகள் மக்களை ஏழையாக்கிவிட்டன என்ற அடிப்படைக் கொந்தளிப்பு, இப்போராட்டங்களின் மையமாக இருக்கிறது.நியூயார்க் நகரில், லண்டனில், ரோம் ஆகிய நகர்களில் மக்கள் ஆர்ப்பாட்டம் நடத்துவது தொடர்கதையாகி விட்டது.அமெரிக்க நெருக்கடியின் மையம்: அமெரிக்காவில் அதிபர் ஒபாமாவை நோக்கி இப்போது மக்கள் எழுப்பும் கேள்வி "பணக்காரர்கள் மற்றும் ஏழைகளுக்கு இடையே இடைவெளி அதிகரிக்கக் காரணம் என்ன?' என்பதே.

வித்தியாசமாக வாஷிங்டன் ஸ்குயர் பூங்காவில் ஆர்ப்பாட்டம் செய்த மாணவர்கள், "படிக்க வாங்கிய வங்கிக் கடனை நாங்கள் எப்படி திருப்பிக் கட்டுவது, எங்களுக்கு வேலைவாய்ப்பு இனி கிடைக்குமா, அது எங்கே?' என்று கோஷம் எழுப்பினர். இது தான் இன்று அமெரிக்கா சந்திக்கும் பெரிய பொருளாதார நெருக்கடியின் அடிப்படையாகும்.அமெரிக்காவும் ஐரோப்பாவும்: ஆனால், அமெரிக்கா ஒன்றும் ஐரோப்பிய நாடுகள் அல்ல. அமெரிக்கா என்பது பல்வேறு மாகாணங்கள் கொண்ட கூட்டமைப்பு. ஒரே கரன்சியான "டாலர்' மற்றும் ஒரே மாதிரியான நிதிக்கொள்கை கொண்ட பலமான நாடு.ஐரோப்பாவில் உள்ள நாடுகளில் ஜெர்மனியும், பிரான்சும் சற்று பலமானவை. பொருளாதார நெருக்கடியில் கிரீஸ் சிக்கி நொறுங்குகிறது; இத்தாலி தவிக்கிறது. இந்த ஐரோப்பிய யூனியனை காக்க, ஒரே கரன்சியான "யூரோ' என்பது அமெரிக்க டாலர் போல பாதுகாக்கப்பட்ட கரன்சி அல்ல. இந்த வித்தியாசத்தை சுட்டிக்காட்டிய பொருளாதார அறிஞர் ஸ்டிக்லிட்ஸ், "அமெரிக்கா போல அல்ல ஐரோப்பிய நாடுகள். பொருளாதாரச் சுமை அந்த நாடுகளை வாட்டும்' என்கிறார்.

மக்களின் கருத்துக்கள்:இந்தப் பிரச்னையை அதிக ஜனநாயகம் காக்கும் பிரிட்டன் மக்கள் வெளிப்படையாகவே விமர்சிக்கின்றனர். லண்டனில் நடந்த ஆர்ப்பாட்டத்தில்,"வங்கிகள் அடிக்கும் கொள்ளை அதிகம். அதில் சம்பந்தப்படாத நாங்கள், மக்கள் தொகையில் 99 சதவீதம் பேர். நாங்கள் எதற்கு வங்கிகள் சந்திக்கும் நிதிநெருக்கடியை ஏற்க வேண்டும்' என்று, சிலர் தெரிவித்தனர். ஜெர்மனியின் பெர்லின் நகரில் நடந்த ஆர்ப்பாட்டத்தில், ஒருவர், "நம்நாட்டில் நிதித்துறை செயல்படும் விதம் தார்மீகமற்றது. நஷ்டமடைந்த வங்கிகளை அரசு மீட்கக் கூடாது. கடன் சுமையில் வாழும் மக்களை காப்பாற்றுங்கள்' என்று கூறினார்.ரோமில் நடந்த ஆர்ப்பாட்டத்தில் ஒருவர், "எங்கள் எதிர்காலமே இருண்டிருக்கிறது. இனிமேல் எங்களுக்கு பென்ஷன் கிடைக்காது. கடைசி மூச்சுவரை உழைத்து ஓடாகிச் சாக வேண்டும்' என்று கூறியுள்ளார்.

மாயத் தோற்றம்:
வேறுவிதமாகச் சொன்னால், அமெரிக்க மக்கள் எழுப்பும் கேள்வி இது தான். "சம்பாதித்து வரிகட்டும் மக்கள் பணத்தை, நலிவடைந்த ஆட்டோமொபைல் நிறுவனங்கள், திவாலான வங்கிகளைக் காக்க பயன்படுத்த வேண்டுமா, அதுவா அரசின் முன்னுரிமை?' என்று கேட்கின்றனர். இது உலகம் முழுவதும் இன்று எழுப்பப்படும் கேள்வி. ரஷ்யாவின் நிலை வேறு. கடந்த ஐந்தாண்டுகளில் கச்சா எண்ணெய் விலை உயர்வால், அதன் தள்ளாட்டமான பொருளாதாரம் சற்று மேலோங்கி, தினசரி வாழ்வுக்கு வசதியாக வாழ வழிவகுக்கிறது. ஆனால், "ஓகோ' என்ற நிலை வருவது அவ்வளவு சுலபமல்ல.கடந்த சில ஆண்டுகளாக, வளர்ச்சியைப் போல மாயத்தோற்றம் காட்டிய "காபிடலிசம்' இன்று, சிலரைக் கொழு த்த பணக்காரர்கள் ஆக்கியதே தவிர, ஏழைகளின் எண்ணிக்கையை அதிகரித்து விட்டது. அது தான் அரசுகளை எதிர்த்து, உலகின் பல நாடுகளில் ஆர்ப்பாட்டங்கள் அதிகரிக்கக் காரணம்.இதற்கு அந்தந்த நாடுகள் உள்ளூர் நிர்வாக, நிதி அம்சங்களின் அடிப்படையில் தீர்வு காண முயற்சிக்கின்றன.

