படிப்பிலும் உயர்வு! அறியாமையிலும் உயர்வா? ஏமாற்றப்படும் பொறி.பட்டத்தினர்

ஐ.டி., நிறுவனங்களில் வேலை ஆசை காட்டி மோசடி: ஏமாறும் பட்டதாரிகள் ஏராளம்

தினமலர்

"பிரபல தகவல் தொழில்நுட்ப நிறுவனங்களில் (ஐ.டி.,) வேலை வாங்கித் தருவதாக, ஆசை வார்த்தைகூறி, பொறியியல் பட்டதாரிகளிடமிருந்து மோசடியாக பணம் பறிக்கும், தனியார் வேலைவாய்ப்பு நிறுவனங்களின் செயல்பாடுகளை, அரசு கண்காணிக்க வேண்டியது அவசியமாகிறது.

விப்ரோ, அசென்ஜர், சி.டி.எஸ்., போன்ற, பிரபல ஐ.டி., நிறுவனங்கள், கல்லூரி வளாகத் தேர்வு மூலம், தங்களுக்குத் தேவையான பணியாளர்களை பெரும்பாலும் தேர்ந்தெடுக்கின்றன. இதில் வாய்ப்புக் கிடைக்காத, பி.இ., - எம்.சி.ஏ., பட்டதாரிகள், தனியார் வேலைவாய்ப்பு நிறுவனங்களையே பெரிதும் நம்பி உள்ளனர்.

மோசடி கும்பல்
சென்னை, கோவை போன்ற பெருநகரங்களில், தகவல் தொழில்நுட்பத் துறை சார்ந்த நூற்றுக்கணக்கான தனியார் வேலைவாய்ப்பு நிறுவனங்கள் இயங்கி வருகின்றன. இவற்றின் மூலம், ஐ.டி., நிறுவனங்களில் வேலை பெறுவோர், தங்களின் ஒரு மாத சம்பளம் அல்லது குறிப்பிட்ட தொகையை சேவைக் கட்டணமாக வழங்குவது வழக்கம்.பணிவாய்ப்பு வழங்கும் நிறுவனங்களிடம் மட்டும், சேவைக் கட்டணம் பெறும் தனியார் வேலைவாய்ப்பு நிறுவனங்களும் உள்ளன. தற்போது, "பிரபல ஐ.டி., நிறுவனங்களில் வேலை' என, "இ-மெயில்' மற்றும் தொலைபேசி மூலம், பொறியியல் பட்டதாரிகளை தொடர்புகொண்டு, பல்லாயிரக்கணக்கில் பண மோசடி செய்யும் தனியார் வேலை வாய்ப்பு நிறுவனங்கள் பெருகி வருகின்றன.

ஆசை வார்த்தை...
இது குறித்து, சென்னை, சைதாப்பேட்டையைச் சேர்ந்த பொறியியல் பட்டதாரி ஒருவர் கூறியதாவது:"ஆன் -லைன்' வேலைவாய்ப்பு நிறுவனங்களில், என் "பயோடேட்டா'வை பதிவு செய்துள்ளேன். சில நாட்களுக்கு முன், "டைம்ஸ் ஜாப்' வேலை வாய்ப்பு நிறுவனத்திலிருந்து பேசுவதாக, என் அலைபேசிக்கு அழைப்பு வந்தது. அதில் பேசியவர், "விப்ரோ, சி.டி.எஸ்., போன்ற நிறுவனங்களில் பணி வாங்கி தருகிறோம். முன்பணமாக, 1,500 ரூபாய் செலுத்துங்கள்,' என்றார்."பணிக்கான தேர்வுகளுக்கு முதலில் ஏற்பாடு செய்யுங்கள்; பிறகு பணம் தருகிறேன்,' என்றேன். உடனே, "உங்கள் வேலைக்காக, 1,500 ரூபாய் கூட செலவு செய்ய மாட்டீர்களா?' எனக் கோபமாக கேட்டப்படி, அந்த மர்ம நபர் தொடர்பைத் துண்டித்தார்.இவ்வாறு அவர் கூறினார்.மேலும், "இதுபற்றி நண்பர்களிடம் விவாதித்தபோது தான், பிரபல ஐ.டி., நிறுவனங்கள், "ஆன் -லைன்' வேலை வாய்ப்பு நிறுவனங்களின் பெயரை பயன்படுத்தி, பல்லாயிரக்கணக்கில் பணமோசடி நடப்பது தெரிந்தது,'' என்றார்.

