கு.சி.பா.அறக்கட்டளை லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கு.சி.பா.அறக்கட்டளை லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

புதன், 3 அக்டோபர், 2012

புதிய சொற்களை உருவாக்க முனைப்புடன் களம் இறங்குவோம்: தினமணி ஆசிரியர்

புதிய சொற்களை உருவாக்க முனைப்புடன் களம் இறங்குவோம்: தினமணி ஆசிரியர்

First Published : 03 October 2012 03:23 AM IST
தமிழில் புதிய, புதிய சொற்களை உருவாக்க முனைப்புடன் களம் இறங்குவோம் என்று தினமணி ஆசிரியர் கே. வைத்தியநாதன் கூறினார்.
நாமக்கல் கு. சின்னப்பபாரதி இலக்கியக் கருத்தரங்க நினைவு அறக்கட்டளை சார்பில் "கு.சி.பா. அறக்கட்டளை இலக்கிய விருதுகள்-2012' வழங்கும் விழா, நாமக்கல் செல்வம் பொறியியல் கல்லூரி வளாகத்தில் செவ்வாய்க்கிழமை நடைபெற்றது.
அறக்கட்டளையின் முதன்மை விருது, பொற்கிழி ரூ.1.50 லட்சம் ஆகியவற்றை தினமணி ஆசிரியர் கே. வைத்தியநாதனுக்கு, சென்னை உயர் நீதிமன்ற நீதிபதி வி. ராமசுப்பிரமணியன் வழங்கிப் பாராட்டுத் தெரிவித்தார்.
விருதை பெற்றுக் கொண்டு ஏற்புரையாற்றிய தினமணி ஆசிரியர் கே. வைத்தியநாதன் பேசியது:
தமிழகத்தின் மிகவும் கௌரவமான விருது, அரசால் வழங்கப்படும் விருது, பட்டம் போன்றவைகளைப் பெறுவதில் எனக்கு எப்போதும் ஆவல் இருந்ததில்லை. இந்தக் கருத்தை முன்பே ஒருமுறை வெளிப்படுத்தியிருந்தேன்.
ஆனால், கு.சி.பா. அறக்கட்டளை விருதை நான் ஏற்றுக்கொள்வதற்கு இரண்டு காரணங்கள் உள்ளன. ஓர் எழுத்தாளர் மற்றொரு எழுத்தாளருக்குத் தரும் விருது என்பதால் இதை என்னால் மறுக்க இயலவில்லை என்பது முதல் காரணம். விருது பெறுவது என்பதல்ல பெருமை. அந்த விருது யாரால் தரப்படுகிறது என்பதால்தான் விருது முக்கியத்துவம் பெறுகிறது.
நாவலாசிரியர் கு.சி.பா.வின் பெயரில் தரப்படும் இந்த விருது இலக்கியவாதியான, அப்பழுக்கற்ற நீதியரசர் ஒருவரின் திருக்கரங்களால் தரப்படுகிறது என்பது என்னை இந்த விருதை ஏற்றுக்கொள்ள வைத்தது இரண்டாவது காரணம்.
அவசரநிலைச் சட்டம் பிறப்பிக்கப்பட்ட காலத்தில் அதை எதிர்த்துக் குரல் எழுப்பியவரில் முதன்மையானவர் அப்பொழுது தமிழ்நாடு முற்போக்கு எழுத்தாளர் சங்கத்தின் துணைத் தலைவராக இருந்த கு. சின்னப்பபாரதி அவர்கள். அந்தச் சூழலில் பத்திரிகைச் சுதந்திரத்தை பேணிக் காத்ததிலும் அடக்குமுறைக்கும், அவசரநிலை சட்டத்திற்கும் எதிராகத் துணிந்து போராடியதிலும் அவரது பங்கு மகத்தானது.
தமிழுக்கும், இலக்கியத்துக்கும் கல்வெட்டு ஆய்வுகள் மூலம் அளப்பரிய பங்காற்றிய புலவர் ராசுவுக்குத்தான் இந்த முதன்மை விருது வழங்கப்பட்டிருக்க வேண்டும் என்கிற எனது கருத்தை நான் கு.சி.பா. அறக்கட்டளையினரிடம் தெரிவிக்கத் தவறவில்லை. அவர்கள், "ஏற்கெனவே எங்கள் குழு முடிவு எடுத்துவிட்டது' என்று கூறி என்னை இந்த விருதை ஏற்றுக்கொள்ளப் பணித்தனர்.
தினமணியின் மூலம் இதழியலுக்கும் தமிழுக்கும் எனது பங்களிப்புக்காக இந்த விருது தரப்படுகிறது. இந்த நேரத்தில் நான் சில உண்மைகளை உங்கள் முன் எடுத்துரைக்க விரும்புகிறேன்.
தினமணியில் பணியாற்றும் ஆசிரியர் குழுவினர் அனைவருடைய உழைப்பும் ஒத்துழைப்பும்தான் தினமணி ஆசிரியரான என்னுடைய பங்களிப்புக்குக் காரணமே தவிர, அது என்னுடைய தனிப்பட்ட பங்களிப்பாகவோ வெற்றியாகவோ நான் கருதவில்லை.