அமெரிக்க துடைப்பம் :நியூயார்க்கில் உள்ள ஜார்டென் கம்பெனி, துடைப்பம் தயாரிக்கும் நிறுவனம். மீன்பிடி கருவிகள், கூடாரங்கள் அமைக்க உதவும் கயிறுகளையும் தயாரிக்கிறது இந்த நிறுவனம்.இந்த நிறுவனம், தனக்குத் தேவையான பல பொருட்களை, சீனாவில் இருந்து ஓரளவு தயார் செய்த நிலையில், வாங்குவதை இதுவரை வாடிக்கையாகக் கொண்டிருந்தது. அமெரிக்காவை விட, குறைந்த கூலியில் சீனாவில் இத்தயாரிப்புகள் செய்யப்படும். அமெரிக்கப் பொருளாதாரச் சரிவு காரணமாக, சீனாவிலும் பாதிப்பு ஏற்பட்டது. அதனால், இத்தயாரிப்பு பொருட்கள் மீது, விலையை உயர்த்தியது சீனா.அமெரிக்காவிலேயே, சற்று செலவு குறைவாக, இப்பொருட்கள் முழுவதுமாகத் தயாரிக்க வேண்டும் என்ற முனைப்பில், "அமெரிக்கத் தயாரிப்பாகவே இருக்கட்டும்' என்ற நடைமுறையை, தற்போது ஏற்படுத்தி விட்டது இந்த நிறுவனம்.சீனாவுக்கு, இனி ஆர்டர் தரப் போவதில்லை. இதனால், செலவு மிச்சமாகும் என்கிறது ஜார்டென் நிறுவனம். இது, அமெரிக்கப் பொருளாதாரப் பாதிப்பில் ஏற்பட்ட விளைவுக்கு, ஓர் அடையாளம்.

நீதிபதிகள் தலை வழுக்கையை இனி பார்க்க முடியும் :பிரிட்டனின் பொருளாதாரச் சுமை அதிகம். அங்கே, அதன் விளைவாகப் பல சிக்கனத் திட்டங்கள் அமலாகின்றன. பிரிட்டனின் அங்கமான அயர்லாந்தில், நூற்றுக்கணக்கான ஆண்டுகளாக உள்ள நடைமுறை, சிக்கனச் சீரமைப்பு என்ற பெயரில் மாற்றப்பட்டிருக்கிறது.பிரிட்டிஷ் கோர்ட் நடைமுறைகளின்படி, நீதிபதிகள் வெள்ளை நிறத்தில் உள்ள "விக்' அணிய வேண்டும். கழுத்து வரை அங்கிபோல, சுருள் சுருளாக அமைந்த இந்த "விக்' குதிரை வாலில் உள்ள முடியில் இருந்து தயாரிக்கப்படுவது.லண்டனில் உள்ள நிறுவனம் தயாரிக்கும், இந்த "விக்' ஒன்றின் விலை, ரூபாய் மதிப்பில் 1.48 லட்சம் ஆகும் ( யூரோ கரன்சியில் 2200 ஆகும்). அயர்லாந்து அரசுக்கு, இந்த தண்டச் செலவு இனி கிடையாது. கி.பி.1660 முதல் நீதிபதிகளுக்கான அதிகாரப்பூர்வ ஆடை வடிவமைப்பில், இந்த "விக்' முக்கியமாக இருந்தது. அயர்லாந்தின் முதலாவது பெண் தலைமை நீதிபதி சுசான் டென்ஹம், இந்த "விக்' நடைமுறையை ஒழித்து உத்தரவிட்டிருக்கிறார். இனி, நீதிபதி தலை வழுக்கையைக் கூட, சாதாரணமாக அனைவரும் காணலாம். அதே போல, நீதிபதியை வழக்கறிஞர்கள் இனி "ஜட்ஜ் அவர்களே' என்றழைத்தால் போதும், "மைலார்டு' என்ற ஆடம்பரச் சொல் கிடையாது. பொருளாதார வறட்சி, எத்தனை மாற்றத்தைக் கொண்டு வருகிறது பாருங்கள்!
- எம். ஆர்.இராமலிங்கம் -
மேலும் உலகம் செய்திகள்:

ஞாயிறு, 16 அக்டோபர், 2011

உன் "மை' யாருக்கு? உண்மைக்கே!

உன் "மை' யாருக்கு? உண்மைக்கே!

