புதன், 6 செப்டம்பர், 2023

தோழர் தியாகு எழுதுகிறார் 202 : எப்படிச் செத்தார் புளியங்குடி தங்கசாமி?

 




(தோழர் தியாகு எழுதுகிறார் 201 : சாத்தான்குளம் பென்னிக்குசு செயராசு – தொடர்ச்சி)

எப்படிச் செத்தார் புளியங்குடி தங்கசாமி?

தென்காசி மாவட்டம் புளியங்குடி நடுக்கருப்பழகுத் தெருவைச் சேர்ந்த தங்கசாமி (த/பெ மாடசாமி) சென்ற 11.06.2023 அன்று காலை வீட்டிலிருந்து புறப்பட்டுச் சென்றவர் அன்று இரவு வீடு திரும்பவில்லை.

அவர் வெளியூர் வேலைக்குச் செல்வதும், அங்கேயே தங்கி விடுவதும் வழக்கமே என்பதால் குடும்பத்தினர் – அம்மாவும், தம்பி ஈஸ்வரனும் – நண்பர்களும் பெரிதாக அலட்டிக் கொண்டார்களில்லை. தங்கசாமி மறு நாளும் வரவில்லை, அவரிடமிருந்து தொலைபேசி அழைப்பும் இல்லை. அவரது செல்பேசியும் தொடர்பு எல்லைக்கு வெளியே இருந்தது.

கவலையுற்ற தாயும் தம்பியும் நண்பர்களும் தங்கசாமி வேலைக்குச் செல்லக் கூடிய இடங்களில் எல்லாம் தேட முற்பட்டார்கள். எந்தத் தகவலும் கிடைக்கவில்லை. ஒரு நாள், இரு நாள், மூன்று நாளாயிற்று.

நான்காம் நாள், 14/06 மாலை 5.30 மணியளவில் புளியங்குடி ஊர் நாட்டாமையைக் கூப்பிட்டனுப்பிய புளியங்குடி காவல் நிலைய ஆய்வாளர் பாலகிருட்டிணன், தங்கசாமி பற்றி விசாரிப்பது போல் விசாரித்து விட்டுக் கடைசியில் சொன்னார்: “தங்கசாமி பாளையங்கோட்டை மத்திய சிறையில் வைத்துச் செத்துப் போய் விட்டான்.”

குடும்பத்தினரும் ஊர் மக்களும் இச்செய்தி அறிந்து காவல் நிலையத்துக்குச் சென்றார்கள். ஆய்வாளர் பாலகிருட்டிணன் அவர்களிடம் சொன்னார்: “நாங்கள் இருசக்கர வாகனம் ஒன்றைப் பிடித்து வைத்திருந்தோம், அது தனக்குச் சொந்தம் என்று கேட்டு வாங்கிப் போக தங்கசாமி காவல் நிலையத்துக்கு வந்தான். நாங்கள் அவனைக் கைது செய்து சிறைக்கு அனுப்பி வைத்தோம். இன்று பாளையங்கோட்டை மத்திய சிறையில் வைத்து அவன் இறந்து விட்டதாகத் தகவல் வந்துள்ளது. உடல் இப்போது திருநெல்வேலி அரசு மருத்துவக் கல்லூரி மருத்துவமனையில் உள்ளது.”

மறுநாள் 15/06 காலையில் தங்கசாமியின் தம்பி ஈசுவரன், உறவினர்கள் கணேசன், சிவராசு, கருப்பசாமி, அமிர்தராசு ஆகிய ஐவரும் திருநெல்வேலி மருத்துவக் கல்லூரி மருத்துவமனைப் பிணவறையில் தங்கசாமியின் உடலைப் பார்த்தனர். உடலில் காயங்கள் இருப்பதைக் கண்டு, காணொளியும் நிலைப்படமும் எடுத்துக் கொண்டனர். அவர்கள் பிணவறையிலிருந்து வெளியே வந்த பின் பாளையங்கோட்டை காவல் உதவி ஆணையர் சதீசுகுமார் செல்பேசியைப் பிடுங்கிக் காணொளிப் பதிவுகளை அழித்து விட்டார். “ஏன் இப்படிச் செய்தீர்கள்?” என்று ஈசுவரன் கேட்ட போது உதவி ஆணையர் விடையே சொல்லாமல் கோபமாக முறைத்து விட்டுப் போய் விட்டார்.

தங்கசாமியின் இறப்பு பெருமாள்புரம் காவல் நிலையக் குற்ற எண் 255/2023இல் சந்தேக மரணம் என்று வழக்குப் பதிவு செய்யப்பட்டுள்ளது என்பதைத் தெரிந்து கொண்ட ஈசுவரன் சடலக் கூறாய்வு அறிக்கையும் கூறாய்வின் போது எடுத்த காணொளிப் பதிவும் வேண்டுமென்று கேட்டு அன்றே வழக்கறிஞர் உதவியோடு உயர்நீதிமன்ற மதுரைக் கிளையில் விண்ணப்பித்தார். திருநெல்வேலி நீதித்துறை நடுவர், மருத்துவக் கல்லூரி மருத்துவமனை முதல்வர், மாவட்டக் காவல் கண்காணிப்பாளர் ஆகியோருக்கும் மின்னஞ்சலில் விண்ணப்பிக்கப்பட்டது. அன்று மாலையே உடற்கூறாய்வு அறிக்கை தரப்பட்ட போதிலும், காணொளிப் பதிவுகள் தரப்படவில்லை.