ஞாயிறுதோறும் வெளிவரும் தமிழ்மணியில் வெளியாகும் "மயங்கொலிச் சொற்கள்' பற்றி நீதியரசர் ராமசுப்பிரமணியன் குறிப்பிட்டுப் பாராட்டினார். தமிழ்மணியில் தரும் தகவல்களுக்கு பாராட்டப்பட வேண்டியவர் தமிழ்மணி பகுதியின் உதவி ஆசிரியர் இடைமருதூர் கி. மஞ்சுளாவே தவிர நான் அல்ல.
அதேபோல, இங்கே பலர் தினமணிகதிரைப் பற்றி பாராட்டினார்கள். ஞாயிறன்று வெளிவரும் இணைப்புகளில் மிகச் சிறப்பாக வெளிவரும் இணைப்பு தினமணிகதிர்தான் என்றும், அது ஒரு தகவல் பெட்டகமாகத் திகழ்கிறது என்றும் பலர் என்னிடம் கூறினார்கள். அதற்கான பாராட்டைப் பெற வேண்டியவர் செய்தி ஆசிரியர் பாவை சந்திரனே தவிர நான் அல்ல.
தலையங்கப் பக்கத்தில் வெளியிடப்படும் திருக்குறள் பற்றி நான் செல்லும் இடமெல்லாம் பாராட்டுகிறார்கள். அதற்கான பாராட்டு எங்கள் திருச்சி பதிப்பின் செய்தி ஆசிரியர் இரா. சோமசுந்தரத்தைச் சேர வேண்டுமே தவிர, எனக்கு ஆனதல்ல.
எனக்கு வழங்கப்படும் இந்த விருதும் சரி, எனக்கு தரப்படும் பாராட்டும் சரி இதற்கெல்லாம் உரியவர்கள் தினமணி ஆசிரியர் குழுவைச் சேர்ந்த அனைவருமே தவிர நான் அல்ல. அவர்கள் சார்பில் உங்கள் பாராட்டுகளை ஏற்றுக்கொள்கிறேன், அவ்வளவே.
தமிழில் புதிய சொற்களை உருவாக்க வேண்டும் என நீதிபதி ராமசுப்பிரமணியன் கோரிக்கை விடுத்துள்ளார். அத்தகைய சொற்களை ஆய்ந்து தருகின்ற பணியை பல்கலைக்கழகங்களும், அறிஞர்களும் செய்ய வேண்டும் என்று கருதி பத்திரிகைகள் அதில் முனைப்புக் காட்டவில்லை என்று நினைக்கிறேன்.
பத்திரிகைகள் புதிய பல சொற்களை வழங்கி தமிழை வளப்படுத்தும் பணியை இனி முனைப்புடன் மேற்கொள்ள வேண்டும். "வாரம் ஒரு சொல்' என வாசகர்களிடமே கொடுத்து புதிய பல சொல்களை உருவாக்கும் முயற்சியில் பத்திரிகைகள் இறங்க முடியும் என்பதை நீதியரசரின் தகவல் முன்மொழிந்திருக்கிறது.
இனிமேல் தமிழில் புதிய சொற்களை உருவாக்க முனைப்புடன் களம் இறங்குவோம். ஊழல், முறைகேடு, தவறுகளைச் சுட்டிக்காட்டுவதால் அரசியல்வாதிகள், ஆட்சியாளர்கள் திருந்திவிடுவார்களா என்று கேட்கிறார்கள். அவ்வாறு தட்டிக்கேட்பதால் அத்தகைய நடவடிக்கைகள் மட்டுப்படுகின்றன என்பதே முக்கியம். ஊழல், தவறு செய்தவர்கள் தண்டிக்கப்படவில்லையே எனக் கவலை கொள்ள வேண்டாம். தட்டிக் கேட்கப்படுவோம் என்ற உணர்வே முக்கியம்.
இன்றைய சூழ்நிலையில் வளரும் சமுதாயத்துக்கு ஆங்கிலம் உள்ளிட்ட அனைத்து மொழிகளும் கற்க வேண்டியது அவசியம்தான். ஆனால், அவர்களை "தமிழ் கற்காதே, தமிழில் பேசாதே' என கூறக் கூடாது. குழந்தைகளை ஆங்கில வழிக் கல்வியில் சேர்த்தாலும் வீட்டிலும் உறவினர்களிடமும் தாய் மொழியாம் தமிழில் பேசுவதைக் கட்டாயமாக்க வேண்டும்.
வீட்டிலும், ஒருவருக்கொருவர் சந்திக்கும்போதும், குழந்தைகளிடமும் தமிழில் பேசுவதை வழக்கமாகக் கொண்டால் மட்டுமே நாம் தமிழை அடுத்த தலைமுறைக்கு எடுத்துச் சென்று காப்பாற்ற முடியும்.
விற்பனை உத்திக்கான நாவல்களைப் படைப்பதைவிட சமூகச் சிந்தனை மேலோங்கி நிற்கும் நாவல்களே இன்றையத் தேவையாக உள்ளது. அதற்கு ஊருக்கு ஒரு கு.சி.பா, பொன்னீலன் போன்ற எழுத்தாளர்கள் உருவாக வேண்டும். அதன்மூலம்தான் தமிழ் இலக்கியம் வளரும் என்றார் வைத்தியநாதன்