First Published : 16 Oct 2011 04:37:25 AM IST


சென்னை, அக்.15: பிரசார சத்தம் சனிக்கிழமையோடு ஓய்ந்தது. வாக்குப்பதிவு திங்கள்கிழமை. இடையில் ஓர் நாள். உங்கள் பொன்னான வாக்கை யாருக்கு என்பதை முடிவு செய்யும் முன் இதைப் படியுங்கள்:சம்பவம் 1: எழும்பூர் பகுதியில் ஒருவர் பிரியாணி கடை வைத்திருந்தார். அந்தப் பகுதி கவுன்சிலருக்குப் பிறந்த நாள். கடைக்காரர் அமைதியாக இருக்காமல் கவுன்சிலருக்கு வாழ்த்துத் தெரிவிக்கச் சென்றார். போகும்போது சும்மா போகக்கூடாதே என்று குறிப்பிட்டத் தொகையைக் கவுன்சிலருக்குக் கொடுத்துள்ளார். கடைக்காரரிடம் கவுன்சிலர் கேட்ட முதல் கேள்வி. "உன் ஒரு நாள் வருமானம் எவ்வளவு?' கடைக்காரர் வெளிப்படையாக வருமானத்தைச் சொல்லியிருக்கிறார். கவுன்சிலர் உடனே போட்ட உத்தரவு மாதம் ஒரு குறிப்பிட்ட தொகை தரவேண்டும் என்று. கடைக்காரர் தர மறுத்தார். கவுன்சிலரும் விடாமல் தொந்தரவு கொடுத்தார். அப்படியொரு கடையை அப்படியொருவர் வைத்திருந்தார் என்கிற சுவடே பின்னர் இல்லாமல் போனது.சம்பவம் 2: ஒரு முட்டுச் சந்தின் கடைசி வீடு. அதைத் தாண்டி யாரும் போகப்போவதில்லை. வீட்டு வாசலில் குடும்பத்தினர் புதிதாக கார் வாங்கி நிறுத்தியிருந்தனர். இதையெல்லாம் கவனித்துச் சொல்வதற்கென்றே பகுதியில் கவுன்சிலர் ஆள்கள் வைத்திருப்பார்களோ என்னவோ, நேராக அந்த வீட்டிற்கு வந்தார் கவுன்சிலர். போக்குவரத்துக்கு தொந்தரவாக இப்படி நிறுத்த என் பகுதியில் அனுமதிக்கவே மாட்டேன் என்று ஒரே கத்தல். வீட்டுக்காரர் என்னென்வோ முயற்சித்துப் பார்த்தார். முடியவில்லை. மாதம் ஒரு தொகை தண்டத்திற்கு அழுதார். இப்படிப்பட்டவர்கள் தேர்ந்தெடுக்கப்படாமல் இருக்க சில யோசனைகள்:* வாக்களிக்கும் முன்பு, தங்கள் பகுதியில் போட்டியிடும் வேட்பாளர்கள் பற்றி முழுமையாக அறிந்து கொள்ள வேண்டும். ஒரு செல்போன் வாங்கும்போதே பல நாள் யோசித்து, பல ஆலோசனைகள் பெற்று வாங்குகிறோம். நமது பிரதிநிதியைத் தேர்ந்தெடுக்க யோசிக்க வேண்டாமா?* மலையைப் பெயர்த்து உங்களுக்குத் தருவேன். ஆகாயத்தைச் சுருட்டித் தருவேன் என்று யார் வேண்டுமானாலும் வாக்களிக்கலாம். ஆனால் அதை அவர்களால் நிறைவேற்ற முடியுமா? நிறைவேற்றித் தருவார்களா? என்று ஆராய்ந்து பார்த்து வாங்களியுங்கள்.* நீங்கள் சார்ந்த கட்சியேகூட தவறான வேட்பாளரை நிறுத்தியிருந்தால் அவரைப் புறக்கணியுங்கள். கட்சி மனநிலை என்பது கைவிலங்கு அணிந்திருப்பது போல் இருக்கக்கூடாது. கட்சிக்கு அப்பாற்பட்டு பொதுநல அக்கறை உள்ளவரைத் தேர்ந்தெடுங்கள்.* ஏற்கெனவே கவுன்சிலர்களாக உள்ளவர்தான் வேட்பாளராக நிற்கிறார் என்றால் அவர் பணியை முழுமையாய் ஆராய்ந்து பாருங்கள். கடந்த காலங்களில் அவர் கொடுத்த வாக்குறுதிகளையெல்லாம் நிச்சயம் நீங்கள் மறந்திருப்பீர்கள் என்று அதே வாக்குறுதிகளையே மீண்டும் அளித்திருக்கூடும். நீங்கள் விழிப்போடு உள்ளீர்கள் என்பதை வாக்குகளில் தெரியப்படுத்துங்கள். * சோழியன் குடுமி சும்மா ஆடாது என்பது பழமொழி. வாக்களிப்பதற்குப் பரிசு தருகிறார்கள் என்றாலே உஷாராகி விடுங்கள். உங்களுக்கு சோளப்பொரியைக் கொடுத்துவிட்டு சோளக்காட்டை எழுதி வாங்கப் பார்க்கின்றனர் என்று புரிந்துகொள்ளுங்கள். * பரீட்சைக்கு கடைசி சில நாள்களில் மட்டும் விழுந்து விழுந்து படிக்கும் மாணவர்களைப் பார்த்திருப்பீர்கள். அதைப்போல கடைசி சில மாதங்களில் மட்டும் தெருதெருவாக குப்பையை எடுத்து நடித்திருப்பார்கள். அவர்களையும் புறம் தள்ளுங்கள்.

சனி, 15 அக்டோபர், 2011

மெய்யாலுமா...?

மெய்யாலுமா...?

