சிற்பங்கள் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
சிற்பங்கள் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

திங்கள், 29 ஏப்ரல், 2013

கி.பி., 7ஆம் நூற்றாண்டு ச் சிற்பங்கள் ; திருக்கோவிலூர் அருகே கண்டெடுப்பு


கி.பி., 7ஆம் நூற்றாண்டு ச் சிற்பங்கள் ; திருக்கோவிலூர் அருகே கண்டெடுப்பு
விழுப்புரம், : பல்லவர் காலத்தில் உருவான, இரண்டு அய்யனார் சிற்பங்கள், கண்டறியப்பட்டு உள்ளன. திருக்கோவிலூர் அடுத்த நெற்குன்றம் ஆற்றங்கரையில், சிவன் கோவில் உள்ளது. கல்வெட்டு ஆய்வாளர்கள், வீரராகவன், மங்கையர்கரசி, மற்றும் பிச்சைப்பிள்ளை ஆகியோர், இந்த கோவிலில் கள ஆய்வு மேற்கொண்டனர். அப்போது, அங்குள்ள ஆலமரத்தடியில், அய்யனார் சிற்பங்கள் கண்டறியப்பட்டன.

இதுபற்றி, ஆய்வாளர் வீரராகவன் கூறியதாவது:

பொதுமக்கள் வழிபாட்டில் உள்ள ஒரு அய்யனார் சிற்பம், திண்டிவனம் அடுத்த கிளியனூரில் உள்ள தனிக்கோவில் சிற்பத்துடன் ஒத்துப்போகிறது. ஒழுங்கற்ற கற்பலகையில், புடைப்புச் சிற்பமாக வெட்டப்பட்டுள்ள அய்யனார் சிற்பம், கிராம காவல் தெய்வமாக காட்சியளிக்கிறது. அய்யனார், வலது காலை தொங்கவிட்டும், இடது காலை குத்திட்டும், உட்குடி ஆசனத்தில் அமர்ந்துள்ளது போல், சிலை வடிக்கப்பட்டுள்ளது.

வலது கையில் சாட்டை ஒன்று பற்றி, வலது தொடையிலும், இடது கை, கால், முட்டியின் மீதும், ஊர்ந்து செல்வது போல் உள்ளது. இடது பாதத்தின் கீழ், குதிரை ஒன்றும், இடையில் அரையாடை அணிந்தும், அதில் நேர்த்தியான முடிச்சுகளும் அமைந்துள்ளது. வயிற்றின் மீது வயிற்றுக்கட்டும், வயிற்றுக்கடியில் குத்துவாள் ஒன்றும் செருகப்பட்டுள்ளது.

மார்பில் புரிநூலும், கழுத்தில் ஆரமும், காதுகளில் பத்திரக் குண்டலங்களும், தலையில் மூன்றடுக்கு கொண்டையுடன், சடாபாரத்துடன் செதுக்கப்பட்டிருப்பது, சிற்பத்திற்கு அழகூட்டுகிறது. இந்த சிற்பம். கி.பி., 10-11ம் நூற்றாண்டில் வடிக்கப்பட்டதாக இருக்கலாம். இந்த சிற்பத்திற்கு அருகே, உடைந்த பழமையான பல்லவர் கால அரிய அய்யனார் சிற்பம் கண்டறியப்பட்டது. இதன் தலை அலங்காரமும், காதணிகளும், கழுத்தில் அணியப்பட்டுள்ள சரபலியும், வெகு நேர்த்தியாக வடிவமைக்கப்பட்டு, பல்லவர் கால கலை நயத்தை எடுத்து காட்டுகிறது. இது. கி.பி., 7ம் நூற்றாண்டில் உருவாக்கப்பட்டதாக இருக்கலாம். இவ்வாறு, வீரராகவன் தெரிவித்தார்.

வியாழன், 18 ஏப்ரல், 2013

சிற்பங்களின் மலை!

சிற்பங்களின் மலை!
கழுகு மலையின், கற்சிற்பம் மற்றும் ஒரே கல்லிலான கோவிலின் சிற்பக்கலையை விளக்கும், வெங்கட்ராமன்: மதுரை காமராசர் பல்கலைக் கழகத்தில், வரலாற்றுப் பேராசிரியராக பணிபுரிந்து ஓய்வு பெற்றவன். யுனெஸ்கோவின் புராதனச் சின்னங்களின் பட்டியலில் இடம் பெற்று, உலக அளவில் அங்கீகாரம் பெறுவதே, தொன்மை சிறப்பு வாய்ந்த பகுதிக்கு அடையாளம். தூத்துக்குடி மாவட்டம், கோவில்பட்டியிலிருந்து, 20 கி.மீ., தொலைவில், சங்கரன்கோவில் செல்லும் சாலையில் அமைந்துள்ள, கழுகு மலையும், இப்பட்டியலில் இடம்பெற போகிறது.பண்டைய கால சமணர்கள், மக்களுக்கு கல்வி கற்பிக்கும் இடமாக, கழுகு மலை இருந்தது. பலர் இங்கு தங்கி, கல்வி பயின்று சென்றுள்ளனர். பள்ளி என்றால், படுக்கை என்று பொருள். பலர் இங்கு தங்கி படித்ததால், "பள்ளிக்கூடம்' என்ற சொல் வழக்கு, இங்கிருந்தே தோன்றியது. 8ம் நூற்றாண்டில், பல சமண முனிவர்கள் உருவாக்கிய சிற்பங்கள், கழுகு மலையில் உள்ளன.

யாரும் செதுக்க முடியாத கடினமான பாறையில், அவ்வளவு துல்லியமாகவும், கலை உணர்வுடனும், சமண முனிவர்கள் எப்படி சிலைகளை செதுக்கினர் என, பல வரலாற்று ஆய்வாளர்கள் ஆச்சரியத்துடன் பார்த்து செல்கின்றனர்.பல நூற்றாண்டானாலும், சிற்பங்களின் பொலிவு சிறிதும் குறையவில்லை. சிற்பங்களுக்கு கீழ், யாரால் செதுக்கப்பட்டது என, வட்டெழுத்துக்களால் எழுதப்பட்டுள்ளது. 8ம் நூற்றாண்டான வரகுணப் பாண்டியன் காலத்தில், சிவனுக்காக கழுகு மலையின் பாறையில், 7.50 மீ., ஆழத்திற்கு சதுரமாக வெட்டியெடுத்து, அதன் நடுப்பகுதியை, "வெட்டுவான் கோவிலாக' செதுக்கியுள்ளனர்.எல்லோரா குகைக் கோவில் மற்றும் மாமல்லபுரக் கோவிலைக் காட்டிலும், கழுகு மலையில் உள்ள பாறைகள் மிகவும் கடினமானவை என்பதால், கழுகு மலையை மேலிருந்து குடைவது எளிதல்ல. பாறைகளை குடைந்தது மட்டுமின்றி, சிற்ப வேலைகளை மிக நுண்ணியமாக கையாண்டதும், தமிழர்களின் சிற்ப கலைக்கு சிறந்த எடுத்துக்காட்டு.கழுகு மலையில் ஒரே கால கட்டத்தில், சிவனுக்காக வெட்டுவான் கோவிலும், சமணர் பள்ளிக் கூடமும் சிறப்பாக இயங்கியது, நம் முன்னோரின் மத நல்லிணக் கத்திற்கு சான்றாக உள்ளது.