தமிழ் மொழி வளர்ச்சிக்கு உதவுகிறது தினமணி

தமிழ் மொழி வளர்ச்சிக்கு உதவுகிறது தினமணி

தமிழ் மொழியின் வளர்ச்சிக்கு நாளேடுகள் உதவ முடியும் என்பதற்கு உதாரணமாக தினமணி திகழ்வதாக சென்னை உயர் நீதிமன்ற நீதிபதி வி.ராமசுப்பிரமணியன் புகழாரம் சூட்டினார்.
நாமக்கல் செல்வம் பொறியியல் கல்லூரியில் செவ்வாய்க்கிழமை நடைபெற்ற கு.சின்னப்பபாரதி அறக்கட்டளையின் இலக்கிய விருதுகள் வழங்கும் விழாவில் தினமணி ஆசிரியர் கே.வைத்தியநாதனுக்கு முதன்மை விருது, பொற்கிழியை வழங்கி அவர் பேசியது:
சுப்பிரமணிய பாரதி கையிருப்பு ஏதும் இல்லாமல் சிரமங்களுடன் எப்படி வாழ்ந்தார் என்பதை அரவிந்தர் சுட்டிக்காட்டியுள்ளார். அதைப் போலவே நாமக்கல்லில் கு.சின்னப்பபாரதி வாழ்ந்து வருகிறார்.
ஆனால், பாரதியின் பெயர் கொண்டுள்ள இந்த அறக்கட்டளை சார்பில், தமிழகத்தில் இவ்வளவு அதிகமான தொகை இலக்கியப் பரிசாக வழங்கப்படுவதை எண்ணி தமிழர்கள் பெருமைப்பட வேண்டும்.
நாளேடுகளை செய்திகளையும், விமர்சனங்களையும் முன்வைக்கும் ஒரு கருவியாக மட்டுமே கருதி வந்த நிலையில், ஒரு நாளேட்டை இலக்கியத் தரம் மிக்கதாகவும், அதன் மூலம் மொழி வளர்ச்சிக்கு உதவும் வகையிலும் நடத்த முடியும் என்பதற்கு தினமணி உதாரணமாகத் திகழ்கிறது. எந்தச் சொல் ஒருவரை ஒரு கணம் சிந்திக்க வைக்கிறதோ அதை மயங்கொலிச் சொல் என்று கூறுவர். தமிழர்களிடையே வழக்கத்தில் இல்லாமல் போய்க் கொண்டிருக்கும் மயங்கொலிச் சொல்களை இன்றும் தினமணி பயன்படுத்தி வருகிறது.
உலகம் தட்டையானது என்று மேலை நாட்டினர் கருதிக் கொண்டிருந்த 8ஆம் நூற்றாண்டில் கம்பன், பூமிப் பந்தை ககனமுட்டை என்று கூறியுள்ளார். மிராஜ் என்று ஆங்கிலத்தில் அழைக்கப்படும் கானல் நீரை காட்சிப் பிழை என்றும், தோற்ற மயக்கம் என்றும் புதிய தமிழ்ச் சொல்லில் பாரதியார் குறிப்பிட்டார்.
இவ்வாறு தமிழில் நாள்தோறும் புதிய சொல்களை உருவாக்க வேண்டும். இல்லாவிட்டால் தமிழ் மொழி மேற்கொண்டு வளராமல் போய்விடும். ஆங்கிலம் இன்று உலகின் பல்வேறு நாடுகளில் திட்டமிட்டு வளர்க்கப்படுகிறது. அதைப் போல தமிழையும் வளர்க்க நாம் முன்வர வேண்டும்.
தமிழ் எத்தகையது, தமிழரின் வரலாறு எத்தகையது என்று பழங்கதைகள் பேசிடாமல் இன்றைய காலச் சூழல் எத்தகையது, இனி நாம் என்ன செய்ய வேண்டும் என்று யோசித்தால் மட்டுமே தமிழை அடுத்த கட்டத்துக்கு கொண்டு செல்ல முடியும் என்றார் ராமசுப்பிரமணியன்.