தங்கசாமியின் சடலக் கூறாய்வு அறிக்கையின் படி அவரது உடலில் 7 காயங்கள் காணப்பட்டுள்ளன. இறப்புக்கு 3-4 நாள் முன்னதாக அந்தக் காயங்கள் ஏற்பட்டுள்ளன. இந்தக் காயங்கள் ஏற்படுவதற்கான வன்முறைத் தாக்குதல் புளியங்குடி காவல் நிலையத்தில் நடந்ததா? அல்லது பாளையங்கோட்டை மத்தியச் சிறையில் நடந்ததா? என்று உறுதியாகத் தெரியவில்லை. எது எப்படியானாலும் காவல் சித்திரவதையால்தான் அவர் உயிரிழந்தார் என்பதில் ஐயமில்லை. சட்டப் புறம்பான இந்தச் சித்திரவதை யாரால் எங்கே செய்யப்பட்டது என்பதை முறையான புலனாய்வில்தான் கண்டறிய முடியும்.

தங்ககசாமியைப் பிடித்த (கைது செய்த) புளியங்குடி காவல் நிலைய ஆய்வாளர் அதற்கான கைதுக் குறிப்பாணை வழங்கினாரா? குடும்பத்தாருக்குத் தகவல் கொடுக்கவில்லை. டிகே பாசு நெறிமுறைகள், சைலேந்திரபாபுவின் 41 கட்டளைகள் எதையாவது கடைபிடித்தரா? புளியங்குடி காவல் நிலையத்தில் கண்காணிப்புப் படக் கருவிகள் உள்ளனவா?

தங்கசாமியைக் காவலில் வைத்து(‘ரிமாண்டு’ செய்து) நீதித்துறைக் காவலுக்கு அனுப்பி வைத்த சிவகிரி நடுவர் அவரிடம் ஏதாவது கேட்டறிந்தாரா? அவரை ஏறெடுத்துப் பார்த்தாரா? தலைகுனிந்தபடி காவல் ஆணையில் ஒப்பமிட்டு அனுப்பி விட்டாரா?

பாளையங்கோட்டை மத்தியச் சிறை அதிகாரிகள் தங்கசாமியை சிறைக்குள் சேர்த்துக் கொண்ட போது அவரிடம் என்ன கேட்டார்கள்? அவரை மருத்துவ ஆய்வுக்கு அனுப்பினார்களா? சிறைக்குள் அவருக்கு மாரடைப்பு ஏற்பட்டதாகவும் மருத்துவமனைக்கு உடனே அனுப்பி விட்டதாகவும் சிறை அதிகாரிகள் சொல்கிறார்கள். அவர் இங்குக் கொண்டுவரப்படும் போதே பிணமாகத்தான் இருந்தார் என்று மருத்துவமனை அதிகாரிகள் சொல்கிறார்களாம். அப்படியானால் வரும் வழியில் உயிர் போய் விட்டதா? உண்மை தெரிய வேண்டும்.

தமிழ்நாட்டில் இனிக் காவல் கொட்டடிச் சாவே நிகழாது என்று உறுதி கொடுத்த முதலமைச்சர் மு.க. தாலினுக்குப் புளியங்குடி தங்கசாமியின் சாவு பற்றித் தெரியுமா?

தங்கசாமி தணிந்தசாதி(தலித்து) என்பதால் குற்றவாளிகள் மீது ப.சா.,ப.இ, (எசுசி, எசுடி) வன்கொடுமைத் தடுப்புச் சட்டப்படி வழக்குப் பதிவு செய்து, குற்றவாளிகளான காவல் அதிகாரிகளையும் சிறை அதிகாரிகளையும் சிறைப்படுத்த வேண்டும். நம்பகமான விசாரணை வேண்டும். தங்கசாமி குடும்பத்தார்க்கு இழப்பீடு வழங்க வேண்டும்.

இந்தக் கோரிக்கைகளுக்காகப் புளியங்குடியில் ம.பொ.க.(சிபிஎம்), இ.பொ.க.(மா.இலெ.)(சிபிஐ(எம்எல்)), விசிக, தீண்டாமை ஒழிப்பு முன்னணி, தமிழ்த் தேசிய அமைப்புகள் அனைத்தும் ஒருங்கிணைந்து போராடி வருகின்றன. காவல் சித்திரவதைக்கு எதிரான கூட்டியக்கத்தின் தமிழக ஒருங்கிணைப்பாளர் என்ற முறையில் நானும் கலந்து கொண்டு விரிவாகப் பேசினேன்.

இந்தப் போராட்டம் நடந்து கொண்டிருக்கும் போதே மாவட்ட ஆட்சியர் மறைந்த தங்கசாமியின் தாயாரை அழைத்துப் போய் உடலை வாங்கிக் கொள்ளச் சொல்லிப் பேரம் செய்து கொண்டிருந்தார். அந்தப் பகுதியைச் சேர்ந்த சட்டப்பேரவை உறுப்பினர்கள் இருவரும் இந்தப் பேரத்தில் மும்முரமாய் ஈடுபட்டிருப்பதாக அறிந்தேன்.

புளியங்குடியில் நடந்தது என்ன? நடக்க வேண்டியது என்ன? எல்லாவற்றையும் சாத்தான்குளத்திலிருந்து புளியங்குடிக்கு நீண்ட சாலைப் பயணத்தின் போது எனக்கு விளக்கிச் சொன்னவர் வழக்கறிஞர் மாடசாமி. தமிழ்நாட்டைக் காவல் சித்திரவதை இல்லாத தேசமாக்கும் முயற்சியில் தோழர் மாடசாமி போன்றவர்களின் உழைப்பு மகத்தானது. நமக்கு ஊருக்கு ஊர் மாடசாமிகள் தேவை.

