தோழர்தியாகு எழுதுகிறார் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
தோழர்தியாகு எழுதுகிறார் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

செவ்வாய், 12 செப்டம்பர், 2023

தோழர்தியாகு எழுதுகிறார் 208 : இடையன்குடி – காலுடுவெல்லுக்கு முன்

      12 September 2023      அகரமுதல



(தோழர்தியாகு எழுதுகிறார் 207 : தமிழ்மணக்கும் காலுடுவெல் இல்லம் – தொடர்ச்சி)

இடையன்குடி – காலுடுவெல்லுக்கு முன்

இராபருட்டு காலுடுவெல் குறித்தும் அவரது மொழியியல் ஆய்வு, அதன் முடிவுகள் குறித்தும் அண்மைக் காலத்தில்தான் நிறைய படித்தேன். அரசியல் வகுப்புக்காகப் படித்தமையால் சற்று ஆழ்ந்தே படித்தேன் எனலாம்.

மொழிநூல் அறிஞர் காலுடுவெல் ‘திராவிடம்’ என்ற சொல்லை ஆண்டார் என்ற ஒரே காரணத்துக்காக  உடனடி அரசியல் தேவைகளுக்காக அவரைக் கொச்சைப்படுத்தும் போக்குகள் தலைதூக்கியிருக்கும் இத்தருணத்தில் காலுடுவெல்லை முறையாக அறிந்து கொள்வதும் அறியச் செய்வதும் தேவை எனக் கருதுகிறேன்.

அவர் தமிழியல் ஆய்வாளராக மட்டும் இருந்து விடாமல், தமிழ் மண்ணில் வாழ்ந்து, தமிழ் மக்களோடு அரை நூற்றாண்டுக்கு மேல் ஊடாடிப் பணி செய்தவர் என்ற உண்மை அவரை எல்லாக் கோணங்களிலிருந்தும் பயிலும் ஆவலைத் தூண்டியது. இது அறிவுசார் ஈடுபாட்டுடன் ஓர் உணர்வுசார் நேசமும் வளரக் காரணமாயிற்று.

இராபருட்டு காலுடுவெல் செய்த ஆய்வுகளும், வாழ்ந்த வாழ்க்கையும், ஆற்றிய பணிகளும் சில விடைகள் கண்ட போதே பல வினாக்களையும் விட்டுச் சென்றன. அவர் வாழ்ந்த இடையன்குடிக்குப் புறப்படும் போதே, அந்த ஊர் பற்றிய முரண்பட்ட செய்திகளை அறிந்துதான் வைத்திருந்தேன். இடையன்குடி என்ற ஊர்ப் பெயர் பற்றிப் பலரும் இப்படிப் பலவாறு எழுதியிருக்கின்றனர்:

1)      இடையன்குடி ஆதியில் இடையர்களின் குடியிருப்பாக இருந்தது. சமயப் பரப்புப் பணிக்காக அங்கு வந்து குடியேறிய இராபருட்டு காலுடுவெல் அங்குள்ள நாடார்களைக் கிறித்துவ சமயத்துக்கு மதமாற்றி, ஊரை முழுமையாகச் சீரமைத்தார். மற்ற கிறித்துவ மத போதகர்கள் தாங்கள் உருவாக்கும் குடியிருப்புகளுக்கு விவிலியப் பெயர்கள் சூட்டுவது வழக்கம். ஆனால் காலுடுவெல் அப்படிச் செய்யாமல் இடையன்குடி என்ற பழைய பெயரையே தக்கவைத்துக் கொண்டார்.

2)      அயர்லாந்தியராகப் பிறந்து சுகாட்டுலாந்தில் வளர்ந்த காலுடுவெல்லின் சொந்த ஊர் SHEPHERDYARD. இதைத் தமிழாக்கினால் இடையன்குடி என்று வரும். இடையன்குடியைக் கால்டுவெல் தேர்ந்தெடுக்க இது ஒரு காரணமாக இருக்கலாம் என்று ஒரு கருத்து.

3)      முன்பு இடையன்குடி வேறு பெயரால் வழங்கியிருக்க,  காலுடுவெல்தான் சொந்த ஊர்ப் பாசத்தால் இடையன்குடி என்று பெயர் சூட்டியிருக்க வேண்டும்.

