கலா இரசிகன் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கலா இரசிகன் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

ஞாயிறு, 7 ஜூலை, 2013

இரிகேசில் திருவள்ளுவர் சிலை - ஆறு. அழகப்பன் பணி

திருவள்ளுவர் படிமம் கோவிலூர் மடத்தில் முனைவர் ஆறு.அழகப்பன் அவர்களால் நிறுவப்பட்ட செய்தி குறித்து ஆசிரியர் பகிர்ந்துள்ளதை அவரிடம் தெரிவித்தேன்.  சித்திரின் சிலை எனக் கருதுவதாக ஆசிரியர் குறிப்பிட்டுள்ளதைக் குறிப்பிட்டுத் தெய்வப்புலவர் திருவள்ளுவர் பற்றி  தமிழிலும் ஆங்கிலத்திலும் இந்தியிலும் எழுதி வைக்க ஆவன செய்யுமாறு வேண்டினேன். உடன் நடவடிக்கை எடுப்பதாகத் தெரிவித்தார். கோவிலூர் மடத்தினரும் தக்க நடவடிக்கை எடுக்க வேண்டும். இச் செய்தியைப் பகிர்ந்த ஆசிரியருக்கு நன்றி. அன்புடன் இலக்குவனார் திருவள்ளுவன் /தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்!/


இந்த வார க் கலா இரசிகன்








உத்தரகாண்ட் சோகத்தை நேரில் கண்டறிய "தினமணி' ஆசிரியர் குழுவைச் சேர்ந்த சுந்தரேஸ்வரன், வெங்கடேசன், புகைப்படக் கலைஞர் ராமகிருஷ்ணன் ஆகியோருடன், ரிஷிகேஷில் உள்ள சுவாமி தயானந்த சரஸ்வதி ஆசிரமத்தில் தங்கியிருந்தேன். அதற்கு அடுத்தாற்போல இருக்கும் ஆசிரமம் காரைக்குடி கோவிலூர் மடம்.
கோவிலூர் மடத்திற்குள் நுழைந்தபோது, அங்கே கம்பீரமாகத் திருவள்ளுவர் சிலையொன்று அமைக்கப்பட்டிருந்ததைக் கண்டோம். அண்ணாமலைப் பல்கலைக்கழகத் தமிழ்த்துறைத் தலைவராக இருந்து ஓய்வுபெற்ற முனைவர் ஆறு.அழகப்பன்தான், அந்தச் சிலையை எடுத்துச் சென்று அங்கு நிறுவியதாகத் தெரிவித்தார் மடத்தின் நிர்வாகியான விசாலாட்சி ஆச்சி.
உள்ளூர்க்காரர்களுக்குத் திருவள்ளுவர் பற்றித் தெரியாதாம். அது ஏதோ ஒரு சித்தரின் சிலையாக இருக்கும் என்று கருதி வணங்குபவர்களும் இருக்கிறார்களாம். வள்ளுவப் பேராசானுக்கு ரிஷிகேஷத்தில் சிலை நிறுவியதற்காக முனைவர் ஆறு.அழகப்பனைப் பாராட்டுவது நமது கடமை.