இதுவும் காரணம்
பெயர் வெளியிட விரும்பாத, மனிதவள ஆலோசகர் ஒருவர் இதுகுறித்து கூறியதாவது:கல்லூரி வளாகத் தேர்வு மூலம், பணியாளர்களைத் தேர்ந்தெடுக்கும் ஐ.டி., நிறுவனங்களில் பெரும்பாலானவை, பட்டப்படிப்பில் மட்டுமல்லாமல், 10ம் வகுப்பு, பிளஸ் 2 பொதுத் தேர்வுகளில் மாணவர்கள் எடுத்துள்ள மதிப்பெண்களையும் கணக்கில் கொள்கின்றன.இதனால், பட்டப்படிப்பில் நல்ல மதிப்பெண் எடுக்கும் பலரும், வளாகத் தேர்வுகளில் பங்குபெறும் வாய்ப்பை இழக்கின்றனர். இவர்களும், தனியார் வேலைவாய்ப்பு நிறுவனங்களை நாட வேண்டியதாகிறது.முறையாக இயங்கும் தனியார் வேலைவாய்ப்பு நிறுவனங்கள், பணி தொடர்பான தகவல்களை தெரிவிக்க மட்டுமே, தொலைபேசி மற்றும் "இ-மெயில்' வசதிகளை பயன்படுத்துகின்றன. தொலைபேசியிலேயே நேர்முகத் தேர்வு நடத்தி, "இ-மெயில்' மூலமே பணி நியமன ஆணையை வழங்குபவை, நிச்சயம் போலி நிறுவனங்கள் தான்.இவ்வாறு அவர் கூறினார்.

மாற வேண்டும்
மேலும், "பட்டதாரிகள், இத்தகைய நிறுவனங்களிடம் ஆயிரக்கணக்கில் பணம் கொடுத்து ஏமாறுவது வருந்தத்தக்கது. இதை தவிர்க்க, வேலை கிடைத்தால் போதும் என்ற மனநிலையில் இருந்து, பட்டதாரிகள் விடுபட வேண்டும். தனியார் வேலைவாய்ப்பு நிறுவனங்களின் நம்பகத்தன்மையை உறுதிசெய்த பின் தான், அவற்றை அணுக வேண்டும்,'' என்றார்.

பண மோசடியில் ஈடுபடும் நிறுவனங்கள் மீது போலீசில் புகார் அளிக்க, பாதிக்கப்பட்டோர் தைரியமாக முன்வர வேண்டும் என்றும்; வேலை தேடுவோர், குறிப்பிட்ட நிறுவனத்தைத் தொடர்பு கொண்டு, முழு விளக்கங்களை பெற்று, அவற்றை அணுகுவது அவசியம் என்றும், அவர் தெரிவித்தார்.

என்னோட நியூயார்க் வந்துடும்மா...

ஏமாற்றுதல், மோசடி, நயவஞ்சகம் முதலான பல குற்றங்கள் புரிந்ததுடன் பெற்றதாயின் மனத்தைக்    கொலை செய்த பாவி இருக்கும் ஊரிலும் பணியாற்றும் இடங்களிலும் இத்தகவலைப் பரப்புங்கள். இக் கொடுமையை நினைக்கும் பொழுது ஒன்றும் எழுத வரவில்லை. வேதனையுடன்  இலக்குவனார் திருவள்ளுவன் / தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்! /

venkatnagaraj

சந்தித்ததும் சிந்தித்ததும்

என்னோட நியூயார்க் வந்துடும்மா...

[பட உதவி: கூகிள்]

புது தில்லி இந்திரா காந்தி பன்னாட்டு விமான நிலையத்தின் T3 ஓய்விடத்திலிருந்த இருக்கையில் சரிந்து அமர்ந்திருந்தார் அந்த வயதான பெண்மணி. வாழ்வில் பெற்ற அனுபவங்கள் வரிவரியாக சுருக்கங்களை அவரது தோலில் ஏற்றியிருந்தது. பலவித நாடுகளிலிருந்து வந்த/செல்லும் எண்ணிலடங்கா மனிதர்களுக்கு நடுவே இந்தப் பெண்மணி எங்கே பயணம் செய்யக் காத்திருக்கிறார்? அவரது மனதில் ஓடிக்கொண்டிருக்கும் எண்ணங்கள்தான் என்ன? பார்ப்போமா?

“அப்பாடி…. எவ்வளவு வருடங்கள் ஆயிற்று இப்படி நிம்மதியாய் உட்கார்ந்து. வாழ்வின் தொடக்கத்திலிருந்தே ஓடி ஓடி, மணமுடித்து, “ஒண்ணே ஒண்ணு கண்ணே கண்ணு” என ஒரு மகனைப் பெற்று, வளர்த்து, ஆளாக்கி என ஓட்டம் தொடர்ந்து கொண்டே தான் இருந்தது. ஒரு வருடமா, இரண்டு வருடமா, கடந்த 72 வருடங்களாக ஓடிட்டே தான் இருந்திருக்கேன்….