(தொடரும்)
தோழர் தியாகு
தாழி மடல் 2
30

செவ்வாய், 5 செப்டம்பர், 2023

தோழர் தியாகு எழுதுகிறார் 201 : சாத்தான்குளம் பென்னிக்குசு செயராசு

 




(தோழர் தியாகு எழுதுகிறார் 200 : மோதி வாயில் கொழுக்கட்டை!-தொடர்ச்சி)

சாத்தான்குளம் பென்னிக்குசு செயராசு


22/06/2023 அன்று சாத்தான்குளம் பென்னிக்குசு செயராசு மூன்றாம் ஆண்டு நினைவுநாள். ஏற்கெனவே உங்களுக்குச் சொன்ன படி, பென்னிக்குசு செயராசு குடும்பத்தினர் நான் அந்த நாளில் சாத்தான்குளத்தில் தங்களோடு இருக்க வேண்டும் என்று விரும்புவதாகச் சில நாள் முன்பு என்றி திபேன் வாயிலாக அறிந்தேன்.

செயராசின் மருமகன் அகட்டினும் இதை உறுதி செய்த போது, எப்படியும் போய் விடுவது என்று முடிவெடுத்தேன். அதே ஊரைச் சேர்ந்த நண்பர் இசக்கிமுத்து அழைத்து என் வருகையை உறுதி செய்து கொண்டார். அந்தப் பகுதியைச் சேர்ந்தவரான ததேவிஇ அமைப்புச் செயலாளர் தோழர் மகிழனையும் என்னோடு அழைத்துச் செல்ல விரும்பினேன். அன்பர் நலங்கிள்ளி உடனே தொடர்வண்டிப் பயணச்சீட்டுக்கு ஆவன செய்தார்.

மூன்றாண்டுகளாக அந்தக் குடும்பத்தினரைப் பார்த்து ஆறுதல் சொல்லத் தவறி விட்டேன் என்ற குற்ற உணர்விலிருந்து விடுபடப் போகும் மாறுதலான உணர்வோடு பயணத்துக்கு அணியமானேன்.

கடைசி நேரத்தில் சுருதிக்கு உடல்நலம் குன்றவே, மகிழன் என்னோடு வர முடியாத நிலையில் நான் மட்டும் 21/06 இரவு தாம்பரத்தில் வண்டியேறி 22/06 விடியற்காலையில் நெல்லை போய்ச் சேர்ந்தேன். என்னை அழைத்துப் போக அன்பர் பிரிட்டோ வந்திருந்தார்.

பிரிட்டோவும் அன்பர் நெல்லை பீட்டரும் உடன்வர சாத்தான்குளத்துக்குப் புறப்பட்டேன். வழியிலேயே பிரிட்டோ சொன்ன தகவல்: தென்காசி மாவட்டம் புளியங்குடியில் ஒரு காவல் சாவு நிகழ்ந்துள்ளது. அதற்கு நீதி கோரிப் போராட்டம் நடந்து வருகிறது.

“இன்று மாலை புளியங்குடியில் நடக்கும் ஆர்ப்பாட்டத்தில் நீங்களும் கலந்து கொள்ள வேண்டும் என்று போராட்டத்தில் முன்னுக்கு நிற்கும் மா.பொ.க.(சிபிஎம்) கட்சியினர் விரும்புகின்றனர். நீங்கள் சாத்தான்குளம் வருவது தெரிந்து அழைக்கின்றனர்” என்றார். போகலாம், அதற்குமுன் விவரம் முழுக்கத் தெரிந்து கொள்ள வேண்டும் என்றேன்.

அடுத்து நான் ஒரு கோரிக்கை வைத்தேன். காலுடுவெல் வாழ்ந்த இடையன்குடிக்குப் போக வேண்டும், இன்றோ நாளையோ போகலாம்.

இடையிடையே சாத்தான்குளத்திலிருந்து இசக்கிமுத்து அழைத்துக் கொண்டே இருந்தார். நாங்கள் போய்ச் சேரும் போதே சாத்தான்குளம் கடைத்தெரு பகுதியில் பென்னிக்குசு செயராசு மூன்றாம் ஆண்டு நினைவேந்தல் நிகழ்ச்சி தொடங்கியிருந்தது. சுப. உதயகுமார், பேராசிரியர் பாத்திமா முதலான பலரும் வெளியூர்களிலிருந்து வந்திருந்தனர் உள்ளூர் மக்கள் திரளாகக் கூடியிருந்தனர். அவர்களிடையே வணிகர்களும் அனைத்துக் கட்சியினரும் கலந்திருப்பதை உணர முடிந்தது.

பென்னிக்குசின் அக்காள் பெருசிசு நின்ற படியே நிகழ்ச்சியைக் கவனித்துக் கொண்டும், வலையொளிக்காரர்களுக்குப் பேட்டியளித்துக் கொண்டும் இருந்தார். நீண்ட நேரம் கழித்தும் அவர் நின்று கொண்டே இருப்பதைப் பார்த்து நான் அவரை உட்காரச் சொல்லி சைகை செய்தேன், அவர் மறுத்த போதும் விடாமல் வலியுறுத்தி உட்கார வைத்தேன்.

என்னைப் பேச அழைத்த போது பென்னிக்குசு செயராசு படத்துக்கு மலர்தூவி அஞ்சலி செலுத்தி மெழுகுவத்திச் சுடரேற்றிய பின் பேசினேன். மூன்றாண்டு முன்பு சாத்தான்குளம் கொடுமை தமிழ்நாட்டில் ஏற்படுத்திய அதிர்வுகளை நினைவுகூர்ந்து, பென்னிக்குசு செயராசு குருதித் துளிகளிலிருந்து விளைந்ததே காவல் சித்திரவதைக்கு எதிரான கூட்டியக்கம் என்று அறிவித்தேன்.