First Published : 15 Oct 2011 01:31:11 AM IST


அரசு தேர்வாணையத்தின் தேர்வு முறைதான் கண்துடைப்பு என்கிற குற்றச்சாட்டு இருக்கிறது என்றால், இப்போது தேர்வாணைய உறுப்பினர்களின் வீட்டில் நடந்த ஊழல் கண்காணிப்புத் துறையின் அதிரடி சோதனைகளும் கண்துடைப்புதான் என்று பரவலாகக் கூறப்படுகிறது. வெள்ளிக்கிழமை காலையில் சோதனை நடைபெறப் போவதாகவும், முக்கியமான தகவல்களைப் பத்திரப்படுத்தும்படியும், தேவையான தஸ்தாவேஜுகளையும், தொலைபேசி எண்கள் போன்ற அன்றாடத் தேவைகளையும் பாதுகாத்துக் கொள்ளும்படியும் வியாழக்கிழமை மாலை நான்கு மணிக்குக் கூட்டம்போட்டு உறுப்பினர்களை எச்சரித்துவிட்டார் தலைவர் என்று சொல்கிறார்கள்.  ÷இந்த அதிரடி சோதனை கண்துடைப்பு என்பதற்கு இன்னொரு காரணமும் கூறப்படுகிறது. இதெல்லாம் "தும்பை விட்டு வாலைப் பிடிக்கும் கதைதானே சாமி' என்று தேர்வாணையத்தின் கடைநிலை ஊழியர் ஒருவர் அங்கலாய்த்தார்.  ÷தேர்வாணையத்தில் நடந்த அத்தனை குளறுபடிகளுக்கும், முறைகேடுகளுக்கும் காரணமாவனர் தொடர்ந்து ஏழு வருடங்கள் பதவியில் தொடர்ந்த முன்னாள் செயலர். அவரோ "மீனே மீனே மீனம்மா' - என்று ஜாலியாகப் பாட்டுப் பாடியபடி வலம்வந்து கொண்டிருக்கிறார். முறைகேடுகளுக்குக் காரணமான முந்தைய தலைவர் காசியில் இருக்கிறாரா, ராமேஸ்வரத்தில் இருக்கிறாரா என்றுகூடத் தெரியாது. இந்த நிலையில் புதிதாக வந்தவர்கள் வீட்டில் சோதனை போட்டால், தேர்வாணைய முறைகேடுகள் எப்படித் தெரியவரும் என்று எழுப்பப்படும் கேள்வியில் நியாயம் இருக்கிறதுதானே?  ÷அதிகாரிகள் ஒன்றுக்கொன்றாகி ஒருவரை ஒருவர் காப்பாற்றிக் கொள்வதில் ஒற்றுமை நிலவுவதாகவும், ஆட்சி மாற்றத்தால் நடத்தப்படும் எல்லா சோதனைகளும் கண்துடைப்பு சோதனைகள்தான் என்றும் சொல்லப்படுகிறதே, மெய்யாலுமா...?    சாதாரணமாக ஜீன்ஸ் பேண்டும், டீ ஷர்ட்டுமாக குடும்பத்துடன் லட்சத் தீவுகளுக்கும், வெளிநாடுகளுக்கும் விடுமுறையைக் கழிக்கப் பயணமாகும் "நார்த் பிளாக்' நாயகன், இப்போதெல்லாம் கேஷத்திராடனத்தில் இறங்கிவிட்டது பலரை வியப்பிலாழ்த்தி இருக்கிறது. அதுமட்டுமல்ல, பார்க்காத ஜோசியர் இல்லை, போகாத பரிகாரத் தலங்களில்லை என்று கிரகங்களை நம்பத் தொடங்கிவிட்டாரே பொருளாதார மேதை என்று அவரது ஆதரவாளர்களே ஆச்சரியத்தில் சமைந்து விட்டிருக்கிறார்கள்.  ÷சனிப்பெயர்ச்சியால் 2ஜி தன்னைப் பிடித்துக்கொண்டு விட்டதோ என்று சனி பகவானுக்குப் பரிகாரம் செய்யக் கிளம்பி விட்டிருக்கிறாரோ என்று நினைத்தால் தவறு. இதில் சிதம்பர ரகசியம் எதுவும் கிடையாதாம். இவருக்கு எதிராகத் தொடுக்கப்பட்டிருக்கும் மக்களவைத் தேர்தல் வழக்கின் தீர்ப்பு விரைவில் வெளிவர இருக்கிறதாம். அது பாதகமாகப் போய்விட்டால் என்ன செய்வது என்கிற கவலைதான், கார்ப்பரேட் நிறுவனங்களையும் நீதிமன்றங்களையும் மட்டுமே பற்றிக் கவலைப்பட்டுக் கொண்டிருந்தவரைக் கடவுளைப் பற்றியும் நினைக்க வைத்திருக்கிறது என்கிறார்கள். மெய்யாலுமா...?    தேர்தல் வழக்கு என்று சொன்னதும், வழக்குத் தொடுத்தவர் பற்றிய ஒரு செய்தி. ஒன்றன் பின் ஒன்றாக வந்த தேர்தல் தோல்விகளால் துவண்டு விடவில்லை அந்த 63 நாயன்மார்களில் ஒருவர் பெயர் கொண்ட அந்த முன்னாள் அமைச்சர். அம்மையாரின் முதல் ஐந்தாண்டு ஆட்சியில் மிக அதிகமாக சம்பாதித்து சரித்திரம் படைத்தவர் என்கிற பெருமைக்குரிய இவர், பொதுப்பணியில் மட்டுமல்ல அடுத்தவர்களைக் கவிழ்க்கும் களப்பணியிலும் கெட்டிக்காரர் என்கிறார்கள்.  ÷அதிகார மையத்தின் முக்கியஸ்தர்கள் ஒருவரைத் தனது பணபலத்தால் ராவணனை வாலி தனது வாலால் கட்டிப் போட்டதுபோல இவர் கட்டிப்போட்டிருப்பதாகவும், எப்படியும் மீண்டும் இழந்த இடத்தையும், தொலைத்த பணத்தையும் திரும்பப் பெற்றுவிடுவேன் என்று சபதம் போட்டிருப்பதாகவும் சொல்கிறார்கள். சிவகங்கைச் சீமானுக்கே தண்ணி காட்டியவர் இப்போது குறிவைத்திருப்பது யாருக்குத் தெரியுமா? அம்மாவின் அருளாசியுடன் அமைச்சரவையில் இடம்பெற்றுவிட்ட பெண்மணிக்கு. கண்ணனை மீறிய கோகுலமா என்று கொதிக்கிறாராம் மனிதர்.  ÷"எனக்கு ரெண்டு கண்ணும் போனாலும் பரவாயில்லை, அவளை ஓரம் கட்டி ஒழித்துக் கட்டாமல் விடப்போவதில்லை. அதற்காக எனது சொத்தெல்லாம் அழிந்தாலும் பரவாயில்லை'' என்று நெருங்கிய நண்பர்களிடம் சூளுரைத்திருக்கிறாராம்.  ÷பாவம் அந்த அம்மணி. "அண்ணா' என்று அழைத்துப் பார்த்தார். நகர்ப்புறத்துக்கு அம்மாவால் நகர்த்தவும் செய்யப்பட்டார். பயனில்லை. இப்போது, என்ன செய்வாரோ, எப்படி காயை நகர்த்துவாரோ என்கிற பயத்திலேயே உலவுகிறாராம் அம்மணி. "அம்மா என்னைக் கைவிட்டுவிட மாட்டார்' என்கிற நம்பிக்கையில் உழன்று கொண்டிருப்பவருக்குத் தெரியாது அவருக்கு எதிராக ஒரு கூட்டணி வளர்ந்து வருவது.  ÷ஆயிரம் வாட்ஸ் விளக்கின் வெளிச்சத்தில் பார்த்தாலும் தெரியாத அளவுக்கு ரகசியமாகக் கண்ணும் கண்ணும் வைத்தாற்போல வளர்கிறதாம் மதியாலோசனை, மன்னிக்கவும், சதியாலோசனை. என்னுடைய இடத்தில் இன்னொருத்தியா என்று அவரும், எனக்கு எதிராகப் பெண்ணொருத்தியா என்று இவரும் கைகோத்துச் செயல்படுகிறார்களாமே, மெய்யாலுமா...?    மாவீரன், அஞ்சாநெஞ்சன் என்றெல்லாம் பெயர் வைத்துக் கொண்டவர்கள் ஆட்சியில் இருந்தால்தான் அந்தப் பெயருக்கு ஏற்றபடி நடந்துகொள்கிறார்கள். மதுரைக்காரரையே எடுத்துக் கொள்வோம். தலைநகர் பக்கம் போவதையோ, தனது அலுவல்களை கவனிப்பதிலோ அக்கறையே இல்லாமல் இருந்தவர், இப்போதெல்லாம் தமிழகத்துக்கு வருவதையே தவிர்க்கிறாராமே, தெரியுமா?  ÷எப்போதாவது காதும் காதும் வைத்தாற்போல வந்து போகிறாரே தவிர, நாலு பேர் பார்ப்பதுபோல நடமாடுவதைக்கூடத் தவிர்க்கிறாராம். அதுமட்டுமா, இவரது தொண்டர் வட்டம், மூடப்பட்ட வழக்குகள் தோண்டப்படுமோ என்று பயந்து தமிழகத்திலிருந்தே எஸ்கேப்பாகித் தலைநகரைத் தஞ்சம் அடைந்திருக்கிறதாமே, மெய்யாலுமா...?    அமைச்சர் மலைவாழ் இனத்தைச் சேர்ந்தவர். குளுகுளு வாசஸ்தலத்தைச் சேர்ந்தவர். ஊட்டியில் விளையும் உருளைக்கிழங்கையும், முட்டைக் கோசையும் எல்லோரும்தான் சாப்பிடுகிறார்கள். ஊட்டிக்காரர்கள் மட்டும்தானா சாப்பிடுகிறார்கள்? அதுபோலத்தானே அமைச்சர்களின் பதவியும்? எல்லோருக்கும் அமைச்சராக இருக்க வேண்டாமோ? தனது சொந்த ஜாதிக்காரர்களுக்கு மட்டும்தான் அமைச்சர் என்று நினைத்துக் கொண்டால் எப்படி?  ÷இவரைப் பற்றி ஒரு ஜோக். யாராவது சிபாரிசுக்கு வந்தால் எஸ்.சி.யா என்று விசாரித்துத் தெரிந்துதான் உதவுகிறாராம். மலைவாழ் இனத்தைச் சேர்ந்த அமைச்சர்கள் எஸ்.டி. அல்லவா, பிறகு ஏன் இவருக்கு எஸ்.சி. மீது கரிசனம் என்று கேட்டுவிடாதீர்கள். எஸ்.சி.என்றால் ஷெட்யூல் கேஸ்ட் (நஸ்ரீட்ங்க்ன்ப்ங்க் ஸ்ரீஹள்ற்ங்) அல்ல. சேம் கேஸ்ட் (நஹம்ங் ஸ்ரீஹள்ற்ங்). இப்போது புரிகிறதா அவரது பரிபாஷை?  ÷ஜாதிப்பற்று இருக்க வேண்டியதுதான். அதற்காக ஒருவர் தனது ஜாதிக்காரர்களுடன்தான் பேசுவது பழகுவது என்றா இருக்க முடியும்? ""இவரோட புத்திபோற போக்கப்பாரு'' என்று கூறி கட்சிக்காரர்களே சிரிக்கிறார்களாமே, மெய்யாலுமா...?    ஆளும் கட்சி சார்பில் சென்னை மாநகராட்சிக்கான தேர்தலில் போட்டியிடும் கவுன்சிலர்கள் அத்தனை பேரும் வெளியில் சொல்ல முடியாமல் ஒருவரை மனதாரத் திட்டுகிறார்கள் என்பது அந்த மனித நேயருக்குத் தெரியாமலா இருக்கும்? அவரிடம் "துரை', "துரை' என்று கெஞ்சிப் பார்த்தும், சாமி, சாமி என்று கும்பிட்டுப் பார்த்தும் எந்தவித பயனுமில்லை என்று குமுறுகிறார்கள் ஆளும்கட்சி வேட்பாளர்கள்.  ÷விஷயம் வேறொன்றுமில்லை. மொத்தம் 200 டிவிஷன்களில் போட்டிபோடும் வேட்பாளர்களைத் தங்களுக்கும் செலவு செய்து கொண்டு அவருக்கும் சேர்த்து இலவசமாகப் பிரசாரம் செய்யச் சொன்னால் அவர்களுக்குக் கோபம் வரத்தானே செய்யும்? வேறு கட்சியாக இருந்தால் ஆட்சிக்கு வந்த பிறகு தண்ணி காட்டலாம். அம்மா கட்சியில் அடக்கித்தானே வாசிக்க வேண்டும்.  ÷அவரிடம் கேட்டால் என்ன சொல்கிறாராம் தெரியுமா? ""இவர்களுக்குக் கொடுக்கத் தொடங்கினால் கொடுத்து மாளாது... கடைசி இரண்டு மூன்று நாள்களில் எதாவது கொடுத்து சமாதானப்படுத்திக்கொண்டு விடலாம்'' என்று சமாளிக்கிறாராம். பலவீனமான முப்பது நாற்பது பேருக்கு மட்டும் ஏதோ கொஞ்சம் கொடுத்துத் தனது வெற்றியை உறுதி செய்துகொள்ள முயற்சிக்கிறாராம்.  ÷""வேட்பாளர்கள் கிடக்கட்டும். ஆளும்கட்சித் தொண்டர்கள் ஆளுக்கு ஆள் காசு, காசு என்று ஆலாய் பறக்கிறார்களே. அவர்களை யார் சமாளிப்பது? இவர் வெறும் கையில் முழம்போட நினைத்தால் நாங்களும், வேட்பாளர்களும் நினைத்தாலும் வட்டமும் பகுதியும் காலைவாரிவிட்டுவிடுமே. கைக்கெட்டியது வாய்க்கெட்டாமல் பெரும்பான்மை பலத்துடன் வெற்றி பெற்றும் அவரை ஜெயிக்க வைக்க முடியாமல் போனால் அம்மாவுக்கு யார் பதில் சொல்வது?'' என்று மாவட்டங்களும் எம்.எல்.ஏ.க்களும் புலம்புகிறார்களாமே, மெய்யாலுமா...?

