விபத்து லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
விபத்து லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

ஞாயிறு, 7 ஜூலை, 2013

எதிர்பாரா நேர்ச்சியில் உதவுங்கள் - அதுவும் இனிய சுமையே!



விபத்தில் உதவுங்கள்... அதுவும் சுகமான சுமையே

பொது இடங்களில் நடக்கும் விபத்துகளின் போது, பல நூறு பேர் அங்கிருந்தாலும், விபத்தில் பாதிக்கப்பட்டவரின் உயிரை காப்பாற்ற முடிவதில்லை. விபத்தில் காயம்பட்டவருக்கு, உடனடியாக அளிக்க வேண்டிய முதலுதவியை செய்தால் தான், தொடர் மருத்துவ சிகிச்சை அளித்து உயிரை காப்பற்ற முடியும்.

விபத்தில் காயமடைந்த நேரத்தில்இருந்து, முதலுதவி அளிக்கும் நேரம் வரை உள்ள காலத்தை "கோல்டன் ஹவர்' என, குறிப்பிடுகின்றனர். இந்த நேரத்தை வீணாக்காமல், முதல் உதவி அளிக்க வேண்டும். இல்லையென்றால், விபத்தில் பாதிக்கப்பட்டவரின் உயிரை காப்பாற்ற முடியாது. ஆனால், விபத்து நடக்கும் இடத்தில், பல நூறு பேர் இருந்தாலும், "கோல்டன் ஹவரில்', பாதிக்கப்பட்டவருக்கு அளிக்க வேண்டிய முதலுதவியை அளிப்பதில்லை. இதனால், தான் பல உயிர்களை இழக்க நேரிடுகிறது.இதற்கு, சென்னை "எக்ஸ்பிரஸ் அவென்யூ' வணிக வளாகத்தில்,சமீபத்தில் நடந்த தற்கொலையை குறிப்பிடலாம். "எக்ஸ்பிரஸ் அவென்யூவின்' மூன்றாவது மாடியிலிருந்து குதித்து, ஐ.டி., ஊழியர் ஒருவர்தற்கொலை செய்து கொண்டார்.
பல்வேறு தடைகள்


அவர் மாடியிலிருந்து கீழே குதித்தபோது, அங்கு நூற்றுக்கும் மேற்பட்டோர் இருந்தனர். மாடியிலிருந்து குதித்து ரத்த வெள்ளத்தில் கிடந்த இளைஞருக்கு உதவ, பல தடைகள் அங்கு நிலவியுள்ளது.ரத்த வெள்ளத்தில் மிதக்கும் இளைஞரை நெருங்க, யாரும் அனுமதிக்கப்படவில்லை. போலீஸ் வரட்டும் என, வணிக வளாக ஊழியர்கள், பொதுமக்களை தடுத்து விட்டதாக கூறப்படுகிறது. பாதிக்கப்பட்ட இளைஞரை உடனடியாக மருத்துவமனைக்கு கொண்டு சென்றிருந்தால், காப்பாற்றியிருக்கலாம் என, அங்கிருந்த பெண் ஒருவர், போலீசாரிடம் வாக்குவாதத்தில் ஈடுபட்டார்.இதுபோன்ற சூழல்களில், பொதுமக்கள் மனதில் பல்வேறு தயக்கங்கள் ஏற்படுகின்றன."போலீஸ் கேஸ் ஆகிவிடும். இதில், தலையிட்டால் கோர்ட்டுக்கு போய் சாட்சி சொல்லணும். போலீசார் தொடர்ந்து விசாரிப்பர். இதற்கு, வேலையை விட்டுவிட்டு, மெனக்கெடணும்' என, வேடிக்கை பார்த்து சென்றதாகவும் சொல்லப்படுகிறது. விபத்து நேரத்தில், பாதிக்கப்பட்டவருக்கு உதவுவதால், சட்டரீதியான நெருக்கடிக்கு உள்ளாகி விடுவோமோ என்ற அச்சம் மக்கள் மத்தியில் இருப்பதே இதற்கு காரணம் என, கருத்து நிலவுகிறது.
விலகி செல்ல வேண்டாம்:

இதுகுறித்து, தமிழக கூடுதல் டி.ஜி.பி., கே.ராதாகிருஷ்ணன் கூறியதாவது:இந்திய கிரிமினல் சட்டம், 100சதவீதம் மக்களை நம்பி தான் உள்ளது. ஒரு குற்ற நிகழ்வு குறித்து, போலீசுக்கு மக்கள் உதவினால் தான், குற்றத்துக்கான உண்மையான காரணத்தையும், குற்றவாளியையும் கண்டுபிடிக்க முடியும்.சட்டத்தை கண்டு மக்கள் பயந்தால், உண்மையை வெளிக்கொணர்வது சாத்தியமில்லை. இதற்காக தான், சமுதாய காவல் என்ற அமைப்பை உருவாக்கினோம். இந்த அமைப்பு செயல்படும் பகுதிகளில், குற்றம் தொடர்பான முழு உண்மைகள் வெளிவருகின்றன. விபத்தில் பாதிக்கப்பட்டவருக்கு முதலுதவி அளிக்க வேண்டியது, அந்த பகுதியில் உள்ள பொதுமக்களின் கடமை. பாதிக்கப்பட்டவரை மருத்துவமனையில் சேர்ப்பவர்களை, போலீசார் விசாரிப்பர். விசாரணை நடத்தினால் தான், அங்கு என்ன நடந்தது என்பது தெரியும். போலீசார் விசாரிப்பரே என, பயந்து பாராமுகமாக செல்லும் மனோபாவமே மக்கள் மத்தியில் உள்ளது. இதனால், தங்களின் கடமையில்இருந்து பொதுமக்கள் விலகி செல்கின்றனர். விபத்தில் பாதிக்கப்பட்டவருக்கு உதவுவதை சுமையாகக்கருதாமல், சுகமான சுமையாக கருத வேண்டும்.மக்களுக்கான சட்டத்தில், மக்களின் பங்களிப்பே முக்கியம். இதை, பொதுமக்கள் புரிந்து கொண்டால், பல வழக்குகளில் உண்மையான குற்றவாளிகள் தண்டிக்கப்படுவர். தொடர் குற்றங்கள் நடப்பதும் தடுக்கப்படும்.இவ்வாறு, ராதாகிருஷ்ணன் கூறினார்.இதுபோன்ற வழக்குகளில், சட்ட ரீதியான பாதுகாப்பும், முதலுதவி செய்பவருக்கு உள்ளது என,கூறுகின்றனர்.
சட்ட பாதுகாப்பு உண்டு:

இதுபற்றி, தமிழகம் மற்றும் புதுவை கீழமை நீதிமன்ற வழக்கறிஞர் கூட்டமைப்பின் முன்னாள் தலைவர் பி.திருமலைராஜன் கூறியதாவது:விபத்தில் பாதிக்கப்பட்டவருக்கு, முதலுதவி செய்ய மருத்துவமனைக்கு அழைத்து செல்வோர், மருத்துவமனையில் அவரை சேர்த்துவிட்டு சென்று விடலாம். மருத்துவமனை போலீசுக்கு தவகல் கொடுத்துவிடும்.சம்பவம் குறித்து போலீசுக்குதகவல்கள் சொல்ல விரும்பினால், மருத்துவ மனையில் முகவரியை கொடுக்கலாம். தானே முன்வந்தும் போலீசுக்கு தகவலை சொல்லலாம். கோர்ட்டுக்கு சென்று சாட்சி சொல்ல நேரிடும்போது, "எனக்கு வேலை அதிகம் இருக்கிறது. எனவே, என் சாட்சியத்தை முதலில் பதிவு செய்துகொள்ளுங்கள்' என, எழுத்துமூலம், சாட்சியம் அளிக்கலாம்.இதன்மூலம், வழக்கு முடியும் வரை கோர்ட்டுக்கு செல்ல வேண்டிய அவசியமில்லை. பொது இடங்களில் நடக்கும் சம்பவங்கள் குறித்து, அஞ்சாமல் தகவல் சொல்லலாம். இதற்கு, போதிய சட்ட பாதுகாப்பு மக்களுக்கு வழங்கப்பட்டுள்ளது.இவ்வாறு, திருமலைராஜன் கூறினார்.