கூட்டியக்கத்தின் இப்போதைய பணிகளை விளக்கி விட்டு, தமிழ்நாட்டில் காவல் சித்திரவதைத் தடுப்புச் சட்டம் தேவை என்ற கருத்தை வலியுறுத்தினேன்.

எனக்கு முன் பேசிய அன்பர் பிரிட்டோ காவல் சித்திரவதைக்கு எதிரான கூட்டியக்கத்தின் ஒரு செயல்திட்டத்தை அறிவித்தார். காவல் நிலையங்களை நேரில் பார்வையிட்டு, உச்ச நீதிமன்றத் தீர்ப்பின் படி கண்காணிப்புப் படக் கருவிகள் பொருத்தப்பட்டுள்ளனவா? காவல் நிலைய முகப்பில் அது பற்றிய அறிவிப்பு வைக்கப்பட்டுள்ளதா? என்பதைச் சரிபார்ப்பதுதான் அது.

“இன்று இந்நிகழ்ச்சி முடிந்தவுடன் அண்ணன் தியாகு தலைமையில் நேராகச் சாத்தான்குளம் காவல் நிலையத்துக்குச் செல்வோம். உச்ச நீதிமன்றத் தீர்ப்பின் சுருக்கத்தைத் தமிழில் நூல் வடிவில் வெளியிட்டுள்ளோம். அதை அந்த அதிகாரிகள் கையில் ஒப்படைப்போம். முறையாகக் கண்காணிப்புப் படக் கருவிகள் பொருத்தியுள்ளார்களா என்று பார்த்து விட்டு வருவோம்” என்று பிரிட்டோ சொல்லி விட்டார். நிகழ்ச்சி முடிந்த பின் நான், பிரிட்டோ, சுப. உதயகுமார், பாத்திமா, வழக்கறிஞர் மாடசாமி ஆகியோர் காவல் நிலையத்துக்குப் புறப்படத் திட்டமிட்டோம். பென்னிக்குசு செயராசு படத்துக்கு சட்டப்பேரவை உறுப்பினர் மாலை அணிவிக்க வர, நாங்கள் புறப்படுவது தாமதமாயிற்று.

இறுதியில் நாங்கள் கூட்டமாகப் புறப்பட்ட போது காவல்துறை ஆய்வாளரும் மற்றக் காவலர்களும் எங்களை வழிமறித்தனர். “இன்றைய நிகழ்ச்சியை இத்தோடு முடித்துக் கொள்ளுங்கள், மற்றதைப் பிறகு பார்க்கலாம்” என்றார் ஆய்வாளர். நடந்து முடிந்த நினைவேந்தல் நிகழ்ச்சி வேறு, நாங்கள் காவல் நிலையத்துக்கு வரும் திட்டம் வேறு என்பதை அவருக்குப் புரிய வைக்கவே முடியவில்லை.
“நாங்கள் கூட்டமாக வரவில்லை, மூன்று நான்கு பேர் மட்டும் வருகிறோம்” என்று பேசிப் பார்த்தோம். முடியவே முடியாது என்றார். “காவல் நிலையத்தைப் பார்க்க எங்களுக்கு உரிமை உண்டு. உங்களால் எங்களைத் தடுக்க முடியாது” என்று கண்டிப்பாகக் கூறி விட்டு நடக்கத் தொடங்கி விட்டேன்.

நாங்கள் நடந்து போய்ச் சேருவதற்குள் காவல் நிலையத்தில் ஒரு படையையே குவித்து விட்டார்கள். நாங்களும் பின்னடிப்பதாக இல்லை. கடுமையான வாக்குவாதம் நடந்தது. இறுதியில் துணைக்கண்காணிப்பாளர் (பெயர்: அருள்) மட்டும் எங்களைத் தனது அலுவலகத்துக்குள் அழைத்துப் போய் உட்கார வைத்துப் பேசினார். அந்த அலுவலகத்தில் வெளியே அறிவிப்பும் இல்லை, உள்ளே ஒரு கண்காணிப்புப் படக் கருவியும் கூட இல்லை என்பதைக் குறித்துக் கொண்டோம். எங்கள் பணி ஓரளவு முடிந்தது.

ஆனால் சாத்தான்குளம் காவல் நிலைய ஆய்வாளர் எங்களைக் காவல் நிலையத்துக்குள் விடவே மாட்டேன் என்று பிடிவாதமாக இருந்தார். அவர் சொன்ன ஒரு செய்தி பொருள் பொதிந்தது:

“நாங்கள் யாரையும் அடிக்கறதில்லை ஐயா! அடித்துவிட்டு யார் சிறைக்குப் போவது?”

அவரது இந்தச் சலிப்புத் தொனி… சிக்கல் ஏதுமில்லாமல் கைதியை அடிக்கும் தடையிலா உரிமைக்காக அவர் ஏங்குவதன் வெளிப்பாடுதான்!

வெளியே வந்து ஊடகங்களிடம் நடந்ததைச் சொல்லி முடித்து, பென்னிக்குசு செயராசு இல்லம் சென்று உணவருந்தி விட்டு அம்மா உள்ளிட்ட குடும்பத்தினரிடம் ஆறுதல் தந்து விடை பெற்று நெல்லை நோக்கிப் புறப்பட்டோம்.

காலுடுவெல்லின் இடையங்குடி செல்ல இனி நேரமில்லை. நெல்லை சென்று புளியங்குடி விரைய வேண்டும். புளியங்குடி காவல் நிலையத்தில் தங்கச்சாமியின் உயிரிழப்புக்கு நீதி கேட்கும் ஆர்ப்பாட்டம்! பென்னிக்குசு செயராசு மூன்றாம் ஆண்டு நினைவேந்தல் ஒரு பக்கம், தங்கச்சாமியின் காவல் சாவுக்கு நீதிகோரும் போராட்டம் மறுபக்கம்! இந்த மூன்றாண்டுகளில் தமிழ்நாடு இந்த வகையில் மாறவே இல்லையா?