-------------------------------------

இராஜாஜியைப் பற்றிய ஒரு பதிவு இங்கே தரப்பட்டுள்ளது.
""சேலம் சக்கரவர்த்தி ராஜகோபாலாச்சாரியாரைக் குறித்து நான் கண்டது முழுவதும் எழுத வேண்டுமானால் விரிந்து பெருகிவிடும். 1917-ஆம் வருடம் ஆகஸ்டு மாதம் முதற்கொண்டு நாங்கள் இருவரும் ஒன்றுபட்டு இந்தியாவின் சுதந்திரத்திற்காக இடைவிடாது சேவை செய்திருக்கிறோம். எனக்கு அவரிடத்தில் உண்டாகியிருக்கும் மதிப்பு அளவற்றதாகும். சமய, சமூக அரசியல் திட்டங்களில் அவர் கொண்டுள்ள கருத்துகள் பெரும்பாலும் எனக்கு உடன்பாடானதாகவே இருந்திருக்கின்றன. சென்ற 30 ஆண்டுகளில் மூன்று தடவைகளில் எனக்கும் அவருக்கும் மாறுபாடான அபிப்ராயங்கள் உண்டாயிற்று.
குறிப்பாக பாகிஸ்தான் விஷயத்தில், அன்றும் இன்றும் சக்கரவர்த்தி ராஜகோபாலாச்சாரியாருடைய கொள்கையில் நான் முற்றும் மாறுபட்டவனாகவே இருக்கின்றேன். இதில் யாருடைய நோக்கம் தவறானது என்பதை வருங்காலத்து மக்களே முடிவுகூற வேண்டியிருக்கின்றது.
இவ்வளவு மாறுபாடான அபிப்ராயம் இருந்தும் என்னுடைய அன்பு ஆச்சாரியாரிடம் தங்கி உறுதி பெற்றிருப்பதைக் குறித்து மட்டும் இங்கு எடுத்துக்காட்ட விரும்புகிறேன்.
மக்களுக்கும் தான் பிறந்த நாட்டுக்கும் சேவை செய்ய முன்வருபவர் குறிப்பாகச் சில லட்சணங்கள் பெற்றிருக்க வேண்டும். களங்கமற்ற மனதும் வெகு பரிசுத்தமான வாழ்க்கையும் மிகவும் அவசியமாகும். நான் கண்ட தேசியத் தலைவர்களில் தம்முடைய சொந்த வாழ்க்கையில் பரிசுத்தமாயிருந்தவர்களில் ஒரு சிலரைத்தான் நான் கண்டிருக்கிறேன். அவர்களில் மூன்று பெயர்களைக் கூறுவதாயின் மகாத்மா காந்தி, ராஜேந்திர பிரசாத், ராஜகோபாலாச்சாரியார் என்று சொல்வேன். இவர்களிடத்தில் நெருங்கிப் பழகும் பாக்கியம் எனக்கிருந்திருக்கின்றது. சொந்த வாழ்க்கையில் சுத்தம் இல்லாதவன் உலகத்தை ஏமாற்றிவிடலாம். ஆனால் உண்மையில் உயர்ந்தவராக முடியாது.
சக்கரவர்த்தி ராஜகோபாலாச்சாரியார் உண்மையில் பெரியவர். பரிசுத்தமான வாழ்க்கையைக் கடைப்பிடித்தவர். ஆச்சாரியாரை அண்டிப் பிழைக்கும் வெறும் ஆட்களைக்கொண்டு யாரும் ஆச்சாரியாரை மதிப்பிடக்கூடாது. இனம், ஜாதி என்ற பூசலினால் ஆச்சாரியாரின் உயர்வைத் தென்னாட்டு மக்கள் அறியத் தவறிவிட்டார்கள். ஆச்சாரியாரை எதிர்த்து பலமாகக் கிளர்ச்சிகளை நானும் நடத்தியிருக்கிறேன். அவருடைய ஒழுக்கம், தேசபக்தி, தியாகம் ஆகிய குணங்களைக் குறித்து ஒரு நாளாவது அந்தரங்கமாகவோ, பகிரங்கமாகவோ நான் குற்றம் சொன்னதில்லை. ஆச்சாரியாரைப் போன்ற ஒரு தலைவர் நமது சேலத்தாராயிருக்கிறாரே என்று நான் பெரிதும் பெருமை அடைகிறேன்.