வியாழன், 28 மார்ச், 2013

நேர்ச்சி(விபத்து)களில் சிக்குபவர்களுக்கு இலவசப் பண்டுவம்: மத்திய மந்திரி

நேர்ச்சி(விபத்து)களில் சிக்குபவர்களுக்கு இலவச ப் பண்டுவம்: மத்திய மந்திரி
விபத்துக்களில் சிக்குபவர்களுக்கு இலவச சிகிச்சை: மத்திய மந்திரி
புதுடெல்லி, மார்ச் 28:-

சாலை விபத்துக்குள்ளாகும் நபர்களுக்கு எல்லா ஆஸ்பத்திரிகளுக்கும் இலவச சிகிச்சையை மத்திய அரசு அறிமுகப்படுத்தியுள்ளது. மத்திய சாலை போக்குவரத்து அமைச்சம் மற்றும் ஐ.சி.ஐ.சி.ஐ. லோம்பார்ட் இன்சூரன்ஸ் நிறுவனத்திற்கும் இடையே இதற்கான புரிந்துணர்வு ஒப்பந்தம் சமீபத்தில் கையொப்பமாகி உள்ளது.

சாலை விபத்துக்களை பொருத்த வரையில் விபத்து நடத்த பின்னர் முதல் ஒரு மணி நேரம் என்பது உயிரை பாதுகாப்பதில் முக்கிய பங்கு வகிக்கிற்து என்பதால் சோதனை முயற்சியாக இந்த நடவடிக்கை மேற்கொள்ளப்பட உள்ளது என மத்திய சாலை போக்குவரத்து மற்றும் நெடுஞ்சாலைத்துறை மந்திரி சி.பி.ஜோஷி கூறியுள்ளார்.

இந்த புதிய ஒப்பந்தத்தின்படி விபத்து நடந்த இடத்திற்கு வந்து காயமடைந்தவர்களை அருகாமையில் உள்ள ஆஸ்பத்திரிகளில் அனுமதிப்பது, அடுத்த 48 மணி நேரம் வரையிலான சிகிச்சை செலவுகளை ஏற்றுக் கொள்வது உள்ளிட்ட முதலுதவி பணிகளை இன்சூரன்ஸ் நிறுவனம் ஏற்றுக் கொள்ளும்.

இந்த திட்டத்திற்காக ரூ.20 கோடி ஒதுக்கப்பட்டுள்ளது. இத்தொகையைக் கொண்டு உயிர்காக்கும் உபகரணங்களுடன் கூடிய ஆம்புலன்ஸ், மருத்து பணியாளர்கள், தகவல் கட்டுப்பாட்டு மையம் உள்ளிட்ட முதல்கட்ட பணிகள் மேற்கொள்ளப்படும்.

முதல்முறையாக குர்கான்-ஜெய்ப்பூர் நெடுஞ்சாலையில் மட்டும் அறிமுகப்படுத்தப்படவுள்ள இந்த திட்டம் படிப்படியாக அனைத்து தேசிய நெடுஞ்சாலைகளிலும் செயல்படுத்தப்படும் என அறிவிக்கப்பட்டுள்ளது. 

திங்கள், 19 நவம்பர், 2012

மூளைச்சாவு : புதுமாப்பிள்ளை: உடல் உறுப்புகள் ஐந்து பேருக்குத் தானம்

விபத்தில் மூளைச்சாவு அடைந்த புதுமாப்பிள்ளை : உடல் உறுப்புகள் ஐந்து பேருக்கு த் தானம்
(தருமராசன் இறப்பில் தருமராசன் ஆனார்)