திங்கள், 3 மே, 2010

எழுதுகோலும் தெய்வம்; எழுத்தும் தெய்வம்



நீங்கள் செய்தித்தாளே இல்லாத அரசை விரும்புவீர்களா? அல்லது அரசே இல்லாத செய்தித்தாள்களையா?'' என அமெரிக்காவின் மூன்றாவது குடியரசுத் தலைவரான தாமஸ் ஜெப்பர்சனிடம் கேட்டபோது,அவர் கூறிய பதில், ""செய்தித் தாள்களையே நான் விரும்புவேன்'' என்பதுதான்.இதழியல் துறை இவ்வாறு, சிறப்பு மிக்க ஓர் இடத்தைப்பெற்று பொது மக்களின் கருத்துகளை உருவாக்கவோ, அழிக்கவோ வல்லதாக வளர்ந்துள்ளது."டையர்னல்' என்ற இலத்தீன் சொல்லிலிருந்து தோன்றிய "ஜர்னலிசம்' என்கிற ஆங்கில வார்த்தையின் தமிழாக்கமே "இதழியல்' என்ற சொல். இதழ் என்பது பத்திரிகை, செய்தித்தாள், தாளிகை என்பனவற்றைக் குறிக்கும். இதழ்களுக்கு குறிப்பாக செய்தித்தாள்களுக்கு எழுதும் தொழில்தான் முதன் முதலில் இதழியல் எனப்பட்டது. இப்போது, செய்திகளையும், கருத்துகளையும் பரப்புகின்ற மக்கள் தொடர்பு நிறுவனமாகவும், சமுதாய விழிப்புணர்வுக்கு மிக இன்றியமையாத கருவியாகவும் வளர்ந்துள்ளது இதழியல். அற அடிப்படையிலும், சட்ட நோக்கிலும் பொறுப்பேற்கும் அமைப்பாகவும் இதழியல் துறை திகழ்கிறது. அறிவியல், தொழில்நுட்ப முன்னேற்றத்தின் விளைவாக இதழ்கள் - செய்தித்தாள்கள் அளவாலும், இயல்பாலும், வகையாலும் நமது அரசியல், பொருளாதார, சமூக வாழ்க்கையில் சிறப்பிடம் பெற்றுள்ளது. இதழ்களின் செல்வாக்குக்கு உள்படாத எந்தத் துறையும் இல்லை என்றே கூறலாம். அந்த அளவுக்கு தற்போது வியக்கத்தக்க வகையில் இதழியல்துறை தனது பார்வையையும், வீச்சையும் பரவலாக்கிக் கொண்டிருக்கிறது.அரசின் கொள்கைகளையும், திட்டங்களையும் மக்களுக்கு எடுத்துச் சொல்வதில் தகவல் தொடர்பு சாதனங்களில் முதலிடம் பெறுவது இதழ்களே. எல்லா நாடுகளிலும் செய்தித் தொடர்புக்குத்தான் இதழ்கள் தோன்றின. செய்திகள் பெருகப் பெருக செய்தித் தொடர்புகளின் எல்லைகள் விரிய விரிய, இதழ்களும் வளர்ச்சி அடைந்தன. ""பத்திரிகைதான் ஒரு நாட்டுச் சுதந்திரத்தின் மிகப்பெரிய காவலாளி'' என லார்ட்கிரேவும், ""பெரும்பாலும் ஒரு நாளிதழ் அறிவிப்பதும் கருதுவதும்தான் வரலாற்றுக்கு மூலப் பொருளாகவும், வரலாற்று ஆசிரியர்களுக்கு மிகவும் மதிப்புடையதாகவும் அமைகிறது'' என பிராங் மோரஸ் என்பவரும் இதழியலின் சிறப்பை வெளிப்படுத்தியுள்ளனர்.""பொதுநோக்குடைய இதழியல் துறை, ஓர் ஆற்றல் மிக்க கருவியாகும். அதன் மூலம்தான் இன்றைய சமுதாயம் அதனுடைய வழிகளை வரையறுக்கப்பட்ட வளரும் மனித நலன் என்னும் குறிக்கோளை நோக்கி முன்னேறி வருகிறது'' என்று ஹெரால்டு பெஞ்ஜமின் என்னும் புகழ்மிக்க அமெரிக்க இதழியல் பேராசிரியர் கூற்று இதழியலுக்கே சிறப்பு சேர்க்கிறது.இதழ்கள் பொறுப்புணர்வோடு செயல்படாவிட்டால் ஏற்படும் கேடுகள் அளவிட முடியாதன. எனவே, இதழியலாளர்கள் மிகுந்த அற உணர்வோடும் சமுதாயப் பொறுப்போடும் செயல்பட வேண்டியது மிக மிக அவசியம் மட்டுமல்ல, காலத்தின் கட்டாயமும் கூட.நாடாளுமன்றம், நிர்வாகத்துறை, நீதித்துறை ஆகிய மூன்று முக்கியத் துறைகளோடு பத்திரிகைத் துறையும் இணைக்கப்பட்டு அரசின் நான்காம் தூணாகக் கருதப்படுகிறது.உண்மையாகவும், நம்பிக்கையாகவும், துல்லியமாகவும் செய்திகளை வெளியிட வேண்டும்; தன்னலம் கருதி செய்திகளைப் பயன்படுத்தக்கூடாது; தெரிந்தே ஒரு பக்கம் சார்ந்து, உண்மைக்குப் புறம்பாகத் தலையங்கம் எழுதுவதோ, செய்திகளுக்குத் தவறான விளக்கங்கள் தருவதோ, விமர்சிப்பதோ கூடாது; நடுநிலைமையோடு செய்திகளை வெளியிட வேண்டும்; செய்தி அறிக்கையும் கருத்துகளின் வெளியீடுகளையும் வேறுபடுத்திக்காட்ட வேண்டும் என்பன பத்திரிகை சுதந்திரத்துக்கான எல்லையாகக் குறிப்பிடப்பட்டுள்ளது.""சட்டத்துக்குப் புறம்பாகப் போகாமல் எதைப் பற்றியும் வெளியிட, விவாதிக்க இதழ்களுக்குக் கட்டுப்பாடற்ற சுதந்திரம் தேவை. மனித இனத்தின் தலையாய உரிமைகளுள் ஒன்று "பத்திரிகை சுதந்திரம்'. தவறு ஏற்பட்டுவிட்டால் திருத்திக்கொள்ளத் தயங்கக்கூடாது. செய்திகளை பண்பு நெறிகளினின்று விலகாமல் வெளியிட வேண்டும். குறிப்பாக வன்முறைகளை, கொலை, கொள்ளை, கற்பழிப்பு முதலிய செய்திகளை வெளியிடுகின்றபோது, வாசகர்களின் விலங்கு உணர்வுகளைத் தூண்டாதவாறு செய்திகளை வெளியிட வேண்டும். இவ்வாறு இதழ்கள் நடுநிலையோடும் அற உணர்வோடும் பொறுப்போடும் செயல்பட வேண்டும்'' என்பவை பத்திரிகைத் தர்மமாகக் கூறப்பட்டுள்ளது.இதழ்களுக்கு எந்த அளவுக்குச் சுதந்திரம் வேண்டுமோ அந்த அளவுக்குச் சுய கட்டுப்பாடும் வேண்டும் என்பதை, ""இதழியலின் ஒரே நோக்கம் தொண்டு செய்வதுதான். பத்திரிகை என்பது மிகப்பெரும் சக்தியாகும். ஆனால், கட்டுப்பாடில்லாத வெள்ளம், நாட்டுப் புறத்தை மூழ்கடித்துப் பயிர்களை வீணாக்குவதைப் போல, கட்டுப் பாடில்லாத பேனா, உருவாக்குவதற்குப் பதிலாக அழித்து விடுகின்றன. கட்டுப்பாடு வெளியிலிருந்து வருவது நஞ்சாக மாறிவிடும். கட்டுப்பாடு உள்ளுக்குள்ளேயே தோன்ற வேண்டும். பத்திரிகைகள் மக்களின் நலன்களைக் காக்கவும் வளர்க்கவும் அரசுக்கு இதழ்கள் தோன்றாத் துணையாகத் திகழ்கின்றன'' என்று மகாத்மா காந்தியடிகள் கூறியுள்ளார். அவர் கூறியுள்ள கருத்துகள் பத்திரிகை சுதந்திரத்தின் எல்லைகளைச் சுட்டிக்காட்டுகின்றன.""பொதுமக்களின் கருத்தை உருவாக்குவதிலும், செப்பனிடுவதிலும், பிரதிபலிப்பதிலும் மக்களாட்சி நடைபெறும் நாட்டில் பத்திரிகை மிகவும் முக்கியமானதாகச் செயல்படுகிறது. பத்திரிகை நமது சமுதாயத்தின் ஆதார நிறுவனமாகும். அரசியல், சமுதாய, பொருளாதார வளர்ச்சிகளைச் சிறப்பாக ஏற்படுத்த அது மிகவும் துணைபுரிகிறது. அரசு செயல்படுவதோடும், அது பின்பற்றும் கொள்கையோடும் நெருக்கமாகத் தொடர்பு கொண்டிருக்கிறது. நமது பொது வாழ்க்கையின் ஒவ்வொரு கூறுபாட்டையும் அது தொடுகின்றது'' என்று மக்களாட்சியில் இதழ்களின் பங்கு குறித்து சிறப்பித்திருக்கும் டி.எஸ்.மேத்தா என்னும் ஆய்வாளர் கூறும் இக்கருத்துகள் என்றும் நினைவு கொள்ளத்தக்கவை.