சேலம் முனிசிபல் சேர்மனாயிருந்தவர் இந்தியாவின் கவர்னர் ஜெனரலாகியது அரசியல் சூழ்ச்சியால் அல்ல. காங்கிரசு தலைவர்களின் தயவினால் அல்ல. அவருக்கு அமைந்திருக்கும் யோக்கியதையினாலேயே ஆச்சாரியார் கவர்னர் ஜெனரலானார் என்பதே எனது தெளிவான அபிப்பிராயமாகும்.
திறமையில் அவருக்கு ஈடாக வடநாட்டுத் தலைவர்களில் நான் ஒருவரையும் எடுத்துக்காட்ட முடியவில்லை. மக்கள் யாவரும் சமம், ஒரு குலம் என்றாலும், ஆற்றலும் அறிவும் தோற்றமும் பெற்றவர்கள் லட்சத்தில் ஒருவர்கூட இல்லை. அவ்வாறு பொறுக்கி எடுத்த உலகத்துப் பெரியோர்களில் ஆச்சாரியாரும் ஒருவர்.
இந்நாட்டு மக்கள் அவரைப் பரிபூரணமாக அறிந்துகொள்ளவில்லை. நான் கண்ட ஆச்சாரியாருக்கு பணத்தின் மீது ஆசையில்லை. அவருடைய தனிப்பட்ட வாழ்க்கையில் ஒருநாளும் களங்கம் நான் காணவில்லை. அரசியல் ஆட்சி நடத்தும் அதிகாரம் தனக்கு வேண்டுமென்ற எண்ணம் அவருக்கு உண்டு. அந்நிய ஆட்சியில் அடங்கி நடக்க அவர் விரும்பவில்லை. தம்முடைய தேசீயக் கொள்கையின்படி சுயேச்சையான அதிகாரம் பெறவேண்டும். அதைத் தாமே நடத்திக்காட்ட வேண்டுமென்ற கருத்து அவர் உள்ளத்தில் வெகு காலமாக இருந்து வந்ததை நான் அறிவேன். இதில் குற்றம் இல்லை. கவைக்கு உதவாதவர்களும்கூட இதுபோன்ற ஆசையில் அடிபட்டு, நாட்டைப் பாழ்படுத்தி வரும்போது, சகலத்தையும் தம்முடைய நாட்டின், மக்களின் நலனுக்காகவே தியாகம் செய்ய வேண்டுமென்ற மிகமிக உயர்ந்த லட்சியத்தை அடிப்படையாகக் கொண்டுள்ள ஆச்சாரியார் அரசியலை நடத்த விரும்புவதில் என்ன தவறு?
தனக்கென்று வாழாது, நாட்டுக்கென்று வாழ்வதே ஈசன் வழிபாடு என்ற எண்ணமுள்ள ஆச்சாரியார் போன்றவர்களே இந்நாட்டுக்கு இப்போது தேவையாகும். இப்போதுள்ள சட்டசபையின் போக்கையும், சர்க்கார் நிர்வாகத்தின் துர்பாக்கியமான நிலைமையையும் கவனிக்கும்போது, சக்கரவர்த்தி ராஜகோபாலாச்சாரியாரை சுதந்திர இந்தியாவின் "சர்வாதிகாரி'யாக நியமித்துவிட்டால் நாட்டுக்கும் அதன் குடிமக்களுக்கும் நன்மையாயிருக்குமென்று நான் கருதுகிறேன்''.
இப்படி ராஜாஜி பற்றிக் கூறியிருப்பவர் யார் என்று தெரிந்தால் ஆச்சரியப்படுவீர்கள். ராஜாஜி தமிழக முதல்வராக இருக்கும்போது கொண்டுவந்த குலக்கல்வித் திட்டத்தை எதிர்த்துப் பேராடிய டாக்டர் வரதராஜுலு நாயுடுதான் மேலே சொன்ன கருத்தைத் தெரிவித்திருக்கிறார்.
"பெரியாரின் நண்பர் - டாக்டர் வரதராஜுலு நாயுடு வரலாறு' என்கிற பழ. அதியமானின் புத்தகத்தில் வரதராஜுலு நாயுடு பற்றியும், அவரது சமகால அரசியல் தலைவர்கள் பற்றியும் பல அரிய தகவல்களும் சம்பவங்களும் காணக்கிடைக்கின்றன. படிக்க வேண்டிய புத்தகம்.
ஏ ஏ ஏ ஏ