கோவை,: விபத்தில், மூளைச்சாவு ஏற்பட்ட இளைஞரின் உடல் உறுப்புகள், தானமாக வழங்கப்பட்டதில், மூன்று பேர் சாவின் விளிம்பில் இருந்து மீண்டனர்.கண் தானம் மூலம் இருவருக்கு பார்வை கிடைத்தது. கோவையில் நடந்த இந்த மனதை உருக்கும் சம்பவம், உறுப்பு தானத்தின் முக்கியத்துவத்தை உணர்த்தியது.
கோவை மேட்டுப்பாளையம் சுண்டக்கட்டி பகுதியை சேர்ந்த, மருதன் - பாப்பாத்தி தம்பதியரின் மகன் தர்மராஜன், 23. "எலக்டிரிக்கல் அண்டு எலக்டிரானிக்ஸ்' இன்ஜினியரிங்கில் டிப்ளமோ முடித்த தர்மராஜனுக்கு, சமீபத்தில் லட்சுமி மில்ஸ் நிறுவனத்தில் வேலை கிடைத்தது. வேலை கிடைத்த கையோடு, காதலி மலர்விழியை மூன்று மாதங்களுக்கு முன் திருமணம் செய்து கொண்டார்.மனைவி வீட்டில் "தலை தீபாவளி'யை கொண்டாடினார். கடந்த, 15ம் தேதி மாலை நண்பர் பானுசந்தருடன் பைக்கில் வீடு திரும்பி கொண்டிருந்தார். காரமடை அருகே எதிரே வந்த லாரி மோதியதில், இருவரும் பலத்த காயமடைந்தனர். கோவை கே.ஜி., மருத்துவமனையில் அனுமதிக்கப்பட்டனர். மூன்று அறுவை சிகிச்சைகளுக்குப் பின், நண்பர் பானுசந்தர் உயிர் பிழைத்துக் கொண்டார். தர்மராஜனின் தலையின் பின்பகுதியில் பலத்த அடிபட்டிருந்ததால், மூளையில் ரத்தக்கசிவு ஏற்பட்டு மூளைச்சாவு ஏற்பட்டது. உயிர் பிரிந்து கொண்டிருந்ததை உணர்ந்த டாக்டர்கள், தர்மராஜனின் பெற்றோர், உறவினரிடம் தெரிவித்தனர்.உடல் உறுப்புகளை தானம் செய்தால், மூன்று பேரின் உயிரை காப்பாற்ற முடியும் என்பதையும், தெரிவித்தனர். சிறிது நேரம் கதறியழுதபடி இருந்த உறவினர்கள், இனி எதுவும் செய்வதற்கில்லை என்பதை உணர்ந்து, இறுதியில் உறுப்பு தானத்துக்கு சம்மதித்தனர்.
உயிர் பிரிவதற்குள் உடல் உறுப்புகளை அகற்ற வேண்டும் என்பதால், அதன் பின் மருத்துவமனையில் நடந்த, அத்தனை நிகழ்வுகளும் போர்க்கால அடிப்படையில் துரிதமாக நடந்தன.ஒரு குழுவினர் உடல் உறுப்புகளுக்காக பல்வேறு மருத்துவமனைகளில் பதிவு செய்து காத்திருப்போர் பட்டியலை உடனடியாக சேகரிக்க, மற்றொரு குழுவினர் விதிமுறையின்படி போலீசுக்கு தகவல் தெரிவித்து, உரிய படிவங்களில் உறவினர்களிடம் கையெழுத்து பெற்றனர். டாக்டர்கள் குழுவினரோ உறுப்புகளை அகற்றி, உடனடியாக மற்றொருவருக்கு பொருத்தும் பணிகளை தயார் செய்தனர்.
சீனியாரிட்டியின் அடிப்படையில், இரண்டு கிட்னியில் ஒன்று கே.ஜி., மருத்துவமனையில் "டயாலிசிஸ்' சிகிச்சை பெற்று வரும் ஒருவருக்கும், மற்றொன்று கே.எம்.சி.எச்., மருத்துவமனை நோயாளிக்கும் பொருத்தப்பட்டது. வேலூர் சி.எம்.சி., மருத்துவனை நோயாளிக்கு ஈரல் பொருத்தப்பட்டது.கரு விழிகளில் ஒன்று கே.ஜி., மருத்துவமனையிலும், மற்றொன்று அரவிந்த் மருத்துவமனையில் சிகிச்சை பெற்று வந்த இருவருக்கு பொருத்தப்பட்டது. இறுதியில் கோவை அரசு மருத்துவமனையில் பிரேத பரிசோதனைக்குப் பின், உடல் பெற்றோரிடம் ஒப்படைக்கப்பட்டது.தர்மராஜனின் பெற்றோர் கூறுகையில், ""எங்கள் மகனின் உயிர் பிரிந்தாலும், அதன் மூலம், மூன்று பேரின் உயிர் காப்பாற்றப்பட்டுள்ளது. இருவருக்கு கண் பார்வை கிடைத்துள்ளது மகிழ்ச்சியாக உள்ளது. தர்மராஜன் என்ற பெயருக்கு ஏற்ப, தனது உடல் உறுப்புகளை தர்மம் செய்து, பிறரை வாழ வைத்து விட்டான். இதற்காகவே இந்த மண்ணில் பிறந்தானோ என்னவோ..,'' என்றனர் அழுதபடி.