கல்வெட்டுகள் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கல்வெட்டுகள் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வெள்ளி, 22 அக்டோபர், 2010

குமரி மாவட்டத்தில் ராஜராஜன் கால கல்வெட்டுகள்


நாகர்கோவில், அக். 21: கன்னியாகுமரி மாவட்டத்திலுள்ள பெரியகுளம் எழுத்திட்டான் பாறையில் கி.பி. 1012 ஆம் ஆண்டை சேர்ந்த ராஜராஜ சோழன் கால கல்வெட்டுகள் கண்டறியப்பட்டுள்ளன.  இவற்றைப் பராமரிக்க வேண்டும் என்று இன்டாக் அறக்கட்டளை வலியுறுத்தியுள்ளது.  இந்த கல்வெட்டுகளை ஆராய்ந்த குழுவுக்கு தலைமை வகித்த இன்டாக் அறக்கட்டளைத் தலைவர் ஆர்.எஸ். லால்மோகன் கூறியதாவது:  கன்னியாகுமரி மாவட்டம், மணவாளக்குறிச்சி ஊராட்சியிலுள்ள பெரியகுளத்தின் அருகே எழுத்திட்டான் பாறை உள்ளது.  இந்த பாறையில் 3 கல்வெட்டுகள் காணப்படுகின்றன. இவற்றில் ஒன்று கி.பி. 1012-ம் ஆண்டு சோழமன்னர் ராஜராஜ சோழனால் எழுதப்பட்டது.  இக் கல்வெட்டு, பெரியகுளக்கரை உடைப்பு எடுத்தால் அதை தடுத்து அணை கட்டி பராமரிப்பதற்காக முதலாம் ராஜராஜ சோழன் 1012-ம் ஆண்டில் நிலக்கொடை வழங்கியதை குறிக்கிறது.  குளத்தைப் பராமரிக்க தவறினால் 85 களஞ்சியம் பொன் தண்டனையாக கொடுக்க வேண்டும். இந்த பணமும் பெரியகுளம் பராமரிப்புக்கு செலவழிக்கப்பட வேண்டும் என்று எழுதப்பட்டுள்ளது.  மற்றொரு கல்வெட்டு அதன் அருகே 50 அடி தொலைவில் காணப்படுகிறது. இதில் 1597 சித்திரை 14-ம் தேதி எனப் பொறிக்கப்பட்டுள்ளது. இந்த கல்வெட்டு குறித்து இதுவரை அறியப்படவில்லை. ஏடுகளில் குறிப்பிடப்படவும் இல்லை.  குலசேகரப்பெருமாள் ரவிவர்மன் காலத்தில் இது எழுதப்பட்டுள்ளது. அங்குள்ள கோயிலுக்கு குரு பூஜைக்கு அரசனால் நிலம் கொடுக்கப்பட்டதை இந்த கல்வெட்டு கூறுகிறது.  இக் கல்வெட்டு மண்ணுக்கு அடியில் பல ஆண்டுகள் புதைந்து இருந்ததால் எழுத்துகள் மங்கிவிட்டன.  இந்த கல்வெட்டில் காணப்படும் எழுத்துகளுக்கும், ராஜராஜ சோழன் கல்வெட்டில் காணப்படும் எழுத்துகளுக்கும் மிகவும் வேறுபாடுகள் உள்ளன.  மேலும் ஒரு கல்வெட்டு இங்கு காணப்படுகிறது. இந்த கல்வெட்டின் எழுத்துகளுக்கும் 2-வது கல்வெட்டின் எழுத்துகளுக்கும் அதிக வேறுபாடுகள் இல்லை. இது 400 ஆண்டுகள் பழமை வாய்ந்ததாகத் தெரிகிறது.  இந்த பழமையான 3 கல்வெட்டுகளும் எந்த பராமரிப்பும், பாதுகாப்பும் இல்லாமல் இருக்கின்றன.  இவை அழியும் தருவாயில் இருப்பதால் இவற்றைப் பாதுகாக்க நடவடிக்கை எடுக்க வேண்டும்.  கல்வெட்டுகளை சுற்றிலும் சிமென்ட் தூண்கள் அமைத்து கம்பி வேலியிட வேண்டும் என்றார் லால்மோகன்.  இன்டாக் அங்கத்தினர்கள் கல்வெட்டு அறிஞர் செந்தீ நடராசன், ஆசிரியர் ஆப்ரகாம் லிங்கன், ஜெபர்சன், சந்திராசிங், ஜார்ஜ், வார்டு உறுப்பினர் எஸ். ஸ்ரீகுமார், அருள் அமலன், ஆதிகேசவன், ஏ. ராஜாமணி உள்ளிட்டோர் ஆய்வு குழுவில் இடம்பெற்றிருந்தனர்.

திங்கள், 25 ஜனவரி, 2010

ஆராயப்பட வேண்டிய அரிய கல்வெட்டுகள்!