கடந்த வாரம் "கல்கி' வார இதழில் வெளியாகி இருந்தது கொ.மா.கோ. இளங்கோ எழுதிய "ஒண்ணாங்கிளாஸ்' என்கிற கவிதை.

வீட்டுப்பாடம் எழுதிமுடித்த
வீணா குட்டியின்
நோட்டைச் சரிபார்க்கும்
வேலை இனி அப்பாவுக்கு...

அப்பாவை அருகில் அழைத்து
உட்காரச் சொல்லி ஒரு விளையாட்டை
இப்படித்தான் தொடங்கினாள் வீணா குட்டி

""அப்பா...
நீ ஒண்ணாங்கிளாஸ் பையனாம்
ஒனக்கு நான் டீச்சராம்
வீட்டுப்பாடம் எழுதுன நோட்டை
விருட்டுன்னு எடுத்துகிட்டு வா பாக்கலாம்!''

ஞாயிறு, 31 மே, 2009

இந்த வாரம் கலாரசிகள்

First Published : 31 May 2009 01:10:00 AM IST


தமிழ் மொழியின் அடிப்படை இலக்கணத்தை வரையறுத்த நூல் தொல்காப்பியம் என்பது சொல்லித் தெரிய வேண்டியதில்லை. தொல்காப்பியத்தின் அடிச்சுவட்டில் எழுந்த புறப்பொருள் இலக்கண நூல் பன்னிரு படலம். அதனை அடிப்படையாகக் கொண்டு எழுந்த நூல்தான் புறப்பொருள் வெண்பாமாலை. புறப்பொருள் பற்றிக் கூறும் இலக்கண நூல்கள் தமிழில் மிகுதியாகத் தோன்றவில்லை. தொல்காப்பியரும் கூடப் புறத்திணை இயலில் மட்டும்தான் புறப்பொருள் இலக்கணம் பற்றிக் கூறியுள்ளார். வீர சோழியம், இலக்கண விளக்கம், தொன்னூல் விளக்கம் போன்றன ஓரளவு புறப்பொருள் பற்றிக் கூறுகின்றன என்றாலும், பழந்தமிழர் வாழ்வை விவரமாக எடுத்துரைக்கும் நூல் புறப்பொருள் வெண்பாமாலைதான் எனலாம். ""புறப்பொருள் வெண்பாமாலை, பொருளின் பகுதியாகிய புறப்பொருளுக்கு இலக்கணமும் இலக்கியமுமாக அமைந்துள்ளது'' என்பார் "தமிழ்வேள்' முனைவர் சிவ. இரத்தினம். புறப்பொருள் இலக்கணத்தை வெண்பா யாப்பினால் விரித்துரைக்கும் புறப்பொருள் வெண்பாமாலை வெட்சி, கரந்தை, வஞ்சி, காஞ்சி, நொச்சி, உழிஞை, தும்பை, வாகை, பாடாண், பொதுவியல், கைக்கிளை, பெருந்திணை என்று 12 படலங்களைக் கொண்டது. இதில் 19 நூற்பாக்கள், 361 வெண்பாக்கள், 341 கொளுக்கள் அடங்கியுள்ளன. ஆமாம், அது என்ன "கொளு'? கொளு என்பது வெண்பாவின் கருத்தைக் கொண்டுள்ள நூற்பா. இது துறையின் இலக்கணத்தை வரையறுக்கும். கொளு கூறும் இலக்கணத்திற்கு இலக்கியமாக அமைந்ததுதான் வெண்பா. புறப்பொருள் வெண்பாமாலையை இயற்றியவர் சேரர் குலத்தவரான கி.பி. 8-ஆம் நூற்றாண்டில் வாழ்ந்த ஐயனாரிதனார் என்பவர். இந்த நூலுக்கு 14-ஆம் நூற்றாண்டில் வாழ்ந்த ஜயங்கொண்ட சோழ மண்டலத்து மேற்கானாட்டு மாறகலூர்க்கிழார் சாமுண்டித் தேவநாயகர் என்பவர் எழுதிய பழைய உரை இன்றும் போற்றப்படுகிறது. புறத்துறை அனைத்தும் காட்டப்படும் இந்நூலில் தமிழர்தம் வீரம், பண்பாடு, அறநெறி மற்றும் வீர விளையாட்டுக்களான ஏறுதழுவுதல் முதலானவை விவரமாகக் குறிப்பிடப்பட்டுள்ளன. இந்த இலக்கண நூலில் காணப்படும் வெண்பாக்கள் கவிச்சுவையும் பொருட்சுவையும் கொண்டு விளங்குவன. இந்த அற்புதமான இலக்கண நூலுக்குக் கவிஞர் வ.