தமிழ் இதழ்களின் வேகமான வளர்ச்சிக்கு இந்தியாவின் உரிமைப்போர், இரு உலகப் பெரும்போர்கள் என மூன்று போர்கள் உறுதுணையாக, ஊக்கிகளாக இருந்தன. உலகப்போர்களின் போதுதான் இதழியல் துறை செழித்து வளர்ந்தது. உரிமைப் போரில் எல்லா இதழ்களும் நல்ல வளர்ச்சியை அடைந்தன. நமது நாட்டின் விடுதலை இயக்கத்துக்குப் பெரும் துணை புரிந்தவை பத்திரிகைகளே. விடுதலை இயக்கத்தை நடத்திய தலைவர்களில் பலர், தங்களது இயக்க வளர்ச்சிக்கு உதவும் வகையில் தாங்களே இதழ்களை நடத்தி வெற்றியும் கண்டுள்ளனர்.""விடுதலைக் கிளர்ச்சியும், தமிழ்ப் பத்திரிகைத் துறையும் சேர்ந்தே வளர்ந்தன; அவை இரட்டைக் குழந்தைகள்'' என்கிறார் ம.பொ.சி.""எமக்குத் தொழில் கவிதை, நாட்டுக்கு உழைத்தல், இமைப்பொழுதும் சோராது இருத்தல்'' என்று வீர முழக்கமிட்டு வாழ்ந்த மகாகவி பாரதியார், ""எழுதுகோலும் தெய்வம்; எழுத்தும் தெய்வம்'' என்று இதழியலுக்கு மணி மகுடம் சூட்டினார்.இதழ்களின் பேராற்றலைப் பாவேந்தர் பாரதிதாசன் புகழ்ந்து பாடியதோடு,""அறிஞர்தம் இதய ஓடைஆழநீர் தன்னை மொண்டுசெறிதரும் மக்கள் எண்ணம்செழுத்திட ஊற்றி ஊற்றிக்குறுகிய செயல்கள் தீர்த்துக்குவலயம் ஓங்கச் செய்வாய்நறுமண இதழ் பெண்ணே! உன்நலம் காணார் ஞாலம் காணார்''என, இதழ்களின் கல்விப் பணியையும் இலக்கிய நயத்தோடு இதழியலை சிறப்பிக்கிறார்."" இந்தியப் பத்திரிகை வரலாறு என்பதே அதனுடைய சுதந்திரத்துக்கான போராட்ட வரலாறுதான்'' எனப் பத்திரிகையாளர் ஆர்.சி.எஸ். சர்க்கார் கூறியுள்ளார்.இதழ்கள் தொடங்கப்பட்ட நாளிலிருந்தே அவற்றை அடக்கவும், ஒடுக்கவும் ஆட்சியாளர்கள் முயல்வதும் தொடர்ந்து நடந்து கொண்டுதான் இருக்கிறது.பத்திரிகை சுதந்திரத்தின் கூறுகளாகக் கொலம்பியா மிசெüரி பல்கலைக்கழகத்தின் தகவல் மையம் கீழ்க்கண்டவற்றை வெளியிட்டுள்ளது. அவை: செய்திகளைப் பெறுவதற்கு உரிமை, முன் கட்டுப்பாடின்றி அச்சிடும் உரிமை, அச்சமோ, அச்சுறுத்தலோ இன்றி அச்சிடும் உரிமை, தகவல் தொடர்புக்கு வேண்டிய வாய்ப்புகளையும், சாதனங்களையும் பெற்றுக்கொள்ளும் உரிமை, அரசோ, மக்களோ தலையிடாமல் செய்திகளைப் பரப்புகின்ற உரிமை போன்றவை பத்திரிகை சுதந்திரமாகக் கருதப்படுகின்றன. ஆனால், இன்றைய சூழ்நிலையில் பத்திரிகைகளுக்கு இப்படிப்பட்ட சுதந்திரம் இருக்கிறதா என்பது சந்தேகம்தான்! நாட்டில், மக்களாட்சியில் நடக்கும் அக்கிரமங்களை துணிந்து வெளியிடமுடிகிறதா? அப்படி வெளியிடும் பத்திரிகை அலுவலகத்துக்குள் அத்துமீறி நுழைந்து சேதப்படுத்துதல், தீ வைத்தல், நிருபர், புகைப்படக்காரர் தாக்கப்படுதல் போன்றவை இன்றும் பல இடங்களில் நடந்துகொண்டுதான் இருக்கின்றன. இன்றைய சூழ்நிலையில், பத்திரிகை சுதந்திரம் பறிபோகும் நிலையில் இருக்கிறது என்பது மறுக்க முடியாத உண்மை.கடந்த ஆண்டில் நிகழ்ந்த ஒரு கொடுமையான நிகழ்வு. பத்திரிகை ஆசிரியர் ஒருவர், தன் வீட்டின் முன் காரில் இருந்து இறங்கும் நேரத்தில் அடையாளம் தெரியாத சிலரால் கண்மூடித்தனமாகத் தாக்கப்பட்டு சம்பவ இடத்திலேயே மரணமடைந்தார். அதுமட்டுமல்ல, 2008-ஆம் ஆண்டில் உலகளவில் நடத்தப்பட்ட கணக்கெடுப்பின்படி, ஆப்பிரிக்காவில் 4, அமெரிக்காவில் 11, ஆசியாவில் 31, ஐரோப்பா மற்றும் மத்திய ஆசியாவில் 9, மத்திய கிழக்கு மற்றும் வடஆப்பிரிக்காவில் 15 என மொத்தம் 70 பத்திரிகையாளர் கொலை செய்யப்பட்டுள்ளனர்.ஆப்பிரிகாவில் 23, அமெரிக்காவில் 24, ஆசியாவில் 52, ஐரோப்பா மற்றும் மத்திய ஆசியாவில் 14, மத்திய கிழக்கு மற்றும் வட ஆப்பிரிக்காவில் 12 என மொத்தம் 125 பத்திரிகையாளர்கள் சிறையில் அடைக்கப்பட்டுள்ளனர். இதுதான் பத்திரிகை சுதந்திரமா? பத்திரிகை சுதந்திரம் என்பது நாட்டுச் சுதந்திரத்தின் நடைபாதை என்றும், பத்திரிகையை மக்களாட்சி முறை என்ற கட்டடத்தின் நான்காவது தூண் என்றும் கூறுவர். அத்தகைய சிறப்புகளைப் பெற்றுள்ள பத்திரிகை, சுதந்திரத்துடன் செயல்பட வேண்டும். அரசின் திட்டங்களில் உள்ள குறைநிறைகளை அச்சமின்றி எடுத்துச் சொல்ல பத்திரிகைச் சுதந்திரம் இன்றியமையாத ஒன்று.பலநாடுகளில் பத்திரிகைகளுக்கு என்று சில உரிமைகளும் சுதந்திரங்களும் அந்தந்த நாட்டு அரசியல் சாசனங்களில் தரப்பட்டுள்ளன. இந்தியாவைப் பொறுத்தவரை, ஏனைய நாடுகளில் பத்திரிகைகளுக்கு வழங்கப்படும் சிறப்பு உரிமைகளை ஒவ்வொரு குடிமகனுக்கும் வழங்குவது என்றும், அதனால் பத்திரிகைகளுக்கு என்று தனி உரிமைகள் தேவையில்லை என்றும் அரசியல் நிர்ணயசபை முடிவெடுத்து, அதன்படி இந்திய அரசமைப்புச் சட்டத்தின் அடிப்படை உரிமைகளாகப் பேச்சுரிமையும், எழுத்துரிமையும் தரப்பட்டுள்ளன.கொள்கைப்படிப்பும், மக்கள் நலனில் அக்கறையும் ஆட்சியாளருக்குக் குறையக்குறைய விமர்சனங்களை ஏற்றுக்கொள்ளும் பக்குவமும் குறைந்துவிடுகிறது. இதன் தொடர் விளைவாக பத்திரிகைகள் புகழ்பாடும் ஒலிபெருக்கிகளாகத் திகழவேண்டும் என்று எதிர்பார்க்கிறார்கள். விமர்சனங்கள் அடக்குமுறைக்கு ஆளாகின்றன. எந்தவொரு ஆட்சியாக இருந்தாலும் அந்த ஆட்சியை நல்லாட்சியாக மாற்றுவது பத்திரிகை விமர்சனங்கள்தான். ஆட்சியின் அவலங்களையும், நிர்வாகக் குளறுபடிகளையும் பத்திரிகைகள் படம்பிடித்துக் காட்டுவை. ஆரோக்கியமான விமர்சனமாக ஓர் அரசு ஏற்றுக்கொண்டு தனது குறைகளைக் களைய முற்படுமேயானால், அந்த ஆட்சி நல்லாட்சியாக மக்கள் மன்றத்தால் எடைபோடப்படும் என்பது ஆட்சியாளர்களுக்குப் புரியாமல் போவது ஆச்சரியம்தான். அதேபோல ஆட்சியாளர்களின் அடிவருடியாக இருந்து அதன்மூலம் தனது வாழ்க்கையை வளப்படுத்திக் கொள்வதன்மூலம், தனது எழுத்துக்கும் வாசகர்களுக்கும் துரோகம் இழைப்பதை சில பத்திரிகையாளர்கள் புரிந்துகொள்ள மறுப்பதும் வியப்பான ஒன்றே!பத்திரிகை சுதந்திர தினமாக மே 3-ஆம் தேதியை யுனெஸ்கோ நிறுவனம் 1993-ஆம் ஆண்டு அறிவித்துள்ளது. பத்திரிகை சுதந்திரதினம் என்றைக்கு என்பதுகூட தெரியாமல் பத்திரிகையில் பணி புரிபவர்கள் பலர் இன்றும் இருக்கத்தான் செய்கின்றனர். இதுதான் வேதனையிலும் வேதனை. இது தொடர்கதை ஆகாமல் இருக்க, ஆண்டுதோறும் பத்திரிகை சுதந்திர தினத்தை அந்தந்த பத்திரிகை அலுவலங்கள் கொண்டாடவேண்டும். சுதந்திரத்துக்காகப் போராடியவர்கள் மட்டுமே தியாகிகள் அல்ல. இந்நாட்டு அரசியல் மற்றும் சமுதாயச் சீர்கேடுகளைச் சுட்டிக்காட்டி அதன்காரணமாக உயிர்த்தியாகம் செய்தவர்களும் சிறை சென்ற, மரணம் அடைந்த பத்திரிகையாளர்களும்கூட தியாகிகள்தான்! (மே 3 - பத்திரிகை சுதந்திர தினம்)
கருத்துக்கள்

