மத்திய அரசு அலுவலகத்தில் சங்கு ஊதிய பா.சனதாவினர்

நுங்கம்பாக்கத்தில் முற்றுகை ப் போராட்டம்: மத்திய அரசு அலுவலகத்தில் புகுந்து சங்கு ஊதிய பா.சனதாவினர்

பதிவு செய்த நாள் : புதன்கிழமை, மார்ச் 20, 12:35 PM IST

சென்னை, மார்ச். 20-

இலங்கைத் தமிழர் படுகொலையை கண்டித்தும், அதற்கு துணை போவதாக கூறி மத்திய அரசை கண்டித்தும் தமிழகம் முழுவதும் கடந்த  10 நாட்களாக  போராட்டம் நடந்து வருகிறது. அனைத்து கட்சிகளும் பாரபட்சமின்றி  ஈழத் தமிழர்களுக்காக குரல் கொடுத்து வருகின்றன. இந்த நிலையில் நுங்கம்பாக்கம் கல்லூரி சாலையில் உள்ள ஈ.வெ.கி. சம்பத் மாளிகை கட்டிடத்தில் 7-வது மாடியில் இயங்கி வரும் இந்திய வெளியுறவுத்துறை  அலுவலகத்தை முற்றுகையிட்டு பா.ஜனதா கட்சி இளைஞர் அணி சார்பில் இன்று போராட்டம் நடத்தப்பட்டது.

இதற்காக இளைஞர் அணி மாநில தலைவர் பொன் பாலகணபதி,  செயலாளர் வினோஜ்பி. செல்வம், பொதுச் செயலாளர் கமல் குமார், பா.ஜனதா கட்சியின் மாவட்ட தலைவர்கள் பிரகாஷ், ஜெய்சங்கர் மற்றும் நூற்றுக்கணக்கான பா.ஜனதா கட்சி தொண்டர்கள் இன்று காலை 10 மணியளவில் கல்லூரி சாலையில் ஈ.வெ.கி. சம்பத் மாளிகை அருகில் திரண்டனர். அப்போது பா.ஜனதா கட்சி நிர்வாகிகளும், தொண்டர்களும் சங்கு ஊதி மத்திய அரசுக்கு தங்கள் கண்டனத்தை தெரிவித்தனர்.

திடீரென ராஜபக்சேவின் உருவ பொம்மையை தீவைத்து கொளுத்தினார்கள்.  பின்னர் சோனியா காந்தியின் உருவ படங்களையும் தீவைத்து எரித்தனர். இதைத் தொடர்ந்து அங்கு பாதுகாப்பு பணியில் ஈடுபட்டிருந்த நுங்கம்பாக்கம் உதவி கமிஷனர் ஞானசேகரன், சூளைமேடு இன்ஸ்பெக்டர் கிரி மற்றும் போலீசார் அவர்களை கைது செய்வதற்கான நடவடிக்கையில் ஈடுபட்டனர்.
அவர்களை அழைத்து செல்வதற்காக 2 போலீஸ் வேன்களும் நிறுத்தப்பட்டிருந்தன.

இந்த நிலையில் யாரும் எதிர்பாராத வகையில் போராட்டத்தில் ஈடுபட்ட பா.ஜனதா கட்சி தொண்டர்கள் தாங்கள் முற்றுகையிட்ட மத்திய அரசு அலுவலகத்துக்குள் அத்து மீறி மின்னல் வேகத்தில் ஓடத்தொடங்கினார்கள். அவர்களை போலீசாரால் கட்டுப்படுத்த முடியவில்லை. உள்ளே புகுந்த பா.ஜனதா தொண்டர்கள் சிலர் வெளியுறவுத்துறை அலுவலகம் இருக்கும்  இடத்தை நோக்கி ஓடினார்கள்.  அவர்களை விரட்டி சென்ற போலீசார் குண்டு கட்டாக  தூக்கி வந்தனர். அப்போது அலுவலகத்தின் உள்ளே வைத்து பா.ஜனதா கட்சி தொண்டர்கள் ஆவேசமாக சங்குகளை ஊதினர்.