த. இராம சுப்பிரமணியன் சமீபத்தில் உரை ஒன்று எழுதிப் பதிப்பித்திருக்கிறார். தமிழைத் தமது பிழைப்பாகக் கொள்ளாமல் தொண்டாகக் கருதி உழைக்கும் திருமுறை உரை ஆசிரியர் கவிஞர் வ.த. இராம சுப்பிரமணியனின் இந்தப் புறப்பொருள் வெண்பாமாலை உரையின் தனிச் சிறப்பு, இலக்கணம் பற்றிய ஒரு நூலை ஆர்வம் தரும் நடையில் அவர் எழுதியிருப்பதுதான். "இலக்கியத்தைப் படிக்கும் உணர்வுடன் இதனைப் படித்து மகிழலாம்' என்று "தமிழ்வேள்' தமது அணிந்துரையில் குறிப்பிட்டிருப்பது உண்மையிலும் உண்மை. சாமுண்டித் தேவநாயகரின் பழைய உரையை, "இதன் பொருள்' என்று குறுந்தலைப்பிட்டும், தமது எளிய விளக்கத்தை விளக்கவுரை என்றும் தந்திருப்பதுதான் இந்த நூலின் தனிச்சிறப்பு. மீனாட்சி புத்தக நிலையத்தாரால் வெளியிடப்பட்டிருக்கும் இந்த நூல், தமிழ் இலக்கிய, இலக்கண ஆர்வலர்களுக்கும், மாணவர்களுக்கும் ஒரு வரப் பிரசாதம் என்றுதான் கூறவேண்டும். விளக்க உரையாசிரியர் கவிஞர் வ.த. இராம சுப்பிரமணியன் தமிழுக்குத் தந்திருக்கும் கொடை இது!******தங்களது மதத்தைப் பரப்புவதற்காக வந்தவர்கள்தான் கிறிஸ்தவ மத போதகர்களும், பாதிரியார்களும். ஆனால், தமிழகம் கிறிஸ்தவத்தின்பால் காட்டிய ஈர்ப்பைவிட கிறிஸ்தவப் பாதிரியார்களுக்குத் தமிழின் மேல் ஏற்பட்ட காதல்தான் அதிகம் என்பதைக் காலம் நிரூபித்தது. தமிழில் உரைநடை இலக்கியம் தழைத்து வளர்ந்ததற்கு நாம் கிறிஸ்தவ மதபோதகர்களுக்கும், பாதிரியார்களுக்கும் நன்றி சொல்லக் கடமைப் பட்டிருக்கிறோம். கிறிஸ்தவத் தமிழ் இலக்கியம் என்பது முன்னூறு ஆண்டு வரலாறை உள்ளடக்கியது. வீரமாமுனிவர், வேதநாயக சாஸ்திரியார், கிருஷ்ணப்பிள்ளை என்று தொடங்கி, கவிதை, காப்பியம், நாடகம், புதினம், இலக்கண இலக்கிய ஆராய்ச்சி என்று தங்களது பங்களிப்புகளை வாரி வழங்கியவர்கள் பலர். கடந்த 300 ஆண்டுகளில் எழுந்த கிறிஸ்தவத் தமிழ் நூல்கள் முழுவதும் இன்றளவும் நமக்குக் கிடைக்கப் பெறாமல் உள்ளன. சில அரிய நூல்களின் படிகள் மேனாட்டு நூலகங்களிலும், காப்பகங்களிலும் பாதுகாக்கப்படுகின்றன. கிறிஸ்தவத் தமிழ் நூல்களைத் தொகுத்து வழங்கும் முயற்சியில் சென்னை பல்கலைக்கழகத்தின் கிறிஸ்தவத் தமிழ் இருக்கையின் முன்னாள் பேராசிரியர் முனைவர் ஆ. இன்னாசியின் பங்களிப்பு குறிப்பிடத்தக்கது. "கிறிஸ்தவத் தமிழ்க் கொடை' என்னும் நூலை இவர் தொகுத்து வெளியிட்டிருக்கிறார். "கிறிஸ்தவத் தமிழ் இலக்கியம் - ஓர் அறிமுகம்' என்கிற நூலை ஆசியவியல் நிறுவனத்தின் சார்பில் தி. தயானந்தன் பிரான்சிஸ் மற்றும் யோ.ஞானசந்திர ஜாண்சன் ஆகியோர் தொகுத்தளித்திருக்கிறார்கள். வீரமாமுனிவரின் "திருக்காவலூர்க் கலம்பகம்', வேதநாயக சாஸ்திரியாரின் "பராபரன்மாலை' மற்றும் "வண்ண சமுத்திரம்', சுத்தானந்த பாரதியாரின் "இயேசுநாதர் சரிதை', வீ.