சென்னை, ஜன.24: பல்லவ மன்னர்கள் மற்றும் அவர்களுடைய காலத்தில் வாழ்ந்த சிற்பிகளின் பெயர்கள் அடங்கிய அரிய கல்வெட்டுகள் அழியும் நிலையில் உள்ளன.பல்லவ மன்னர்களால் கட்டப்பட்ட அரிய சிவன் கோயிலும் போதிய பராமரிப்பு இன்றி இடிந்து விழும் நிலையில் இருக்கிறது. சென்னையில் இருந்து திருக்கழுகுன்றம் செல்லும் சாலையில் உள்ளது பூஞ்சேரி கிராமம். அரசுப் பள்ளியும், அதன் எதிரே தனியார் பொறியியல் கல்லூரியும் அமையப் பெற்றுள்ளன. பள்ளியை ஒட்டியுள்ள பகுதியில் கற் குவியல்கள் காணப்படுகின்றன. இந்தக் குவியலில் தொட்டி போன்ற அமைப்பு உள்ளது. இதில், சிலரது பெயர்கள் பொறிக்கப்பட்டுள்ளன. கேவாத பெருந்தச்சன், குணமல்லன், சாத முக்கியன், கோலன் சேமகன் என அந்தக் கல்லில் பெயர்கள் பொறிக்கப்பட்டுள்ளன. தச்சன் என்பது சிற்பியைக் குறிக்கும். பெருந்தச்சன் என்பது தலைமைச் சிற்பியைச் சுட்டுவதாகும். அவர்கள், மாமல்லபுரத்தில் கலை அம்சங்கள் பொருந்திய சிற்பங்களைச் செதுக்கியதில் முக்கியமானவர்கள் எனத் தெரிகிறது. அவர்கள் இந்தப் பகுதியில் இருந்தபோது அல்லது தங்கியபோது தங்களது பெயர்களைப் பொறித்து இருக்கலாம். இவை, கி.பி. 671 முதல் 700}ம் காலத்தைச் சேர்ந்தது'' என்கிறார் பல்லவ சிற்பக் கலைகளை ஆராய்ந்து வரும் முனைவர் ஜான்ஸன் வெஸ்லி. முட்செடிகளுக்குள்: இத்தனை அரிய தகவல்கள் அடங்கிய இந்தக் கல்வெட்டு முட்செடிகளுக்குள் மறைந்து கிடக்கிறது.""இந்தப் பகுதியில் சாலையை அகலப்படுத்தினால் கல்வெட்டுகள் அகற்றப்படும் நிலை ஏற்படும். பல்லவ மன்னர்கள் காலத்திய அரிய தகவல்கள் அடங்கிய கல்வெட்டுகள் இந்தப் பகுதியில் அதிகளவு இருக்க வாய்ப்பு இருக்கிறது. எனவே, தொல்லியல் துறை அறிஞர்கள் உடனடியாக அவற்றைத் தங்கள் வசம் எடுத்து ஆராய வேண்டும்'' என்று பூஞ்சேரி பகுதி மக்கள் வேண்டுகோள் விடுத்துள்ளனர்.வாயலூர் கிராமத்தில்: பூஞ்சேரியில் இருந்து சில கிலோ மீட்டர் தொலைவில் உள்ளது வாயலூர் கிராமம். எழில் சூழ்ந்த இந்தக் கிராமத்தில் திருப்புலீஸ்வரர், வைகுந்தப் பெருமாள் சன்னதிகள் ஒரே வளாகத்தில் அமைந்துள்ளன. ""பல்லவ மன்னர்களில் ஒரு சாரார் சைவத்தையும், அதன்பின் வந்தவர்கள் வைணவத்தையும் கடைப்பிடித்து இருக்கலாம். இதன் வெளிப்பாடே ஒரே வளாகத்தில் சைவமும், வைணவமும் இணைந்து காட்சி தருகிறது'' என்று தொல்லியியல் அறிஞர்கள் தெரிவிக்கின்றனர்.வரிசைக் கிரமமாக வம்சப் பெயர்கள்: கோயிலின் நுழைவு வாயிலில் பல்லவர் கால எழுத்துகளால் ஆன கல்வெட்டு பராமரிப்பின்றி உள்ளது.""இந்தக் கல்வெட்டில் பல்லவ மன்னர்களின் 52 வம்சப் பெயர்கள் பொறிக்கப்பட்டுள்ளன. ஒரு முழு அரச வம்சத்தின் பெயர்கள் வரிசைக்கிரமமாகக் காணப்படுவது இந்தக் கல்வெட்டில்தான்'' என்கிறார் வெஸ்லி. கோயில் மண்டபங்களில் பல்லவர் கால எழுத்துகள் பொறிக்கப்பட்டுள்ளன. அவை கால மாற்றத்தால் அழியும் நிலையில் உள்ளன. கோயிலைப் பற்றிய வரலாறோ, கோயில் எந்த ஆண்டு யாரால் கட்டப்பட்டு என்ற தகவலோ அந்த வளாகத்தில் இடம் பெறவில்லை. ஆனால், அவை கி.பி.690-728-ம் ஆண்டு காலத்தியதைச் சேர்ந்ததாக இருக்கலாம் என்று தொல்லியல் அறிஞர்கள் தெரிவிக்கின்றனர். உள்ளூர் மக்கள் விருப்பம்: கோயிலின் சிறப்பு குறித்து வாயலூர் கிராம மக்களிடம் கேட்டபோது, ""இந்தக் கோயிலுக்கு காலை வேளையில் மட்டும் அர்ச்சகர் வந்து பூஜை செய்வார். இந்தியத் தொல்லியல் ஆய்வுத்துறையின் அதிகாரிகள் மாதத்துக்கு ஒரு முறை வருவார்கள். கோயிலுக்கு என்று தனியாகப் பாதுகாவலர்கள் யாரும் இல்லை. நிரந்தரமாக அதிகாரிகளை இங்கு பணியில் அமர்த்தி கோயிலின் வரலாற்றை எங்களுக்குத் (கிராம மக்கள்) தெரிவிக்க வேண்டும்'' என்று கோரிக்கை விடுத்துள்ளனர்.