(தொடரும்)
தோழர் தியாகு
தாழி மடல் 22
9

திங்கள், 4 செப்டம்பர், 2023

புதுமை இலக்கியத்தென்றல், இலக்குவனார் நினைவரங்கம்

 


புதுமை இலக்கியத் தென்றல்

தமிழுரிமைப் போராளி சி.இலக்குவனார் நினைவரங்கம்

ஆவணி 18  , 2054 / 04.09.2023 ஞாயிறு மாலை 6.30

அன்னை மணியம்மையார் மன்றம், பெரியார் திடல், சென்னை

தலைமை: அரிமா தா.கு.திவாகரன்

வரவேற்புரை: செல்வ.மீனாடசி சுந்தரம்

நினைவுரை: பேராசிரியர் 

                      முனைவர் மறைமலை இலக்குவனார்

நன்றியுரை: இராவணன் மல்லிகா



குவிகம் சிறுகதைப் போட்டி

 


குவிகம் இணைந்து நடத்தும் சிறுகதைப் போட்டி

முதல் பரிசு உரூ.5000/

இரண்டாம் பரிசு உரூ-3000/

மூன்றாம் பரிசு  உரூ.2000/

கதைகள் வந்து சேரவேண்டிய இறுதி நாள் நவம்பர் 30,2023

அனுப்ப வேண்டிய மின்வரி !  magazine.kuvikam@gmail.com






தோழர் தியாகு எழுதுகிறார் 200 : மோதி வாயில் கொழுக்கட்டை!

 




(தோழர் தியாகு எழுதுகிறார் 199 : அணையாத் தீ – தொடர்ச்சி)

மோதி வாயில் கொழுக்கட்டை!

மணிப்பூர் எரிகிறது! மக்கள் கொலையுண்டு மடிகின்றார்கள்! மத வழிபாட்டுக் கூடங்கள் இடித்துத் தரைமட்டமாக்கப்டுகின்றன. கொடிய கொலைக் கருவிகளோடு வன்முறைக் கும்பல்கள் அலைந்து திரிகின்றன! மாநில முதல்வரே ஒருதரப்பு மக்கள் மீது வெறுப்புமிழ்ந்து வன்முறையைத் தூண்டி விடுகின்றார்! இந்திய உள்துறை அமைச்சரோ மணிப்பூர்த் தீயில் குளிர்காய்ந்து அரசியல் பழி விளையாட்டில் காய் நகர்த்திக் கொண்டிருக்கின்றார்!

இத்தனையும் நடக்கும் போது இந்தியப் பெருநாட்டின் தலைமையமைச்சர் நரேந்திர மோதி இது குறித்து வாயே திறந்தாரில்லை.

2023 ஏப்பிரல் 27ஆம் நாள் மணிப்பூர் உயர் நீதிமன்றத்தின் இடைக்காலத் தலைமை
நீதியர் (தமிழ்நாட்டுக்காரர்) எம்.வி. முரளிதரன் வழங்கிய தீர்ப்புதான் முதலில்
கலகத்தைத் தூண்டியது. 
மைத்தி சமுதாயத்தை அட்டவணைப் பழங்குடியாக வகைப்படுத்த இந்திய அரசுக்கு மாநில அரசு பரிந்துரை வழங்க நான்கு மாத அவகாசம் கொடுப்பதுதான் இந்தத் தீர்ப்பு. இது தவறான தீர்ப்பு என்று உச்ச நீதிமன்றமே கூறியுள்ளது. மைத்தி சமுதாயத்தைப் பழங்குடி அட்டவணையில் சேர்ப்பது ஏற்கெனவே அந்த அட்டவணையில் இடம்பெற்றுள்ள குக்கி, சோ போன்ற பழங்குடிச் சமுதாயங்களின் உரிமைகளை, முகன்மையாக நிலவுரிமைகளை, அச்சுறுத்துவதாக இருக்கும். இது இனமோதல் ஏற்படத் தூண்டுதலாக அமைந்து விட்டது.

மேத் திங்கள் முழுக்க மணிப்பூரில் மைத்தி சமுதாய மக்களும் குக்கி சமுதாய மக்களும் மூர்க்கமாக மோதிக் கொண்டனர். மே 3 தொடக்கம் படுகொலைகளும் பாலியல் வன்கொடுமைகளும் நிகழ்ந்தன. சற்றொப்ப ஓரிலக்கம் (ஒரு இலட்சம்) பேர், பெரும்பாலும் குக்கிப் பழங்குடி மக்கள், பெரும்பாலும் கிறித்துவர்கள், வீடு வாசல் இழந்து ஏதிலிகளாக விரட்டப்பட்டனர். வழிபாட்டுக் கூடங்கள், முக்கியமாகக் கிறித்துவ தேவாலயங்கள் தீயிட்டு எரிக்கப்பட்டன. தாக்கி அழிக்கப்பட்டுத் தரைமட்டமாக்கப்பட்டன. காவல்துறையும் பிற ஆய்தப் படைகளும் இந்தக் குற்றங்களைத் தடுக்காமல் வேடிக்கை பார்த்தன என்று சொல்வது குறைக்கூற்றே ஆகும். ஏனென்றால் இரு தரப்புக்கும் காவல்துறையே ஆய்தங்கள் வழங்கிற்று.