ஆச்சு, ஒரே பையனும் கல்யாணம் பண்ணி நியூயார்க்-லயே செட்டிலாயிட்டான். ஆனாலும் எனக்கென்னமோ இந்த தில்லியை விட்டு போகணும்னு நினைச்சுக்கூட பார்க்கமுடியல. வயசு தான் ஏறிட்டு போகுதே, எப்படி தனியாக இருக்க முடியும்னு அப்பப்ப மனசுல தோணிட்டே இருந்தாலும், ஏனோ போக மனசு வரல. ஆனா இந்த ஒரு வருஷமா உடம்பு ரொம்பதான் படுத்துது. எவ்வளவு நாள் தான் ஓட முடியும், என்னிக்காவது ஒரு நாள் உட்கார்ந்து தானே ஆகணும்.

இப்படி ஒரு நாள் உடம்பு சரியில்லாம பக்கத்து வீட்டுக்காரங்க துணையோட ஆஸ்பத்திரி போன போதுதான் என் பையன் அமெரிக்காவிலிருந்து ஃபோன் பண்ணான். “ஏம்மா, இன்னும் எத்தனை நாள் தான் தனியா கஷ்டப்படுவே, இங்கேயே வந்துடேன்னு” கூப்பிட்டான். உடம்பு சரியில்லாத கஷ்டத்திலேயே சரின்னு சொல்லிட்டேன்.

அவனும் அங்கே இருந்தே, இன்டர்னெட் மூலமா நான் இருந்த எங்க சொந்த வீட்டை விக்கிறதுக்கும், பாஸ்போர்ட், விசா, எல்லாத்துக்கும் ஏற்பாடு பண்ணிட்டு, என்னை அழைச்சிட்டுப் போக ஒரு மாசம் முன்னாடி வந்தான். எல்லா வேலையும் கடகடன்னு முடிச்சு, இதோ இங்கே ஏர்போர்ட் வரைக்கும் வந்தாச்சு, அடுத்து நியூயார்க் தான்.”

அவரோட எண்ண ஓட்டத்தை தடை செய்யறமாதிரி, பாதுகாப்பிற்கு நின்றிருந்த ஒரு போலீஸ்காரர், அந்தப் பெண்மணியை “மாதாஜி ரொம்ப நேரமா இங்கே உட்கார்ந்து இருக்கீங்களே, ஏதாவது உதவி வேணுமா?”ன்னு கேட்டார். அட பழைய நினைவுகளில் மூழ்கியதில் நேரம் போனதே தெரியலையேன்னு நினைச்சு சிரிச்சுக்கிட்டே, “என் பையனோட நியூயார்க் போகக் காத்திருக்கேன், உள்ள போய் போர்டிங் பாஸ் மத்த ஏற்பாடெல்லாம் பண்ணிட்டு வரேன்னு போயிருக்கான், இப்ப வந்துடுவான்”_னு சொல்ல, அவர் விடாம “உங்க பையன் பேர் சொல்லுங்கம்மா, நான் விசாரிச்சு சொல்றேன்னு” பேர் கேட்டுட்டு உள்ளே போனார். 

[பட உதவி: கூகிள்]

உள்ளே போய் அரை மணி நேரம் கழித்து வந்த போலீஸ்காரர் முகத்தில் ஒரு வித அதிர்ச்சியும், அயர்ச்சியும். ”ஏம்மா, நல்லாத் தெரியுமா, உங்க பையன் உங்களுக்கும் டிக்கெட் வாங்கி இருக்காரான்னு?, ஏன்னா அவர் ஒரு மணி நேரம் முன்பு கிளம்பின நியூயார்க் விமானத்திலே போய்ட்டாரே…”  ன்னு சொன்னதைக் கேட்ட பெண்மணிக்கு மாத்திரமல்ல, நமக்கும் அதிர்ச்சி.

அந்த வயதான பெண்மணிக்கு உட்கார்ந்திருந்தாலும், தரை கீழே நழுவி உள்ளே விழுந்துவிட்டது போன்ற உணர்வு.  “நல்லா விசாரிச்சீங்களா, என் பையன் அப்படி எல்லாம் பண்ண மாட்டானேன்னு” கேட்க, ”நல்லா விசாரிச்சேம்மா, அந்த விமானத்துல அவருக்கு மட்டும் தான் டிக்கெட் வாங்கி இருக்காரு, உங்களுக்கு வாங்கவே இல்லை, விமானம் போயிடுச்சேம்மா” என்று சொல்லி, ”உங்களுக்கு வீட்டுக்கு போகணும்னா சொல்லுங்க, வண்டி ஏற்பாடு பண்ணித் தரேன்னு” சொல்லியிருக்கார்.