4)      இயேசு கிறித்துவை ஆயராகவும் மக்களை ஆட்டு மந்தையாகவும் கருதும் கிறித்துவ மரபையொட்டி இடையன்குடி என்ற பெயரே காலுடுவெல்லுக்குப் பொருத்தமான பெயராகத் தெரிந்திருக்கலாம்.

நான் இந்தச் செய்திமுரண்கள் பற்றி கிறித்துவ சமய போதகர்கள் சிலரிடம் வினவிய போது, அவர்களும் மாறுபட்ட கருத்துகளே சொன்னார்கள். காலுடுவெல் பற்றி எழுதப்பட்ட நூல்கள் என்ன சொல்கின்றன என்று பார்த்தால் ஓரளவு தெளிவு பிறக்கலாம்.

இரா.பி. சேதுப்பிள்ளை எழுதிய ‘காலுடுவெல் ஐயர் சரிதம்’ நம்பகமானது என்று அறிவுலகத்தால் ஏற்றுக் கொள்ளப்படுகிறது. அந்நூலை இப்போதுதான் தேடிப் பிடித்தேன். அழகான தமிழில் சுருக்கமாகவும் சுவைபடவும்  எழுதியுள்ளார். இடையன்குடிக்கு இராபருட்டு காலுடுவெல் வந்து சேர்ந்தது பற்றி சேதுப்பிள்ளை எழுதியிருப்பதைப் படிப்போம்.

“மேல்நாட்டு நாகரிகம் தமிழ்நாட்டிற் பரவத் தொடங்கிய காலந்தொட்டு அந்நாட்டுச் சமயங்களைத் தமிழகத்திற் பரப்பக் கருதிய ஐரோப்பிய ஆர்வலர் பலர் தமிழ்மொழி பயிலத் தலைப்பட்டார். தெள்ளிய தமிழ் நூல்களின் சுவை அறிந்து திளைத்தார் சிலர். தமிழிலமைந்த அற நூல்களின்  திறங்கண்டு வியந்து அவற்றை ஐரோப்பிய மொழிகளிற் பெயர்த்தமைத்தார் சிலர். மேலை நாட்டு மொழிநூல் முறைகளைத் துணைக்கொண்டு தமிழ் மொழியை ஆராய்ந்தார் சிலர். இம்முத்திறத்தாரும் தமிழ்மொழிக்குத் தகைசான்ற தொண்டு புரிந்துள்ளார்.”

“காலுடுவெல் ஐயர் தமிழகத்தையே தாயகமாய்க் கொண்டார்; தென்தமிழ் நாடாய பொருனை நாட்டில் ஐம்பதாண்டுகட்கு மேலாக வதிந்து அருந் தொண்டாற்றினார். ஏழை மாந்தர்க்கு எழுத்தறிவித்தார்; சமய ஒழுக்கத்தைப் பேணக் கருதித் திருச்சபைகள் நிறுவினார்; தூர்ந்து கிடந்த துறைகளைத் துருவினார்; திருநெல்வேலிச் சரித்திரத்தை வரன்முறையாக எழுதி உதவினார்.”

‘பொருனை நாடும் ஏசு மதமும்’ என்ற தலைப்பில், கிறித்துவம் நெல்லைச் சீமையில்  பரவிய கதையை இரா.பி. சேதுப்பிள்ளை எடுத்துரைக்கிறார். காலுடுவெல் வருகைக்கு முன்பே ஏசு மதம் பொருனையாற்றின் இரு கரையிலும் பரவி, மெல்ல அயலூர்களிலும்  நுழையத் தொடங்கியது.

“பாளையங்கோட்டைக்கும் திருச்செந்தூருக்கும் இடைப்பட்ட நெடுநிலத்தில் பெருந்தொகையினராய் வாழும் பழங்குடிகள் நாடார் என்று அழைக்கப்படுவர். இவ்வகுப்பார் வாழும் நாட்டில் கிறித்து மதம் பரவிய பான்மை அறியத்தக்கதாகும்…”

புதிய மதத்தார்க்குப், பழைய மதத்தாரால் தீங்கு விளையும் என்றஞ்சி, கிறித்துவத்துக்கு மாறியவர்கள் தனிக் குடியிருப்பு அமைத்துக் கொள்வது வழக்கமாயிற்று.