மணிப்பூர்த் தேசம் குருதியில் மூழ்கிய அந்த மே மாதத்தில் இந்தியத் தலைமையமைச்சர் நரேந்திர மோதி என்ன செய்து கொண்டிருந்தார்? கருநாடக மாநிலத்தில் தெருத்தெருவாகச் சென்று வாக்கு வேட்டையாடிக் கொண்டிருந்தார். தமது தலைமையில் நாடு கண்டுள்ள முன்னேற்றம் பற்றி ஓங்கி முழங்கிக் கொண்டிருந்தார். ஒரு வார்த்தை, ஒரே ஒரு வார்த்தை மணிப்பூர் பற்றி உச்சரிக்கவில்லை. கருநாடகத் தேர்தல் முடிந்தது. மோதியை சந்திக்க அனைத்துக் கட்சிக் குழு ஒன்று காத்துக் கிடந்தது. தேசத் தலைவர் இப்போது உலகத் தலைவர் அல்லவா? நேரமில்லை என்று அமெரிக்கா புறப்பட அணியமாகிக் கொண்டிருந்தார்.

பெரும்பாலும் கிறித்தவர்களான மலைவாழ் மக்கள் வன்கொடுமைகளுக்கு ஆளாவது பற்றி வருந்த ஆர்எசுஎசு மரபில் ஊறிய நரேந்திர மோதிக்கு மனமில்லை. இசுலாமும் கிறித்துவமும் அவரைப் பொறுத்த வரை அயல் சமயங்கள். வடகிழக்கு மாநிலங்களை ஆர்எசுஎசு, பாசக வலையில் வீழ்த்தப் பற்பல முறை வடகிழக்கு இந்தியாவுக்கு ‘திக்விசயம்’ புரிந்த மோதிஐயா சரியாக மணிப்பூர் எரியும் நேரம் பார்த்து வேறு பக்கம் திரும்பிக் கொண்டார். ஆர்எசுஎசு – பாசகவும், மாநில பாசக முதல்வர் பிரேன் சிங்கும் கக்கிய வெறுப்புத் தீயில் மணிப்பூர் எரிந்து கொண்டிருந்தது.
மே மாதத்தில் உள்துறை அமைச்சர் அமித்துசா கருநாடகத்தில் காய்ந்து கருகிக் கொண்டிருந்த தாமரையை மீண்டும் மலரச் செய்ய முட்டி போட்டுக் கொண்டிருந்தார். கருநாடகத் தோல்வி மூட்டையைச் சுமந்து கொண்டுதான் மணிப்பூர் சென்றார். அவரது பயணத்தால் உருப்படியான பயன் ஏதும் விளையவில்லை என்பது நடுநிலையாளர் கருத்து. உண்மையில் அவரது பயணம் எரிகிற கொள்ளியில் எண்ணெய் ஊற்றுவதாகவே அமைந்தது. அடுத்த தேர்தலைப் பற்றி மட்டுமே சிந்திக்கத் தெரிந்த, அதற்கேற்ப சூழ்ச்சித் திட்டங்கள் வகுக்க மட்டும் தெரிந்த இழிதகை அரசியலரே அமித்துசா. அதால்ஃப் இட்லருக்கு வாய்த்த கோயபல்சு (அல்லது சீபெல்சு?) போல் நரேந்திர மோதிக்கு வாய்த்த அமித்துசா!

நடுவணரசிலும் பாசக, மணிப்பூர் மாநில அரசிலும் பாசக! இதற்குப் பெயர் ‘இரட்டை இழு பொறி (எஞ்சின்) சருக்கார்’! வலுமிக்க ஆட்சியாம்! பாசக ஆட்சியில் வகுப்புவெறி வன்முறைக்கு இடமிருக்காது என்ற பீற்றல் மணிப்பூரில் பிய்ந்து தொங்குகிறது. இது பற்றிய கவலை பிரேன் சிங்குக்கும் இல்லை! அமித்சாவுக்கும் இல்லை! அகன்ற மார்போடு அகிலம் சுற்றும் அசகாய சூரர் நரேந்திர மோதிக்கு இருக்க வேண்டாமா? எவன் செத்தால் எனக்கென்ன? என்று வெள்ளை மாளிகையில் விருந்துண்டு, பிதேன் இணையருக்கு வைரம் பரிசளித்து, கொசுறாக ஆய்தக் கொள்முதல் ஒப்பந்தம் செய்து கொண்டு தேச நலன் காத்து நெஞ்சு நிமிர்த்திக் கொண்டிருக்கிறார். மற்றதெல்லாம் இருக்கட்டும், குசராத்து – 2002, மணிப்பூர் – 2023 இரண்டையுமே மறந்தும் மறைத்தும் இந்தியாவில் சிறுபான்மை மக்கள் பாதுகாப்பாக இல்லையோ என்ற சிறு ஐயத்தையே எள்ளி நகையாடுகின்றார்.

வகுப்பு மோதல் வன்முறையை விரிவாக ஆய்வு செய்துள்ள உ.பி. முன்னாள் காவல்துறைத் தலைவர் முனைவர் விபூதி நாராயண்ராய் கூறியுள்ள படி, ஆட்சியில் உள்ள அரசியல் தலைமை மனம் வைத்தால் எவ்வளவு பெரிய வகுப்புக் கலவரத்தையும் 48 மணிநேரத்துக்குள் கட்டுக்குள் கொண்டுவர முடியும். இதோ மணிப்பூரில் சற்றொப்ப இரு திங்களாயிற்று, வன்முறை தணிந்த பாடில்லை. வன்முறையைக் கட்டுபபடுத்த ‘இரட்டை இழுபொறி(எஞ்சின்) சர்க்கார்’ விரும்பவில்லை என்றுதான் புரிந்து கொள்ள வேண்டும்.