16 படைப்பாளிகளுக்கு கு.சி.பா. அறக்கட்டளை விருது அளிப்பு

16 படைப்பாளிகளுக்கு கு.சி.பா. அறக்கட்டளை விருது அளிப்பு

நாமக்கல் செல்வம் பொறியியல் கல்லூரியில் செவ்வாய்க்கிழமை நடைபெற்ற விழாவில், கு. சின்னப்பபாரதி இலக்கியக் கருத்தரங்க நினைவு அறக்கட்டளை சார்பில், 16 படைப்பாளிகளுக்கு சிறப்பு விருதும், தலா ரூ.10,000 பொற்கிழியும் வழங்கப்பட்டன.
இந்த இலக்கிய விருதுகள் வழங்கும் விழாவுக்கு அறக்கட்டளைத் தலைவர் முனைவர் பொ.செல்வராஜ் தலைமை வகித்தார்.
உலக சமுதாய சேவா சங்க சேலம் மண்டலத் தலைவர் உழவன் ம.தங்கவேல், சேலம் கட்டடப் பொறியாளர் எஸ்.பி.ராமசாமி ஆகியோர் முன்னிலை வகித்தனர்.
அறக்கட்டளைச் செயலர் கா.பழனிச்சாமி தொடக்க உரையாற்றினார். விழாவில், முதன்மை விருதுடன், ரூ.1.50 லட்சம் பொற்கிழி தினமணி ஆசிரியர் கே.வைத்தியநாதனுக்கு வழங்கப்பட்டது. விருதை சென்னை உயர்நீதிமன்ற நீதிபதி வி.ராமசுப்பிரமணியன் வழங்கினார்.
மேலும், சிறந்த நூல்கள் எழுதிய வகையில் சிறுகதைப் பிரிவில் (அடைப்புக் குறிக்குள் நூல்களின் பெயர்கள்), கனடாவைச் சேர்ந்த அகில் என்கிற அகிலேஸ்வரன் சாம்பசிவம் (கூடுகள் சிதைந்த போது), சிங்கப்பூர் மா.அன்பழகன் (என் வானம் நான் மேகம்), கவிதைப் பிரிவில் நாமக்கல் கா.ஜெய்கணேஷ் (நட்பின் முகவரி), பிரான்ஸ் பத்மாராணி இளங்கோவன் (சிறுவர் இலக்கியம்), இலங்கை டாக்டர் ஓ.கே.குணநாதன் (பறக்கும் ஆமை), நாவல் பிரிவில் கன்னியாகுமரி மலர்விழி (தூப்புக்காரி), அமெரிக்காவைச் சேர்ந்த டாக்டர் எஸ்.சிங்காரவடிவேல் (ஆத்தா கல்லறையில் ஒரு ஆவாரஞ்செடி), கட்டுரைப் பிரிவில் ஈரோடு புலவர் செ.ராசு (வாழ்நாள் சாதனை விருது), மலேசியா ராஜம் ராஜேந்திரன் (மலேசியப் புதுக்கவிதைகள் தோற்றமும் வளர்ச்சியும்), லண்டன் சிவ.