“அக்காலத்தில் நாடார்கள் சிறந்து வாழ்ந்த ஊர்களில் இடையன்குடியும் ஒன்றாகும். ஆதியில் முல்லைநில மக்களாய இடையர் மிகுதியாகக் குடியிருந்தமையால் இடையன்குடி என்று பெயர் பெற்ற அவ்வூரில் பத்தொன்பதாம் நூற்றாண்டின் தொடக்கத்தில் நாடார் வகுப்பினரே பெருந்தொகையினராய் வாழ்ந்து வந்தார்கள். வேத விளக்கச் சங்கத்தின் சிறந்த தொண்டராகிய கெற்றிக்கு என்பார் தென்னாட்டில் கிறித்து மதம் செவ்வையாகப் பரவக் கேட்டு மனமகிழ்ந்து நாடாருறையும் நாடுபோந்து ஆயிரத்து முந்நூறு மக்களை ஞான நீராட்டுவித்தார்….”  

ஆக, இரா.பி. சேதுப்பிள்ளை எழுதிய “காலுடுவெல் ஐயர் சரிதம்” இடையன்குடி பற்றிய சில உறுதியான செய்திகளைத் தருகிறது. அது ஆதியில் மெய்யாகவே இடையர் குடியிருப்பாக இருந்துதான் இடையன்குடி எனப் பெயர் பெற்றது. காலப்போக்கில் நாடார்கள் அந்த ஊரில் பெரும்பான்மை ஆகி விட்டனர். இது காலுடுவெல் தந்த பெயர் என்பது உண்மையன்று. அவர் விரும்பிய பெயராக இருந்திருக்கலாம். காலுடுவெல் வருகைக்கு முன்பே நாடார் சமுதாய மக்கள் கிறித்துவம் தழுவத் தொடங்கி விட்டனர்.

அப்படியானால் காலுடுவெல் வரும் போதே இருந்த இடையன்குடி எப்படி இருந்தது? இடையன்குடியில் அவர் ஏற்படுத்திய தாக்கம் என்ன?

இரா.பி. சேதுப்பிள்ளை வளமார் தமிழில் வாரி வழங்கும் செய்திகள் கருத்துக்குரியவை. பருகுவோம்.     (ஏற்றமா? மறக்கவில்லை அன்பரே! திரித்துவக் கோயில் பற்றிச் சொல்லும் போது சொல்கிறேன்.) 

(தொடரும்)
தோழர் தியாகு
தாழி மடல் 235
 
 

திங்கள், 11 செப்டம்பர், 2023

தோழர்தியாகு எழுதுகிறார் 207 : தமிழ்மணக்கும் காலுடுவெல் இல்லம்

 




(தோழர்தியாகுஎழுதுகிறார் 206 : வேண்டும்சித்திரவதைத்தடுப்புச்சட்டம் 2/2-தொடர்ச்சி)

தமிழ் மணக்கும் காலுடுவெல் இல்லம்

 அயல்நாட்டுப் பயணங்களில் வரலாற்று நினைவுச் சின்னங்களைப் பார்க்கப் பெரிதும் விருப்பப்படுவேன். உள்நாட்டிலும் பார்க்க வேண்டியவை பலவும் இருப்பதைக் கால்ந்தாழ்ந்துதான் உணர்ந்தேன். ஆனால் அயல்நாடோ உள்நாடோ அதற்காக யாரையும் தொல்லைப்படுத்தக் கூடாது என்று கவனமாக இருப்பேன். நமக்குள்ள ஆர்வத்தில் கொஞ்சமாவது அவர்களுக்கும் இருக்க வேண்டும். இன்றேல் ஒன்றும் செய்ய முடியாது.

அமெரிக்கப் பயணத்தில் நான் சென்று பார்த்தவைபற்றி ஒரு நூலே எழுதலாம், அவ்வளவு செய்திகள் உண்டு. சிக்காகோவில் மே நாள் நினைவுச் சின்னத்தைத் தேடி அலைந்தது பற்றியும், இரண்டாவது முறை அங்கு சென்ற போது சின்னம் எழும்பியிருந்தது பற்றியும் முன்பே எழுதியுள்ளேன். அந்த எழுத்துகளைத் தேடியெடுத்து விரைவில் உங்களோடு பகிர்வேன்.