பின்னர் ஒரு வழியாக அனைவரையும் தடுத்து நிறுத்தி போலீசார் கைது செய்தனர். இந்த போராட்டம் காரணமாக நுங்கம்பாக்கம் கல்லூரி சாலையில் அரை மணி நேரம் பரபரப்பு ஏற்பட்டது. இலங்கை பிரச்சினைக்காக சென்னையில் பல்வேறு அமைப்பினரும் மத்திய அரசு அலுவலகங்களை முற்றுகையிட்டு தொடர்ந்து போராட்டம்  நடத்தி வருகிறார்கள். ஆனால் எந்த அலுவலகத்திலும் அவர்கள் நுழைய முடியாத அளவுக்கு போலீசார் பாதுகாப்பு ஏற்பாடுகளை செய்திருந்தனர். ஆனால் பா.ஜனதா கட்சி தொண்டர்கள் மத்திய அரசு அலுவலகம் உள்ளேயே புகுந்து போராட்டம் நடத்தி இருப்பது குறிப்பிடத்தக்கது.

ராயபுரம் எம்.எஸ். கோவில் தெரு சந்திப்பில் விடுதலை சிறுத்தைகள் கட்சி மாவட்ட துணை செயலாளர்  பிரபாகரன் தலைமையில் செயலாளர் கபிலன் உள்பட 100-க்கும் மேற்பட்டோர் மறியலில் ஈடுபட்டனர்.  அவர்கள் திடீரென ராஜபக்சே உருவ பொம்மையை எரித்தனர். இன்ஸ்பெக்டர் ராஜசேகர் மற்றும் போலீசார் விரைந்து வந்து மறியலில் ஈடுபட்ட 100 பேரை கைது செய்தனர்.

இலங்கை அதிபர் ராஜபக்சேவை போர்க்குற்ற வாளியாக அறிவிக்க வேண்டும், தனி ஈழம் அமைய பொது வாக்கெடுப்பு நடத்த வேண்டும் என்று கோரி விடுதலை சிறுத்தைகள் கட்சி சார்பில் செங்கல்பட்டு அரசு ஆஸ்பத்திரி எதிரில் இன்று ஒருநாள் அடையாள உண்ணாவிரத போராட்டம் நடந்தது.

உண்ணாவிரதத்துக்கு காஞ்சீபுரம் மாவட்ட இளஞ்சிறுத்தைகள் செயலாளர் தமிழரசன் தலைமை தாங்கினார். விடுதலை சிறுத்தைகள் கட்சி மாநில செய்தி தொடர்பாளர் வன்னியரசு, செங்கல்பட்டு நகர செயலாளர் அன்புசெல்வன் மற்றும் விடுதலை சிறுத்தைகள் கட்சி காஞ்சீபுரம் மாவட்ட நிர்வாகிகள், தொண்டர்கள் உண்ணாவிரதத்தில் பங்கேற்றனர்.

இலங்கை அதிபர் ராஜபக்சேவை கண்டித்து பெரிய பாளையத்தில் விடுதலை சிறுத்தைகள் கட்சியின் ஒன்றிய செயலாளர் ராள்ளைபாபு தலைமையில் பெரியபாளையத்தில் இருந்து ஊத்துக்கோட்டைக்கு நடைபயணம் சென்றனர். வெங்கல் கிராமத்தில் சிலம்பரசன் தலைமையிலும், தாமரைப்பாக்கத்தில் லட்சுமி பதி தலைமையிலும், ஆர்.ஆர். கண்டிகையில் விடுதலை சிறுத்தைகள் கிளை செயலாளர் வெங்கடேசன் தலைமையிலும் உண்ணாவிரதம் நடைபெற்றது.

75 ஆண்டாக மக்களைத் தட்டி எழுப்பும் சங்கொலி: ஈரோட்டில் காலம் காட்டும் கண்ணாடி

75 ஆண்டாக மக்களை தட்டி எழுப்பும் சங்கொலி: 

ஈரோட்டில் காலம் காட்டும் கண்ணாடி

ஈரோடு:ஈரோட்டில், 75 ஆண்டுகளுக்கும் மேலாக, சங்கொலி எழுப்பி வரும் ஆங்கிலேயர்கள் கால மின்சார சங்கு, இப்போதும் நல்ல நிலையில் தன் கடமையை நிறைவேற்றி வருகிறது.