ப.கா.சுந்தரத்தின் "இயேசுவின் திருப்புகழ், அருட்குறள்', கவிஞர் கண்ணதாசனின் "இயேசு காவியம்' என்று 36 தேர்ந்தெடுத்த படைப்புகள் இதில் இடம் பெற்றிருக்கின்றன.******ஆசிரியர் "கலைமாமணி' விக்கிரமனிடமிருந்து வந்த கடிதத்தைப் படித்தபோதுதான் தெரிந்தது "இலக்கியபீடம்' திங்கள் இதழ் 100-வது சுவடியைக் கடந்து விட்டிருக்கிறது என்பது. "அமுதசுரபி'யிலிருந்து வெளியேறி சொந்தமாக இலக்கிய பீடத்தை விக்கிரமன் தொடங்கியது நேற்று நடந்தது போல இருக்கிறது. ஜூன் 7-ஆம் தேதி ஒரு விழா கொண்டாட இருப்பதாகவும், அந்த விழாவில் சிறந்த கவிஞர் ஒருவருக்கு பொற்கிழி வழங்க இருப்பதாகவும் அந்தக் கடிதம் மேலும் தெரிவிக்கிறது. "கலைமாமணி' விக்கிரமன் பற்றி எழுதும்போது இன்னொரு விஷயமும் ஞாபகத்திற்கு வருகிறது. அதுதான் அவர் சமீபத்தில் வெளிக் கொணர்ந்திருக்கும் "இதழாசிரியர்கள் மூவர்' என்கிற புத்தகம். இந்த "இதழாசிரியர்கள் மூவர்' புத்தகத்தைப் படிக்கும்போது, எனக்குள் ஒரு குற்ற உணர்வு. அதற்குக் காரணம் என்ன என்பது எனக்கும் ஆசிரியர் விக்கிரமனுக்கும் மட்டுமே தெரிந்த ரகசியம்! கல்கியின் எழுத்துக்கு மகுடிக்கு மயங்கும் பாம்புபோல மயங்கிய, மயங்கும் பல்லாயிரக்கணக்கான வாசகர்களில் அடியேனும் ஒருவன். கல்கியிடம் எனக்கு ஏற்பட்டது மயக்கம் என்றால், எங்கள் ஆசிரியர் சாவியிடம் எனக்கு ஏற்பட்டது மரியாதை. நான் ஏற்கெனவே பலதடவை குறிப்பிட்டிருப்பது போல, சாவி என்கிற பல்கலைக்கழகத்தில் தேர்ச்சி பெற்ற மாணவர்களில் அடியேனும் ஒருவன். கல்கியிடம் ஏற்பட்டது "மயக்கம்', சாவியிடம் ஏற்பட்டது "மரியாதை'. அப்படியென்றால் "குமுதம்' நிறுவன ஆசிரியர் எஸ்.ஏ.பி.யிடம் ஏற்பட்டது? வேறு என்ன, "பிரமிப்பு'தான்! தமிழ் இதழியலின் முன்னோடிகள் என்றால் திரு.வி.க.வும், சுப்பிரமணிய பாரதியும். வார இதழ்களின் வளர்ச்சிக்கு ஆக்கமும் ஊக்கமும் தந்த மூவர் "கல்கி', "சாவி', மற்றும் "எஸ்.ஏ.பி'. இந்த மூவரிடமும் நெருங்கிப் பழகும் பேறு பெற்றவர் ஆசிரியர் விக்கிரமன். எத்தனை எத்தனையோ சம்பவங்கள். அந்த மாமனிதர்கள் பற்றிய சுவையான செய்திகள். இந்தப் புத்தகத்தின் அட்டையை வடிவமைத்த ஆர்.சி.மதிராஜ், அந்த லேஅவுட்டுடன் சாவி சாரை சந்தித்திருந்தால் அவர் என்ன செய்திருப்பார் தெரியுமா? "கல்கிக்குக் கீழே என் படத்தை வைத்து எஸ்.ஏ.பி.யை தனியாக அல்லவா போட்டிருக்க வேண்டும் அதுதானே லாஜிக்' என்று நிச்சயமாகக் கூறியிருப்பார். காலக் கப்பலில் பின்னோக்கிப் பயணித்து கல்கி, சாவி மற்றும் எஸ்.ஏ.பி. போன்ற ஜாம்பவான்களை நேரில் சந்தித்து அளவளாவிய மகிழ்ச்சியை விக்கிரமன் அல்லாமல் வேறு யாரால் தர முடியும்?