 ஐரோப்பியப் பயணத்தில் என்னோடு நாடு நாடாக அலைந்து என் ஆர்வத்தை முழுமையாகப் பகிர்ந்து கொண்டவர் “சர்வே அண்ணா”. (இப்படித்தான் மற்றவர்கள் அவரை அழைப்பார்கள். நான் அவருக்கு எப்போதும் “தியாகண்ணா”தான்.) நள்ளிரவில் சுழிகுறைவில்(minus)குளிரில் இடிபட்ட பெருலின் சுவர் பார்க்கச் சென்றது என்றும் நெஞ்சு விட்டகலாது.

 செர்மன் நாட்டின் (இ)ரைன்லாந்தில் திரையர் என்ற ஊரில் காரல் மார்க்குசு பிறந்தார் என்று படித்திருப்போம். மார்க்குசு பிறந்த இல்லத்தைப் பார்க்க சர்வே என்னை அழைத்துப் போய் “ஆசை தீரப் பார்த்துப் பேசி விட்டு வாருங்கள்” என்று அனுப்பிய போதும் –

இலண்டனில் மார்க்குசு சிந்திப்பதை நிறுத்தி விட்டு நிரந்தரமாக உறங்கும் ஐகேட்டு கல்லறைக்கு யமுனா இராசேந்திரன் என்னை அழைத்துப் போய், “தோழர், இதோ மார்க்குசு, போய் கொஞ்சி விட்டு வாருங்கள்” என்று அனுப்பி விட்டுப் படங்களாகச் சுட்டுத் தள்ளிய போதும் –

ஏற்பட்ட அதே ஆவல் கலந்த துடிப்போடு இராபருட்டு காலுடுவெல் வாழ்ந்த ஊரையும் இல்லத்தையும் காண அருள்திரு கிப்புசனோடு விரைந்து கொண்டிருந்தேன். திசையன்விளை ஊருக்குள் போவோமா? புறவழிச் சாலையில் போவோமா? காலுடுவெல் இடையன்குடியில் வாழ்ந்த போது அவ்வப்போது போய் வந்த ஊர்கள் திசையன்விளையும் உவரியும் என்று படித்துள்ளேன். ஆனால் இப்போது திசையன்விளைக்குள் போனால் நேரமாகி விடும் என்பதால் வண்டியைப் புறவழிச் சாலையில் விடச் சொன்னோம். இடையன்குடி பார்த்து விட்டு உவரிக்குப் போகலாம் என்றார் கிப்புசன்.

 இடையன்குடி என்ற பெயர்ப் பலகை வந்து விட்டது. நெருங்கி விட்டோம். ஒரு பெரிய வரவேற்பு வளைவு –

“திராவிட மொழிகளின் ஒப்பிலக்கணம் தந்த

தமிழறிஞர் காலுடுவெல் வாழ்ந்த இல்லம்”

என்று அறிவிக்கிறது.

 அதைக் கடந்து போனால் காலுடுவெல் வாழ்ந்த இல்லம். நடுக் கூடத்தில் அழகான காலுடுவெல் சிலை.  அருள்திரு கிப்புசன், நெல்லை பீட்டர் ஆகியோருடன் சிலை அருகில் நின்று படம் எடுத்துக் கொண்டேன்.

 அண்ணா முதல்வராக இருந்த போது 1968 உலகத் தமிழ் மாநாட்டை ஒட்டிகங காலுடுவெல்லுக்குச் சென்னை கடற்கரையில் சிலை வைக்கப்பட்டது. பிறகு கலைஞர் முதல்வராக இருந்த போது 2011இல்தான் காலுடுவெல் இல்லம் நினைவுச் சின்னம் ஆக்கப்பட்டுள்ளது.