தூண்டில்காரனுக்குத் தெப்பத்தில் கண் என்பது போல், இந்திய ஆளும் கும்பலுக்குப் பழங்குடி மக்களின் பாதுகாப்பில் இருக்கும் வனத்திலும் நிலத்திலும் கண்! பிரேன் சிங்கு அரசின் நிலவெளியேற்ற நடவடிக்கைகள், உயர் நீதிமன்றத்தின் பொறுப்பற்ற தீர்ப்பு, இருமாத கால வன்முறை வெறியாட்டங்கள், இவை அனைத்துக்கும் சிகரம் வைத்தாற்போல் மோதியின் அழிச்சாட்டிய ஊமைத்தனம்… எல்லாமே மணிப்பூரின் வனத்தையும் வளத்தையும் பன்னாட்டுக் குழுமங்களுக்கும், மார்வாரி, குசராத்தி பெருமுதலாளர்களுக்கும் அள்ளிக் கொடுப்பதற்காகவே! இதற்குப் பொருத்தமான அரண் அமைத்துக் கொடுக்கவே ஆர்எசுஎசு – பாசகவின் பார்ப்பனிய இந்துவெறி அரசியல்!

அமெரிக்க நாடாளுமன்றத்தின் கூட்டுக் கூட்டத்தில் நரேந்திர மோதி முக மலர்ச்சியோடு பெருமிதம் பொங்க உரை நிகழ்த்தக் கண்டீர்களா?

அண்மையில் ஐயா நக்கீரன் அவர்கள் தாழி மடலுக்கு எழுதிய ஒரு செய்தியை மறந்து விடாதீர்கள்:
“மேற்கு நாடுகளில் மதசார்பின்மைக் கோட்பாட்டை கட்டாயமாக கடைப்பிடிக்கிறார்கள். கனடா நாடாளுமன்றம் தொடங்கும் போது விவிலியத்தில் இருந்து பாடல்களைப் பாடுவார்கள். கனடிய நாடாளுமன்றத்துக்குக் கிறித்து அல்லாதவர்கள் வரத் தொடங்கிய பின்னர் அந்த நடைமுறையை நிறுத்தி விட்டார்கள்!

“அமெரிக்காவில் ஒரு நீதிமன்ற வளாகத்துக்குள் பைபிள் வாசகம் ஒன்றை ஒரு கல்லில் பொறித்து வைத்திருந்தார்கள். அண்மையில் அது அரசின் மாசார்பின்மைக் கோட்பாட்டுக்கு முரணாக இருப்பதாகச் சொல்லி அதனை அகற்றி விட்டர்கள்.”

கனடாவிலும் அமெரிக்காவிலும் உலகியத்தின் (மதச் சார்பின்மையின்) வலிமை இத்தகையது. மோதியின் இந்தியாவில்? புதிய நாடாளுமன்றக் கட்டடத் திறப்பின் போது என்னவெல்லாம் நடந்தது? நரேந்திர மோதி அவர்களே கணபதி ஃகோமம் வளர்த்த செய்தி பார்த்தீர்களா? கணபதியும், கஜமுகனும், வீர விக்கினேசுவரனும் ஆகிய பிள்ளையாருக்குப் படைத்த பூரண கொழுக்கட்டையை விழுங்க முயன்று வாயிலேயே வைத்துக் கொண்டாரோ? அதனால்தான் மணிப்பூர் குறித்து வாய்திறக்க முடியவில்லையோ?
மோகன் பகவத்துக்கே வெளிச்சம்!

(தொடரும்)
தோழர் தியாகு
தாழி மடல் 228

ஞாயிறு, 3 செப்டம்பர், 2023

தோழர் தியாகு எழுதுகிறார் 199 : அணையாத் தீ

 




(தோழர் தியாகு எழுதுகிறார் 198 : தமிழ்த் தேசிய வளர்ச்சிக்காகச் சமயம் சாரலாமா?-தொடர்ச்சி)

அணையாத் தீ!

“தலைவாரிப் பூச்சூடி உன்னைப்

பாடசாலைக்குப் போ என்று சொன்னாள் உன் அன்னை!”

என்று பாவேந்தர் பாடியது போலத்தான் அன்றும் அந்தக் குழந்தைகள் பாடசாலைக்குச் சென்றார்கள்.

ஆனால் தீயில் எரிந்து கரிக்கட்டைகளாக அந்த மழலைச் செல்வங்கள் மீண்டுவரும் என்று அந்தத் தாய் தந்தையர் நினைத்தாரா? உற்றவர் மற்றவர் யாரேனும் நினைத்தாரா? 

குடந்தை காசிராமன் தெருவில் 2004 சூலை 16ஆம் நாள் கிருட்டிணா ஆங்கில வழி (இங்கிலீசு மீடியம்) பள்ளிக்கூடத்தின் கீற்றுக் கூரையில் தாவிப் பற்றிய கொடுந்தீ  தொடக்கக் கல்வி பயின்று கொண்டிருந்த 94  குழந்தைகளை உயிரோடு எரித்த கொடுமையை அறிந்த எவராலும் என்றும் மறக்க முடியாது.

உணர்வுள்ள தமிழ் மக்களின் உள்ளத்தில் அது அணையாத் தீ!

ஒய்வு பெற்ற நீதியர் சம்பத்து தலைமையிலான குழு… இந்தப் பேரிழப்புக்குக் காரணம் பள்ளி நடத்திய கல்வி வணிகரின் பேராசையே என்று தெளிவாக்கிற்று. குழந்தைகள் ஒவ்வொருவருக்கும் 10 இலட்சம் என இழப்பீடு தரப்பட்டது. காயமடைந்தவர்களுக்கும் இழப்பீடு தரப்பட்டது.