இத்தனை வருடம் கஷ்டப்பட்டு, வளர்த்து ஆளாக்கி விட்ட மகன் பணத்திற்காக இப்படிச் செய்வான்னு எதிர்பார்க்காத அந்த பாட்டி அதிர்ச்சியில் அங்கேயே மயங்கிச் சரிந்தார். செல்வதற்கு வீடும் இல்லாமல், கையில் பணமும் இல்லாது என்ன செய்ய முடியும் அந்த மூதாட்டியால்? 

பணத்திற்காக பெற்ற தாயையே இப்படி நட்டாற்றில் விட்டுச் சென்ற அவலம் இந்தத் தலைநகர் தில்லியில் உண்மையாகவே நடந்தது. வடக்கு தில்லியில் நிறைய அடுக்கு மாடிக் குடியிருப்புகளில் ஒன்றில் இருந்த ஒரு பெண்மணிக்கு நேர்ந்த கதி இது. விஷயம் கேள்விப்பட்டு அந்தக் குடியிருப்பில் இருந்த சில பெரியவர்கள் அந்த மூதாட்டியை அழைத்து வந்து மேற்கொண்டு என்ன செய்யமுடியுமோ அதைச் செய்தார்கள். இப்படியும் ஆட்கள் இருக்கத்தான் செய்கிறார்கள்.

பெற்ற தாயை இப்படி நடுத்தெருவில் விட்டுப்போன அந்த படுபாவியை என்ன செய்யலாம்? நீங்களே சொல்லுங்கள்.

மீண்டும் சந்திப்போம்…

வெங்கட்.

புது தில்லி.

காலாவதி மருந்துகளை விற்றால் கடும் நடவடிக்கை: முதல்வர்

First Published : 23 Mar 2010 12:03:00 AM IST

Last Updated : 23 Mar 2010 12:15:58 AM IST

காலாவதியான மருந்துகளை விற்பனை செய்வோர் மீது கடும் நடவடிக்கை எடுப்பது குறித்து முதல்வர் கருணாநிதி தலைமையில் ​தலைமைச் செயலகத்தில் திங்கள்கிழமை நடைபெற்ற ஆய்வுக் கூட்டத்தில் கலந்து கொண்ட ​(வலமிருந்து)​ தலைமைச் செயலர் கே.எஸ்.ஸ்ரீபதி,​​ காவல் துறை கூடுதல் இயக்குநர் கே.ராதாகிருஷ்ணன்,​​ டி.ஜி.பி.​ லத்திகா சரண்,​​ சுகாதாரத் துறை முதன்மைச் செயலர் வி.கு.சுப்புராஜ்,​​ மருந்துக் கட்டுப்பாட்டுத் துறை இயக்குநர் எம்.பாஸ்கரன்,​​ சென்னை மாநகர போலீஸ் ஆணையர் டி.ராஜேந்திரன்,​​ காவல் துறைத் தலைவர் ​(நுண்ணறிவுப் பிரிவு)​ எம்.எஸ்.ஜாபர் சேட்.