உரிய நாளில் வந்துள்ள நல்ல கட்டுரை. எனினும் இலங்கையில்தான் இதழளார்கள் மிகுதியானபேர் கொலைக்கும் சிறைவைப்பிற்கும் ஆளாகியுள்ளனர் என்ற செய்தியைக் குறிப்பிட்டிருக்கலாம். மேற்கோள்களிலும் நல்ல தமிழ்ச் சொற்களையே கையாண்டிருக்கலாம். மக்கள் உரிமை பற்றியும் இதழ்கள் உரிமை பற்றியும் பேசும் பெரும்பாலான இதழ்கள் தங்கள் நிறுவன இதழாளர்களைக் கொத்தடிமைகளாக நடத்தும் அவலங்களையும் குறிப்பிட்டிருக்கலாம்.இதழியல் என்பது இன்று விரிந்து பரந்து பட்ட பொருளில் வழங்கப்படுவதை விளக்கியுள்ள கட்டுரையாளர் இந்நாளைப் பத்திரிகை சுதந்திர தினம் எனக் குறிப்பதைவிட (தான் தெரிவித்ததன் அடிப்படையிலேயே) ஊடக உரிமை நாள் எனக் குறிப்பின் அதுவே பொருத்தமாக இருக்கும்.

அன்புடன் இலக்குவனார் திருவள்ளுவன்

By Ilakkuvanar Thiruvalluvan
5/3/2010 3:46:00 AM
உங்கள் கருத்தைப் பதிவு செய்யுங்கள் *