பள்ளி உரிமையாளர் பழனிச்சாமியும், தாளாளர் சரசுவதியும் மற்றவர்களும் தளை செய்யப்பட்டனர். கல்வித்துறை அதிகாரிகள் சிலர் இடைநீக்கம் செய்யபப்ட்டனர்.

நீண்ட காலத்தாழ்வுக்குப் பின் 2012 செட்டம்பர் 24ஆம் நாள்  தஞ்சை மாவட்ட அமர்வு நீதிமன்றத்தில் வழக்கு விசாரணை தொடங்கியது. 2014 சூலை 3Oஆம் நாள் வழங்கப்பட்ட தீர்ப்பில் புலவர் பழனிச்சாமிக்கு வாழ்நாள் சிறைத் தண்டனை விதிகப்பட்டது. 5 இலட்சத்துக்கு மேல் தண்டமும் விதிக்கப்பட்டது. மேலும் எண்மருக்கு 5 ஆண்டும், ஒருவருக்கு ஈராண்டும் சிறைத் தண்டனை விதிக்கப்பட்டது. ஆசிரியர்கள் மூவர் உட்பட 11 பேர் விடுவிக்கப்பட்டனர்.

94 குழந்தைகள் உயிரோடு எரிந்ததற்கு நம்முடைய சட்டப் பொறிமுறைகள் செய்திருக்கும் நீதி இதுதான்!

இருக்கட்டும். நீதி என்பதென்ன? குற்றவாளிகளைத் தண்டிப்பது மட்டும்தானா? மீண்டும் அதே போன்ற குற்றம் நிகழாமல் தடுக்கவும் வழி செய்தால்தான் நீதி முழுமை பெறும் என்பதே நீதியுலகம் கண்டுள்ள நெறி.

தமிழ்ப் புலவர் பழனிச்சாமி ஏன் தமிழ்வழிக் கல்விக் கூடம் நடத்தாமல் ஆங்கில வழி (இங்கிலீசு மீடிய)க் கல்வி வணிகத்தில் முதலீடு செய்தார்? மாணவர் – ஆசிரியர் தகவு பற்றி ஏன் தவறான தகவல் தந்தார்? கல்வித் துறை அதிகாரிகள் ஏன் இந்த மோசடிக்கு உடந்தையாக இருந்தார்கள்?

கல்வி கொடுக்கும் கடமையிலிருந்து தவறிய அரசு இந்த அவலத்துக்குப் பொறுப்பேற்க வேண்டாமா? வணிகமயத்தில் சிக்கிய கல்வித்துறைதான் இந்தக் கொடுந்தீக்கு இறுதிப் பொறுப்பு என்று குற்றஞ்சாட்டுகிறோம்.

பூக்களும் பிஞ்சுகளுமாய்க் கருக்கப்பட்ட அந்த 94 பிள்ளைகளுக்கும் நிறைமுழு நீதி கிடைப்பது எப்போது? அவர்களை உயிரோடும் கல்விக் கனவோடும் எரித்த இந்தக் கல்விமுறையை இந்தத் தமிழ்நாடு வேரோடும் வேரடி மண்ணோடும் பெயர்த்தெறியும் போதுதான்!

வணிகமயம் தனித்து வரவில்லை தமிழர்களே! அது காவி மயத்தோடும் இந்திய மயத்தோடும் சேர்ந்து வருகிறது. இந்த மும்மயங்களின் திரிசூலம்தான் இந்திய பாசக அரசின் புதிய தேசியக் கல்விக் கொள்கை!

இந்தக் கொள்கையை முறியடிப்பதில்தான் நம் குழந்தைகளின் அறிவு எதிர்காலம் அடங்கியுள்ளது.

(தொடரும்)
தோழர் தியாகு
தாழி மடல் 227

இலக்குவனார் 50ஆம் ஆண்டு நினைவு நாள் கருத்தரங்கம்

 

இலக்குவனார் 50ஆம் ஆண்டு நினைவு நாள் கருத்தரங்கம்

தேசிய மரபு அறக்கட்டளை
செந்தமிழ்ச்சுடர் சி.இலக்குவனார்
50 ஆம் ஆண்டு நினைவுநாள்

பன்னாட்டு இணையவழிக் கருத்தரங்கம்

சிறப்புரை
முனைவர் மறைமலை இலக்குவனார்

– காலமெல்லாம் தமிழ்ப்பணியில் சி.இலக்குவனார்
நாள் 03.09.2023 ஞாயிற்றுக் கிழமை மாலை 6.00- 7.00
அணுக்க இணைவு எண் 883 2405 9158
கடவுச்சொல் PUDUVAI88

பா.வே.பாண்டியன்
ஒருங்கிணைப்பாளர்



இலக்குவனார் 50ஆம் ஆண்டு நினைவுப் போற்றல், மயிலாடு துறை

      03 September 2023      No Comment

செந்தமிழ் அரிமா சி.இலக்குவனார்

50 ஆம் ஆண்டு நினைவுப்போற்றல் விழா

03.09.2023 மாலை 6.00

மயிலாடுதுறைத் தமிழ்ச்சங்க அரங்கம்

சிறப்புரை:

முனைவர் துரை.குணசேகரன்
தவத்திரு சிவகோபாலகிருட்டிணன்
தவத்திரு வாய்மை இளஞ்சேரன்
பரிசு வழங்குதல்: விழாத்தலைவர் தமிழ்ச்செம்மல் ச.பவுல்ராசு
வரவேற்பரை: கு.பெரியசாமி

நன்றியுரை: மது சோ.அபர்னா
நெறியாள்கை : 

இடிமுழக்கம் வீரபாண்டியன்