புதன், 27 மே, 2009

கட்டுரைகள்
இந்த வாரம் காலரசிகன்

First Published : 24 May 2009 12:50:00 AM IST தினமணி


நவீன தமிழ் இலக்கியத்திற்கு அ.மாதவையாவின் பங்களிப்பைக் குறைத்து மதிப்பிட்டுவிட முடியாது. தமிழ் நாவல்களின் வளர்ச்சியில் பிரதாப முதலியார் சரித்திரத்தையும், கமலாம்பாள் சரித்திரத்தையும் தொடர்ந்து மாதவையாவின் பத்மாவதி சரித்திரமும் பெரும் பங்கு வகிக்கிறது. அரை நூற்றாண்டு காலத்துக்கு சற்று அதிகமாக வாழ்ந்தவராயினும், அ.மாதவையாவின் படைப்புகள் காலத்தால் அழியாதவை. கவிதை, கதை, நாவல், நாடகம், வாழ்க்கை வரலாறு, உரை என்று எழுதிக் குவித்தவர் அ.மாதவையா. நெல்லை மாவட்டம் பெருங்குளத்தில் பிறந்து நெல்லையிலும், சென்னை கிறிஸ்தவக் கல்லூரியிலும் படித்து அரசு உத்தியோகத்தில் இருந்தவர் அவர். "விவேக சிந்தாமணி' என்ற பத்திரிகையில் "சாவித்திரி சரித்திரம்' என்கிற தொடர் நாவலை எழுதத் தொடங்கினார் மாதவையா. என்ன காரணத்தாலோ ஆறு இயல்களுடன் அது நின்று போனது. அந்த நாவல் தொடர்ந்து வெளியாகி முழுமை பெற்றிருக்குமேயானால் அதுதான் தமிழின் இரண்டாவது நாவலாக இருந்திருக்க வேண்டும். இதற்குப் பிறகுதான் ராஜம் அய்யர் தனது கமலாம்பாள் சரித்திரத்தை எழுதினார் என்பதுதான் உண்மை. 19-ஆம் நூற்றாண்டின் பிற்பகுதியில் சீர்திருத்தமும், நாத்திகவாதமும் பேசியவர் அ.மாதவையா. சனாதன வேஷதாரி ஜனங்களுக்கு எதிராக முழங்கியவர் அவர் என்பதுடன், நவீன வாழ்க்கை முறைக்கு சமுதாயத்தை மாற்ற வேண்டும் என்பதிலும் ஆணித்தரமாக இருந்தவர். மாதவையாவின் படைப்புகளில் சமுதாயச் சீர்திருத்தம், தனிமனித ஒழுக்கம், பெண்ணுரிமை, தமிழ் மொழி உணர்வு, தேசிய எழுச்சி போன்ற கருத்தாக்கங்களைக் காணலாம். படைப்பிலக்கியத் துறையில் முன்னோடியாகவும், சாதனையாளராகவும் விளங்கிய அ.மாதவையாவின் பணிகளும் சாதனைகளும் முழுமையாக உணரப்படவோ, போற்றப்படவோ இல்லை. முதலில் "தமிழர் நேசன்' பத்திரிகையில் பகுதி நேர ஆசிரியராகப் பணியாற்றிய மாதவையா ஓய்வு பெற்ற பின் சொந்தமாகவே "பஞ்சாமிர்தம்' என்ற பத்திரிகையை வெளியிட்டார். சென்னை பல்கலைக்கழகப் பேரவை உறுப்பினராக இருந்த மாதவையா அன்றைய கூட்டத்தில், பட்டப் படிப்பில் தமிழ் கட்டாயப் பாடமாக இருக்க வேண்டும் என்று ஆணித்தரமாகப் பேசிவிட்டு அமர்ந்த சில நொடிகளில் திடீர் மாரடைப்பால் இயற்கை எய்தினார். தமிழ்ப் படைப்பிலக்கியத்திற்கு அளப்பறிய பங்களிப்பு நல்கிய அ.மாதவையாவின் சில அற்புதமான படைப்புகளைத் தொகுத்து வழங்கி இருக்கிறார்கள் "காவ்யா' பதிப்பகத்தார். நன்முத்தைத் தேடி எடுத்துக் கோர்த்த முத்துச்சரம் போன்ற தொகுப்பு!