5 காசிற்குத் தூய்மையான குடிநீர்!

  

5  காசிற்குத் தூய்மையான  குடிநீர்!

"நானோ' தொழில்நுட்ப முறையில், 500 ரூபாய்க்கே குடிநீரை சுத்திகரிக்கும் இயந் திரத்தை கண்டுபிடித்த, பிரதீப்: நான், மெட்ராஸ் ஐ.ஐ.டி.,யில், வேதியியல் துறை பேராசிரியராக பணியாற்றுகிறேன். சுத்தமான நீரை குடிக்க, ஒவ்வொரு மாதமும், 1,000 ரூபாய்க்கும் மேல் செலவாகும் சூழ்நிலை உள்ளது. மனிதனின் அடிப்படை தேவையான குடிநீர், குறைந்த விலையில் கிடைக்க, ஐந்து ஆண்டுகளாக மேற் கொண்ட முயற்சியில், "நானோ' தொழில்நுட்ப முறையில், ஒரு இயந்திரம் கண்டுபிடித்தேன். முதலில் வைரஸ், பாக்டீரியா போன்ற நுண்கிருமிகளை அழித்த பின், இரண்டாம் கட்டமாக ஆர்சானிக், ஈயம், இரும்பு போன்ற, தேவையற்ற உலோகங்களை நீக்கினேன். சில்வர் நானோ துகள்களிலிருந்து கிடைக்கும், "வெள்ளி அயனிகள்' நீரில் உள்ள நுண்கிருமிகளை அழித்து, நீரை சுத்தப்படுத்தும் தன்மை கொண்டவை. வெள்ளி அயனிகளை நேரடியாக நீரில் சேர்ப்பதால், நுண்கிருமிகள், கனிமங்கள், தாதுக்கள் போன்றவை, அதன் சுத்தப்படுத்தும் செயல்திறனை குறைத்துவிடும் என்பதால், அதற்கான மாற்று முறையை கண்டுபிடித்தேன்.

அலுமினியம் ஆக்சிஹைட்ராக்சைடு என்ற, களிமண் போன்ற பொருளால், 50 நானோ மீட்டர் நீளமும், 30 நானோ மீ., அகலமுள்ள கூண்டு செய்து, அதனுள் வெள்ளி அயனியை வைத்து, "உயிரி பாலிமர்' பொருளால் மூடினேன். இதனால், வெள்ளி அயனியை, நீரில் உள்ள நச்சு பொருட்கள் நேரடியாக தாக்க முடியாததால், வெள்ளி அயனி விரைந்து செயல்பட்டு, நீரின் நுண்கிருமிகளை அழிக்கிறது. இதே முறையில், மற்ற அயனிகளை பயன்படுத்தி, தேவையற்ற உலோகங்களை நீக்கினேன்.

இச்சுத்திகரிப்பு இயந்திரத்தை, வீட்டில் பயன்படுத்தி, நீரை சுத்திகரித்து குடிக்கலாம். ஆண்டிற்கு ஒரு முறை கூண்டை மாற்றினால் போதும்; தொடர்ந்து பயன்படுத்தலாம். இதன் விலை, 120 ரூபாய். கிராமப்புற பெண்களுக்கு இத்தொழில் நுட்ப பயிற்சி கொடுத்தால், வேலைவாய்ப்பு அதிகரிப்பதுடன், சுத்தமான குடிநீரை, லிட்டருக்கு, 5 பைசாவிற்கே தரமுடியும்.

குடிநீருக்காக அலைவதா!

குடிநீருக்காக அலைவதா!