தியாகராஜா (தமிழ் மக்களும் தழுவிய மதங்களும்), சிற்றிதழ் பிரிவில் இலங்கை கலாமணி பரணீதரன் (ஜீவநதி), கணினித் தமிழ்ப் பிரிவில் கோவை ஜெ.வீரநாதன் (இணையத்தை அறிவோம்), மொழி பெயர்ப்புப் பிரிவில் திருச்சி இலக்குவன் திருவரங்கம் (இந்திய விடுதலைப் போராட்ட வரலாறு - இஎம்எஸ் நம்பூதிரிபாட்), சென்னை ஆர்.சௌரிராஜன் (கு.சி.பா. நூல் மொழிபெயர்ப்பு), இலங்கை உபாலி லீலாரத்ன (கு.சி.பா. சர்க்கரை நூல் மொழி பெயர்ப்பு), உஸ்பெகிஸ்தான் லோலா.மக்துபா (கு.சி.பா. நூல் மொழிபெயர்ப்பு) ஆகிய 16 எழுத்தாளர்களுக்கு தலா 10 ஆயிரத்துடன் பொற்கிழியும், விருதும் வழங்கப்பட்டன.
இந்த விருதுகளை தொழிலதிபர் ஜெம் கிரானைட் வீரமணி வழங்கினார்.
இந்த விருதுகளுக்கு மொத்தம் 401 படைப்புகள் வரப்பெற்றதில் சிறந்த 16 படைப்புகள் தேர்வு செய்யப்பட்டு விருது வழங்கப்பட்டிருப்பதாக அறக்கட்டளை நிர்வாகிகள் தெரிவித்தனர்.
முன்னதாக, விழா மலரை சேலம் பெரியார் பல்கலை. துணைவேந்தர் கே.முத்துச்செழியன் வெளியிட, அதை லண்டன் எழுத்தாளர் ரா.உதயணன் பெற்றுக் கொண்டார்.
மேலும், எழுத்தாளர் லோலாமக்துபா உஸ்பெகிஸ்தான் மொழியில் மொழிபெயர்த்து வெளியிட்ட கு.சி.பாவின் "பவளாயி' புதினத்தின் முதல் பிரதியை புதுதில்லி மொழி பெயர்ப்பாளர் எச்.பாலசுப்பிரமணியம் பெற்றுக் கொண்டார்.
உபாலி லீலாரத்னா சிங்கள மொழியில் மொழிபெயர்த்து வெளியிட்ட கு.சி.பா.வின் "சர்க்கரை' என்னும் புதினத்தின் முதல் பிரதியை இலங்கை கொழுந்து இதழாசிரியர் அந்தனி ஜீவா பெற்றுக் கொண்டார். இவ்விரு புதினங்களையும் நீதிபதி ராமசுப்பிரணியன் வெளியிட்டார். தொடர்ந்து, எழுத்தாளர் கு.சின்னப்பபாரதி சிறப்புரையாற்றினார்.
முன்னதாக, செல்வம் கல்வி நிறுவனங்களின் செயலர் கவீத்ராநந்தினி பாபு வரவேற்றார்.
அறக்கட்டளை உறுப்பினர் சி.ரங்கசாமி நன்றி கூறினார்.
அறக்கட்டளை ஒருங்கிணைப்பாளர் நா.செந்தில்குமார் நிகழ்ச்சிகளைத் தொகுத்தளித்தார்.