*****தர்மமூர்த்தி ராவ்பகதூர் கலவல கண்ணன் செட்டியைப் பற்றி நம்மில் எத்தனை பேருக்குத் தெரியும்? சுமார் ஒரு நூற்றாண்டுக்கு முன்பு சென்னையில் வாழ்ந்த தன வணிகர்களில் ஒருவர் அவர். பசி என்று வந்தவர்களுக்கெல்லாம் அன்ன சத்திரம் அமைத்து அவர்களைப் பசியாறச் செய்தவர். கல்விச் சாலைகளை உருவாக்கி ஏழை எளியோரின் அறிவுக் கண்ணைத் திறந்தவர். இல்லை என்று வந்தோர்க்கெல்லாம் இல்லை எனாது வாரி வழங்கிய வள்ளல். தனது சொத்து முழுவதையும் தர்மத்துக்கு எழுதி வைத்து, தனது அரண்மனை போன்ற பங்களா முதல் எல்லாவற்றையும் கல்விச்சாலைகளும், மருத்துவமனைகளும் கட்டி ஏழைகளுக்குப் பயன்படும்படி செய்ய வேண்டும் என்று உயில் எழுதி வைத்து மறைந்தவர். இலவசக் கல்வி புகட்டத் தனது திரண்ட சொத்தை எந்தப் பிரதிபலனும் எதிர்பார்க்காமல் எழுதி வைத்த கண்ணையா செட்டி போன்றவர்கள் வாழ்ந்த காலம். சென்னையை அடுத்த பட்டாபிராமில், தர்மமூர்த்தி ராவ்பகதூர் கலவல கண்ணன் செட்டி இந்துக் கல்லூரியின் ஆண்டு மலர் அடியேனின் பார்வைக்கு அனுப்பப்பட்டிருந்தது. அதிலிருந்த விவரங்கள்தான் மேலே தரப்பட்டவை. அந்த ஆண்டு மலரில் இடம் பெற்றிருந்த ஒரு கவிதை மனதைத் தொட்டது. அந்தக் கல்லூரியின் தமிழ்த் துறை விரிவுரையாளர் லோகநாதன் எழுதிய "அஞ்சல் பெட்டி வானம்' என்ற கவிதை நெஞ்சைத் தொட்டது என்பதைவிட நெஞ்சில் தைத்தது என்பதுதான் நிஜம். இதோ,புஞ்சைக் காட்டில்நன்செய்பயிரிடத்தான்அப்பாநினைக்கின்றார்!அம்மாவுக்கும்ஆசைதான்தென்னை மரத்தின்நிழலில் நின்று இளநீர்குடிக்க!என்னநினைத்துஎன்ன செய்யவெறும் வாயைமென்றகதையாய்எப்பொழுதும்வாய் திறந்தேகிடக்கும்அஞ்சல்பெட்டியாகவே வானம்!*****"இன்றும் நிகழ்கிறது உனக்கான காத்திருப்பு' என்றொரு கவிதைத் தொகுப்பு. கவிஞர் சூர்யநிலாவின் இரண்டாவது தொகுப்பு இது. இவரது முதல் தொகுப்பான "சில்லுகள்' தொகுதியில் இடம்பெற்றிருந்த நடை என்ற கவிதை கோவை பாரதியார் பல்கலைக்கழகப் பாடத்திட்டத்தில் சேர்க்கப்பட்டிருக்கிறது. படித்து, ரசித்து உங்களுடன் பகிர்ந்துகொள்ள விழையும் சில அழுத்தமும் ஆழமுமான ரசனைமிக்க வரிகள்.""ஆலையொன்று எங்களூருக்குவந்தது.தினமும் கிடைத்தக் கூலிகள்எங்கள் வயிற்றின்ஈரத் துணிகளைஉலர்த்திப் போனது,மிகவும் மகிழ்ச்சியாகயிருந்தோம்.ஒரு நாள் போல்ஆனந்த காலங்கள்அதிக நாள் தொடராமல்ஆலைக் கழிவுகளால்மலடாகத் தொடங்கினஎங்கள் மண்.இளநீரில் கூடபரவத் துவங்கின பச்சையம்வீழத் தொடங்கின.எங்களின் வாழ்க்கை.மிகவும் மகிழ்ச்சியாயிருந்தோம்,முன்பெல்லாம்!