கோடையில் ஏற்படும் குடிநீர் தட்டுப்பாட்டால், நீர் வியாபாரமாக மாறுவதை விவரிக்கும், விருதை காந்தி: நான், தமிழ்நாடு குடிநீர் வடிகால் வாரியத் தொழிலாளர் சம்மேளனத்தின் செயலராக பணியாற்றுகிறேன். உலகின் மொத்த நீர் பரப்பில், 2 சதவீத நீர் மட்டுமே குடிக்க உகந்தது. கோடையில் தண்ணீர் தட்டுப்பாட்டை பயன்படுத்தி, கடந்தாண்டு இந்தியாவில் மட்டும், 30 ஆயிரம் கோடி ரூபாய்க்கு குடிநீர் விற்பனை நடந்துள்ளது. இதில், தமிழகத்தில் மட்டும், 5,000 கோடி.கடந்த, 1990களில், "குடிநீரை பாட்டில்களில் அடைத்து விற்பனை செய்யக் கூடாது; பாட்டில்களின் மீது, "மினரல் வாட்டர்' என்று எழுதக் கூடாது' என்று, உச்ச நீதிமன்றமே உத்தரவிட்டிருந்தாலும், யாரும் பின்பற்றவில்லை. பன்னாட்டு கம்பெனிகள், இந்திய நீர்நிலைகள் மீது குறி வைத்துள்ளதால், வணிக சுரண்டல்கள் அதிகரித்து விட்டன.தென் தமிழகத்தின் குடிநீர் ஆதாரமான தாமிரபரணியில், பல பன்னாட்டு கம்பெனிகள், தண்ணீரை உறிஞ்சுகின்றன. காவிரி, பாலாறு, தென்பெண்ணை, வைகை என, அனைத்திலும், அளவுக்கு அதிகமாக மணல் அள்ளியதால், மழை நீரானது, ஆற்று மணல் மூலம், நிலத்தடி நீராக உறிஞ்சப்படாமல், கடலில் கலந்து வீணாகிறது.சிறிதளவு சேமிக்கப்பட்ட நிலத்தடி நீரும், மாசுக் கட்டுப்பாட்டு வாரியத்தின் அலட்சியத்தால், தொழிற்சாலையின் கழிவுநீர், நிலத்தடி நீரில் கலந்து, குரோமியம் அதிகரிப்பதால், சிறுநீரக பாதிப்பு, ரத்தக் கொதிப்பு, புற்றுநோய் போன்றவை ஏற்படுகின்றன. நைட்ரேட், புளோரைடு அதிகரிப்பதால், நீரை குடிப்பவர்களின் பற்களில் கரையும், எலும்பு பலவீனமும் ஏற்படும்.
நிலத்தடி நீர் உறிஞ்சப்படுவதை தடுக்கும் சட்டம் இருந்தும், பொதுச் சொத்தான தண்ணீரை, கேன்களில் அடைத்து, விற்பனை செய்வது தொடர்கிறது. மரங்களை அதிகமாக வளர்த்து, அதனால் கிடைக்கும் மழை நீரை சேகரித்து, நிலத்தடி நீர் மட்டத்தை உயர்த்துவதன் மூலம், குடிநீர் தட்டுப்பாட்டை நீக்க முடியும். இல்லையேல், வருங்கால தலைமுறையும், குடிநீருக்கு அலையும் அவலம் தொடரும்.

1000 புதுப்படி குடிநீர் விலை உரூ. 40: குடிநீர் வாரியம் அறிவிப்பு

1000  புதுப்படி  குடிநீர் விலை  உரூ. 40: குடிநீர் வாரியம் அறிவிப்பு

தினமணி First Published : 23 Sep 2012 02:02:52 AM IST

 

சென்னை, செப். 22: குடிநீர் வாரிய நீரேற்று நிலையங்களில் விற்பனை செய்யப்படும் வீட்டு உபயோகத்திற்கான குடிநீர் 1000 லிட்டர் ரூ.40-க்கு கிடைக்கும் என சென்னை பெருநகர குடிநீர் வாரியம் தெரிவித்துள்ளது.இந்த விலையில் குடிநீர் பெற விரும்புபவர்கள், தங்கள் சொந்த செலவில் லாரிகள் மூலம் நீரேற்று நிலையங்களிலிருந்து குடிநீர் கொண்டு செல்ல வேண்டும் எனவும் அவ்வாரியம் தெரிவித்துள்ளது.இது குறித்து சென்னை பெருநகர குடிநீர் வாரிய மேலாண் இயக்குநர் அபூர்வவர்மா சனிக்கிழமை வெளியிட்டுள்ள செய்திக் குறிப்பு:சென்னைக் குடிநீர் வாரிய ஒப்பந்த லாரிகள் மூலம் வீட்டு உபயோகத்திற்கான குடிநீர்  6 ஆயிரம் லிட்டர் ரூ.400-க்கும், 9 ஆயிரம் லிட்டர் ரூ.600-க்கும் விற்பனை செய்யப்பட்டு வருகிறது.  வியாபாரப் பயன்பாட்டுக்கான குடிநீர் 6 ஆயிரம் லிட்டர் ரூ.510-க்கும், 9 ஆயிரம் லிட்டர் ரூ.765- க்கும் விற்பனை செய்யப்பட்டு வருகிறது.தற்போது, நீரேற்று நிலையங்களிலிருந்து தங்கள் சொந்த செலவில் லாரிகள் மூலம் குடிநீர்  கொண்டு செல்லும் நுகர்வோர்களுக்கு வீட்டு உபயோகத்திற்கான குடிநீர் 1000 லிட்டர் ரூ.40-க்கும், ஹோட்டல்கள், கடைகள் உள்ளிட்ட வியாபார பயன்பாட்டுக்கான குடிநீர் 1000 லிட்டர் ரூ.60- க்கும் விற்கப்பட உள்ளது.இதற்கான முன்பதிவுக்கு,கொளத்தூர் பகுதி நீரேற்று நிலையம்: 044 - 26505435, 8144930313, 8144930906 கீழ்ப்பாக்கம் பகுதி நீரேற்று நிலையம்: 044 - 26441679, 8144930362, 8144930908 தெற்கு பகுதி நீரேற்று நிலையம் (வள்ளுவர் கோட்டம்): 044 - 28341448, 8144930356, 8144930909 என்ற எண்களில் தொடர்பு கொள்ளலாம்.மேலும் தகவல்களுக்கு, 044 - 45674567 என்ற நுகர்வோர்கள் வாரியத் தலைமை அலுவலக எண்ணைத் தொடர்பு கொள்ளலாம் என அந்த செய்திக் குறிப்பில் தெரிவிக்கப்பட்டுள்ளது.