 கலைஞர் எப்போதுமே வரலாற்று நினைவுச் சின்னங்களில் ஆர்வம் உள்ளவர். குமரிக் கடலில் வள்ளுவருக்கு வானுயரச் சிலை அமைத்த போது அதை வரவேற்றுத் தமிழ்த் தேசம் இதழில் பேராசிரியர் மருதமுத்து எழுதிய கட்டுரையை வெளியிட்டோம். பூம்புகாரில் சிலப்பதிகாரக் கலைக் கூடம், சென்னையில் வள்ளுவர் கோட்டம் முதலான  நினைவுச் சின்னங்கள் வெறும் நினைவூட்டும் சின்னங்கள் மட்டுமல்ல. அவை தமிழர்களுக்கு வரலாற்று உணர்வும் வரலாற்று அறிவும் ஊட்ட வல்லவை. கலைஞர் என்ற அடைமொழிக்குப் பொருத்தமான பணிகள் இவை. காலுடுவெல் நினைவில்லம் அமைத்தமைக்காகவும் தமிழ் மாணவர்களின், வரலாற்று மாணவர்களின் நன்றிக்கு உரியவர் ஆகிறார் கலைஞர். கலைஞர் நூற்றாண்டு கொண்டாடப்படும் இந்த நேரத்தில் கலைஞர் அமைத்த நினைவுச் சின்னங்களையும் அவை காட்டும் வரலாற்றையும் இலக்கியத்தையும் தொகுத்து எழுதினால் நன்றாக இருக்கும். யார்?

     சிலை அமைந்துள்ள கூடத்தில் பார்க்கவும் படிக்கவும் கண்ணாடியிட்ட பல அருஞ்செய்திகள் – ஒவ்வொன்றாக நின்று படித்தேன். காலுடுவெல் குடும்ப (FAMILY TREE) வரைபடம் குறிப்பிடத்தக்கது.  எலிசா பற்றிய செய்திகள் அவர் காலுடுவெல் பணிகளுக்குத் துணை நின்றது தவிர தாமாகவே செய்த பணிகளையும் காட்டுகிறது.

 ‘காலுடுவெல் ஐயர்’ உடுத்திய கருப்பு அங்கியை ஒரு கண்ணாடிப் பேழைக்குள் பாதுகாத்துத் தொங்க விட்டுள்ளனர். உயரமான காலுடுவெல் அந்த அங்கி உடுத்தி எவ்வளவு கம்பீரமாகக் காட்சியளித்திருப்பார் என்று மனக் கண்ணால் காணலாம்.

 காலுடுவெல்லின் புத்தக அறை, அவர் அமர்ந்து படித்த நாற்காலி ஒவ்வொன்றையும் எனக்குக் காட்டி விளக்கமும் தந்தார் அருள்திரு கிப்புசன். அங்கிருந்த நினைவகப் பணியாளரும் எல்லா வகையிலும் எங்களுக்கு உதவினார்.

 இல்லத்தைப் பார்த்து முடித்த பின் காலுடுவெல் கட்டிய அந்தத் தூயத் திரித்துவ தேவாலயத்துக்குச்(Holy Trinity Church)  சென்றோம். அது பற்றி நான் முன்பே நிறைய படித்துள்ளேன், படமாகவும் பார்த்துள்ளேன். இப்போது நேரில் பார்க்கும் வாய்ப்பு. தேவாலயத்க்தின் பலிபீடத்தில்தான் காலுடுவெல் இறந்த பின் புதைக்கப்பட்டார். அருகிலேயே எலிசாவும் புதைக்கப்பட்டுள்ளார்.

சுற்றிப் பார்த்து முடித்து இளைப்பாறித் தேநீர் அருந்திய பின் “இன்னும் ஏதும் பார்க்க வேண்டுமா?” என்று கேட்டேன். “இருக்கிறது, உங்களால் ஏற முடியுமா?” என்று கிப்புசன் கேட்க, “ஏறலாமே?” என்று விடையிறுத்தேன்.

 ஏற்றம் என்றாலும் செங்குத்தான ஏற்றம்! என் அகவைக்குக் கடினம்தான்! எப்படியோ ஏறி விட்டேன். யார் இடையன்குடி சென்றாலும் இந்த ஏற்றம் இல்லையேல் பயணம் முழுமை பெறாது. நாளை சொல்கிறேன்.

(தொடரும்)
தோழர் தியாகு
தாழி மடல் 234