கடும் சட்டத்தால் உழவைப் பெருக்கலாம்!

 

சொல்கிறார்கள்

கடும் சட்டத்தால்  உழவைப் பெருக்கலாம்!
வேளாண் பொருளியல் நிபுணர் பாமயன்: நான் விவசாயி வீட்டு பிள்ளை. என் சொந்த ஊர், தென்காசி அருகிலுள்ள, சுந்தரேசபுரம். அப்பாவின் மரணத்திற்கு பின், திருமங்கலத்துக்கு வந்து விட்டேன். மனோதத்துவம், சமூகவியல், இதழியல் எல்லாம் படித்து விட்டு, "புதிய கல்வி' சுற்றுச் சூழல் பத்திரிகையில், நான்கு ஆண்டுகள் பணியாற்றினேன்.இன்றைய சுற்றுச்சூழல் பிரச்னையால், அதிகம் பாதிக்கப்படுவது விவசாயிகள் தான். ஆகவே, விவசாயிகளிடம் வேலை செய்ய முடிவு செய்தேன். "தமிழக விவசாயிகள் தொழில்நுட்பக் கழகம்' என்ற பெயரில், ஒருங்கிணைந்து பயிற்சி கொடுக்கிறேன்.ரசாயன உரங்கள் பற்றியும், பூச்சிக் கொல்லிகளை பற்றியும், வெற்றிகரமாக விவசாயம் செய்வதைப் பற்றியும், பயிற்சி கொடுத்தேன்; நல்ல வரவேற்பு இருந்தது. 15 ஆண்டுகளாக பயிற்சி கொடுத்து வருகிறேன். விவசாயிகள், களை, பூச்சிகளை தான் பெரிய பிரச்னையாக கருதுகின்றனர். மண்ணில் சத்துக்குறைபாடு ஏற்படும் போது தான், களை விளைகிறது. சுண்ணாம்புச் சத்து குறைந்தால் தான், துத்தி செடிகள் முளைக்கும். களை செடிகளை வெட்டி, திருப்பி மண்ணுக்கே கொடுக்க வேண்டும். அப்படி கொடுத்து விட்டால், சத்துக் குறைபாடு சரி செய்யப்படும்.பூச்சிகளைப் பொறுத்தவரை முட்டை, புழு, கூட்டுப்புழு, அந்துப்பூச்சி என, நான்கு பருவம் உண்டு. இலை தழைகளைப் போட்டு, பூச்சிகளை எளிமையாக கட்டுப்படுத்தலாம். நகர வாழ்க்கை பிடிக்காத பலர், "எல்லாத்தையும் விட்டு ஊருக்கே போகலாம்' என, நினைக்கின்றனர்; "அதுல அவ்வளவு வருமானம் வராதே' என்ற எண்ணம், அதைத் தடுக்கிறது. ஆனால், விவசாயம் தான் நல்ல லாபம் தருகிறது.தமிழகம் முழுவதும் ரியல் எஸ்டேட் என்ற பெயரில், பல்லாயிரக்கணக்கான நிலம் தரிசாகக் கிடக்கிறது. இதை சரிசெய்ய, எளிமையான வழி, "இரண்டு ஆண்டுகளுக்கு மேல் தொடர்ந்து தரிசாகக் கிடக்கும் நிலத்தை, அரசு எடுத்துக் கொள்ளும்' என, சட்டம் போட்டால் போதும். விறுவிறுவென மரங்களை நடுவர்; விவசாயத்தில் முதலீடும் குவியும்.

சட்டம் பற்றி தெரிந்துகொள்ள திருக்குறளைப் படியுங்கள்

பாராட்டிற்குரிய கருத்து. திருக்குறளை அடிப்படையாகக் கொண்டு நம் அரசியல் அமைப்புச் சட்டமும் பிற சட்டங்களும் இயற்றப் பெற்றால் நாடு நலம் பெறும்; வளம் பெறும். அன்புடன் இலக்குவனார் திருவள்ளுவன்

சட்டம் பற்றி தெரிந்துகொள்ள திருக்குறளைப் படியுங்கள்: உயர்நீதிமன்ற நீதிபதி வலியுறுத்தல்

First Published : 24 Nov 2010 03:16:51 AM IST

Last Updated :

சென்னை, நவ.23: சட்டம் பற்றித் தெரிந்துகொள்ள விரும்புகிறவர்கள் திருக்குறளைப் படிக்க வேண்டும் என்று சென்னை உயர் நீதிமன்ற நீதிபதி டி. மதிவாணன் கூறினார்.தமிழ்நாடு வழக்கறிஞர்கள் சங்கத்தின் சார்பில் இலக்கிய பாசறை விழாவும், மறைந்த வழக்கறிஞர்கள் சிவகுமார், மதிவாணன், காமேஸ்வரன் ஆகியோரின் குடும்பங்களுக்கு தலா | 1 லட்சம் வழங்கும் நிகழ்ச்சியும் உயர் நீதிமன்ற வளாகத்தில் செவ்வாய்க்கிழமை நடைபெற்றது.இதில் உயர் நீதிமன்ற நீதிபதி டி. மதிவாணன் பேசியது:சட்டத்தின் வரையறை, குற்றத்துக்கான தண்டனை, அரசின் கடமை, எல்லா உயிர்களும் சமம் என சட்டங்களில் கூறப்பட்டுள்ள பெரும்பாலான விஷயங்கள் திருக்குறளோடு ஒத்துப் போகின்றன. திருக்குறளில் உள்ள அறம், பொருள், இன்பம் முப்பால்களிலும் சட்டம் பற்றிய கருத்துகள் உள்ளன. அறம் என்றால் நீதி என்ற ஒரு பொருள் உண்டு. அதை வியாபாரமாக்கக் கூடாது. பெண்களை ஏமாற்றக் கூடாது என்றும் திருக்குறளில் சொல்லப்பட்டுள்ளது.பெண்களை காதலிக்க வேண்டாம் என்று சொல்லவில்லை. ஆனால், அவர்கள் தங்களைத் தற்காத்துக் கொள்ள வேண்டும். ஏனெனில், பெண்கள் தொடர்பான வழக்குகள் அதிகரித்து வருகின்றன. சட்டம் பற்றித் தெரிந்துகொள்ள திருக்குறளைப் படிக்க வேண்டும். அதன்படி, வாழ்ந்தால் மனித வாழ்வு சிறப்பாக இருக்கும் என்றார் அவர்.திருநெல்வேலி மனோன்மணியம் சுந்தரனார் பல்கலைக்கழகத் துணைவேந்தர் ரா.தி. சபாபதிமோகன், தமிழ்நாடு வழக்கறிஞர்கள் சங்கத் தலைவர் எஸ்.பிரபாகரன், மூத்த வழக்கறிஞர் துரைசாமி, வழக்கறிஞர் வி.பி.ஆர்.இளம்வழுதி, எஸ். சுகேந்திரன் உள்பட பலர் கலந்து கொண்டனர்.