சென்னை,​​ மார்ச் 22:​ காலாவதி மருந்துகளை ​ விற்பவர்கள் மீது கடும் நடவடிக்கை எடுக்க முதல்வர் கருணாநிதி உத்தரவிட்டுள்ளார்.​ ​ சென்னை கொடுங்கையூர் குப்பை கொட்டும் தளத்தில் வீசப்பட்ட காலாவதியான மருந்துகளைச் சேகரித்து,​​ லேபிள் மாற்றி ஒட்டி மீண்டும் அவற்றை விற்கும் செயல் கண்டுபிடிக்கப்பட்டது.​ இந்தச் சம்பவத்தில் ஈடுபட்டவர்களைப் பிடிக்க தனிப்படைகள் அமைக்கப்பட்டுள்ளன.​ இந்த நிலையில்,​​ போலி மருந்துகளைத் தயாரிப்பவர்கள் மற்றும் காலாவதியான மருந்துகளை விற்பவர்கள் மீது நடவடிக்கை எடுப்பது குறித்து தலைமைச் செயலர் கே.எஸ்.ஸ்ரீபதி,​​ சுகாதாரத் துறை முதன்மைச் செயலர் வி.கு.சுப்புராஜ் மற்றும் டி.ஜி.பி.​ லத்திகா சரண் உள்ளிட்ட போலீஸ் உயர் அதிகாரிகளுடன் தலைமைச் செயலகத்தில் முதல்வர் கருணாநிதி திங்கள்கிழமை ஆய்வு செய்தார்.​ போலி மருந்துகளைத் தயாரித்து விற்பனை செய்பவர்கள்,​​ காலாவதியான மருந்துகளை விற்கும் நிறுவனங்கள்,​​ மருந்துக் கடைகள் மீது போலீஸ் மற்றும் மருத்துவத் துறையைச் சேர்ந்த உயர் அதிகாரிகள் கூட்டாக ஆய்வு செய்ய வேண்டும்.​ இந்தப் பிரச்னையை ​அடியோடு களைய உரிய நடவடிக்கைகளை உடனடியாக மேற்கொள்ள வேண்டும் என்று முதல்வர் கருணாநிதி உத்தரவிட்டார்.​ மருந்துக் கட்டுப்பாட்டுத் துறையை வலுவுள்ள துறையாகத் தரம் உயர்த்த வேண்டும் எனவும்,​​ பொது மக்களுக்கு மருந்துகள் குறித்த விழிப்புணர்வை ஏற்படுத்தும் வகையில்,​​ அவ்வப்போது எச்சரிக்கை அறிவிப்புகளை வெளியிட வேண்டும் எனவும் முதல்வர் கருணாநிதி அறிவுறுத்தினார்.​ இதுபோன்ற குற்றச் செயல்களில் நேரடியாக ஈடுபடுவர்கள் தவிர,​​ பின்னணியில் செயல்படுபவர்களையும் கண்டறிந்து அவர்கள் மீது கடுமையான நடவடிக்கை எடுக்க வேண்டும் என்று கருணாநிதி உத்தரவிட்டார்.தண்டனை என்ன?​ காலாவதியான மருந்துகளை விற்பவர்களுக்கு விதிக்கப்படும் தண்டனை குறித்து சுகாதாரத் துறை செயலாளர் வி.கு.சுப்புராஜிடம் கேட்ட போது,​​ "போலி மற்றும் காலாவதியான மருந்துகளை விற்பவர்களுக்கு ஆயுள் தண்டனை மற்றும் ரூ.10 லட்சம் அபராதம் விதிக்க சட்டத்தில் வழி வகை செய்யப்பட்டுள்ளது.​ குற்றங்கள் ​கண்டுபிடிக்கப்பட்டால் சம்பந்தப்பட்டவர்கள் மீது கடும் நடவடிக்கை எடுக்கப்படும்' என்றார் அவர்.​ ​ இந்த ஆய்வுக் கூட்டத்தில் சட்டம்-​ ஒழுங்கு கூடுதல் டி.ஜி.பி.​ ராதாகிருஷ்ணன்,​​ சென்னை மாநகர போலீஸ் கமிஷனர் ராஜேந்திரன்,​​ மருந்துக் கட்டுப்பாட்டுத் துறை இயக்குநர் பாஸ்கரன் உள்ளிட்டோர் கலந்து கொண்டனர்.

கருத்துக்கள்

முதல்வரின் அறிவுறுத்தலை ஏற்று, வேண்டியவர் வேண்டாதவர் என்ற பாகுபாடின்றி அசியல் அதிகாரச் செல்வாக்கிற்கு இரையாகாமல் ஊழலுக்குத் துணை போகாமல் முதலில் பிடிக்கப்பட்டவர்கள் மீது விரைந்து உசாவல் மேற்கொண்டு தண்டனை வழங்கச் செய்யுங்கள்.பிற மோசடிப் பேர்வழிகளையும் உடனே பிடித்துத் தண்டனை கிடைக்கச் செய்யுங்கள். உயிரோடு டவிளையாடும் இவர்கள் மீது பரிவு காட்டாதீர்கள். காலக்கெடு முடிந்த மருந்துகள் குப்பைத் தொட்டியில் கொட்டியிருக்க வாயப்பில்லை. தினமணி ஆசிரியவுரையில் குறிப்பிட்டாற்போன்று ஒரு கும்பலே மோசடியில் ஈடுபட்டிருக்க வேண்டும். விரைந்து நடவடிக்கை எடுங்கள். உடன் அறிவுறுத்தியுள்ள முதல்வருக்குப பாராட்டுகள்.

அன்புடன் இலக்குவனார் திருவள்ளுவன்

By Ilakkuvanar Thiruvalluvan
3/23/2010 2:35:00 AM

உங்கள் கருத்தைப் பதிவு செய்யுங்கள்