தமிழர்களின் சோகம் தொடர்கிறது - குற்றச்சாட்டு

இலங்கையில் தமிழர்களின் சோகம் தொடர்கிறது* ஐ.நா., மனித உரிமைகள் ஆணைய த் தலைவர் குற்றச்சாட்டு

கொழும்பு:""இலங்கையில், நான்கு ஆண்டுகளுக்கு முன் உள்நாட்டுப் போர் முடிந்திருந்தாலும், தமிழர்களின் சோகம் இன்னும் தொடர்ந்து கொண்டிருக்கிறது,'' என, ஐக்கிய நாடுகள் சபையின், மனித உரிமைகள் ஆணைய தலைவர் நவநீதம் பிள்ளை தெரிவித்து உள்ளார்.

இலங்கையில், போரால் பாதித்த பகுதிகளில் நடக்கும், மறுவாழ்வு பணிகள் மற்றும் மனித உரிமைகள் சூழ்நிலையை பார்வையிட, கடந்த வாரம், நவநீதம் பிள்ளை அங்கு வந்தார்.

ஒரு வார சுற்றுப் பயணத்திற்குப் பின், கொழும்பில், நேற்று அவர் அளித்த பேட்டி: இலங்கையில், விடுதலை புலிகளுக்கும், ராணுவத்திற்கும் இடையே நடந்த போர், முடிந்து நான்கு ஆண்டுகளாகிவிட்டன. இருப்பினும், தமிழர்களின் உரிமைகளைப் பொறுத்தவரை, இலங்கை அரசு, சர்வாதிகாரப் போக்குடனேயே செயல்படுகிறது. போர் முடிந்திருந்தாலும், தமிழர்களின் துயரம், இன்னும் தீர்ந்த பாடில்லை.போரினால் பாதிக்கப்பட்ட பகுதிகளில் நடக்கும், மறு குடியமர்த்தல் மற்றும் கட்டமைப்பு வசதிகளை உருவாக்கும் பணிகள், திருப்திகரமாக உள்ளன. நான் சந்தித்தவர்களில் பலர், பல்வேறு வகையில், தாங்கள் துன்புறுத்தப்பட்டதாகவும், பழி வாங்கப்பட்டதாகவும் தெரிவித்தனர்.இலங்கையில், தமிழர்களுக்கு எதிரான நடவடிக்கைகள் குறித்து, விமர்சனம் செய்வோர் மீது, அடிக்கடி தாக்குதல் நடத்தப்படுகிறது. இவற்றை, ஐ.நா., சபையின் கவனத்திற்கு கொண்டு செல்வோம்.இலங்கையில், ஜனநாயகம் குழிதோண்டி புதைக்கப்பட்டு உள்ளது. சட்டம் மற்றும் விதிகள் அழிக்கப்பட்டு உள்ளன. நான், விடுதலை புலிகளின் பெண்கள் பிரிவைச் சேர்ந்தவள் என, இலங்கை அமைச்சர்கள் மூவர், என் மீதே தனிப்பட்ட முறையில், அவதூறு கூறியுள்ளனர். இது, முழுக்க முழுக்க உண்மைக்கு புறம்பானது.இவ்வாறு, நவநீதம் பிள்ளை கூறினார்.

வாழைப்பழ அளவில் தேங்காய் : "தானே' புயலால் தொடரும் சோகம்

வாழைப்பழ  அளவில்  தேங்காய் : "தானே' புயலால் தொடரும் சோகம்

பரங்கிப்பேட்டை: "தானே' புயல் பாதிப்பால் தேங்காய், மெலிந்து வாழைப்பழம், "சைசில்' நீண்டு உள்ளதால் விவசாயிகள் அதிர்ச்சியடைந்துள்ளனர். கடலூர் மாவட்டத்தில் பயிரிடப்பட்டிருந்த பல ஆண்டு பலன் தரக்கூடிய தென்னை, மா, பலா, முந்திரி உள்ளிட்ட மரங்கள், "தானே' புயல் கோரத்தாண்டவத்தில் சின்னாபின்னாமானது. வாழ்வாதாரத்தை இழந்த விவசாயிகள், அரசு வழங்கிய நிவாரணத்தை கொண்டு, புயலில் தப்பிய மரங்களை பராமரிக்க துவங்கியுள்ளனர். இருப்பினும், புயலில் தப்பிய தென்னை மரங்களில், தேங்காய் காய்ப்பு குறைவாகவே உள்ளது. பரங்கிப்பேட்டை அடுத்த பெரியகுமட்டி கிராமத்தில், தானே புயலில் தப்பிய தென்னை மரங்களில், காய்க்கும் தேங்காய்கள் ,திறட்சி இல்லாமல், மெலிந்து வாழைப்பழம் அளவில் உள்ளது. மட்டைகள் எப்போதும்போல் பெரியளவில் உள்ளது. ஆனால் இளநீரில் ஒரளவு தண்ணீர் இருந்தாலும் முன்பு போல இல்லை. அவை முற்றிய பின் பருப்பின் அடர்த்தி குன்றி, தண்ணீரின்றி, மெலிந்து கொப்பரையாக மாறி விடுகிறது. இதனால், தென்னை மரங்களை தோட்டக்கலைத்துறை அதிகாரிகள் பார்வையிட்டு, தரமான தேங்காய் விளைச்சலுக்கு ஆலோசனை வழங்க வேண்டும் என விவசாயிகள் எதிர்பார்க்கின்றனர்.