பொதுவாக சங்கு சத்தம் என்றாலே, பலருக்கும் அபசகுணம் என்று தான் நினைத்து வருகின்றனர். சங்கு ஊதினாலே, நினைத்த காரியம் நடக்காது என்ற கெட்ட எண்ணமும் பலரின் மனதில் உள்ளது. ஆனால், 75 ஆண்டுக்கும் மேலாக ஈரோட்டில் எழும் சங்கு ஒலி, இன்றளவும் உழைக்கும் மக்களின் மனதில், உழைக்க வேண்டும் எண்ணத்தை விதைத்து வருகிறது.ஆங்கிலேயர்களின் ஆட்சி காலத்தின் போது, ஆங்கிலேய அதிகாரிகளும், மக்களும் நேரத்தை தெரிந்து கொள்ள, ஊருக்கு பொதுவான இடத்தில் மின்சார சங்கு அமைக்கப்பட்டு, குறிப்பிட்ட நேரத்தில் ஒலி எழுப்பப்பட்டது. ஈரோடு வ.உ.சி. பூங்கா, ஆங்கிலேயர்களால், "பீப்பிள்ஸ் பார்க்' என, அழைக்கப்பட்டது. பூங்காவுக்குள் மின்சார சங்கும் அமைத்தனர்.

அப்போது, காலை, 9 மணி, மாலை, 6 மணிக்கு சங்கு ஒலிக்கப்பட்டது. காலை, 9 மணிக்கு ஒலிக்கப்படும் சங்கொலி, தொழிலாளர்கள் பணிக்கு வர வேண்டிய நேரத்தையும், மாலை, 6 மணிக்கு எழுப்பப்படும் சங்கொலி, பணி நிறைவடைந்த நேரத்தையும் காட்டியது.சங்கொலியை அடிப்படையாக கொண்டே, ஈரோடு பொதுமக்கள் நேரத்தை கணக்கிட்டனர். அறிவியல் முன்னேற்றத்தால், கடிகாரம், கம்ப்யூட்டர் என்று வந்த பின்னும், ஈரோடு மக்களின் காலம் காட்டும் கண்ணாடியாக, இன்றளவும் இந்த சங்கு ஒலித்துக் கொண்டிருக்கிறது.

வ.உ.சி., பூங்காவில், பத்தாண்டுக்கு முன், சிறிய அளவில் மிருகக்காட்சி சாலை அமைக்கப்பட்டிருந்தது. இங்கு வளர்க்கப்பட்ட விலங்குகளுக்கு, சங்கின் ஒலி அச்சத்தை ஏற்படுத்தியதால், சில ஆண்டுகள் சங்கின் ஒலி நிறுத்தப்பட்டது. விலங்குகள் அனைத்தும் சென்னை, கிண்டி உயிரியல் பூங்காவுக்கு கொண்டு செல்லப்பட்ட பின், சங்கின் பணி மீண்டும் தொடர்ந்தது. இன்று, 75 ஆண்டுகளை கடந்து இதன் பணி வெற்றிகரமாக தொடர்கிறது.

மாநகராட்சி ஊழியர்கள் சிலர் கூறியதாவது:சங்கை இயக்கவும், பராமரிக்கவும், தனி வாட்ச்மேன் ஒருவர் இருந்தார். சங்கை இயக்க மாதம், 15 ரூபாய் அவருக்கு, அலவன்ஸ் வழங்கப்பட்டது. தற்போது, துப்புரவு பணியாளர்கள் யாரோ ஒருவர் இப்பணியை செய்கின்றனர். தற்போது, அதிகாலை 4 மணி, காலை 8, மதியம் 12, இரவு 8 மணிக்கு சங்கொலி எழுப்பப்படுகிறது. ஈரோட்டின் பெரும்பாலான பகுதிக்கு சங்கின் ஒலி கேட்கும்.இவ்வாறு அவர்கள் தெரிவித்தனர்.

ஈரோடு மக்களின் உன்னத தோழனாகவும், நேரம் காட்டும் கருவியாகவும், வ.உ.சி., பூங்கா சங்கு விளங்கி வருகிறது.