பாடப்பகுதியில் இருந்து தமிழ் வாழ்த்துப் பகுதி நீக்கம்

தினத்தந்தி தஞ்சாவூர் பதிப்பு

பாடப்பகுதியில்  இருந்து தமிழ் வாழ்த்துப் பகுதி நீக்கம்

தமிழ்க்காப்புக்கழகம் கண்டனம்

சென்னை,  சூலை 25 -

  பாடப் புத்தகத்தில்  இருந்து தமிழ் வாழ்த்துப் பகுதி நீக்கப்பட்டதற்குத் தமிழ்க்காப்புக்கழகம் கண்டனம் தெரிவித்துள்ளது.  இது தொடர்பாகத் தமிழ்க்காப்புக் கழகத்தின் தலைவர்  இலக்குவனார் திருவள்ளுவன்  வெளியிட்டுள்ள அறிக்கையில்  கூறியிருப்பதாவது : -

தமிழ் வாழ்த்துப் பகுதி

 9  ஆம் வகுப்பில் இருந்து தமிழ்ப்பாடநூல்களில் வாழ்த்துப் பகுதியில் முதலில் இறை வாழ்த்தும் அடுத்துத் தமிழ் வாழ்த்தும் இடம் பெறும்.  ஆனால், இப்பொழுது தமிழ்வாழ்த்துப் பகுதி எடுக்கப்பட்டு விட்டது.கருணாநிதியின் செம்மொழிப்பாடல் இடம் பெறுவதற்காகத்தான் இவை எடுக்கப்பட்டன எனப் பாடநூல் குழுவினர் வழி அறிய வருகிறது.

  செம்மொழிப்பாடல், பாடப்புத்தகத்தில் இடம் பெறாத பொழுது  தமிழ் வாழ்த்துப்பகுதியை எடுக்க வேண்டிய தேவையே இல்லை.மேலும், செம்மொழிப்பாடலை எடுத்தபின்பு தமிழ் வாழ்த்தைப் பள்ளிக் கல்வித்துறையினர் ஏன் சேர்க்கவில்லை.

நாட்டுப்பாடல்

  எல்லாப் பாட நூல்களிலும் ‘நீராரும் கடலுடுத்த’ எனத் தொடங்கும் தமிழ்த்தாய் வாழ்த்து உள்ளதே. அது போதாதா என்கின்றனராம் அவர்கள்.சனகனமண என்னும் நாட்டுப்பாடல் எல்லாப் பாடங்களிலும இருந்தாலும் நாடடு வாழ்த்துப்பாடலும இடம் பெறுகிறது. அவ்வாறிருக்க தமிழ் மொழி வாழ்த்தை எடுக்க வேண்டிய தேவை என்ன?

 பள்ளிக்கல்வித்துறை சமச்சீர்க்கல்வி எனக்  கூறிக்கொண்டு பழந்தமிழ் இலக்கியங்கள் கற்பிக்கப்படுவதையும்  குறைத்துள்ளது ஏன்?   சமச்சீர்க்கல்வி அறிமுகப்படுத்துவதற்கு முன்பு 9 ஆம் வகுப்பில்  7 பிரிவுகளில் 24 இலக்கியங்கள் இருந்துள்ளன.  10 ஆம் வகுப்பில் 7 பிரிவுகளில் 28 இலக்கியங்கள் இருந்துள்ளன. ஆனால், சமச்சீர்க்கல்வி அறிமுகத்திற்குப்பின் 9 ஆம் வகுப்பில் 19  இலக்கியங்களும் 10 ஆம் வகுப்பில் 16 இலக்கியங்களும் மட்டுமே உள்ளன. மனப்பாடப்பகுதி வரிகளும் குறைக்கப்பட்டுள்ளன.

சுற்றறிக்கை

  சமச்சீர்க்கல்வி என்ற போர்வையில் தமிழுக்கு எதிரான செயல்பாட்டை மேற்கொண்ட  தமிழ்ப்பகைவர்கள் யார்?  முந்தைய ஆட்சியில் நடந்த தவறு என்று விட்டுவிடாமல் தமிழ்த்தேசிய உணர்விற்கு மதிப்பளிக்கும் இப்போதைய அரசு இதனை உடனே சரி செய்ய வேண்டும். 

  6 ஆம் வகுப்பில் இருந்தே வெவ்வேறு தமிழ் வாழ்த்துப்பாடல்களை ஒவ்வொரு வகுப்பிற்கும் அறிமுகப்படுத்தி அவற்றை மனப்பாடப் பகுதியாகவும் அறிவித்துச் சுற்றறிக்கை மூலம் பள்ளிகளுக்கு அனுப்பி வைக்க வேண்டும்.

  இவ்வாறு  அவர் தெரிவித்துள்ளார்.

thamizh anthem: புதிய தமிழ் வாழ்த்து

Heritage Tunes | மண்ணின் குரல்

Jan27,2011

0/0

புதிய தமிழ் வாழ்த்து

மலேசிய எழுத்தாளர் சங்கம் ஜனவரி 23ம் தேதி வெளியிட்டுள்ள புதிய தமிழ் வாழ்த்துப்பாடல்.







நிலைபெறநீ வாழியவே!
ஆக்கம்: கவிஞர் சீனி நைனா முகம்மது
இசை: ஆர்.பி.எஸ்.ராஜூ
குரல்: துருவன், பாபு லோகநாதன்

காப்பியனை ஈன்றவளே!
காப்பியங்கள் கண்டவளே!
கலைவளர்த்த தமிழகத்தின்
தலைநிலத்தில் ஆள்பவளே!
தாய்ப்புலமை யாற்புவியில்
தனிப்பெருமை கொண்டவளே!
தமிழரொடு புலம்பெயர்ந்து
தரணியெங்கும் வாழ்பவளே!

எங்களெழில் மலைசியத்தில்
சிங்கைதனில் ஈழமண்ணில்
இலக்கியமாய் வழக்கியலாய்
இனக்காவல் தருபவளே!
பொங்கிவளர் அறிவியலின்
புத்தாக்கம் அத்தனைக்கும்
பொருந்தியின்று மின்னுலகில்
புரட்சிவலம் வருபவளே!

செவ்வியலின் இலக்கியங்கள்
செழித்திருந்த பொற்காலம்
சேர்த்துவைத்த செயுள்வளத்தில்
செம்மாந்த பழையவளே!
அவ்வியலில் வேரூன்றி
அறிவுயர்ந்த தற்காலம்
அழகழகாய் உரைநடையும்
ஆளுகின்ற புதியவளே!

குலங்கடந்து நெறிகடந்து
நிலவரம்பின் தடைகடந்து
கோமகளாய்த் தமிழர்மனம்
கொலுவிருக்கும் தமிழணங்கே!
நிலவினுக்கே பெயர்ந்தாலும்
நினதாட்சி தொடருமம்மா!
நிறைகுறையாச் செம்மொழியே
நிலைபெறநீ வாழியவே!